رواية يا لبيه يا الدنيا العجيبة -23
وطارق جواله مانزل من اذنه مكالمه ورا مكالمه
ماخلا واحد من اخوياه اللي وقال يسأل اللي في المستشفى واللي في المرور
وفي كل مكان بس مافي حس ولاخبر
اخذها وتوجهوا لبيت ابو تركي وكان معهم ابو طارق
................
فتحت عيونها راسها حيل ثقيل هذا كله نوم
لا مكانت نايمه هي كانت في المستشفى و وحده جت..........
لااااا منذر يانذل.. ابي اهلي
الله لايوفقك الله لا
ركل الباب وفتحه على مصراعيه
دخل بكل غرور اساريره منفرجه وابتسامه واضحه
ريم: وربي انك حقير حرام اللي سويته
منذر: انا ولد الأكابر تعاملني وحده حثاله زيك بنفور
ريم: انت ماخليت فيها نفور انا اكرهك اكرهك
منذر: انطمي بس
ريم: بس بعرف وش سويت لك والله ما اذكر غلطت عليك
منذر: هو صحيح ماقد غلطتني بس آخر مره غلطتي الحين انا اللي انهي علاقاتي بالبنات
تجين انتي بكل بساطه انا تبت الى الله ههههههههههههه ارحمك صراحه
ريم: والله لو تطيح بإيد اخواني بتكون نهايتك بشعه
باستهزاء: انتظر هاليوم بفارغ الصبر.. انا بعرف اخوانك وعيال عمك على وش شايفين انفسهم
ريم: ياجبان اخذتني منهم على غفله
منذر: لا يابابا طمعك جابك لين عندي وصرتي تحت رحمتي شفتي ان مثل جوع كلبك يتبعك لايق عليك
ريم ببكاء مرير: والله عشان ابوي والا انا في الطقاق انا مستعده اسوي شي بس ترسل الفلوس لابوي
منذر: الحين من جدك بعطيكم 700 الف ياشيخه لو تحبين آخر سما ماشفتي مني ريال ياساقطه
ريم: كل تبن ياحيوان انا اشرف منك
منذر: باين عليك معصبه خلاص ولايهمك انا بعطيك شي انما إيه يريحك ويخليك تطيرين مع العصافير
توارى خلف الباب دقايق وجا ومعه ابره
قرب منها بس ماقدرت تتحرك كان القيد محكم
ريم: تكفى يامنذر الله يخليلك امك الله يستر على خواتك لاتسوي لي اي شي وانفضح
وربي وثقت فيك وحبيتك من قلبي لاتسويلي شي لاتسوييييييييييييلي شي
منذر: تدرين ليش سويت كذا لسببين
عشان اخوانك وتركي.. تركي اللي ماقد شفته ويلحقني بالحكي
لامت نفسها لانها هي اللي وصلت له كلام تركي عنه..
ريم: منذر لاتتهور وانا وش ذنبي هو اللي تكلم فيك يمكن سامع عنك شي
منذر: طيب انا بقطع السنتهم وبنزل روسهم تحت رجلي ..
على فكره ترا جلست مده افكر كيف انتقم منهم ولقيتك صيده سهله والا انا ناوي على شي اكبر ..
ريم: فيه اكبر من كذا
منذر:لدرجه ماتتصورين واعتبري هذا تربيه لك يالحيوانه وعطاها كف
مالت بجسمها ع الارض .. مسكها تقعد: هذا عشان كلمة نذل
وعطاها كف ثاني مالت بجسمها من الناحيه الثانيه: وهذا عشان توبتك ياخي تقهرون الوحده تلف من ورا اهلها لين تشبع وقالت انا تبت
واستمرت كفوفه لها
وهي تبي تبكي بس مافيه دموع.. صدمتها من الموقف ماتخففه الدموع
انتقام غير مألوف
وسبب تافه لتبرير افعاله
بينما يعد الحقد والضغينه والحسد السبب الأوحد لما يمارسه مع ريم
كان يعاني من عدم تماسك اسرته ويحلم بالترابط الاسري اللي كان يقول له عليه نادر
كان يحلم يكون سليم معافى زيه زي باقي الشباب مع انهم مرتاحين ماديا
بس ما انجرفوا خلف السموم اللي يتجرعها يوميا
وكان المساعد في تدهور حالته غياب الرقيب فشافها طريقه يسوي فيها اللي براسه بدون خوف
مسك عضدها وصار يبحث عن وريد
ريم: انا اسفه والله اسفه بس فك قيدي ولاتسويلي شي.. خلني اروح والله ابوي بيصير له شي
طنشها ودخل الابره في الوريد
.
.
.
مانيب داخله جيبيلي بنتي ياجوري
جوري: والله يمه دخلنا للدكتور ويوم طلعنا مالقيناها
ام طارق: اه يابنتي اه
تركي: بس تطمني السكيورتي قال شاف وحده باوصاف ريم طالعه مع وحده يمكن صديقتها
ام طارق: يعني احط يدي على خدي وانتظر لين تشرف مع هالصديقه
جوري: يمه ادحري ابليس وادخلي
اطلعوا برا ياحثالة المجتمع
ابو طارق: انا جاي اسأل عن بنتي يامحمد
ابو تركي: وتدورونها هنا؟؟ دوروها في الشوارع بعيد عن بيتي
ام طارق: اتقي الله حرام تظلمها
ابو تركي: اطلعوا برا بيتي
ام طارق: ماراح اطلع لين تطلعين اختك ياجوري انتي خذيتيها من البيت ترجعينها
تركي: خاله انا اللي بجيبها مايصير خاطرك الا طيب مانبي نسبق الامور يمكن عندها عذر
ابوتركي: انسى انك تساعد هالاشكال فاهم
تركي: يبه مايصير نتنكر لهم في هالمصيبه
ابو تركي: يطلعون برا وانت شيل ايدك من السالفه ما ابي اعيد كلمتي
جوري: عمي الله يهديك هذول اهلي واخوك من لحمك ودمك
ابوتركي: بعآآآد ياجوري والله وطلع لك لسان
ابو طارق: لو ادري انها اخطت والله لاقص لسانها
جوري: ولاراح استرجي اخطي عليك بس موقفك مو موقف اخو مع اخوه ومع بنت اخوه الضايعه
ابوتركي: شفتي طولة هاللسان ان ماخليت تركي يعرس عليك جزاء لك
تركي: يبه انا ب
ابوتركي: اسكت انت.. والحين تلمين قشك وتنقلعين مع اهلك .. وانهى الحديث بدخوله للبيت
تركي واقف بلا حراك صار بين نارين
التزم الصمت لان البيت بيت ابوه ومايقدر يعارض طلوع جوري
ابو طارق: جوري جيبي عبايتك يا ابوي
ام طارق: حسبي الله ونعم الوكيل حسبي الله ونعم الوكيل حاسه انه هو ورا اختفاء ريم
ابو طارق: ان بعض الظن اثم لاتظلمين احد ياهيا
تركي: عمي انا بجيبها بس تلم اغراضها وبتلقونا وراكم
نزل فيصل ومنى من السياره
وشافوا منظرهم "اكيد مشكله جديده"
فيصل: السلام عليكم
ابو طارق رد السلام واخذ مرته وتوجه لبيته
منى تناظر في تركي وش صار
ماشافت الا الاسى مختلط مع ملامحه
جوري ماكانت فيه لان من لحظة وصول فيصل دخلت
منى: وش صار
تركي: ادخلوا ادخلوا
..............
اهل رشا بعد ماعرفوا انها اجهضت
اصرت امها تاخذها عندها وتطلق لكن ابوها رفض
لانه مايبي يخسر فلوس اذا بتخلع نفسها لان زوجها رافض مايطلق الى ماترجع له كل شي
ام رشا كان عندها استعداد لأي شي المهم ان بنتها تتخلص من حياة البؤس اللي عاشتها
وللآن مارسوا على بر
رشا كانت ساكته تبي تخف وبعدها تفكر وتتخذ القرار المناسب
وصل الشرقيه وبعد ساعتين عنده موعد مع الشخص اللي معه الاوراق الخاصه بالشغل
دق جواله تأفف
فواز من اليوم يدق عليه وحالته النفسيه ماتسمحله يرد على احد..
قرر يرد يمكن عنده شي مهم: هلا
فواز: يا ابن الناس وينك
نادر: بالشرقيه وش فيك
فواز: والله مدري وش اقول
نادر: لاتخوفني وش فيك
فواز: مو قبل فتره قلت لي اراقب منذر
نادر: ايه
فواز: هاليومين سمعته يخطط على وحده وصرت ملازمه مثل ظله..
اليوم كنت بالدوام و وكلت واحد يراقب بدالي وقال لي انه اخذ وحده من بنات الاستراحه
وراح ياخذ وحده ثانيه من المستشفى ودام اخذ وحده من بنات الاستراحه
فأكيد الدعوه فيها استدراج
نادر: طيب!!
فواز: يمكن تكون بنت عمك
نادر: لا ويييين بنت عمي ماتطلع بروحها ابد يمكن وحده من صديقاتها
فواز: والله يمكن .. قلت اخبرك بس الحمدلله ماطلعت هي...
وقفلوا
دقيقه ودق جواله مره ثانيه وهو مرهق وده ينام: هلا تركي
تركي: اسمع يانادر فتح مخك
نادر: معك معك شفيك
توه تركي بيتكلم شاف نادر انتظار مكالمه من صاحب الموعد والاوراق
نادر: تركي تركي هذا عبداللطيف ال... برد عليه مابي مشاكل من ابوي
تركي: زين دق علي لاتنسى
نادر: ان شاءالله.. يلا سلام
.............
اتجهت للشماعه خذت عبايتها ولبستها بكل هدوء..
دخل وراها واتكى عل الباب كاسره خاطره من خذاها ماشافت يوم حلو
لبست الطرحه: من قدك
تركي: ليش
جوري: اخيرا بنتحرر
تركي: وش قصدك
جوري: مايبيلها واضحه ومبروك مقدما
تركي: وش تخربطين انتي
جوري: انا بصراحه ارشح رشا الله يوفقك معها ونزلت دمعه يتيمه على خدها
راح لها وضمها
حاولت تفك نفسها
احكم لف ذراعه حولها: روحي مع اهلك
وان شاءالله باخد لنا بيت وننقل انا وانتي
جوري:خلاص ياتركي
قاطعها: فكري في ريم وادعي لها لاتفكرين في شي ثاني وانا ماراح اتخلى عنكم..
طبع قبله على جبينها
وهي بين مصدقه ومكذبه
.
.
.
.
.
ابو فيصل: مابي اشوف واحد منكم في البيت سامعين
ام فيصل: ياسلطان وش يسوون يعني?
ابو فيصل: لايرجعون الا وهم جايبين علم عن ريم
فيصل: ماطلبت شي يبه ماراح اخلي مكان الا وسألت فيه
حمد: والله خايف ان عمي محمد ورا غيابها لانه وصوله صادف اختفائها
ابو فيصل: لا عمك محمد ماظنيت يسويها
فيصل: حمد خل عنك وقوم لانظلم احد.
...............
على رجعته من بيت جوري
دق جواله: هلا دحيم
عبدالرحمن: اسمع انا بمسك الدائري
وانت الشمال نبي نتوزع مدري وش فايدة الشرطه
تركي :هم اعرف بالاجراءات حنا نسوي اللي علينا والباقي على الله
عبدالرحمن:زين يلا سلام
دق جواله كان نادر:الو
تركي:هلا توك تفضى
نادر: لاوالله باقي بقابله وش بغيت
تركي: طايحين بمشكله وين مشكله الا مصيبه يانادر
نادر: وشو
تركي: جوري كان عندها موعد في المستشفى اليوم وراحت معنا ريم ..
دخلنا عند الدكتور
نادر بقمة عصيبته: لالالالالا لاتكمل
تركي: وشفيك
نادر: بنت عمك مع منذر!!
تركي: وش دخل منذر
نادر:الحيوانه معه.. تو فواز قال لي ىان مراقبه وخذاها من مستشفى ال.....
ضرب الدركسون بكل قوته: قول غيرها قول اي شي
نادر: بسرعه الحق عليها قبل لاتنزل روسنا بالارض واذبح هالمنذر الله لايوفقه
تركي: اخ لو يطيح بيدي انا ما اعرف فيه الا سمعته البايخه من الشباب مو هو ولد مطلق عبدالله ال.....
