رواية انا مش ورقة -6
والله بالظبط زي مريض الكبد تلاقيه بعد الغيبوبه يقعد فتره متلتزم بتعليمات الدكتور ويبعد عن اي
حاجه تزود نسبه الامونيا لكن النفس اماره بالسوء تلاقيه ينسي تعليمات الدكتور بعد فتره ويهمل
العلاج مع انه سمع والدكتور شدد عليه وقاله ان ده غلط وماينفعش
انت بقى ممكن تكون دخلت في غيبوبه الالتزام اه الحمد لله سبت المعاصي والتزمت سبت سها والافلام
والاغاني والتزمت بالصلاه وحفظ القراءن واديت العمره
وعرفت خطوره المعاصي والذنوب
لكن بعد فتره لما تفوق تدريجيا هتقول ايه ده وهتستغرب كل اللي بتعمله وترجع تاني للي كنت عليه
وتبدا تفرط شويه بشويه لحد ماتفرط في كل حاجه وتهمل كل النصايح والتوجيهات
لان زي ماقولتلك مش مدرك ايه اللي بيحصلك لانك في غيبوبه
عبدالرحمن:لا انا مش في غيبوبه انا مدرك اللي بيحصل وحسيت بحلاوه كل حاجه قولتهالي انا مكنتش عايش قبل كده
انا بحمد ربنا انه احياني تاني
انا مقدرش زي ماحضرتك قولتلي اني اعصي ربنا تاني .......مقدرش ابعد تاني اه انا خايف اقع في
المعاصي اللي كنت بعملها قبل كده وارجعلها تاني بس انا عارف اني وقتها كنت ميت زي ماحضرتك قولت كده
ازاي بعد ماربنا اعطاني كل خير وبدلني بكل معصيه كنت بعملها حلاوه تانيه خالص لا مقدرش
بعد الاغاني والافلام وتضييع الوقت التزمت بحفظ القراءن وعشت قرءان زي ماحضرتك قولتلي
والتزمت بالصيام والقيام والذكر
وبعد حبي لسها قصدي بعد ماكنت بعصي ربنا وبشرك مع حبه حب تاني ربنا مايرضاش بيه بقيت
خلاص زي ماحضرتك قلت ربنا بس اللي علي عرش قلبي
مفيش حب محرم في حياتي حب ربنا والقرب منه بئي كل حياتي
حتي الهدايا وخط الموبايل لما حضرتك طلبتهم
الحاج حسين:انا عارف كل ده يابني وفرحان بيه اوي وانت بكده بقيت من النوع الرابع الحمد لله رب العالمين والله زي ماقلتك انت ثمره حياتي عشان كده انا خايف عليك خايف انك تقع او اي حد يقضي عليك
وبالذات انهارده لما قلت انك مش هتدخل طب انا خفت اوي عليك
عبدالرحمن:ليه بس والله انا فاكر ان حضرتك هتفرح وكنت حاسس ان حضرتك هتتطلب مني الطلب ده
ليه حضرتك زعلان اوي كده وخايف عليه
الحلقة الثالثة والعشرون
الحاج حسين:انت مش عايز تدخل طب ليه
عبدالرحمن:حضرتك عارف
الحاج حسين:عشان سها
عبدالرحمن:هو ده مش سبب كافي
الحاج حسين:هو سبب بس هو انت هتدخل كليه مفهاش بنات يعني........... اه انت منزلتش الجامعه قبل كده
بس يابني فاكر العنايه المركزه اللي كلمتك عليها
عبدالرحمن:ايوه فاكر
الحاج حسين:فاكر لما قولتلك انك ممنوع من اي زيارات انت بقي لازم تخرج من العنايه دي وتستمر في الادويه والمتابعه
انت هتخرج للناس وهتتعامل معاهم بس...
عبدالرحمن:بس ايه......
