رواية غفلتي دفعتني حياتي -10
بعد كم ساعة وصلوا لمطار بريطانيا.... وعلى طول ع الفندق وبعد ما ارتاحوا طلعوا.... ركبوا السيارة اللي وصلتهم للمكان المطلوب....
نزلت أسماء وهي حافظه الطريق.... دقت الجرس وفتح أبو نواف الباب....
أبو نواف: أهلين أسومه
ضمته أسماء: أهلين بابا... ولهت عليك كثير
أبو نواف: وأنا أكثر وين نواف... لا تقولين ما جا
بعدت أسماء: هناك واقف مع بابا زياد... - مرت من جنب أبوها ودخلت وسلمت على أمها وأختها بسمة.... وركض لعند جدها وجدتها....
في الشارع....
أبو نواف: حيا الله زياد
أبو طارق: الله يحيك شلونك
أبو نواف: الحمد لله... شلونك أنت
أبو طارق: تمام... ما عندك إجتماع اليوم
أبو نواف: اليوم لا... حياك أدخل وش فيك واقف
أبو طارق: لا أنا عندي شغل... بس جالس اقنع نواف إنا العنوان صحيح
أبو نواف: هههههههه نواف أمك ساكنة بالمدينة مو بالريف مثل عمك
أبو طارق: اخليكم الحين... مع السلامة
أبو نواف: خلنا نشوفك
ركب أبو طارق سيارته ومشى.... حط أبو نواف يده على كتف ولده وقال: يللا أمك بتموت وتشوفك
مشى نواف مع أبوه وهو مستغرب.... كيف أبوه فرحان بشوفته وهو يشك فيه.... دخل البيت العادي ووصل الصالة.... شاف وحدة شعرها مثل لون شعره.... لكن هي ما تشبه له....
أم نواف وأم منيرة وأبوها تفاجاوء لما دخل نواف.... لأنه يشبه خاله توماس المسيحي لما كان بعمره.... دق قلب أم نواف وراحت له وضمته ونزلت دموعها....
مسكت كتوفه بيدينها وقالت: نواف حبيبي كيفك
نواف وهو يمسح دموعه: الحمد لله
ناظرته أم نواف نفس أبوه، الدموع عيب عنده.... مسحت شعره ودموعها على خدها.... أكيد أنه يفكر فيها مثل ما هي تفكر فيه....
أم نواف قدمت ولدها لأمها وأبوها وقالت: نواف هؤلاء أبي وأمي... - همست: إنهما مسلمان
ابتسم نواف لأن أمه تتكلم فصحى.... وذكرته بجوانا زوجة عمه.... قرب نواف ومد يده بيسلم عليهم.... بس هم ضموه لأنه ذكرهم بولدهم توماس.... اللي تركهم لما عرف أنهم أسلموا.... يا ما حاولوا يكلمونه عن الأسلام لكن بدون فايدة.... هاجر لأمريكا وتركهم....
نواف استغرب أنا جدوده يضمونه.... لها الدرجة هو غالي.... بعد عنهم وقالت أمه: نواف هذه أختك بسمة
ناظر نواف أخواته التوأم ومو عارف يفرق.... قال وهو واقف مكانه: كيف حالكم يا أخوات
وقفت بسمة وراحت له وضمته وقالت: واخيرا تقابلنا يا نواف... أنك أجمل من الصور بكثير
نواف ظنها أسماء تستهبل عليه.... خربط شعرها وقال: قولي قسم
بسمة: ههههههه صدقني هذه المرة الأولى التي أراك فيها
أسماء: نواف أنا هنا
ضحك نواف: هههههههههه والله منيب عارف أفرق بينكم
توه بيجلس سحبته أمه وجلسته جنبها.... وبدت تسأل فيه عن حاله وعن العملية وعن معاملة عبير له.... وهو مستحي وبنفس الوقت مبسوط....
أبو نواف اللي كان يراقب كل شي حوله.... والفرحة مو شايلته هذي العايلة اللي من سنين تمنى يجمعها.... لأنه هو سبب تشتتها....
بعد ساعة دق الجرس.... راح نواف وفتح الباب وانصدم بالمرايا اللي قباله....
وصلت جوليا مع زوجها وعيالها.... راح فايز ودق الجرس لأنه ولهان على خالته وجده وجدته.... وخصوصا بسمة بنت خالته....
انفتح الباب وتفاجاء لما شاف نواف.... وكأنه توام له.... كل واحد يناظر الثاني وفي باله الف سؤال.... قطع ها اللحظه صوت أبو فايز....
أبو فايز: فايز وش فيك واقف ما دخلت
التفت فايز وتفاجاء أبوه لما شاف الشبه بين ولده.... والولد اللي واقف عند الباب.... ما فيه فرق بينهم بس فايز عدساته بنيه وشعره أسود.... بعكس نواف اللي شعره بني وعدساته زرقا.... بسمة شافت نواف تأخر راحت له....
صرخت بسمة: فاااايز
راحت له وسلمت عليه وعلى زوج خالتها وخالتها.... اللي بصالة سمعوا صرخت بسمة.... وعرف أبو نواف أنا أخت زوجته جايه.... يا ما كلمته عنها وعرف أنها متزوجة سعودي لكنهم ساكنين بابها....
وقفت أم نواف وراحت تدخل ضيوفها.... الكل دخل وسلم وتم التعارف.... الا نواف وفايز دخلوا آخر شي طبعا هذي حركات بسمة.... الكل تفاجاء من الشبه بين الأولاد....
أبو فايز: وهذا أكبر عيالي فايز
أبو نواف: الله يخليه لك
أبو فايز: ويخلي لك عيالك
قرب ولد صغير لأم فايز.... - شالته وحطته بحضنها وقال أبو فايز: وهذا الصغير ماجد
لف فايز لعند نواف وقال: الصراحة بعد ما شفتك... شكيت أنا أهلي هم أهلي
نواف: هههههههههه حتى أنا... تهقى أخذونا من دار الأيتام وكل واحد أخذ له ولد
فايز: يمكن... خلني أسأل أمي
نواف: ههههههههههه الله يخس ابليسك... احنا نشبه خالنا... بس أبيك تجي عندنا الرياض حتى يشوفون الشباب توأمي وولد خالتي
فايز: هههههههههه والله فكرة حتى أنت تعال
بعد الغدا قرروا يرحون الحديقة.... الكل يمشي للحديقه الا نواف كان يمشي آخر واحد.... وبيده الكاميرا ويصور الأماكن اللي حوله.... كان يبغى أخواته ريم ورنا يشوفون المكان....
تذكر كل شي صار له أبوه يضربه.... وريم اللي تعتذر له وأبوه محقره وما يناظره.... رفع راسه وناظر أمه وأخواته راحوا بعيد عنه.... ما أهتم وراح وجلس تحت شجرة وضم رجلينه لصدره ونزل راسه ودمعت عيونه....
أبو نواف اللي تأخر شوي بسبب الزحمة.... شاف نواف يمشي وبيده كاميرا.... فجاءة وقف وراح جلس تحت شجرة.... راح له وجلس جنبه.... رفع نواف راسه لما حس باحد جلس جنبه.... مسح دمعته لما شاف أبوه....
طلع أبو نواف ورقه وقال: خذ يا نواف وأقرا
بدا نواف يقرا الورقة اللي تدين أبوه بعشرة ملايين.... نزل الورقة بعد ما خلص قراءه وقال: كنت عارف أنا عبير ماسكة عليك شي مو هين... عشان كذا تصدق كلامها
أبو نواف: صح كلامك عبير ماسكة علي ها الأوراق ودايما تهددني أنها تفضحني
نواف بقهر: وأنت ليه تسرق عشرة ملايين
أبو نواف: لا يا نواف أنا عمري ما أكلت فلوس حرام... بس هذي لعبه ملفقة وأنا اللي تورطت فيها
نواف: كيف
حكى له كل السالفة....
أبو نواف: وأنت عارف يا نواف اللي يدخل السجن... حتى لو هو مظلوم راح يحمل لقب خريج سجون... لأنه عاش مع مجرمين... وأنا ما بغيتك تنزل راسك قدام الناس عشان كذا تحملت الحياة مع عبير
نواف: يعني... أنت عارف إني ما سويت شي لريم وما قربت منها... - كان بيقول ها الكلام لكنه سكت لما شاف أمه جات....
أم نواف: سالم... نواف لماذا تجلسان هنا
وقف أبو نواف وقال: كنت أقول لنواف عن سالفة العشرة ملايين
أم نواف: هكذا اذن... - ناظرت ولدها وقالت: لا تخف يا بني... فقد جمع والدك مبلغا كبيرا من المال وبإذن الله سوف تنتهي هذه المشكلة
ناظر نواف أبوه وقال: جمعته؟؟
أبو نواف: ما فيه الا ها الحل عشان أقدر أسكت عبير
أم نواف: هيا أختي وزوجها ينتظروننا
أبو نواف: يللا
مرت الأيام سريعة بالنسبة لأبو نواف.... وجا وقت الوداع، نواف وأسماء من يومين رجعوا السعودية.... راح أبو نواف لبيت زوجته حتى يودعها.... لكنها تكره لحظة الوداع، ولما شافها تأخرت وما نزلت تسلم عليه.... وقف وسلم على أم زوجته وأبوها وبنته بسمة ومشى....
وصل الباب لكن صوت زوجته وقفه.... التفت لها وشافها تبكي.... كان الوداع حار ما بينهم لكن قدر أبو نواف يهدي زوجته....
أبو نواف: موني أبغى بيبي
أم نواف وهي تمسح دموعها: ماذا
أبو نواف: أبغى طفل... مو مهم بنت أو ولد المهم لما ترجعين السعودية يكون معك طفل
ابتسمت أم نواف: حسنا بإذن الله سأنجب لك طفل صغيرا
سلم عليها أبو نواف وودعها وطلع.... راح للفندق وبعد كم ساعة اقلعت الطيارة.... جلس أبو نواف بالدرجة الثانية مع إنا مديره حاجز لهم بالدرجة الأولى.... لكن أبو نواف ما يبي يجلس مع مشاري ومنصور لأنهم راح يستهبلون عليه....
ناظر النافذة وهو يفكر" كله منك يا عبير.. حقوده ما تبين الخير لغيرك ".... حس بأحد يهز كتفه والتفت.... شاف الولد اللي جالس جنبه....
أبو نواف: هلا
الولد: جابوا الأكل
وصل لمطار الرياض وشاف أخوه أبو رائد يستقبله.... راح له وسلم عليه....
أبو رائد: الحمد لله ع السلامة
أبو نواف: الله يسلمك
أبو رائد: وش فيك يخوي... كنت أظن أنك بترجع مبسوط... بس شكلك متضايق
أبو نواف: آآآه يا فواز... ما ودي رجعت الا وهم معي... أو على الأقل جلست معهم
أبو رائد: هانت يخوي هانت... قريب بيرجعون لك
أبو نواف: إن شاء الله
أبو رائد: يللا نمشي
بعد أسبوع....
في بيت أبو طارق ولد عم أبو نواف....
خذت أسماء الجريدة وبدت تتصفح بدل الطفش.... وهي تفر فيها قرت مقابله مع واحد فاقد ذاكرته من عشر سنين ويدور أهله....
التفتت لأبوها بالرضاعة وقالت: بابا
أبو طارق: نعم بابا
أسماء: بابا ناظر الرجال بالجريدة... مسكين فاقد ذاكرته ويدور أهله
أبو طارق: إيوه عادي في ناس يسوون كذا عشان يعرفون أهلهم
أسماء: يقولك هذا صار له 10 سنين في ألمانيا... والحين توه جاي للسعودية... -مدت الجريدة وقالت: ناظر صورته والله أنه كسر خاطري
أخذ أبو طارق الجريدة حتى ما يكسر بخاطرها.... ناظر بصورة الرجال وانصدم.... أخذ الجريدة وراح فوق، استغربت أسماء من تصرف أبوها....
راح أبو طارق غرفته أخذ البوم الصور وفتحه.... ناظر بصورته مع ولد عمه والجريدة.... نفس العيون والملامح لكن أكبر.... دمعت عيونه وقال بخاطره" سعود حي؟؟ "....
دق على أبو نواف وأبو رائد أولاد عمه.... ربع ساعة وأثنينهم في بيته.... المفاجاءه كانت كبيرة عليهم.... وما لهم الا يسألون الجريدة عن الرجال....
بعد يومين....
في الدمام....
كان جالس بمجلس الرجال وهو مرتبك.... أسبوع واحد من أجرى المقابله والحين في ناس جايين يشوفونه.... ناظر أبو جراح اللي جالس جنبه هو ومعه 3 من الصحفيين....
التفتتوا لجهة الباب لما دخل أبو رائد وأبو طارق وأبو نواف.... ناظرهم وحاول يتعرف عليهم.... ما عرف أبو نواف ولا أبو طارق.... بس كان يناظر أبو رائد لأنه الوحيد المألوف....
أبو رائد: سعود
ها الصوت سبب صداع لسعود واغمى عليه.... وعلى طول خذوه.... كل هذا قدام الصحافة اللي كانوا يصورون.... وأبو جراح اللي كان مفتخر بإنجازه....
باليوم الثاني....
ركب سعود السيارة وناظر النافذة.... وهو يفكر في أمه وأبوه ويحمد ربه أنه ما فقد واحد منهم....
أبو نواف: آآه يا سعود واحنا اللي ظنينا أنك ميت... وأنت جالس في ألمانيا
ابتسم سعود: إيه والله... أذكر إني طلعت من المستشفى لأني أزور صديقي... فتحت بوكي حتى اشتري لنواف لعبه... وبعدها ما انتبهت الا وأنا ف السماء بسبب الإنفجار... وما صحيت الا وأنا فاقد الذاكرة
أبو رائد وهو يسوق: وكيف جابوا لنا أغراضك... البوك وبطاقة الأحوال
سعود: الظاهر أنا البوك طاح من يدي وقت الإنفجار... أقول أنا أذكر أنا زوجتي جوانا حملت من بعد علاجي... وش صار عليها
أبو نواف: مدري ايش أقولك يخوي... كنا ناويين نجيب جوانا عندنا لأنها حامل... لكن المسكينة زلقت بالحمام ومات الجنين
سعود بأسف: لا حول ولا قوة الا بالله
وقف أبو رائد السيارة وقال: أنا نازل وبقول لأبوي وأمي
أبو نواف بسرعة: لا... أنا أنزل
نزل أبو نواف ودخل بيت أبوه.... شاف أمه وأبوه جالسين بالصالة....
أبو نواف: السلام عليكم
الكل: وعليكم السلام
أم سعود: شلونك يمه
أبو نواف: بخير جعلك الخير... يمه يبه أبغى اقولكم عن شي
أم سعود: وش هو
أبو نواف: أخوي سعود مو هو مات بسبب انفجار في ألمانيا
أبو سعود: إيه الله يرحمه
أبو نواف: يبه يقولك في واحد... ربي حفظه من ها الإنفجار لكن بسبب ضربه براسه... أغمى عليه ولما صحى صار فاقد الذاكره
أبو سعود: وبعدين
مسك أبو نواف يد أمه ويد أبوه وقال: يبه يمه ذا الرجال هو سعود
أبو سعود وأمه بنفس الوقت: سعوود؟؟
دمعت عيون أبو نواف: إيوه يمه... عاش عشر سنين في ألمانيا وهو ما يذكر شي... بس واحد جزاه الله خير شاف سعود بألمانيا وجابه هنا... جريدة اليوم سوت مقابلة مع سعود ورحت أنا مع فواز وزياد ولد عمي وجبناه
نزلت دموع أم سعود وقالت: متأكد يا يمه... - ضغطت على يده وقالت: أنت تقول الصدق
ابتسم أبو نواف لأمه وقال: إيه يا يمه... هو نفسه لكن أكبر
أبو سعود بصوت غريب عليه: هو وينه الحين
أبو نواف: برة مع فواز... - وقف وقال: بروح أناديه لكم
دخل أبو نواف وبعده أبو رائد وبعدهم سعود.... ناظر سعود بأمه وأبوه هذا هم بس أكيد تغيروا لأنه من 10 سنين ما شافهم.... اللقاء كان حار بينهم هذا ولدهم وبكرهم وأول فرحتهم.... الكل يمسح دموعه بسبب الموقف المؤثر....
جلس سعود جنب أمه ويده بيدها.... قال وهو يناظرها: آآآه يا يمه 10 سنين وأنا انتظر يجي أحد يسأل عني... لأني ما أذكر شي... لكن جزاه الله خير أبو جراح هو اللي جا لي واقترح إني أسافر معه
أبو سعود: الحمد لله يا وليدي أهم شي أنك بخير
أبو رائد: أبو جراح كان تفكيره صحيح لما ظن أنا احنا نظن أنك ميت... بس الحمد لله أنك رجعت لنا
سعود: الحمد لله
أبو نواف: يبي لنا نطلع لك هوية جديدة
سعود: إيوه ضروري
الكل التفت لما سمع صوت كتب طاحت بالأرض....
نواف اللي وصل من المدرسة.... وقف سيارته عند بيت جده ونزل.... استغرب لما شاف سيارة أبوه عند الباب.... أكيد عنده شي.... دخل البيت وقف عند مدخل الصالة....
ناظر الموجودين، جدانه مع أبوه وعمه فواز.... ناظر بالرجال الثالث وهو مستغرب.... نفس العيون والملامح لكن أكبر.... طاحت الكتب من يده وقال بهمس بالألماني: والدي
ناظره سعود لابس الثوب وحاط الشماغ على راسه.... وعدساته الزرقاء وشعره البني.... وقف وقرب مسافة وفتح ذراعة: ما ولهت علي يا نواف
قرب نواف وقال بالألماني: والدي
راح له وضمه وهو يصيح ويتكلم ألماني.... سعود كان يمسح شعره وهو مبتسم.... لو جوانا جابت له ولد ما حبه مثل نواف.... رفع نواف راسه وناظر عمه أبوه اللي رباه.... تكلم ألماني وهو مبسوط فيه....
أبو نواف حز في خاطره وهو يشوف ولده قريب من أخوه.... وش اللي أعطاه سعود لنواف وهو قصر عنه فيه.... ومع ذلك كان مبسوط لأخوه....
بعد ساعة أم سعود حطت الغدا مع الخدامة.... وجلسوا كلهم حوالين السفرة.... ناظرتهم أم سعود وهي مبسوطة.... عيالها وزوجها كلهم حولها.... ما طلعت بها الدنيا الا بهذول الرجال.... صحيح سالم مو ولدها.... لكن هو ولد بنت عمها قبل ما يكون ولد زوجها....
هذا هو سعود نفسه الكبير والعاقل من بين أخوانه.... وفواز اللي دايم يقول أنه طاح سوقه من دخل سالم بيتهم.... وسالم أصغر الأولاد والمدلل لأنه أكثر واحد متعذب مع زوج أمه..... وزوجها اللي دايم يضرب الأرض بالخيزران.... يستخدمها للتخويف مو للضرب.... ابتسمت وهي تحمد ربها ألف مرة....
سعود: أقول وش صار على بيتي
أبو رائد: خليناه وقف خيري بأسمك
سعود: زين سويتوا ع الأقل يستفيدون الناس منه بدل ما يكون فاضي
أبو رائد: سعود وين بتنام فيه ترا...
قاطعه سعود: وين بعد... أنا من 10 سنين ما شفتكم... وبجلس عند أمي وأبوي لأني ولهان عليهم وما شبعت منهم
أبو سعود: بيت أبوك هو بيتك
سعود: تسلم يبه... بس إذا جناحي أختفى ترا برجع أبنيه
أم سعود: لا يا وليدي جناحك ما تغير من تركته
انبسط نواف اللي كان مستمع لهم.... لأن عمه بيسكن معه في بيت جده.... وقف وقال: الحمد لله
طياري راح المطبخ وقال للخدامة تنظف جناح سعود.... راح غرفته وفتح الدولاب.... ناظر الشنط اللي فيها وهو مستغرب.... قرر أنه يفتح وحدة بس، طلع وحدة من الدولاب وفتحها.... انفجع لما شاف الخمس ميات اللي قباله ماليه الشنطة كلها....
مو آلآف لا هذي ملايين.... وقف وفتح الشنطة الثانية والثالثة والرابعة.... وكلها فلوس من فئات الـ 500 والـ 200 والـ 100 والـ 50.... بعضها طبعة الملك عبد الله وبعضها الملك فهد الله يرحمه....
التفت نواف لما انفتح الباب وشاف سعود مع أبوه.... ناظرهم وناظر الفلوس ورجع ناظرهم....
أبو نواف: تتوقع لايش هذول يا نواف
نواف يستوعب ثواني وبعدها قال: هذول الـ 10 ملايين
أبو نواف بقهر: لا مو عشرة... لسى باقي مشوار ع العشرة... - التفت لسعود: هذي نصيحتك يا سعود... تعبت وأنا أجمعها
ابتسم سعود: بالعكس يا سالم... أنا لما قلت لك أجمع فلوسك... توقعت أنك راح تطفش وما راح تجمع ها المبلغ الكبير
جلس أبو نواف بطرف السرير: قهر والله... هذي فلوسي من حقي اتمتع فيهم أو أحرقهم... مو غيري ياخذهم
سعود: هانت يخوي... أنت مظلوم وربك ما نساك... وإن شاء الله يطلع الحرامي وتتمتع بفلوسك
أبو نواف حط يده على عيونه وما رد.... وقف نواف وقرب وجلس جنب أبوه وقال: يبه
رفع أبو نواف راسه وقال نواف: ليه ما جمعت فلوسك في بنك
تنهد أبو نواف: لأن عبير راح تكتشف إني أجمع فلوسي... وفضلت إني أجمعهم هنا ومحد يدري عنهم غير أخواني
سعود: نواف تدري أنا أمك جمعت مع أبوك فلوس
التفت نواف لأبوه وقال: صحيح
أبو نواف: إيوه... أنا فتحت حساب بأسمك بالبنك... وهي حولت الفلوس فيه
سعود: نواف... خلني مع أبوك شوي
وقف نواف: اوكيه... عن أذنكم
طلع نواف وهو يحس بندم.... لأن ظن أنا أبوه كذب عليه بسالفة الملايين... وظن أنه هو سارقهم.... لكن بعد ما سمع الكلام اللي دار بين سعود وأخوه.... عرف أنا أبوه مظلوم....
انتشر خبر رجوع سعود بين الناس.... توالت عليه الزيارات من أهله ومن أصاحبه ومعارفه....
بعد يومين دخل سعود بيت أبوه.... تمدد ع الجلسة حتى يرتاح.... بعد ساعة دخل أبو نواف وشاف أمه جالسة تتابع التلفزيون.... وسعود نايم....
أبو نواف: السلام عليكم
أم سعود: وعليكم السلام... هلا يمه
أبو نواف: هلا فيك... ها يمه مبسوطة بسعود
ناظرته أم سعود وابتسمت: إيوه والله إني مو مصدقة أنه هنا... - التفتت لأبو نواف وقالت: وراك يا يمه ما رحت لاميمتك
أبو نواف: توني جاي من عندهم
أم سعود: وش أخبارهم
أبو نواف: كلهم بخير... بس نهلة من بعد ما طلعت من العدة وحالها مو عاجبني
أم سعود: وش فيها
أبو نواف: مثل منتي عارفة زوجها الله يرحمه فقير وما عنده أخوان... وهي صارت مسؤلة عن عيالها ومحتاجه للفلس
أم سعود: افاا يا ولدي ما هقيتك تقصر على أختك
أبو نواف: حاولت معها ومو راضية تأخذ مني فلوس... بس أنا عطيت أمي وهي تاخذ منها إذا أحتاجت
أم سعود: وعيالها منهو وليهم
إبو نواف: أخوي عمر... شفتي عمر ما كمل 28 سنة مسؤل عن ولد وبنت عمرهم 6 سنين... لكن الحمد لله على كل حال
أم سعود: الله يرحمه أبوها هو اللي بلاها بذا الرجال
أبو نواف: محد كان موافق ع الزواج... بس ايش نسوي
أبو نواف كان يتكلم عن هموم أخته.... وما درا عن سعود اللي أنفطر قلبه على حبيبته السرية.... خطبها سعود لكن أبوها رفض ولما درس في ألمانيا.... وتزوج جوانا أكتشف أنه عقيم.... وارتاح أنه ما تزوجها حتى ما يحرمها من العيال....
طلع أبو نواف وقالت أم سعود: ها يمه للحين خاطرك فيها
تفاجاء سعود كيف عرفت أمه.... جلس وقال: من هي
ابتسمت أم سعود: من بعد... نهلة
ناظر سعود الأرض وقال: وش ها الكلام يمه... توها طالعه من العدة
أم سعود: صار لها سنة من طلعت من الحداد... وش قلت أجس نبضها
ابتسم سعود: سوي اللي تبينه... - وقف: يللا أنا رايح أصلي العصر
بعد فترة....
دخلت نهلة لبيت أبو سعود مع زوجها سعود.... راحوا أثنينهم لجناح سعود وجلسوا بالصالة....
سعود: ألف مبروك يا غالية
ابتسمت نهلة: الله يبارك فيك
سعود: يا شيخة واخيرا وافقتي
نزلت نهلة عينها: مثل ما أنت عارف أنا عندي عيال... وكل الأنظار علي عشان بتزوج وأترك عيالي... وخصوصا أنا أبوهم متوفي
سعود: على طاري مروة ومعاذ... - مسك يدها ووقف: تعالي معي
نهلة: وين
سعود: تعالي وما عليك
وقفت نهلة وراحت معه.... طلعوا من الجناح ووقفوا عند باب غرفة.... فتح سعود الباب وتفاجات نهلة.... غرفة فيها سريرين واحد لونه سماوي والثاني وردي... وشكلها غرفة عيال....
نهلة: لمين هذي
سعود: لمروة ومعاذ... مثل ما أنتي عارفه أنا ما عندي عيال... شاورت أبوي ووافق أنهم يسكنون هنا لأني أبيهم
نهلة: ما يصير هذا بيت أبوك
سعود: ما عليك هو وافق وأشترى لي أرض وإن شاء الله بتكون بيتنا... بنعيش هنا مع أمي وأبوي والعيال ونواف ولد أخوي سالم
نلهة: نواف ساكن هنا ليه
سعود: ما عليك قريب يروح لبيت أبوه... - مسك يدينها وقال: الليلة ليلتنا وبكرة يومنا... وبعد بكرة تجيبين مروة ومعاذ ونطير لماليزيا
نهلة: ماليزيا؟؟
سعود: أكيد... يللا تعالي أخوي سالم مجهز لنا عشاء خاص بالجناح
ابتسمت نهلة، سعود فرق عن أبو معاذ في كل شي.... حمدت ربها أنه أستجاب دعواتها وعوضها خير عن اللي فقدته....
صحى نواف من النوم معصب.... لأن جدته مصحيته من 10 الصباح في يوم الإجازة.... وتبيه يروح معها المزرعة عند جده.... لأن أبو سعود قايل لعياله يبي مزرعة صغيرة عشان يشغل نفسه فيها....
بعد ما صلى نواف الظهر رجع البيت.... جلس بطفش قدام التلفزيون جنب جدته.... أم سعود كانت مبسوطة وهي تشوف بساط الفقر.... التفتت لنواف وشافته مميل راسه على يده ومغمض عيونه....
أم سعود بعصبية: نوويف جعلك اللي منيب قايلتها
نواف وهو على وضعه: هممم
أم سعود: تسنع وكلمني عدل
عدل جلسته وعيونه حمرا وقال: سمي يمه
أم سعود: وش هو له نايم الحين
نواف: أنتي ليش مصحيتني من صباح ربي... واحنا في إجازة
أم سعود: وإجازة يعني تسهر الليل وتنام النهار... قم أفتح الباب وشف منهو جا
ابتسم نواف: إن شاء الله يمه... ما يصير خاطرك الا طيب
راح يفتح الباب ومقفلة معه.... فتح الباب وقال بدون نفس: خييير
رائد: يلعن الأخلاق المقفلة
نواف: فكنا واللي يعافيك
رائد: آف ولد العم معصب... وش فيك
نواف وهو يدخل: من جدتك مصحيتني من 10 الصباح وأنا مانمت الا 4 الفجر
رائد لحقه: هههههههه ليش وش عندها
نواف: تبيني أوديها المزرعة ويوم إني تروشت وجهزت... غيرت رايها وقالت بتروح العصر
رائد: ههههههههههههه تستاهل... - دخل الصالة: السلام عليكم
أم سعود: وعليكم السلام... هلا وغلا بوليدي
رائد باس راسها وقال: هلا يمه... شلونك
أم سعود: أنا بخير جعلك الخير... شلونك أنت وشلون أمك وخواتك
جلس رائد قبالها وقال: كلنا بخير... شلون عمي سعود وجدي عساهم مبسوطين بالمزرعة
أم سعود: كلهم بخير وجدك مستانس بالمزرعة... وبروح له العصر مع نويف
نواف بطفش: يصير خير
أم سعود: أيا قليل الخاتمة... قم عن وجهي خلف الله على أمن جابتك
ناظر رائد لنواف وهز راسه وقال: ما عليك منه يمه... شارب بايسون خايس ويقط خيط وخيط
أم سعود سمعت شارب خايس.... التفتت لنواف بروعة: شارب خايس... - حطت يدها على كتفه ويدها الثانية تتفحص وجهه وصدره وبطنه.... وقالت بخوف: بسم الله عليك يمه... بطنك يعورك لاعيه كبدك... قم خلني أوديك المستشفى
رائد ونواف ناظروا بعض وأنفجروا ضحك: ههههههههههههههههههههههه
عصبت أم سعود: ضحكتوا بلا ضروس... يا قليلين الحيا
نواف طاح على جنب من كثر الضحك....
رائد بعد ما مسك نفسه قال: هههههه سوري يمه لا تخافين على نواف... شوفيه حصان ما فيه شي
أم سعود: يا بعد عمري يا نواف ما عنده أم تهتم فيه... لو ياكل شي بايت محد درا عنه
نواف باس راسها وعيونه مدمعة من الضحك: الله يحفظك يمه... أدري محد يخاف علي مثلك الله يخليك لي
أبو نواف اللي كان واقف من فترة تفاجئ لما شاف نواف يضحك بها الطريقة.... كان يظنه انطوائي ودوم ساكت.... وابتسم لما خافت أمه على ولده لأن أم نواف بعيده عن ولدها.... وخصوصا لما عرفت معاملت عبير الشينة لنواف....
دخل أبو نواف مبتسم: السلام عليكم
الكل: وعليكم السلام
وقف نواف: عن أذنكم... - طلع نواف وهو مقهور كيف أبوه يشك فيه.... مستحيل يجلس بمكان أبوه موجود فيه....
عصب رائد من تصرف نواف وطلع له.... مسكه من ذراعه وقال: ايش هذا يا نواف
بعد نواف يده عن ولد عمه وقال: تسألني وأنت عارف كل شي... حط نفسك بمكاني تخيل عمي يشك فيك مع أختك رغد... ما راح تستحمل تشوفه لأنه ما يثق فيك
رائد: أنا غير لأن رغد أختي... بس أنت وريم مو أخوان
نواف ثواني يستوعب: ايش... وش تخربط أنت
رائد: نواف ريم بنت عبير... بس مو بنت عمي سالم، يعني مو أختك
نواف مأثرة فيه الصدمة: كيف من قالك
رائد: أنت عمرك ما دققت بأسمها... أسم أبوها يوسف بن فهد الـ...
أخيرا أستوعب نواف ريم مو أخته وطبيعي يخافون عليها.... بس كيف يشكون فيه وهو توه يدري أنها مو أخته.... ذكره أسم أبوها بواحد بالمدرسة أسمه فهد بن يوسف الـ...
دايما يقرب منه ذا الطالب وكنه يبي شي.... بس يغير رايه ويمشي أكيد يبي يسأل عن أخته ريم.... وعارف أنها عايشة عندهم....
نبهه من أفكاره لما دق الجرس وفتح رائد الباب.... وبعد ثواني قال رائد لرجال: حياكم تفضلوا
دخلوا الرجال للمجلس.... ناظرهم نواف رجالين وشايب....
رائد: نواف الرجال يبون أبوك رح ناده
هز نواف راسه ودخل....
في الصالة بعد ما طلع نواف وطلع معه رائد.... جلس أبو نواف عند أمه....
أبو نواف: شلونك يمه
أم سعود: أنا بخير بس حالك أنت مع ولدك مو عاجبني
ما رد أبو نواف لأنه تعب وهو يبرر لأمه.... وهي راكبة في راسها يكلم نواف....
أم سعود: سالم أنت عاجبك حال ولدك... يظن أنك تشك فيه مع بنت زوجتك... وكله من تحت راس السوسة عبير... والله إني خايفة يضيع عليك ولدك مـ...
أبو نواف بخوف: بسم الله عليه... الله لايقوله
أم سعود: أجل متى ناوي تقوله
أبو نواف: يمه إذا أكتمل عندي المبلغ وارتحت أقوله... أما الحين ما ينفع
دخل نواف وناظر أبوه اللي يناظر التلفزيون.... ناظره بعتب" ليه ما تثق فيني يا يبه.. ليه ".... قال وهو يناظر أبوه: يبه
التفت أبو نواف وأبعد نواف نظره وقال: في ثلاث رجال يسألون عنك في المجلس
أبو نواف: عن أذنك يمه... بس قولي للخدامة تسوي القهوة
قام وراح لعند ولده اللي واقف مكانه.... نواف كان بيتعد عن أبوه بس أبو نواف مسكه....
مسكه وضمه وقال بصوت واطي: أنا واثق فيك أكثر من نفسي... بس هي سحابة صيف وتعدي
تركه وراح من غير ما يناظره.... نواف وقف مكانه وكلام أبوه يتردد في أذنه " أنا واثق فيك أكثر من نفسي... بس هي سحابة صيف وتعدي "...." يقصد من بالسحابة.. عبير ولا ريم " وألف سؤال براسه....
دخل أبو نواف المجلس: السلام عليكم
الكل: وعليكم السلام
ناظرهم أبو نواف وما عرفهم: يا هلا والله فيكم
واحد من الرجال: هلا فيك... بس بغينا سالم بن عبد الله الـ...
أبو نواف: وصلت خير... أنا سالم أبو نواف
نفس الرجال قال: أنت تعرفني يبو نواف بس أكيد ما تذكرني... أنا خالد الـ... كنت مسؤل عنك في شركة... - أشر بيده ع الشايب: أبو عبد الرحمن الـ...
سكت أبو نواف وهو يناظره نفسه اللي خلاه يوقع.... وش عنده جاي له وجايب معه مديرهم القديم....
عبد الرحمن ولد الشايب قال: أكيد عندك خبر عن العشرة ملايين اللي أنسرقت من شركة الوالد
هز أبو نواف راسه وهو يفكر.... جا وقت الحساب ودفع الدين اللي ماله ذنب فيه.... دخل نواف وبيده صينية القهوة والفناجين والتمر.... بعد ما ضيف الضيوف جلس جنب أبوه....
ناظر خالد أبو نواف وأشر على نواف بعينه.... فهم أبو نواف أنهم ما راح يتكلمون ونواف موجود....
أبو نواف: نواف
نواف: هلا يبه
أبو نواف: خلنا لحالنا شوي
نواف: أجل وين رائد
عبد الرحمن: دقوا عليه ربعه وطلع
وقف نواف: عن أذنكم
طلع نواف وشاف رائد توه داخل من الشارع....
نواف: رائد وش فيك تركت الرجال
رائد: واحد من الرجال قالي أنهم يبغون يكلمون عمي لحاله
نواف: عشان كذا قالي أبوي خلنا لحالنا... تتوقع وش عندهم
رفع رائد كتوفه: علمي علمك... أقول تعال معي نروح المزرعة مع جدتي
نواف: دقيقة... بس أقول لجدتي ونجيك
بعد ما طلع نواف.... أبو عبد الرحمن الشايب عصب من ولده وخالد.... لأنهم طيحوا قلب أبو نواف بمقدامتهم....
أبو عبد الرحمن: أسمعني يا ولدي يا سالم... - حط يد كتف خالد وقال: هذا خالد هو نفسه اللي خلاك توقع الأوراق وهو اللي سرق الفلوس... تفاهم معه
أبو نواف: ايش
أبو عبد الرحمن: إيه يا ولدي هذا خالد اللي ورطك... وأنت مظلوم وما تدري عن شي
ناظره أبو نواف بحقد.... ما قدر يسوي شي لأنه يتذكر حياة الذل والإهانة اللي عاشها بسبب عبير وأخوها.... ناظر الأرض وهو يتحسر على عمره اللي راح.... وعلى أشياء كثيرة بسبب اللي قباله....
قام خالد وجلس قبال أبو نواف على الأرض.... رفع راسه لأبو نواف وقال: سامحني يبو نواف... عشت في هموم وأنت مظلوم وكله مني أنا
ناظره أبو نواف وهو يتذكر لما ذله مساعد وقاله.... بوس رجلي وقلي أنا آسف....
أبو نواف بعتب: بعد ايش يا خالد... بعد ما وصلت الورقة بيد واحد يكرهني... ذلني وغصبني أتزوج أخته وأغراها إني بكون تحت شورها
خالد: لا تظن إني مرتاح يبو نواف... أنا كنت في مكة وعيال الحرام خذوا ولدي مني... ورجع لي بس منحرف ما همه غير الخمر والبنات والحشيش... أكبر عيالي يتهمني إني انا اللي ضيعته
وقف أبو نواف وراح لعند النافذة وقال: وش شعورك وأنت تسمع زوجتك وأخوانها... يعايرونك بشي أنت مالك ذنب فيه... ما لقيت حل غير إني أجمع فلوسي وأحرم نفسي من كل شي... بس عشان أرجع الفلوس لأصحابها مع إني مظلوم
قرب خالد منه وهو يمسح دموعه وقال: سامحني يبو نواف... الله يخليك سامحني
ناظره أبو نواف" أكيد هو عانا مثل ما أنا عانيت " تنهد وقال: مسامحك يا خالد... يمكن ذا أبتلاء من ربي لي... أو عقوبة لأشياء أنا سويتها الله يسامحني عليها
خالد مو مصدق لأن أبو عبد الرحمن قاله.... " إذا سامحك سالم بسامحك.. وإذا رفض بتدخل السجن ".... قال برجاء: ايش قلت يبو نواف
ابتسم أبو نواف: مسامحك يا خالد... الله يسامحك ويستر عليك
أبو عبد الرحمن: بما أنك سامحته يبو نواف... بكرة ع الساعة ثمان الصباح نشوفك بالمحكمة
أبو نواف: لايش
ابتسم أبو عبد الرحمن: عشان نوقع على أوراق براءتك
بعد ما طلعوا الرجال دخل أبو نواف الصالة وما شاف حد فيها.... ناد الخدامة وما ردت عليه.... رفع جواله ودق على ولده.... اللي قله أنهم بالمزرعة....
طلع أبو نواف من البيت وراح لبيته والفرحة مو شايلته.... دخل البيت وكان فاضي لأن عبير عندها خطوبة بنت خالها....
راح أبو نواف غرفته وبعد ما صلى ركعتين شكر.... جلس بطرف السرير وهو مو مصدق.... ابتسم وقال بفرح: كابوس... كان كابوس واخيرا صحيت منه
ابتسم وأفكار كثيرة براسه.... هو جمع 9 ملايين و700 الف ريال.... مليونين لمنيرة وراح يرجعهم لها.... ومليونين لأخوه فواز وبيرجعم له.... والباقي له، فكر يأمن مستقبل عياله وأولهم ريم.... لأنه عرف أنا أبوها فقير وعلى قد حاله.... وهي متعودة على حياة ممتازة....
نبهه من أفكاره صوت طق الباب.... عدل جلسته وقال: أدخل
فتحت ريم الباب وقالت: يبه... أنت هنا
أبو نواف: إيه من شوي جيت... أنتم ليش رجعتوا من الخطوبة بدري
ريم: لا ما رجعوا... أنا اللي ما رحت
أبو نواف: ليش يا ريم
ريم: مو جوي... ما أحب أجلس معهم كثير
تذكر أبو نواف أنا عبير وأخواتها ما يتغطون عن عيال خالاتهم وخوالهم.... وقال: أحسن لك
ريم: صحيح يبه... تقول الخدامة في رجال جايين لك تحت
أبو نواف: بعد؟؟
ريم: بغيت شي يبه
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك