رواية سميتك معشوقي -3
فهد : لا لاتروحين ابيك تقعدين جنبي لين اخلص والا ترا بقوم
تسنيم وهي منحرجه جلست وهي متغطيه : طيب
سيف وهو يناظر امه : شخبارك يمه ؟
منيره بفرح : الحمد لله على سلامتك ياولدي .. حتى ماتنزلت تقول لنا بموعد وصولك عشان نكون موجودين
سيف بابتسامه : الله يسلمك يمه ... ودي عطيتكم خبر بموعد وصولي بس خفت اعطلكم عن اشغالكم وتنتظروني .. بعدين انا جيت متأخر وتعبان يعني نفس الحكايه
منيره : اهم شي فرحتنا بشوفتك ياولدي .. يانا مشتاقه اشوفك واجلس وياك واسولف معك
سيف : وهذاني موجود متى مابغيتيني وبتشبعين من شوفتي بعد
منيره : فديتك ياولدي .. ومن قال اني اشبع من شوفتك .. مهما جلستو قدامي ماشبع من شوفتكم ياعيالي
سيف : الله يخليك لنا يالغاليه .. الا ابوي ماشفته .. وين هو؟
منيره : هذي حزته يصحى .. الحين يجي عشان يفطر ويروح الشركه.... الا بدخلة عبد العزيز
عبد العزيز: احم احم .. صباح الخير
سيف وقف اول ماشاف ابوه وباس راسه : صباح النور يبا .. شلونك يالغالي
عبد العزيز : الحمد لله .. شلونك انت؟؟.. والحمد لله السلامه
سيف : الله يسلمك .. انا بخير من شفت وجيهكم السمحه
عبد العزيز : متى جيت؟
سيف : وصلت البارح .. بس كان الوقت متأخر . فقلت الحين نايمين واشوفهم الصباح
عبد العزيز : اهااا .. منور بوجودك ياولدي
جلس عبد العزيز عشان بيفطر وكانت تسنيم تبي تسلم عليه لانها من عادتها تبوس راس عبد العزيز كل يوم الصبح احترام له .. بس هي منحرجه من وجود سيف
تسنيم وقفت واتجهت لعبد العزيز وباست راسه وبصوت ناعم : صباح الخير يبا
عبد العزيز بابتسامه : هلا بنتي وين رايحه تعالي كملي فطورك
تسنيم : لا الحمد لله شبعت .. عن اذنكم
فهد : بابا ليه تروح تسنيم انا مابعد خلصت
عبد العزيز : ليه انت توك دادا؟... كل لحالك.. خلاص انت الحين رجال
فهد : انا خلاص شبعت بروح العب مع تسنيم
عبد العزيز : الله يكون بعون هالمسكينه ..
منيره بعصبيه : ليه؟؟... يعني الحين ولدي صار ملعوزها؟.. هي مجرد خدامه بس تخدمه وتستلم راتب
سيف انصدم من كلام امه : يممه وش قاعده تقولين
منيره : مثل ماسمعت .. بنت الفقر طمعانه بفلوسنا مو حب لاخوك
سيف : طيب ولو .. اهم شي هي مهتمه في اخوي ومو مقصره معاه .. والاحظ ان فهد يحبها حيل ومتعلق فيها
منيره بقرف : ساحره ولدي بنت الفقر تبي تستولي على فلوسه
عبد العزيز : منيره ليمتى وانتي تعاملينها كذا؟
منيره : لين ترجع لخرابتها عند بيت ابوها.. هذا هو مستواها
عبد العزيز بعصبيه : سمعيني زين .. ترا طفح الكيل .. مليون مرره وانا اقول لك ابعدي عن هالبنت
سيف : يبا هد اعصابك .. ترا مايسوى تتهاوشون عشانها .. وانتي يما خلاص اتركي البنت في حالها واعتبريها مجرد موظفه عندنا لاأكثر
منيره معصبه : وصلت انك ترفع صوتك علي ياعبد العزيز؟؟... وعشان مين؟؟.. عشان وحده ماتسوى؟؟..
قامت من على الاكل بزعل وراحت لغرفتها
: شالت جوالها بغيض ودقت على اختها .. الو
ام محمد : هلا بهالصوت
منيره : هلا فيك
ام محمد : شفيك صوتك متغير؟؟
منيره : ابد مافيني شي بس حبيت ابلغك ان سيف وصل البارح
ام محمد بفرح : الحمد لله على سلامته قرت عينكم بشوفته .. فاتحتيه بالموضوع؟؟
منيره : ماعليه ياوخيتي .. انا للحين مافاتحته .. الولد توه صاحي ويفطر .. وان شاء الله بكلمه العصر
ام محمد : أي ماوصيك تراني عطيت سحر خبر انه بيخطبها
منيره : الله يهديك ياختي لاكان استعجلتي لين نشوف وش يقول سيف
ام محمد : مايبي لها كلام .. من صغرتهم واحنا قايلين ان سحر لسيف
منيره : طيب طيب .. خلاص مثل ماوعدتك العصر اكلمه
ام محمد : لاتنسين تسلمي لي على سيف سلام كثير
منيره : وليه ماتجين انتي تسلمين عليه بنفسك؟.. المهم الليله العشا بمناسبة جية سيف بالسلامه لازم تجون
ام محمد : ان شاء الله .. اكيد بنجي .. سيف غالي علينا
منيره : ولا تنسين تجيبين معاك البنات .. لاني بسوي مفاجأه للكل >>> (ناويه على تسنيم)
ام محمد : مايبي لها كلام
منيره : يلله باي
**********
ام محمد وهي تنادي : سحر.. سحر
سحر وهي نازله من الدرج : نعم يما
ام محمد : تجهزي الليله العشا بيت اختي ام فهد عشان سيف جا من السفر
سحر بفرحه : والله؟... متى جا..
ام محمد : وصل البارح
سحر : طيب يممه راح البس احسن فستان عندي
ام محمد : لازم تصيرين احلى وحده لان كل الاهل بيكونون موجودين هناك
سحر بابتسامة دلع : افا عليك.. طبعا ياماما اكيد راح اكون احلاهم
*******
طلعت تسنيم من غرفتها وشافت الدنيا مقلوبه بالقصر لانهم يرتبون عشان الحفله الليله
تسنيم نادت وحده من الخدم : وش صاير؟؟.. وش قاعدين تسوون؟
الخدامه : مدام منيره يسوي حفلة عشا عشان سيف
تسنيم : اهاااااا... حتى ماكلفو على نفسهم يقولون لي
رن جوالها .. شافت رقم المتصل .. كانت خالتها اللي ساكنه بالرياض
تسيم : هلا خالتي
خالة تسنيم : هلا والله ببنت اختي .. شخبارك؟
تسنيم : الحمد لله مبسوطه .. وانتو وش اخباركم؟
خالة تسنيم : تمااام . حبيبتي.. حبيت ابلغك .. ملكنا على بنتي .. والليله خطوبتها لاوصيك لازم تجين .. على الاقل بدال امك
تسنيم : ان شاء الله راح اجي بس لازم آخذ موافقة ابوي
خالة تسنيم باستغراب : ابوك؟؟؟.. وش دخل ابوك؟؟...هو خله يوافق يخلي امك تجي عشان تروحين تاخذين موافقته..
تسنيم وهي تضحك : ههههه لا ياخالتي .. انا اقصد ابو زوجي
خالة تسنيم : اهاااا ... أي مو مشكله بس انتي حاولي تجين طيب؟
تسنيم : ان شاء الله
خالة تسنيم : يلله باي .. وسلمي على ابوك
تسنيم : الله يسلمك
امممممممممم .. الحين ام زوجي مستحيل راح تخليني احضر معاهم الحفله وراح تحبسني بالغرفه .. ليه ماروح خطوبة بنت خالتي احسن!!!.... انا لازم اروح لابوي عبد العزيز واستئذن منه
رقت الدرج واتجهت لغرفة عبد العزيز وطقت الباب
عبد العزيز : تفضل
تسنيم بابتسامه : زاد فضلك يبا
عبد العزيز يبادلها الابتسامه : خير اليوم جايه لين غرفتي؟؟
تسنيم : الخير بوجهك يبا .. بس انا ..... كنت ابي ........
عبد العزيز : قولي يابنتي لاتخافين قولي اللي تبينه وانا حاظر
تسنيم : بنت خالتي خطوبتها اليوم .. وودي احظر الخطوبه
عبد العزيز وهو عارف ان منيره ماراح تخلي تسنيم تشاركهم بحفلة العشا : خلاص انتي جهزي نفسك وخلي السواق يوديك
تسنيم بفرح باست راس عبد العزيز : الله يخليك لنا ويطول بعمرك يبا ... وطلعت
**********
طبعا تسنيم كانت عندها ملابس جديده ومالبستها لانها مجبوره تكون بعبايتها بالقصر
طلعت لها فستان ناعم من اللي شرتهم لها اختها ناديه وتروشت وسوت شعرها كيرلي ولبست الفستان وحطت لها ميك آب ناعم
قابلت المرايه بابتسامه رضا واعجاب لنفسها لبست عبايتها وشيلتها وطلعت عشان بتروح للسواق يوصلها بيت خالتها.. وعشان الصاله كانت بوسط القصر لازم تمر على الصاله عشان تطلع ... تفاجأت بوجود المعازيم وماعرفت تطلع وكانت مغطيه وجهها عشان ماحد يعرفها
منيره لمحت تسنيم ومسكتها من يدها وبصوت عالي : لو سمحتو ابي الكل يوجه نظره هنا
الكل التفت لمنيره وللي جنبها واقفه بعبايتها
منيره : انا وعدتكم بمفاجأه .. والمفاجأه هي .. وتأشر على تسنيم .. هذي هي.. واتمنى من الكل ماينصدم ... لان هالبنت هي مرت ولدي فهد ( كانت تبي تفشلها لان على بالها ان شكل تسنيم معفوس ويفشل لكن الصاعقه .....
سحبت منيره العبايه والشيله وانبهر الكل بجمال تسنيم .. والكل ذكر الله من الجمال اللي شافوه
وش تتوقعون بيكون موقف منيره من شكل تسنيم اللي فاجأها ؟؟
سحر حظرت الحفله .. ياترى وش ناويه عليه؟؟
الحفله بتمر على خير والا بيصير فيه مشاكل؟؟
ننتظر الاحداث في البارت المقبل
((البــــارت الخـــامس))
جارة منيره : ماصدق منوور .. معقوله هالجمال وخاشته عنا؟؟؟
ام محمد انصدمت من شافت تسنيم اللي عدت على بنتها في الجمال : منور وتقولين شينه وتلوع الكبد؟؟... الله يسامحك بس
منيره متفشله : ههههه لا انا بس حبيت افاجأكم بمرت ولدي وذوقي ههههه ... وبهمس وهي مسكره اسنانها وبتهديد ( زين اوريك يابنت الفقر)
تسنيم مو عارفه وش تسوي لان حتى هي تفاجأت بالموقف اللي مرت فيه
منيره حبت تخلي الوضع عادي جنب المعازيم وبابتسامه مصطنعه: تعالي يامرت ولدي سلمي على المعازيم يبون يشوفونك
بدت تسنيم تسلم على معازيم منيره .. قربت من منيره .. يما انا آسفه ماكنت مخططه اني اكون معاكم .. كنت بروح لخطوبة بنت خالتي ... منيره ماعطتها وجه
تسنيم (الله يستر ) : هلا هلا ..الحمد لله .. وبدت تبتسم للمعازيم وهي كانت تحاتي لانها تأخرت عن الخطوبه
منيره : يلله تفضلو على العشا
تسنيم : يما انا........
منيره : كلي تبن وقضبي ارضك .. وان رحتي مكان حشيت رجولك سامعه؟؟؟
تسنيم فقدت الامل : ان شاء الله ...... دخلو المعازيم يتعشون
كانت متضايقه ومحتاجه تكون لحالها ومحتاجه لجو هادي بدون ازعاج ... دخلت غرفتها شافت فهد نايم ولا حبت تزعجه .. قررت تدور لها مكان ثاني .. دخلت المطبخ وكانو الخدم مسويين فوضى بالمطبخ ... شافت باب صغير بالمطبخ يطلع على خلف القصر اللي كان هاديء ومافي احد
وكان الجو مظلم ويعمه سكوون الليل
انهالت من عيونها دمعات وكأن هذي الدمعات بتطفي نار القهر اللي بقلبها ..... غمضت عيونها وصارت تفكر وتفكر وتفكر فجأه.............................
: وش قاعده تسوين هنا
تسنيم كانت مغمضه لكن يوم سمعت الصوت الرجولي فتحت عيونها بسرعه وبخوف ووقفت بسرعه : انا .....آآآآ........
توها بتهرب الا مسكها بسرعه
سيف بحده : انا ابي اعرف شي واحد بس ... هذي المره الثانيه اللي تتظاهرين فيها انك مانتبهتي لي .. وش قصدك بالضبط؟
تسنيم مصدومه من كلامه :..............
سيف بابتسامة غرور واستهزاء : تحسبيني بنفتن فيك؟؟ ... هذا حلم ماراح يتحقق .. لكن اسمعي .. تدرين لو يتكرر هالشي مره ثانيه؟؟.... راح اشوه معالم وجهك .. (مسك وجهها بيده بقوه ) .. سامعه والا لا؟؟؟؟
تسنيم والدموع تكمل مسارها هزت راسها بمعني ايه :........
سيف وعيونه محمره من الغيض : والحين طسي عن وجهي
ركضت تسنيم بخوف وبسرعه لين وصلت غرفتها ... سكرت الباب غمضت عيونها عشان تهدا اعصابها شوي لبست بجامتها وصارت تفكر بالكلام اللي قاله لها سيف ( هذي المره الثانيه اللي تتضاهرين فيها انك مانتبهتي لي .. وش قصدك بالضبط؟)
***********
في صالة العشا
سحر بابتسامه : اممممم خالتي اجل سيف وينه الحين؟
منيره :مادري والله يمكن مع الرجال بالمجلس
سحر: اهااا .. طيب انا ودي اسلم عليه القاطع
منيره : هو بعد شوي بيروح غرفته لان هذا وقته ينام
سحر : اهااااا ... طيب عن اذنكم انا بروح ارتب مكياجي
طلعت سحر من صالة العشا وراحت تتجول بالقصر على امل انها تشوف سيف
وفعلا ... دخل سيف وسوت نفسها ماتدري وتعمدت تصدم فيه
سيف وهو يبتعد عنها : انتبهي يابنت
سحر بدلع : اوووه .. سوري مانتبهت
سيف وهو يطالع فيها مستغرب بس ماعطاها اهتمام لانه كان معصب وكمل طريقه على غرفته :................
الخدامه تنادي : مس سحر .. مدام ام محمد تبيك
انتبه سيف لاسمها لكن سوا نفسه مو مهتم
سحر : وجع .. كل هذا غرور؟؟؟.... آآآخ بس .. شكله مررره يخقق وبابتسامة خبث .. بس وين بتروح عني .. انت لي لحالي .. وراحت لامها
طلعو المعازيم كلهم ورجع الهدوء في القصر والكل راح على غرفته ونام
ـــــــــــــــــــــــــــــــ
عبد العزيز : صباح الخير
الكل كان موجود فهد وسيف ومنيره ماعدا تسنيم : صباح النور
عبد العزيز وعيونه تدور على تسنيم : وين تسنيم؟
فهد : تسنيم مو راضيه تجي تاكل معنا تقول شبعانه
منيره باستهزاء : هههه هذي بعير لاعشا البارح ولا فطوور؟... الا متفشله بالخزي اللي سوته البارح
عبد العزيز : خير وش سوت هي
منيره : بنت الفقر تبي تسوي نفسها من مستوانا .. متشيكه وطالعه .. فشلتني وصغرت وجهي عند الحريم
عبد العزيز : ليه؟.. هي ماراحت لخطوبة بنت خالتها؟؟
منيره : اساسا هذا عذر من اعذارها السخيفه .. لاخطوبه عندها ولا شي
عبد العزيز : فهد .. قوم ناد زوجتك .. قول لها يبيك ابوي بسرعه لاتتأخر
فهد بفرح : طيب يبا
بعد لحظات
تسنيم دخلت وباست راس عبد العزيز: صباح الخير يبا
عبد العزيز : صباح النور
تسنيم وهي متوجهه لمنيره وباست راسها : صباح الخير
منيره : الا صباح الزفت
تسنيم : آمر يبا .. بغيتني بشي؟
عبد العزيز : ايه .. جلسي افطري معنا
منيره بققت عيونها : عبد العزيز
عبد العزيز بحده : انا الآمر الناهي هنا
منيره ماقدرت تتكلم لانها شافته عصب :.......
