رواية اصبعي وهو اصبعي ان غدرني اقطعه -35

رواية اصبعي وهو اصبعي ان غدرني اقطعه -35

نوف اللي ابتسمت ومسحت وجهها بالفوطه 00 ورتبت شكلها 00 افتح الباب وانصدمت فيه بوجهها 00 ولابس قميص البجامه 00 ابتسملها وبادلته الأبتسامه

مشعل – وينك تأخرتي

نوف – لا كنت في الحمام

مشعل – أجل يالله تعالي

توجهوا للمطبخ 00 وتفأجاو ان ماعلى الطاوله شي وساره حاطه كل شي في الغساله وصابه عليهم مويه

مشعل بإستغراب – وين الفطور

ساره تأشر بإستحقار – خل هاذي تسويه لك وبعدين ( مسكته مع يده ) انا وياك فطرنا خلاص

مشعل فك يده – بس انا ماافطرت زين

ساره ردت تمسك يده ثاني – مو شغلي من قالك تنادي ام السعف والليف

مشعل عصب – بدينا عاد في المشاكل هاذا وانتي تقولين انا مابسوي شي هي اللي بتسوي فك يده منها بقوه 00 وهي برطمت 00 دخلت الغرفه عقب ماعطته نظره تقتل 00 وصفقت بالباب بقوه

نوف تلطف الجو – حصل خير هالحين انا اللي بسوي الفطور

مشعل اللي جلس على الطاوله وهو يزفر صكت 00 ونوف بدت تحضر له الفطور وهي مبسوطه من داخلها 00 وأخيرا عمل لي قيمه وخاطر جميلك مابنساه يامشعل

الله يخليك لي يارب

حطت راسها على صدر صديقتها واختها وهي تبكي – انا خايفه خايفه

مي وهي تضمها – ليش تخافين حبيبتي هاذي سنة الحياه

منال ترفع وجهها وتناظر مي – مي ابوي ماله وقت من مات استعجلوا على العرس وقامت تشاهق وهي تحضن مي

مي – صدقيني يامنال انتم أكثر مابتحتاجون لخالد في هالوقت وخالد يبي يوقف جنبك ويرعاك انتي مو منال اللي نعرفها تغيرتي بالحيل حتى ناظري وجهك ذابل وعظام وجهك برزت

منال اللي تشاهق – وابوي وابوي اللي مات وهو مو راضي عني في الفتره الأخيره مقاطعته ولا أكلمه ولا اعطيه ريق حلو ( وزاد شهيقها )

مي ربتت عليها – بس بس يامنال حرام عليك لاتسوين كذا في نفسك انتي كذا تعترضين على حكم ربي وبعدين يمكن ربي أخذه يريحكم من اللي ممكن يسويه ويفضحكم

منال وهي تزيد بكى – نبيه راضين فيه وبعيوبه يامي بس وينه خليه يرد ابي اضمه واحضنه واقوله تكفى سامحني يايبه

مي – خلاص يامنال خذاه اللي اقوى مني ومنك خذاه رب العالمين ولا تعترضين على حكمه

منال – استغفرك ياربي استغفرك ويارب ابوي يسامحني يارب

مي – لاتخافين اكيد بيسامحك مافيه ابو يموت وهو زعلان على عياله مهما كان يظل ابوكم ويحبكم وأكيد سامحكم

منال رفعت وجهها وتمسحدموعها – تهقين

مي – إن شاءالله بس انتي قومي غسلي وجهك وتعالي نشوف وش باقيلك ماخذينه

منال وقفت وهي تحس راسها بينفجر – إن شاءالله

زفرت مي ووقفت بتروح تجيب لها كوب مويه تبل ريقها وتبل ريق هالمسكينه اللي صاحت لين قالت بس 00 دخلت المطبخ وهي تفتح الثلاجه 00 وطلعت المويه ومارفعت راسها من الثلاجه 00 إلا اللي في وجهها وهو يناظر فيها بصدمه 00 وهي خافت وماتدري وش تسوي 00 في النهايه جلست وخلت باب الثلاجه فاصل بينهم 00 انتبه على نفسه 00 وعرف ان هاذي اخت محمد وصديقة منال اخته 00 لام نفسه كثير 00 بس لما تذكر منظرها وهي تجلس وتتخبى بباب الثلاجه ضحك كثير

بعد مرور ثلاثة ايام

مشعل ونوف وساره رجعوا للرياض 00 ومشعل طلع يعزي حمود في وفاة والده

في الكوفي \ العصر

مشعل وحمود وخالد جالسين

مشعل – على البركه اجل يعني زواجك بعد بكره

خالد – ايه وأخيرا مابغيت

حمود بحزن – كان نفس ابوي يفرح بواحد فينا مات ولا حس بهالفرحه

مشعل ربت على كتفه – أدعله بالرحمه هاذا اللي يطلبه منكم وتصدق عنه

حمود – الله يرحمه ويغفرله

قطع جوهم الأتصال على جوال مشعل

فتح الخط – آلو مرحبا

- السلام عليكم

- وعليكم السلام

- انت مشعل

- نعم انا مشعل من معي !

- معك زياد

مشعل بإستغراب واضج – زياد من زياد

زياد – معليه إذا قابلتك خبرتك بس ممكن اشوفك

مشعل – اوكيه

زياد – فاضي هالحين

مشعل – ايه موجود في مقهى ...........

زياد – ايه عرفته مسافة الطريق واكون عندك

مشعل – اوكيه انتظرك

سكر منه

خالد – من ذا

مشعل – ماادري ماعرفته يقول اسمه زياد ويبي يشوفني

حمود بإستغراب – وش عنده

مشعل – العلم عند الله

عبدالعزيز اللي فاق من المخدر وأستعاد عافيته 00 وعبدالله اللي كان يتردد عليه ليليا من دون مافيه حد يحس عليه سوى ريهام اللي تساعده على الهروب

عبدالعزيز يناظر في عبير اللي كانت نايمه بسلام 00 ومنظره جميل جدا يريح النظر 00 ابتسم لها 00 وفزوا لما سمعوا الباب يطق 00 عبير بسرعه عدلت حجابها وابتسمت في وجهه عبدالعزيز اللي بادلها الأبتسامه

عبدالعزيز – ادخل

دخل عبدالله وهالمره ريهام معه اللي ابتسملهم عبدالعزيز

عبدالله وريهام – السلام عليكم

عبدالعزيز وعبير – وعليكم السلام

ريهام اللي اول مره تشوف عبير شمقت فيها 00 هاذي اللي تكون البديله لاأمل آآآآآآآآآه يا أمل الله يرحمك

ابتسمت عبير واقتربت تسلم عليها 00 ورحبت فيها 00 اجلست ريهام بصمت وهي تستمع لأحاديث الأخوين

عبدالعزيز – خلاص عبدالله هاذي اخر مره تجي أخاف يحسون ومعاد يستقبلونك

عبدالله ابتسم – نشوف

ابتسم عبدالعزيز في وجهه ريهام – مشكوره ريهام

ريهام اللي بلعت ريقها – العفو عيادة المريض واجبه والحمدالله على سلامتك

عبدالعزيز – الله يسلمك

ريهام بنبره أليمه – هاذي زوجتك

توتر عبدالعزيز وتوترت عبير لما عرفتها 00 وسكت عبدالله

عبدالعزيز – ايه عبير

ريهام ناظرت فيها وسكتت وهي تحس بالمراره والألم 00 صدق انكم يالريجيل خونه

عبير تلطف الجو – تشربون شي

ريهام اللي وقفت – لا انا بروح عبدالله تروح معي

عبدالله وقف – اكيد يالله اسمحولنا

عبدالعزيز – لاتجي عبدالله انا اللي بزورك قريب

عبدالله ابتسم وهز راسه وطلع

طلعوا وتنفست عبير الصعداء – مسكينه

ناظر فيها عبدالعزيز وهي مسكت فمها على الغلطه الموجعه فعلا

اما عند ريهام من طلعت وهي تبكي وتخفي دموعها عن عبدالله اللي منتبهه لدموعها وصاكت عنها 00 ركبوا في السياره وماقدرت وانفجرت تبكي وهي شاده على وجهها بيدينها

مسك كتفه 00 ولف راسه يناظر – انت زياد

زياد – ايه بس ممكن نتكلم على إنفراد

وقف مشعل – اوكيه ,, ( ناظر في حمود وخالد ) عن إذنكم

حمود وخالد وقفوا – حنا بنطلع اصلا اجلسوا في الطاوله

جلسوا في الطاوله وهم مركزين في عيون بعض وزياد نزل راسه – ابي اتكلم معك ولاتقاطعني وعارف انك ماتعرفني بس الأكيد اني اعرفك زين واعرف اهلك

قطب مشعل حواجبه

زياد بحزن – انا متأكد انك عقب مابتسمعني بتتمنى انك ماشفتني ويمكن تتفل على وجهي بس بقولك ان الله عاقبني با أقوى عقاب وبا أقوى مرض

استغرب مشعل اكثر واكثر – وش وراك انت

زياد – اسمي زياد تخرجت من جامعة الملك سعود قبل شهور وانا كنت احلم بالبعثه بس للاسف معدلي مو مناسب واحوال اهلي الماديه مو زينه 00 وحلمي بدأ يتلاشى ويضيع إلين الله ارسلي الانسانه اللي بتنقذني من هاذا كله 00 كنت اظن ان هي منقذتني بس هي السبب الأول في اللي يصيرلي الله لايسامحها لدنيا ولا آخره 00 المهم تعرفت عليها وكان منصب ابوها عالي مره هاذا اللي قالته لي بس توقعتها تكذب 00 إلين قالت لي الصدمه وأنلجمت يوم عرفت ان ابوها وزير في الدوله

شك مشعل في الأمر وصكت يشوف وش وراه

زياد يكمل – للاسف كنت الوسيله في انتقامها المؤذي جدا لحياة إنسانه مسكينه وفي يوم من الأيام اتفقت انا وهي ووحده من صحابتها ( يقصد دينا ) انا نؤذي هالانسانه ونخرب مستقبلها ونخرب حياتها مع زوجها

مشعل اللي ابتسم بسخريه – ايوه كمل

زياد بخجل وندم موجع – في ذاك اليوم غرقت جوال ذيك المسكينه برسائل وإتصالات عشان نوقعها في شباك التهمه في أنها تعرف حد غير زوجها

مشعل اللي فاهم لكل شي عرف السالفه وانتظر يسمع وش يقول – ايوه

زياد بلكلكه وهو يرد عقله للماضي وكأن ذيك الأحداث تحدث امام عيونه – و اا اا اا كل ل م تها قدام زوجها

مشعل بعصبيه – وهالزوج المغفل انا

زياد اللي خاف من عصبيته - ا ي و وو وه

مشعل اللي ضرب على الطاوله – كل هالمسلسل ياللي ماتخافون الله تسوونه في إنسانه بريئه مالها ذنب

زياد برجاء – الله يخليك اسمعني ساره عشمتني بالفلوس والبعثه اللي دهورتني وجلبت لي الأيدز الأيدز الأيدز انا مريض فيه الله يخليك سامحني وخل ذيك تسامحني ان كانت لين هالحين زوجتك

مشعل وقف وضرب على الطاوله وقرب وجهه له – الله عاقبك با أقوى عقوبه وما أبي ألوث يدي فيك والله لايوفقك لادنيا ولا آخره وقريب إن شاء الله اسمع خبر وفاتك ( وراح وخلاه ) بسرعه طيران توجهه على فلته 00 دور عليها مالقاها طلع جواله وهو يكتم غيضه ودق عليها

ردت عليها – هلا ميشو

مشعل اللي ماسك غيضه – وينك في انتي

ساره اللي ماانتبهت لنبرة صوته – عند اهلك في القصر

مشعل صكر في وجهها وركض 00 ومايشوف قدامه إلا منظر ضربه الدامي لنوف المسكينه اللي ظلمها وظلم نفسه قبلها

دخل القصر وشاف الكل متجمعين بما فيهم عمته 00 قرب لساره ومسكها مع شعرها وعطاها كف 00 خلى الكل يشهق من الصفعه

مشعل ركض لها – يالكلبه يالحقيره ياللي ماتخافين الله ولا .....

دلال اللي عصبت وصرخت عليه – هيه انت كيف تضربها قدامنا

انت انهبلت

مشعل – بنتك الصايعه الضايعه اللي ماعرفتني تربينها اللي اتهمت نوف ظلم وزور هي السبب في اللي صار لها هي اللي كذبت عليها وتبلتها هي هالكلبه (ويأشر عليها بإستحقار 00 وساره طايحه في الأرض ومنصدمه ) وهي اللي حرضت واحد عشان يخرب حياة نوف هي هي هـــــــــــــــــي

بدريه والكل مسكوا افواهم وهم مستغربين 00 بينما نوف كانت غايبه عن هالجلسه وهي فوق 00 سمعت الصراخ وركضت لهم تعدي الدرجات وهي مصدومه من اشكالهم ومن الهواشات

دلال - انطم بنتي اشرف من الشرف نفسه

مشعل اللي صرخ في وجهها ووجهه محمر ومحتقن - تخسين وتخسي بنتك اللي فرقتني عن بنت عمي وزوجتي اللي بكون سعيد معها لو هي مادخلت حياتي

دلال بصدمه للجميع وهي تصرخ – كذاااااااااااااااااااب هاذي مو بنت عمك ( وتأشر على نوف ) هااااااااااااااااااااااذي موبنت صـــــــــــــالح مو بنت صالــــــــح اخوي مو بنته مو بنته ( وهي تلطم رأسها وتصرخ )

الجميع شهقوا 00 ونوف اتجبصت في مكانها 00 والعيون تحولت على نوف اللي ماترمش

دلال جلست وهي تبكي وتصرخ – اخوي قبل مايسافر الأمارات 00سوى حادث وتضرر الحوض عنده كثير 00وانا الوحيده اللي خبرني الدكتور انه مابيقدر ينجب ابد 00خبيت السالفه عنه وعن امي وعن سالم اخوي 00وانا اللي تحملت هالحزن لوحدي 00ونوف دموعها تنزل وهي ماترمش 00 معقوله مااكون انا بنت صالح 00 معقوله مااكون بنته

دلال تصرخ وتلطم رأسها وتكمل – عقب هالحادث قال لامي بسافر 00ماابي اقعد بسبب المشاكل اللي تصيرله مع سالم 00سافر وانا اكتم في صدري السر اللي مابحته لحد ابد00 خفت مابغيت اخبر امي واصدمها بتبكي ويمكن تنهار وسالم اخوي اللي مكان يطيقه وخفت يعايره بهالسر00 بس الصدمه الأكبر لي لما دق وبشرنا بحمل مرته 00ارتجفت لانه اكيد تلعب عليه 00كرهتها وحقدت عليها وحمل هالسر اصبح ثقيل في صدري 00وامي ماتدري اللي كانت مبسوطه في حمل مرة صالح اللي تحبه 00وكل ماشفت فرحها زدت بكى اكثر 00وخبيت السر اكثر واكثر 00لين دق علينا بعد فتره وقال زوجته جابت بنت 00هنا انا مسكت امي اللي كانت بتسافر له عشان تتطمن على بنت مو بنتنا 00مو بنتنا00 موبنتنا

نوف اللي دموعها تنزل بدون صوت عطتهم ظهرها وطلعت للغرفه وهي مو مصدقه اللي يصير فيها فجأه تكتشف انها مو بنت صالح 00 انسدحت على السرير وتلملمت على نفسها وهي تبكي بوجع 00 انا مو بنت صالح مو بنته اجل من أكون من أكون مين أنا ميـــــــــــــــــــــــــــــــن ( وهي تصرخ بهالكلمه )

.

.

( الفصل السادس والثلاثين )

ربت على كتفها 00 وهي تزيد شهقاتها 00

عبدالله – خلاص لاتبكين

ريهام – مو متخيله حد يكون في مكان امل عند اخوك

عبدالله – هاذي سنة الحياه

ريهام – بس امل كانت هايمه فيه مجنونه فيه كثير ولو كانت عايشه مستحيل تعرف حد غيره

عبدالله – وحتى عبدالعزيز تأكدي انه يحبها ويحبها كثير بس ابوي وامي غصبوه على الزواج مو مستحيل يعيشون ولا يشوفون عياله يبغون يفرحون فيه

ريهام – ايه بس عاد مو كذا هي مالها مده طويله من ماتت

عبدالله – بس خلاص ياريهام الحي ابقى من الميت وصدقيني عبدالعزيز ماله يد في وفاة امل مهما كان

ريهام اسكتت وهي بين فتره وفتره تشاهق 00 امل كانت لها كل شي في الحياه كفايه انها رافضه هالحياه عشانها 00 وتظاهرت بالجنون وصرفت اموالها عشان تقعد مع بشر مجانين 00 ومع مدمنين 00 لان حياتهم على الأقل اخف بكثير عليها من حياه مع بشر صاحين وماتشوف وجه امل فيهم

خيوط الفجر بدت تتسلسل على شباك غرفتها 00 وهي في وسط هالغرفه تصيح وتبكي 00 رفضت تشوف أي حد 00 اندق الباب عليها أكثر من مره 00 بس كيف تقابل ناس مو ناسها 00 وأهل مو أهلها 00 وعائله مو عائلتها 00 لازم تكلم خالها لازم تتأكد منه لازم 00 هو الوحيد بس اللي يعرف بقصتها 00ماان اصبح الصبح حتى دقت على جواله وهي تبكي 00 وماسكه شهقاتها ودموعها

رد عليها وهو مستغرب إتصالها اللي طول لين جاه – هلا والله ببنت أختي هلا باللي مودره خالها ولاتنشد عنه

نوف اكتمت شهقاتها – هلا خالي ,, سامحني ياخالي ( وش اقول لك 00 سامحني على ضعفي 00 ولا على غبائي 00 ولا على إيش وإيش 00 هل معقوله أكون بنت صالح اللي عشقته وحبيته وياما أفتخرت اني اكون بنته )

ردني صوت خالي – بنتي وين سرتي

دموعي صبت وانا اكتم عبرتي – خالي وحشتني بالحيل ,, متى بشوفك

خالي – يابنتي قولي لريلك ييبك عندنا حشى مكن لج خال وهل هني

هزيت رأسي وكأنه ينظرني – خالي ( وخفت وش اقول له 00 وش اقول )

خالي – لبيه يابنتي

انا بخوف – ابوي هو ابوي ؟؟

خالي مافهم – كيف يعني

انا بتعب من اللي صارلي وماعرفت اثمن كلامي – يعني انا بنته

انصدم خالي وبان التساؤل في صوته – اكيد ابوك ليش تسألين

انهرت 00 وانا أتذكر عمتي 00 لالا خلاص هي مو بعمتي 00 لما سمعتني اللي قالته 00 اللي طعنتني فيه – يعني انا بنته

حزن خالي لحالي وعصب – انتي يابنتي شكلك قمتي تألفين من راسك أكيد بنته يعني من بتكونين

انا بصدمه له – بس عمتي تقول غير هالكلام

اليوم 00 هو يوم خروج عبدالعزيز من المستشفى 00 وعبدالله مابيطول وبنرد كلنا مع بعض 00 عبدالله اتصل في عبدالعزيز وبشره 00 يعني قريب برد للسعوديه واخيرا 00 مليت من امريكا 00 سمعت صوت عبدالعزيز – امل

ألتفت له بسرعه بس هو ماحس انه غلط في الكلمه – عطيني ملابسي

مادري ليه حسيت نار تحرقني من جوه 00 ياربي كيف أغار من إنسانه ميته

وقفت وجبت ملابسه له – تفضل

عبدالعزيز – مشكوره

حسيت ابلل على خدي 00 حطيت اصابعي 00 وشفت دمعتي نازله 00 لا كل هاذي غيره كل هاذا حب له 00 كيف حبيته بهالصوره كيف

سألني وهو مشغول في لبسه للقميص – نمتي زين البارح

أنا وانا ألملم دموعي – ايه الحمدالله

عبدالعزيز وهو يلبس البنطلون 00 لفيت راسي عنه وانا أحس الخجل أكل وجهي

سمعته يئن 00 لفيت عليه 00 شفته وقف 00 مسكت يده – لاتتعب عمرك إذا ماتقدر تقوم وتمشي بجيب العربيه

هو بتعب – لا مو مشكله بس مكان العمليه يعورني

انا وامسك يده زين – اوكيه استند على يدي زين

هو ومغمض عيونه – طيب

مشيت معه 00 وأحسه يتألم بين فتره وفتره 00 ناظرت فيه – يوم ماتقدر تمشي ليش أصريت على الخروج

هو بألم – لاني مااقدر اجلس واخلي عبدالله كل يوم هارب من المركز عشان يجيني

يالله كبر هالانسان في عيني 00 يقدم مصلحة غيره عن مصلحته 00 سكت وانا اتألم لألمه 00 مسكين الله يشفيه

خالي بعصبيه – كذب كذابه عمتج قاعده تخرف عليج وعلى هلج هاذي بالله شو هاي عمه هاي

بلعت ريقي من عصبية خالي

شفته زفر وهدئ – فعلا ابوج كان مايقدر ينجب

انصدمت 00 يعني صدق موبنته 00 سالت دموعي

بس فجأني خالي لما قال – وبذل الغالي والرخيص عشان يجيب من امج لو طفل واحد بس في يوم زار البلاد دكتور بريطاني متخصص في الأنجاب 00 ورحت ويا ابوج وامج له 00 وقال ابوج بس يحتاج حق عمليه صغيره عشان يستطيع ينجب 00 خبينا عن هله مشكلته 00 ورمسني مااخبر حد ابد 00 خايف ان سالم اخوه ذاك الوقت يعايره ويتمسخر عليه 00 وامه تنغث عليه وبعد فتره بسيطه حملت أمج منه ( وعصب خالي ) وعندي الاوراق اللي تثبت كلامي وصحته أوراق ابوج مازلت محتفظ فيها 00 وموعد عمليته وكل شي عندي

أنفرجت اساريري 00 وانشرح قلبي 00 ما أبالغ لو تركت السماعه ورحت اسجد سجود شكر 00 رديت للجوال سمعت خالي يقول – سمعي يانوف لاتخلين حد يهز ثقتج في نفسج او في ابوج انتي بنت صالح واللي يقول غير كذا غلطان انا بدز لج الاوراق على الفاكس خلي الكل يشوفها وانا بييج باجر ان الله عطاني عمر وعمتج هاذي بعرف شغلي وياها بس كم رقم فاكس البيت

انا – مااعرف خالي بس اكيد الخادمات يعرفون بسألهم وأرد ادق عليك

خالي – لا انا بدق عليج سيري بس ييبي الرقم وانا بجهز الأوراق

سكرت من خالي وانا بطير من الوناسه 00 ماأبالغ لوقلت هاذا أسعد يوم في عمري 00 والله هالشي نساني فرحتي في برائتي 00 بس ماعليه من أثبت اني بنت صالح لهم 00 مافيه حد بيحط عينه في عيني 00 ولا وربي انصرني بالبراءه يعني مافيه حد له عندي شي 00 بس اللي قاهرني اني ماشفت مشعل ابد يالله يمكن هو من اللي طق علي باب الغرفه امس 00 وانا رافضه افتحله 00 ايه ايه ( لعبت على عمري بهالكلمتين ) واخذت الرقم من وحده من الخدمات لانهم يرسلون اوراق على ديرهم وهالفاكس يعرفون رقمه 00 دق علي خالي واعطيته الرقم 00 دز علي الأوراق 00 وياما ضحكت وانا استلمهم 00 مبسوطه والله العظيم مبسوطه 00 عارفين يوم حد يغرق 00 وخلاص شاف الموت بعينه 00 وحس فيه حد جاي من قارب بعيد وأنتشله من هالعذاب 00 هاذي انا وهاذا خالي الله يخليك لي ياخالي 00 وااااااااااااي حدي مستانسه انه بكره بيزورني 00 صعدت لجناحي وانا اتأمل الأوراق اللي تثبت ان ابوي تعالج 00 من وطت رجلي الجناح حتى سمعت التلفون يدق 00 ركضت له وانا حاسه عمري بطير 00 اليوم انا غير وأحساسي غير 00 تذكرت كلمات لشاعر معروف 00 اليوم انا غير احساسي غير ومدري وش يقول فيه 00 بس خطيره ذيك القصيده 00 رفعت السماعه والضحكه شاقه وجهي – آلو

سمعت ضحكة سخريه وشماته في نفس الوقت انتي لين هالحين قاعده صدق لين قالوا لصقة عنزروت ,, يالله ضفي قشك واطلعي عن بيت خالي لاتلوثينه يابنت الشوارع

ضحكت بسخريه وتكلمت بنفس لهجتها – والله عاد البيت بيتي ( وعشان أكسحها اكثر واكثر ) وبيت زوجي حبيبي و ......

قاطعتني بحقاره وهي تضحك – والله حاله مصدقه بيت زوجها قال زوجها قال هيه اصحي اصحي انتي لانتي من لحمنا ولا دمنا سلعه مغشوشه والحمدالله أمي كشفت غشك انتي وامك يالحقيرات ومشعل قالي انه بيطلقك قريب لانك بنت شوارع وش يبي فيك و

قاطعتها وانا اصرخ – انطمي انطمي انا بنت صالح ( وقهرتها يوم قلت ) وعندي الأوراق اللي تثبت ومشعل بيعرف كذبة امك وبيطلقك انتي يالصايعه يالضايعه

ضحكت ضحكه قويه وبسخريه – عاد تدرين اول مره ارحمك صراحه حبيبتي مشعل حبيبي توه كان نايم عندي وسهرت انا وإياه سهره معتبره وأحتفلنا انك منتي منا وهو قالي بالحرف الواحد انه بيطلقك اليوم بس هو رحمك امس وايه صح عشان اثبتلك انه كان نايم عندي يوم بيجي بتلاحظين قلم في جيبه الأمامي طبعا امس اهديتله هالهديه ومحفور فيه حرفي وحرفه

تجمدت إلا انصعقت 00 وسكرت السماعه على وجهها 00يعني خدعني 00 يعني عشمني في الحب وخلاني احبه 00 يعني لعب علي 00 يعني ضحك علي 00 يعني صرت مطنزه لهم 00 وانا لما شك اني اكلم موتني ضرب وطق 00 وهي لما اكتشف الحقيقه نايم عندها ويخطط علي 00 نزلت دمعتي بمراره للي اتذوقه

والحشرجه اللي بحلقي تؤلمني 00 عشاني يتيمه يستغل يتمي 00 يضربني ويهيني ويشتمني وكنت مستانسه عليه ومبسوطه ولعبت على عمري وحبيته 00 سمعت الباب ينطق ومسحت دموعي ومثل المسبهه فتحته عشان أنصدم باللي كان عند الباب صدمة عمري

يعني خلاص بتروح

عبدالله وهو يأكل بهدوء ويبتسم لها – بعد أسبوع تقريبا المختصين قالوا لي لو استمريت على العلاج الأسبوع الجاي بتتحسن حالتك الحمدالله وبودعكم

بدون ماتقصد – وانا

ناظر فيها 00 وهي حاولت تصرف – اقصد اا انا بعد ودي اطلع طفشت من المركز بس من اطلع منه بطلع برى امريكا يمكن اروح اعيش في اسبانيا خوال امي هناك

ناظر فيها بتمعن – وليش بتطلعين لاسبانيا ليش مابتمين هنا

هي وتناظر صحنها وتحرك الملعقه بملل – ماابي اعيش في مكان عشت فيه مع امل والقى هالمكان هالحين خالي بدونها امل كل شي في حياتي ياعبدالله

عبدالله صدمها – وليش ماترجعين لديرتك وهلك في السعوديه

ريهام – لا ماابي ارد ثقافه وبيئه وعادات وتقاليد كل شي غير وبعدين ماابي اشوف حد من هل ابوي لانهم خدعوه

عبدالله قطب حواجبه – كيف اخدعوه

ريهام وقفت – قصه اسمحلي ما احب اقولها لاني اكره سماعها ,, تسمحلي بروح غرفتي

عبدالله – خذي راحتك

راحت 00 وهو يناظر فيها 00 وش هي قصتك ياريهام 00 ابغي اعرفها 00 معقوله فيه حد مايبي يشوف هله وديرته

وقف وهو حاس بوخزة حزن من فراقه لها لانسانه اللي تعلم أشياء كثيره منها

ماأن افتحت الباب إلا انصدمت باللي قدامها 00 ونوف بالكاد ماسكه دمعتها- خير

ناظرت فيها بإنكسار – ابي اتكلم معك

نوف – مابينا كلام مستقبلي وضيعتوه والبيت وبتاخذونه واخوك وزوجتيه بنت عمتك وصاحبتك معاد عندي شي ( صرخت وهي تجر هدومها ) مافيه شي باقي تأخذونه مني

انصدمت دنيا بحالتها – نوف ا

نوف قاطعتها وهي تبكي – مارحمتوا يتمي وضعفي كلكم كنتوا علي ماوقف في وجهه الكل غير امك وريم اما الباقين كانوا يخدعوني يخدعوني ( وانهارت على ركبها

دنيا انصدمت وجلست جنبها – نوف الله يخليك سامحيني انا اخطيت مو بحقك انتي وبس حتى في حق نفسي انتي بنت عمي ومن لحمي ودمي حتى لو قالوا الجميع غير كذا كل هاذا كذب وانا مو مصدقه حد انتي طلعتي الطيبه فينا

نوف وهي منهاره وترد شعرها لورى بقوه – بدري بدري تصدقوني انا مستحيل اتم في هالبيت دقيقه وحده ( لفت لها ) اخوك خدعني اخذ كل حجه زينه فيني مستحيل اسامحه مستحيل وحوبتي مابتتعداكم انتم كسرتوني كسرتوني

دنيا بكت معها – نوف انتي شكلك منهاره انا ا

نوف قاطعتها – انا اكرهكم اكرهكم ( وقفت وناظرت فيها ) إذا متفقه مع صديقتك على خدعه ثانيه انا خلاص بتركلكم الساحه وبغادر خذيتوا كل شي مني مابقالي شي خلاص تاخذونه وقوليلها الله يهنيك معه

دنيا وقفت وضمتها وبكت – والله العظيم اني ندمانه قد شعر راسي وربي عاقبني

سامحيني يانوف سامحيني

نوف فكت عمرها منها وهي تمسح دموعها وتقوي نفسها – انتي خدعتيني مره وصدقتك والمؤمن مايلدغ من جحر مرتين ( وعطتها ظهرها ) اطلعي برى ماابغى اشوفك

دنيا بدموع – بس انا

نوف قاطعتها – اطلعي برى دنيا ماابي اسمع شي

دنيا لفت ظهرها بحزن وطلعت 00 ونوف سكرت الباب بقوه 00 وركضت لشنطتها تجمع الأغراض اللي بس جت فيها 00 ماتبي شي من ناس وعالم خدعوها 00 وهي تشهق بألم 00 ليش تصير نهايتي كذا ليش ليش 00 حبيته عقب كل اللي سواه لي وانخدعت وحبيته 00 يقوم يسوي فيني كل هاذا 00 معقوله تكون تلعب علي 00 ومشعل منام عندها 00 لما يجي بتأكد 00 سمعت باب الجناح انفتح 00 سكرت سحاب الشنطه ورحت اشوفه 00 ووقفت متفأجاه من شوفه 00 والطعنه اللي ماحسبت حسابها مابردها

ترتجف والخوف ذابحها 00 ضحكت مي – اللي يشوفك بيقول هاذي بيودونها للمسلخ

منال بخوف – اسكتي لااضربك بالشنطه اللي عندي

مي – يالله صباح خير عشان اليوم عرسك ترتجفين مثل الورقه وتبين تضربيني وفري ضربك لمسيو خالد بيه

منال بخوف – مي والله موفاضيه لمزحك حدي خايفه ياربي وش اسوي

( وقعدت تبكي ) 00 ناظرت فيها مي وانصدمت – انتي وش فيك انهبلتي

منال – تخيلي اليوم عرسي وامي وابوي مو معي

مي حزنت لحالها – دخيلك لاتبكين وتبكيني معك وهاذي سنة الحياه وخالد بيعوضك إن شاءالله

منال ضمت مي وبكت على حضنها – خايفه كثير يامي خايفه

مي ضربتها على كتفها بمزح – اها وينهي منال خفيفة الدم طويلة اللسان

منال انصدمت ورفعت وجهها 00 ومي خافت من صدمتها 00 اخذت منال المخده وضربت مي على الراس 00 ومي انصدمت 00 وجلسن يضحكن 00 ويتمنن نوف معهن بس هي قالت لهن بتحضر الليله العرس عشان خاطر صديقتها

اقتربت منه 00 وعينها مركزه على شي معين فيه 00 وهو منصدم من شكلها وشكل وجهها 00 مو هي اللي يعرفها 00 طلعت القلم اللي في جيبه وتمعنت فيه زين 00 ناظرت فيه بألف معنى ومعنى 00 وهو مركز في عيونها بصمت

نوف بهدؤ عكس البراكين اللي جواها تطبخ – تتوقع اني مو بنت عمك صح أكيد متأكد اني بنت شوارع مستحيل اكون بنت عمك صالح

وهو يناظرها بصمت وعينه مركزه في عينها اللي تحمل قوه غريبه

نوف تكمل وبنفس الهدؤ – تصدق عاد انا بعد اظن اني بنت شوارع

رفع حاجبه وهو بنفس الصمت

نوف وبنفس الهدؤ – خساره البيت اللي كتبته لي ام صالح وسالم مسكينه ماتت ماتدري اني مو بنت صالح

وهو بنفس الصمت المطبق 00 اللي يشوفه يقول بلع لسانه

نوف وتكمل – وخساره بعد فيني الزوج اللي عندي حسب نسب ولد عيله وناس وجميل ووسيم ومريوش بعد ( تتكلم وهي مستغربه صمته العميق ونظراته فيها )

تصدق عاد اني مستخسرتك فيني 00 وخساره خساره انت فيني 00 وتستاهل تقضي ليله حلوه وجميله ومعتبره مع بنت الحسب والنسب اما انا دخيله عليك وانغصبت فيها لا وفي النهايه اطلع بنت شوارع 00 حتى لو كانت بنت الحسب والنسب خدعتك وخدعتني 00 او عفوا عفوا اشيل انها خدعتك ( ودموعها تنزل) لانك قضيت عندها ليله حلوه وأكيد انك سامحتها ( ناظرت في بطنها بحزن ودموعها تصب على خدودها 00 وهي مقهوره انها نزلت )

رفعت عينها له – تدري اني أكثر شي حزينه على هاذا ( تأشر على بطنها ) طفل وانخدع بالدنيا لان أمه ضعيفه وضعيفه مره وماتستاهل تكون امه ولا حتى تكون انت ابوه 00 لاني مادافعت عن حقوقه من البدايه 00 وللأسف رضيت ان الكل يقول عنه ولد حرام ومو منك بيجي على الدنيا وأمه مظلومه لان بس اخت صالح قالت ان امه موبنت صالح

مسحت دموعها وبلعت ريقها – مشعل انا من البدايه المفروض مااكون معك لان مكاني هنا غلط بينكم

مشعل ساكت ومسند ظهره على الجدار وعينه فيها

رفعت القلم في وجهه اللي كان بيدها طول الوقت – وهاذا أكبر دليل على ضعفي

وعلى اني مجرد امعه في المكان اللي تحطني فيه تلقاني فيه مالي دور ابد ومسكينه ماوراي ظهر يحميني ( صرخت في وجهه ) تدري ليه لاني بنت يتيمه ابوي وامي ماتوا وخلوني ( ناظرت فيه ) ايه لاتمط عيونك امي وابوي ميتين انا مو من الشارع انا بنت صالح اللي حتى هالشي بتحرموني منه لان اسهل شي عندكم الكذب والخداع والنفاق والزور انا بنته بنته ومن صلب صلبه بعد ( مدت له الأوراق ) خذ هاك اقرأ ( مشعل قعد يناظر فيهم ويقرأ ) شوف دّور تلاقي مدخل لكذبه جديده تألفونها على راسي من جديد

مشعل رفع عينه عن الأوراق – نوف انا

نوف قاطعته وهي تصرخ عليه – بــــــــــــــــــــس دخيلك اسكت ماابي اسمع صوتك لانه يقرفني يقرفني يقرفني

مط عيونه وبحلق فيها – انا جنيت على نفسي بنفسي وهالمسلسل او هالروايه اللي ألفتوها مستحيل تتم تدري ليه ( تمعنت فيه ) لانك بطلقني وهالحين بعد ولاتخاف بترك لكم المكان باللي فيه لاني ماأستاهله تدري من اللي يستاهله

( رفعت القلم في وجهه ) صاحب الكذب والخداع واللي نفسه طويل طويل مره

واللي يعرف يمحور الأمور لصالحه ( حذفت القلم في الارض

( ناظرت فيه ) - مشعل انت مستحيل تحبني ومستحيل تحترمني ومستحيل انا نكمل مع بعض لان لاأنا أنفعلك ولا أنت تنفعلي وان كان فيك ذرة رجوله تطلقني

مشعل – نوف انا متأكد ان فيـ

نوف بصراخ – قلت لك بـــــــــــــــــــس لاتتكلم الكلمه اللي ابي اسمعها منك هي طالق اما غير هالكلمه ماابي اسمع شي لانك تقرفني تقرفني يامشعل تقرفني

مشعل عصب – مستحيل اطلقك وبتسمعيني للأخير

ركضت عنه 00 ودخلت غرفة الملابس 00 لبست عبايتها وشالت شنطه اللي ماتسمى شنطه لانها ماطلعت غير باللي دخلت فيه هالبيت الجلابيات والقمصان فقط 00 ( ناظر فيها بخوف ) – وين رايحه

نوف وهي تناظر فيه – انت غدرتني يامشعل غدرتني عشمتني باأنك ممكن تحبني في ألمانيا بس انخدعت فيك بالرياض واصبعي وهو إصبعي إذا غدرني باقطعه

طلعت من الغرفه وهو مصدوم من هالكلمتين اللي قالتهم 00 وقف برهه وهو يناظر بالفراغ اللي كانت واقفه فيه 00 ماتوقع ان نوف ممكن تتركه لان مالها أحد ابد بعد فتره طويله شوي 00 وعقب ماتقبل اللي صار 00 ركض وراها وهو يعض أصابع الندم

نوف اللي نزلت وهي كاتمه دموعها 00 وبدريه ودنيا وريم واقفين في الصاله لان دنيا خبرتهم انها بتطلع

بدريه بحزن – نوف يمه نوف مدت يدها بمعنى اسكتي 00 ناظرت في البيت وفيهم وابتسمت واطلعت 00 وقفت تاكسي 00 وركبت معه 00 وهي تشهق بصمت

نزل مع الدرج وهو يركض وناظر فيهم – وين راحت

بدريه وريم ودنيا اللي يبكون قالوله طلعت 00 ركض وراها وركب سيارته 00 وطلع باأسرع ماعنده وهو يدور عليها 00 بس للأسف هو طلع با أتجاه ونوف با أتجاه بعيد جدا عن هالأتجاه

دنيا وهي تبكي – يمه انا ظلمت نوف من البدايه مستحيل اسامح نفسي مستحيل

وركضت فوق وهي منهاره

ريم اللي تبكي – يارب مشعل لحق عليها

بدريه – اركضي دقي عليه يمه بسرعه واسأليه

دقت عليه بس مارد عليها 00 اصلا هو مو بحال جوال ابد

ريم – خالتي مارد علي

بدريه حزينه – ربي سترك ودخيلك تحفظهم يارب

دور عليها دور وهو يدمع بقهر 00 ضيعها من أيده يوم قدر يوصلها وحست في حبه ضاعت من ايده 00 وين يلقاها وين وين تكون راحت 00 نوف دخيلك لاتتركيني والله العظيم احبك والله العظيم احبك بس لاتتركيني لاتتركيني

.

.

وصلت البيت المنشود 00 ناظرت في البيت اللي جنبه ودمعت بحزن 00 طقت الباب 00 وسمعت صوت حرمه كبيره من وراه – من عند الباب

نوف بإنهيار – انا انا نوف بنت صالح حفيدة أم سالم وصالح

انفتح الباب بسرعه وضمتها العجوز – من نوف وين رحتي يابنيتي لعاد تنشدين عني ولا عاد شفت لتس أثر سألت عليتس عربان واجد وقالوا مايعرفون وين قصر عمك

نوف بكت في حظنها وهي تستنشق ريحة جدتها في هالعجوز ام سعود 00 دخلتها ام سعود داخل البيت – انتي علامتس تبكين يابنيتي

نوف بإنهيار – انا أبي اتطلق من مشعل ابي الطلاق ابيه ( وضمت ام سعود وبكت على حضنها )

دخلوا الغرفه وهو حاس بألم و كاتم ألمه علشان عبير 00 حطته على السرير وهي تزين المفرش له – ارتاح ارتاح ياعبد العزيز

يتبع ,,,,

👇👇👇

تعديل المقال