رواية نهاية حبك اعدامي -146
طلعت فاطمه من الصاله رايحه المطبخ تجيب ماي لزوجها .. سلمان كان واقف عند باب المطبخ يراقب فاطمه .. تنهد ونزل راسه راح الصاله .. سلم عليهم وريما ركضت ناحيته وحضنته .. شلها سلمان وباسها .. قعد جنب الجوهره وريما في حضنه ..
سلمان: شخباركم ؟
الجوهره: الحمدلله ..
يوسف: وينك ما تبين يا خالي ..
سلمان: لاهي مع هالشغل والمحل ..
يوسف: يعطيك العافيه ..
دخلت فاطمه بكل هدوء .. سلمت وعطت يوسف الماي وقعدت جنبه .. خذت لولو من عند الجوهره وتمت تلاعبها بحنان ..
الجوهره: يلا يوسف نبي نشوف عيالك ..
فاطمه رفعت راسها وابتسمت للجوهره ..
يوسف: الله كريم .. ريما شاسمي بنتي ؟
ريما: اكيد ريما ..
يوسف: وع من زين اسمج ..
ريما: بابا شوفه .. يقول اسمي مب حلو
سلمان: ههههه .. ما عليج منه انتي اسمج احلى من اسمه ..
يوسف: يسمح امرك .. انا اسمي حلو وشكلي احلى بعد ..
الجوهره: يا مغرور ..
يوسف: يحق لي اغتر .. من حسن يوسف خذت اوصاف الجمال .. حد ينكر هالشي ..
سلمان والجوهره وفاطمه ضحكوا على كلام يوسف ..
الجوهره تلعوز اخوها: فديتك اخوي صج مزيون بس مو حلو ..
يوسف: ها خالي شرايك فيني ؟
سلمان: همممم .. اول لازم استشير بنتي ..
الكل: هههههه
سلمان: ما عليك زود ..
يوسف: احم احم .. زين زوجتي العزيزه قولي لي رايج فيني ..
فاطمه حست باحراج: ما عليك زود ..
يوسف: 2 1 .. لو سمحتي اختي لقطي ويهج ..
الكل: ههههههه ..
الجوهره: خالك يجاملك .. و زوجتك العزيزه ترفع معنوياتك .. معليه اخوي حاول تستحمل شكلك ..
كلهم ضحكوا على كلام الجوهره ..
يوسف: لا وصرتي تعرفين تقطعين بعد ..
سلمان: والله وكبرتي يا جوجو ..
الجوهره: صج والله .. اونكم قطعتوني ..
يوسف: آخ صادتنا والله ..
سلمان: لا ابراهيم دربج عدل ..
الجوهره: هههههه ..
فاطمه: لا صج قطعوج .. ضحكت وحطت يدها على حلجها ..
سلمان شاف حركتها وتم يطالعها .. نزل راسه بسرعه وقام من مكانه ..
الجوهره: وين خالي ؟
سلمان: بروح ادخن ..
طلع سلمان فالحوش و ولع له زقاره .. طلع وراه يوسف ..
يوسف: عسى ماشر خالي ؟
سلمان ينفخ الدخان: مافيني شي ..
يوسف: ما نشوفك وايد .. ودوم مشغول والا تشغل نفسك .. عسى ماشر ..
سلمان مبتسم: ماشر ..
يوسف: صج انك بتروح المكسيك وبتستقر هناك ؟
سلمان التفت على يوسف: شدراك ؟
يوسف: بنتك تقول انها سمعتك تكلم صاحبك ..
سلمان: اي بستقر هناك خلاص ..
يوسف: ليش خالي ؟
سلمان: لقيت لي فرصة عمل حلوه .. و بحول تجارتي لهناك ..
يوسف: قرارك غريب يا خالي ..
سلمان: احسن لي ولريما ..
يوسف: شدخل ريما ؟
سلمان: تكون قريبه من خالتها ..
يوسف: واحنا وين رحنا ؟
سلمان: فيكم الخير والبركه .. بس الظروف جات جي ..
يوسف: فكرت فالموضوع عدل يا خالي ؟
سلمان: اي فكرت فيه عدل .. والحين قاعد ارتب اموري واخلص اوراقي ..
يوسف كان مستغرب من كلام سلمان و قراره الغريب .. سلمان طفى زقارته ودخلوا الصاله عند الحريم .. فاطمه والجوهره جهزوا للعشى وتعشوا كلهم وكملوا سهرتهم سوالف وضحك ..
الساعه 10 سلمان غطى ريما عدل .. باسها ومسح على راسها .. سكر باب غرفتها وراح غرفته .. قعد على الكرسي وشغل التفزيون .. تم يتابع المباره وهو يفكر في كلامه مع يوسف ..
سلمان " انا آسف يا يوسف .. انا آسف يا عيال اختي .. اللي بيصير غصبن عني مو بيدي .. ادري خذلتكم بقراري بس ماقدر اشوف فاطمه جدامي .. اتعذب لي شفتها .. سامحوني سامحوني " .. تم يتابع المباره وباله مشغول .. ما قدر ينام من كثر التفكير ..
يوم جديد بصباحه وشمسه وعبق زهوره يطل على ابطالنا .. فارس فتح عيونه بتفائل .. قام من السرير بكل نشاط خذ له شور منعش .. لبس ثوبه وضبط غترته .. تدهن بدهن العود وتعطر وطلع من بيته رايح المكتب .. دخل وكانت الساعه 8 ونص .. مر على مكتب خالد وسلم عليه .. راح مكتبه وابتدى شغله بكل نشاط وحيويه ..
يوسف كان نايم ومستانس على دفى الفراش .. فاطمه قامت من الصبح وجهزت له الفطور .. جهزت ثوبه وغترته وبخرتهم له .. راحت عند سريره تقعده من النوم ..
فاطمه بهمس: يوسف .. حبيبي .. حبيبي .. حطت يدها على راسه وتمت تلعب بشعره ..
يوسف: هممم ..
فاطمه: يلا حبيبي قوم الساعه 6 وربع ..
يوسف: خليني انام 5 دقايق بس ..
فاطمه ابتسمت: يلا قوم فديت روحك .. قوم عشان تتسبح ..
يوسف فتح عيونه بتكاسل: زين ..
فاطمه شلت اللحاف عنه شوي شوي ..
فاطمه: يلا حبيبي قوم ..
يوسف: ان شاءالله ..
قعد على السرير وتمدد فارد يدينه فالهوا .. فاطمه طلعت من الغرفه ترتب له الطاوله وصبت له العصير .. يوسف قام وخذ له شور منعش نشطه بعد النوم .. لبس ثوبه وطلع الصاله ..
فاطمه مبتسمه: صباح الخير حبيبي ..
يوسف مبتسم: صباح الحب ..
فاطمه: صح النوم ..
يوسف: صح بدنج .. ها شمسوية لنا .. شهالريحه الحلوه ؟
فاطمه: اقرب فديت روحك ..
قعد على الطاوله .. شرب العصير وفاطمه قربت من الاكل وصبت له الشاي الاحمر .. يوسف تريق وفاطمه معاه ..
يوسف: الساعه كم اول محاضره ؟
فاطمه: الساعه 8 ..
يوسف: متى تبين تطلعين من هني ؟
فاطمه الساعه 7 ..
يوسف: زين انا باوصلج ..
فاطمه: لا فديتك مو مشكله .. انت روح الدوام وانا باتصل في دريولنا يوصلني ..
يوسف: حياتي ما راح اتأخر ..
فاطمه: زين حبيبي .. عيل خل اقوم اجهز ..
يوسف طالعها مبتسم وتم يشرب الشاي .. فاطمه لبست وتجهزت وراحت عند يوسف ..
فاطمه: انا جهزت حبيبي ..
يوسف: جيبي غترتي فديت قلبج ..
فاطمه: ان شاءالله ..
جابت له الغتره ضبطها وطلعوا مع بعض .. وصلها الجامعه وراح الشغل .. فاطمه تلاقت باختها ولطيفه .. سلموا على بعض وتمت كل وحده فيهم تسولف عن حياتها ..
لطيفه: والله دنيا .. كبرنا ..
الكل: ههههه ..
فاطمه: انتوا تشوفون نفسكم كبرتوا مشكلتكم .. انا توني صغيره ..
مريم: ههههه .. بقولكم شي ..
لطيفه: قولي يالجميله انتي ..
مريم بخجل: انا حامل ..
فاطمه صرخت: واااااو ..
لطيفه بوناسه: الف مبروك مريوم ..
فاطمه حضنت اختها: مبروك مرايم ..
مريم: الله يبارك فيكم ..
فاطمه: قلتي حق خالد ؟
مريم: لا للحين .. امس اتصلت لي الدكتوره تأكد لي ..
لطيفه: سويها مفاجأه له ..
مريم: اي هاي اللي بسويه ..
فاطمه: فديتج يا مريوم .. تستاهلين .. وبتصيرين ام ..
مريم: انا مو مصدقه والله ..
لطيفه: يعني انا اللي مصدقه ..
الكل: ههههه ..
لطيفه: عقبالج يا فطيم ..
مريم: عندي احساس ان فطيم كله بتجيب اولاد ..
فاطمه: هههه .. انا ماتفرق معاي .. بس احس انتاجج انتي وخالد بيطلع احلى انتاج ..
لطيفه: صدقت فطيم والله ..
مريم بخجل: والله .. الحمدلله على كل حال ..
فاطمه: لا انتي ولا خالد عليكم زود في الجمال ..
لطيفه: انا اشهد ..
مريم: فديتكم والله ..
لطيفه: بسألكم ..
فاطمه و هي تفتح شنطتها: هلا ..
لطيفه: مناف وينها؟ لها مالها حس هاليومين ..
مريم: لاحظت عليها فالفتره الاخيره دوم تعبانه..
لطيفه: انا بعد .. اشوفها دوم شارده وتفكر .. وما تاكل يادوب تشرب كوفي معانا بس ..
فاطمه عقدت حواجبها: اتصلتوا لها ؟
مريم: والله ماتصلت لها ..
لطيفه: ولا انا ..
فاطمه: خل اتصل لها ..
مريم: تسوين خير .. نبي نتطمن عليها ..
لطيفه: لها وحشه ..
اتصلت فاطمه حق مناف .. تم التلفون يرن فتره ومحد رد ..
فاطمه: ما ترد ..
لطيفه: ليكون فيها شي البنت ..
مريم: خوفتوني عليها والله ..
فاطمه: ان شاءالله ما عليها شر .. يمكن تعبانه .. بطرش لها مسج ..
فاطمه طرشت مسج لمناف .. البنات كل وحده منهم توجهت لمحاضرتها .. مريم ولطيفه كانوا في محاضره وحده .. اما فاطمه فكانت محاضرتها غير عنهم ..
الساعه 11 مناف قعدت من النوم وشافت 2 مس كول ومسج .. المس كول الاول كان من فارس .. والثاني من فاطمه .. فتحت الرساله اللي من فاطمه .. وكانت كاتبه لها المسج كالتالي ..
(( صباح الخير مناف .. وينج وحشتينا حبيبتي ؟ عسى المانع خير ليش ما شفناج اليوم ؟ لو فضيتي اتصلي لي ))
مناف قرت المسج وابتسمت ..
مناف " فديتهم والله .. فيهم الخير يسألون عني .. جزاهم الله خير " ..
اتصلت بفارس تبي تسمع صوته بشوق .. رن جواله بالنغمه المخصصه لها ( عالي مستواه ) .. رد بكل فرح ..
فارس: يا قلبه انتي ..
مناف عضت شفتها: هلا حبيبي ..
فارس: صح النوم للحلوين ..
مناف بدلع: فديت قلبك ..
فارس: عمري انتي ..
مناف: متى قعدت من النوم حبيبي ؟
فارس: الساعه 8 تقريبا ..
مناف: اوه قاعد من وقت ..
فارس: اي عيل مثلج انتي يالكسوله ..
مناف: هههههه ..
فارس: فديت هالضحكه الحلوه ..
مناف انحرجت وسكتت ..
فارس: كلتي شي حبيبتي ؟
مناف: لا ..
فارس: ليش يا قلبه ؟
مناف: توني قاعده من النوم حبيبي .. بعد شوي باروح عند امي وباكل ..
فارس: عاد اكلي زين ..
مناف: ان شاءالله ..
فارس: زين يا قلبه انا مشغول الحين .. انتي قومي تنشطي شوي .. وتريقي وباكلمج وانا طالع من المكتب ..
مناف: زين حبيبي ..
فارس: احبج ..
مناف: اموت فيك ..
فارس: ديري بالج على نفسج ..
مناف: ان شاءالله ..
فارس: يلا سلام ..
مناف: الله وياك ..
سكر فارس منها وكمل شغله .. اما مناف كانت مبسوطه وايد .. خذت لها شور وراحت عند امها عشان تتريق ..
مناف: صباح الخير يمه ..
ام مناف مبتسمه: هلا والله .. شلونج اليوم ؟
مناف: احسن الحمدلله ..
ام مناف: الحمدلله .. تعالي اكلي لج لقمه يمه ..
مناف: ان شاءالله .. شمسويه يمه ؟
ام مناف: مسويه لج بيض مقلي .. وحطيت لج الجبن اللي تحبينه .. وهذا هو التوست اللي تحبينه بعد .. بس باقوم اسوي لج الحليب ..
مناف: مشكوره يمه ..
ام مناف: بالعافيه يمه ..
ام مناف قربت صينية الاكل من بنتها .. وراحت تسوي لها الحليب .. مناف اتصلت بفاطمه وهي تاكل ..
مناف: السلام عليكم ..
فاطمه: وعليكم السلامه والرحمه .. هلا وغلا ..
مناف: شلونكم ؟
فاطمه: وينج يالقاطعه ؟
مناف: ههههه .. موجوده بس تعبانه شوي ..
فاطمه: سلامتج عسى ماشر حبيبتي ؟
مناف: ماشر حبيبتي .. بس كنت مرهقه شوي فالفتره الاخيره ..
فاطمه: تدرين البنات يقولون انهم لاحظوا عليج هالشي .. شو فيج مناف ؟ عندج مشاكل انتي ؟
مناف: لا ماعندي مشاكل الحمدلله .. انتي اخبارج بعد العرس ؟
فاطمه مبتسمه: الحمدلله .. مستناسه
مناف: الله يبارج لج وفيج ..
فاطمه: تسلمين حبيبتي .. وياج .. عيل بنشوفج بكره ان شاءالله ؟
مناف: ماعتقد .. تعبانه والدكتوره ما عطتني اجازه ..
فاطمه بحنان: ما تشوفين شر حبيبتي ..
مناف: الشر ما يجيج ..
فاطمه: زين حبوبه ما طول عليج .. بخليج ترتاحين .. حبيت اتطمن عليج .. والبنات بعد بس والله لج وحشه ..
مناف: ان شاءالله الاسبوع الجاي نتشاوف ..
فاطمه: بأذن الله ..
مناف: مشكوره على السؤال حبيبتي ..
فاطمه: انتي منا وفينا يا مناف ..
مناف: تسلمين حبيبتي ..
فاطمه: يلا حبيبتي مع السلامه ..
مناف: مع السلامه ..
سكت مناف من فاطمه والتفت على امها وهي مبتسمه ..
مناف: يمه هاي فاطمه اللي رحنا عرسها ..
ام مناف مبتسمه: حليلها والله .. فيها الخير
مناف: ما توقعت اتصالها .. والله هي اكثر وحده واصلتني ..
ام مناف: الله يستر عليها ويبارك لها ..
مناف: آمين ..
ام مناف: والفال لج يا بنتي .. يا علني اشوفج عروس قبل ما تغمض عيوني ..
مناف: عسى عمرج طويل يالغاليه ..
ام مناف: فديتج والله .. يلا يمه شربي الحليب قبل لا يبرد ..
مناف مبتسمه: ان شاءلله ..
مناف تريقت وبعدين قعدت مع امها تسولف ..
الجده وبوفارس وبومحمد كانوا قاعدين يسولفون عن موضوع فارس ..
بومحمد: ولدك يعرفها يا محمد ؟
بوفارس: لا ما يعرفها ..
بومحمد: شو اللي مخليك متأكد ؟
بوفارس رفع حاجب: ولدي واعرفه .. ولو كان يعرفها خير يعني ؟
بومحمد: شو هالكلام يا محمد ..
بوفارس: يا يبه الحب مب حرام .. ليش مسوين سالفه انتوا .. وبعدين هاذي قراره هو يتحمل نتيجة اختياره ..
بومحمد: بس انت تهدم حياة ولدك ..
بوفارس: شلون ؟
بومحمد: داري ان اللي يسويه غلط .. وتماشيه ومخليه على راحته .. ولي طاح الفاس فالراس بتتحسف انت و ولدك .. شذنب ولدك ولا بنت الناس لو ما اتفقوا بعد الزواج ؟
بوفارس: اعتقد انهم بيتحملون كل شي يجيهم من هالقرار ..
بومحمد: والله تفكيرك وايد متحرر يا محمد .. يبه وين عايشين احنا ..
بوفارس: لا عيل تبيني اجبر عيالي ياخذون على مزاجنا .. جي بنزيد الطين بله .. لما هم يقررون وتبدى نتايج قرارقتهم تظهر جدامهم .. بيعرفون يتصرفون ويحافظون على حياتهم .. يسايرون الزمن ..
بومحمد: شو يسايرون الزمن ؟ محمد ولدي اختار ساره بنفسه وطلبنا نخطبها له .. والحين انفصل عنها ..
بوفارس: والله ماعرف شو في قلب ولدك .. بس هو يتحمل نتيجة قراره ..
بومحمد: الله يهديك يا محمد ..
الجده: الحين خلونا من هذرتكم اللي ضعت فيها ..
حمد ومحمد: هههههه ..
الجده: لا تضحكون لاكسر هالدلال على روسكم ..
بوفارس: امي وايد عصبيه ..
بومحمد: مثل ابوي .. ما راحت بعيد ..
الجده: بسكم يا عيال .. زين قولوا لي الحين شو سويتوا معاه ؟
بوفارس: ما سوينا شي ..
الجده: مرتك هاذي يبيلها من يسنعها ..
بوفارس: الله يهديها ..
بومحمد: صج الحين شو بتسون ؟
بوفارس: والله ما يندرى عن فارس .. كل ما احاول اكلمه يتهرب مني .. والحرب مشتعله بينه وبن امه ..
الجده: اتصل بولدك خله يجي الحين ..
بوفارس: الحين ماعتقد القاه .. اكيد فالشركه ..
الجده: طلعه لي من تحت الارض ..
بوفارس مبتسم: ان شاءالله ..
بومحمد: شو ناويه تسوين ؟
الجده: انا بروح اخطبها له ..
بومحمد: والله قويه يمه ..
الجده: بشوف آخرتها مع مزنه اللي راكبه راسها ومعانده ..
بوفارس: لا يا يمه صبري شوي .. لا تستعجلين ..
الجده: زين اتصل له قوله يجي .. وبعدين بتفاهم معاكم ..
بوفارس: ان شاءالله ..
دخلت عليهم هيا مبتسمه وسلمت عليهم ..
بومحمد: هلا والله ..
هيا مبتسمه: شلونك فديت روحك ؟
بومحمد: الحمدلله .. اعلومج انتي ؟
هيا: طيبه .. التفتت على بوفارس .. شلونك محمد فديتك ؟
بوفارس: طيبه الله يسلمج الغاليه .. اعلومج انتي ؟
هيا: الحمدلله .. مع هالدنيا ..
بوفارس: يعطيج العافيه ..
هيا: الله يعافيك .. ها حليتوا قضية فارس ؟
بومحمد: امي ناويه على نيه والله يستر منها ..
هيا: ها يمه شو اللي ناويه عليه ؟
الجده: بروح اخطب حق ولد ولدي ..
هيا: من بتاخذين له ؟ بنت العز اللي تكلمه بالتلفون ؟
بوفارس رفع راسه وعطى هيا نظره خلاها تتحسف على الكلام اللي قالته .. هيا من الاحراج نزلت راسها وانحرجت
الجده: كبري يالعاقله .. تراها بنت ناس حالها حالج ..
بومحمد حس ان الجو كان مشحون .. فحب يلطف الجو شوي ..
بومحمد: هيا تعالي معاي شوي ..
هيا: ان شاءالله ..
طلعت هيا ورا اخوها .. وراحوا الصاله الثانيه ..
بومحمد: الله يهدج .. هاي كلام تقولينه ..
هيا متنرفزه: لان اللي يصير مب عدل ..
بومحمد: انا مب معارض على زواج فارس ولد محمد .. وماشوف ان سبب رفضكم لها مقنع ..
هيا: بس يا حمد الولد يكلمها بالتلفون .. وين قاعدين احنا ..
بومحمد: انا رايي مثلج .. بس قلبي متطمن ناحية فارس .. واحس ان هاي الوحيده اللي بتسعده ..
هيا: يبه خلوا عنكم كلام الافلام والقصص ..
بومحمد: وانتوا خلوا عنكم التعالي والتكبر على الناس ..
هيا: احنا مب متكبرين ..
بومحمد: وكلامج الحين شو تسمينه .. تقولين لاخوج الكبير بنت العز اللي يكلمها على التلفون .. يبه انتي جرحتيه مهما كان ترا فارس غالي عند محمد .. تعرفين غلاه عند محمد اخوي .. وحتى مزنه تموت في فارس .. بس الله يهديها مكبره الموضوع ..
....................
هيا: والله من حقها .. تبي الزين لولدها ..
بومحمد: انتوا شلون تفكرون ؟ البنت بنت ناس حالها حال بناتنا ..
هيا: مكرمين بناتنا عنها ..
بومحمد بعصبيه: عيب هالكلام يا هيا .. ما توقعت هاي نظرتج للناس يا متعلمه انتي ..
هيا بتعالي: والله احنا وين وهالبنت وين .. لو ولد اخوك ركب راسه وخذها .. انا وحده مب حاضره عرسه ولا ببارك له ..
بومحمد بغضب: السالفه جي .. زين انا بوريكم كلكم ..
هيا هزت راسها: ورينا يا خوي ..
بومحمد طلع عنها من غير ما يرد عليها .. كان منصدم من ردة فعل اخته على الموضوع ..
بومحمد " هيا الحنونه اللي الكل يلجأ لها لو عنده مشكله تقول هالكلام .. شو صاير فالدنيا ؟ الله يهديهم بس " ..
دخل الصاله عند امه واخوه ..
بومحمد: كلمت ولدك ؟
يتبع ,,,
👇👇👇

اللهم لك الحمد حتى ترضى وإذا رضيت وبعد الرضى ,,, اضف تعليقك