رواية انا الضحية وانا الجلاد -33

رواية انا الضحية وانا الجلاد -33

"في غرفة نجود"

عذبة: أهوه ياستي جيت وش تبين؟

نجود: ......................عذبة......

عذبة: أقول نجيده أنا وراي شغل الدنيا... إخلصي علي..

نجود: مبروك ما جابت أفنان...

عذبة: ههههههه ياشيخة جايبتن من بيتنا عشان تباركين ولدة أفنان!!

الله يبارك بتس... توي جايتن من عنده وليده يهبل... ماشاء الله... كنه خاله سلطان..

نجود: عذبة.....

عذبة_تقوم وتأخذ حقيبتها وتضعها على كتفها وتحل عقدة نقابها لتلبسه مرة أخرى_: مع السلامة..

نجود_تمسك بكتف عذبة_: هو..هو!!

إصبري تو الناس يالعجوز ماقلت لتس وش عندي!!

عذبة: أنا وراي شغل.. بروح أطارد أشغال...وأوقع على أوراق..

هذا غير أقساط مدرسة ناصر ونجلاء...

بروح أشوف وش يبون ...

وأنتي لو بنتظرتس كان يجي بكرا وأنتي تمسسين السالفة..

أقول مع السلامة أنا مرتن مانب فاضية..

نجود:هههههههههههههههه

جد توي أصدق إنتس طالعتن على جدتتس عذبة!!

أقول إقعدي.. أبقولتس سالفة خطيرة...

********

"في الخبر"

يدخل بندر قادما من دوامه, عبير وأحمد مشدودين للجهاز ويتابعون بشغف,

ليلى وإيمان وأم إبراهيم يشربن القهوة ويتحدثن بهدوء, استدار بندر بهدوء خلف شاشة الحاسب, وإذ بمشد ساخن نوعا ما يعرض في الفيلم...

صرخ بندر: خيــــــــــــــــــــــــــــــر!!

_فزع أحمد وعبير _

أم إبراهيم: هبلتن يا وليدي!!

أحمد: من متى جاي أنت؟

إيمان: طاح ولدي من الروعة...

ليلى: ههههههههههههههه

بندر: وش قلة الأدب والمسخرة هذي!!

أحمد: ...و...والله هذا أول مقطع وصخ..

عبير: والله مب وصخ مرة!!

بندر: لا!!

وش أكثر من كذا بعد!!

ماتت قلوبكم وماعاد تستحون ...

هاتوه... هاتوه... أقول...

أحمد: حقي أنا شاريه..

بندر: أقول هاته.. خلك عشان المرة الثانية تشري شي محترم ولا تخلي قروشك بجيبك...

عبير: بندر.. الله يخليك... ودنا نكمل تحمسنا..

بندر: لا.. مافيه جيبيوه

أم إبراهيم: بندر... وش بوه؟

بندر: قلة أدب.. وقاحة... شلون ترضين لهم يشوفونه..

ماموت قلوب هالناس إلا هالبلاوي اللي يشوفونه

ليلى: بس حرام.. هم متابعين..

لا تاخذه منهم...

المرة الثانية خذه..

بندر: ياملحتس صاكتن إثمتس...سكت دهراً ونطق كفراً...

_نظرت إيمان لليلى وهما تكتمان ضحكتهما _

أحمد: بندر والله مو حق..

يمه!!

أم إبراهيم: إه.. عطوه أخوك وفكنا وش الغنيمة اللي بتجي منه؟!!

بندر: هاته_وهو يسحبه بعنف , ويصعد للأعلى_

عبير: يمه... ليش تخلينه ياخذه؟

أم إبراهيم:روحي أنتي قولي له...!!

وبعدين هو أخوتس الكبير...

وما أقواو... لامن جاء أبوتس خليه يتفاهم معوه..

أحمد: ياحبيل إبراهيم... مايتدخل..

إيمان: إلا صح.. إبراهيم بيجي اليوم هو وولده؟

عبير: إيه.. تصدقين إني ولهت على زينب..

ليلى: الله ياخذه.. ترا لو بتجي بدبر لي مشوار مو طايقة أشوف وجهه..

عقب اللي سوته بأختي...

***********

"في غرفة نجود"

عذبة: خالد!!

ولد خالي!!

نجود: أنا ترددت... أول مرة أتردد.. بالعادة علطول لا.. بس خالد...

ما أدري..

عذبة: لا عادي قولي الحقيقة.. اللي لو كنت مكانتس بقوله..

ولمتى بنتظر واحد .... مات.....

لو يفيد الإنتظار كان ظليت طول عمري أنتظر رجعته..

الياس رحمة... ماتصدقين يا نجود... عجزت أيس من رجعه أبوي...

لكن سعود وأمي.... خلاص اللي راح ما يرجع..

_أطرقت رأسها وبدأت تغالب عبرة مكتومة_

لا...يانجود..أقول... خالد ما ينعاف... وخبله لو بتردينه...

نجود: بس أنا... مو متخيله انو فيه أحد بياخذ مكان سعود...

عذبة: خلاص سعود مات...

لو أنتي اللي متي كان ما إنتظر سعود سنه وحده...

وأنتي قعدتني سنتين وزود ترفضين ..

وأنتي بنت.. لو فاتس الزواج بوقت يمكن ما يحصل لتس بوقت ثاني...

نجود: أخاف أظلم خالد على ذكرى سعود..

عذبة: إخس... اللي يسمعتس يقول ذي عشرة عمر هي وسعود..

أقول ترا راس ماله خطبه...

إسمعي... الحين إذا تزوجتي.. أبجي أنام عندكم..

نجود: ليش؟!!

عذبة: لأني راضعه من مرت خالي الله يرحمه... أم خالد...

وأفتش لكل عيال خالي وأحفادهم...

نجود: والله!!

أجل مستانسه هناك لا غطاء ولا شي!!

عذبة: لا أستحي مو كلهم أفتش لهم..

***********

"في بيت سعد"

تركي: نواعم... نواعم... نواعم !!

تينا وين نواعم؟

_تلتفت الخادمة ببرود_:

ما آدري... يمكن راحت مع نورة...

تركي: نورة!!

وهذي من طلاق أمي ماتقعد بالبيت!!

يووووووووووووه...

_يجلس على الأريكة المنعزلة ويرفع سماعة الهاتف ويتصل بجوال نواعم.._

نواعم: هلا تركي...

تركي: نواعم وينك؟

نواعم: مع نورة ونجلاء رحنا للملاهي...تبي شي؟

تركي: نواعم ... مايصير... كل يوم طلعة ودخلة مو معبرة أحد...

طيب قولي لي قولي لأبوي إنك بتطلعين... مو تفكين الباب وتطلعين!!

نواعم: ليش هي رقابة ولا إيش؟

تركي: نعومة حبيبتي روحي أنا مقدر إنك متضايقة من الوضع بالبيت بس الهروب مو حل... على الأقل عطينا خبر إنك بتطلعين إذا أنتي ملزّمة..

أخاف يصير لك شي وحنا ماندري...

نواعم: تركي... أدق عليك ومقفل!!

تركي: أنا كنت بالمستشفى... كان دقيتي على أبوي...

نواعم: أوهو أبوي لأ...

تكفى تركي أبي أستانس... لا تقلب المواجع..

تركي: نواعم... هذا أبوك أولا وأخيرا... وأنتي لازم تحطين عنده خبر...

نواعم: ما أبي أكلمه... ما أبي أسمع صوته...

تركي: هذا أبوك... وماقصر معك أنتي بالذات بشي...

لا تخلين مشاكل أمي وأبوي تأثر على علاقتك بهم...

لأنهم مهما سوو فهم يدورون مصلحتك..

نواعم: تركي... لو هو يحبنا ما طلق أمي!!

تركي: أمي هي اللي طلبت الطلاق....

وهو ما قصر معها... تكفل بالعيادة وفتحها لها وللحين قاعد يشغلها لها بالمجان...

كل هذا عشاننا يا آنسه... وعشان أمي... لو ما كان يغلي أمي ما سوا كذا..

نواعم: يغلي أمي بيتزوج عليها!!

تركي: أنتي خبله... أمك هي اللي طلبت الطلاق...

والزواج حقه... ماسوا جريمه.. وبعدين على فكرة...

ترا أبوي متضايق من تجاهلك له...

هذا أبوك...

نواعم: زين يتزوج.. بس ما أبيها بالبيت عندنا...

إذا جت للبيت أبروح عن أم عبدالعزيز وجدتي مالي جلسه...

تركي: خير تلبشين الناس أنتي؟

نواعم: أم عبدالعزيز هي أمي اللي ربتني..هي اللي علمتني الصح من الخطأ...

وأنت أعرف بهالشي.. أم عبدالعزيز ماعمرها ضاقت بي...

وإن هي تمشكلت مع أمي... هي تحبني..

تركي: زين..._بسخرية_ الله يبشرك بالخير هي تحبك أجل..

الحمدلله....مير سلمي على البنات... وقولي لنورة لا تجمع ربعها عند سيارتي...

نواعم: وشو؟

تركي: قولي لها وبس...

نواعم: طيب أخوي ... تآمر على شي؟

تركي: سلامتك يا قلب أخوك... بس لا جيتي لازم تمرين على أبوي...

وتسلمين عليه... إتفقنا؟

نواعم: بالبيت نتفاهم...يالله باي نورة جابت العشاء..

تركي: إلحقي إلحقي... إذا بدت نوير خلصته عنكم!!

باااااااااااااااااااااااااااااي

طووووووط طوووووووووط

_تلتفت نواعم وهي تضحك بشدة_: نورة... ههههههههههههه

نورة: وش به ذي.؟

نجلاء: أنا أدري!!؟

نواعم: ولا شي..

نورة: وش قالتس تركي يا علوه الفاري!!

أكيد قعد يتطنز علي!!

نجلاء: لا يهمتس... تروك لو ما تطنز مات..

نواعم: لا .. يقول لا تجمعين ربعك عند سيارتي...

نورة: أيه... من زين سيارته... سيارة مجيد أحسن..

نجلاء: روحي إلعبي بسيارة مجيد..

نورة: لا والله ما قضيت من عمري...

نواعم: الحين أنتي وش مسويه بسيارة تركي؟

نجلاء: بس جالسه هي والبنات على السيارة ... وقاعدات يرسمن على القزازبالروج...

نواعم: وأنتي مشاركة بالمعرض الفني!!

نجلاء: لا تعرفين إني أمقت كل أنواع الفن التشكيلي...

تخيلي ذاك اليوم برسم بعير... حسبته الأستاذة بقرة!!

نورة: قاعدتن فوق الشجرة تقل قرد!!

نواعم:هههههههههههههه

أمنه تركي معصب!!

نجلاء: كفشه بالجرم المشهود..

نورة: هجينا كلنا وهي تورطت فوق الشجرة... نشبت بطرف تنورته...

جاء تركي وهو معصب....

ويسمع خرفشة ويرفع راسة ولا الأميرة الناعسة متشعمطة فوق الشجرة..

بس ياهو نز نزه!!

نجلاء: تفشلت حسبي الله على العدو...

نواعم: ههههههههههههههههه

وحط الحرة فيك!!

نجلاء: يخسى!!

بس نزل راسه وسأل" من مشخمط على السيارة بالروج!!"

وقلت له نورة والشلة حقينه...

عصب وركب السيارة وهو يهوش ويتوعد...

نورة: وكلم مجيد... بس رحمه من ربي إني كنت حاطتن راسي على حجر أمي نورة...

ولا كان مجيدوه توطى ببطني... حلفت عليه أمي نورة ما يسوي شي...

نواعم: والله فله أمي نورة...

قاهرة مجيد... زين موقفته عند حدة ولا كان يتعنتر عليكم...

************

"في غرفة بندر"

يدخل أحمد خلسة للغرفة, صوت المياة من الحمام تبعث في نفس أحمد الطمأنينة

بحث عن الـ DVD على التسريحة وعلى الأرفف فلم يجد شيء..

إلتفت متبرماً, فتوجه نحو الدولاب, فتحه وبحث بين الأغراض بسرعة فلم يجد شيء أيضاً, إتجه نحو السرير, ورفع البطانية ومن ثم الوسادة فوجد ورقة بيضاء مثنية من المنتصف, أخذها وإذ بصوت باب الحمام يفتح , فزع أحمد وأراد الهروب , فأمسك بندر بيده وهو يصرخ:

هات الورقة.. هاته.... أحمد..

فزع أحمد وأفلت يده من بندر وفر خارجا, ضرب بندر بيده على الجدار ثم أخذ بنطاله المتسخ ولبسه بسرعه ورمى الفوطة,وخرج راكضا وهو يغلق السحاب,

_في الصالة_

أحمد يركض مفزوعا ويرتمي خلف والدته, وهو يصرخ..:

يمه.. فكين من ولدتس...

_في أول الدرج بندر يصرخ: أحمد هات الورقة اللي معك!!

أحمد: لا...

جب الفيلم وأعطيك ورقتك...

بندر: أحمدوه والله لأمسحك من الدنيا جبه!!!!

_بدا بندر مضطربا وغاضبا, أخذ أحمد الورقة وفتحها, فذهل ثم رفع رأسه ونظر لبندر قائلاً:

عيب عليك... تعلمنا الأدب... شوفي يمه وش معه...

بندر: أحمد.. لاااااااااااااااااااااااااااااااااااااااا

_فتحت أم إبراهيم الورقة فشدتها عبير منها للأسفل بحيث تكون واضحه لها ولأيمان وليلى_

بندر: والله لأوريك يا أحمد جب الورقة

_في هذه الأثناء دخل الخال من الملحق_

الخال: خير إن شاء الله!!

وشهالصراخ؟

بندر عيب عليك... ليش نازلن كذا!!

وش عندكن أنتن وش بكن...

وش هالورقة اللي معكن...

أحمد: لا ... يبه... هذي.. و.. ورقه لقيته.....

برجعه لراعيه...

_أخذ الخال الورقة بعنف من يد أم إبراهيم, وإلتفت وإذ ببندر يعود لغرفته

فتح الخال الورقة, ونظر إليها بذهول ثم إلتفت على أحمد_:

منين جبته؟

أحمد: من...من...الشارع....

الخال: بلا كذب... أحمد عينك بعيني ولا تكذب على أبوك!!

أحمد_يشيح ببصره ويطرق رأسه_

الخال: أحمد....

لا تطوله معي...

أم إبراهيم... قولي الحق...منين؟

أم إبراهيم:... يالله إن الشكوى لك...

جابه.. جابه من غرفة بندر...

الخال: بندر!!!!!

****"في بيت منيرة أم تركي_الخبر_"

هيفاء: منيرة... مهما صار ليش تخربينها بعد هالسنين؟

منيرة: هيفاء... خلاص واللي يرحم والديج...

ما إفتكيت من عيالي تيين أنتي بعد!!

هذا اللي كان لازم يصير من زمان...

هيفاء: وعيالج!!

منيرة: أنا اللي مصبرني هالسنين عيالي...

لكن إكتشفت إن وجودي عند عيالي كعدمه... ليش أيلس عيل!!

هيفاء: أنتي شناقصج هناك... كان مشيتي عمرج وتحملتي شوي..

منيرة: تدرين شناقصني يا أختي!!

ناقصني الأمان... طول عمري وأنا حاطة إيدي على قلبي خايفة من سعد...

هيفاء: سعد يعزج... وشوفي اللي يسويه عشانج..

منيرة: مو عشاني... عشان عياله...

سعد ما أحد يعرفه مثلي... قلبه حجر...

وما يعرف اللين ...

هيفاء: طيب ليش الحين تعادينه...

طول عمرج خاضعه له وبالآخر تخربينها!!

منيرة: ولمتى بتم خاضعة يا هيفاء لمتى؟

خضعت لأمي ودخلت طب وإهوا مو رغبتي...

خضعت لأبوي وتركت حسين وتزوجت سعد..

خضعت لسعد وكملت دراسة وتوظفت وليته عاجبه!!

كل يوم والثاني يعايرني بإهمالي لبيتي

وإن عيالي اللي مربينهم إخوه ومرت أخوه...

يعني مو عاجبه...

ولا أنا عاجبني الوضع...

وعيالي.....

خلاص أكيد أهم يبيوني أختار الوضع اللي يريحني...

هيفاء: منور... للحين ما نسيتي حسين؟

منيرة: وش قاعدة تخربطين أنتي.. أنا بس أقولك وش صار..

هيفاء: فعلاً... ومالحب إلا للحبيب الأولي...

منيرة: هيفوه يالماصلة!!

هيفاء: حتى مشاري... للحين يحب عذبة...يموت عليها...

لامن صار مبسوط ناداني عذبة...

وكل يوم .... يفكر فيها... ولامن جاء طاريها يفز...

تعبت منه... ومن تفكيره بعذيب...

منيرة: شلون؟

مو... طيب ... ليه أهو طلقها!!

هيفاء: ما أدري....

بس اللي أدري فيه إنه للحين يبيها وهي للحين تبيه

وخالتي فاتن بعد لو بيدها ردتهم لبعض...

منيرة: فاتن!!

أصلا فاتن مب راضية بزيجتج كلها..

أنا قلت لج...

بس منى إهي اللي لعبت بمخج وفرته...

هيفاء: منى... أكلتها علقه من سعد...

خلها ...هذي اللي تلعب بالناس يي من يلعب فيها...

ما أقول إلا حسبي الله عليها..

منيرة: طيب... وش بتسوين بمشاري؟

هيفاء: ما أدري....

بس بعد ما تطلقتي... تفتحت عيوني على أشياء كثيرة...

منيرة: وشلون؟

هيفاء: مشاري من خذاني وهو مو يمي...

مابي أفتح عيوني يوم وألاقيه جاييب عذبة على راسي

حتى أنا مثلج يا منيرة ... مو حاسة بالأمان مع مشاري....

مشاري .... بايعني وشاري عذبة...

بس ما أدري أمتى...

********** *******

الجزء التاسع والثلاثين"

"في الخبر"

طرقات خفيفة على باب غرفة بندر..

بندر صامت ولا يجيب..

"بندر الله يخليك إفتح أبقولك"

"بندر والله مو قصدي...والله ما كنت أدري وش بالورقة"

يشيح بندر , ويتنهد.. متجاهلاً توسلات أحمد ..

سار أحمد متوجهاً للدرج نزل بتثاقل..وحين توسط الصالة

الخال: أحمد...أنت متأكد أخذته من تحت وسادة بندر؟

أحمد:.....................

الخال: أحمد أنا أسألك!!

أحمد: بس....

الخال(يصرخ): أحمد!!

أحمد: إيه...إيه...

_ويفر أحمد للدرج حيث عبير تراقب الموقف, فتمسك بكتفه وتذهب معه للأعلى_

التفت الخال بعصبية نحو أم إبراهيم وقال:

توقعين من اللي عطاه بندر...هي؟

أم إبراهيم: مستحيل....

البنت عاقلة مب راعية هالخرابيط..لالا.. وبندر عاقل..

وش تقول.. أنت .. وه وجعت قلبي

الخال: طيب شلون جت بيده؟

هو ولدتتس قاضين منه...

بس البلشة إن كان متبلي بنت الناس!!

أم إبراهيم: لا.. لا بندر يخرب هو بس ما يخرب بنات الناس...

أكيد.. لقاه طايحة ولا ,,, أحد دسه بأغراضه...

الخال_يصرخ_: من بيدسه بأغراضه!!

من يدخل غرفته أصلاً..

ليلى... ليلى!!

_أقبلت ليلى بوجل_:

سم..سم يا خال..

الخال: تعالي...

أنتي تعرفين البنت!!

ليلى: نورة... إيه أعرفها...

الخال: وش جاب رسمته مع ولدي؟

هو لاعبن بمخه!!

ليلى: لا... خالي صدقني.. نورة مالها دخل..

أصلاً الرسمة هذي أنا اللي رسمتها..

وإنشغلت بسالفة الخطبة وأنت تعرف الظروف..

ومن زمان و ا لبنت تسألني عنها وأنا ما أدري وين راحت...

ما خليت مكان ما دورتها...

ما أدري شلون وصلت بندر...

بس نورة .. مالها دخل... والله مالها دخل...

الخال: ليلى.... قولي الجد....

لا تسترين على بنت عمتس..

خلينا نعرف راسنا من رجيلنا عشان نحل الموضوع...

ليلى: والله يا خال ما أستر عليها...

بس نورة قبل إسبوعين نافشة المرسم تدورها...

وأختها زعلت عليها تقول أكيد حدى الشغالات أخذتها...

نورة مرة خايفة تكون الصورة بيد السووايق ولا الشغالات...

الخال: وصارت مع ولدي....

لاحول ولا قوة إلا بالله...

_يزم شفتيه ويكتف يديه لصدرة وبدت عليه علامات الحيرة والقلق_

********

في الرياض"

_الحديقة_

نجلاء: نوير عويذ الله من شرتس يا مرة!!

نورة: إلا قولي لي...

نجلاء: نورة!!

نورة: أنتي ما جربتي الحب!!

نجلاء: قصدتس ما إنخدعت بوهم الحب...

وش عاجبتس بالحب.. ووش اللي جانا منه!!

ليلى إتطلقت بعد ما ركبت راسه على زيجه فاشلة من أوله..

مها... رضت تعيش مع عقيم..وتنحرم من الذرية..

عذبة..._ترفع رأسها وتنظر لغرفة عذبة_

الله يكون بعونه بس ...

نورة: بس بندر غير...

يختي عيونه قتاله... وطوله يمي يمي ... وش ذا الطول والرزة...

ولا جسمه... ياربيه بس.. لالا.. خلاص أخاف أنحته..

نجلاء: لا قولي ما شاء الله ولا نتب ناحتته..

نورة: ولاّ هيبته ... صح يخرع بس رجل..

وه بس يختي... الثقل صنعه...

نجلاء: وشعره؟!!_تنظر لنورة بطرف عينها وتكتم إبتسامه خبيثة_

نورة: إيه شعره يهبل....

أصلا أنا أحب الكيرلي....

نجلوه... لا تناظرينن كذا!!

نجلاء: أقول... متى بيجي فيصلوه....؟

نورة: ما أدري... يمكن بملكة نجود...

نجلاء: إيه صح... يختي قولي له مانبي ملكة ولا شي...

مالي خلق أدور فستان!!

نورة: إفتحي الدالوب وإلبسي من اللي عندتس..

نجلاء: لا... هذا من الجهتين كلهم شايفين فساتيني...

خوالي وأهلي وخوالتس!!

نورة: إيه .... متى بندر بيخطبن؟

نجلاء: نورررررررررة!!

أصلا بندر شايب...

ومب خاطبتس.... كبير وأنتي بزر!!

نورة: إيه بعد قولي بياخذ حصة بنت خالتس!!

نجلاء: ههههههههههههه

والله إنتس خبله .. علطول صدقتي..

أجل لو بعلمتس عن عرسة منتب مصدقه؟

نورة: قولي والله!!

بيعرس!!

نجلاء: لا حوووووول ولا قوة ....

أوووووووووف نوير متى تعقلين أنتي!!

نورة: إممممم نجلاء... تتوقعين منيرة أم تركي تجي للمكلة؟

هي تحب نجود مرة... بس...

نجلاء: لا ما أتوقع تجي... وش بيقولون الناس ..

تجي لأهل طليقه... صعبه شوي...

******

في غرفة بندر"

يجلس بندر على طرف التسريحة...

يعض شفتيه بعصبيه ويتنهد, يرفع رأسه للأعلى ويهمس:

ياربيه... وش سويت أنا...

الله ياخذك يا أحمدوه.. والله لأوريك...

يوووووووووه

يضرب بقبضته على الدولاب ويقف ثم يسند وجهه على المرآه ...

طرقات خفيفة على الباب..

بندر_يهمس_: أكيد أحمدوه الحمار..

وله وجه يجي بعد...

الطرقات تزداد...

بندر_يصرخ_: أحمدوه إنقلع أحسن لك!!

الطارق: بندر إفتح....

بندر_بدى على وجهه الرهبه_: أبوي!!

سم..

_ويفتح الباب دون أن ينبس بكلمة, أشاح بوجهه عن أبيه محرجا,

أغلق الأب الباب وأقفله بالمفتاح, ثم جلس على السرير_

الأب_راشد_: بندر...

بندر_بصوت متهدج_: سم يبه...

راشد: شلون وصلت الرسمة؟

بندر: ..................

راشد: بندر جاوبن ... أنا أبوك ولازم تجاوبن وما تخبي عن شي...

خلك بندر اللي أعرفه...

بندر: يبه .. أنا آسف...

راشد: لا تتأسف .. جاوبن بس على سؤالي...

بندر: لقيته بالحديقة على الستاند وأنا كنت طالع من بيت عمتي فرح...

عجبتن... أخذته...

راشد: ليش؟

بندر: ...............

راشد: أنت تحب هالبنيه؟

بندر: ..... إيه...إيه يبه...

راشد: هه ومن متى وقعت في الحب؟

بندر: من... يبه لا ... والله مو بيدي.. حاولت أنساه عجزت..

راشد: لا.. يا وليدي خذ راحتك...

قل كل اللي عندك.. أنا أبسمع القصة من أوله...

بندر_بدى محرجاً_:.................

راشد: بندر لا تستحي من .. أنا أبوك...

وصديقك... ولا؟

بندر: إلا يبه.. الله يخليك لنا...

راشد :طيب كمل..

بندر: من جتنا ذيك المرة...

وقت زواج مشاري...

... دخلت غرفتي بالغلط....

هبلتن بس ضحكتن خفة دمه...

وبعدين ... ...

راشد: وبعدين حبيته ... و عجزت تنساه..

وعشان كذا إذا قلنا لك تزوج تقول بدري وتو الناس..

صح!!؟

بندر: يبه..

يتبع ,,,,

👇👇👇

تعديل المقال