الحاج حسين:انت لازم تخرج من العنايه المركزه بجهاز استقبال شغال 24 ساعه
عبدالرحمن:جهاز استقبال
الحاج حسين:اه الجهاز ده شغال 24 ساعه ترجمه صحيحه لرسايل ربنا
كل حاجه تحصلك وكل رساله توصلك لازم يبقي لها ترجمه صح ماشي
مايبقاش جهاز استقبال زي قلته
يعني مثلا لما واحد تحصله مشكله في حياته
مثلا ضيق في الرزق او فشل مثلا في دراسته او موت احد احبابه
تلاقيه قلبه اتحول للاسباب نسي اهم حاجه
يعني بدل مايدور علي السبب الاساسي تلاقيه مهتم بالفروع
يعني زي ماسها قالتلك عن وفاه محمود كده هتلاقيه كان تعبان
وتنسي اني دي رساله من ربنا بتقولها فوقي ممكن انت اللي تبقي مكانه
وتلاقي اللي عنده ضيق رزق او مشكله في دراسته هو اصلا عنده مشكله في
حياته هي اصل المشكله ممكن تلاقيه مثلا مضيع الصلاة ومضيع حق ربنا
بس هو مهتم بالفرع شايف المشكله وناسي اهم سبب للمشكله
عشان كده.......انا عايزك تكون دكتور شاطر
عبداالرحمن:هو انا هدخل طب
الحاج حسين:سيبك دلوقتي من موضوع طب
انا قصدي دكتور قلب شاطر
عندك جهاز حساس لقياس اي ضعف ولو بسيط في الالتزام
يعني اي تفريط لازم تكتشفه بدري وتعالجه
عبدالرحمن:تفريط في ايه
الحاج حسين:في اي حاجه
يعني مثلا تلاقي واحد كان ملتزم بحضور الدروس والعلم وبعد فتره تلاقيه
يكسل ويقول خلاص انا مش لاقي وقت انا ممكن اسمع في البيت
وتلاقي الاخ من دول ملتحي ومقصر وبعد فتره يبدا بالتفريط شويه بشويه
ماهو يعني الشيطان مش فجاه هيقوله احلق لحيتك وارجع للبسك القديم
الموضوع بيبتدي خطوه بخطوه زي ماربنا قال سبحان الله
بسم الله الرحمن الرحيم
يَا أَيُّهَا الَّذِينَ آمَنُوا لا تَتَّبِعُوا خُطُوَاتِ الشَّيْطَانِ وَمَنْ يَتَّبِعْ خُطُوَاتِ الشَّيْطَانِ فَإِنَّهُ يَأْمُرُ بِالْفَحْشَاءِ وَالْمُنْكَرِ وَلَوْلا فَضْلُ اللَّهِ عَلَيْكُمْ وَرَحْمَتُهُ مَا زَكَا مِنْكُمْ مِنْ أَحَدٍ أَبَداً وَلَكِنَّ اللَّهَ يُزَكِّي مَنْ يَشَاءُ وَاللَّهُ سَمِيعٌ عَلِيمٌ (21)
هيبدا يفرط ويمشي ورا الشيطان خطوه بخطوه يقول انا لبسي ده غريب بين اصحابي وشكلي غريب
مالها الهدوم الي كنت بلبسها قبل كده خلاص انا ارجع لهدومي القديمه بتاعه زمان حتي مايبقاش شكلي غريب وسط اصحابي واقرب منهم وادعيهم لربنا
انا مش عارف بدعيهم لايه وهو بيفرط اصلا وبيقع خلاص
وبعد مايطول البنطلون
الشيطان طبعا مش هيسيبه في حاله
هيبدا يقول واللحيه دي كمان لسه محسساك بالغربه قصرها شويه
وطبعا هو اول مايحط ايده عليها خلاص انسى
هتلاقيه بعد كده.....الله المستعان ربنا يثبتنا
وبنت تلاقيها بفضل الله لابسه الخمار والحجاب الشرعي
وبعد فتره تلاقيها تفرط في الحجاب شويه بشويه وتقولك الموضه بقي والكليه والناس ووو
بعد الخمار تلاقيها تلبس طرحه طويله وتلفها وتقول دي اشيك من الخمار والمسكينه مش عارفه انها خلاص فرطت وبعد فتره هتلاقيها لابسه طرحه عاديه ولبس عادي
والامور كلها تبقي عادي في عادي