عبد العزيز : تسنيم .. ليه مارحتي خطوبة بنت خالتك؟
تسنيم توقهت ماعرفت وش تقول : اممم ..امـــي........ مارضتـــ... لي اروح
عبد العزيز : منيره .. كلام تسنيم صح؟
منيره : ايه .. شعقبه ..يوم فشلتني وشافوها المعازيم .. تقول بروح؟؟؟؟
عبد العزيز : يعني مو غلطة تسنيم .. انا سمحت لها تروح وانتي منعتيها .. والبنت صارت في الطوشه
المهم ..تسنيم كل يوم راح تقابلنا على كل وجبه واللي مو عاجبه بكيفه سامعين؟؟؟؟؟؟
منيره وسيف ساكتين اماا فهد كان فرحان بقرار ابوه
********
رن جوال منيره وطلعت وهي ماسكه الجوال ومتجهه للصاله : الو
ام محمد : هلا منيره .. شلونكم
منيره : الحمد لله
ام محمد : هاه وش سويتي؟.. كلمتي ولدك؟
منيره لا بكلمه بعد الفطور
ام محمد : الله يهديك كان المفروض امس فتحتي الموضوع له
منيره : أي والله بس مافضيت ياعمري لان انشغلت بتجهيزات العشا ولا صار عندي وقت اكلمه
ام محمد : خلاص انتي حاولي اليوم تكلمينه اكيد
منيره بضيقه : طيب طيب.. يلله باي
شافت سيف متوجه لناحيتها .. ابتسمت له ..
منيره : تعال ياولدي ابيك بسالفه
سيف : آمري يما
منيره : مادري كيف ابتددي .. بس بختصر الموضوع
سيف : خذي راحتك
منيره : شف ياولدي .. طبعا انا مو عاجبني وضعك كذا .. اخوانك كلهم متزوجين ماعدا انت .. وبصراحه انا اخترت لك الزوجه اللي تليق لك .. سحر بنت اختي .. واذا ماخطبناها بسرعه يمكن تنخطب من غيرك ولا تصير من نصيبك
سيف (اهااا اكيد هذي اللي شفتها البارح): اوكي يمه انتي فصلي وانا البس
منيره بفرح : يعني موافق؟
سيف بتنهيده : ايه موافق
منيره : طيب متى نروح نخطبها رسمي؟؟
سيف : يمه لاتستعجلين لاني مشغول هالايام .. بعدين يصير خير
منيره : بس هم مستعجلين لان في خطاب جاينها
سيف وهو واقف بيروح غرفته : يممه انا قلت لكم مو مستعجل على الزواج.. واذا هي مستعجله تروح في طريقها
منيره بتضجر : لاحول ولا قوة الا بالله
راح غرفه وبدل ملابسه عشان بيروح الشركه بعدها نزل وطلع للحديقه .. شاف فهد ومعاه تسنيم كانو يضحكون بقوه .. ولاحظ ان فهد مستانس مع تسنيم .. ضحك عليهم لان حركاتهم كنهم بزران فجأه.........
فهد صار يكح بصوره مو طبيعيه
تسنيم : فهد شفيك؟؟؟
فهد يكح اكثر واكثر وبدا وجهه يزرق :.........
تسنيم خافت وبدت تصرخ : فهد شفيك؟؟؟؟؟
جاهم سيف يركض : وش صاير .. شسويتي فيه؟؟؟
تسنيم وهي تبكي : والله ماسويت فيه شي .. كان يضحك وفجأه تغير حاله
سيف : بسرعه جيبيه للسياره
ركبت تسنيم مع فهد بالسياره مع سيف وماكان في وقت يقولون لـ بو فهد او ام فهد
وصلو المستشفى وعلى طول شالوه ودخلوه العنايه الفائقه ... بعد ساعه تقريبا
الدكتور طلع من الغرفه اللي موجود فيها فهد :.......
سيف : دكتور .. طمني على اخوي
الدكتور : اخوك بخير والحمد لله
سيف : بس هو كان يكح بصوره مخيفه
الدكتور : معليش هو مافي حاجه بس الرئتين عنده تعبانه .. هو معاه ربو مزمن .. ومن الطبيعي تجيه ازمه خاصه لما يتغير الجو او يتعب
سيف : طيب نقدر ناخذه معنا الحين؟
الدكتور : لا مانقدر نطلعه اليوم .. راح نخليه عندنا يومين على الاقل
تسنيم وهي تبكي : دكتور تكفا ابي اكون معاه
الدكتور :انا آسف ممنوع
تسنيم : ليه ممنوع .. هذا زوجي ولازم اكون معاه
سيف كان يطالعها وهي تتكلم ومستغرب (معقوله تحبه ومتعلقه فيه لهالدرجه؟؟) : تسنيم الظاهر كلام الدكتور واضح
تسنيم مالتفتت لسيف لانها اصلا كارهته وبترجي : دكتور تكفا ابي اكون معاه
الدكتور : اوكي مو مشكله تقدرين تكونين معاه بس في حاله وحده... تحجزون غرفه خاصه
تسنيم : موافقين .. خلاص احجزو غرفه خاصه
سيف باستهزاء : هههه... والله وصرتي تتحكمين وتآمرين مثل اسيادك
تسنيم : سيف تكفا مو وقته
سيف : دكتور .. وين أأمن له.. في غرفه خاصه والا بالعنايه؟؟
الدكتور : والله بصراحه .. العنايه افضل .. لان الممرضات دايم بيكونون موجودين على طول
سيف بسخريه : اجل خله بالعنايه .. وانتي يامدام تفضلي روحي معاي البيت .. والا تدرين؟؟.. مايشرفني تركبين سيارتي.. دقي على السواق يجي ياخذك (طلع وتركها)
راح للشركه ووقع الاوراق المهمه ورجع البيت بسرعه وقال لابوه وامه عن حالة فهد وقال لهم ان الزياره اليوم ممنوعه وان بكره بيفتحون المجال للزياره
اما تسنيم فكانت متوهقه لان ماعندها جوال عشان تدق على احد ياخذها لانها كانت مستعجله وخايفه على فهد وماخذت جوالها.. راحت للرسبشن وطلبت من موظف الاستقبال رقم سيف لانها مو حافظه ولا رقم
اتصل الموظف على سيف
موظف الاستقبال : السلام عليكم
سيف : عليكم السلام .. مين معي؟
الموظف : معاك موظف الاستقبال من مستشفى .....
سيف : عسا ماشر؟
الموظف : في بنت اسمها تسنيم لها وقت طويل هنا بالمستشفى وتقول ماعندها جوالها .. على الاقل ارسلو لها احد ياخذها من المستشفى
سيف (وربي هالبنت غبيه ) : اوكي راح ارسل لها السواق .. خلها تنتظر بره لين يجيها السواق
الموظف : اوكي شكرا .. باي
ظلت تسنيم تنتظر السواق لين جا واخذها ووصلها القصر .. اتجهت على طول لغرفتها ..وبدت تبكي على حالة فهد .. توضت وصلت ودعت ربها ان يقوم فهد بالسلامه ويرجع مثل اول
في اليوم الثاني
راح سيف المستشفى لحاله وقال له الدكتور ان فهد بخير ويقدر ياخذه معاه البيت بس مايجهد نفسه .. وفعلا جابه القصر ..
اول ماشافته تسنيم راحت له تركض وضمته بشوق ..وصارت تبكي وهي ضامته
الكل استغرب حبها له.. حتى منيره اللي كان قاسي قلبها عليها صارت تبكي لما شافت الموقف .. حست ان حب تسنيم لفهد يفوق حبها له
بعد مرور الايام رجع فهد لحالته الطبيعيه .. وصار البيت يعج بصراخ تسنيم وفهد
**********
ام محمد تعبت وهي تحاتي ... وقررت تدق على اختها عشان يعجلون الخطبه
ام محمد : الو
منيره : هلا
ام محمد هلا فيك .. شخبارك؟
منيره : الحمد لله
ام محمد : وش صار عن سالفة الخطبه؟؟
منيره : الله يهديك اختي لاتعجلينا .. انتي عارفه رد سيف .. وان اصريت عليه راح يبطل كل شي .. كذا مره كل ماغصبته يقول خلاص خلوها تشوف طريقها واي احد يخطبها تتزوج لاتزنون فوق راسي
ام محمد بعصبيه : طيب انتي حاولي تقنعينه باي شي
منيره : والله ياختي عجزت .. كل شي سويته .. حاولت بشتى الطرق مافي فايده كلمته وحده .. دايم يقول لاتستعجلون وانا مو مستعد الحين .. شتبيني اسوي اكثرمن كذا
ام محمد : الله يهديه
منيره : آمين يارب
ام محمد : طيب اخليك .. باي
منيره : باي
سحر : ها يما وش صار؟؟
ام محمد : للحين مافي فايده
سحر : يممه.. عندك رقم سيف؟
ام محمد : ايه.. ليه؟؟... لاتقولين ادق عليه .. بعدين ينزعج ويبطل سالفة الزواج مره وحده
سحر : لا يمه.. من قال انك انتي اللي بتدقين؟؟ ..
ام محمد باستغراب : اجل مين؟
سحر بثقه وهي تأشر على نفسها : أنا
ام محمد : انتي انجنيتي؟؟.. شبيقول عنا؟؟.. هذولا منزغرين يبوني اتزوجها غصب!!!
سحر : يمما انتي عطيني رقمه وبتشوفين
ام محمد : طيب بعطيك رقمه .. بس تعلميني اول وش بتسوين
شرحت سحر خطتها لامها وهي أيدتها .. وعلى طول راحت سحر غرفتها عشان تنفذ الخطه
____________________
في باريس
ناصر : مبروووك ياأحلى زوجه بالدنيا
ندى بفرح : الله يبارك فيك
ناصر : شفتي؟؟... قلت لك اصبري وراح تلقين ثمرة صبرك
ندى : ههههههه فديتك ياقلبي .. واخيرا نجح العلاج
ناصر بخبث : ودام العلاج نجح خلينا نشد حيلنا عشان نجيب كتاكيت صغار حلوين زي امهم
ندى ماده بوزها : وليه مايصيرون على ابوهم؟؟
ناصر : خلاص واحد علي والباقي على امهم
ندى وهي تضحك وتضرب ناصر على كتفه : لا ابيهم كلهم عليك
ناصر : هههههه.. المهم حياتي .. جهزي الشنط وبكره راجعين للرياض
ندى بفرح : اخيرا
ناصر : اشوف مليتي مني.. كني بغير رايي ونتم هنا شهر بعد
ندى : لا نصوري تكفا .. والله اني مشتاقه لارض الرياض ولاهلي
ناصر : بس اهلك؟؟
ندى : ههههههه.. عاد لاتصير طماع.. انت على طول جنبي ماتفارقني
ناصر يبي ينرفزها : الله يسامحك بس.. انا اللي احبك واموت فيك اكثر واحد بالدنيا .. تشتاقين لغيري وانا مخليتني على جنب
ندى مبققه عيونها : نصوري وش هالكلام .. لاتجنني
ناصر بابتسامه : وانا اقدر على زعل حبيبتي؟؟؟.. المهم لاتنسين تجهزين الاغراض من اليوم عشان مانتأخر على الطياره بكرا
ندى باست خد ناصر : ان شاء الله ياأحلى زوج بالعالم
*****
: رن جواله .. شاله وشاف رقم غريب .. الوو
سحر : السلام عليكم
سيف يستغرب الصوت الناعم : مين معي؟
سحر : انا سحر
- سيف كان عاطف على تسنيم لكن فجأه صار قاسي عليها .. وغير كذا وافق انه يخطب سحر... ياترى ليه؟
- ندى وزوجها ناصر راح يرجعون لأرض الرياض وطبعا لأول مره ندى بتشوف تسنيم .. هل بتكون معاملتها معاها نفس امها او العكس
- سحر وامها.. حسو ان سيف متردد على سالفة الخطبه لكن رسمو خطه .. ياترى وش خطتهم ؟؟.. وهل بتنجح والا لا؟
راح نشوف الاحداث في البارت القادم
((البــــارت الســـادس))
...........: رن جواله .. شاله وشاف رقم غريب .. الوو
سحر : السلام عليكم
سيف يستغرب الصوت الناعم : مين معي؟
سحر : انا سحر
سيف باستغراب : سحر؟؟؟
سحر :ايه سحر بنت عمك وبنت خالتك
سيف : هلا فيك .. آمري .. بغيتي شي؟
سحر : بصراحه ايه.. بغيت توقف معي بحاجه
سيف : من عيوني .. بس وش هي ؟؟
سحر وهي تبكي : ابيك تكلم ابوي .. لان خاطبني واحد وابوي يبيني اوافق عليه بالغصب.. تكفا سيف كلمه واقنعه لو .....
سيف : لو شنو؟؟..
سحر : لو بكذبه بيضا..
سيف : أنا آسف ياسحر بس مافهمت عليك .. ممكن توضحين اكثر؟؟
سحر : سيف .. انا احترمك واعزك .. ولو توقف معي في هالموقف ماراح انسى جميلك
سيف : سحر لاتتكلمين بالالغاز .. دخلي بالموضوع على طول
سحر : سيف ابيك تخطبني رسمي .. لو مؤقت بس .... تكفا سيف انت الوحيد اللي قادر انك توقف زواجي من شخص مابيه
سيف : بس صعبه
سحر : صدقني ماراح تندم لانك راح تنقذ حياتي بمساعدتك لي
سيف باستغراب: انقذ حياتك؟؟
سحر وهي تمثل عليه دور الحزينه : ايه .. لو اتزوجه وربي انتحر
سيف (ياربي وش هالورطه) : سحر انتي مجنونه؟..
سحر وهي تمثل عليه انها تبكي : ايه ترا اسويها وتكونون انتو سبب موتي
سيف : اوكي خلاص .. بس انتي اهدي وان شاء الله بتنحل مشكلتك
سحر ميته فرح بس ماتبي تبين لسيف عشان ماينكشف ملعوبها : طيب .. سيف تكفا لاتتأخر ترا مصيري بين يديك
سيف بتنهيده : خلاص لاتحاتين .. ان شاء الله اليوم اكلم ابوك واتفق معاه .. بس بشرط
سحر : وشو؟؟
سيف : مجرد خطبه بس لين تنحل مشكلتك
سحر : اوعدك ماراح اسبب لك أي مشاكل بس انت اخطبني عشان اتخلص من المصيبه
سيف : اوكي تطمني .. باي
سحر : باي
صارت تنطط من الفرح لان ملعوبها نجح .. وفعلا .. اتصل سيف على ابو سحر وخطب سحر منه ووافق ابو سحر على طول .. واتفقو تكون الملكه بعد شهر
انتشر الخبر وتحقق مراد سحر وامها
**********
ندى وناصر وصلو ارض الرياض بعد ماخبرو الكل انهم بيوصلون اليوم تحديدا
والكل رحب فيهم وفرح لهم وتحمدو لهم بالسلامه وسوو حفله بمناسبه نجاح علاج ندى ووصولهم بالسلامه
ندى ارتاحت لتسنيم وحبتها من اول مره شافتها.. وكانت كل يوم تجي قصر ابوها وتجلس مع تسنيم وسوالف وضحك .. وحبو بعض لدرجة انهم صارو اكثر من خوات
ندى حزينه ومتأثره : ياربي.. ليه ابوك يعاملكم كذا .. حرام والله
تسنيم : ربي ياخذ حقنا منه .. هو ظلمنا كثير
ندى : طيب وامك ليه ماتوقفه عند حده؟
تسنيم : امي بعد شايفه منه ظلم اكثر.. تحملت عذابه وظلمه عشان تربينا
ندى : ياحرااام .. وربي قهرني باسلوبه .. معقوله اب يبيع بناته عشان فلوس؟
تسنيم : الحمد لله انها جات على كذا .. على الاقل زوجنا بالحلال ولا باعنا بفلوس بالحرام
ندى : استغفر الله العظيم .. لا ياتسنيم ماظن يسويها
تسنيم بضحكة استهزاء : ابوي اتوقع منه كل شي .. مافي شي يصعب عليه
ندى : طيب شرايك نغير هالسالفه اللي تجيب الهم والنكد
تسنيم : اوكي
ندى : شوفي انا بكره بروح السوق .. شرايك تروحين معي؟؟
تسنيم : بصراحه... انا مامره دخلت السوق من جيت للرياض
ندى باستغراب : معقوله؟؟... انتي من أي عصر؟؟
يتبع ,,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك