رواية انين كره حب انتقام نهاية مجهولة -22
بشار وهو يمسك يدها:هاني معاه حق يا أختي
ابو هاني:لو هو حي كان قال ابدي من جديد وانسي وارسمي البسمه على وجهك وآنا متأكد ان أمك بعد كان بتقول نفس الشي
انين هزت راسها وعلى وجهها ابتسامه
ابو هاني:وش رايك يا بنتي تدخلين عن أم هاني وتتعرفين عليهم وعلى بنتي
انين:طيب
قامت مع ابو هاني ودخلت داخل وخلت بشار وهاني يسولفون
&&&&&&&&&&&&&&
طلع من المحاضرة وركب سيارته وتوجه للبيت
دخل وسمع صوت ضحك من جهة المطبخ ولما قرب سمع صوتها:الله يقطع إبليسك يا عنيد
العنود:من عنيد
حلا:أنتي طبعا
العنود:أقول اتركي عنك اللف والدوران شاهي وشربناك الحين يله قولي لي
حلا:وش أقول
العنود:وش كنتي تقصدين لما قلتي علشان اللي يحبونك وهم غالين علي
حلا:وأنتي ما نسيتي
العنود:لا
حلا:راح أقول لك بس توعديني يكون سر بيني وبينك
العنود:أكيد أصلا كلي أسرار مو عجزانه أحط عليهم سر جديد
حلا توترت:انا..ك. كنت.. اقصد...وسكت
العنود باهتمام:ايه كملي وش تقصدين
حلا:اخوك
العنود طلعت عيونها:من اخوي سالم
سليمان تفاجأ وش دخل سالم
حلا وهي تبعد عيونها عن نظرات العنود:لا
العنود شهقت:لا يكون سليمان
حلا ووجها بدا يصير احمر :ايه
العنود:وسويلم من وين تعرفينه
سالم كان مركز لكلام حلا:تذكرين الشخص اللي أخذت جواله وعطيته رقم مصري اللي قالت لك عنه ناديه
العنود تحاول تتذكر:ايه ذكرته وش فيه
حلا:هو اخوك
العنود:سليمان هو اللي أخذتي....وسكتت
حلا:ايه بس ها عنيد أنتي قلتي سر بينا
العنود:أكيد...وسكتت وكأنها تفكر وبعدها:ههههههههههه
حلا وهي منحرجه:وش فيك
العنود:الحين عرفت ليه ذاك اليوم أصر يروح معاي المجمع
حلا:ماني فاهمه
العنود:سمعني انا وناديه نسولف عنك يوم أخذتي الجوال وظل يطالعني وبعدها قال بيروح معاي
حلا ابتسمت
العنود:الحين عرفت وين اختفى لما رحنا المجمع
حلا:التقيت به بالمطعم وخلاني انزل اشتري جوال جديد خاف إني انصب عليه
العنود:ههههههههه ما ألومه اخوي
حلا:هههه مالت عليك
العنود:ههههههههه
وبعد سكوت لمحت انعكاس صورة أخوها بالثلاجه اللي عند الباب وابتسمت بنذاله:أقول حلا
حلا:هلا
العنود:أنتي تعزين سويلم
حلا انصدمت من سؤالها وسكتت
العنود:ما جاوبتيني
حلا وهي منحرجه ومعصبه: أنطمي انا الغلطانه اللي اقولك شي
العنود:ههههههههههه
أما اللي كان عند باب المطبخ استند على الجدار وهو راسم أحلى ابتسامه على وجهه ما توقع ابد انه يشوفها هو يوم المجمع يوم شافها أنصدم والحين أنصدم لما لقاها في بيتهم
سليمان:كل مره اشوفك فيها يا حلا تصدميني من كان يتوقع إني اشوفك وفي بيتنا وصديقه العنود بعد ولا تفكرين فيني
شق حلقه بالابتسامه وصعد لغرفته يدندن
&&&&&&&&&&&&&&&&&&&
بعد شهر
في بيتهم الكبير
قاعد بين الأوراق وماسك الجوال ويتصل على هذا ويكلم هذا
دخلت عليه وجلست عنده لحد ما خلص تلفونه
غزلان بملل:ها حبيبي خلصت
سالم :ايه خلصت كل أموري
غزلان:واستقالتك
سالم:قدمتها اليوم لازم من بكرا أتفرغ لشركتي علشان ارفعها فوق
غزلان:ان شاء الله يا رب يتحقق لك كل اللي في بالك
سالم بابتسامه:أمين يا رب أخبار الحمل معاك ان شاء الله ما يتعبك
غزلان:لا ما يتعبني
سالم:الله لا يحرمني من روحي يارب
غزلان وهي تقوم وتجي جهته وتقومه:طيب روحك يبغى ينام وما يعرف ينام وقلبه صاحي
سالم:هههه طيب يا روحي يله
العنود وهي تهذر فوق رأس سمر:والله مبسوطه اننا رجعنا لبيتنا
سمر:وآنا بعد
العنود:الحمد لله لك يارب وشوي شوي نرجع مثل أول
سمر وهي تتذكر بشار:ان شاء الله بس هالتجربه ما مرت علينا سهله
العنود وهي تتذكر ناديه واللي سوته فيها:ايه والله غيرتنا
سمر:بس أكثر اثنين تغيروا أنتي وسليمان
العنود:انا وسليمان
سمر:ايه أنتي ما كنتي تهتمين إلا لصديقاتك والمجمعات وهالسوالف التافهه وسليمان كان كل همه الفلوس وربعه وما يتحمل مسؤولية احد
العنود:والحين
سمر:الحين غير أنتي شايله أبوي شيل وسليمان كان يدرس ويشتغل بنفس الوقت و شايل معاي وسالم مسؤولية المصاريف
العنود:تصدقين أحس إني الحين أحسن من قبل
سمر:يعني السالفه طلعنا منها بأشياء ايجابيه
سمر:معاك حق
العنود وهي توقف:يله انا بروح أشوف أبوي وبعدها بنام وأخليك تنامين وراك دوام بكره
سمر:طيب تصبحين على خير
العنود:وأنتي من أهله
طلعت وبعدها نامت سمر وهي تحمد ربها على الفرج و النعمه اللي هم فيها
&&&&&&&&&&&&&&&&&&
في اليوم الثاني
رن تلفونها وهي جالسه بالصاله عند التلفزيون
انين بابتسامه:الو
ربى :هلا وغلا و مرحباااااااا بأنون
انين:هههه مين أنون
ربى:مين غير القميل اللي يكلمني
انين:ههههه تسلمين أخبارك وأخبار خالتي
ربى:كلنا تمام ها تجيني اليوم
انين:أخر مره انا جيتك الحين دورك أنتي تعالي
ربى:اممممممم اسأل أمي و أبوي أول بعدها أرد عليك
انين:طيب ولو إني واثقه ان خالتي ما راح تقول لا لا هي ولا عمي
ربى:اوكيشن اسأل وارد
انين:طيب يله باي
ربى:باي يا حلو
صكت الجوال وهي تضحك وبعد فتره تنهدت وهي تتذكر كيف تعرفت على أم هاني وربى وكيف حبتهم وغمروها بحبهم وطيبتهم :من كان يتوقع يا أنين انك تصادقين احد أنتي كنتي طول الوقت تتجنبين مصادقة الكل بس ربى صدق بنت فلاويه يا حليلها تهبل وخالتي أم هاني مره طيبه صدق انهم ناس غير عن أي احد عرفته
دخل عليها وشافها سرحانه و مبتسمه
بشار وهو يقعد جنبها :الحلوين سرحانين في ايش
انين:هلا بشار
بشار وهو يبتسم:وش سر هالابتسامه الحلوه
انين:ربى
بشار:من ربى
انين:اخت هاني
بشار:اها هذيك الملسونه
انين:هههه حرام عليك انت أصلا وش عرفك انها ملسونه
بشار وهو يمسك الريموت التلفزيون ويفر:أنتي تقولين
انين شهقت:بشارو لا تكذب انا ما قلت على البنت شي
بشار:ههههههه ما قلتي بس لا تجيك سكته قلبيه
انين:أحس إني مرتاحه بمعرفتهم والله انهم ناس طيبين
بشار:ايه والله معاك حق
انين:انت تغديت ترى انا استناك
بشار:لا ما تغديت
انين:طيب يله قوم نتغدى
بشار:يله
وقاموا يتغدون وبشار مبسوط على التغير اللي بدا واضح على أخته
&&&&&&&&&&&&&&&
في البيت الكبير والكل مجتمع
سالم:سمور أنتي شريتي كل أغراضك ولا باقي
سمر:لا باقي والعرس باقي له أسبوعين يعني ما له داعي الخوف
العنود:بس أغراضك كثيره
غزلان:لحد الحين ما تبغون عرس
سمر:أصلا مو من كثر أهلنا وآنا ما أحب الفشخره الكذابه
العنود:يا ربي ذي بتموتني قهر الناس إذا جات تعرس ما تخلي شي ما تسويه وهذي تبغاه مختصر
سمر:أنتي نسيتي ان أبوي دائما يتعب يعني ماني رايقه لصالات ولا معازيم ولا هالخرابيط
غزلان:صدق أنتي غريبه توني ادري ان العرس وهالعلوم خرابيط بس على العموم على راحتك
سالم:خلوها على راحتها مدام هي وناصر متفقين على كيفهم
وعم الهدوء وسالم يطالع العنود والعنود لاحظت:وش فيك تطالعني
سالم:في واحد جاء وخطبك
العنود طلعت عيونها وغصت:كح كح كح
سمر بتفاجأ:احد خطب العنود
سالم:ايه وآنا سالت عنه وطلع رجال والنعم فيه
سمر:ومن هو
سالم :اسمه مصعب عبد اللطيف
العنود طول الوقت ساكته ومو مستوعبه
سمر وهي تطالع أختها المصدومه وفيها الضحكه:وأنت وش رايك فيه يا اخوي
سالم:والله الرجال ما عليه كلام ضابط وما شاء الله عليه
غزلان:وهو من وين يعرفنا
سالم:يقول بنت خاله دلته علينا
سمر:ومن بنت خاله
سالم:ما ادري ...والتف على العنود:ابغاك تفكرين يا أختي واستخيري وبعدها ردي علي
العنود قامت وراحت لغرفتها والباقين صاروا يضحكون وهي عقلها مشوش
&&&&&&&&&&&&&&
مر أسبوعين وانشغلت عائلة ابو سالم وخصوصا سمر والعنود اللي بعد ما استخارت ووافقت خصوصا ان سالم وسليمان يمدحون اللي متقدم لها
وجاء وقت الملكه والعرس في نفس الوقت لسمر
غزلان وهي معاها البخور وام ناصر معاهم وأهل مصعب وحلا :كلللللللوووووووش
الكل يسلم واللي يسولف واللي يضحك وام مصعب مع أم ناصر قطوا الميانه لان كل وحده ارتاحت للثانيه
أم مصعب :ما شاء الله عليهم بنات أختك بنات جمال ودلال وسنع
أم ناصر:تسلمين يا أختي والله الساعه المباركه يوم نصير أهل
جابوا الدفتر ووقعوا العروستين وسط زغاريط وفرحت الكل بهم
سمر وهي ترجف وغزلان معاها:وش فيك يا بنت تنتفضين كأنك جزارة عشب
سمر تطالعها بنظرة أنطمي
غزلان:ههههههه ترى والله اخوي ناصر حبوب
سمر:أقول أنطمي تراني بروحي ارجف
غزلان:ههههههه
دق سالم على غزلان :الو - ايه – خلاص...وصكت والتفتت على سمر:قومي سالم يقول يله
سمر:تو الناس
غزلان:لا بس ناصر بيشوفك أما الروحه معاه بعدين مو الحين
سمر:طيب .....قامت وقابلت سالم أخوها وصديقها اللي يفهمها ودخل معاها وهي متوتره
سلموا وناصر رد السلام وجلسوا
سالم وهو يقوم:يله اتركم مع بعض وناصر الله الله
ناصر:في عيوني
طلع سالم والتفت ناصر عليها وقعد ثواني يتأملها ويتذكر سالفة المطبخ والقهوه وقام وجلس جنبها
ناصر بهمس:أخبارك سمر
سمر بصوت راجف:زينه
ناصر:تدرين إني حبيت مطبخ بيتنا
سمر طالعته باستغراب
ناصر:لاني أول مره شفتك كان فيه ومن ذاك الوقت حبيتك
سمر نزلت عيونها وسكتت
ناصر:ادري يمكن أنتي تعتبريني بس ولد خاله بس صدقيني راح أحطك بعيوني وقبلها بقلبي واسكر عليك
مسك يدها وحطها بيده:وراح اخلي يدي ما تفارق يدك ابد على الحلوه و المره وهذا وعد مني
سمر:وانا أوعدك ما تشوف مني قصور ابد
ناصر باس راسها:انا واثق ان ما منك قصور يا بنت خالتي
ابتسمت سمر له بخجل وهو يبادلها الابتسامه
خلونا نخليهم ونروح للعنود
&&&&&&&&&&&&
العنود:حلو انا خايفه أحس رجولي ترقل
حلا:ههههههههه
العنود:وجع ذا وقته تضحكين
حلا:وش تبغين أسوي لك يعني
العنود:مالت عليك من صديقه بدل ما تخففين على تضحكين ها
غزلان تاشر للعنود
حلا:يله مرت اخوك تاشر لك
العنود:تعالي معاي
حلا:انا ماله داعي أروح أنتي روحي وأكيد بتلقين احد من إخوانك يستناك
العنود وهي تقوم:طيب ..وقبل ما تمشى حلا تكلمها :أقول عنيد ترى في مفاجأه لك
العنود:مفاجأه
حلا:لما تدخلين داخل تعرفينها
العنود:وش هي تراك خوفتيني
حلا بابتسامه:لا تخافين روحي والله يوفقك
العنود ابتسمت وراحت مع غزلان ودخلت مع سليمان اللي ينتظرها
أول ما دخلت ما قدرت ترفع عيونها وتطالع الإنسان اللي قدامها
سليمان:السلام عليكم
مصعب:وعليكم السلام
العنود شبهت على الصوت بس استحت ترفع عينها وتطالعه
سليمان قبل لا يقوم بهمس وفيه الضحكه:عنيد ردي على الرجال لا كلمك ولا راح يفكرك طرما ويظن ان احنا غاشينه
العنود في نفسها:والله لاوريك يا سويلم انت وحلو الخايسه
طلع سليمان والعنود عيونها لحد الحين في الأرض
قام مصعب وجلس قريب منها وقال:أخبارك يالعنود
العنود تأكدت من الصوت والتفتت بسرعه وطلعت عيونها من الصدمه وبهمس:انت
مصعب:ايه انا تذكرتيني
العنود بخوف:انـ..ت ا..لضـ..ابـ...ط اللي فـ...ي مـ.ركز الـ..شرطـ...ه
دمعت عيونها وحست برجفه ودقات قلبها تسرع
مصعب:ايه انا الضابط اللي في مركز الشرطه واللي حقق معاك أنتي واللي معاك
العنود وهي تبكي:والله مالي دخل ...وصارت تشهق
مصعب:هدي هدي ادري ان مالك دخل حلا قالت لي كل شي
العنود باستغراب:حلا
مصعب:ايه حلا قالت ان في بنت هي اللي ورطتك وجابتك للشقه
العنود وهي تشهق:حلا وش دخلها
مصعب:ليه ما تدرين ان حلا هي بنت خالي
العنود منصدمه و متفاجاه:بنت خالك بس هي ما قالت لي شي
مصعب:انا قلت لها إني بقول لك
العنود ورجعت تبكي:والله هي قالت لي حفله
مصعب وهو يمسح دموعها:ادري حلا قالت لي ان البنت قالت لك انها حفله عاديه وأنتي ما كنتي تدرين
العنود:لا تقول لإخواني الله يخليك
مصعب:انا ما راح أقول غير انسي السالفه هذي وحلا رشحتك لي وآنا الصراحه انعجبت فيك كثير من كلام حلا عنك وانعجبت أكثر لما عرفت انك حولتي منازل علشان تديرين أبوك وتنتبهين عليه واللي يسوي كذا مستحيل يغلط أو يكون له سوابق
العنود نزلت عيونها وسكتت
مصعب:كل اللي ابغاه منك انك ما تثقين باحد بسهوله
العنود:انا خذت درس قاسي
مصعب:أهم شي تتعلمين منه
العنود هزت راسها ومصعب صار يمسح لها دموعها
&&&&&&&&&&&&&&&
قاعده مع أخوها في الصاله ويطالعون فلم رعب
انين:أقول بشور
بشار:هلا
انين:أنتي ليش ما تخطب
بشار عقد حواجبه:نعم
انين:اللي سمعته ان عندي لك عروس
بشار:لا مشكوره
انين :لحد الحين ما نسيت...
بشار يقاطعها:هذا ماضي وراح
انين:طيب ليه ما تتزوج
بشا:أزوجك أول
انين:ههههههههه انت نسيت إني كنت متزوجه
بشار:مو مشكله أزوجك مره ثانيه
انين:أتركك مني وزوجك عمرك
بشار:أنتي مشتغله خطابه وآنا ما ادري
انين:علشان خاطرك اشتغل خطابه
بشار:من العروس اللي نالت أعجاب انين الغانمي
انين:تتطنز بس يله ما عليه وش رايك بربى
بشار باستغراب:أي ربى
انين:ربى اخت هاني
بشار:ههههههه انا أتزوج أم لسان
انين:والله البنت تهبل وما عليها كلام
بشار:أقول اطلعي من راسي الله يخليك لا ربى ولا غيرها
انين:الحين بخليك بس ما راح أنسى الموضوع
بشار طالعها وما رد ورجع يطالع التلفزيون
&&&&&&&&&&&&&&
طلعت من المجلس وهي حاقده على حلا
وأول ما جلست وجاتها حلا:ها وش الأحوال
العنود:يعني يا زفته طلع ولد عمتك
حلا:ههههههه ايه
العنود:ابغى اعرف أنتي لما طلعتيني من المركز كنتي تعرفين ان هو الشرطي
حلا:ايه
العنود:أنتي وش مكذبه عليه
حلا:انا ما كذبت بس خبيت بعض الحقائق
العنود:مثل
حلا:قلت إني صديقتك من زمان واعرف ناديه ومحذرتك بس أنتي على نياتك ورحتي وبس
العنود سكتت تفكر
حلا:المفروض تبوسين راسي على المدح اللي مدحته قدامه علشان يغرم فيك
العنود:بس أنتي ما قلتي لي ان عندك ولد عمه
حلا:أهل أبوي قاطعوا عمتي هذي من زمان ليه ما ادري بس بعد ما بقيت لحالي في البيت قلت ليه ما اعرفهم ورحت وتعرفت عليهم
العنود:طيب ليه رشحتيني انا مو أي بنت ثانيه
حلا: لأنك غاليه على قلبي واحبك ومعتبرتك أختي
العنود:الله لا يحرمني منك
حلا:ابغاك تسامحيني على اللي سويته معاك بالماضي
العنود: انا نسيت وأنتي انسي بعد وخلينا نحرق الماضي وندفن الأسرار
حلا وهي مبسوطه:طيب
العنود:إلا أنتي كم عمرك يا حلا
حلا باستغراب:ليه
العنود:جاوبي
حلا:يعني بدخل 21 ليه
العنود:أنتي تخرجتي
حلا:لا تركت الجامعه ما كملت بس ليه تسالين
العنود:هجل كيف تعرفتي على انين
حلا:تعرفت عليها قبل ما اترك الجامعه انا كنت سنه أولى وهي كانت سنه ثالثه وبعد ما تركت الجامعه ظليت متواصله معاها
العنود:اها
حلا:ليه تسالين
العنود وهي تبتسم:ولا شي
&&&&&&&&&&&&&&&
تسارعت الأيام والشهور
مرت سنه ونصف على أبطالنا
ماذا حدث خلال هذي السنه؟
انين خطبها هاني وتزوجته وسافرت معاه علشان يدرس أمور في علم النفس ويطور من معرفته ويصير من أفضل أطباء علم النفس
أما انين فراح تكمل دراستها وتأخذ الماجستير في إدارة الأعمال
ربى تزوجت بشار اللي أقنعته انين وعايش ومبسوط
غزلان جابت ولد وسموه راشد وسالم قدر يرفع اسم الشركه عالي ورجع اسم شركه راشد العالي يرتفع من جديد
سليمان تزوج حلا اللي رتبت كل أمورهم العنود و عايشين ومبسوطين
سمر عايشه مع ناصر اللي ما يقصر معاها في بيت أم ناصر وهي حامل ببنت وينتظرون المولوده بفارغ الصبر
العنود تزوجت مصعب ومثل ما اتفقت مع حلا ادفنوا الأسرار وبدوا صفحه جديده مليئه بالسعاده
خليل تزوج وحده امراتيه تعرف عليها ومبسوط
ابو سالم على حاله ما تغير فيه شي
&&&&&&&&&&&&&
انين وهي واقفه تطالع البحر وسرحانه
هاني وهو يحظنها:حياتي سرحان في ايش
انين بابتسامه:في الماضي
هاني:احنا اتفقنا ننسى الماضي
انين:عارفه بس اتمنى لو الكل يقدر يعرف ان
الكره:من أبشع المشاعر وهي تزيد ما تنقص وكل ما تزيد هالمشاعر تضر صاحبها
الانتقام:هذا يعتبر مرض يدمر أحبابك قبل أعدائك ولازم تتعالج منه
والحب:هو الطريق اللي ينقذك من كل المشاعر البشعه اللي ممكن تضرك وتخرب بيتك والبيوت اللي حولك
انا دائما أقول
انين...كره...حب .. انتقام ...نهاية مجهوله(لعبة شطرنج)
بس الحين انا أقول
انين....محبه.....غرام....نسيان الماضي......نهاية سعيده(وبكذا تكون الفايز في لعبة الشطرنج)
طالعها هاني بفخر وقال:الله يحرمني من الفهيم ولا اللي في بطنه
انين:ههههههههه ولا يحرمني من دكتوري وأبو ولدي
&&&&&&&&&&&&&&
انين...كره...حب .. انتقام ...نهاية مجهوله(لعبة شطرنج)
&&&&&&&&&&&&&&
اتمنى ان روايتي تكون نالت إعجابكم واستحسانكم لكم مني كل موده ومحبه وفعلا الانتقام هو طريق الهلاك والحب هو طريق النجاة وخلاص القلب من الحقد والكره والانتقام
&&&&&&&&&&
ودي لكم
قلب أمي وروحها
تجميع ورد الجوري
اللهم لك الحمد حتى ترضى وإذا رضيت وبعد الرضى ,,, اضف تعليقك