عشان كده انا عايزك اول ماتحس باي ذره تفريط تلحق نفسك لانك لو سبتها هتوقعك خالص وتجيبك الارض
وبرضه المعاصي بتاعه زمان تطلع عنده وتظهر شويه بشويه
الاغاني والتلفزيون والافلام
يعني مثلا فيلم او اغنيه كان بيحبها
تلاقيها لومرت بيه تفكره بايام زمان وتلاقيه يقول ياااااااا هو انا عملت في نفسي كده ليه وتلاقيه يبدا يحن لايام زمان
وتلاقيه يقول انا هتفرج علي التلفزيون ولو جت اغنيه او اي منظر ماينفعش اشوفه هقوم او اسكت الصوت عما المشهد او الاغنيه دي تخلص
فاهم ياعبدالرحمن
عبدالرحمن:فاهم
الحاج حسين:زي ماقلتلك لازم تكون عندك مناعه ايمانيه وجهاز حساس لاي ضعف في الالتزام انا كل كلمه قولتهالك لازم تكون محفوره في قلبك وعاقلك ماشي
لازم يبقي شعار حياتك سمعنا واطعنا ماشي يابني
كل كلمه تسمعها مني لازم تنفذها
مش عايزك تمشي بمبدا سمعنا وسمعنا وسمعنا
طب والتنفيذ والطاعه امتي
لان زي ماقولتلك قبل كده الوقايه خير من العلاج
ولو حصل والاعراض ظهرت لازم تتعالج بدري
لان كل مالعلاج كان بدري كانت المضاعفات والمخاطر اقل
عبدالرحمن:ممكن توضح اكتر انا مش فاهم
محمد:كويس كويس
عبدالرحمن:هو ايه اللي كويس
محمد:انك مش فاهم عشان مايبقاش حد احسن من حد وتقعد تتريق عليه
عبدالرحمن:الله يهديك يامحمد
محمد:بركاتك ياشيخ عبده كمل كمل
عبدالرحمن:ماشي ياسيدي
الحاج حسين:بص ياحبيبي
الدكتور الشاطر اللي يحط ايده علي المرض الصح ويبدا في العلاج بدري
يعني مثلا مريض يجي للدكتور يشتيكيله عندي صداع وبسخن وبطني بتوجعني وووووو
تلاقي بقي الدكتور الخايب يقعد يعالج الاعراض يهمل اصل المرض وده طبعا هيدخل المريض في مشاكل هو في غني عنها
يعني تلاقي اصلا ان المريض عنده سرطان وهو مش حاسس هو حاسس بس بالاعراض والدكتور ماشي ورا المريض وناسي المصيبه دي
وده طبعا حالنا تلاقي قلبك بايظ وتعبان وبيشتكي بس انت ولا انت هنا
يعني قصدي اي مشكله تحصلك في حياتك دور علي الاصل ماتهتمش بالمشكله وتنسي السبب الاساسي للمشكله
يبقي اتفقنا
عبدالرحمن:علي ايه
الحاج حسين:انك تخرج من العنايه المركزه بالحاجات دي والحاجات دي لازم لها شحن مستمر
اول حاجه
مناعه ايمانيه قويه ضد المعاصي والذنوب
تاني حاجه
جهاز استقبال شغال 24 ساعه
تالت حاجه
جهاز حساس لقياس اي ضعف و لو بسيط في التزامك لان الوقايه خير من العلاج
رابع حاجه
تكون دكتور شاطر تحط ايدك علي المرض الاصلي وتبدا في العلاج بدري في اقرب فرصه
خامس حاجه
الستاره
عبدالرحمن:ايه الستاره دي وازاي اشحنهم شحن مستمر
محمد:انا مبقيتش فاهم حاجه ستاره ايه وشحن ايه وانت في طب وللا لا وهو ليه زعلان اوي كده انك مش عايز تدخل طب دا المفروض يفرح
يتبع ان شاء الله
الحلقة الرابعة والعشرون
عبدالرحمن:بص يامحمد عشان تستريح انا معاك في طب
محمد:ياراجل اخيرا ريحتنني
بص انت ياعبدالرحمن بصراحه كده انا اول يوم شوفتك فيه في الكليه وانا حاسس انك
مش عبدالرحمن اللي كنت اعرفه قبل كده وقاعد تحكيلي في كلام .....
