بارت من

رواية نهاية حبك اعدامي -147

رواية نهاية حبك اعدامي - غرام

رواية نهاية حبك اعدامي -147

هيا: والله من حقها .. تبي الزين لولدها ..
بومحمد: انتوا شلون تفكرون ؟ البنت بنت ناس حالها حال بناتنا ..
هيا: مكرمين بناتنا عنها ..
بومحمد بعصبيه: عيب هالكلام يا هيا .. ما توقعت هاي نظرتج للناس يا متعلمه انتي ..
هيا بتعالي: والله احنا وين وهالبنت وين .. لو ولد اخوك ركب راسه وخذها .. انا وحده مب حاضره عرسه ولا ببارك له ..
بومحمد بغضب: السالفه جي .. زين انا بوريكم كلكم ..
هيا هزت راسها: ورينا يا خوي ..
بومحمد طلع عنها من غير ما يرد عليها .. كان منصدم من ردة فعل اخته على الموضوع ..
بومحمد " هيا الحنونه اللي الكل يلجأ لها لو عنده مشكله تقول هالكلام .. شو صاير فالدنيا ؟ الله يهديهم بس " ..
دخل الصاله عند امه واخوه ..
بومحمد: كلمت ولدك ؟
بوفارس: اي الحين جاي ..
بومحمد: يمه انا اللي بوصلج بيت البنت لي رحتي تخطبينها حق فارس ..
الجده وبوفارس طالعوا بعض ..
الجده: سبحان مغير الاحوال ..
بومحمد: انا فكري ما تغير .. واللي في بالي مقتنع فيه .. بس فارس يستاهل كل خير ..
بوفارس مبتسم: ينشد فيك الظهر يا ولد سلطان ..
الجده شافت الفرحه فعيون عيالها وصاحت .. قرب منها بوفارس ..
بوفارس: ليش هالدموع يمه ؟
الجده: يعلني دوم اشوفكم على قلب واحد .. الله لا يفرق بينكم ..
بومحمد وبوفارس: آمين ..
بومحمد حضن امه: الله يطول بعمرج يالغاليه ..
الجده: الله لا يحرمني منكم ..
دخل فارس وشاف يدته وهي تمسح دموعها .. خاف وقرب منها بسرعه ..
فارس: عسى ماشر يدتي ؟
الجده: مافيني شي فديت قلبك .. تعال عندي ..
فارس باس راسها: انا كلي تحت امرج ..
الجده: يا عل عيني ما تبكيك ..
فارس ابتسم وباس يدته مره ثانيه ..
بوفارس: زين يا جماعه ابغي اقولكم شي ..
الجده: قول ابوي انته ..
بوفارس: هالكلام انا قلته لفارس من قبل .. بس بقوله لكم انتوا ..
بومحمد: خوفتنا تكلم ..
بوفارس ابتسم: زين سمعوا .. يمه تذكرين فاطمه ..
الجده باستغراب: فاطمه ؟ من فاطمه ؟؟
بوفارس: فاطمه اللي كانت مالج عليها من قبل ..
الجده: اي اخبرها الله يذكرها بالخير ..
بوفارس: بعد ما طلقتها .. تمت تقريبا 5 او 6 سنين لين تزوجت ..
الجده وبومحمد: زين ..
بوفارس: انا تزوجت مزنه بعد 7 شهور صح ..
الجده: اي ..
بومحمد: كمل ..
بوفارس: فاطمه تزوجت واحد على قد حاله وعاشت معاه تقريبا 15 سنه ومات ..
الجده: لا حول ولا قوة الا بالله ..
بومحمد: الله يرحمه ..
بوفارس: جابت منه بنت الحين بنتها مره عمرها تقريبا 20 سنه .. قد فطيم بنتي ..
فارس " يعني ابوي كان يحب ام مناف ؟؟ مسمي فطيم عليها ويموت فيها بعد ؟ همممممم " ..
بوفارس يكمل: وعندها 3 اولاد .. واحد عمره 12 سنه .. والثاني 8 سنين .. واللي عمره 4 سنين مات من سنه تقريبا ..

