بداية

رواية اخواه واخوات -5

رواية اخواه واخوات - غرام

رواية اخواه واخوات -5

احلام: 1000 شنو بيسوي، حق الثوب والاكسسوارات بس؟؟
فيصل: وهذي 1000 ثانيه ولا تزعلين...
احلام: تسلم حبيبي، عسى الله لايحرمني منك...
في بيت بو نواس، بغرفة ابرار تحديداً...
أبرار وهي تكلم جوال مع احدى صديقاتها: أيــه غصون.. راح تجين العرس؟؟
غصون: انشالله اذا الله أراد...
أبرار: شكلك ماراح تجين...
غصون: اذا سمحوا لي الدوريات بالخروج راح أجي واذا رفضوا بعد شسوي...
((يطرق باب غرفتها فجأه))..
أبرار: أووك حبيبتي بعدين أكلمك باب غرفتي يطقونه...
غصون: مع السلامه حبيبتي...
((سكرت الجوال وقامت وفتحت الباب))..
حنان: ممكن أدخل..
أبرار بدون نفس خلت الباب مفتوح وجلست على احد الكراسي بغرفتها..
حنان: ممكن اتكلم معاك دقايق؟؟
أبرار: وهو بيننا شي نتكلم فيه...
حنان: انا بس يا أبرار حبيت اقولك شي عشان ارتاح واريحك، إني مو متزوجه ابوك عشاني طمعانه بخيركم وحلالكم، أنا تزوجته لأني حسيته الشخص المناسب لي...
أبرار: واذا أنتي مو طمعانه بالحلال والأملاك ليش تزوجتي واحد كبر أبوك؟؟
حنان: انا تزوجت واحد كبر أبوي لأني انحرمت من حنان الأبو من عشرين سنه..
أبرار: يعني راح تثبتيلي انك طيبه وعلى نياتك بهذا الكلام؟؟
حنان: والله يا أبرار نيتي صافيه تجاهكم، ولو أنا شريره مثل ماتقولين كان شفتيني من أول مادخلت بيتكم سويت معاك ومع اخوك مشاكل، بس أنا ما أحب عوار الراس والمشاكل، والله صدقيني...
أبرار: مو لازم تطلع حقيقتك الحين...
حنان: الأيام راح تثبت هالشي... الحين أخليك بشغلك...
أبرار بدون نفس: الله معاك..
في بيت عطر...
عطر: هاه وافقوا أو لا؟؟
وصايف: وافقوا، يالله بسرعه البسي خلينا نعجل..
عطر: يالله جايه وراك...
وصايف: عالعموم نواف اللي بيودينا...
عطر: واذا نواف يعني؟؟
وصايف: يعني مابيخلينا على راحتنا نفرفر...
عطر: مو بكيفه...


في بيت هند...
هند: يمه؟؟ أكدتوا على حجز الصاله؟؟
ام ناصر: أيه يمه لاتخافين...
هند: وبوكيه الورد؟؟
أم ناصر: كل شي جاهز...
هند: والصالون؟؟
أم ناصر: قلنا لك كل شي جاهز... خلاص عاد..
هند: تحمليني شوي يمه، تدرين لازم اتأكد من كل شي...
.................................................. .................................................. ......................

في ليلة العرس..

(( ملخص احداث العرس ))...
دخلت العروس وبعد مادخلت حطوا اغنيه صدفه لعبدالمجيد: "من لمحته بعيد يمشي فز قلبي وقلت اعرفه ويوم انا قربت منه هذا خلي هذا وصفه بعد ماطوّل غيابه التقينا دون موعد واحلى شي من الحكاية كلها صدفه بصدفه"
وقاموا فرقة الدلوعات وسووا البروفا اللي تدربوا عليها وكانوا لابسين تنوره قصيره مخططه بوردي مع بلوزه تيشيرت لونها وردي >>هذا اللبس بس عشان البروفا<< وبعد ماخلصوا الكل صفق لهم على اللي سووه وبعضهم عاتبوهم لأن ماقالوا لهم عشان يتدربون معاهم...
الأربع البنات كانوا لابسين نفس الموديل لكن بألوان مختلفه فستان مخطط بكريستال يبين بعض المفاتن واكسسوارات على كيف كيفكم... وكل وحده احلى من الثانيه.. وكانوا مسوين شعورهم طبقات..


غاده وشوق ورغد كانوا لابسين فساتين هاديه قصيره طبعاً الوان مختلفه... والميك اب كان هادي بعد...
طبعاً الامهات كانوا لابسين جلابيات وشالات على الوان الجلابيات...
أبرار كانت لابسه فستان لونه اصفر قصير مزخرف بشخابيط لكنه لايق عليها وعلى جسمها وبشرتها...
وصايف وعطر كانوا لابسين نفس الموديل طالعين شي، والميك اب ماكان زايد ولا كان خفيف ومسوين نفس التسريحه..
طبعاً ماننسى النصابه الكبرى احلام اللي قصّت على زوجها فيصل واللي كانت لابسه فستان عادي وميك اب عادي وطالعه جيكره ولله الحمد..
طبعاً ماننسى العروس اللي كانت بقمة الروعه...
دخل المعرس وباسها على جبينها وجلسوا وصوروا وبعدها دخلوا أخوان العروس الاربعه وسلموا على اختهم وقاموا يرقصون بعد..
وبعدها أخذ المعرس زوجته وراحوا لبيتهم المستقل اللي كان شرط هند انها تكون ببيت لحالها...
طبعاً هذا ملخص احداث العرس...
.................................................. .................................................. .......................
في الصاله بعد ماراحوا كل المعازيم...
الهنوف راحت المطبخ بتاخذ لها مويه وبعد مافتحت الثلاجه جا من وراها شخص ومسكها من كتفها...
الهنوف بخرعه: بسم الله الرحمن الرحيم... شفيك خرعتني..
قصي: اسم الله عليك من الخرعه حبيبتي...
الهنوف: أنت شاللي جابك الحين؟؟
قصي: جاي أشوف ملاكي حبيبتي...
الهنوف: صدقتك...
قصي: صايره حلوه وقمر ياقمر...
الهنوف: عيونك الحلوه...
قصي: زين متى راح أشوفك؟؟ انتي وعدتيني وما وفيتي بوعدك...
الهنوف: انشالله قريب، انا راح اتصل عليك ونتفاهم عالموضوع...
قصي: انتظر اتصالك...
الهنوف وهي توخره: يالله الحين روح اطلع لا احد يشوفنا..
قصي: احبك...
الهنوف: اووك الحين روح...
قصي: اموت فيك..
الهنوف: والتالي؟؟ ترى راح ازعل...
قصي: لا لا، كل شي ولا زعلك ...
((وطلع من المطبخ وراح))..
عند باب الصاله الخارجي...
العنود كانت تبي تنادي خالها ومالقت غير ناصر واقف على الباب وماكان عندها خيار ثاني الا انها تكلمه: ناصر؟؟ ممكن شوي...
ناصر تقرب من الباب: شبغيتي؟؟
العنود: ممكن تناديلي على خالي اذا ماعليك أمر؟؟
ناصر: ثواني بس...
((راح ناصر ونادى على خال البنات وماقدر يجي لها ورجع لها ناصر وقال)): خالك مايقدر يجيك لأن معاه رجاجيل.. خير أمري؟؟
العنود: مايامر عليك عدو..بس نبي نروح البيت...
ناصر: من اللي بيروح معاك؟؟
العنود: انا والهنوف وأمك..
ناصر: يالله اجل تجهزوا انا راح أوصلكم...
العنود: أخاف نلهيك عن شغلك...
ناصر: ماعندي لا شغل ولا مشغله، الحين يالله روحوا تجهزوا ونادي على الباقي...
العنود: دقاايق بس...
((وراحت وكانت عيون ناصر ماتفارق العنود دقيقه وحده لين دخلت الصاله واختفت عن انظاره))...
طلعوا الكل ووصلوهم على بيوتهم....
وكانت هذي الليله متعبه عالجميع...
__________________________

الحــــــــ(( 13 ))ـــــــلقة..



ذكرى وهي تكلم بجوالها مع العنود: اليوم انا لازم اشوفك يالعنود...
العنود: خير... شفيه؟؟
ذكرى: الكلام اللي بقولك اياه ماقدر أقوله عالتلفون..
العنود: لهدرجة الموضوع ضروري؟؟ زين وين تبيني أشوفك؟؟
ذكرى: أي مكان...
((حددوا المكان والموعد بيكون العصر الساعه 4 ))..
في بيت هند المستقل...
هند وهي تدور بصالة البيت بملل: أنا اول مره أشوف واحد بيوم عرسه يطلع ويخلي زوجته بالبيت لحالها...
((يدخل نايف البيت)) ببرود: السلام ....
هند: وعليكم السلام... وين كنت يانايف؟؟ خوفتني عليك...
نايف: كنت مع ربعي، خير فيه شي؟؟
هند: لا سلامتك بس كنت احاتيك..
نايف: يالله اجل أنا بروح أنام...
هند جلست على الكنبه بعصبية وقالت: يابرودك يانايف...
في جناح فيصل...
فيصل: جهزي نفسك يا أحلام احنا راح نسافر أسبوع الجاي...
احلام بفرحه: وين راح نسافر؟؟ لندن ولا باريس؟؟
فيصل: راح نسافر مكه للعمره...
احلام راح اثر الضحكه من على شفاتها وقالت: انشالله ياعمري، يعني أحد يعيف بيت الله؟؟
فيصل: اجل كوني جاهزه اسبوع الجاي...
في بيت أم ناصر...
صوت التلفون يرن: تررن تررن تررن...
وليد مسك التلفون ورد عليه: ألووو، هلا...
هند: كيفك وليد؟؟
وليد: هنوده؟؟ والله الحمدلله تمام... أنتي شلونك وشلون الحبيب؟؟
هند: والله تمام ... الا بسألك أمي موجوده أو لا؟؟
وليد: والله أمي مو موجوده.. خير فيك شي؟؟
هند: لا مافيني شي بس أشتقت لها وحبيت أسمع صوتها...
وليد: هند؟؟ ممكن أطلب منك طلب ولا ترديني؟؟
هند: خير انشالله؟؟ عيوني لك...
في غرفة بشرى...
بشرى كانت قاعده عالسرير ورن جوالها وقالت بأستغراب: هذا رقم غريب منو ياترى؟؟
((طنشت الرقم وما ردت))..
بعد دقايق....
رن التلفون مرة ثانيه: هذا نفس الرقم رجع دق...خلني أرد اشوف يمكن أحد مهم..
((وردت)): ألووو، منو معاي؟؟
..................: هلا بشرى...
بشرى بأنفعال واستغراب: منو أنت؟؟ وشتبي مني؟؟
.................: أنا وليد يابشرى...
بشرى : وليد؟؟ انت منو اللي عطاك رقمي؟؟
وليد: مو مهم الحين منو اللي عطاني الرقم... ممكن يابشرى أخذ من وقتك دقايق بس؟؟
بشرى بدون نفس: خير شعندك؟؟واختصر لو سمحت...
وليد: بشرى أنا من أول مره شفتك فيها دخلتي قلبي وعقلي وكل شي بدنيتي وحاولت أشيلك من بالي بسبب رفضك لي بس ماقدرت..
بشرى: الحين انت متصل عليّ عشان تقول لي هالكلام؟؟ سوري أنا مو مستعده اسمعك... باي...
وليد: لحظه يابشرى لا تسكرين الخط...
بشرى: تبي شي ثاني بعد؟؟
وليد: بشرى أنا احبك...
في بيت بو نواس، بالصالة تحديداً...
أبرار وهي ماخذه عبايتها ومتجهه للباب بتطلع وكانت حنان تشاهد تلفزيون وانتبهت لها وقالت: طالعه أبرار؟؟
أبرار وقفت بدون نفس التفتت لها وردت عليها: بعد بتحاسبيني على طلعتي ودخلتي من البيت؟؟
حنان: لا مو قصدي كذا..
أبرار: عيل شنو قصدك يامرت أبوي؟؟
حنان: يعني اذا أبوك سألني عنك وين أقوله رحتي؟؟
أبرار: تطمني أنا قلت لأبوي وين راح أروح... الحين تبين شي؟؟
حنان: سلامتك...
أبرار: سلام...((وطلعت))..
حنان: ياربييي... حاولت كثر ماقدر اني أتقرب منها بس ماكو فايده...((ورفعت راسها لفوق)): يارب هل زواجي من رجال أكبر مني وعنده عيال صح أو غلط؟؟


الساعة 4 العصر...
في احدى الكافيهات...
العنود: خير ياذكرى... خوفتيني... فيك شي؟؟
ذكرى: لا مافيني شي لاتخافين، كل مافي الموضوع أني حابه افتح معاك موضوع يتعلق فيك...
العنود بأستغراب: موضوع يتعلق فيني؟؟ خير انشالله؟؟
ذكرى: جسار أخوي...
العنود: شفيه؟؟
ذكرى: شرايك فيه؟؟
العنود: شرايي فيه؟؟ وأنا قعدت معاه عشان أقولك رايي فيه؟؟
ذكرى: أخوي جسار قرر يتزوج وقال لي أني أدور له على بنت الحلال، فما لقيت احسن منك زوجه حقه...
العنود بهدوء وتفاجئ سكتت..
ذكرى: العنود شفيك سكتي؟؟ قولي لي شرايك؟؟
العنود بإرتباك:والله مادري شقولك ياذكرى... أنتي فاجأتيني الصراحه...
ذكرى: أخذي راحتك بالتفكير، ترى جسار مو مستعجل...
العنود: انشالله الله يكتب اللي فيه الخير..
ذكرى: كم يوم يكفيك عشان تفكرين فيه؟؟
العنود: عطيني مهله شهر واحد بس...
ذكرى: ماشي حبيبتي... انتظر ردك بعد شهر...
العنود: أوووك...
_________________________

الحــــــــ(( 14 ))ـــــــــــلقة..

بعد اسبوع...
على وقت الغدا في بيت هند...
هند وهي تجهز الغدا وتحطه على الطاوله وتنادي: نايف حبيبي يالله تعال الغدا جاهز...
((يطلع نايف من الغرفه لابس ومتكشخ)): أنا ماقدر اتغدى معاك اليوم خليها مره ثانيه انا بطلع مع ربعي...
هند: وهذا الغدا أنا مسويتيه عشان منو، مو عشانك انت؟؟
نايف: ليش ماسألتيني بالأول؟؟
هند بأنفعال: وانا أشوفك عشان اسألك؟؟ احنا من تزوجنا وانا ماقعدت معاك دقيقه وحده، كيف تبيني اسألك؟؟
نايف: عالعموم خلي النقاش هذا بعدين... انا طالع الحين، يالله سلام...
هند ماردت عليه وراحت مسرعه لغرفتها...


في بيت أم فيصل...
فيصل: يالله يمه نودعكم الحين...
أم فيصل: تروحون وترجعون بالسلامه، وانتبهوا لنفسكم وحط بالك على أحلام...
فيصل: احلام بعيوني...
رغد: لا تنسى صوغتي فصول...
فيصل: ماراح انسى لاتخافين...
شوق: يالله ياخوي مع السلامه ((وحضنته وباسته))..
غاده: راح نفقدك ياخوي...
فيصل: اسبوعين وانا راجع، يعني ماراح تفقدوني...
احلام بدون نفس: يالله خالتي مع السلامه.... يالله يابنات باي....
ام فيصل: مع السلامه يابنتي...
رغد: مع السلامه احلام....
((وتوادعوا وطلعوا من البيت الى الطياره فوراً))..


الساعه 4 العصر على البحر...
قصي: تصدقين يالهنوف؟؟
الهنوف بأستظراف: لا ما أصدق...
قصي: وانا قلت شي عشان تقولين لا؟؟
الهنوف: مادري عنك...
قصي: تصدقين ان هالبحر يشبهك؟؟ بس انتي احلى...
الهنوف: طبعاً انا احلى، ماكو احد مثل جمالي...
قصي: أنتي ملاك الكون ياعمري...
الهنوف: قصي؟؟ ممكن اسألك سؤال؟؟
قصي: أمري حبيبتي...
الهنوف: انت تحبني من صج؟؟
قصي: انتي شاكه بحبي لك؟؟
الهنوف: لا مو شاكه، بس اخاف انك تلعب عليّ..
قصي: انا العب عليك؟؟ انا يالهنوف أحبك وأموت فيك بعد...
"" خوش، خوش... وانا أقول ليش ماترد على مسجاتي واتصالتي، الا انت عايش جوك مع حب جديد؟؟""
قصي: نوف؟؟
نوف < هذي وحده من اللي يكلمهم قصي>: أيـــه نوف، شفيك مستغرب؟؟
الهنوف: منو هذي ياقصي؟؟
قصي بأرتباك: هذي أأأأأ...........
نوف: قول لها منو أنا، ليش خايف؟؟
الهنوف ارتفع صوتها بوجهه: أنا اسألك ياقصي، جاوب عليّ...
نوف: أنا صاحبته وخطيبته بالمستقبل...
الهنوف: خطيبته بالمستقبل؟؟
((التفتت على قصي وهو كان منزل راسه وراحت عنهم وركبت سياره اجره وقرر انه يلاحقها بس ما أمداه ورجع لنوف))..
قصي بأنفعال: انتي شتبين مني؟؟ ليش طالعه لحياتي مره ثانيه؟؟
نوف بهدوء: انا أحبك يا قصي، انا اموت فيك...
قصي بصراخ: وأنا كرهتك من هاللحظه... وعالعموم مابي أشوف ارقامك على جوالي ولا ابي أشوف رقعة وجهك بحياتي مره ثانيه..مفهوم؟؟ أنا راح اتزوج الهنوف...الهنوف وبس... واذا انتي بايعه نفسك وعمرك قربي من طريقي مرة ثانية وراح تشوفين شنو راح اسوي فيك... راح افضحك عند ابوك واخوك وطبعاً ابوك عنده القلب فأكيد بتخافين عليه... فـ أبتعدي عن طريقي احسن لك...
(( راح عنها وركب سيارته واتصل على الهنوف)): يالله ردي...
الهنوف طنشت اتصالاته ورجع دق عليها مرات وردت عليه بصراخ وصوتها اللي كان يبكي: خير شتبي بعد؟؟
قصي: الهنوف سمعيني شوي الله يخليك...
الهنوف: مابي اسمع منك ولا شي...
قصي: انتي اسمعيني وبعدين سوي اللي تبينه...
الهنوف: أذا انتهيت من علاقاتك مع البنات بعدين راح اسمعك، اما الحين اسمح لي ماقدر اسمعك...
((وسكرت التلفون بوجهه))...
بعد دقايق...
وصل للهنوف مسج وهي تأكدت انه من قصي وفتحته:
والله يالهنوف اني احبك وانتي الوحيده اللي ببالي وماكو غيرك وانا راح أسوي اللي طلبتيه مني... راح اكنسل كل علاقاتي مع اي بنت، واوعدك بأقرب وقت راح اجي واخطبك...
في بيت الدلوعات...
طرق جرس باب البيت وقامت الجازي وفتحت الباب وبإنصدام قالت : يبــــــه؟؟
بو العنود: هلا حبيبتي.. هلا بالجازي...
المها وهي نازله بإبتسامه: يبه انت جيت؟؟
بو العنود: أيـــــه توني واصل...
((وحضنهم ثنتينهم بقوه وحب))..
المها: الحمدلله عالسلامه يبه.. والله اشتقنا لك وايد .. هالمرة طولت علينا الغيبة..




في الليل في بيت هند...
هند: نايف؟؟ ابي اروح بيت أهلي.. توصلني بطريقك؟؟
نايف: انتي جاهزه؟؟
هند: بس اجيب عباتي...
نايف: يالله اجل انا انتظرك بالسياره...
((جابت عبايتها وركبت السياره ومشوا وطول الطريق وهم صمت ولا واحد منهم تكلم لين وصلوا بيت أهل هند))..
نايف: راح تطولين بيت أهلك؟؟
هند: لا ماراح اطول... كلها ساعتين وراح أمشي...
نايف: تبيني أمّر عليك؟؟
هند: لا مابي اتعبك... راح اخلي واحد من اخواني يوصلني للبيت..
نايف: اوووك... ((ومشى))..
هند دخلت البيت...
أم ناصر: هنوده حبيبتي عندنا؟؟
هند بضحكه: ايه عندكم...
أم ناصر: شلونك حبيبتي؟؟ ((وراحت لها وحضنتها بحنان))..
هند: والله الحمدلله.. مشتاقه لكم...
أم ناصر: تشتاقلك العافيه... شلون زوجك معاك؟؟
هند: الحمدلله تمام... يسلم عليك...
ام ناصر: الله يسلمه...


في بيت الدلوعات...

العنود: يعني خلاص ماراح تسافر مره ثانيه؟؟
بو العنود: انشالله...
الهنوف: عسى جبت لنا صوغات من سفرتك؟؟
بو العنود: جبت لكم كل خير...
الهنوف: يالله اجل خلنا نروح نفتح للجناط وناخذ صوغاتنا...
بو العنود: مو الحين... بعدين...
في بيت هند...
في الصاله حيث ماكان ناصر ووليد وهند قاعدين...
هند وهي تكلم جوال مع بشرى: انا في بيت أهلي الحين...
بشرى: سلمي لي على خالتي؟؟
هند: يوصل...
بشرى: دريتي بأخر خبر؟؟
هند: شنو؟؟
بشرى: العنود اختي انخطبت...
هند: صج؟؟ العنود انخطبت؟؟
بشرى: بس لين الحين ماوافقت عليه...
ناصر كان قاعد يسمع الحوار اللي كان بين هند وبشرى ويوم سمع بخطبة العنود راح بسرعه على غرفته...
هند وهي تغمز لوليد بإبتسامه: حتى وليد بكره راح نروح انا وامي نخطب له...
بشرى تغيرت همسة صوتها بالكلام وقالت: صج؟؟ عالبركه انشالله...
هند: الله يبارك فيك...
بشرى: يالله حبيبتي انا استأذنك الحين..
هند: اووك حبيبتي يالله باي...
((وسكرت منها))..
وليد: شنو قالت يوم قلتي لها اني راح اخطب بكره؟؟
هند: ماراح تصدق اذا قلت لك...
وليد: شنو؟؟
هند: تغيرت نبرة صوتها وبعدها قالت عالبركه...
وليد: صج؟؟
هند: والله العظيم.... يالله انا ابي اروح البيت بتوصلني ولا اخذ تاكسي؟؟
وليد: تاخذين تاكسي وانا موجود؟؟
هند: يالله عيل خلصني بسرعه...
وليد: يالله مشينا...
____________________________

الحـــــــــ(( 15 ))ـــــــــــــلقة..

في بيت الدلوعات، بغرفة العنود تحديداً...
العنود كانت جالسه على سريرها وفجأة رن جوالها وشافت الرقم بأستغراب وقالت: معقولة؟؟ ناصر؟؟
((وردت)): ألوووو..
ناصر بهدوء: هلا العنود...
العنود: هلا ناصر.... خير شفيك؟؟
ناصر: ماكو شي لاتخافين... كل مافي الموضوع أني..............
العنود: أنك شنو؟؟
ناصر: ممكن أشوفك اليوم يالعنود؟؟
العنود: بتشوفني؟؟ ليش؟؟
ناصر: أبي أكلمك بموضوع خاص بيني وبينك...
العنود أستغربت وقالت: أوووك، وين تبي تشوفني؟؟
ناصر: أنتي وين تحبي نلتقي؟؟
(( تفاهموا على المكان والزمان وكان الموعد بكره الساعة 4 العصر))


في بيت مشاعل المستقل..
مشاعل: تدري ياسعيد أني ماتصلت على بيتنا وقلت لهم أني جيت؟؟
سعيد: وليش عاد؟؟
مشاعل: بسويها لهم مفاجأه...
سعيد: سامحيني يامشاعل إني ماخليتك تستانسين معاي...
مشاعل: لاتقول كذا ياسعيد ترى أزعل عليك...
سعيد: ان شالله أعوضك بالسفره الجايه...
مشاعل: سفرتين وانت الصادق...
سعيد: زين متى تبيني أوصلك لبيتكم؟؟ تبيني أوديك الحين؟؟
مشاعل: أنت وين بتروح؟؟
سعيد: بروح الشركه عندي شوية شغل..
مشاعل: خلاص انت أركب الحين السياره وانا أجيب عباتي والحقك...
سعيد: انتظرك...
في بيت عطر....
عطر وهي تمشي ناحية الباب وصايف انتبهت لها وقالت: على وين العزم؟؟
عطر: أنتي هنا؟؟
وصايف: لا هناك...
عطر بدون نفس ضحكت: بايخه..
وصايف: الحين لاتغيرين الموضوع وقولي لي وين رايحه؟؟
عطر: بطلع..
وصايف: تستهبلين ويا وجهك..أدري أنك بتطلعين بس وين رايحه بالضبط؟؟
عطر: بطلع مع سالم...
وصايف: مع سالم؟؟
عطر: إيـــه مع سالم، شفيك مستغربه؟؟
وصايف: لأنك من انخطبتي عليه ولا مره طلعتوا، بس استغفر الله طلعتوا مرتين...
عطر: والله أنا مثلك مستغربه، قال يبيني بموضوع ضروري...
وصايف: عساه خير!!
عطر: بروح وبشوف..
"قاطعهم صوت بوق السياره">> بوق= هرن..
عطر: كاهو جا، يالله سلام...
وصايف: سلمي لي عليه...
عطر: يوصل..


في الطريق ولم وصلوا بيت بو نواس...
مشاعل نزلت من السياره وسعيد ناداها: مشاعل؟؟
مشاعل: هلا حبيبي...
سعيد: تبين شي قبل لا أروح...
مشاعل: لا حبيبي سلامتك...
سعيد: انتبهي لنفسك حياتي...
مشاعل: وانت بعد..
سعيد: يالله سلام...
((انتظرها لين مادخلت البيت ومشى ))..
في بيت بو نواس...
كانت حنان وبو نواس قاعدين بالصاله يشاهدون تلفزيون ومشاعل دخلت: السلام عليكم..
حنان وبو نواس انتبهوا لها: وعليكم السلام والرحمة...
بو نواس: مشاعل؟؟ نورتي البيت حبيبتي..انتي متى وصلتي؟؟ وليش ما قلتي لنا عشان نستقبلك بالمطار؟؟
مشاعل طنشت كلام ابوها وقالت بإستغراب: يبه؟؟ منو هذي اللي واقفه وراك...
"" هذي مرت أبوي يامشاعل""
مشاعل: مرت أبوي؟؟
أبرار وهي تنزل: أستغل فترة زواجك وسوا اللي سواه..
مشاعل التفتت على ابوها: صدق هالكلام اللي أسمعه يا يبه من أبرار؟؟ قول كذب..
بو نواس نزلّ راسه للأرض وأبرار قالت: تكلم يايبه، قول لها صج ولا لا...
حنان: استهدوا بالله وخفوا على أبوكم شوي...
مشاعل بأنفعال: أنتي أكلي تبن..أنا قاعده أكلم أبوي مو قاعده أكلمك انتي...
بو نواس: مشاعل أحترمي نفسك، هذي زوجتي...
مشاعل: أنا يايبه محترمة نفسي من زمان...
أبرار وقفت قبال أختها: مدام جيتي يا مشاعل أنا مالي قعده بهالبيت، أنا بروح معاك..
مشاعل: لا حبيبتي مو أنتي اللي بتطلعين، اللي واقفه هناك أهي اللي بتطلع..
بو نواس ارتفع صوته: حنان راعية البيت وأهي الداخله وأنتوا الطالعين، ويالله الحين اخذي أختك وطلعوا برا..يالله برا...
مشاعل: تطردنا من البيت يايبه؟؟
حنان: لا يابو نواس مايصير كذا هذولي بناتك...
مشاعل: اقول بس.. مسويه فيها طيبه وعلى نياتك؟؟...ترى ماينفعك ياحلوه...
بو نواس : ترى زودتيها يامشاعل...>> ورفع ايده يبي يضربها..
مشاعل: تبي تطقني بعد؟؟
أبرار: هذا كله من سحور بنت ابليس...
بو نواس: قضبي لسانك ياأبرار،ترى بتشوفين شي عمرك ماشفتيه...
مشاعل: يالله يا أبرار مشينا، مالنا قعده بهالبيت...خلي هالمراهق مع زوجته يشبعون فيه...
((مشت مشاعل مع أبرار خطوتين وبعدها جات لمشاعل دوخه قويه وألم عند خاصرتها وطاحت عالأرض))..


في بيت هند...
هند وهي تدور رايحه جايه في بيتها: هذا وينه من طلع من الصبح ماجا ولا اتصل حتا...
"" ترن ترن ترن""
هند توجهت لناحية التلفون وردت: ألووو..
المتكلم: هذا بيت نايف تركي...
هند: إيــــه هذا بيته... أنا زوجته،خير فيه شي؟؟
المتكلم: نايف تعرض لحادث والحين أهو بالمستشفى...
هند انصدمت صدمة قويه وبلا شعور تركت التلفون وركضت لغرفتها وخذت عبايتها وطلعت...


مع عطر وسالم...
عطر: خير ياسالم، قلت تبيني بموضوع ضروري، خير انشالله؟؟
سالم: مادري شقولك ياعطر...
عطر: قول ياسالم، محتاج شي، ناقصك شي؟؟
سالم: لا حبيبتي مشكوره...
عطر: عيل شنو، خوفتني...
سالم: عطر أحنا لازم ننفصل عن بعض...


يتبع ,,,,

👇👇👇
تعليقات
    حجم الخط
    +
    16
    -
    تباعد السطور
    +
    2
    -