رواية قتلهن الطيش وأحياهن الحب -21

رواية قتلهن الطيش وأحياهن الحب -21

عدا يومين على هذا الموضوع وحسن طبيعي رح يكون اتصل على هند .. لكن هند ماهي عارفه وش تسوي معاه عشان كذا ماردت عليه .. هند كانت بغرفتها وجالسه تطلع ملابس لأنها بتروح هي ولوجين لنور .. فاتحه الدولاب ونص الدولاب على السرير وواقفه تفكر وش تلبس .. اللين اختارت تنوره جنز بيج وبلوزه تركواز ..حطتهم على جنب وراحت عند التسريحه .. رن جوالها برقم غريب .. ردت هند وسكتت :....

حسن : الوو

هند ماعرفته: نعم

حسن : عظم الله اجرك ..

هند ابتسمت وعرفته : جازاك الله خير

حسن فرحان انه سمع صوتها : واخيرا رديتي ..يعني لو مااتصلت من رقم ثاني كان مارديتي علي صح ؟

هند : انا اسفه على الحركه اللي صارت

حسن : انا اللي اسف ياقلبي على كل شي .. اسف على كل ضيقه صدر كانت بسببي .. اسف على كل دمعه نزلت من عيونك .. اسف على كل لحظه حلوه ماعشتيها عشاني .. هند انا اسف ياقلبي .. اسف بكل معانيها ..

هند : تقولي اسف ياحسن .. وانت جرحتني جرح لا انا ولا الايام قدرت تداويه

حسن : انا بداويه بس عطيني فرصه .. انا ابعوضك عن كل شي راح .. ابعيشك احلى دنيا .. ابنسيك نفسك .. وابطيرك فوق فوق بالسما عشان تصرخين بصوتك وتقولين لهالعالم كله انك اسعد انسانه معاي

هند : قلت لي هالكلام كثير .. وماشفت شي .. ولا نسيت ؟!

حسن : هذيك ايام راحت والله لا يعيدها .. حنا باليوم وابي تطلبين أي شي بس عشان اثبت لك حبي الصادق .. هند انت ماتعرفين وش صار فيني لما لوجين قالت لي انك توفيتي .. هند تدرين اني بكيت .. تدرين اني انهبلت .. لكن قلبي كان محسسني ان السالفه فيها كذب

هند : انا بعد الحركه اللي سويتها فيني كرهتك .. عشان كذا قلت للوجين تقولك هلاكلام .. كنت ابيك تبعد عني

حسن : هنوده حبيبتي انا اسف للمره المليون اقولها لك اسف اسف اسف .. وش تبين بعد اسوي عشان تقبلين اعتذاري؟!

هند : ولا شي سلامتك .. بس منيره ....

قاطعها حسن: حبيبتي منيره انسي موضوعها خلاص اعتبريها شخص بحياتك واختفى ,, ولك مني وعد بقطع علاقتي فيها .. وماابي اكون بهالدنيا الا معك وبس

هند ابتسمت : تسلم .. بس انا ابي شي يثبتلي هالكلام لأني بصراحه لين اللحين خايفه ومو واثقه

حسن : بوش تبين اثبت لك وانا حاظر باللي تامرين عليه ..

هند : عندك صور لها ؟!

حسن تفاجئ: صور ؟؟

هند : ايه صور لمنيروه .. اكيد عندك صح ..؟!

حسن خاف: ليش ياقلبي صور .. ماله داعي تكبيرنها

هند : اهااااه .. خلاص فهمت اذن كل اللي قلته كذب بكذب وماتغير اي شي وانت مثل ماانت

حسن : لا والله اني ماكذبت بشي

هند : اجل ارسل لي صورتها ..

حسن : بس ماعندي لها صور ..

هند : موب شغلي دبر .. ولي دبرت صوره لها اتصل علي

حسن : طيب ليش فهميني

هند : لما اشوف الصوره بجوالي بقولك .. ولا تخاف عليها انا مارح افضحها بس ببرد ناري .. لأني مو من النوع الواطي والحمدلله.. واعراض الناس مو لعبه عندي

حسن : اجل وش تبين فيها ؟!!

هند : لما اشوفها اقولك ..

حسن : توعديني انك بتحافظين على صورتها ؟!

هند : اكيد اوعدك

حسن : اجل اصبري كم يوم وبتوصلك

هند : اوكي اجل مابيننا أي كلام اللين اشوف الصوره عندي

,,,,,,,,,,,,,,,,,,,,,,,,,,,,,

بنفس الوقت هذا نور كانت هي وضي ينتظرون البنات بالبيت وجالسين بالصاله مع سعود اماعبدالرحمن موب موجود ..

سعود:بيسهرون عندك البنات اليوم ؟

نور: اكيد ..

ضي : نونو قلتي لهند تجيب هنوف معها؟!

نور: ايه قلت لها .. وقالت طيب

سعود: اجل انا بتصل على عزيز يجيني ياخذني

نور: ليش بابا

سعود: عشان تاخذون راحتكم بالبيت .. وانا من زمان مارحت بيته

نور: بابا عادي البنات متعودين وبعدين حنا مابنجلس معك ..

سعود:ادري انتو بتجلسون مع البنات وانا بجلس اقابل التلفزيون اللين امل .. خلني اكلم عزيز .. واطلع اغير جو البيت

نور : بابا لا تحسسني بالذنب

سعود: ذنب وش يابنتي

نور: اننا بنخليك تجلس لحالك

سعود: لا انا ابي اطلع انكتمت من الجلسه هنا .. وبعدين انا ابي لكم الوناسه .. ابيكم تتجمعون دايم وتستانسون بوقتكم

نور: الله يخليك لنا يارب

سعود: امين .. قومي اتصلي على عبدالعزيز خليه يمرني

نور: طيب ..

يتبع...

تابع الجزء العاشر

اما لوجين كانت خلاص جاهزه لكنها ماراحت لنور لأن الوقت بدري.. وكانت لابسه بنطلون زيتي وبلوزه تفاحي وحاطه كحل اخضر وقلوز ومسكرا وجزمه سبور زيتي بتفاحي ومستشوره شعرها وجالسه بغرفتها على كرسي المكتب وتدور.. ومنزله غرتها على وجهها وتهفها بهوا من فمها والغرا ترتفع وتطيح على وجهها مره ثانيه .. اورنج باليومين اللي راحت مااتصل ولا لوجين اتصلت عليه بعد الطلب اللي طلبها اياه .. بهالحظه اتصل اورنج والجوال كان بالشنطه وقامت طلعته بسرعه وشافت الرقم وخافت ..

ردت : الوو

اورنج : اهلين بأحلى الو .. شخبارتس حبي

لوجين بجمود: بخير الحمدلله .. انت كيفك

اورنج : انا مشتاق لتس .. ليه مااتصلتي باليومين اللي راحت

لوجين : كنت مشغوله شوي

اورنج : مشغوله بوش ياقلبي دراسه وماعندتس .. وبعدين وش الشي اللي يشغلتس عن حبيبتس ؟!

لوجين بلعت ريقها : ابدا .. بس شوي مشاغل بالبيت

اورنج : اهااا .. لولو حبيبتي ..

لوجين : نعم

اورنج : فكرتي بالموضوع اللي كلمتس به؟!

لوجين : أي موضوع ؟

اورنج : حبيبتي ولو .. يعني نسيتي وش طالبتس انا ؟!

لوجين : يووووه عزوز .. خلاص انتهينا من هالسالفه وانت عارف رأيي فيها

اورنج بصوت حاد: لا مانتهينا .. واللي ابيه منتس بتسوينه

لوجين خافت : لا مابسويه

اورنج : بتسوينه غصباً عليتس ..

لوجين : انت وش فيك .. وش صاير لك عزوز .. انت ليش صاير كذا وش هالاسلوب الجديد

اورنج : انا كذا من زمان .. وهذا اسلوبي من قبل تنولدين .. واللي بتتعودين عليه

لوجين : طيب والمطلوب مني؟!

اورنج : تعرضين لي وانت شبه عاريه ..

لوجين بهاللحظه من جد خافت .. بس استجمعت قواها وقالت : نجوم السما اقرب لك مني ياواطي ياحقير .. وتقفل السماعه بوجهه وتصيح من الفجعه .. دقايق ووصلت لها رساله من اورنج : ( باقي معك مهله لأخر الاسبوع ..فكري زين قبل تخسرين كل شي ) اورنج ليه جالس يتصرف هالتصرف مع لوجين وهي ماضرته بشي ..اورنج يبي ينتقم من هند بصديقتها مثل ماخربت عليه صداقته بنور بس هوا مايعرف ان هالشي بيزيد كره نور له وانه مهما سوا مارح ترجع علاقتهم مثل اول ... قرتها لوجين ومسحتها وهي بقمه خوفها .. فكرت انها تبطل تروح لنور لكن قالت لأ بروح وافاتحها بالموضوع يمكن هي بتعرف تتصرف ..

,,,,,,,,,,,,,,,,,,,,

بعد المغرب جا عبدالعزيز سلم على خواته واخذ ابوه تمشوا شوي وراحوا للبيت .. جنان : ددي ددي .. فتلي اياها ( جدي فكلي اياها )

اخذ سعود منها الحلاوه وفكها : هه خذي ياحلوه

عبير: نورت البيت ياعمي سعود .. كان من زمان جيت لمنا ونستنا شوي

سعود: منور بأهله يابنتي .. تسلمين

عبدالعزيز: تراك بتمرح عندنا الليله

سعود: لا يابن الحلال مااعرف انام غير في بيتي

عبير: كلها يومين غير مكانك واستانس معنا وبكره نكلم البنات وعبدالرحمن بعد ونتغدا ونتعشى سوا

جنان تناظر سعود: ليث ماذو عنتنا ( ليش ماجو عندنا)

سعود: عندهم ضيوف بالبيت

عبدالعزيز: هاا يبه شقلت

سعود : لا ياوليدي .. اجلس عندكم اليوم كله بس انام لا والله لا زم تعذروني مااقدر انام الا بمكاني

جنان: ددي نام عنتنا الله يخليت .. الله يدخلت الذنه ( جدي نام عندنا الله يخليك الله يدخلك الجنه )

سعود يبوسها ومبسوط من كلامها: يازينك ياجنان الله يسعدك على هالدعاوي .. انت شرايك تجين معاي تنامين عند عمه نور وعمه ضي

جنان تناظر امها وبخوف : ايه

ضحكو عليها كلهم .. وقالت عبير : والله بتجننكم

سعود: لا ماتجننا ولا شي خليني بس اخذها معي وانا رايح

عبير: اللي يريحك مثل ماتبي

,,,,,,,,,,,,,,,,,,,,,

بعد العشا البنات كانوا في بيت نور .. لوجين مابينت أي شي رغم ان الخوف ذابحها من داخل ضي والهنوف كالعاده بغرفة ضي ويسولوفون .. اما نور وصديقاتها جالسين بالصاله مشغلين التلفزيون وسوالف وضحك

وقالت لهم هند عن اللي دار بينها وبين حسن

لوجين : وانت شتبين بصورتها

هند : ابيه يثبتلي صدق كلامه

نور: كلامه باين انه صادق

هند : لا ياحبيبتي غير كذا ببرد ناري منها

نور: امانه عاد وش تبين تسوين ؟

هند تبتسم : لما توصلني الصوره اقول لكم

لوجين : ماقلت لكم سالفه الهديه اللي وصلتني من مجهول

هند ونور: لأ

نور: أي هديه

لوجين : في نفس اليوم اللي طلعت فيه النتيجه بالليل اندق الجرس وفتحت خديجه ولقت هديه ودخلتها .. وكملت لهم باقي السالفه

هند : والله وناسه مين يلاقي عند بابه هدايا بأسمه

لوجين : بس الهديه رووووووعه .. وتقرب منهم شمو ريحة العطر هذا واحد من المجموعه

نور: وااااو خطيره ريحته بااارده

لوجين : لا والباقي احلى ان شالله اذا جيتوني يوم الحفله بوريكم اياها

هند : الا صح متى الحفله ؟!

لوجين : والله بابا كان يبغاها هذا الاسبوع بس انا اجلتها عشان تقدر تجي جود

نور وهند : اهااا

نور: بس الصراحه سالفه الهديه تحير .. وتناظر هند : صح ؟!

هند: ايه .. يكن من وحده من صديقاتك ..

لوجين : بس لو من صديقاتي ماتقول ولا تكتب اسمها ليش طيب؟

نور: والله مدري .. يالله ياشيخه المهم هديه وخلاص .. وتضحك

لوجين تناظرهم : ايوه صح انت واياها وين هديتي .. اشوف ولا وحده فيكم ذوق وجابت لي شي

نور تضحك: معرفتك فيني اكبر هديه .. صح ؟!

لوجين: هيهيهيهي لا والله من جد

نور: ايه من جد ..

هند : لا يالخبله حنا نبي نجيب الهديه يوم الحفله عشان كذا اسألك متى موعدها

لوجين تضحك : والله صدق

نور وهند: ايه

بعد وقت البنات طلعوا لغرفه نور وجلسوا فيها .. ونور فاتحه دولابها توريهم فستان اشترته قبل فتره .. كان لونه بني محروق قصير لحد الركب وبدون اكمام لكن امتداد من حرده الصدر اللين فوق ويلف على الرقبه من ورى مثل القبه ..والظهر مفتوح لنصه .. ومطرز اطرافه بشكل ناعم باللون الذهبي ,, وطالع شكله خيال .. البنات انجنو عليه ومره اعجبهم .. جلسوا شوي وقالت لوجين نبي مويه عصير أي شي ميته عطش .

نور: هذا الطريق تدلينه .. مافي احد انزلي اشربي وتعالي

لوجين : مافيني

هند: اجل اجلسي عطشانه اللين تموتين مافي احد بيجيب لك..

لوجين تضحك وقامت : لا خلاص بنزل ..

نور: وافتحي الثلاجه جيبي لنا عصير

لوجين : اوكي ونزلت ..

نازله لوجين على الدرج وهي تفكر بسالفه اورنج ودخلت المطبخ ...

بهاللحظه عبدالرحمن دخل البيت وعنده علم من ابوه ان البنات عند نور يوم قرب للصاله تنحنح بس محد رد عليه وعرف انهم مو بالصاله .. دخل عادي وتوجه للمطبخ على طول .. اول ما عتب عتبه المطبخ وقف.. شاف لوجين واقفه قدام الثلاجه وماتشوفه طبعا وتفكر وش تاخذ من العصيرات الموجوده .. عبدالرحمن لازال واقف وابتسم ودخل بهدووء اللين وصل لنص المطبخ ومن حظه ان الخدامه موب موجوده بهالحظه .. ركز ظهره على دولاب المطبخ وكح كحه متعمدها عشان تلتفت له .. : كح كح

لوجين على طول لفت وشافته ماعرفت شتسوي : صرخت وغطت وجهها بالتبسي اللي كانت تبي تشيل فيه العصير

عبدالرحمن ضحك وقال: شلونك لوجين

لوجين : هييي منت شايفني يعني .. اطلع برا

عبدالرحمن مات ضحك :يعني بالله ماكنا قبل مده مع بعض بالبر وكاشفه علي

لوجين : هذاك البر مو البيت

عبدالرحمن : طيب نزلي التبسي اللي بيدك هذا

لوجين لازالت ماسكته وتمشي وتناظر الارض من تحت التبسي تبي تتطلع من المطبخ .. وقف بطريقها عبدالرحمن واخذ التبسي من ايدها وحطه على الدولاب .. لوجين : هيي انت وش فيك ؟؟

عبدالرحمن مبتسم : مافيني شي .. ومبروك النجاح

لوجين : الله يبارك فيك .. وتبعد من قدامه تبي تتطلع من المطبخ

لكن عبدالرحمن مسكها من كتفها وقال: عجبتك الهديه ؟!

هنا لوجين سكتت وناظرته : انت اللي جايب الهديه ؟!

عبدالرحمن : ايه انا .. عجبتك ؟!

لوجين ابتسمت وقالت : تجنن ..

عبدالرحمن : قريتي الكروت ؟!

لوجين تناظره ووجهها احمر وطالع عبدالرحمن اطول منها بكثير : ايه قريتها

عبدالرحمن : وش كان مكتوب فيها؟!

لوجين : انت ادرى ..

عبدالرحمن: لا ماادري .. نسيت .. انت قولي وش اللي كان مكتوب فيها

لوجين خلاص انحرجت موت ورفعت ايدها لأيده اللي ماسك فيها كتفها ونزلتها بهدوء : مكتوب الف مبروك النجاح

عبدالرحمن : وغيره ..

لوجين مشت من قدامه لبرا ويوم وصلت عتبت المطبخ قالت : شكرا على الهديه .. وكملت طريقها لفوق .. عبدالرحمن مبسوووط على اللي صار وراح فتح الثلاجه اخذ له عصير وجلس يشربه .. اما لوجين وهي طالعه مسرعه قابلوها ضي والهنوف وقالت لهم ان عبدالرحمن تحت وراحت للبنات

لوجين : نور لو سمحتي هزي طولك وانزلي جيبي لنا المويه والعصير لأن اخوك طلع تحت ودخل علي بالمطبخ وانا طلعت لكم جري

نور: متى جى

لوجين : مدري عنه

هند : طيب وايش المشكله يعني جى وانت بالمطبخ موكنا كلنا سوا بالبر

لوجين : ادري كنا سوا بالبر بس البر كل الناس فيه.. وبعدين لاتنسين اننا كنا نلبس غطا على شعورنا موب كذا ..

نور ترفع حواجبها: ماشالله في تطور والله

لوجين : انتو وش شايفيني بايعه نفسي

هند تضحك: لا شاريتها هههههههههههههه

لوجين : يامصخك

نزلت نور للمطبخ وكان عبدالرحمن باقي موجود .. ويوم شافته ضحكت

عبدالرحمن : وش فيك

نور: دخلت على لوجين .. وتضحك

عبدالرحمن ابتسم : ايه دخلت وكانت فاتحه الثلاجه وبيدها التبسي ويوم شافتني صرخت وتغطت فيه

نور فطست ضحك: غبيه هالبنت .. وراحت الثلاجه تطلع عصير .. وفتحت الدولاب وحطت شبس وبساكيت بأنواعها وشالت التبسي تبي تطلع

عبدالرحمن : مطولين عندك البنات؟!

نور: ايه بيسهرون .. ليش بغيت شي

عبدالرحمن : لا ولا شي بس اسأل ..

نور: انت جالس ولا بتطلع

عبدالرحمن : لا ماني طالع

,,,,,,,,,,,,,,,,,,,,,

فهد ماشي بسيارته الا جواله يدق .. ناظره الا هذا رقم وليد خويه ..غريبه وش يبي ورد: هلا والله

وليد : السلام عليكم ..

فهد : وعليكم السلام ورحمه الله .. الله حيه ..شخبارك

وليد : بخير يامال الخير .. انت اخبارك

فهد : الحمدلله بخير ونعمه

وليد : الحمدلله .. بفيت اسألك ياابو عبدالله

فهد: سم

وليد : الوالده تبي رقم بيتكم

فهد : خير

وليد : الخير بوجهك .. بس ودها تتعرف عليكم وتزوركم

فهد استغرب : ابشر سجل عندك الرقم

,,,,,,,,,,,,,,,,,,,,,,,

حسن : حبيبتي ..

منيره : هلا ياعيون حبيبتك

حسن : ماتصدقين وش كثر مشتاق اشوفك .. ليش مانشوف لنا مكان عام نتقابل فيه

منيره استغربت اسلوبه بس فرحت وقالت بنفسها يمكن رجع لها حسن مثل اول : يابعد عمري وانا اكثر .. بس نتقابل برا صعبه شوي

حسن : ليش صعبه .. بمكان عام وكل الناس حوالينا

منيره : والله ودي بس مااقدر اطلع من البيت هالايام

حسن : طيب وش اسوي اجل .. يهون عليك اضل مشتاق لك وانت مشتاقه لي ولا نشوف بعض

منيره ومصدقه الفلم : لا مايهون علي .. بس وش اسوي مابيدي شي .. انت عارف وضعي بالبيت طلعاتي بالسنه حسنه

حسن : طيب عندي فكره ..

منيره : وش هي؟!

انا برسلك صورتي وانت ترسلين لي صورتك .. وش رايك مو كذا احسن من اننا مانشوف بعض بالمره

منيره : طيب انا ارسلت لك قبل كذا كثير ماهي عندك ..

حسن : انا وش كنت اقولك دايم .. اشوفها وامسحها وانا كنت عند كلمتي و ماعندي أي صوره لك الحين

منيره : خلاص اوكي .. بس انت ارسل لي اول لأني مشتاقه لك موت

حسن ابتسم : وانا بعد يالله باي خلينا نرسل صورنا

منيره تضحك: باي قلبي

قفلت منه منيره وارسلت له احلى صوره لها بالجوال .. وحسن بعد ارسل لها صورته ...

,,,,,,,,,,,,,,,,,,,,,

البنات لازالو جالسين .. رن جوال لوجين بنغمه رساله ..سحبت الجوال من جيب البنطلون وفتحتها .. وكانت الطامه الكبرى ,,,,

,,,,,,,,,,,,,,,,,,

من جهه ثانيه وليد عند امه : يمه هذا رقمهم .. متى بتروحين لهم

ام وليد : اصبر ياابن الحلال ترى محد يطاردك

وليد: ابشري يمه .. بس بعرف متى تزورينهم

ام وليد : على قدام شوي

وليد: وليه مو الايام هذي ؟!

ام وليد : والله ابوك اللي قالي

وليد: ليش يمه ؟!

ام وليد : والله مدري عنهم قال تزورينهم وتشوفين البنت بس مو اللحين ..سألته ليه ..ماقالي

وليد بآسى : ياااربي

,,,,,,,,,,,,,,,,,,,,,,,,,

هدى : ماقلتي ياام ماجد من البنت اللي تبينها لماجد ؟!

سعاد تضحك : والله ذيك الايام مابغيت اقول قدام البنات لأني ماابيهم يعرفون .. ابيها مفاجئه للكل

هدى : يعني مابتقولين حتى لي .. معزمه تخبين السالفه

سعاد : لا ياام فهد بقولك .. لأني باخذ رايك فيها اصلا ..

هدى : من هي ؟!

سعاد: شرايك بنور

هدى فرحت : نور ماغيرها

سعاد : ايه ماغيرها بنت سعود وحنان الله يرحمها

هدى : والله هذي زينه البنات ماشالله .. عرفتي تختارين ياسعاد ..

سعاد: والله ماجد اللي يبيها وقال اخطبيها لي .. بس لين اللحين ماكلمنا اهلها بالموضوع

هدى : الله يتمم لكم على خير ان شالله .. والله هذا الكلام الزين اللي يشرح الخاطر ياام ماجد

سعاد : يالله عقبال ماتلاقين لفهد بعد بنت الحلال اللي تسعده

هدى ا: الله يسمع منك .. ومتى بتتكلمون بالموضوع رسمي

سعاد : ان شالله قريب

هدى : الله يرحمك ياحنان .. وينك تسمعين اخبار مثل هذي ..الله يرحمك

سعاد : الله يرحمها الغاليه

,,,,,,,,,,,,,,,,,,,

هند ونور يناظرون لوجين اللي ماسكه الجوال ومايدرون وش السالفه بس شافو دموعها اللي نزلت فجئه وبغزاره

نور : لولو وش فيك

لوجين تعطي نور الجوال خذي شوفي .. نور اخذت الجوال وشافت الرساله ..شهقت نور : مستحيل اللي يصير هذا

هند مستغربه : وش فيكم بسم الله .. وتسحب الجوال من نور وتشوف هالرساله .. الرساله كانت من اورنج ..صوره لوجين وكاتب( تحتها لو مانفذتي اللي ابيه في الموعد اللي حددته بتلاقين هالصوره بكل الجوالات ومواقع الانترنت .. فكري زين ..اوكي )

لوجين تصيح : ياربي وش اسوي .. وتناظر نور : نور وش اسوي قوليلي

نور تناظرها وهي مصدومه : وش صار ؟!

لوجين تقول لهم السالفه وهي تصيح ..

هند : لوجين انت غبيه .. انت شلون تفكرين ابي اعرف .. يعني انا قبلك مجربه هالانسان ..شلون انت تغلطين نفس غلطتي .. وين عقلك ؟!

لوجين تبكي : اللحين قولوا لي وش اسوي

نور للحين مصدومه من اللي تشوفه وتسمعه من لوجين .. يعني لوجين شافت شكثر انا زعلت على هند بسبب هالموضوع وشلون هي تروح تسوي نفس الشي ..شلون..

لوجين تناظر نور وهي تبكي : نور وش اسوي ؟!

بهالحظه......... لوجين اخذت ثاني كف واقوى كف بحياتها من نور : حقيره

وتركتهم وطلعت من الغرفه

لوجين صرخت : ياااربي شسوي .. هند الحقيني دبريني

هند : لوجين شلون ادبرك شلون .. انت غبيه حماره دلخه ماتفكرين

لوجين : هند موب وقت هالكلام اللحين

نورطلعت السطح دخلته .. وصارت تتنفس بقوه وتحس براكين قهر بداخلها من لوجين .. تمنت انها ماتت ولا عرفت بهالسالفه .. نص ساعه جلستها نور لحالها بعيد عن هند ولوجين اللين روقت وهدت وردت نزلت لهم .. لوجين كانت جالسه تصيح وهند تناظرها وساكته ..

دخلت نور وجلست على السرير .. : ليش يالولو سويتي كذا ؟!

لوجين وصوتها كله صياح : ماادري والله ماادري

نور علت صوتها وانفعلت : انت ماتدرين وهند قبلك ماتدري وكل وحده فيكم تقول انا ماادري ليش سويت كذا .. انا ابي افهم وش فيه هالانسان الي يخليكم تتصرفون بدون تفكير .. ادري بتجاوبين وتقولون ماادري .. لوجين اللحين وش بيقول علي اورنج الحقير .. اكيد بيقول هذي نور اللي مسويه فيها الاخلاق ذولي صديقاتها اكيد هي مثلهم ..

هند: لا يانور انا قلت هالكلمه له قلت اكيد انك بتقول نور مثلهم .. قالي لا ..الاخوان وهم اخوان يختلفون عن بعض ..ومو معنى اللي صار ان نور تكون مثل وحده فيكم ..كل انسان له شخصيته وله افكاراه وتصرفاته

نور: فكينا بالله ..بلا كلام فاضي ..سكتت شوي وقالت : وين جوالي

هند: هذا هو وتعطيها اياه

نور: كم رقمه الحقير

لوجين ناظرتها : وش بتسوين

نور : مايخصك .. انت تسكتين وبس

هند: نور حبيبتي اهدي ..

نور: هند ماتشوفينها شسوت .. نفس غلطك كررته هي ماتفكر ماعندها عقل وتأشر بيدها على مخها وتقول: ولا هذا على الفاضي

هند تمسكها وتجلسها على طرف السرير: خلاص لا تقولين شي اللي صار صار .. الحين تبين تكلمينه وش تقولين له

نور: اللي بقوله بتسمعونه.. عطيني الرقم

هند تنقلها الرقم ونور تتصل .. ورد : الوو

نور هدت نفسها : الو السلام عليكم

اورنج : وعليكم السلام

نور: معاي عبدالعزيز؟!

اورنج : ايه من انت

نور وبقهرودموعها نزلت: معك نور.. عرفتني ( نور عمرها بحياتها مافكرت تكلم هالانسان لكن جى الشي اللي يجبرها عليه وهذا اللي نزل دمعتها)

اورنج سمع الاسم ماصدق : نوور

نور: ايه

اورنج : هلا والله .. شخبارتس

نور: الحمدلله ,, انت اخبارك ان شالله تمام

اورنج : تمام الحمدلله ..دامتس بخير حنا بخير

نور: الحمدلله ..انا اسفه اذا ازعجتك

اورنج: لا شدعوه عادي الله يحيتس بأي وقت

نور: بغيت اسألك لو سمحت

اورنج : امري

نور: تسلم .. وش صاير بينك انت ولوجين

اورنج: لوجين .. من لوجين هذي؟!

نور: عبدالعزيز مايحتاج تلف وتدور أنا عارفه كل شي .. وش التهديدات هذي والكلام الفاضي

اورنج : أي تهديد واي كلام فاضي .. ويضحك

نور: لو سمحت .. اورنج ..

اورنج : سمي

نور: انا ماعرفت فيك هالاسلوب المنحط ولا التفكير الحجري ولا عندك هالامور كلها صح ولا لأ

اورنج: صح

نور: اجل ليش هالتعامل ؟

اورنج :والله يانور صديقاتتس هم اللي جوا لمي .. انا ماتعرضت لوحده فيهم ..

هاللكلمه دمرت نور من داخلها ..

وكمل كلامه : ابيتس تعرفين شي واحد .. انا اسلوبي مع كل شخص يماثل اسلوبه بالضبط واعامل الناس مثل مايعاملوني

نور: اورنج .. انا عرفت اسلوبك الحلو واخلاقك العاليه وروحك المرحه .. تمنيت من كل قلبي انك تكون على طول بنظري بهذي الصفات ..يمكن مايهمك كلامي بس هذا اللي ابي اوصله لك ..

قاطعها اورنج : انا مثل ماقلتي وبضل كذا ان شالله

نور: بس كلامك للوجين يثبت غير هالشي

اورنج : نور انا كم لي اعرفك على النت طبعا ؟!

نور: سنين

اورنج: ولوجين وهند؟!

نور: كم شهر بس

اورنج: اجل لاتشيلين هم شي وانسي كل اللي صار وارتاحي .. والانسان اللي تعرفينه من سنين هو نفسه ماتغير ..

نور: وصور لوجين اللي عندك؟!

اورنج : اللحين بمسحها والله لأمسحها .. ابيتس توصلين لها كلمتين .. لو مو انت خويتها كان الامور اختلفت

نور: ايه هذا صديقي اللي اعرفه .. صدقني ماتمنيت الاتصال اللي بيننا يكون بسبب هالامور اللي صارت كنت اتمنى يكون اتصال بمناسبه احلى من كذا

اورنج يضحك: ولا يهمتس ..اهم شي اننا واخيرا سمعنا صوتتس

نور حست بقهر من كلمته : تسلم .. يالله بغيت شي اللحين ؟!

اورنج : ابد سلامتتس ورضاتس

نور: الله يسلمك .. مع السلامه .. وتقفل منه.. ونزلت الجوال ..

لوجين : وش قال لك

نور: خلا ص انتهى الموضوع

هند: وش قال ؟!

نور: قال وصلي لها لو مو انا خويتها كانت الامور اختلفت

لوجين : قالك بيمسح الصوره ؟!

نور: ايه

لوجين: متأكده

نور: اللحين نتأكد..

وترفع جوالها وتتصل على اهات .. الاتصال الاول مارد وعادت الاتصال ورد: هلا والله

نور: اهلين ..كيفك

اهات : تمام .. عاش من سمع هالصوت

نور: عاشت ايامك يارب.. شخبارك

اهات : ماشي الحال الحمدلله ..انت اخبارك ان شالله كل شي زين

نور: ياليت

اهات/ افااا .. خير وش صاير؟!

نور: اسمع بقولك شي عن اورنج

اهات تفاجئ: اورنج خويي ماغيره

نور/ ايه ..وتقوله كل الموضوع ..

اهات ضحك: هو يقول لها انشر صورك ومدري شنو

نور : ايه

اهات : والله مايسويها .. لا تشيلين هم وحطي فبطنك بطيخه صيفي ونامي

نور: اكيد ؟!

اهات : نور وش فيك هذا خويي واعرف تفكيره .. يمكن هوا سوا كذا تخويف لها بس اما انه ينشر صور وخرابيط لا مايسويها

نور: الله يريح قلبك

اهات : وقلبك .. نحن في الخدمه دائماً

ضحكت نور: ادري فيك ماتقصر.. يالله بقفل تبي شي

اهات : سلامتك

نور: الله يسلمك يارب .. يالله مع السلامه

اهات : مع السلامه

وتقفل منه وتحط الجوال وتقوم تروح تجلس جنب لوجين من الطرف الثاني للسرير: خلاص حتى اهات يقول انه مايسويها

لوجين ناظرت نور وضمتها وبكت مره ثانيه: انا اسفه يانونو والله اسفه

نور: حصل خير .. خلاص ان شالله مابيصير شي .. بس اهم شي تحذفينه من ايميلك ولا تردين عليه ابد لو اتصل ..فاهمه

لوجين تركتها : ان شالله

نور ناظرت هند: وانت وش فيك بعد واقفه كذا تقول صنم

هند ضحكت : لا والله شي بس متأثره بالمشهد اللي قدامي

قامت نور وقفت وصفقت ايدينها ببعض : يالله ماتبون تتعشون ؟!

هند : اكيد نبي

لوجين : انا ماابي مالي نفس

نور تسحبها من ايدها : يالله قومي بلا دلع خلاص لا تفكرين كثير السالفه انتهت واللي صار صار .. واللحين وقت الاكل وبس

نزلو البنات وطلبوا العشا وتعشوا وكل وحده راحت بيتها ...

,,,,,,,,,,,,,,,,,,,,,,,,,

انتهــــــــــــى الجزء العاشـــر...

في الجزء الحادي عشر .. هند وش تبي بصوره منيره ؟؟!

وهل خطوبه وليد للوجين رح تتم ..وان تمت وش بيسوي عبدالرحمن؟!

يتبع ,,,,,

👇👇👇

تعديل المقال