ومش عارف بصراحه هو الكلام اللي كبير وللا انا اللي مبفهمش مش عارف...وصحيح
ايه بقي حكايه الستاره والشحن
عبدالرحمن:بص يامحمد ياحبيبي انت هتفهم وهتحس كل حاجه وهتعرف وتعيش كل كلمه قولتهالك المهم انهارده يوم الخميس
محمد::رجعنا للالغاز تاني...... يعني ايه يعني انهارده يوم الخميس .............اااااااه
فهمت قصدك يعني سهره يوم الخميس بقي وفسح يوم الخميس والذي منه
عبدالرحمن:هو ايه ده الذي منه بص يامحمد الحاج حسين بيدي كل يوم خميس درس في الجامع بعد العصر وانا عايز اعرفك عليه
محمد:بجد والله....... لا ياعم روح اسمع انت وابقي تعالي قولي..... وبعدين هو مش قطعني قبل كده لاحسن يضربني المره دي... انا انهارده عايز اتفسح واخرج من جو الكليه الكئيب ده...... روح انت ياعم الله يهديك انا خايف منه
عبدالرحمن:اسمعني بس ده هيحبك اوي والله
محمد:اسمع ايه...... انا قولت اللي عندي
عبدالرحمن:داانا هعزمك علي الفطار مع انك مش صايم بس مش مشكله الاتنين الجاي تكون صايم
محمد:هو انت هتعملي فيها الحاج حسين
عبدالرحمن:انا .......طب ياريت اكون ربع وللا حتي تمن الحاج حسين
محمد:ايوه ياعم البقال المهم انت هتفطرني ايه انهارده
عبدالرحمن:انا عارف انك علي طول همك علي بطنك تعالي الاول الدرس وبعدين نشوف موضوع الاكل ده
محمد:لا نتفق علي الاكل الاول
عبدالرحمن:هههههههه ماشي ياسيدي عايز تاكل ايه
محمد:اللي تحبه مش من اول مره كده هشرط
عبدالرحمن:ليه هو انا هعزمك كل اتنين وخميس وللا ايه
محمد:اهو كله بثوابه
عبدالرحمن:اه بس انت كفايه عليه في الكليه مش كمان اخدك البيت
محمد:ههههههههه لا ياعم وكمان هنبقي نسايب
عبدالرحمن:وماله مايضرش برضه..... المهم اتصل بيهم في البيت عشان هنروح الجامع بعد الكليه
محمد:هو ايه ده
عبدالرحمن: هو انت مابتفهمش وكمان بتنسي ومابتسمعش ......ايه ده ارحمني
محمد:يعني بلاش اهزر
عبدالرحمن:هزر بس ماتنرفزنيش
محمد:خلاص ياسيدي هاجي معاك خلاص ماتزعلش
وبعد الانتهاء من الدرس
الحاج حسين:ازيك ياعبدالرحمن وحشتني اوي ايه اخبار الكليه...... ده صاحبك محمد
عبدالرحمن:الحمد لله رب العالمين ايوه ده محمد
الحاج حسين:انت بقي محمد
محمد:في سره هو هيضربني وللا ايه ..... ربنا يستر...... ومحمد بصوت متقطع ايوه انا محمد
الحاج حسين:ازيك ياحبيبي ايه اخبارك
ويحضن الحاج حسين محمد وكأنه ابنه التاني بعد عبد الرحمن
محمد:في سره حبيبك هو انت بتحب كل الناس كده....الحمد لله انا كويس
الحاج حسين:الحمد لله يابني اتمني اشوفك هنا علي طول
محمد:كل خميس طب وووووو
الحاج حسين:ووو ايه
محمد:لا ولا حاجه ابدا
وياذن المغرب
الله اكبر الله اكبر
ويقدم عبدالرحمن التمر للحاج حسين ومحمد
محمد:ياخد عبدالرحمن علي جنب هو ده الفطار لا انا اضحك عليه انا مش هاجي تاني
عبدالرحمن:اصبر يامحمد السنه انك تفطر علي تمر وبعد الصلاه هاخدك البيت وربنا يستر ومتاكلنيش في الطريق
محمد:لا مش للدرجه دي
وبعد انتهاء الصلاه
الحاج حسين:عبدالرحمن تعالي عايز اقولك حاجه
عبدالرحمن:ايوه ياحاج حسين
الحاج حسين:بكره ان شاء الله هنروح مشوار مهم
عبدالرحمن:مشوار ايه
الحاج حسين:هتعرف بكره ان شاء الله
عبدالرحمن:هعرف بكره طب اجيب محمد معانا
الحاج حسين:لا بلاش محمد دلوقتي هستناك بكره بعد صلاه الجمعه ماتنساش
عبدالرحمن:ان شاء الله
وبعد انتهاء الصلاه وخروج محمد وعبدالرحمن من المسجد متجهين لبيت عبدالرحمن
محمد:هو الحاج حسين كان بيقولك ايه
عبدالرحمن: كان بيقولي اننا بكره هنروح مشورا مهم
محمد:مشوار ايه ده
عبدالرحمن:ياريتني اعرف كنت قولتلك
محمد:اااااااااه تاهت ولقيناها
عبدالرحمن:هي ايه دي
محمد:وبتقولي اني مابفهمش اكيد الحاج حسين هياخدك لسها
عبدالرحمن:هههههههههه سها مين انسي بقي
محمد:طب بكره تقول محمد قالي مش بعيد كمان يجيبلك الشبكه هديه ماتاخدني معاك
عبدالرحمن:لا هو قالي بلاش محمد
محمد:انا مش عارف الراجل ده ماله ومالي امال بيحبني ايه
عبدالرحمن:هو انت ماتعرفش تسكت شويه سيبني افكر
محمد:تفكر ايه احنا وصلنا البيت اهو وللا انت رجعت في كلامك
عبدالرحمن:لا ياعم ازاي
ويدخل عبدالرحمن ومحمد البيت وترحب والده عبدالرحمن بمحمد
ويدخل عبدالرحمن ومحمد الاوضه
محمد:بص انت الاتنين الجاي ان شاء الله تقولك لمامتك تعملي سمك اصلي بحبه اوي
عبدالرحمن:محمد ارحمني واسكت شويه انا قلقان من مشوار بكره ده
محمد:قلقان ايه ياعم داانا هتصل اباركلك بكره .....بكره تقول محمد قالي
المهم ايه موضوع الشحن والستاره مش هتقولي بقي
عبدالرحمن::بص ياسيدي بالنسبه للشحن ده اللي كان انهارده
محمد:ايه ده هو ده بقي الشحن
ههههههههه الشحن فراخ ياسلام والمره الجايه سمك دمك خفيف ياعبده
عبدالرحمن:محمد
محمد:نعم ياعبده
عبدالرحمن:امشي اطلع بره وماتورنيش وشك تاني
محمد:طب مش هتعزمني حتي علي الخطوبه هجيبلك هديه والله وانا جاي
عبدالرحمن:امشي امشي من وشي جبتلي الضغط
انا هتصل بباك يعملك اختبار لنسبه الذكاء
محمد:هههههههه ايوه ايوه انت عايز تطمن علي اولاد اختك
عبدالرحمن:ياااااااااارب ارحمني
يتبع ان شاء الله
الحلقة الخامسة والعشرون
يتقابل محمد وعبدالرحمن في الكليه
عبدالرحمن:السلام عليكم ورحمه الله وبركاته ازيك يامحمد ايه اخبارك
محمد:وعليكم السلام ورحمه الله وبركاته انا الحمد لله كويس انت عامل ايه
عبدالرحمن:الحمد لله رب العالمين......... صحيح انا نسيت اسالك ايه رايك في درس يوم الخميس هو ده بقي الشحن يابني
محمد:بجد هو ده الشحن اه....... ههههه وانا اللي كنت فاكره السمك والفراخ
عبدالرحمن:هههههه اه شوفت بقي
محمد:اه المهم انا عايزك تحكيلي الاول انت عملت ايه مع الحاج حسين يوم الجمعه...... فين الدبله ياعم
عبدالرحمن:دبله ايه ياعم وبتاع ايه
محمد:انت مش خطبت سها
عبدالرحمن:انا لاخطبت سها ولاغير سها وحتي يابني انا لوخطبت مش هلبس دبله لانها بدعه
محمد:بدعه
عبدالرحمن:بص ابقي دور علي الموضوع ده براحتك .......انا اللي سمعته يوم الجمعه من الحاج حسين واللي شوفته
محمد:شوفت ايه وسمعت ايه...... شوفت اللي عمرك ماشوفته ههههههههههه
عبدالرحمن:انت بتهزر والله فعلا شوفت اللي عمري ماشوفته
محمد:ليه انتوا روحتوا فين
عبدالرحمن:روحنا المقابر
محمد:ايه........ المقابر ليه كده ورحتوا تعملوا ايه
عبدالرحمن:بعد ماصلاه الجمعه انتهت
الحاج حسين:ها مستعد
عبدالرحمن:مستعد لايه
الحاج حسين:احنا هنروح نزور حد عزيز عليك بس انت فرطت في حقه
عبدالرحمن:حد عزيز وفرطت في حقه مين ده!!!
الحاج حسين:محمود
عبدالرحمن:محمود
الحاج حسين:ايوه محمود ابن خالتك
عبدالرحمن:ليه ؟!!!! لازم يعني نروح
الحاج حسين:ايوه لازم نروح وهتعرف اهميه المشوار ده هناك
عبدالرحمن:طب مانقول الكلام اللي حضرتك عايز تقوله هنا لازم يعني نروح هناك
الحاج حسين:عبدالرحمن اسمع الكلام وماتجادلش كتير
عبدالرحمن:اصل
الحاج حسين:لا اصل ولا فصل خلاص احنا هنروح يعني هنروح يلا قوم
عبدالرحمن:خلاص ماشي ربنا يستر......بس انا معرفش مكانها فين بالظبط
الحاج حسين:بسيطه اتصل بباك اسئله مهياش حجه يعني هنروح يعني هنروح حتي لو معرفناش نوصل لمقبره محمود مش مشكله
وبعد ما وصلنا للمقابر
انا مكنتش قادر ادخل وكنت متردد لدرجه اني كنت هرجع الااني لقيت الحاج حسين بيشدني وبيدخلني بالقوه
الحاج حسين:انت رايح فين هتدخل يعني هتدخل مفيش مفر
عبدالرحمن:لا مقدرش مقدرش ادخل انا عايز اروح
الحاج حسين:انا قولتلك ايه ..........مش قولت
مش عايز اسمع مقدرش بس الا في حاله واحده بس انت عارفها عايزك تقول دايما مقدرش اعصي ربنا
يلا قول ورايا دعاء دخول المقابر
السلام علـيكـم أهل الديار من المؤمنين والمسلمين وإنا إن شاء الله بكـم لاحقون نـسأل الله لنا ولكم العافية".
وبعد ماوصلنا لمقبره محمود
الحاج حسين:ها حاسس بايه دلوقتي
عبدالرحمن :حاسس بايه....... انا مش حاسس بحاجه
الحاج حسين:اول حاجه عايز اقولها لك انك لازم تشكرنعمه ربنا انه امهلك الفتره دي ممكن تكون انت اللي مكانه
عبدالرحمن:مكانه
الحاج حسين:ايوه مكانه
شوف بقي كنت هتقابل ربنا ازاي .............ها مستعد
عبدالرحمن:مستعد لايه
محمد:هو ناوي يموتك ويدفنك جمب محمود ولا ايه
عبدالرحمن:لا يامحمد هو احياني بكلامه
محمد:ايه ده ازاي
هو انتوا عملتوا ايه هناك
يتبع ان شاء الله
الحلقة السابعه والعشرون
محمد:خلاص ياعبده كمل سماح المره دي
عبدالرحمن:اما اشوف اخرتها معاك
الحاج حسين قعد يتكلم معايا لدرجه اني حسيت اني دي
اخر مره هيكلمني فيها
كل كلمه وكل حرف قاله محفور جوايا زي ماهو
قالي......... كأني سامعه دلوقتي
انا اول ماسمعته قال قفل
استغربت اوي وسالته
عبدالرحمن:قفل ايه...... وليه
الحاج حسين:القفل ده اللي لازم يكون علي قلبك مكان
ماتروح لازم يكون موجود........ القفل ده هو حياتك
عبدالرحمن:حياتي ......القفل
الحاج حسين:ايوه .......انت لو عندك شئ غالي اوي
هتسيبه كده من غير ماتحافظ عليه
عبدالرحمن:لا طبعا اكيد هخاف عليه زي عنيه
الحاج حسين:اهو انت قولت اهو بلسانك
عبدالرحمن:انا مش فاهم حاجه
الحاج حسين:بص يابني انا عايزك تجاوبني بصراحه
الاول
انت حاسس بايه دلوقتي
عبدالرحمن:حاسس اني خايف وعايز اروح
الحاج حسين:لا انا مش قصدي كده انا قصدي انت ايه
حالك دلوقتي وكان ايه حالك قبل وفاه محمود و قبل
ماتدخل الجامع
عبدالرحمن:الفرق بين حالي دلوقتي وحالي زمان
ياااااااااااه دا فرق كبير اوي
مايحسش بيه الا كل بعيد وقرب من تاني
انا كنت غريق وربنا نجاني من بحر المعاصي اللي
بيغرق كل اللي يقرب منه
انا كنت ميت قبل وفاه محمود......اه انا مكنتش عايش
والله زي ماحضرتك قولت انا لازم فعلا اشكر نعمه ربنا
اللي امهلني وانا اللي كنت بعصيه طول الفتره اللي فاتت
محمود مات خلاص وادفن ربنا يرحمه رحمه واسعه وانا
ربنا احياني من جديد
ازاي تاني ابعد عنه....... ازاي اعصيه وهو كريم اوي
ممكن كنت ابقي مكان محمود اه ممكن ليه مش ممكن
احنا الاتنين اد بعض وهو مات فجاه من غير مايكون
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك