رواية بين ثنايا الايام -74
خلاص بتصير البنت اللي حبيتها وتمنيتها من نصيبي
الحمد الله
بيت مشعل .. الساعه :00 مساءً
مشعل
كنت جالس مع رهف في المجلس نشوف التلفزيون .. وكانت تكلم جوال
’’ والله .. مبرووك .. اخوك خالد خطب .. وفارس بعد .. فارس للحين ماعطوهم رد .. بيعرسون جميع يعني .. خالد من اخذ .. بنت خالتك .. اهااا .. وفارس .. هنووفه ؟؟ لا تمزحين .. انتي اخترتيها له .. اهاا امك .. والله هنوفه تستاهل كل خير ومابيلقى احسن منها .. يللا الف الف مبروك .. ان شاء الله .. وانتي بعد .. على خير .. باي’’
خالد خطب ؟ احسن فكنا منه .. عساه مايتوفق ان شاء الله
اول ماقفلت رهف لفت علي وقالت : خالد خطب
ماكملت اخر حرف .. بسرعه سحبت يدها بعصبيه وقلت : واذا خطب ؟
قالت : انا .. اقولك يعني
قلت بصراخ وانا اشد على يدها : والله انتي وراك شي من هالكلام
سكتت عني وهي ميته خوف .. هزيتها وقلت : قولي يللا
قالت : مشعل تعورني
قلت : قــــــــولــــي
قالت : قسم بالله ماوراي شي
قلت بصوت عالي : ياحبيبتي انا فاهم قصدك عدل .. اذا قصدك يعني طلقني .. لو تموتين ماطلقتك .. ولو تصعدين للسما وتنزلين ماطلعتي من هالبيت
تركتها وطلعت من المجلس وانا في قمة العصبيه
طلعت وراي وقالت بصوت عالي : مشعل انت ليه تفهم على كيفك
قلت وانا ااشر على راسي : والله انا حر وافهم اللي ابيه واخلي اللي ما ابيه
قالت : اصلاً الموضوع اللي في بالك انا نسيته
صرخت عليها : لو نسيتيه كان ماجيتي قلتيلي الحين
سكت يوم شفت نايف نازل مع الدرج .. ورهف ركبت فوق على طول
قال نايف : للحين تتهاوشون ؟
سندت نفسي على سور الدرج وقلت : ما احب احد يتدخل في اموري مع زوجتي
ناظرني وقال بجديه : مشعل ماتبيها طلقها
ومر بجنبي بيروح .. مسكت يده وقلت : وليه اطلقها ؟ عشان انت تتزوجها !!
** نايف **
وش يقول مشعل ؟ اكيد انا ماسمعته زين
بلعت ريقي وسكت .. اخاف اذا تكلمت يبين من صوتي اني اكذب
سمعته يقول : اشوفك ساكت
ابتسمت وقلت : مشعل الله يهديك .. وش هالكلام اللي قلته تو
ضرب كتفي وقال : اقول .. انسى
قلت : يللا عن اذنك
قال : وين بتروح
قلت : عزيمة ابراهيم .. اللي معنا بالشركه
قال : حتى انا بروح .. مابتنتظرني
قلت : انتظرك في السياره
.
.
طول ماكنت في العزيمه .. افكر بكلام مشعل .. ليه قال لي كذا .. وش عرفه اني احب رهف .. اكيد يبي يختبرني .. وانا الحين بسرحاني اخربها .. حاولت قد ما اقدر ما اسرح ولا افكر .. عشان مايلاحظ مشعل هالشي
** رهف **
ماكنت قاصده اتهاوش مع مشعل او ازعله .. بس احس نفسي غلطانه .. ليه رحت قلت له عن خالد .. وش دخلنا فيه ؟
والحين وش اسوي ؟ اكيد الحين طلع متضايق وزعلان ولا ادري وين راح .. ومشعل غالي على قلبي مهما كان هذا ابو اللي في بطني
ايه جاتني فكره .. بفاجأه وبطبخ له .. ماعمري طبخت له شي
مسكت التلفون ودقيت على شجن بنت عمة مشعل
رد علي زوجها سلطان .. قلت : الوو السلام عليكم
قال : وعليكم السلام .. نجود ؟
قلت : لا انا رهف زوجة مشعل
قال : هلا وغلا .. لان رقمكم طالع عندي .. كيف حالكم ؟
قلت : بخير الحمد الله .. وينها شجن
قال : لحظه
شوي وجات شجن .. قالت بفرحه : هلا وغلا قلبي
قلت : هلا فيك .. اخبارك
قالت : وحشتيني .. ماتدرين وش كثر فرحني اتصالك
قلت : تسلمين يا الغاليه .. اقول شجن .. ابي تعلميني طبخه بالدجاج .. وحلى
قالت : وش طاري عليك .. قررتي تبدين في دروس الطبخ
ضحكت وقلت : يعني
قالت امسكي ورقه وقلم واكتبي
.
.
بعد ماسويت حوسه في المطبخ .. وخلصت كل شي .. رحت تلبست وانتظرت مشعل في الصاله
بعد ساعه من الانتظار دخل
وقفت وقلت : مساء الخير
قال : مساء النور
كان بيركب فوق ناديته .. لف وقال : امري ؟
قلت وانا ابتسم : انا طبخت عشا .. ماتبي تـــ..
حط يده على بطنه وقال : لا انا ونايف جايين من عزيمه .. شبعان مره .. يللا تصبحين على خير
ركب وخلاني في حالة ذهول وصدمه .. الظاهر نسى اني اول مره اطبخ ؟
وش سويت انا عشان يعاملني بهذي المعامله .. مايبي اوكي .. بس كان يقدر يقول لي بطريقه احسن من كذا
رحت المطبخ وحطيت لي من الحلا اللي سويته .. وجلست على الطاوله .. العب في الصحن بالشوكه .. وانا احس هم الدنيا كله على راسي .. والسبب مشعل .. وشوله طابخه انا ؟
دخل نايف المطبخ .. وقال : السلام عليكم
ماناظرت فيه .. اصلاً انا من قريت في دفتر اشعاره انه يحبني .. صرت ما اقدر احط عيوني في عيونه وينكتم نفسي اذا شفته .. استحي منه مره .. يا انا اطلع من هالبيت ياهو يطلع
قلت بهمس : وعليكم السلام
قال : من اللي مسوي الحلا ؟
قلت : انا .. انا اللي سويت العشا اليوم
قال بأندفاع وبصوت عالي : انتــــــي ؟؟؟
نايف **
تفاجأت مره ان رهف طابخه .. اول مره تطبخ
مستحيل افوت فرصة اني اكل من يدها .. بس بطني مليان اكلت كثير في العزيمه
لو ادري ما اكلت .. اخاف اكل الحين ومن كثر الاكل ارجعه .. وبتفهم ان طبخها ماعجبني
اخذت صحن وقلت بحماس : حطيلي
ابتسمت وقالت : ماتعشيت ؟
قلت : لا
وقفت وقالت : هات الصحن
عطيتها الصحن وحطت لي .. قلت : حطيلي اكثر شكله يجنن
جلست على الطاوله .. واكلت اول ملعقه .. مدري بصراحه هو طباخها حلو او انا لاني احبها اذوقه حلو .. لان يقولون اللي تطبخ اول مره طبخها مايطلع حلو
اكلت اللي بالصحن بسرعه .. اسوي نفسي ميت جوع .. وانا مو قادر بطني بينفجر .. برجع الاكل
وهي تناظرني متفاجأه .. خلصت ومديت لها الصحن .. وقلت : حطيلي بعد
قالت : عجبك ؟
هزيت راسي وقلت : مررره مررره .. دام انك تطبخين كذا .. ليه ماطبختي من اول
وربي لك مستقبل في الطبخ .. ماشاء الله عليك
ابتسمت بقوه وقالت : جد والله طبخي حلو
قلت : والله العظيم
حطت لي مره ثانيه وعطتني الصحن .. ناظرت في الصحن وبلعت ريقي .. وشلون راح اكل هذا كله .. لالا مااقدر برجعه .. والله انك خبل يانايف .. ليه تسوي هالحركات البايخه .. منت بمشتهي تاكل لا تاكل
حطيت الصحن على الطاوله .. واكلته كله
يوم خلصت قلت : الحمد الله .. خلاص شبعت مره .. تسلم يدك رهف
قالت : الله يسلمك
قلت : يللا حطيلي حلا
اخذت صحن ثاني وحطت لي
اكلت ملعقه وحده .. وخلاص مااقدر اكمل .. مستحيل اتحمل هالاكل كله .. بطني يعورني بينفجر
اكلت الملعقه الثانيه والثالثه .. وقمت
قالت : الظاهر ما عجبك الحلا
قلت بأنفعال وكان كلامي سريع : لا قسم بالله عجبني .. بس لان شبعت .. والا هو احلى من الحلو بعد .. ولا تخلصونه عني .. لاني بنزل بعدين وباكل .. مره مره عجبني وحتى انـ....
حسيت لنفسي اني زودتها .. هي بس قالت كلمه وانا قلت عشر
دخلت نجود وقالت : سلاموو
قلنا : وعليكم السلام
قلت : وينك مو مبينه اليوم
حطت يدها ورا ظهرها .. وقالت : اسكت بس عندي بحث .. وجالسه اسويه ’’ فتحت عيونها ’’ الله من اللي مسوي الحلا
قلت : رهوفه
سوت نفسها بتطيح وقالت : لا ما اصدق بيغمى علي .. رهف تطبخ
ضحكت وطلعت من المطبخ .. ركبت فوق وكان فيصل داق علي .. كلمته في الصاله اللي فوق تقريباً ثلث ساعه .. بعدين قفلت وشفت رهف راكبه
قالت لي : نايف نسيت محفظتك تحت .. على الطاوله
ودخلت غرفتها على طول .. حطيت يدي بجيبي كانت المحفظه موجوده
وش السالفه ؟ .. بنزل اشوف
نزلت ودخلت المطبخ .. ناظرت في الطاوله كانت عليها ورقه
عقدت حواجبي ورحت فتحتها .. كان مكتوب عليها بقلم عريض
.
.
نــــــــــا يــــــــف انــــا ادري انـــــــــك كـــــــنــــــت فـــي عــــزيـــــمــــه
وتـــــــعــــــشــــيـــــت صــح فــرحـتــنـــي ورفــــعـــــت مــــــعنـــــويــــاتي لان حـــتـــى نـــــــجــــود مــــا مــدحـــــــت طبــــــخــــــي مثـــــــــلـــــك بـــــس مـــــو زيـــــــن تــــتـــــعــــشى مرتــــــــيــــن
.
.
عضيت شفايفي وغطيت وجهي بالورقه
ياربي فشله اثاريها كافشتني
بيت العمه .. الساعه : 11:00 مساءً
** الهنوف **
’’ والله ماتتزوج الهنوف قبل حنان وانا عايشه ’’
وانا نازله من الدرج .. سمعت كلمة امي هذي
بدون ما احس قلت : وشو ؟
قالت امي : مثل ما سمعتي .. مابتتزوجين قبل اختك الكبيره .. وش فيك احسن منها عشان تتزوجين قبلها
وقفت حنان وقالت لي : يعني يا الهنوف مابتتزوجين الا اذا انا اخذت نايف
هزيت راسي وقلت : اهااا يعني انا مابتزوج طول عمري
حطت يدينها على خصرها وقالت : وليه بالله
قلت وانا ااشر على الارض : لانك لو تبوسين الارض اللي يمشي عليها
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك