رواية شامخة وبنت رجال وجاء من يغلبني -21
الجوهره:نجحنا وآنا جبت ممتاز
أم عبدالمجيد والكل:ألف مبروك
ماجد:ها دلول وش سويتي
أم دلول:أكيد مغرزه
دلول وهي شاقه الحلق:لا يمه نجحت
أم دلول:وش جبتي
دلول تورطت:ها...ايه ..جبت... وبصوت واطي:جيد
أم دلول:انا قايله
دلول:يمه أهم شي إني نجحت
ماجد:والله كان ودي تجيبين أحسن من كذا
أم دلول:وين تجيب أحسن وأنت مطيح معها مكالمات 24 ساعه
ماجد تفشل هو ودلول أما أم عبدالمجيد والجوهره ماتوا ضحك
رن جوالها شافت الاسم واستأذنت وقامت
الجوهره:الو
طلال:أحلى الو اسمعها بحياتي
الجوهره بابتسامه خجوله وإحساس التوتر اللي تعرفت عليه من يوم
عرفت طلال:تسلم
طلال:مبروووووووك
الجوهره:على ايش
طلال:على النجوح والله تستأهلين أحلى هديه
الجوهره هي متفاجاه:شلون عرفت
طلال:أي شي يخص قلبي لازم اعرفه
الجوهره سكتت وما كان عندها رد
طلال وهو يبتسم:هديتك موجوده
الجوهره وهي مبسوطه وتطالع الخاتم اللي بيدها والسلسال اللي برقبتها جنب سلسال أمها:وش هي
طلال:إذا شفتك عطيتك إياها
الجوهره:طيب
طلال:ما اشتقتي لي يا جوهرتي
الجوهره باستغراب:جوهرتك
طلال:ايه جوهرتي وأغلى ما في حياتي حتى أغلى من روحي علي
الجوهره ساكته
طلال وهو يتنهد:ما توقعت إني في يوم بقدر أكلمك أو أوصل لك
الجوهره:ليه
طلال:لأنك قافله على قلبك بصندوق من زجاج والمفتاح ما ادري وينه بس بعد ما لقيت المفتاح وفتحته قدرت أكسبك
الجوهره:لها الدرجه
طلال:وأكثر أنتي روحي يا جوهرتي روحي اللي لا غابت عني أموت
الجوهره بضيق:لا تجيب سيرت الموت
طلال حب يغير الموضوع لأنها تضايقت:طيب ما قلتي لي ما اشتقتي لي
الجوهره سكتت وما عرفت وش ترد
بس في داخلها كان قلبها يدق مع كل كلمه يقولها طلال ما تدري كيف بدت تحس بشي عمرها ما حست به من قبل إحساس حبته مع انها أنكرته في البداية بس حب طلال خلا كل فيها يتغير وتشوف أشياء كثير بطريقه مختلفه
&&&&&&&&&&&&&&
في مكان يصرخ بالفساد والموسيقى
جالس مع صديقه وسط الخمر والمنكرات
سعد:انت ما قلت انك تسامحت من أبوك
خالد:إلا
سعد:انا فكرتك تبت من هالاشياء
خالد:اترك كل شي إلا المزاج ما راح اتركه أصلا الحركتين اللي سويتهم لأبوي علشان فلوسه اللي قاعده على قلبه ما أنحرم منها
سعد:ههههههههه انا قايل خالد ما في من وراه رجاء
خالد وهو يطالع البنت اللي جايتهم:جاء القمر
سعد:لحد الحين حظك يكسر الصخر
خالد:لا تنظلني
سعد:هههه لا ما راح أنظلك عيني بارده
قا خالد مع البنت ودخل وحده من الغرف
&&&&
بعد ساعتين
&&&&&&
سمعوا صوت الباب ينكسر واختلط صوت الصراخ مع صوت الموسيقى
&&&&&&&&&&&&&&&
في البيت الكبير
قاعدين والضحك واصل لأخر بيت بشارعهم
رن جواله شاف الرقم غريب بس رد:الو – ايه معاك من معي – من
قام من مكانه وبعد عن الباقين:ايه اعرفه خير وش صاير
بتفاجأ:ايش – طيب مشكور...سكر وهو يردد:لا حول ولا قوة إلا بالله
سمع صوتها والتفت لها
عبير بابتسامه:حبيبي وين رحت
عبدالمجيد يطالعها بجمود وما رد
عبير وابتسامتها اختفت وبخوف:وش فيك صاير شي
عبدالمجيد وهو يمسك يديها بين يديه:عظم الله أجرك
عبير بخوف وصراخ:في مين....
&&&&&&&&&&&&&&&
قاعده مع أمها عند التلفزيون
رن جوالها وقامت ترد والابتسامة مرسومه على وجهها:هلا
تركي:آهلين حبي أخبارك
سحر:الحمد لله وأنت
تركي:زين
سحر حست ان في شي:تركي وش في صوتك مو عاجبني
تركي بتردد:سحر....وسكت
سحر بخوف:تركي وش صاير تراك خوفتني
تركي:عظم الله أجرك
سحر اللي جلست على الكرسي لان رجولها ما عاد قدرت تشيلها وهي ترجف وخايفه :في مين..
&&&&&&&&&&&&&&&
هذه الدنيا تأخذ ناس وتحضر ناس
نحن فيها كمن يسكن فندق نأتي وبعدها نرحل
لكن الفرق اننا لا نأخذ شي إلا أعمالنا
أعمالنا وما زرعت أيدينا
و كلا وزرعه سوف يحصده
&&&&&&&&&&&&&
خيم الحزن على الكل وانتشر خبر وفاة خالد
خالد الشاب اللي كان الكل يكرهه أو يبغض تصرفاته
خالد الشاب اللي ما لقى الاهتمام في صغره وصار من الصعب التعامل معاه في كبره
خالد الشاب اللي ضاع شبابه في الفساد وما جاب إلا السمعه السيئه لأهله
خالد الشاب اللي خسر كل شي من ضمنها الفلوس اللي كان دائما يركض لها والاهم من هذا كله خسر حياته اللي أفناها في الضياع ومعصية الخالق
مهما صار الدم ما يصير ماء حضر عزاه الكل الجوهره وام عبدالمجيد وام دلول والكل وعبير من ضمنهم الكل حزن عليه
أم خالد موت ولدها صحاها من غفلتها وعرفت ان البني ادم فاني والواحد ما يركض وراء وسخ الدنيا
ابو خالد سامح عبير واعتذر من عيال أخوه سالم بعد ما شاف وقفتهم معاه بالعزاء وقيامهم بكل أمور العزاء والدفن وبدا ابو خالد يحس بالندم والحسره على معاملته لآخوه سالم رحمة الله عليه ونكرانه له ولعياله
&&&&&&&&&&&&&&&
بعد شهر
المعاريس ما سوو عرس علشان حزن ابو خالد وام خالد واضطروا يسوون عرس بسيط في استراحه وفي البداية عارض اسامه بس علشان خاطر شوق رضى بالحفله البسيطه وعلشان مقدر حزن عايلتها
الجوهره – دلال – حنين – شوق - سحر
طلال – ماجد – فيصل – اسامه – تركي
&&&&&&&&&&&&&&&&&&&
بعد خمس سنوات مرت على أبطالنا
&&&&&&&&&&&&&&
برا المملكه بعيد عن ديار ابو متعب واقف عند النافذه وهو سرحان في غرفته ودخل عليه زميله وينادي عليه وصرخ في إذنه:علي
علي:وجع وش فيك تصارخ
مساعد زميله في السكن:وش أسوي لك صار لي ساعه أناديك وأنت ما ترد الله يعلم سرحان في مين
علي وهو يبتسم:سرحان في حبيبة قلبي
مساعد:من حبيبة قلبك ما أخبرك تحب
علي:ديار ابو متعب مشتاق لها ولهواها ولهلي ولحبايب قلبي الصغار
مساعد ابتسم لعلي ولطيبة قلبه:اليوم رادين السعوديه وراح تشوفهم وتكحل عينك بهم
علي:ان شاء الله
والتفت للصوره اللي هو موجود فيها مع بنتين صغر و معاهم أبوهم وابتسم:يالله وش كثر مشتاق لكم ولجمعتكم ولهبالكم وسوالفكم
جاء من الشغل تعبان ودخل البيت سمع ركض ولده وفاتح يديه واستقبله حمد ورفعه:هوبلاااااا هلا بحبيب قلب ابوه هلا
مبارك:حبيبي يبه
حمد وهو يبوس ولده يدخل الصاله و شايل مبارك معاه وشافها قاعده ووقفت لما دخل وراح لها وباس راسها:أخبارك يالغاليه
حنان:بخير دام انت بخير
حمد جلس وجلس مبارك على رجوله
حنان وهي تبتسم:بروح أحط لك الغداء أكيد جوعان
اشر لها برأسه والتفت لولده مبارك اللي يسولف له عن الروضه بحماس
وسرح ورجع للماضي قبل خمس سنوات
فيصل:انت ليه ما تتزوج
حمد:لا انا اغسل أيديك مني
فيصل:ليه يا خوي
حمد:انا ما ابغى عوار رأس والحريم ما وراهم غير عوار الرأس
فيصل:واللي يقول لك عند لك عروس
حمد:ههههه اشتغلت خطابه وآنا ما ادري
فيصل:الشره علي اللي ابغى لك الخير و جايب لك عروس ما في مثلها
حمد بفضول:من هي
فيصل:اخت زوجتي طيبه وما لها صوت وحنون ها وش قلت
حمد:بس..
فيصل:لا بس ولا غيره
حمد سكت يفكر
وبعد محاولات أقنعه وتزوج حمد حنان
رجع للحاضر :والله صدقت يا فيصل انا خذيت ذهبه نادره في هالزمن
دخلت عليه وهي تبتسم:يله على الغداء
قام حمد ونزل مبارك من رجوله ووقفها وظل يطالع عيونها
حنان:وش فيك حياتي بغيت شي
حمد وهو يبوس راسها:الله لا يحرمني منك يا أم مبارك
حنان بابتسامه:ولا منك يالغالي
&&&&&&&&&&&
دخل عليهم لقاهم يتهاوشون والصراخ واصل لأخر الدنيا
فيصل :وش فيكم وش هالصراخ
سينان وهي تبكي:باب ثوفها
فيصل وهي يجلس بننه على رجله:جينان وش سويتي لأختك
جينان:والله ما سويت شي
سينان وهي تصيح:تدول عني كدابه
فيصل:ليه قلتي لها كذا يا جينان
جينان:لأنها تكذب
فيصل:في ايش
جينان:تقول إذا كبرت صارت محاميه أصلا ما يصلح
فيصل:إلا يصلح من قال ما يصلح
سينان:ثوفتي انا أصلا بصير زي بابي أدافع عن المذلومين
حنين وهي جايه لهم:ها حبيبي جيت
فيصل:ايه وجالس أشوف حل لهذه لمشكله العويصه
حنين بابتسامه:هههه مره ثانيه تهاوشو
جينان:أنتي بتصيرين محامين انا بعد بصير
حنين:ايش تصيرين يا ماما
جينان:بصير شرطي
فيصل وحنين:ههههههههههه
فيصل يطالع بناته الثنتين بحب الكل قال انهم يشبهونه وهو فخور بهم ورافع رأسه ببناته
..وزوجته وبناته الثنتين أغلى ما علي قلبه وهم كنزه الثمين هم وخالته أم حنين اللي عاشت معهم و روئ اللي يعتبرها اخت له غير شهد وشوق
&&&&&&&&&&&&&&&&&
في الشاليه
واقفه قدام البحر تتأمله وتذكرت قبل خمس سنوات بدت من هنا والحين هي حست انها الفايزه لأنها ما ترددت ومدت يدها وصافحته جاتها بنتاه تركض:ماما شوفي ...وجات وراها بنتها الثانيه التوأم :انا بعد شوفي
الجوهره نزلت لمستواهم:الله قوقعه تبغون تسمعون صوت حلو
البنتين:ايه
الجوهره :حطوها على أذانيكم
حطوها التوأم على أذانيهم
الجوهره:ها ندى ايش تسمعين
ندى:اوووش
الجوهره:ههههه وأنتي يا أمل
أمل:مثل أختي اوووش
الجوهره:هههه هذا صوت البحر في يوم راح تكبرون ولما يجونكم بنات راح تسمعون معاهم صوت البحر
البنتين يطالعون بعض ويضحكون وراحوا يركضون يكملون لعب
تذكرت لما أمها لما قالت لها (في يوم راح تسمعين أنتي وبنتك صوت البحر)
ضحكت الجوهره وكانت هذي اول مره تتذكر فيها امها من غير ما تبكي:سمعته يا يمه بس مع بناتي الثنتين
باسها على خدها و صحاها من ذكرياتها والتفت له بابتسامه شافته مع ولدهم عبد العزيز
طلال:حياتي سرحان في ايش
الجوهره:فيك
طلال وهو ينزل عبد العزيز:روح العب مع خواتك
عبد العزيز:طيب
وراح وطلال باس خدها الثاني:يا بختي إذا كان حبي سرحان فيني
الجوهره:تدري يا طلال
طلال:همممممممم
الجوهره:كنت شامخة وأقول انا بنت رجال بس انت قدرت تغلبني
طلال:وآنا جامد وأنتي صحيتيني من سباتي
الجوهره:ههههههه الله لا يحرمني منكم
طلال:ولا منك يا روحي بس يله نمشي يالله نلحق نروح الاستراحه ولا نسيتي الجمعه اليوم
الجوهره:لا ما نسيت يله
&&&&&&&&&&&&
نايم ودخلوا عليه مثل الإعصار وصاروا يناقزون على السرير لحد ما صحى ونقزت عليه وباسه:باب يله اصحى نروح ملاهي
اسامه:آه يا بابا فيني نوم خليها بعدين
أثير:اهئ لا ابغى الحين
اسامه يطالع شوق الواقفه عند الباب بنظرات تهديد:أكيد أنتي اللي قايله لهم
شوق:هههه الصراحه ايه حرام انت مواعدهم من زمان
اسامه طالع بناته الثنتين وابتسم:طيب يله
مي وأثير صاروا يناقزون و اسامه فرحان لفرحهم
&&&&&&&&&&&&
قاعده وتتذكر أخوها اللي فقدته وهم بعاد عن بعض نزلت دمعه عليه وهو مسحها انتبهت له وابتسمت له ومسحت دموعها
تركي:وش فيك حبي
سحر:ابد تذكرت خالد
تركي وهو يأخذها في حضنه:الله يرحمه
سحر:ما كنت متوقعه انه مدمن ما كان مبين عليه
تركي:هذا اللي وصلت له الشرطه بعد ما اقتحمت الشقه ولقوه ميت بجرعه زايده
سحر:ما توقعت ميساء تبلغ ابد
تركي:لان اهلها عرفوا بسوالفها وعلشان ما يذبحونها بلغت وقالت انها معاهم وسجنوها لان في سجنها نجاة من الموت
سحر:حسبي الله ونعم الوكيل
تركي:وهو يمسح دموعها: الله يرحمه
سحر تنهدت
تركي:يله نتجهز ترى اليوم الجمعه عند طلال بالاستراحه بس وين خالد وسيف
سحر:يعني ما تعرف خالد عند أمي وأبوي تعرف انهم ما يستغنون عنه وسيف نايم
تركي:طيب خالد وإحنا طالعين نأخذه معانا
سحر بابتسامه:اوكي
وقاموا يتجهزون
&&&&&&&&&&&&&&&
ركبوا السياره مستعدين للجمعه اللي راح يجتمعونها مع بعض
عبدالمجيد:ها كلكم ركبتوا
سالم:ايه يا يبه
الجوهره :يبه راح القى ندى بنت عمتي الجوهره هناك
عبدالمجيد:ايه يا بابا راح تلقينها هناك
عبير ركبت وهي شايله بنتها منيره عمرها 5 أشهر:يله حبيبي
عبدالمجيد بابتسامه:يله
حركوا سيارتهم ومشوا
&&&&&&&&&&&&&&&
في بيت أم عبدالمجيد
أم دلول جات وعاشت عندها بعد ما علي سافر يدرس في الخارج ودلول عاشت مع أم عبدالمجيد بعد ما عبير وعبدالمجيد طلعوا في بيت لحالهم
دلول تركض وراء منيره تبغى تلبسها:تعالي يا بنت والله تعبت وآنا اركض وراك
منيره:لا ابغى جدتي تلبسني
دلول:خالتي لبسي حفيدتك هي ما تبغى احد غيرك يلبسها
أم عبدالمجيد:فديت عيونك تعالي يا بعد عمري
جات منيره الصغيره وصارت أم عبدالمجيد تلبسها
أم دلول :وين سميتي سموره
دلول:يمه نايمه
أم دلول:صحيها علشان الجمعه يالله يمدينا نخلص
دلول:من عيوني...وقامت لبنتها
جاء ماجد:السلام عليكم
الكل:وعليكم السلام
منيره تركض لماجد:بابا حبيبي
ماجد وهو يبوسها:هلا بحياة أبوها منور
أم دلول:إلا علي متى بيرجع
ماجد:يقول بكره ان شاء الله
أم دلول:من يصدق عليوي يسافر للخارج ويدرس هندسه كان دائما يقول انا بدرس بالخارج وآنا أقول له احلم والحلم صار صدق
أم عبدالمجيد:الله يخليه لك الولد صار عمره 20ورجال الله يوفقه
أم دلول :تسلمين
ماجد صار يضحك بينه اللي هي نسخه من أمها
&&&&&&&&&&&&&
اجتمعوا بالاستراحه
الجوهره وطلال وعيالهم(عبد العزيز على ابو طلال وبناتهم التوأم أمل على أم طلال وندى على أم الجوهره)
عبير و عبدالمجيد وعيالهم(سالم على ابو عبدالمجيد والجوهره و منيره )
ماجد ودلول وعيالهم(منيره على اسم أم عبدالمجيد و سميره على اسم أم دلول)
حمد وحنان وولدهم(مبارك)
تركي وسحر وعيالهم(خالد على خالد المرحوم وسيف على اسم ابو تركي)
فيصل وحنين وعيالهم(جينان وسينان)
وام دلول وام عبدالمجيد وميري
وريان اللي صار عمره 15 سنه ونوف ونايف اللي اعمارهم10 سنوات
الحريم لحالهم والشباب لحالهم والشوي والوناسه والضحك
بنت دلول منيره:مالت عليك يا أم عيون
ميري:مالت على أنتي وام أنتي
سميره بنتها الثانيه:لا تثبين أمي والله لأعلمها
ميري:روه روه علم انا ما في كوف والله هاله انا في هرب من دلال أهين أجي بنات هوا
منيره وهي تتخصر:أصلا أنتي المفروض ميته أنتي يا أم عيون كأنك كتاب الأمل معمره
ميري طلعت عيونها:قول ما شاء الله بعدين في انزل انا
نوف ونايف ميتين ضحك على بنت دلول اللي طلعت نسخه منها ولسانها طويل مثلها
ولد حمد مبارك وهو لابس الثوب عكس الباقين:لا تلمس بنت خالتي لاوريك
جينان وهي وراء مبارك:ايه وره شغله هو يطقني
خالد ولد تركي:انت مالك دخل
مبارك:وآنا ولد أبوي تطق بنت خالتي وتقول مالي دخل
الكبار يضحكون على مبارك اللي مثل حمد حتى في لبس الثوب والغتره
أم عبدالمجيد:إلا وين ريان ما شفته
الجوهره:راح يجيب أغراض من السوبر ماركت على السياره وراجع
أم عبدالمجيد:الله يحفظه
الكل:أمين
أم عبدالمجيد انتبهت لام دلول:وش عندك لابسه فوشي ترانا كبرنا على هالالوان
أم دلول:تكلمي عن نفسك
وجات بنت دلول تركض لجدتها أم دلول وكانت لابسه فوشي
أم عبدالمجيد:أنتي لابسه مثل البزر
أم دلول:ليه نسيتي انها على اسمي قلت نلبس طقم
الكل:ههه ههههههههه وام عبدالمجيد تتحمد على أم دلول مهما الزمن مر هي مستحيل تتغير
دلول بهمس للجوهره:شوفي بنتك وولد عبدالمجيد
الجوهره التفتت شافتهم يلعبون مع بعض:وش فيهم
دلول:تدرين ان ولد عبدالمجيد يقول انا إذا كبرت بتزوج ندى وما بأخذ احد غيرها
الجوهره:ههههه كان الزمن يعيد نفسه ندى أمي وسالم أبوي والحب الكبير
دلول:معاك حق والله هالبزران جيل يخوف
الجوهره:ههههههههه
انتبهوا لصراخ عيال ماجد ودلول
جات منيره تركض لهم:خالو جاء
دلال وام دلول قاموا من مكانهم وطلعوا وشافوا علي شايل سميره ويبوسها
أم دلول:يمه ولدي حبيبي
وجاها وحضنها وعيونه تمتلي دموع:يالغاليه يا روحي
أم دلول وهي تبكي وتمسح دموعها:وحشتني يا وليدي
علي:وآنا أكثر
والتفت على دلال:ما تبغين تسلمين على علويتك
دلول:علوي يالخايس تكذب وتقول بكره بتجي.... وتروح له وتحضنه وبدت تبكي
علي وهو يضحك:ههههههه مسويها مفاجأه.... وسلم على الكل
وقضوا اليوم ضحك وسوالف
&&&&&&&&&&&&&&&&
أكيد بتقولون وين ساره ونوره ووش صار عليهم بعد 5 سنوات
ساره تزوجت مشعاب ونوره تزوجت ذياب واللي محد توقعه ان ساره ونوره يقدرون يمشون أزواجهم زي الخاتم في يديهم كيف الله واعلم شروا بيوت جنب بعض وسكنوا جنب بعض وجاهم عيال وبنات وزيد بثاني ثانوي علمي مع ان الكل قال انه بيدخل أدبي واللي قال بيطلع من المدرسه بس هو اثبت جدارته ودخل علمي وهو ناوي بعد ما يخلص ثانوي يسافر للخارج ويدرس اداره أعمال ويكون ناجح بس هو لحد الحين مغازل وما ترك حركات الهبل
&&&&&&&&&&&&&&&
شهد دخلت طب وانخطبت من طالب يدرس طب مثلها وهي لحد الحين دافوره
&&&&&&&&&&&&&&&&&
أخر كلماتي
اشكر كل من شجعني إني انزل أول روايه لي
اشكر كل من تابعني سوا من الأعضاء ولا من المشاهدين ومن خلف الكواليس وربي يشهد علي إني حسيت إني بين أهلي وكانت ردودكم تفرح قلبي
اشكر منتدى غرام اللي عطاني الفرصه علشان أطلق كل ما في مخيلتي
راح افقد واشتاق لشخصياتي اللي حبيتهم واللي حسيت إني عشت كل حدث معهم
الجوهره وطلال رمز الشموخ والتحدي
فيصل وحنين رمز الشهامه والمحبه
تركي وسحر رمز التوبه والفرص و البدايه الجديده
عبير وعبدالمجيد رمز الحب والطفولة والأمان
دلول وماجد رمز الضحك والحب والهبل
شوق وشهد وأبو فيصل وام فيصل رمز الطيبه والمواقف المضحكه
أم عبدالمجيد وام دلول رمز الضحك والفرفشه وروح النكته
نوف ونايف وريان رمز البرائه
حمد وحنان رمز الاخوه والصداقه
أم خالد وأبو خالد رمز الطمع الجشع
ساره ونوره رمز الصداقه والاخوه وأقول يا حبي لكم يا أهلي يا أهل الجنوب
علي وزيد رمز النجاح
خالد رمز الضياع والفساد
وأخيرا ميري رمز النكته وروح وملح الروايه
اتمنى تكون مولودتي الأولى أعجبتكم نهايتها وآنا من جد راح افقدهم لأنهم جزء مني
وسلامي وتحياتي لكم
&&&&&&&&&&&&&
النهايه
&&&&&&&&&&&&&&&
شامخة وبنت رجال وجاء من يغلبني
&&&&&&&&&&&&&&
ودي لكم وأحلى بوسه لكم
قلب أمي وروحها
عدد الاجزاء 21
تجميع ورد الجوري
اللهم لك الحمد حتى ترضى وإذا رضيت وبعد الرضى ,,, اضف تعليقك