الجده: يالله .. مسكينه شقت وايد في حياتها .. الله يصبرها ..

بومحمد: انا لله وانا اليه راجعون ..
بوفارس: وحالتها هي وعيالها الحين ماتسر .. زوجها كان يشتغل في شركه خاصه .. وبعد ما توفى ما مشى لعياله لا راتب ولا شي .. حالتهم كسيفه وايد .. سكت ونزل راسه ..
الجده: ما تستاهل هالبدره والله ..
فارس: شلون بدره يدتي ؟
الجده: فاطمه كانوا يتغنون بجمالها ..
بومحمد: انا اشهد .. كانت بنت مافي بحلاها ..
فارس: زين ليش طلقتها يبه ؟
بوفارس: هي طلبت ..
فارس: ليش ؟
بوفارس: تدري لين يومك ماعرف السبب ..
الجده: ولاحد يعرف ..
بوفارس: الحين هي لها حياتها وانا لي حياتي ..
بومحمد: زين بسألك يا محمد ..
بوفارس: هلا تفضل ..
بومحمد: ليش طريت فاطمه .. وش ذكرك فيها ؟
بوفارس: ان شاءالله قريب بتعرفون ..
فارس: يبه امي كانت تعرف انك كنت مالج عليها ؟
بوفارس: اي تعرف .. بس ماتعرف من تكون ..
فارس: اهااا .. " واله انك داهيه يا بوفارس .. مب هين والله " ..
بومحمد: شو هالواري اخوي .. قولنا ؟
بوفارس مبتسم: كل شي بوقته حلو ..
الجده: زين ما علينا من هالسوالف الحين .. يالمتوت قولي وين بيت البنت ؟
فارس مبتسم: انا متوت ؟؟
الجده: لا تشغل علي الحين ..
فارس وابوه وعمه: هههههههه ..
فارس: ان شاءلله .. آمريني الغاليه ..
الجده: وين بيت هالبنت ؟
فارس: همممم .. بعيد عن بيوتنا ..
الجده: اسمعني يبه .. بكره تروح وتكلم امك مره ثانيه .. وتجيني وتقولي شو ردها زين ..
فارس: هممم .. ليش ؟
الجده: سو اللي اقولك عليه وبس ..
فارس: ان شاءالله .. بس ليش سألتي عن بيت البنت ؟
الجده: لا تسأل وايد .. الصبر زين ..
فارس: ان شاءالله ..
بوفارس: يلا يا جماعه انا استأذن ..
الجده: وين يبه ؟
بوفارس: عندي شغل ..
الجده: اقعد تعشى معانا ..
بوفارس: عليكم بالعافيه .. باتعشى فالبيت ..
الجده: على راحتك ..
بوفارس سلم عليهم وطلع .. الجده وبومحمد تموا يسولفون شوي ..
فارس: وين عميمه ؟
الجده لوت بوزها: فوق ..
بومحمد يغير الموضوع: وين عشاكم يمه ؟
الجده: اتصل في ابوك شوف وينه هالهايت ..
بومحمد: ان شاءالله ..
اتصل بومحمد بأبوه اللي كان هايت مع عبدالعزيز ..
بومحمد: هلا يبه ..
الجد: شو تبي ..
بومحمد: كله يزف ..
الجد: شو ؟
بومحمد: انت وين يبه ؟
الجد: وش لك فيني ؟
بومحمد: يبه امي تسأل عنك ..
الجد " يالله بالستر ": قولها الحين جاي ..
بومحمد"شي والله يخاف من امي ": زين ننتظرك نبي نتعشى ..
الجد: ان شاءالله ..
سكر بومحمد من ابوه والتفت على امه وفارس اللي كانوا يهمسون مع بعض ..
بومحمد: شو توسوسون ؟
فارس مبتسم: يدتي تسولف عن عزيز ويدي ..
بومحمد: هههههه .. الحين بيجي وساحب عزيز معاه ..
الجده: انا خابرتهم هالثنين ..
فارس: يدتي ..
الجده: ابويه انته ..
فارس: يدي توه شباب ..
الجده تقاطعه: شباب يكسرون ظهرك ..
بومحمد وفارس: هههههه ..
الجده: يوز عن سوالفك انت بعد ..
فارس: ما قلت شي فديتني ..
الجده: ويتفدى عمره .. من زين ويهك يالمتوت ..
فارس: بدينا بالغلط ..
بومحمد: اشتغلتوا الحين ..
الجده: هو اللي بدى .. بس اوريك فيه ..
فارس ويدته وعمه تموا يسولفون بوناسه ويضحكون .. دخل عليهم الجد وعبدالعزيز وراه .. اول ما شافتهم الجده
الجده: انتوا ما وراكم خير ..
الجد بهمس: بل هاذي محد يطيح بلسانها ..
عبدالعزيز: قايلك بنزلك وبروح تقولي انزل احسن ..
الجد: هي لا شافتنا مع بعض على طول تشك ..
عبدالعزيز: علم عمرك .. تقولي انا هالكلام ليش ..
الجده: وش عليه تتهامسون انتوا الثنين ..
الجد وعبدالعزيز: ولا شي ..
فارس وعمه طالعوا بعض وضحكوا عليهم: ههههههه
الجد: تتشمتون .. لنا الله ..
عبدالعزيز: اي والله .. لنا الله ..
الجد: وين عشاكم ؟
الجده: عزوز قم ناد عمتك قولها تجهز ..
عبدالعزيز: ان شاءالله ..
راح عبدالعزيز ينادي عمته وبومحمد كان متوتر .. خايف من المواجه بين هيا وفارس .. لان فارس ما يدري بموقف عمته .. هيا دخلت عليهم .. طاحت عينها على فارس اللي كان مشغول بجواله .. طلعت وراحت المطبخ تجهز للعشى .. بعد ما خلصت نادتهم .. كلهم دخلوا المطعم وقعدوا على السفره .. فارس كان آخر واحد .. شاف عمته وراح صوبها مبتسم عشان يسلم عليها .. هيا صدت عنه وقطت عليه كلام جرحه ..
فارس مبتسم: هلا عميمه ..
هيا: بنت العز اللي تكلمها بالتلفون بتفرقنا ..
طالعته بنظره حقد .. فارس ابتسامته البريئه تحولت الى دموع تجمعت بعيونه .. وقف مكانه ولا تحرك .. الكل التفت على فارس بعد ما سمعوا كلام هيا .. عبدالعزيز ما عجبته الحركه من عمته .. حس بجرح اخوه .. وقف جنب فارس وحط يده على كتفه وابتسم ..
عبدالعزيز: بقولك بونايف .. ما عندها اخت تزوجني اياها .. فكره حلوه ترا .. اخوان ماخذين خوات ..
موقف عبدالعزيز هدى فارس شوي ..

فارس مسك اخوه من يده وبكل هدوء طلع من المطعم ..

الجده: حسبي الله ونعم الوكيل .. ولحقت فارس واخوه ..
بومحمد: هاي كلام ينقال يا هيا ..
الجد: انتي ما تستحين على ويهج ..
هيا بعصبيه: دافعوا عنه .. محد بينزل راسنا الارض الا هو مع هالتعبانه اللي بياخذها .. فضحنا ..
الجد: قومي روحي دارج ولا عاد اشوف ويهج ..
هيا طلعت من المطعم وهي معصبه .. فارس وعبدالعزيز طلعوا من بيت جدهم وكل واحد فيهم شايل في خاطره من اللي صار .. الجده ما لحقت عليهم .. كل منهم ركب سيارته وطلعوا بسرعه من البيت .. قعدت الجده على الارض وهي تبكي فارس ..
الجده: يا حسرتي على هالولد يا ناس ..
بومحمد بحزن: قومي يمه الله يهديج ..
الجده: هاذي اختك بكسر راسها .. حسبي الله ونعم الوكيل .. نقصت على الولد ..
بومحمد: قومي يمه نروح داخل .. لا تكدرين نفسج ..
الجده وسط دموعها: يبه شلني ماتحمل اوقف على ريولي ..
بومحمد شل امه و راح داخل .. الجد شاف منظرهم وخاف ..
الجد: شو فيها امك ؟
بومحمد: تعبانه شوي ..
الجد: سمالله عليج .. جيب ماي لامك بسرعه ..
الجده: الله ينشف ريقج يا هيا انتي ومرت اخوج .. حسبي الله ونعم الوكيل ..
الجد: ذكري ربج يا ام محمد ..
الجده: عنبو دارهم .. نقصوا على الولد .. لاهو متنهني في بيتهم .. ولا في بيتنا ..
الجد: ان شاءلله تتيسر ..
الجده: ان شاءالله ..
بومحمد جاب الماي وسقى امه .. الوضع توتر زياده من موقف هيا ..
الجده: لا تقولون لمحمد اللي صار ..
بومحمد والجد: ان شاءالله ..
الجده: حمد يبه توكل بيتك ولا تشل هم ..
بومحمد: ان شاءالله ..
الجد: الله وياك ..
الجده: الله يحفظك ..
سلم عليهم وراح بيته .. طبعا بومحمد وايد كان متضايق من اللي صار .. موقف اخته فالبدايه وبعدين الكلام الجارح اللي قالته لفارس المسكين .. اما فارس وعبدالعزيز طلعوا طيران من بيت جدهم .. راحوا بيت فارس .. عبدالعزيز كان مستغرب من الشقه اول ما دخلها ..
عبدالعزيز: شقة من ذي ؟
فارس: شقتي ..
عبدالعزيز: من متى ؟
فارس: يوم قررت اعرس جهزت نفسي ..
عبدالعزيز " الله ينولك اللي في بالك ياخوي " ..
فارس: شو تشرب ؟
عبدالعزيز: مابي شي .. عمتك غثتني ..
فارس: ما عليك من كلامها .. انا اوريك فيهم كلهم ..
عبدالعزيز: شو فيك متهدد انت ؟
فارس: يصبرون علي بس ..
عبدالعزيز الله يهديك بس ..
فارس: تعال المطبخ خل نسوي لنا شي ..
عبدالعزيز ضحك على اخوه: جوعان ؟
فارس: لا بس خل نشرب شي ..
عبدالعزيز: يلا ..
راحوا المطبخ وضبطوا لهم قهوه .. قعدوا يتقهون ويسولفون فالمطبخ ..
عبدالعزيز: فروس اول مره ادري ان ذوقك جي حلو .. الشقه حلوه وايد ..
فارس: ههههههه .. الله يسلمو محمد ولد عمي ..
عبدالعزيز يحط الفنيال على الطاوله: ليش ؟
فارس: هو اللي منسق ومختار لي كل شي ..
عبدالعزيز: زيدني قهوه فديتك .. بس ماشاءالله عليه ذوقه حلو ..
فارس يصب القهوه لاخوه: والله اول ما خذت الشقه ما فكرت أأثث الا بحضوره ..
عبدالعزيز: بس حلوه الشقه .. ملمومه وعلى قدك ..
فارس: غرفتين نوم و3 حمامات وصاله ومطبخ .. والله خوش ترتيب ..
عبدالعزيز: ان شاءالله نشوف عيالك يتراكضون فيها ..
فارس: ان شاءالله ..
عبدالعزيز: اخوي بقولك ..
فارس: قول فديتك ..
عبدالعزيز: لا تخلي كلام عميمه ولا امي يأثر فيك .. وانا اقولك اني واقف معاك لين آخر المشوار .. ودام انت تبي البنت ما عليك من حد خذها يا فروس دام راحتك معاها هي .. لا تجامل حد ولا تجبر نفسك على شي ..
فارس مبتسم لاخوه: والله طيبت خاطري بكلامك .. وانا ما راح استسلم ..
عبدالعزيز: تمسك فيها بكل ما فيك ..
فارس: والله كلك على بعضك خطير يا بوسعود ..
عبدالعزيز ضحك: ههههه .. عليك سوالف ..
فارس: بس تعرف شو اللي خابف منه ؟
عبدالعزيز باهتمام: شو ؟
فارس: اخاف انها تعافني ..
عبدالعزيز عقد حواجيه: ليش ؟
فارس: لان امك المحترمه ردت عليها ذاك اليوم وهزئتها ..
عبدالعزيز: لا حول ولا قوة الا بالله ..
فارس: وهي ماخذه موقف من ذاك اليوم .. قالت لي وانا اقول ليش طال الموضوع ..
عبدالعزيز؟ الله يهديها الولده بس ..
فارس: خلها على الله ..
عبدالعزيز: اخوي واعرفك .. قدها ..
فارس: ما قصرت ياخوي والله .. لو انت ما كنت معاي هناك كنت تهورت والله .. محد مصبرني على هالهم الا محمد ولد عمي .. بس انت فيك الخير يابوسعود ..
عبدالعزيز: انت قدوتي يا فارس ..
فارس رفع حاجب: هااا .. ليكون غرقان فالحب انت بعد ؟
عبدالعزيز: ههههه .. لا مو غرقان ..
تموا الاخوان يسولفون وفارس كان وايد مبسوط من اخوه ومرتاح حوله .. استأذن عبدالعزيز ورجع البيت .. فارس اتصل بمحمد ..
فارس: يالحب ..
محمد: ايه عليك ..
فارس: شو اخبارك ؟
محمد: تمام .. اعلومك انت ؟
فارس: طيب .. انت وين ؟
محمد: فالبيت ..
فارس: تعال نام عندي الليله ..
محمد: حاضرين يالغلا ..
فارس: احم احم .. والله اني محظوظ ..
محمد: حلاة الواحد ما يمدح جداكم ..
فارس اونه يتدلع: عاااد
محمد بصراخ: ووووع لوعت جبدي .. لاتدلع ..
فارس: ههههههه ..
محمد: سكر لا انجلط الحين ..
فارس: اوريك يا اسود الويه ..
فارس ومحمد: هههههه ..
فارس: انتظرك الغالي ..
محمد: مسافة السكه يا فندم ..
فارس: هههههه .. زين يلا سلام ..
سكر فارس من محمد وهو يضحك عليه .. راح خذ له شور وبعدين اتصل بمناف يسولف معاها .. في هالاثناء خالد ومريم كانوا في شقتهم الصغيره قاعدين يتابعون فلم ومندمجين معاه .. مريم التفت على خالد وهي مبتسمه .. طالعها خالد وابتسم لها ..
مريم: خالد ..
خالد: حياتي ..
مريم: خالد بقولك شي ..
خالد جابل مريم و وطى على صوت التلفزيون .. مسك يدها وباسها ..
خالد: آمريني ..
مريم مبتسمه: ما يآمر عليك العدو .. بقولك شي ..
خالد مبتسم: قولي حبيبتي ..
مريم: خالد مبروك بتستوي ابو قريب ..
خالد بطل عيونه و ابتسم لدرجة ان اسنانه بانت ..
خالد: باستوي ابو ..
مريم هوت راسها: اي حبيبي ..
خالد قام من مكانه وسجد سجود شكر .. تم يحمد ربه .. قام من وضعية السجود وحضن مريم بقوه ..
خالد: الف مبروك حبيبتي ..
مريم: فديت قلبك يا خالد ..
خالد: متى دريتي ؟
مريم: امس ..
خالد: يالظالمه وما قلتي لي الا اليوم ..
مريم: هههههه ..
خالد: تضحكين يالدلوعه ..
مريم: ههههه .. خلاص عاد قلت لك الحين ..
خالد باسها على جبهتها: فديت قلبج يا مريم .. الله يهون عليج ..
مريم: آمين .. بسألك حبيبي ..
خالد مبتسم: سألي فديتج ..
مريم: شو في خاطرك بنت ولا ولد ؟
خالد: انا احب الجنسين .. بس افضل بكري بنت ..
مريم: هممممم .. وليش يعني ؟
خالد: لان البنت حلو ادلعها .. و تعرفين فرحة اول طفل غير ..
مريم: عدل كلامك حبيبي ..
خالد: زين انتي شو خاطرج ؟
مريم: مثلك .. حلاته اول بيبي بنوته ..
خالد: ان شاءالله تؤام ..
مريم: انا لو مثل فطيم عزيز اخوي ..
خالد: ان شاءالله ..
مريم: زين شو بتسمي البنت ؟
خالد: الاسم اللي يعجبج حبيبتي .. انا ماتفرق عندي ..
مريم: هممممم .. زين فكر معاي في اسم حلو ..
خالد: همممم .. شو رايج باسم مشاعل ؟
مريم: مممممم .. لا مب عاجبني ..
خالد: زين شو رايج باسم هاجر ..
مريم مبتسمه: حلو اسم هاجر ..
خالد: والله انتي اللي احلى ..
مريم ضحكت: ههههه .. زين لو جانا ولد شو بنسميه ؟
خالد: زين ليش بس انا اختار ؟ انتي مافي بالج اسم معين ؟
مريم: حاليا لأ .. انت قول يمكن يعجبني اسم ..
خالد مبتسم: ان شاءالله .. زين شو رايج باسم ناصر ؟
مريم: حلو ناصر وغيره ..
خالد: همممم .. تصدقين ان اسم فارس عاجبني ..
مريم: وانا بعد بس فطيم اختي بتسمي فارس ..
خالد: زين واحنا ممنوع نسمي ..
مريم: ههههه .. انا ماحب اكرر الاسامي ..
خالد: اها .. زين شو رايج باسم راكان ؟
مريم: روعه هالاسم ..
خالد: خلاص اول ولد نسميه راكان ..
مريم: حلو .. راكان بن خالد ..
خالد حضن مريم بوناسه .. فرحة خالد ما تنوصف بخبر حمل مريم .. طبعا الخبر انتشر بين الكل .. بومحمد وام محمد كانوا فرحانين بهالخبر الحلو .. ام فارس وبوفارس بعد فرحوا بهالخبر الحلو .. مرت الايام ويبقى الحال على ما هو عليه .. فارس من بعد الموقف اللي صار له في بيت جده ما مر عليهم كلش .. محمد درى باللي صار وانصدم بوفارس امه قالت له .. طبعا بوفارس ما عجبه تصرف هيا اخته .. زعل منها بس ما بين لها شي .. ام فارس ما زالت مصره على موقفها .. الريم في عالم ثاني .. تتعذب عشان فارس .. واللي ذبحها زود لما عرفت ان فارس على علاقة باللي يبي يتزوجها .. الشباب ( علي فاضل عبدالعزيز ويوسف ) ما زالوا عايشين حياتهم بالطول والعرض ما بين ساحات الاستعراض .. العزب .. والبحر .. سلمان ما زال مصر على كلامه وحدد مصيره ومصير بنته ريما .. قراره بالهجره عن البلاد فاجأ بنات اخته .. الجوهره عايشه احلى حياة مع ابراهيم وبنتهم لولو .. هنادي حامل وعايشه حياة سعيده مع نواف .. بس هي واختها منصدمين بقرار سلمان .. ريما حبت فاطمه وأسماء بنت بومحمد وايد وقرار ابوها بالهجره وايد مزعجها .. لانها لقت الامان والاستقرار فالبلاد .. ساره زوجة محمد بعد طلاقها من محمد قاعده في بيت اهلها والحزن غلب عليها .. عيالها عندها بس محمد يشوفهم فالاسبوع مرتين ومحمد حالته مو احسن منها .. بس لانه وصل لمرحله ماقدر يصبر فيها على ساره وكلامها الجارح .. جاسم وسلطان واحمد وفهد ما زالوا عايشين حياة العبط والاستعباط .. مناف وامها واخوانها تيار حياتهم ما زال هادئ .. فاطمه ويوسف عايشين احلى ايام حياتهم بفرح وحب و وناسه ..
بعد مرور اسبوع على الاحداث اللي صارت ..
فارس ومناف عصافير الحب عايشين حب مافي مثله رغم كل المصاعب اللي واجهتم واللي يدرون انها بتواجهم فالمستقبل .. فارس ومحمد كانوا قاعدين فالقهوه يشيشون ويشربون شاي ..
فارس: الحمدي ..
محمد: عيونه يا ابوالفوارس ..

يتبع ,,,

👇👇👇


تعليقات