بداية

رواية يا زينه ويا زين طاريه -5 البارت الاخير

رواية يا زينه ويا زين طاريه - غرام

رواية يا زينه ويا زين طاريه -5

الجزء التاسع و الاخير

نوره قهرتها نبرة صوته : وإنت شعليك اوافق وإلا لأ ؟؟؟ هذا شي ما يخصك
سيف ولع : إلا يخصني ونص ..توه بيقول أنا أحبج وأبيج زوجة لي بس خاف تفشله وغير رأيه : إنتي توج صغيره شلون يتجرأون ويخطبونج؟؟
نوره ما كان هذا الرد إللي كانت تنتظره : أولا أنا لسه ما وافقت.. وبعدين أنا مو صغيره أنا مره وبخلص 18 سنه .. غير كذا إنت ما لك شغل.. وعنادٍ فيك أنا موافقه شعندك ؟؟
طوط طوط طوط طوط
صكت السماعه

يبكي الصوت و النظرات تشكي
و المعاني ولو صاحت حبيسه
يصمت الليل و التنهيد يحكي
و المعاليق في قلبي يبيسه
يا حبيبه سألت الليل انا عنك
و كل نجم فقد مثلي أنيسه
هل دمعي و قام الليل يبكي
و القمر نشّ من فرقى جليسه

حذف الجوال بكل قوته إلى أن تفكك وهو يصرخ : لو تموتين.. لو تموتين يا نوره ما لك إلا سيف هاللي مو عاجبك
نوره بعد ما صكت الخط قعدت تصيح من قهرها منه ومن ظروفها : بس هذا إللي طرى على بالك؟؟ إني توني صغيره!!! ما تشوفني الا صغيره يا سيف ؟؟ بكره إذا ملكت أكيد بتنتبه إني كبرت خلاص
سيف من ضيقته ما رجع البيت وأمه كل دقيقه تدق عليه وهو مو حاب إنها تخاف عليه فيقول لها بعد شوي باجي.. وما فيني شي.. ومن هالكلام.. وهو قاعد يدور بالسيارة فكر بطريقة كلام نوره له : ما أدري يانوره موافقتك سببها عناد فيني مثل ما قلتي؟؟ وإلا صحيح تبينه ؟؟... أكلم خالي؟؟ وإلا إنتي أصلن ما تبيني؟؟
تذكر عبد الله صديقه : يا حظك يا عبد الله يوم بغيت بنت عمك حيرتها بس أنا شلون أحيرها وهالشي مو من عوايدنا؟؟؟ وانا بعد ما أقبل على روحي إني أتزوج بنت مجبوره علي
ردوا أهل نوره على أهل سلطان بالموافقه وما قدر يسوي سيف أي شي هيا اخته ارحمته كثير وقالت : سيف تبيني اكلم نوره ؟؟؟؟
سيف اللي ضاقت عليه الوسيعه بعد ما وصله خبر الموافقه : لا تكلمينها... اذا ما كانت هي اللي تبيني ماني بجابرها علي
نفسي عيوف يا اريش العين تجزع
ما تقبل الحقران لو من عشيري
إلى متى في طلبتك باتخضع
وأسأل متى يوم الوصل بي يصيري
لو كان قلبي في هواك يتقطع
خله لعله بالقسى يستخيري
أهل سلطان و أولهم خالد كانوا طايرين من الفرحه وعلى طول حددوا مع اهل نوره موعد الملكه
نوره في هالفتره عايشه صراع وتحس انها ودها تموت اليوم قبل بكره عشان ترتاح من هالهم اللي ذابحها ... ليلها نهارها تفكر بسيف ودمعتها على عينها : شسوى لما درى إني وافقت ؟؟؟ تكدر؟؟ والا ما طريت على باله؟؟؟ااااااااااااااه يا قلبي بينعصر من اللي فيه .. يارب ارحمني و ريحني
أم نوره حاسه إن بنتها فيها شي وقالت للابو : عبد الرحمن بنتي ما ادري ايش فيها 24 ساعه قاعده بالغرفة من ردينا على أهل خالد بالموافقه ؟؟
أبو نوره ضحك وهو مبسوط : ههههههههه لا تخافين دلع بنات يعني تستحي مني.. وإلا يمكن تفكر انها بتترك البيت ؟؟
أم نوره ورد زوجها ما اقنعها واجد : ما ادري .. يمكن
طبعاً أم محمد قلبها يتقطع على حال ولدها بس ما تقدر تسوي شي لان سيف قال لاحد يتدخل : ما يصير كذا يا هيا.. ولدي يموت باليوم ألف مره.. إنقلب حاله.. ما عاد سيف الاولي .. أبد والله مو سيف
هيا تحاول تهدي أمها : بعد شنسوي هو رافض نتدخل يقول لا تجبرونها
في يوم الملكه الصبح راح خالد يحلق ويتعدل للحدث المهم .. وهو يحلق ذكر ذاك اليوم اللي شاف نوره وبغى قلبه ينط من صدره كان عمره في ذاك الوقت 18 سنه وهي مثل ما انتوا عارفين 12 سنه.. مع انها كانت صغيره بس سحرته بجمالها ..كان يوم ملكة سلطان وهيا في بيت أم محمد جا له اتصال وطلع من المجلس وراح الحوش عشان يكلم
خالد والابتسامه تدل على ان الاتصال مو عادي احم احم : هلا وغلا
.....: هلا فيك يا عمري وينك ؟؟؟
خالد وهو مسوي ثقيل : ابد يا روحي اتغلى ههههه
......: افااا خلودتي تتغلى علي ؟؟؟ ان زعلانه
خالد وهو مبتسم : لا يا روح خلودج ان زعلتي اراضيج
في تلك اللحظه وعلى حين غره >>> قلبت فصحى
نوره كانت ماره من عند الباب بس من داخل ولا انتبهت ان في احد برى يكلم لانه من زود اندماجه راح جهة باب الحريم من غير ما يحس
هو انبهر فيها ولا قام يسمع اللي تكلمه بالتليفون... الا يسمع ام محمد تنادي : نوره يا نوره تعالي
ويشوفها ترد عليها : زين عمتي جايه الحين اودي العبايه بس
خالد وكانه تخدر من سمع صوتها : نوره ؟؟؟ اسمها نوره ؟؟ يا زينها ويا زين اسمها
ومن غير شعور صك الخط في وجه اللي معاه.. عاد تصدقون وإلا ما تصدقون إن خالد من يومها حاطها في باله وحرم على نفسه المغازل لجل عين نوره
أنا أحبك أنا أعزك أنا باقي على ذكـــــراك
وإذا الله ماكتب تتحقق أحلامك ولا أحلامي
صحيح يحز في نفسي بعد ذاك الوفاء فرقاك
ولكن من عمر محسوب بيامك وبيـامـــــي
عاد الملكه عندنا بس للرجال.. والحريم بعدين في حفل بسيط بعد الملكه بكم يوم.. عشان كذا محد جا بيت أهل نوره إلا العمه وهيا وبس من الحريم.. وطبعا كانوا مظهرين الفرحه بس قلوبهم كانت تعبانه على حال سيف
هيا تكلم أم نوره : خالتي وين نوره؟؟؟؟ عساها جاهزه؟؟؟ بعد شوي بيجون الرجال والملاك
أم نوره وهي مشغوله بتحضير القهوة للرجال : أي خلصت.. روحي لها فوق ونسيها تراها قاعده بروحها
ركبت هيا عند نوره ووقفت عند الباب وهي حاطه يدها على قلبها : يا حسرتي عليك ياخوي
طقت الباب و دخلت إلا تشوف نوره ماعطى الباب ظهرها و بإبتسامه و صوت حنون : العروس شخبارها ؟؟ إن شاء الله مستعده نفسيا ومعنويا ؟؟
نوره ما ردت على هيا إلا بشهقات خفيفه ..هيا خافت عليها وقابلتها بالوجه و راعها اللي شافته و على طول ضمتها : نوره!!!!!! شفيج حبيبتي ؟؟؟ ليش هالصياح كله
طبعا نوره كان سايح مكياج عينها من كثر ما تصيح و تمسح دموعها : هيااااااااا.. بموت يا هيا.. أنا اليوم بموت
خافت عليها هيا وضمتها اكثر: بسم الله عليج يا عيون وقلب هيا إنتي... شالكلام اللي تقولينه الله يهداج ذكري الله؟؟؟
نوره ومازالت تصيح : أقولج بموت.. أنا حاسه إن اليوم آخر يوم بحياتي
توها هيا بترد عليها الا يرن جوال هيا : الو
سيف اللي ما حضر الملكه لانه لو حضر اكيد بيموت.. بصوت كله حزن: الو هيا
هيا طالعت نوره وهي ترد : هلا سيف
نوره سمعت اسم سيف وزاد صياحها وقامت تشاهق بصوت عالي لا شعوريا و من قوة صياحها تحس ان روحها بتطلع خلاااااص
هيا ارتاعت عليها وسيف من سمع صياحها بغى يستخف : هيا ؟؟ هيا هذي نوره اللي تصيح ؟؟
هيا تحاول تسكتها : بسم الله عليج ... خلاص حبيبتي يكفي صياح شفيج؟؟ ..
الا سيف يصرخ في الجهه الثانيه : هيوووووه هذي نوره؟؟
هيا انتبهت لاخوها : إي هذي نوره
سيف حس ان قلبه طلع برى ضلوعه خلااااص.. نوره تصيح ؟؟ ليش؟؟ وصرخ في اخته : ليش ؟؟ شفيها نوره؟؟ عطيني اياها الحين
مدت هيا الجوال لنوره وهي متوتره من صرخة اخوها.. نوره طالعت الجوال وهي لسه تشاهق وسيف يصرخ في الجهه الثانيه : نوره ..نوره الله يخليج يا نوره ردي علي
نوره بس تصيح وهي تسمع صوته مو قادره ترد.. وسيف شوي ويصيح : نوره..وسكت شوي وهو يحاول بس ما قدر يمسك نفسه هالمره عن إنه يقول : يا قلب سيف وروحه ردي علي
نوره سمعت هالكلام ويزيد صياحها : سيييييف .. بموت يا سيف
من سمع سيف كلامها خلاص إنهار تماماً : بسم عليج.... لا تقولين هالكلام يا جعل روح سيف فداج يا عيون سيف
نوره وهي في قمة حزنها على قمة فرحها يوم سمعته يتفداها : بسم عليك يا روح نوره
سيف هنا اصدمته الكلمه الاخيره وهو يمسح دموعه اللي صارت مثل الشلال : ايش ؟؟ شقلتي؟؟ عيدي نورووه ..
نوره استحت واسكتت وهيا فاتحه فمها وهي تسمع هالكلام اللي تقوله نوره
سيف هالمره يكلمها ونبرة الصوت تغيرت 180 ْ : نوره الله يخليج عيدي اللي قلتيه
نوره حمر وجها من الفشيله يوم جات عينها في عين هيا اللي ابتسامتها شقت حلجها شق: يا .. روح نوره
سيف قام يصارخ من الفرح وهو يضحك من قلبه : ياااااااااااويل حالي هههههههههه.. بتهبلين فيني يالبزر .. سمعي يا نوير الحين بجي بيتكم وبمنع الملكه ويا ويلج تقولين ما أبي سيف .. وصرخ بالقوه: ساااامعه
نوره انقزت من مكانها على صرخته.. حتى اخته سمعت صوته وانصرعت نوره ويدها على قلبها من الخرعه : زين مو قايله ..وكملت بصوت واطي مصحوب بخجل: ما أقدر أصلن
سيف طار برج من راسه : خلاص خلاص.. مو الحين هالكلام ما أستحمل .. يالله بروح لأبوج الحين
نوره بخجل عطت هيا الجوال بعد ما صك سيف الخط وهيا تطالعها بحب واندهاش وفرحه : يا بعد قلبي يا نونو هههههههههههه.. تحبون بعض يالقطو والفأر هههههههههه يا فرحة قلبك ياأخوي.. تدرين شسويتي فأخوي ؟؟
نوره وهي فاتحه عينها على الاخر : لا.. ايش سويت ؟؟؟
وتضحك هيا :ههههههههه لا خليه هو بعدين يقول لج بنفسه أحسن
في المجلس كان الكل حاضر الشيخ واهل المعاريس ألا على دخلت سيف وهو في قمة بهدلته : خالي أنا مو مرخص نوره لأحد
الخال استغرب من ولد اخته ومحمد انفجع من حركة سيف الغريبه عليهم: سيف عسى ما شر؟؟ شهالكلام؟؟
سيف رفع يده لاخوه بقصد اسكت : خالي أنا ولد عمة نوره و أولى بها من الغريب ولاني براضي إنها تتزوج غيري
الخال سكت وبعدين تذكر حال بنته : بس يا سيف أنا ما أقدر أزوجك بنتي .. أنا عطيت كلمتي للرجال..وسكت شوي الخال وهو يطالع وجه سيف إللي تغير و حالته إللي يرثى لها وقال : إلا إذا نوره وافقت عليك
سيف طار من الفرحه ونور وجهه بذيك الابتسامه إللي اخفت كل ملامح الحزن إللي كان فيه ..وطلع الخال ووجهه متغير من الفشيله من حركة سيف وشاف زوجته قدامه : وين نوره ؟؟؟
الأم وقلبها ناغزها: فوق في غرفتها
راح لها فوق وهيا يوم شافت خالها بيكلم نوره طلعت عنهم ...قعد ابو نوره يطالع بنته بابتسامه ويمسح على راسها بعد ما شاف آثار الدموع على عينها : نوره .. سيف طلبج مني ألحين وأنا ما ابي أغصبج على شي خصوصاً الزواج .. شقلتي ؟؟ سيف وإلا خالد ؟؟؟
نوره نزلت راسها وهي مستحيه :... سيف يبه
ضحك ابوها عليها : ههههههه بعد من غير حيا.. سيف يبه هاااااا؟؟ بعدين بعرف سالفتكم يالشياطين هههههههه.. وسكت وهو مبتسم ويطالعها : بالله الحين ايش أقول حق هالرجال إللي تحت؟؟؟... ما أقول إلا الله يسعدج ويهنيج
سيف قاعد على أعصابه ويطالع في خالد إللي لونه تقلب مية لون من قهره من هالسيف.. إلا بدخلت أبو نوره وهو يوجه كلامه لسلطان وخالد : السموحه منكم يا سلطان والله لو هي ذبيحه ما عشتكم.. وخالد ولدنا والنعم فيه.. ولو ما كنا شاريينكم ما قربناكم.. بس الزواج قسمه ونصيب
سيف فز وحب راس خاله من الفرحه وسلطان تفهم الموضوع بس خالد صابته خيبة امل كبيره و طلعوا ... وعقد الملاك على سيف ونوره .... عاد سيف من الشفاحه إللي فيه قال يبي يشوفها ألحين ونادواها من فوق وهي توها تتظبط بعد الصياح
في المجلس سيف قاعد يستناها إلا بدخلتها ويفز واقف ويروح لها وهو مبتسم و يمسك يدها قدام ابوها وهو يجرها وهي التفتت لأبوها وهي خايفه على مستغربه: يالخال اطلع شوي الله لا يهينك عندي سالفه مستعجله مع حرمنا المصون
ويطلع الخال وهو يضحك : هههههههه زين بس 5 دقايق لا تطول السالفه ترى أزوجكم اليوم
سيف يطالع فيها وهو عاض على شفايفه: يا ريييييييييت
نوره ما استحملت تمسك ضحكتها على شكل سيف : ههههههههههه
سيف يطالعها وهي تضحك بحب ويسحبها تقعد جنبه :فديت هالضحكه و راعيتها
عساها دوم مو بس يوم
استحت نوره ونزلت عينها وهو يكمل كلامه : شسويتي فيني يالبزر ؟؟ إلا ترفع عينها بقهر: شوف سيف أنا أكره ما علي هالكلمه
ويموت سيف من الضحك : هههههههههه أدري إن هذي الكلمه سبب تعاستي... بس بعد... أنتي أحلى وأجمل بزر في عيني
سكت شوي وهو يطالع عيونها :.... تدرين إني بغيت أستخف و أتهور و أجيج بيتكم يوم صكيتي السماعه ..تدرين إني من ذاك اليوم ماذاقت عيني النوم... كل ما غفيت شفتج على الكوشه وجنبج خالد
تجمعت الدموع في عيون نوره : بسم الله عليك..... سيف أنا عمري ما حبيت أحد غيرك.... بصرحه أنا وافقت على خالد عشان تشوف إن نوره مو بنيه صغيرونه
سيف يمسح دموعها إللي نزلت وهو مبتسم بحب : يا عمري على إللي كبرت وصارت عروس لسيف وإن شاء الله أم عياله... بس خلاص لاتطالعيني بهالنظرات ترى أتهور وأخلي العرس الليله
بعد الملكه بشهر في المدرسه ابتسام ونوره قاعدين يسولفون بالصف
ابتسام وهي تتشره : شدعوه كل ما أتصل إلا نايمه أو عندج سيف الله المسلول
نوره بابتسامه خجل : بعد شسوي لسيف فديت عيونه يا أسهر بالتليفون معاه و إلا يجينا البيت كل دقيقتين
إلا بدخلت مريم عليهم : فديت عيونه هااا.. الله يرحم ذيك الأيام ... أيام ما كان طاري سيف يجيب لج اللوعه
نوره حطت يدها على قلبها تقلد مريم : سييييييف.. وه بس.. يا زينه و يا زين طاريه ههههههههههههههه
أولها ببدا بالسلام وثم رد التحايا
عقبها يحلى الكلام فزين الوصايف
سبحان من صوره زين الحلايا
العيون ناعسات مثلها ما قد شايف
والخصر ميلته به موتي وفنايا
والشعر زين متون اغلى الولايف
والنحر كنه قمر يضوي بسمايا
وخدودها تغري مع لون الشفايف
رزة طولها لا وقفت بين البرايا
ترفةٍ تزهى بحسنها وغيرها زايف
بقربها افرح وتضحك الدنيا معايا
وبغيابها تمضي سنيني حسايف

وموووووووووووووه بوسه مني لكم لأن القصه انتهت أخيراً النهايه الصح إللي أعتقد إنكم تبونها مثل ما أنا أبيها
ولكم مني الف شكر ومحبه وتقدير على التشجيع واتمنى إن القصه حازت على اعجابكم
وبالنسبه للاشعار اللي في الروايه لشعراء معروفين
إلا هالقصيدتين فهم لي انا سالفتي سالفه
عادي احبه
عادي اوده
عادي ارسل اشواقي له من بعيد
عادي ان شوفه غدى لايام عيد
عادي لو حبه كل يوم(ن) يزيد
بس وش يفيد
دام قلبه مقيد بالف قيد
+
أولها ببدا بالسلام وثم رد التحايا
عقبها يحلى الكلام فزين الوصايف
سبحان من صوره زين الحلايا
العيون ناعسات مثلها ما قد شايف
والخصر ميلته به موتي وفنايا
والشعر زين متون اغلى الولايف
والنحر كنه قمر يضوي بسمايا
وخدودها تغري مع لون الشفايف
رزة طولها لا وقفت بين البرايا
ترفةٍ تزهى بحسنها وغيرها زايف
بقربها افرح وتضحك الدنيا معايا
وبغيابها تمضي سنيني حسايف


اوجه شكري وتقديري لمدراء التحرير اللي ساعدوني كثير في الاخطاء الاملائيه واللغويه واللي كان لهم الفضل الاول في تشجيعي على التهور وكتابة هالقصه خواتي ( ناهد وعيوشه )>>>> اهم شي مدراء التحرير خخخخخخ
احب اشكر اخواتي
ملاك الشرق ذات الردود الحماسيه
عطيت ولا خذيت
تستاهل الغالي
miss$bink
بنت بدويه
ايس كريم
&&ليتني في خياله&&
دلوعه ومزيونه


اللي تابعوني وردوا على البارتات واللي بفضل هالتشجيع حسيت اني صج صج اعرف اكتب شي حلو >>> مصدقه روحي خخخخ
وشوووووووووووووووووووكرا
تجميع
شموووخهـ
تعليقات
    حجم الخط
    +
    16
    -
    تباعد السطور
    +
    2
    -