رواية كبرياء امرأة -5

رواية كبرياء امرأة -5

وهو يجر اللحاف عليه بصوت مسموع كله احتقار : تخسي الا هي ترفضني .
الفصل السادس
مر على موضوع الخطبة أسبوع ، سعيد وأبوه كانوا عرفين الرد بس في نفس الوقت ما فقدو الأمل مع طول المدة على الرد ، بصوره عامه بيت أبو سعيد وبيت أبو راشد تسيطر عليهم حاله من التوتر والقلق تزيد مع طول فترة الانتظار ، بس الشئ اللي كان غير متوقع في بيت أبو راشد أن راشد هو اللي يكون معصب على تأخر الرد من وضحه . كان مثل الكبريت ما حد يقدر يكلمه الا شب فيه .. وبعد اليوم الرابع صار رايح جاي يسال أمه ردوا ولا ما ردوا عليهم .

كان يفكر في وضحه ايش اللي يخليها تتأخر في الرد عليهم كل هذا الوقت .. على ويش شايفه عمرها واتعزز عن الرد وهي في النهاية بتوافق بتوافق . تبي تبين للناس أني ما أناسبها عشان كذا بتفكر مليون مره قبل لا توافق . يلعن أبو الزفت إلى ذي الدرجة وصلت معاها . والله ما قاصر الا أنها ترفضني بعد والله تسويها . لالالالا مستحيل تسويها أصلا هي تبيني ولا ما كانت انطرتني كل ذي السنين . صدق أنا يوم طلعت من ثالث ثانوي ودخلت الجيش كانت أبي أتزوج مثل باقي الشباب بس أبوي الله يهديه ما رضى وقال ما لك الا وضحه بنت عمك اصبر على البنت توها في الابتدائية خلها تدخل الإعدادي ويصير خير. وبعد ما قضيت ست سنين في الجيش وفنشت عشان ارجع أكمل دراسة .. أخذت الشهادة الثانوية .. ويوم بغيت أسافر وأكمل دراسة برى قلت أتزوج لي وحده وأخذها معاي برى خلاص أنا كبرت . قالوا مالك الا وضحه بس هي خاطرها تدخل الجامعة اصبر بعد شوي . كرهت وضحه من كثر ما دخلوها وحكموها في مستقبلي .. بس صبرت وسافرت ودرست سبع سنين تخصص وخمس ممارسه وسنتين زمالة . لا او هي ما تبيني ليه ما تكلمت؟؟ .. كان من أول مره رجعت فيها بعد التخصص وما خطبتها . رضت بغيري ما انطرت سبع سنين ثانيه .. بس كيف بتاخذ غيري وأنا محيرها وبدون أرضاي ماهي بمعرسة . ولا يمكن أتخير فيني وفي البزر عبود تسويها . اصبري علي يا عجوز النار أن ما واريتس . ولله لا محق زمانس بس انتملك .

أما وضحه تملكها شعور غريب مزيج من اللذة و ألامبالاة تجاه الكل وهي تشوفهم كل يوم يكلمونها وفي عيونهم اللهفة عشان يسمعون ردها .. كان البرود مسيطر على أعصابها يمكن لأنها استنزفت كل طاقتها في الأيام اللي طافت . أو انه رد فعل عكسي للموضوع . وضحه اخفت السالفة عن صديقاتها في المدرسة الا سارة طبعاً .. سارة لما أسالت وضحه عن رأيها قالت لها وضحه نفس الكلام الي قالته لسعيد .. سارة ما اقتنعت بكلام وضحه لكن ما أوصلت مع وضحه لشئ .

يوم الخميس وضحه كانت مقرره أنها ترد على أبوها اليوم . طولتها وهي قصيرة.. السالفة طاف عليها أسبوع .. وقالت بكره اجازه واللي بعده اذا صار شيء ما شيء أنا أصلا اجازة .. وبعدين أقوله وهو برى البيت أحسن عن لا يحتشرون علي هل البيت.. وبلغت وضحه أبوها الخبر آخر النهار وهي في المدرسة استغلت فرصة انشغال البنات عنها في توزيع الشهادات واتصلت لبوها .. حست وضحه بعد ما قالت لها بسكون غريب ينبعث من داخله ويزحف في كل الغرفة مثل الدخان ..

أبو سعيد هو بعد ما اجل الخبر على طول اتصل وبلغ أخوه الخبر .

أبو سعيد : الو . السلام عليكم

أبو راشد : وعليكم السلام . حي الله ذا الصوت والله .

أبو سعيد : الله يحيك ويبقيك .. وشحاك يا اخوي .. وش حال أم راشد والعيال ؟؟

أبو راشد : والله الحمد لله كلنا بخير وبسهاله . بشر يا محمد أعلوم وضحه ؟

أبو سعيد : .. والله يا زايد يعلم الله أني يعز علي أردك في شيء .. بس البنت ما لها خاطر في العرس .. وأنا يا اخوي ادري أنها مثل بنتك وأنا شورها في يدك قبل لا يصير عندي . وادري أني لو بغصبها على العرس أنت اللي منت براضي .. أبو راشد على الرغم من انه كان حاس ان هذا الزواج ماهب تام . اصدمه رفض وضحه وخصوصا بعد ما عرف من أم راشد لهفت راشد كل يوم على الرد .. بس ما قدر الا انه يرضى بالأمر الواقع خصوصا انه يدري ان راشد مغصوب عليها . لو كان راشد هو اللي يبيها كان ما رضا بهذا الكلام واقنع أخوه انه يغصبها على الزوج وبيكون متأكد أنا راشد بيغير رأيها عقب ما يأخذها .. لأنه اللي يبي وحده بيحطها في عنه. وقاطع أبو سعيد : اسمع يا محمد وضحه بنتي وأنا صدق أبيها لولدي بس هو ما هب أغلى منها عند .. وقال هذا الكلام وهو يفكر كيف رب العالمين نصرها عليه من غير ما تدري . ورجع يكمل . ولا عاش من يغصب وضحه على شيء وأنا راسي يشم الهوا .

الساعة وحده ونص الظهر في بيت ابو راشد . في الصالة راشد كان قاعد يقرا جريده جايبها معاه وهو جاي من المستشفى بعد مخلص أوراق التعين .. أما عبدالله كان يفرفر في التلفزيون دخل عليهم ابو راشد وهو مغندم . ابو راشد : السلام عليكم ..

راشد و عبدالله : وعليكم السلام .

ابو راشد : عبدالله أمك وين ؟

عبدالله يقول في خاطره أبوي راضى على اليوم يقولي عبدالله .. العادة عبود . بس ليه عاد ما اخبر مسوي شيء يستأهل . والله اخف تقلب علي يا ابو راشد .. ورد على أبوه : تنكب الغدا . أقول يبه كيف حالك اليوم ؟ وكيف الشغل معاك ؟؟

رد ابو راشد عليه وهو يشوف راشد اللي منزل رأسه في الجريد يبي يتجنب اى اشتباك مع أبوه : بخير .

دخلت أم راشد والغدا معاها . حطوا الغدا ونادوا سعد ونوره . اقعدوا الرجاجيل على الغدا وأم راشد ونورة جلسوا على جنب يسالفون عن تجهيز ثياب المولودة .. فجأة ابو راشد رفع رأسه عن الغدا وقال : شيخه ترى محمد رد على اليوم عن الخطبة .

هنا الكل سكت . وراشد تجمدت يده على لقمته وهو يشوف أبوه ينطره يكمل. حاول راشد انه يتمالك نفسه ما عرف ليه بس حس ان قلبه من كثر ما كان يدق الكل اسمعه .

أم راشد وهو تشوف راشد: بشر ؟

لف ابو راشد على راشد ولد وهو وفي عينه نظرات شماتة واحتقار وهو يرد على أم راشد : يقول ما في نصيب .

أم راشد وهي متفاجئة : ليه ما في نصيب ؟؟ وش ذا الكلام ؟

ابو راشد : يقولون وضحه ما تبي راشد .

أم راشد كانت بالفعل متفاجئة بهذا الرد وما توقعت ان وضحه بترد راشد . وحتى إذا ما بغته أكيد أبوها وخوانها بيغصبونها .. سعد ونورة كانوا منصدمين من اللي صار بس ما فيهم واحد تكلم .. عبدالله هو اللي بالفعل كان مستغرب . المسكين وجهه كان عبره عن علامة استفهام كبيرة وهو يقول : وضحه قالت ما تبي راشد ؟ وعمي هو اللي قايل لك ؟؟ ابو راشد : لف صوب عبدالله : إيه محمد هو اللي قايل لي ذا الكلام بنفسه اليوم ..

عبدالله : الصرحه . ما ني بمصدق ان عمي بدل أم يغصبها يقول ما تبي تطور والله .. بس تعال . وضحه ليه ما تبيه ؟ هو صحيح ما تنلام اخوي العزيز راشد يجلط .. بس بعد أبي اعرف ليه هي ما تبيه ؟

ابو راشد وهو ينفض أيده بيقوم من الغدا : قدرة رب العالمين

ما يسوى شيء الا فيه صالح.

راشد اللي ضل ما سك لقمته في يده وهو منزل رأسه في الأرض وكلام أبوه يتردد في رأسه . وضحه ما تبي راشد .. وضحه ما تبي راشد . وضحه ما تبي راشد . هي من تكون عشن ترفضني . هي ولا شيء . على ويش مانه بعمرها . على الشين وفطر العين . وضحه ما تبي راشد . الله لا يبغيس بخير .. أنا اللي تتمناني بنات القبايل ترفضيني يا العجوز .. أنا . أنا .. إيه أكيد ما تبيني .. وش جاب الكبير إلى الصغير .. ( كان يفكر في عبدالله ) . شباب ووسامه .. تبيه يعيد لها شباب الضايع .. العجوز ما تبيني أنا . إيه عبود بزر إلى خذاها بتزابي به قدام الناس .. بيقولون الرجاجيل التذابح عليها .. الكبير والصغير وهي تنقت فيهم .. الله لا يعطيني عافية ان ما راويتس .. أصلا هي كيف تسمح لنفسها تفكر مجرد تفكير ترفضني . وعمي كيف يخليها على كيفها . كيف ما دبغها يوم قالت ما أبيه . أحسن شيء ان أنا اللي أدبه . أي لزم أدبه بعقال ألين ما تقول بس . وضحه ما تبي راشد . انتبه راشد على صوت عبدالله وهو يسال صدق راشد وضحه ليه ما تبيك ؟؟ أكيد مسوي شيء كبير عشان تعافك ؟

راشد لف على عبدالله وبكل طاقة الاستنكار والحقد على اللي صار رد على عبدالله : تدري ليه ما تبيني . لان العجوز ما تبي الرجاجيل .. أتشفق على البزران .. الظاهر خاطرها فيك تبيك تجدد لها شبابها .. واللي خلا راشد يسكت فجأة كان كف على وجهه من أبوه . وقال وهو ما سكه من ثوبه : جب ولا كلمة . والله لو عاد تعيدها وتقول ذا الكلام عن وضحه أني أذبحك ذباح .. الله يزولك . فضحتنا في الله وخلقه .. الله لا يوفقك . قال ابو راشد كلامه وهو يشر على نورة اللي كانت تبكي من الكلام اللي قاله راشد على أختها .

الجزء السابع :

سعد وعبدالله كانوا يحاولون يفججون راشد من يد أبوه . أم راشد كانت تترجى ابو راشد انه يفك راشد .. راشد حاس انه وسط دوامه كبيرة أصوات ناس يعرفهم بس ما يفهمهم . وما استوعب اللي يصير له الا لما دزه أبوه على الأرض وطلع وخلاه . رفع رأسه . شاف سعد ماسك نورة من يدها ويطلع هو معها . أمه كانت قاعدة على الكرسي وتبكي .. عبدالله كان واقف يشوفه بنظرات كلها غموض . بعدها قرب منه عبدالله ومد أيده يحاول يرفعه من الأرض بس راشد دز أيده وقام بسرعة وراح غرفته .

راشد كانت حالته حاله دخل غرفته وقام ينثر كل الكتب اللي على المكتب في الأرض .. مسك رأسه بيده ورفع رأسه للسقف .. كان حاس انه بيختنق .. اخذ اسوجه وطلع من البيت .

سعيد كان يحاول يهدي الموضوع مع نورة .. قال وهو يلمها : نورة الله يهديس اللي يشوفس يقول ميت لس حد . يلا مسحى دموعس السالفة ما تستأهل .

نورة : سعد كيف ما تستأهل ما سمعت وش قال عن وضحه . وضحه اللي ينصلا على طرف ثوبها يقول عنها أنها أتشفق على عبود ؟ . وضحه .. حرام عليه ..

سعد : أكرام عليها بنت عمي من العلوم الشينه .. بس عاد يا نورة راشد بعد ما ينلام .. من حرته قال ذا الكلام .. تدرين انه محيرها من زمان . وانه كان يبي يعرس من زمان وكذا مره تتأجل السالفة . والحين ترفضه بعد ذا العمر وهو ينطرها ؟ .. من حقه انه يعصب .. خصوصاً انه صار رجال كبير..

قاطعته نورة : سعد أنت ليه تقلب الحقيقة وضحه هي اللي تنطر راشد . راشد كان يقدر انه يعرس في أي وقت لكن وضحه هي اللي غصباً عنها كانت تنطره .

سعد : بيعرس بدون أرضا والديه . واصلاً هو من قبل حتى لا يفكر في العرس وهم يقلون له ما لك الا وضحه. وبعدين أنتي تعرفين ان راشد ماله في الحريم ولا الخرابيط . وين بيعرف وحده عشان يأخذها ؟

نورة : حتى ولو هذا ما يعطيه الحق انه يقول عنها ذا الكلام ؟ صدق أنا انصدمت مثله ويمكن أكثر منه بس بفكر بألف سبب وسبب الا الكلام اللي قاله ..

سعد : لنس أختها وهو اللي يبيها . نورة الله يهديس اسمعيني عدل كل ذا الكلام ذا الحين ما منه فأيده المهم انس تنسين ذي السالفة وما في داعي حد من هلس يدري بها .

نورة : الله يهديك بس . ذا كلام حد يقوله . بدون ما توصيني .. ما اقدر اعلم به حد .

راشد طلع بالسيارة وقبض خط الشمال ما كان عرف وين يروح كل اللي يعرفه انه يبي يطلع من البيت .. المشاعر عند راشد كانت متضاربة ما بين الخجل من الكلام اللي قاله عن عبدالله وضحه .. وبين الشعور بالإحراج من اللي سواه أبوه فيه قدام الكل وهو بهذا السن . أنا وش سويت ؟ اشلون أنا الكبير العاقل أقول مثل هذا الكلام . ورجع تذكر الموقف وشلون أبوه كان معصب لان نورة أسمعت هذا الكلام .. معاه حق يعصب ويضربني بعد . خير يا طير أرفضتني. في العنه . ألف وحده تتمناني . ما كان في داعي لكل اللي قالته . لا وقدام الكل ..لا وأختها بعد . أكيد بتقول لعمي والكل بيعرف .. وسعيد.. سعيد أكيد بيعرف .. وشلون باحط عيني في عين سعيد بعد ما يعرف .. الله يأخذ روحس يا العجوز كل ذا بسبايبس .. .. بس ليه ؟

ليه هي أرفضتني ؟؟ ليه ؟ ليه يا وضحه ؟؟ ليه؟ بعد الصبر اللي صبرته. ليه؟؟

وضحه صدق كانت تحس بالجوع بس هي قررت أنها تقول لامها أنها ما تبي غدا وبتروح تنام عشان رأسها يعورها . وضحه ما كانت تبي تكون موجودة في الوقت اللي بيعلمهم أبوها فيه عن قرارها بالرفض . أكثر شيء وضحه كانت خايفه منه هو رد فعل أمها لأنها تدري بها تحاتيها . بس ما باليد حيله بتزعل شوي وبعدين بترضى . وضحه بعد ما راحت غرفتها حاولت تنام بس ما أقدرت من كثرت التوتر . أفتحت ألنت وقعدت عليه . رن جوالها فجأة كان المتصل عبدالله . وضحه ما كانت متوقعه ان الخبر يكون وصل بيت عمها بذي السرعة .

وضحه : هلا والله بشيخ العرب كلهم ..

عبدالله : السلام عليكم .

وضحه استغربت هدوء عبدالله : وعليكم السلام ورحمة الله وبركاته .. عبدالله خير فيك شيء ؟؟

عبدالله : ما فيني شيء .

وضحه بقلق : أبوك و أمك وسعد ونورة . وراشد كلكم بخير .

عبدالله : . تحاتينه ؟

وضحه : من ؟؟

عبدالله : اجل ليه ترفضينه ؟.. ليه ردتيه ؟؟ أكيد في شيء كبير خلس تردينه ؟

وضحه بالفعل كانت منصدمه ما توقعت ان الجازي بتنقل الخبر بذي السرعة لأهلها وقالت : أنت كيف عرفت ؟

عبدالله : أبوي قال لنا اليوم على الغدا .. يقول عمي هو اللي قايل له . بس أنتي بعدس ما ردتي علي . وضحه ادري ان هذا شيء يخصسس وما حد له الحق انه يسالس بس ارجوس لزم اعرف ولي أسبابي . وضحه ريحيني ..

وضحه ردت على عبد الله بكل هدوء .. ما كانت تبيه يتوتر أكثر من توتره : .. اسمع عبدالله أنا ما راح أقولك اللي قلته لغيرك .. ولا راح اكذب عليك .. يكفيك انك تعرف. أني عمري ما فكرت في حد غير راشد يكون رجل لي .. وعمري ما تخيلت أني أكون زوجه لحد غيره .. ومع هذا أنا متاكده ان هذا الشيء ما راح يتم ولا اقبل به دامني حيه . ولا تطلب تعرف أكثر . مثل ما أنت لك أسبابك أنا بعد لي أسبابي .. وكل اللي أبيه منك أني مثل ما ريحتك وقلت لك الصدق تريحني ويبقى ذا الكلام بيني وبينك .. ما يظهر لحد .. أوعدني يا عبدالله ..

عبدالله كان يعرف ومتأكد ان وضحه تحب راشد . والدليل الكلام اللي قالته بس وش اللي يخليها ترفضه ؟؟ ليه ؟؟ وليه قال راشد الكلام اللي قاله.. ومع ذا الشي ما قدر الا انه يرضى باللي هي تبيه وقال : اوعدس يمه .

وضحه بارتياح : مشكور يا عبدالله أنا ادري انك رجال إذا قلت فعلت . والسر عندك في بير.

عبدالله : . بس راشد ؟

وضحه : وش فيه راشد ؟ ألف من بتقبل فيه ما هب متعطل .. لا تحاتيه ..

عبدالله : بس هو يبيس؟؟ والدليل انه عصب علينا وصرخ ( طبعاً عبدالله ما قدر يقول كل التفاصيل ) وطلع من البيت وهو زعلان .

أقطعته وضحه اللي ما تتخيل واحد مثل راشد بكل غروره وارداته القوية يأثر فيه موضوع تافه مثل ذا خصوصاً انه هو اللي ما يبيها : عبدالله بتصدقني لو قالت لك ان راشد ماهمه الموضوع .. وان كل اللي همه هو غروره . ونعرت اى رجال لرجولته اللي تمنعه من انه تتحكم فيه مره أو أنها ترفض وجوده في حياتها . لا تخاف عليه يومين وبينسى السالفة كلها .. قالت وضحه كلامها وهي تتذكر كلام راشد اللي في شريط الفيديو عنها وعن مستواه العالي . وعدم التكافؤ بينهم ..

أذن المغرب وراشد ما رجع.. أم راشد كانت حالتها حاله ما كانت تعرف متى طلع ومتى بيرجع . كل اللي تعرفه انه طلع زعلان لأنها شافت غرفته شلون كانت معفوسه يوم راحت تكلمه العصر بعد ما هدت ابو راشد . نزل سعد من فوق شاف أمه واقفة قدام باب الصالة .

سعد وهو جاي يدنق على راس أمه : يمه عسى ما شر واقفة على الباب فيس شيء ؟؟

لفت عليه أم راشد وهي تبكي : الحق علي يا سعد راشد طلع من البيت والى ذا الحين ما رد . ما ادري وش فيه اخف صار عليه شيء . دخل عليهم عبدالله جاي من الجامعة عند محاضر متأخرة . ويوم شافهم مجتمعين عند الباب استغرب وقال : خير ان شاء الله وش فيكم ؟

علمه سعد وقاله : تعرف وين يمكن يروح ؟

عبدالله الصراحة ما ادري . ولا اعرف حد يعرف .

أم راشد وهي تبكي : دخيلكم لا تخلون أخوكم . دوروا عليه تكفون . وقالت وهي تمسح دموعها. حسبي الله ونعم الوكيل . حسبي الله على من هي سبايبه . عبدالله وسعد افهموا من تقصد بس اسكتوا . واطلعوا عشان يدورون راشد .خبر رفض وضحه لراشد انتشر في البيت .. كانت ردود الفعل مختلفة .. أم حمد اعتزلت في غرفتها و أضربت عن الآكل. ما كانت تقدر تسوي شيء بعد مارد عليهم ابو سعيد .. سعيد كان متوقع هذا الشيء . تقبل الخبر بكل برود . حمدة ونجله .. استغربوا .. وحاولوا يتصلون في وضحه أكثر من مره عشان يعرفون السبب بس وضحه بعد اتصال عبدالله سكرت جوالها .. نجله كانت تبي تروح لوضحه بس سعيد ما خلاها . ونوف كان حالها من حالهم . كل اللي أقدرت تسويه انه تجي لامها عشان تأخذ اللي في خاطرها .. الجازي كانت مندهشة .. اتصلت في بيت أهلها تشوف إذا كان الخبر وصلهم ولا لا . عرفت من أمها المنهارة ان راشد بعد ما سمع الخبر تهاد مع أبوه وطلع من البيت ولا رجع إلى ذا الوقت . الجازي بعد ما عرفت اللي صار حقدت على وضحه .. له حق يزعل .. يا بعد روحي قضى عمره في رجاها وذا الحين ترده . وضلت على اتصال مع أمها عشان تطمأن على أخوها. كل هذا ووضحه صاكه على عمرها الغرفة . مبتعدة عن أي اشتباك . اكتفت بعبدالله . ما كانت تدري أنها إذا ارفضت لزم تواجه بذا الرفض كل حد تعرفه .

الساعة ثمان فليل دخل ابو راشد البيت وشاف أم راشد تبكي في الصالة و نورة قاعدة تهديها .. ضن أنها تبكي على نفس السالفة فطنش وقال يكلم نوره : رجلس و حماس وينهم؟ المجلس ما حد فيه ليه ؟

نورة : . راحوا يدورون راشد .. طلع من ظهر إلى ذا الحين ما رجع .. وهنا أم راشد على صوتها بالبكي . ابو راشد حس بقشعريرة في كل جسمه .. وتوتر بس ما حب يبين ذا الشيء وقال : ليه يدورونه؟ ما هب بزر عشان يدورونه ؟؟ . وطلع ورجع المجلس ..

راشد وهو راجع من الشمال بعد ما صلى المغرب .. كان مقرر انه أول ما يوصل البيت يروح يتعذر من أبوه . ما راح يصغر نفسه أكثر من كذا . عشان سالفة زواج يصير ذا كله ما يسوى .. ما في داعي تكبر السالفة بين الأخوان.. أنا ما كنت أبيه .. أو هي ما تبيني النتيجة وحده . ..فجأة تاير السيارة فرقع . وبصعوبة راشد قدر انه يسيطر على السيارة لأنه كان مسرع . اطر راشد انه ينزل يبدل التاير بس حظه العاثر ما كان فيه اسبير .قفل السيارة. ووقف راشد ينطر حد يمر عليه ويوصله . وبعد فتره مر عليه واحد من الشباب اللي وصله إلى اقرب كراج . وبعد ما سوى كل شيء رجع البيت بالسيارة كانت الساعة تقريباً عشر ونصف فليل.

حمد كان آخر من يدري بالخبر .. توه راجع من البحر .. كان طالع مع الشباب .. أول ما دخل غرفته لقى الجازي تبكي .. لما سألها عن سبب بكاها . علمته عن اللي صار في بيتهم واللي صارفي بيت أهلها .. وعن راشد اللي من سمع بالخبرطلع ولا رجع إلى ذا الحين.. كله من سبايب وضحه .

يتبع ,,,

👇👇👇

تعديل المقال