نادر:ايه هو بسرعه
تركي: وش بسرعه اقولك سمعته واصلتني والا انا ماقد شفته بحياتي
نادر: تصرف ياتركي..
دق ع العيال وقال لهم
وبلغ الشرطه على اساس البنت مختطفه
بس احساسه يقول راحت برضاها
.............
فاقت مخدره تماما والدم تجمع حول معصمها من ربط الحبل
منذر : صح النووووووم.. جوعانه
استرجعت اللي صار: وين انا
منذر: في الكره الارضيه
ريم: تكفى رجعني
منذر: اوووما عاد تونا في بداية اللعبه
ريم: منتب خايف يكشفون انك مختطفني
منذر: لا انتي جايه برضاك
ريم: استغليتني واستدرجتني
منذر: ليش طفله
ريم: الحين تلقاهم قالبين الدنيا علي
منذر:قضايا الاختطاف تاخذ احكام سنين
بس فيما لو وانا اقول لو كشفوني بطلع بنفس اليوم
ريم: وين بتروح من ربي
منذر: لاتتبعين هالاسلوب معي وزين انك صحيتي موعد الجرعه الثانيه حان
ريم: وش بتستفيد
منذر: اشياء كثير اولها مسمى مدمنه
الحين انا مدلعك كل جرعاتك بلوشي
بس اذا تمكن مفعول الكيف وتغلغل في دمك بصير ابيعه منك نذاله..
واتحداك تلقين هالنوع عند غيري يعني زي الكلبه مهما رحتي بترجعين
ريم: حسبي الله عليك الله ينتقم لي منك الله يسلط عليك اعدائك
منذر: انطمي بس والله لو ماتسكتين لتشوفين شي عمرك ماشفتيه وجا بيعطيها الجرعه
ريم:لحظه لحظه تكفى
منذر: وش تبين
ريم: بصلي الفروض اللي طافت
منذر: شكلك بتلعبين بس من الحين اقولك الفله مافيها الا انا وانتي
والابواب كلها مقفله وطلع كومة مفاتيح قدامه
ريم: بس بصلي
منذر: اوك.. وقام اخذ جوالها وفك قيدها وطلع من الغرفه وسمعته يغلقها بالمفتاح
تحسست مكان الحبل وشافت نقطه صغيره كانت اثر الابره : الله لايوفقك
انا غبيه اوافق مدري كيف وثقت فيه
الحين وش بيقولون اهلي وانا ربي يشهد اني ماسويت كذا الا عشان ابوي
قامت توضت وطلعت تدور سجاده مافيه ..وحتى لو لقت شلون بتعرف اتجاه القبله
شافت غروب الشمس تذكرت طريقة ابوها في معرفة القبله
دعت له في سرها ولبست عبايتها واتكلت على الله وصلت الفروض
...............
راح ابو طارق وطارق وتركي للشرطه وقدموا بلاغ ضد منذر
سألهم الضابط تشكون في احد ثاني
طارق كان وده يقول عمي محمد بس تقديرا لتركي وفزعته تغاضى
.................
في الاستراحه
كان واقف عجزان يسلم فما احد انتبه له غير النمر لانه بعيد..
سلم عليه : وينك انت
- : المدام تعبانه بس ها بيني وبينك ما ابي احد يعرف اني متزوج
النمر:خلاص حفظت هالاسطوانه ماتشوف شر
-: مايجيك الشر
النمر: وسع صدرك انا جايب بنات يهبلون
شف هذيك وحده من العينه
-: خلها تجي تسليني
راح النمر وجاب بنتين:سوسو لي وميمي لك
وطالع في البنات: صبايا هذا المعزب
سلموا عليه وقعدوا
-:يسلم لي هالقد المياس
ميمي بضحكه سافرره:يسلم لي طولك وعرضك وتمد له الكاس
-: شكرا ياعسل بس مابي الحين
ميمي :ههههههههههههه وتكلم النمر الظاهر صديقك مستعجل يلا قوم معي
عرف قصدها:لا ياعمري انا جاي ابربر اسولف .. مو كفايه حبي؟؟!
ميمي وعيونها بعيون النمر:الظاهر صديقك مطوع
استحقرها واستحقر استهزائها:مو مطوع
بس تبينها على بلاطه انا عمري مازنيت
ميمي بضحكه فجرت المكان:ههههههههههههههههااااااااي
اجل وش جايبك هنا وليش فاتح هالوكر ..
اصلا دخولك هنا وانت تدري انه حرام هذي بحد ذاتها اكبر معصيه
ياشيخ فوق لنفسك ههههههههههههاااااي مطوع زمانه
قام عنها لان كلامها استفزه وده ينحرها
وكل مامشى صدم بأحدالاستراحه صارت زحمه :اقول شباب حركوا نروح الاستراحه الثانيه اكبر بكثير
هنا زحمه مره يلا قوموا مانبي نضيع اي دقيقه وقام الكل بسرعه
طلع هو وتقدم قبلهم وشغل سيارته كان بيسبقهم ع الاستراحه الثانيه دق جواله:وش عندها الزفته
-: خير
طلعت اخته استغرب: سود الله وجهك ولك عين تنافخ
-: ترا مالي خلق وش تبين
ام ايمن: الحين تجي توديني لرشا
-: اجليها يامها الحين ما اقدر
ام ايمن: احتريك اخلص علي
-: مانيب جاي مشغول
ام ايمن: لايكثر تعال الحين لاتفور لي دمي
"اصلا احس اني مخنوق من كلام هالسافره ميمي وماودي اقابلها"
كان عارف في قرارة نفسه ان معها حق
وحس باحاسيس غريبه وماكان مرتاح من اللي هو فيه وحول اتجاهه لاخته
................
خلصت صلاتها رفعت ايدها
يارب اغفرلي يارب تب علي واسترني ..
يارب ارحمني برحمتك
يارب والله ندمانه ادري هالطريق نهايته شينه بس الله يلعن ابليس زين لي المعصيه
يارب انت تدري ماسويت كذا الا عشان ابوي والا انا عمري ماطلعت مع احد
يارب اوعدك اتوب عن هالطريق وما ارجع له مهما صار
يارب يارب يارب رد كيده في نحره وانتقم لي منه الله يفضحه اذا كان ناوي يفضحني
وبكت بكت بألم وبحزن يقطع القلب
كانت ضربات قلبها تنبض بقوه ودايخه وتنفسها صعب
اكيد مفعول الجرعات اللي عطاها اياها..
شافت شي ع الطاوله قامت بسرعه له بالرغم من الالم اللي يسري في اوصالها
شافت ان هالشي كان بالنسبه لها طوق النجاه .. ومسكته قبل يجي منذر ..
............
مرت 3 ايام والوضع متردي ومتأزم
الشرطه ماخلت مكان الا وتدور منذر
كأنه فص ملح وذاب ماخلوا احد ماسألوا عنه
وكانوا متكتمين الا فواز الوحيد اللي كان واقف معهم..
ام طارق وابو طارق حالتهم تشكي لله
العايله كلها مو مستوعبين من اللي صار
معقواه اختطفت بس رجل الامن قال كانت تمشي عادي مو باين انها مختطفه
كانوا يفكرون معقوله برضاها راحت ..
اكثر وحده متأثره ساره لان ريم اكيد احد احتواها يوم كانوا ضدها ولعب في مخها
واكثر شي راسخ في ذهنها يوم حفلة عيد ميلاها والورقه اللي مكتوب فيها
"اتق شر من احسنت اليه"
كانت رساله تحذيريه
.............
كان في غرفه عند اخته يحس بضياع
حابس نفسه فيها ثلاثه ايام ومقفل جواله مايبي اي احتكاك مع احد
ومايدري وش يسوي لين متى هالنفسيه
مازالت كلمة ميمي ترن في اذنه
مطوع زمانه
"اسكر واحشش واسوي اشياء تغضب الرب يعني بسوي فيها اني رجل صالح لاني ما اقرب الزنا"
وتذكر ام ايمن بعد مارجعوا من عند رشا
حطت شريط بالمسجل لان ماعندها تلفزيون
كان الشريط من المحاظرات اللي تشلع القلب بس في نفس الوقت مؤثره
مكان يبي يسمع شي لانه حتى صلاه مايصلي ويخاف
لزمت عليه يسمع ومن يومها انقلبت نفسيته
يعني لمتى هالحال لمتى بيعيش حياة الضياع هذي
اول شي سواه توجه لتوت بيقول له لاعاد يجيب ام الكباير ذي
حرك سيارته وراح لبيته
...............
تأخر نادر في الشرقيه وقلبه معهم
بس الرجال كل يوم له كلمه وكل يوم موعد
كلم ابوه يبي يرجع الرياض لين مايفضى الرجال بس رفض ...
كان يغلي قهر وده لو يطيح منذر في يده
...............
وصل بيت توت لقى فيه سيارة شرطه واقفه عنده" اكيد كشفوا الاستراحه والبلاوي"
وانحاش
كان عنده شقه بالخرج وصلها زي البرق
دق على اخوياه محد يرد
نزل الكابينه عشان بيدق على تلفونات بيوتهم دور على اي رقم بيت يخص واحد فيهم
لقى رقم توت دق ردت عليه وحده عارف صوتها هذي امه: نعم
-: وين طلال
امه: اتركونا بحالنا الله لايوفقكم قولوا امين وقفت بوجهه
استغرب شفيها وش قال هو
وطلع من الكابينه شاف رجال هيئه ارتعد وخاف حده
مشى من عندهم لان سيارته كانت وراهم
فجأه
شاف واحد ملتزم بعد التدقيق تذكر انه صديق له ايام الجامعه''ماشاءالله يهدي من يشاء''
نواف من بعيد: يالاخو
التفت له: هلا هلا نواف.. صافحه بايد ترتعش
نواف وزاد وجهه نور:هلابك والله وش اخبارك عاش من شافك
كان يطالع في هالملتحي سبحان اللي يغير ومايتغير-: تعيش ايامك يهدي من يشاء
ابتسم نواف: اي والله يهدي من يشاء بعد ايام الدشره الله لايعيدها
بانكسار:الله يهدي الجميع
نواف:وش جابك للخرج عساه خير
-: هاا خير بس جاي لواحد هنا تعبان وكذا
عبدالرحمن: الله يشفيه
-: لاوالله جاي اسلم ع الوالده وراجع الرياض..
عندي قضيه ياشيخ هالدنيا بلاوي انت تدري اني اشتغل في الهيئه بعد ربي ما اكرمني بالهدايه
بلع ريقه: ماشاءالله وش القضيه
استأنف: كنت انا والاخوان ندرس وضع القضيه الله لايبلانا ويستر على الجميع
وقبل ثلاثه ايام جابوا لنا شله الله لايوريك بنات وشباب كانوا في حفله ماجنه نسأل الله الثبات
فكر انه من رواد وداعم هالحفلات وقال مستنكر:اناااا لله
نواف:الله يهدي شباب وشابات المسلمين
-:امين
ويجي واحد يكلم نواف
التفت نواف:يلا عن اذنك الواجب ينادي لازم امشي الحين الرياض
حاول يبتسم:في امان الكريم
مشى نواف مع الرجال مسافه يعني كان بامكانه يسمعهم
نواف يكلم اللي معه:انا اللي اثر فيني نهاية بعض اللي كانوا متواجدين في هالحفله
تخيل لقوهم متفحمين تماااما ويحاول يتذكر على ماقال الضابط كان خمسه شباب وثلاث بنات
الرجال:سبحان الله وشف السبب التماس في الاسلاك ادى الى هالموته البشعه
ارتعش اول ماجا يفتح باب السياره سوا نفسه كان يطالع السياره
او ان الباب مانفتح مايدري بالضبط وش يسوي اهم شي يبي يسمع اللي بينهم
نواف:انا مارحمت الا ام واحد منهم يوم حكالي الضابط عنها
يقول منهاره وتتحسب على اصدقاءه اللي ضيعوه تدري اني بكيت وهو يحكي لي ذكرني وش اسمه؟
الرجال:كان اسمه هشام مبارك اعوذ بالله موتته جدا بشعه
كانت زي الصاعقه نزلت عليه مو مصدق اللي يسمعه''اكيد تشابه اسماء انا لازم اتأكد''
طلع شقته دق صديق قديم
بعد السلام والتحيه
صديقه: ثلاثه ايام مختفي وينك خفنا عليك
-: شفيك
صديقه: كنت متأكد بيأثر عليك موت النمر والشله
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك