رواية يا لبيه يا الدنيا العجيبة -43
جوري:وش فيه
كان وجه ندى متغير:ابوي يبيه
جوري:خلاص انا اقول له
ندى:بسرعه الله يخليك.. وراحت
جوري حست بخوف وش اللي صار
جوري:تركي
تركي مارد
جوري: امداك نمت
تركي من ورا اللحاف :جوري ترا حدي معصب
جوري مامنعها خوفها انها تتبسم ودها تضحك على شكله:طيب انزل عمي يبيك
تركي:وش يبي
جوري:مدري تو ندى قالتلي يبيك بسرعه
قام تركي: يااااا هالليله... بدل ونزل
.............
نزل الصاله وتنحنح
ام تركي: تعال البنات رقوا يريحون
دخل شاف امه وابوه وعبدالرحمن وندى
تركي: وينها منى ونادر
ندى:منى اخذها فيصل ونادر فوق
التفت لابوه: آمر يبه شفيك
ابو تركي: وش عندك فوق
استغرب:بنام
ابو تركي: الساعه كم
طالع ترركي الساعه اللي كانت بالجدار:9ونص
ابو تركي:بتنام الحين
تركي:اي والله تعبان.. امر بغيت شي
ابو تركي:يعني بتصحى بدري
تركي:ان شاءالله
ثار ابو تركي: نايم الحين ؟؟
والشركه مايطلع الموظفين منها
الا 11 وانت اللي يقالك راعي الحلال تاركه وبتنام الحين
تركي: بس هالاسابيع حيلي مهدود
والا اليوم داومت ومن بكرا ان شاءالله يبه بداوم من 7 لين 3العصر..
ابو تركي: والليل من بيقابل الحلال ان شاءالله
عبدالرحمن: يبه وانا وخالد وفيصل وطارق...
ابو تركي:وليش هو موب رجال والا جايزتله القعده هنيا مثل الحريم دلوعة امه
تركي انحرج:يبه انت وش تقوووول
ام تركي:ندى اطلعي فوق ..
ماتبي هيبته تنزل من عيون اخته ..وطلعت
عبدالرحمن:تركي ياخي خلاص..
والتفت لابوه والله يبه الاسابيع اللي راحت ان تركي شايل الشغل كله على راسه
ام تركي:يا ابو تركي تركي ماعاد هو بزي قبل الحين
عنده حرمه يعني زين انه يداوم من 7 الصباح لين 3 العصر
ابو تركي:مو شغلي انه ماقدر يوفق بين شغله وزواجه
تركي:انا ماقصرت في شغلي ولاتنسى انت من اجبرني ع الزواج
والحين يوم رضيت فيها تبيني احقرها طول اليوم واقابل الاوراق
ابو تركي: تداوم غصب عليك وجوري ماهيب طايره
عايشه معززه مكرمه وش تبي بعد
تركي: ودي لو مره تتفاهم معي بهدوء ..
ودي لو مره تشكرني بعد اللي سويته لك ..
يبه انت ليش كذا نسيت وقفتنا معك والحين اطلب الرحه تسوي بي كذا
اسمح لي ماراح اقعد وطلع..
وطلع عبدالرحمن وراه يهديه
ام تركي: انت كل شي عندك تجبرهم وتامرهم
ابو تركي:انتي وش تقولين يامره عطيني شي واحد بس انا اجبرتهم فيه
ام تركي تبكي:دايم تقول هالجمله
والله يا ابو تركي مابيك تزعل مني انت داري عمري مازعلتك بس الحق ينقال..
كل شي عندك اوامر والا تفرض عليهم اشياء مايبونها وخااااااصه
يعني شف عندك تركي اقرب مثال زوجته غصب عليه
مع انه كان من حقه يختار شريكة حياته بنفسه ماهو عيب ولا حرام..
ابو تركي:يعني جوري ماهيب كفو يعن...
ام تركي تقاطعه:والله كفو وشيخة البنات
وكل وحده تتمناها لولدها بس انت قايل اعطيك شي واحد على انك تجبرهم
والانسان ينغصب على اي شي الا الزواج
ابو تركي:يامره انتي بتجنيني وش هاللي قاعده تقولينه..
انا اجبرت تريك لانه مايعرف مصلحته
ام تركي:رجال طول وعرض فاهم و واعي اكيد يعرف مصلحته
واكثر واحد بعد يعرف مصلحة غيره في كل شي وانت بنفسك تعتمد عليه
بعد الله واخر دليل يوم تضيع الورقه
ابو تركي:لطيفه اسكتي عني خلاص وفارقي
ام تركي:انت ماتعصب بالطريقه ذي الا اذا كنت غلطان..
بحياتي ماغلطتك بس تجي على تركي ماراح اسكت
واللي يصير يصير مو كفايه سلبته حقه انه يقرر مصيره ويختار طريقه..
وجاي الحين تلومه بعد ماتزوج وتبيه يكرس حياته للشغل
ابو تركي عصب:وبعد تغلطيني اصلا كلكم ماتعرفون مصلحتكم
لوما انا كان ضعتوا وبالذات تركي اللي ماسكه راسك فيه
ام تركي ترفع صوتها: ترا ماهوب صغير عمره 30سنه يعرف مصلحته ويقدر يتخذ قراراته بنفسه..
ولو اخطأ في قراراته هو المسؤول عنها..
المهم علينا اننا نوجهه ونخليه يختار
ابو تركي بسخريه:انتي يالجاهله توجهيني وتعلميني مصلحة عيالي
ام تركي:والله ماغيرك الجاهل والا وش نفعتك شهاداتك
ابو تركي استجمع قواه وبكل قوته عطاها كف مسكينه طاحت ع الكنبه
وانصدمت اول مره يمد يده عليها صح هو قاسي معها
بس طوال زواجها فيه ماقد رفع ايده عليها
وانصدم نادر اللي توه نازل
شاف ابوه واقف والشرر يتطاير من عيونه
وامه قاعده ع الكنبه وكان تنفسها بطيئ ووجها احمر
نادر:يبه وش سويت
ابو تركي طنشه ويكلم ام تركي
اللي كانت مبققه عيونها من غير دموع:معك شهادة الثانوي وجايه تعطيني دروس
ومواعظ مو كفايه علي متحمل جهلك ياجاهله ..
لا وبعد تقارنين نفسك فيني انا وين وانتي وين..
الغلط مني ماخذ وحده مو من مستواي والله بتضيعين عيالي بعقليتك
نادر ماتحمل الوضع وصرخ في ابوه:يبه مو عيالك وحدك حنا عيالها ونفتخر فيها
ابو تركي:ا ياقليل الحيا وترفع صوتك علي عشان هذي
نادر قاطعه:هذي امي وام تركي وام عبدالرحمن
وام منى وام ندى عيالها مثل ماحنا عيالك ..
حتى في هذي تبي تتملكنا لحالك
ورفع ايده بيعطي نادر كف لكن ام تركي قطعت عليه بصرخه قويه
ومحزنه تقطع القلب طلعت منها وطالعوا فيها لقوها
يالله تتنفس وماسكه على صدرها
نادر مسك ايدها:يمه وش فيك..
ام تركي تبي تتكلم مو قادره
ابو تركي قعد جنبها حس بندم فظيع:لطيفه وش فيك تكلمي
ام تركي دموعها تنساب على خدودها وصار وجهها ازرق
نادر دمعت عيونه:يمه وش تحسين فيه..
يمه واللي يخليك ردي
ابو تركي :قم قم جيب عبايتها خل نوديها المستشفى .. طلع نادر زي الخبل
تركي شافه اللي كان قاعد مع عبدالرحمن في المجلس طلع على طول
تركي:هيييييه نويدر وش فيك
نادر يلهث :امي تعبانه بجيب عبايتها .. وهبوا الشباب للصاله
شالوها وحطوها بالسياره
عبدالرحمن كانت معه ندى اللي سمعت اصواتهم واصرت الا تروح
وهي تبكي وساره وجوري كانوا ورا
والسياره الثانيه ابو تركي يسوق ونادر اللي اصر انه مايسوق
هو وتركي قعدوا معها ورا كان تركي يدلك يدها وخايف مره
وابو تركي كان بنفس الحاله وازود ونادر اكثر واحد كان متأثر ومنهار..
سمعوها كأنها بتقول شي
ابو تركي مرعوب:وش تقول؟
نادر:مدري ماهي قادره تنطق
ام تركي تهمهم
تركي:يمه خلاص لاتحكين اهدي الحين نوصل
ام تركي بصوت متقطع:ترركي
تركي دموعه تنزل:سمي
ام تركي: سامحني يمه انا ماوقفت معك
تركي عرف قصدها:والله يمه اني راضي فيها الحين..
والله مرتاح معها والله وفقني والسبب رضاك يالغاليه
ام تركي:ولا اوصيكم على ندى
ابو تركي زاد في سرعته:اذكري الله يالطيفه اذكري الله ماله داعي هالكلام
ام تركي:ابو تركي
ابو تركي دموعه تنسكب انسكاب على خدوده:سمي يالطيفه
ام تركي تنفسها صار ضيق: الله يسامحك دنيا واخره
نادر انهار وبكى في حضنها:يمه واللي يعافيك لاترهقين نفسك ارتاحي ولاتتكلمين
ام تركي ماسكه على صدرها وعيونها شاخصه
تركي:يمه يمه افتحي عيونك الحين نوصل
وصلوا الطوارئ وعلى طول جوا بالعربه
حقة الاسعاف
فيصل:لاحول ولاقوة الا بالله من قال لك
ابو فيصل:عمك تو قال لي وانا وامك رايحين المستشفى وانت بطريقتك قول لمنى
فيصل ارتفع صوته:يبه شلون وش اقولها
ابو فيصل:تصرف يافيصل
منى كانت بالمطبخ سمعت صوت فيصل
يقول وشلون وش اقول لها خافت ودخلت وعيونها عليه ..
تمت واقفه
فيصل ارتبك قام لها وقعدها ع السرير وقعد جنبها
منى خافت اكثر:وش صار وش ..اللي وشلون تقول لي
فيصل ضمها:هدي نفسك حبيبتي ماصار الا الخير
منى تبعده عنها:فيصل الله يخليك قول اهلي صار لهم شي ابوي صار له شي
فيصل ماقد انحط في هالموقف
ومايدري شلون يتصرف:منى ياقلبي ابوك مافيه الا العافيه
بس خالتي شوي تعبانه الحين نروح نتطمن عليها
منى:امي وش فيها وش صار لها
فيصل رجع ضمها:استهدي بالله الحين اوديك وتطمنين عليها..اووك حياتي..
منى:طيب بقوم البس
............
بالمستشفى كان الكل موجود
هذي الغاليه ام تركي ياما ساعدت الكل والحين هم جايين عشانها
كان نادر جالس باول كرسي وحاط ايدينه على راسه وجالس قدامه خالد يهديه
وعبدالرحمن لاف الغتره على وجهه بدون عقال وحمد معه
منى تبكي وفيصل قاعد جنبها يهديها وامه من الناحيه الثانيه تقرا عليها
وندى منهاره وام طارق ضامتها على صدرها والبنات حولها
وتركي رايح جاي بالسيب شاف ندى مره حالتها صعبه
راح عندها تفرقن البنات وضم اخته:امي تبي تقوم ان شاءالله بس ادعي لها ..
ندى متمسكه في اخوها
جوري قعدت جنب دانه
دانه: وش صار لخالتي لطيفه
جوري:والله مدري كنت فوق وسمعت صوت ندى تبكي
نزلت اشوف قالت امي تعبانه وجينا هنا
وجرت دموعها على خدها لان ام تركي تعتبرها امها الثانيه تحبها لابعد درجه
ام طارق:جوري يمه اذكري الله مو زين الصياح الحين
وتركي لازالت ندى في حضنه تبكي بحرقه اخر شي شال شماغه
وغطى على عيونه واهتزت اكتافه بدون صوت
عبدالرحمن مسك ندى وقعدها جنب ساره تهديها
عبدالرحمن:تركي قول لا اله الا الله توك تهدي ندى
تركي بصوت مخنوق:هذي الغاليه ياعبدالرحمن الغااااااليه
قام ابو فيصل وراح لتركي ومسك وجه تركي:تررررركي
تركي غمض عيونه تمنى ان اللي فيه كابوس وبيصحى منه
وبعدها بيتعوذ من الشيطان ويرجع ينام
بس قطع افكاره صوت ابو فيصل:تركي اسمعني زين
فتح عيونه وتأكد انه على ارض الواقع
ابو فيصل ركز في عيونه:امك بتقوم بالسلامه ادعوا لها بسس
وفجأه جا ابو تركي وقال بصوت هادئ:
تركي هدي نفسك انت الكبير خلك اقوى من كذا عشان خواتك يستمدون منك القوه
اول ماسمع نادر صوت ابوه شد على شعره وطلعت منه ااااه مكتومه
كان اكثر واحد تعبان لانه شاف امه ويدري باللي صار والسبب اللي جابها المستشفى
طلع الدكتور
قام الكل
ابو تركي:بشر دكتور
الدكتور:ذبحه صدريه مفاجأه والواضح اول مره تجيها بتأثير صدمه قويه..
نادر ماشالته رجوله قعد ع الارض
تركي مستغرب''صدمه'': ذبحه صدريه .....وصدمه قويه..
الدكتور:اه والحاجه ماتحملت..
نادر:ااااااااااااااااه
تركي مسك الدكتور:تعال انت وش تقول
الدكتور نزل راسه:البقاء لله
منى:يمممممممه لااااااااا.. ضمها فيصل خايف عليها
ندى انهارت:امممممي رااااااااااااااحت لااااااااااا يممممه
طلبتك لاتخليني وتروحين يمممممه ما اقدر اعيش من دونك..
ااااااااااااه يايمه حبيبتي لاتروحين
تركي:يعني خلاص امي راحت ماراح ترجع ماراح نشوفها بعد اليوم...
ياااااااايمه ليته انا ولا انتي لييييييييييييييته انا
وقعد في الارض مع نادر وضمه وبكوا من قلب اشكالهم تحزن
عبدالرحمن غطى وجهه بغترته وبكى بكاء مرير :الله يرحمك يمممه الله يرحمك
والكل بكا على فراق ام تركي القلب الحنون اللي ماقد غلطت على احد
وابو تركي جالس ع الكرسي يحس سكاكين تقطعه من تأنيب الضمير
نادر ماسك في تركي ويبكي:امي راحت ياتركي راحت وخلتنا
تركي يبكي بحرقه مو قادر يتكلم
جا حمد وخالد وفكوهم عن بعض وقوموهم عن الارض
حمد:تركي استخلفوا خير فيها
نادر راح وقف قدام ابوه:ارتحت الحين..خلاص ارتحت؟؟
ابو فيصل:ولد عيب تكلم ابوك كذا مو كفايه اللي هو فيه
ابو تركي يمسح دموعه بطرف شماغه:خله يا ابو فيصل خله
نادر بوقاحه:ايه اكيد بتقول كذا لانك انت السبب
عبدالرحمن ماتحمل وقاحة اخوه على ابوه:نااااادر كفايه اللي صار لنا
نادر يطالع في عبدالرحمن
ويأشر على ابوه:تدافع عنه والله انه سبب موت امي
سمعها كلام ماينقال وضربها وهي ماتحملت اللي صار لها
اندهش الكل
تركي رفع راسه:ضربهااااا!!
نادر يبكي:ايه وماخلا كلمه ماقالها لها انتي جاهله..
ومو من مستواي..
والله ياتركي حرقها حرق بكلامه وكمل بالكف اللي خلاها تطيح
ابو فيصل مسك نادر وطلعه معه بالقوه
تركي وعبدالرحمن وندى يطالعون ابوهم اما منى ماتحملت واغمى عليها
ابو تركي تم ساكت وكان ابو طارق خايف عليه لايلحق مرته
.
.
.
.
نهاية البارت قراءه ممتعه
*سر جوري!
*سر حمد!
*قصة منى وفيصل!
*سر نادر وعبدالرحمن!
*موت ام تركي!
*اختفاء رشا!
فرحوني بتوقعاتكم عليها.. وش وراهم هالاشخاص
.
.
.
مدري انا حسيت فيه بعض الاحداث نزلتها من قبل او يمكن لا لاني اكثر من مره اعيد اقراها
اذا فعلا فيه احداث نزلتها من قبل واليوم نزلتها فاعذروني والله متلخبطه
ان شاءالله يوم السبت راح انزل ((الاجزاء الاخيره تحت بارت واحد)) يعني النهايه
وسوري لانو ماسويت كومنت لبعض المجتهدات معي اللي كل بارت يفرحوني بتعليقاتهم وتوقعاتهم
وباذن الله يوم السبت راح يكون لهم شكر خاص مع ذكر اسمائهم بس مو على لساني لا
على لسان ابطال روايتنا..
حركه جديده حبيت افاجئكم فيها
امس سهرت عليه وسويت اضافات وان شاءالله تطلع بالمستوى المطلوب
موعدنا الاحد ان شاءالله
البارت((25)) والاخير
.
.
.
.
.
.
بعد مرور شهر من وفاة ام تركي
دانه ونوف كانوا ينامون عند ندى
مايبون يفارقونها دقيقه طول وقتها تبكي
مافارقت غرفة امها دقيقه
تشم ريحة هدومها وحاضنتها
بس تسلت عقب هالشهر مع البنات
ورضت بقضاء الله وقدره
عبدالرحمن كان يداوم ويرجع البيت ينام
ماله خلق احد وساره كانت تهيئ له سبل الراحه
تقديرا لحالته وطبعا ماتخلو مواقفهم من خفة دم ساره
اللي كان يبتسم عليها رغم المعاناه اللي مرت عليه
نادر من غرفته للمسجد ومن المسجد للغرفه
رافض اي احتكاك مع الكل.. حتى اتصالات دانه مايرد عليها
شوفته لامه تموت قدام عيونه منغص عليه عيشته
منى كان فيصل جنبها و واقف معها
واثبت انه يعتمد عليه في المواقف اللي زي كذا ..
وعيالها قدروا يسلونها بس كل ماتذكرت امها فرت دمعه من عيونها
وابو تركي من بعد ام تركي ماصار يدخل البيت
كل مكان فيه يذكره بأم تركي وطول وقته ونومه واكله وشربه في الخيمه
وكان ابو طارق وابو فيصل يطلون عليه يوميا
وتركي استقل بشغله وناوي بعد يستقل في بيت بروحه
بس يبي ندى تتسلى شوي وينقلون
.............
يوم جديد
ام طارق اللي كانت في بيت ابو تركي
تجي يوم عن يوم:جوري فيه وحده تبيك ورافضه تدخل
جوري: من هي
ام طارق:قومي شوفيها
راحت لقتها واقفه
سلمت عليها:عظم الله اجركم وغفر لميتكم
جوري: صوتك مو غريب علي.. انتي؟!!
الحرمه:ايه السموحه مادريت والله والا لو اني سمعت الخبر بوقته كان جيت
جوري مو مستوعبه وحبت راسها: صراحه والله مدري شلون اشكرك انتي واقفه معي باتصالاتك
من مده في مواقف كبيره واخيرا تحققت امنيتي وشفتك
وربي جميلك بشيله طول عمري فوق راسي والله يمدني بالقوه وارجعه لك
الحرمه:يشهد الله اني ما ابي شي وانا وقفتي معك خالصه لوجه الله سبحانه
جوري: وربي كفيتي و وفيتي وانا والله ان طال عمري ماغير ارده لك
الحرمه تبكي: انا ما ابي شي من هالدنيا الا حاجه وحده ومستحيل تحقيقها
جوري:لاتبكين ياخاله ان شاءالله ابيض وجهي قدامك
الحرمه: فديتك.. يلا انا استأذن
جوري: ادخلي ياخاله
الحرمه:ولدي برا مستعجل
جوري: الله معاك وبينا اتصال كالعاده
الحرمه:ان شاءالله
وطلعت
جت جوري بتدخل قابلها تركي
شافت الشحوب بوجهه
تركي: جوري
التفتت له:هلا
تركي: من هذي
جوري: معرفه قديمه ماقصرت جت تواسينا وتعزينا
تركي:جزاها الله خير
جوري: وين كنت
تركي: بمكتب العقار شريت لنا بيت كلها ايام وننقل
جوري:صادق
تركي: ايه.. وشال ايدها وباسها واردف: وتكفين بدون اسئله لاني ماراح اتراجع
جوري: مايخالف على راحتك بس كان صبرت شوي
تركي: لاتخافين موب الحين بننقل
جوري: اللي تشوفه
............
نوف:قسم بالله بقوه كاسرين خاطري
دانه: الله يجبر كسر انفسهم ماينلامون
دخل حمد:السلام عليكم
البنات:وعليكم السلام
حمد: دانه شوفيلي اكل جوعان
دانه: الحين اقوم
نوف: حمد دق عليك واحد يقول يبيك ضروري
حمد:ماقال اسمه
نوف:اسمه غريب نسيته بس اتوقع قال لقب حتى ضحكت في نفسي عليه
حمد:لقب؟
نوف: ايه بس نسيته.. اووووه تذكرت قال الفقير الى الله
حمد ارتبك:انا طالع
طلعت دانه بالاكل:تعال وين واللي جبته لك
حمد:ما ابيه ما ابيه وطلع
دانه:شفيه
نوف:مدري عنه
...........
كانت جالسه بالصاله مع عيالها
منى: بسم الله مالك خمس دقايق طالع نسيت شي
فيصل: انكب زيت السياره علي ببدل واطلع
منى قامت معه: ابقوم اساعدك
راحت معه الغرفه
وطلعت له ملابس
في اثناء ذلك جته رساله
قراها وتهالك ع السرير
منى:شفيك
مارد عليها وتم ساكت
منى: هذا حالك من تجيك رساله تتغير علي
ياخي قدر اللي انا فيه ان كان بحياتك وحده ثانيه فهذا مو وقتها
فيصل: وش تقولين انتي
منى:اللي سمعته.. انا كنت اسدي نصايح للكل
وعلى قول امي الله يرحمها انا عاجزه في مواجهة مشاكلي واني القى لها حلول
فيصل: ممكن اتكلم
منى: تتكلم وش بتقول خلاص الكلام ماعاد يفيد ا
لله يهنيك معها
فيصل: مجنونه
منى: صدقت لاني بالرغم من هذا ماراح اطلع من البيت ع
شان عيالي بس والدور اللي فوق خذه لها ع الاقل تاخذها بالحلال احسن من اللي تسويه
فيصل: تصدقين اني فرحان هاللحظه لدرجه ماتتصورينها
منى: اكيد بتفرح انسانه ساذجه مثلي تسمح لك بالزواج
قام لعندها وضمها
منى: لو سمحت فيصل وخر
فيصل: انا مكتوب لك وانتي مكتوبه لي واسف والله والله والله اسسسسف
منى مستغربه:على ايش
فيصل: الشيطان ماخلى احد في حاله لعب في مخي وربي اسف
منى:طيب من ايش لاتجنني
فيصل: قسم خجلان اقولها بس آسف اني شكيت فيك
منى:انا تشك فيني؟؟!
فيصل: والله حتى اني ما اصنفه شك شك.. ولو اني شاك مره كان واجهتك
منى: شوف انا بسكت وبسمع اللي عندك ابي افهم وش اللي صار
فيصل:انا اعلمك...
دايم تجيني رسايل عنك وانك مو مضبوطه
سكت بيشوف ردة فعلها
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك