رواية يا زينه ويا زين طاريه -3
هذا اكبر من احلى احلامه
فدوة عيونك لو غدت روح مغليك
وش عاد لو راحت لعينك عشاير
أبيع مايغلى على الكون واشريك
واسوق لى جتني علومك بشاير
وازعل جميع الناس بالحيل وارضيك
واصبر لو دارت علي الدواير
واخذ من ايامي لك ايام واعطيك
وان راح عمري لك فلا هو خساير
نوره من الحيا تخبت ورى هيا من نظرات سيف.. في هاللحظه سيف انتبه لاخته انها تكلمه : ايش؟ .. أيش تقولين ؟؟؟
هيا وعيونها مفتنتها عليه : اقول نزل عينك شفيك؟؟ ما صرت تسمع؟ الطيحه اثرت عليك؟؟
انحرج سيف من حركته البايخه وكلام اخته زاد من احراجه : آسف.. مو قصدي.. السموحه نوره
وراح مجلس الرجال وهو حالته حاله من غير ما يسأل عن الاكل خلص وإلا لا
يطالع فيه اخوه وهو يحرك له يده بمعنى شصار
سيف يطالع أخوه بس مخه مو معاه و مو فاهم شيبي محمد
محمد وجهه ولع من الحمق وجا لاخوه : شفيك استثولت وإلا ايش؟؟
سيف وهو لسه مو مستوعب أي شي: ايش ؟؟ شتبي؟؟
محمد وهو مفور على الاخر: الغدى يالذكي خلص والا لسه؟؟
هنا تذكر سيف الغدى وانه ما سأل عنه : اووووووووووو الغدى ههههههههههه والله نسيت الحين يحطونه الحين
نوره رجعت عند الحريم وهي مختبصه ومو قادره تحط عينها باحد تحس ان الكل شافها وهي منسدحه على الارض وجنبها سيف
وإلا نظرات سيف لها اللي سببت لها صدمه ما توقعت بتحس بهالشعور الغريب والسبب نظرات مين؟؟؟ نظرات سيف!!!!!!!!
خلصت العزيمه والكل راح على المغرب الا بيت الخال لازم خدمهم يساعدون خدم أم محمد
في غرفة هيا كنت هيا ونوره وساره زوجة محمد قاعدين يسولفون مع بعض ويسألون هيا عن كندا والغربه وهالسوالف.. بس هيا لاحظت ان نوره مو معاهم مع انها تسوي روحها انها مندمجه ...حبت تقطع عليها تفكيرها نحاسه لانها شكت انها تفكر باللي صار الظهر: نووووووووووره
فزت نوره من الخرعه : وجع ليش تصرخين هذاني جنبج
هيا وهي تضحك على فزتها : ههههههههههه لا اجرب اسمج على صوتي
ساره ضحكت على حركة هيا : هههههههه حرام عليج صرعتيها عشان تجربين صوتج يا أنغام الدمام
نوره قامت بتطلع : أنا بروح البيت قعدتكم سخيفه وأنا فيني نوم
سحبتها هيا وقعدتها جنبها : لا ما في طلعه يوم ناموا عيالي وصرت اقدر اسولف عدل مثل الناس والخلق بتطلعين انثبري مكانج
نوره وهي تتثاوب : هيووه والله ما نمت مواصله من امس من زود فرحتي بتشريف حضرتكم.. وودي الحين أخذها رقده إلى بكره العصر من غير أي مقاطعه صهيونيه
هيا بترجي : الله يخليج نوروه نامي معاي ودي اسولف معاج انا صرفت سلطان عشان اسهر معاكم ..وسارووه لو ما حمود قايل لها لأ وإلا كان نامت بعد هي الثانية..الله يخليج نامي معاي
نوره وهي متردده : ما ادري بس اخوج موجود
هيا فهمت عليها : اخوي يطلع ما يرجع الا متأخر بنكون نمنا.. عاد نوروه بلا سخافه
نوره كسرت خاطرها بنت عمتها : انزين بس عاد ما أنام على الأرض أنام معاج على السرير والهيلق عيالج على الأرض
ستانست هيا و نطت على نوره : هيلق هيلق اللي تبين حتى لو تبين أنومهم مع سيف ما في مُسكله رفيق
رن جوال ساره مع دقت قلب نوره لما انذكر اسم سيف : الو
محمد : هلا والله بأم ريم الفلا
ساره وهي مبسوطه : هلا وغلا فيك يا عيون أم ريم وقلبها
نوره ما بقت مخده ما حذفتها على ساره وبصوت واطي : يا قليلة الحيا انا ما زلت عذراء لا تخليني انحرف
محمد وهو منشكح من كثر الانبساط : تسلم عيون الغاليه ام الغاليه يالله انا تحت
وقفت ساره وهي تحاول تبعد المخدات المتطايره : حمودي فديت روحك.. انا الحين اقذف باسلحة الدمار الشامل الحين انزل لك تحت يالله باي
وقبل ما تطلع اخذت مخده وحذفتها على نوره : يارب يجي اليوم اللي احذف عليج المخدات وانتي تكلمين عنترج يا ليلوه
وتصك الباب بسرعه وراها لان نوره رجعت المخده باتجاهها: طيري بس أنا عنتري ما اغازله قدام الناس عيني عينك
هيا تشيل المخدات من الارض : الله يعافيج أنتي وعنترج محد يبي يسمعكم وانتوا تتغزلون في بعض رتبي اللي حذفتيهم اشوف لا تعفسين حجرتي
نوره تخصرت لها : بدينا المذله حجرتي وحجرتي لا يبه بروح بيتنا
وتجيها ذيك المخده من هيا قذيفه ارض جو : اقول رتبي وانتي ساكته.. كل دقيقه بتهددين بسحب السفير؟؟ خلصي علينا.. يالله
القوس قوسك والسهام سهامك ... مالي على رمش(ن( تسله قوه ...
انا اسيرك واقف(ن) قدامك ... واللي تبا تسويه فيه سوه ...
وثقت في قلبك وطيب انسامك .. ماظن تظلم وانت فيك امروة ...
قلبي رهيف ولا يروم هيامك ... توه تعلم كيف يعشق توه ...
قلب(ن) جبرته لا ترص احكامك ... خفف على قلب(ن) حكمت بجوه ...
يفداك لكنه يشيل احلامك ... ملكك ولا لي منه غير امخوه ...
بك زين من راسك إلين ابهامك ... والليل ياخذ من صباحك ضوه ...
ما يحجب الوجه الصبوح الثامك ... طلتك دايم يالحلا محلوة ...
سيف في السياره وسرحان مع اغنية عيضه ويتذكر شكل عيون نوره : اااااااااه صدقت والله... مالي على رمشن تسله قوه .... والله أحس انه عيب علي أفكر فيج يانوره كم فرق السن بينا؟؟؟؟ والله عيب... بس قلبي ما يعرف العيب قليل أدب ههههههههههه
الا يرن جواله وهو في قمة سرحانه : نعم
هيا وهي مغيره صوتها لانها تكلمه بخطها الجديد اللي توه طلعه لها زوجها.. وطبعا نوره لازقه اذونها معاها : الو السلام عليكم
سيف : وعليكم السلام.. نعم؟؟ مين معاي؟؟؟
نوره حمر وجهها لما سمعت صوت سيف وهيا جاتها الضحكه واكتمتها : شوي شوي.. مو كذا انت خوفتني ..بعدين ما اعرف ارد
سيف تسيخفها بس خفف نبرة صوته : طيب مين معاي؟؟ كذا احسن يا اخت؟؟
هيا خلاص ماتت من الضحك : ههههههههههههه والله انك مسخره تبي تتعرف عليها بعد ؟؟؟ بعلم عليك امي
سيف وهو منقهر بس بعد ضحكته حركتها : اقول قلبي وجهج والله كنت داري انها سخافه
هيا وهي تحاول تقهره : أي أي صح انا صدقتك الحين
ولع سيف من سخافة اخته :انتي وين قاعده الحين اذا في بيتنا؟؟ هذا انذار مني لج ان جيت و شفتج انتي والهيلق عيالج في بيتنا ما تلومين الا نفسج
هيا تخوصرت : نعم ؟نعم ؟نعم ؟منو الهيلق عيالي ؟؟؟ شفيكم أنت وأم السعف والليف تقولون عنهم هيلق ؟؟اشوف عيالكم بعدين شبيصيرون؟؟؟
نوره كفخت راس هيا بالمخده وهي منقهره منها وسيف سمعها وهي تقول لها : جب
هيا تعورت : اييييييي.. جب يجبج .. يا ام السعف والليف
سيف قلبه دق : هيووه من عندج ؟؟؟
هيا وهي تلحق نوره وتحذفها بالعلبة الكلينكس : بعد مين؟؟؟ ام السعف والليف
انشق حلج سيف وبكل هدوء: نوره ؟؟
هيا تطلع من الغرفه وهي تركض لا تزيد نوره في طقها : أي تراها نايمه عندي لا تستهبل وتدخل علي الحجره يعني ينقال بتسلم علي
سيف استانس الا طار من الفرحه نوره في بيتنا يا مرحبا يا مرحبا.. بس سوى روحه ثقيل : شقالوا لج ما استحي وبعدين نوره بنيه صغيرونه شلون بستهبل واطالعها؟؟ ..ما انسى ان مصروفي كان يخلص على حلوياتها والعابها
هيا تركض ونوره وراها : أي لاتنسى الحلويات والالعاب نوره تقول لك عمو سيف جيب لي معاك مصاصه الله يخليك
حز في خاطر سيف مع انه يدري انه من تأليف اخته هالكلام بس كأنها دقه له إن نوره اصغر منك ب 11 سنه : يالله باي مو فاضي لكم ولتفاهتكم
وصك في وجهها الخط وهيا وقفت تطالع في جوالها وتجيها نوره من وراها تمسكها : صدتج يا أم خماس أنا أم السعف والليف
هيا وهي تضحك : هههههههه والله أم أربعه وأربعين بعد ههههههههه تصدقين صك السماعه في وجهي سيفوه هههههههه
نوره تعدل قذلتها وتسوي روحها مو مهتمه : ليش ؟؟؟
هيا قعدت على الكنب اللي في الصاله وهي مبتسمه : ما ادري عنه كنت اقول انج بتنامين عندي ولا تدخل علي الحجره قال مو داخل ونوره الا بنيه صغيرونه عاد بغيت استغل هالشي وقلت له انج تبينه يجيب حلويات والعاب عشان اعطيهم عيالي هههههه قال مو فاضي لكم ..وصك الخط في وجهي
نوره انقهرت من كلام سيف وفي خاطرها : مازلت صغيره في عينك يا سيف؟؟؟
في الثانويه وبتخرج ولسه انا صغيرونه ؟؟
اثنين ما ناموا هالليله سيف وهو يفكر بإن نوره نايمه معاه تحت سقف واحد وانه بس يحس بوجودها من غير ما يشوفها او يسمعها وفي نفس الوقت يحس انه ما يستحي قاعد يفكر فيها وهي اصغر منه بواجد ويتخيل روحه لما انولدت كان هو في المدرسه يدرس يعني هي بالنسبه لواحد عمره 29سنه....... بزر
نوره الثانيه تفكر في سيف بس بطريقه ثانيه متكدره او متضايقه من انها فكرت فيه خلال لحظات انه فتى احلامها وحست ان نظرته لها نظرة غير بس اكتشفت ان نظرته يمكن تكون بس مفاجئه بسبب الطيحه وبس: مالت علي الحين يوم دق قلبي ما دق الا لسيفوه هالمغرور؟؟؟؟ وانا مسويه روحي مستحيه منه مالت علي الف مره
في اليوم الثاني الكل قعد بدري الا سيف ونوره كل من جا يقعدهم هاوشوه الخدامات وهيا وولدها لقوا لهم هواش على كيف كيفك وبعد على الازعاج اللي كان فوق روسهم ما صحوا الا الظهر
سيف سلم على امه وحب راسها وسلم على اخته وهو يقعد : يعني يوم سليطين يروح بيت أهله امس ليش ما سحبكم معاه؟؟؟ مخليكم عندنا تقلقون راحة المسلمين ليش ؟؟؟
هيا ضحكت عليه : انا سلطان موصيني عليك ازعجك ازعاج اعوض فيه عن سنوات القهر اللي عيشتني فيها
طالعها سيف وهو رافع حاجب : قلوب سوده سبحان الله ما فيها مكان للمغفره والرحمه
امه تعطيه الشاي : اقول ما كأنكم مصختوها مع هالنوم الناس ظهر وانتوا ما تزحزحتوا عن الفرش
سيف شرب الشاي وهو يرد على امه : والله الساحره بنتج وعيالها قاعدين مع اذان الفجر ما خلوني انام وبعدين من اللي مصختوها؟؟؟ ما في غيري !!!
امه تشرب الشاي وهي تكلم ولدها : انت ونوره هاللي لين ألحين ما جا عليها الصبح على قولت المصريين ( تاكل رز مع الملايكه )
شرق سيف بالشاي : كح كح كح كح
ان شاء الله يعجبكم البارت ما اوصيكم هالله هالله بالردود المفرحه
اختكم
سالفتي سالفه
ياعينها ماترحمين المجاريح اللِّي مشــاعـــرهم غرامك جرحها
ويا شعرها لا تنثني لي مع الريح صــــورتك طـــــول فراقنا مامسحها
ويا جيدها المنتوق لا تغري مريح عينه قبــــــل شوفتك صدّ ونصحها
وياقدّها خفِّفْ تثنيك لا اصيح صيحة نفـــوس لــوِّعت في فرحها
رمشك يلمِّحْ لي بالآمال تلميح والياس نفسي قبـــــل اشوفك ذبحها
صحيح لو جابوا جميع المماليح انوارهم نورك بلمحـــــه نضـــحها
الجزء السادس
هيا تضربه على ظهره وهي مبتسمه : بسم الله عليك... بسم الله عليك ...شرق العدو بريقه إن شاء الله.. شفيك يا اخوي عسى ما شر شطرى لك ؟؟؟
سيف وما زالت آثار الشرقه في صوته : اح.. احم.. احــــــممم .. لا الله يسلمج ما فيني شي... ليش نوره شمسهرها؟؟ المفروض من الساعه 9 نايمه.. يــــاالله تتعود على المدرسه ما بقى شي وترجع للمريول ههههههه
سمعته نوره وهو يضحك عليها وفي قلبها : يا مسخفك وإنت تنكت.. ما يلوق عليك خفة الدم كلش
وهي نازله الدرج عدلت غطاها وبصوت مسموع بس واطي : السلام عليكم
الكل رد عليها السلام وسيف قلبه يدق طبول مع كل خطوه تخطيها جهتهم يحس إن قلبه بيطلع من مكانه.. عيونه ما نشالت من عليها.. لو احد منتبه عليه كان شاف في عيونه شوقه ولهفته.. بس من حظه إن عيونهم معلقه فيها وهي عيونها على عمتها ..جات نوره حبت راس عمتها
ام محمد وهي مبتسمه : صباح الخير وإلا نقول ظهر الخير أنسب
انحرجت نوره من عمتها خاصه إنها تحس إن سيف قاعد يطالعها بس ما تعرف ايش نوع نظرته: آسفه والله ما جاني نوم أمس يمكن لأني غيرت مكاني؟؟ ما نمت إلا بعد آذان الفجر
سيف يوم سمع صوتها زادت عنده الطبول وقام يدق قلبه سامري هالمره... وفي خاطره : يا بعد قلبي يا نوره ما نمتي؟؟ كان ناديتيني أونسج وتونسيني
حس كأنه تفكيره صار وسخ قال في خاطره بعد ما نزل عينه عنها : استغفر الله.. شقاعد أفكر فيه؟؟؟؟
أم محمد: نوم العوافي حبيبتي
نوره منحرجه من وجود سيف بس مسويه إنها عادي : الله يعافيج عمتي
هيا صبت لها شاي وعطتها : نوره تبغين أحط لج فطور مع سيف؟؟
نوره رفعت عينها على سيف شافت عينه عليها وراسه منزله وعلى طول التفتت على هيا : لا ما ابي الحين شي... أنا إذا قعدت ما أشتهي أكل
قام سيف وهو يطالع أخته : جيبي الفطور بالمجلس خل نوره تأخذ راحتها
هيا من غير معارضه : اوكي الحين أجيبه لك
أمه وهي تناديه : سيف يمه تعال هذي إلا نوره بنت خالك بحسبة أختك مو غريبة عشان تقيد راحتها
سيف يطالع نوره ووده يتحرش شوي فيها : زين يمكن أنا اللي مو مأخذ راحتي
نوره رفعت عينها وهي ميته من الحره وطلعت نوره الاصليه من قالب الحيا اللي مو مناسبها بالمره : شنو؟ شنو؟ شنو؟؟؟؟ مين اللي مو مأخذ راحتك بسبته؟؟ قصدك انا؟؟ شوف يا عيوني أنا ألحين أروح بيتنا وخذ راحتك عدل
وفزت من مكانها بحمق وسيف اختبص وفي خاطره : شسويت أنا ؟؟؟
أم محمد وهي تكلم نوره بحب : حبيبتي نوره صلي على النبي تراه يمزح معاج
هيا قهرها اخوها واسلوبه الغبي في المزح.. بس هذا هم الاولاد مزحهم ثقيل: نونو حبيبتي قعدي زين تراه يمزح.. والله يمزح
والتفتت على اخوها وهي مبتسمه ابتسامه رجاء : تمزح صح سيف ؟؟
سيف وهو طالع بعد ما حس إنه إذا قعد زياده بيطين الدنيا : أي أمزح.. السموحه منج يا نوره إذا ثقلت عليج
نوره قلبها عورها لأنها سوت مسرحيه وهي عارفه إنه كان يمزح.. بس كانت مقهوره منه لأنها تحس ناحيته بمشاعر و هالمشاعر من طرف واحد وفي خاطرها : لا ما ثقلت.. أنا السخيفه بس تعال
ياصغّير لاتضيعني بنظرات البراءه
وانت ماتعرف مدى تاثير نظراتك بحالي
آه يالبيه يابشويش ياهدئ الاضاءه
للجفون اللي من اجفى له يجفني ظلالي
فز بسم الله عليك من المبره للاساءه
وارقد آمن في عيوني واسهر آمن في خيالي
ياصغير والذكي مثلي اذا خانه ذكائه
ماله الا يعشقك ويصير لعيونك شمالي
راح سيف المجلس وقلبه بقى في الصاله عند نوره.. لو هي ذكيه تقدر تعلقه فيها من نظره.. بس ايش يسوي لو كانت ما تحس بهالعشق إللي في قلبه : اخخخخ يا نوره يا ريتج بس تحسين شوي.. والله لأخطبج اليوم قبل بكره وأتزوجج بعدها بدقيقه.. والله ما أخليج تنامين الليلة إلا عندي... اااااااااااااه يا قليبك يا سيف يوم حبيت ما حبيت إلا بنت صغيرونه.. لا وأمي تقول بحسبت اختك أي اخت زيـــــــــــن؟؟؟ اختي كل ما جابوا طاريها يضربني زلزال؟؟ والله حالتي حاله
وهو في عز أفكاره دخلت عليه اخته مع الفطور وهي رافعه حاجب: هااااااااي نحنُ هنا.. وين وصلت أفكارك؟؟ عساها قريبه يا أخي العزيز ؟؟؟
سيف ووده يزنط اخته لأنها تستهبل عليه: تصدقين من جيتي من كندا وانتي صايره ثقيلة دم... أقول ليش ما تفارقين بيت زوجج أبرك لج؟؟
حطت هيا الفطور والحلج مشقوق وبنذاله: أي ما عندي مانع.. وبأخذ معاي نوره بيت أهل سلطان ونستانس هناك.. شرايك؟؟؟
سيف رفع عينه عليها بحمق : وليش نوره تروح معاج ؟؟؟ انتي بتروحين بيت زوجج هي شعليها؟؟ وإلا ترززينها قدام حموانج ؟؟
هيا عرفت إن اخوها خلاص عصب والغيره ذبحته وبتذبحها معاه : شأرززها الله يهداك شفيك؟؟ أمزح أمزح بسم الله علي
وقف سيف وهو منقهر : اكلي الفطور بروحج ما ابي شي... ولا تمزحين معاي مره ثانيه أنا مو أصغر عيالج
وطلع من غير ما ياكل شي ولا جا على الغدى بعد.. ونوره راحت بيتهم بعد الغدى لانها تحس بضيقه ما تدري ايش سببها هل بسبب إن سيف يمكن زعل عليها؟؟ وإلا لأنها تحبه وهو مايشوفها أكثر من أخت صغيره ؟؟
بعد العزيمه بإسبوع وقبل المدارس ما تفتح أبوابها قرر الخال يسوي عزيمه لبنت اخته بمناسبة رجعتهم بالسلامه بس هالمره العزيمه راح تكون برى البيوت في فندق الانتركونتيننتال اللي بالجبيل الصناعية وحجز لهم ولاخته وعيالها ليلة هناك مع الوجبات
يوم الخميس من الصبح الكل متجهز للروحه أبو نوره وعيلته الصغيره وأم محمد وسيف ومحمد وزوجته وبنته وهيا وزوجها وعيالها
الرجال أول ما وصلوا الفندق بدلوا وانزلوا البركه
الحريم ومعاهم نوره والاطفال على طول طيران على بركة الحريم الى أن صار وقت الغدى واطلعوا راحوا الغرف لأن الخال طلب لهم الغدى هناك
على العصر نزلوا الرجال البحر وأخذ سلطان حمد معاه ومحمد أخذ ريم والخال نزل معاهم يتسبحون بالبحر أما سيف فكان يلعب كرة طائره مع مجموعه من الشباب البنات قرروا يلحقونهم بعد الغدى بس الامهات بيريحون شوي وبعدين ينزلون وراهم
عند البحر وسيف يلعب إلا يشوف الثلاثي نازل من الدرج الاسمنتي على الرمل
((( تذكرت ذيك الاغنيه الكويتيه القديمه في شارع الجهره صادفوني ثلاثه رايحين الصالحيه خخخخخخخخ ..احم ما علينا المهم)))
وعرفهم على طول من رشودي ولد هيا... وجاهم وهو يهرول.. إنتبهت له نوره وبغى قلبها ينط من صدرها.. كان سيف مو سيف إللي تعرفه.. هالمره غير لابس تي شيرت وبرموده إلى نص الساق والنظارة الشمسية مسويه أكشن بالشكل
جاهم سيف وهو مبتسم : على وين الشيخات رايحين ؟؟؟
هيا : الشيخات يبون يتفرجون على الشيوخ وهم يسبحون
طبعا نوره ما كانت معاهم كان بالها في هالبنات إللي في البحر.. إللي لابسه عبايه بس مطلعه وجهها وقذلتها... وإللي مو لابسه خير شر.. وقاعدين يطالعون هالمزيون ( سيف ) ويتكلمون وهي ميته من القهر تحس الغيره أكلت قلبها أكل
إنتبهت إن هيا تكلمها : نعم ؟؟؟ ايش؟؟؟
هيا : وين رحتي ؟؟ سيف يسألج ايش تشربين ؟؟؟
نوره طالعت في سيف إلا تشوف على وجهه ذيك الابتسامه الجانبيه اللي تدوخ وردت طالعت هيا : لا ما ابي شي شكراً
سيف مشى قدامهم جهة البحر: خلاص باطلب لج على ذوقي.. بس تعالوا أول أدور لكم مكان تاخذون راحتكم فيه وبعدين أروح أطلب
إنحرجت نوره ولا ردت
لما راح يطلب إنتبهت نوره إن وحده أجنبيه بيضه شقره وقفت جنبه.. و عقلها الباطني صور لها إنها تكلمه وهو يرد عليها... والحقيقه إنها كانت تكلم الجرسون وصادف إن سيف لف وجهه جهتها وبس
فزت نوره فجأه وعيونها مركزه عليه : أنا تعبانه بروح الغرفه... شيقعدني هنا؟؟؟ عشان أتعب زياده
هيا و ساره إستغربوا هالتحول المفاجئ وتابعوها بعيونهم وهي رايحه
وهي تمشي ما بقى شي في خاطرها ما قالته من قهرها: أي هذا هو مستواك.. ما تقدر تطالع أعلى من كذا ...عجبتك الشقره؟؟... شوي وتقعد في حضنها يا قليل الحيا.. وانا الخبله خايفه من السعوديات.. طلع ما يجيبون راسك إلا الشقر.. أي بعد سنين عايش عندهم ..أكيد أخذك الشوق
وهو يأشر للجرسون مكان البنات انتبه لنوره وهي مسرعه جهة الفندق ووراها: نوره....يـــــا نوره
هي سمعته وزادت سرعة مشيها : نعم ؟؟ شتبي؟؟
سيف وهو يلحقها بجري شوي : تعالي شفيج ؟؟ شصار؟؟
نوره موراضيه توقف : ما فيني شي... روح كمل إللي كنت تسويه
سيف ما فهم قصدها : طيب استني
وشوي يوم ماسمعت كلامه مسكها من زندها ولفها جهته ويمسك الزند الثاني بعد وهو محتر عليها : إذا كنت أكلمج توقفين وتردين علي عدل
نوره تطالع عيونه من غير ما تتكلم هو انتبه انه ما سكها غلط وتركها : آسف ..مو قصدي..وسكت شوي : ...... نوره شفيج ؟؟؟
هنا نوره لاشعورياً تجمعت الدموع في عينها.. وسيف انتبه و إنكسر خاطره عليها وتمنى انها حلاله عشان يحضنها: لااااااااا ليش الدموع الحين ؟؟
يا العيون الباكيه يكفي كفا
لا تهلين العباير والدموع
ما بدمعك يا عيوني لي شفا
غير انواع الشقى من كل نوع
نوره وفي هاللحظه كانت تتمنى بعد إن سيف يحضنها ويمسح على ظهرها ويطيب خاطرها عن الشي إللي ما سواه.. مسحت دموعها : لا مافيني شي.. بس راسي يوجعني شوي.. أنا بروح أرتاح بالغرفة
سيف وهو مبتسم بحنان: لا سلامتج.. طيب تعالي أوصلج الغرفة
ومشى قدامها وهي وراه تلحقه ..تقدرون تقولون إن قلبها كان يرفرف مثل الطير من الفرحه ...عند باب الغرفه : نوره إذا متضايقه من شي.. وألا أحد مزعلج علميني ..حس انه شوي و بيسيح وبينكشف حبه.. فقلبها مزح وهو مبتسم: ترى حاضرين للطيبين
نوره وقلبها مازال في حالة طيران : مشكور سيف.. بس محد مزعلني ..وإذا احد سواها أكيد بقول لك..... دخلت الغرفه وهي مبسوطه بس تقول في خاطرها: يا ريتك يا سيف تحبني حب حقيقي مو مثل حب اخو لاخته
اليوم الثاني ارجعوا كلهم بعد الغدى .. سيف ونوره كانت هالرحله رحلة هدنه وتجديد علاقات.. بس كل واحد و نظرته!!!
ان شاء الله يعجبكم البارت ويالله عاد ما في غير ملاك الشرق ما يصييييييييير
اختكم
سالفتي سالفه
تطلبوني شي مني وش تبون
بس إنتوا ما لكم فيني شغل
إيه أحبه حب وحبي له جنون
وإللي يمنعني ترى ماله أمل
الجزء السابع
ابتدت المدارس و راحت نوره المدرسه وهي مغصوبه لأنها ما نامت عدل وكان ودها لو السنه 9 شهور إجازه
في المدرسه كان النوم ذابحها ما غير تقولب راسها على الطاوله جاتها ابتسام من وراها وهي تصرخ : ياااااااااااااا دب النوم قومي
نوره بعد ما انقزت ذيك النقزه وترسل لابتسام صفقه على ظهرها : حسبي الله عليج صرعتيني.. الحين شلون أتزوج؟؟ قطعتي الخلف
ابتسام ظهرها عورها من ضربت نوره : أحححححححح ياعلج الشلل أحححححح مو أصابع خيازرين.. ليش مندفنه داخل الصف؟؟ خلاص اصحي تعالي معانا تحت بدال ما تنامين هنا نامي بالبيت
نوره رجعت راسها على الطاوله : من زينكم أنزل معاكم؟؟.. فارقي انتي الحين.. بس شوي أنام وأجيكم
جات مريم وهي مستانسه أنها تدرس مع اختها ونوره بنفس الثانويه :الله وناسه الحين نقدر نكون شله شرايكم ؟؟
نوره ضحكت عليها : مريوم تراج عبيطه أي شله وأي خرابيط؟؟ إحنا توجيهي وأنتي أولى يعني بتشوهين سمعتنا اذا ماشيتينا
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك