رواية يمسح الدمعة بشكوى -17
التفتت لعبد الله وحاولت اغير الموضوع
عمر = اقول بس لا عاد تتوقع وخلك على القربة المشقوقة
ضحك عبد الله وبدينا نسولف باشياء جانبية .. وبالي مشغول بكلامهم
صح .. معهم حق ... نايف دخل بيتي وطعني بغفلة مني ليش مايصير كلامهم صحيح ...
ومع اذان المغرب دخل مصعب علينا الغرفة
صافح الشباب وبعدها وقف بجنبي من الجهه الثانية ومد علي بوكي ومفاتيحي
رفعت راسي له مستغرب
عمر = انت بعد مافتحلك رايد ؟
حط مصعب بوكي ومفاتيحي على صدري
مصعب = ما احد فتحلي .... طاحت يدي وانا اطق .. وقلت يمكن رايد اخذ ليموزين وجا عندك
طيرت عيوني منصدم .. لا يكون رايد سواها وطلع من بيتي
امس قبل اروح للجامعة قال يبي يطلع من عندي ... بس انا اقنعته انه يقعد .. ليش طلع الحين
وش هالتفكير اللي فيه ... اجل يقول يبي يطلع لانه سبب لي مشاكل على حد فهمه الغبي .. يوم ملى علي البيت و حسسني بمعنى الاخ الصغير يطلع .. ما ابي ارجع للوحدة مرة ثانية ... مابي ارجع لبيت موحش مافيه الا انا
مديت يدي واخذت المفاتيح ومديتها على مصعب
عمر = مصعب تكفى خذ المفاتيح وادخل البيت وشف رايد فيه والا لا
مصعب مستغرب = ليه يمكن هو اخذ لموزين وعلى وصول الحين ... او يمكن راح مشوار
عمر بترجي = تكفى مصعب .. رح وشف
سكت مصعب شوي وبعدها ابتسم ابتسامة جانبيه
مصعب بابتسامة = دايم تقول ما انت محتاجني .. والحين ترسلني
كشرت بوجهه متضايق ..
عمر = وانا الى الحين ماني محتاجك ( والتفتت لمشعل بعصبية ابي ارسله ) مشعل
بس قاطعني مصعب واخذ المفتاح مني
مصعب = لا لا خلاص خلاص .. انا ابروح
وطلع
يارب رايد موجود بالبيت ... يارب انه ماطلع ... حاولت اتذكر اخر كلامنا مع بعض .. ما شفت اغبى منه .. وش المشاكل اللي سببها لي بزعمه .. انا اصلا راعي مشاكل من يوم كنت صغير .. انا راعي مشاكل من قبل اعرفه .. ليه يتوقع كذا ..
= عمر وش فيك
انتبهت على عبد الله اللي واقف بمكان مصعب ورفعت نظري له متضايق
عمر = رايد .. اظنه طلع من بيتي
استغربوا كلهم
مشعل = ليه وش مسويله انت .. ترا رايد حساس .. وانت الصراحة جلف حتى معنا
تغيرت ملامحي وانا احاول اتذكر معاملتي معه
ايه انا اتطنز عليه .. واسبه .. وارسله واجد .. وبعض الاحيان اضربه .. بس والله حبيته مثل اخوي الصغير ... رايد حسسني بمعنى الاخو اللي محروم منها
مديت يدي واخذت بوكي وحطيته تحت مخدتي بصمت
منصور = يمكن رجع لعمه ؟
رديت عليه بصوت مخنوق
عمر = احتري مصعب الحين يتأكد اذا كان بالبيت والا لا
وغمضت عيوني بألم .. ما اعتقد عمه الحقير راح يستقبله .. خاصة انه بزعمه ان رايد هو اللي كسر سيارته .. يااارب يحصله مصعب بالبيت
سمعت اصوات ضحكات خفيفة حولي وفتحت عيوني مستغرب .. ولقيت منصور ومشعل وعبد الله كل واحد ماسك ضحكته
استغربت والصراحة فرحت .. يمكن مسوين مقلب ويعرفون رايد وين
عمر = وش فيكم ؟
وانفجروا ضحك اول ماسمعوا سؤالي
احتريتهم يخلصون موجة الضحك هذي وانا اطالعهم واحد واحد مستغرب
عبد الله وهو يضحك = سبحاان مغير الاحوال ... عميران تذكر مين اللي كان معيي يسكن رايد عنده ههههههههههههههه
منصور = شوفوا شكله شوي ويصيح ههههههههههههه
مشعل وهو يتكم ضحكته = يارجال تلقى رايد راح مشوار هنا والا هنا .. لا تنسى ماله احد ببريدة .. ورايد حالف مايرجع لعمه .. يعني الولد ماله مكان الا بيتك
تفشلت من اكتشافهم لي .. وبنفس الوقت ماني متطمن لكلامهم .. وما اقدر اجادلهم اكثر عشان ما ابين لهم ان كلامهم صحيح
سمعنا يقوم للصلاة بس الشباب حالتهم نفس حالتي مع الصلاة
قعدنا نسولف وانا بالي ماهو معهم .. احتري مصعب
نص ساعة ودخل مصعب الغرفة علينا بسرعة وبدون سلام ولا مقدمات
مصعب = عمر رايد شكله مارجع البيت من البارح
شهقت وحاولت اجلس بس عجزت
مشعل = وانت وش عرفك انه مارجع البيت
التفت مصعب لمشعل
مصعب = دخلت بيت عمر ( والتفت لي ) وشفت الدم ومناشف عند عتبه الباب الداخلي .. لو رايد رجع كان على الاقل وخر المناشف عن الطريق
ليه يارايد ليييييييييه
ليه طلعت .. معي مفاجأة لك
عبد الله = معه جوال ؟
هزيت راسي بيأس
عمر = لا ( وهمست بألم ) ليتني شريتله
مشعل = يمكن رجع لعمه .. ماعليكم اذا رحت لحارتنا ابسأل ولد عمه بندر عنه واشوف
طالعت مشعل بصمت .. ما اعتقد انه رجع لعمه ... حتى لو رجع يمديه طرده مرة ثانية عشان سالفة السيارة ...
الثلاثاء ... الساعة 12 الظهر
منسدح على سريري لا شغل ولا مشغله .. تعبت من السرير ومليت
امي ومها وجدي عندي من الساعة 9 .. بالي مشغول برايد طلعوا الشباب من عندي ولا واحد اتصل علي يطمني
مشعل قال بيسأل بندر بس ما اتصل علي الى الان .. ومصعب اكيد وكالعادة يمر على بيت جدي .. بس ما اتصل علي اذا سأل والا لا
بالي مشغول .. الخوف اذا راح رايد للرياض عند خواله ... اكيد بيستقر عندهم هناك وارجع انا لوحدتي وارجع لهواجيسي والاشباح اللي اتخيلها بالبيت
طيب على الاقل يزورني ... ترا كل اللي انا فيه عشانه ... اخر شي يروح ولا حتى يسأل عن صحتي بعد اللي صار ( تنهدت بضيق ) وينك يارايد ؟
انتبهت على جدي يكلمني بس ما استوعبت كلامه .. التفتت له اتأكد
عمر = تكلمني ؟
مها = اللي ماخذ عقلك يتهنابه .. ابوي يسألك من اليوم
جدي = انت قبل هالمرة متهاوش مع نايف ؟
لفيت وجهي عنه بضيق .. ماني فاضي لتحقيقاته الحين
عمر بدون نفس = ايه .. تهاوشت معه
جدي بحزم = طيب ليه كذبت علي وقلت ان اللي برجلك من لعب الكورة
التفتت له مستغرب
عمر بعدم استعياب = هااه
جدي وبدا يعصب
جدي = ليه ماعلمتنا انك تهاوشت معه ... ليه قلت لنا ان اللي برجلك من لعب الكورة
قطبت حواجبي مستغرب .. وش جاب هذي لهذي ... انا احسب يسألني عن اللي براسي ... سكتت يوم تذكرت رساله مصعب .. زين جدي جاب كذبة جاهزة بدل ما اتعب نفسي وادور عذر
جدي بصراخ = ليش ماترد
مها = يدور كذبه
امي = مها خليك محضر خير
التفتت لجدي
عمر = رجلي من نايف بس وقتها ماحبيت اقولكم .. كنت اظن اني .. آآآ ... احل المشكلة بيني وبينه
هزت امي راسها بقلة حيلة
امي بتنهيدة = الله يهديك
مها = واللي براسك بعد منه ؟
هزت راسي بايه
مها = هذا يمشي ويطقك ( وضحكت )
كشرت بوجهي لها
عمر = بايخة
جدي = طيب سيارتك وينهي ... من زمان ماشفتها معك .. ما اشوف معك الا سيارة معاذ
التفتت مها لجدي تأيده
مها = ايه انا بعد مستغربة ( والتفتت لي ) اللي اعرفه عمر ومعاذ مايتدانون .. كيف يعطون سياراتهم لبعض ... وش صاير بالدنيا
التفتت لجدي ولقيته يطالعني بحزم ويحتريني ارد ... تورطت مدري وش اقول
مها = ماااااترد
التفتت لمها معصب
عمر بعصبية = انت وش تبين الحين ؟
جدي بنفاذ صبر = عمر سيارتك وينهي ؟
التفتت لامي اللي جالسة بجنبي وتحتريني ردي مثلهم
طالعت جدي وانا طفشان من هالتحقيقات اللي كل يوم
عمر = بالورشة .. خربانة ... خربت علي عند الجامعة ووديتها للورشة .. فيها شي هذي ؟ .. انتم الحين جايين تزورون والا جايين تحققون معي ...
مها = الاثنين
التفتت لمها هالسوسة
عمر = اسكتي انتي
فجأة سمعته يذن الظهر
عمر بعصبية = خلاص .. خلصت الزيارة
قامت امي وحطت يدها على صدري
امي = لا خلاص بنسكت عنك
مها بعصبية = تطردنا ياللي ماني بقايلة
رفعت نظري لامي ولقيتها تطالعني بنظرات حزن وخوف
زفرت بضيق .. وش فيني شاب ضو اليوم
حطيت يدي على يد امي
عمر بضيق = لا تزعلين يمه .. والله ماقصدت ( والتفتت لجدي ) جدي لا تزعل مني مــ
وقاااطعتني امي
امي = خلاص ياوليدي ماحنا مضايقينك .. الله يرضى عليك
مها = طيب و انا ما استسمحت مني
عمر = اهاا بس
قام جدي وجا عندي ووقف بجنب امي
جدي = الله يصلحك ويهديك .. انا اسألك من خوفي عليك
ابتسمت .. وقلت اغير الموضوع
عمر = جدي انت شفت ابو بندر ؟
قطب جدي حواجبه مستغرب من سؤالي المفاجئ
جدي = لا .. امس ماشفته
عمر = ولا شفت رايد بالحارة .؟
جدي = رايد ؟ مو انت قلتلي انه عندك بالبيت ... ورحت معك عشان اشـ
قاطعته
عمر = رايد طلع من البيت من يوم دخلت المستشفى والى الحين مارجع
امي مستغرب = مين رايد ؟
التفتت لامي
عمر = اللي ساكن معي
جدي = لا ماشفته بحارتنا ابسأل عمه عنه واشوف .. هو مازارك ابد ؟
عمر = ايه
وسكتت ودي اقول لجدي يتصل على ابو بندر الحين ويطمني ... بس ما ابي ابين لهم اني مهتم مرة ... اخاف يضحكون علي مثل ماضحكوا علي الشباب
اخذوا شوي وطلعوا راجعين للبيت
اخذت جوالي و اتصلت على مشعل ولا رد ... اتصلت على مصعب ولا رد .. اتصلت على عبد الله ولا رد
رفعت حواجبي متنزفر وين ذلفوا هذولي
ابي اسألهم عن رايد .. ليش مايردون
افففففف .. مليت وانا بالمستشفى .. لازم اطلع
حطيت يدي على بطني بألم .. الدكتور مانعني عن الجلوس اسبوع كامل لين يلتئم الجرح على الاقل مبدئيا .. بس وش يصبرني اسبوع بالمستشفى
عناااد بهالدكتور ابحاول اجلس وامشي ... لو اسمع كلام هالدكاترة عز الله عفنت عندهم
جلست بصعوبة وببطئ على السرير .. شوي شوي نزلت من السرير ببطئ .. شوي شوي حاولت امشي داخل الغرفة وخارجها ادرب نفسي على شوي شوي .. الجرح اللي بفخذي متعبني ... مر عليها اكثر من اسبوع والى الان الجرح بفخذي ما التئم .. بسبب نايف وهوشاتي معه عادوا خياطتها ثلاث مرات ... يارب ما اتهاوش مع احد وتبرا ... تعبت وانا اعرج
العصر الساعه 4
منسدح على سريري تعبان من الم بطني .. بكل حركة احس الجرح ببطني ينفك ...
= السلام عليكم
التفتت على مشعل ومنصور وعبد الله اللي دخلوا فجأة علي بدون ما انتبه
عمر = وعليكم السلام
وبعد السلام والتعليقات اللي اكثرها من عبد الله .. التفتت لمشعل
عمر = هيييييه انت واياه اتصل عليكم ليش ماتردون
مشعل = اتصلت وانا عندي اخر محاضرة .. بتورينا انك باجازة.. يقالك نسيت جدولنا الحين وشوله تتصل بهالوقت
وضحكوا علي
رفعت حواجبي .. صح نسيت
التفت عبد الله يكلم مشعل ويعلق علي
عبد الله = ناوي يقهرنا هههههههه
طنشت تعليق عبد الله
عمر = مشعل سألت عن رايد ؟
سكتوا كلهم شوي وبعدها تكلم منصور
منصور = تونا مرينا انا ومشعل وعبد الله على حارتكم
هزيت راسي احثه يكمل
عمر = ايه وبعدين
منصور = سألنا الولد اللي اسمه بندر .. ولد عم رايد .. يقول ان رايد اخر مرة جاهم يوم يكسر سيارة ابوه ( وهز اكتافه ) هذا كلام الولد
مشعل = ابوي علمني قبل يومين ان سيارة ابو بندر الجيب مكسورة واللي كسرها رايد ..
انفعلت منقهر منهم .. ماجابوا شي جديد
عمر = ماجبتوا شي جديد هذا كله اعرفه ... كل اللي تقولونه صار قبل ادخل المستشفى .. وقبل يختفي رايد ( وسكتت اطالعهم واحد واحد ) اللي ابي اعرفه رايد عند عمه الحين والا لا ؟
منصور = بندر يقول اخر مرة جاهــم يوم يكسر سيارتهم ... و سألناه رايد موجود قال لا
لفيت وجهي عنهم متضايق .. وينه اجل .. لا يكون راح للرياض .. لا يكون بيستقر هناك .. مابيه يروح لخواله يمكن يعجبه الوضع هناك وينساني
ليه انا حظي كذا .. الوحدة وراي وراي
مشعل = انا متأكد انه راح لخواله ؟
منصور = اظن خواله بالدمام صح ؟
مشعل = لا .. بالرياض
عبد الله = طيب وشلون نتاكد ؟
التفتت لعبد الله .. صح سؤال وجيه ... وشلون نتأكد ؟؟
عمر = طيب كيف نعرف اذا كان عند خواله والا لا ؟
وسكتنا نفكر
مشعل بتفكير = اممممم مافيه الا نسأل عمه
التفتت بسرعة لمشعل
عمر = لا .. فكنا من عمه ... هذا واحد كذوب
عبد الله = اجل نسأل بندر
التفت منصور على عبد الله
منصور = هذا بزر وش يعرفه ؟
مها
مافيه الا مها ... عمتي مها ... ابطلب منها تتصل على اخت رايد وتسأل خوالها عن رايد .. مافيه الا كذا
التفتت للشباب
عمر = خلاص .. خلوها علي .. ابقول لاهلي يسألون اخته .. او ناخذ رقم خواله من اخته واسألهم بنفسي
التفتوا الشباب لبعضهم يتبسمون وكل واحد ماسك ضحكته
انقهرت منهم .. ليه يضحكون علي اذا شافوني مهتم برايد
اشرت عليهم بسبابتي
عمر بعصبية = والله تضحكون والا ماتضحكون ماني راااد عليكم
وكأني قلت نكتة ... انفجروا ضحك
ربع ساعة وتفاجأت بزيارة الشيبان ( 4 من جيران جدي بالحارة ومنهم ابو مشعل وعم رايد ) يدخلون علي وجدي وعمي معهم ... وتفاجأت اكثر لما شفت عم رايد معهم
سلموا منصور وعبد الله ومشعل علي وطلعوا ... تمنيت اطلع معهم ... حسدتهم الصراحة ... ماجلسوا مثلي يسمعون النصايح و المواعظ من هالشيبان
استلموني .. ومابلسانهم الا ( هذي اخرتها و ماجا من هالشباب الا المتاعب ) .. ومن هالكلام .. وكأنهم يحشون راس جدي علي ...
وتحاشيت الخايس عم رايد وماسألته عن رايد ابد ... لانه اولا كذوب ثانا الشباب سألوا بندر وقال لهم انه مو موجود .. اجل وشوله اتعب نفسي و اسأل هالشايب الكذوب
الاربعاء .. الفجر
منسدح على سريري وماجايني نوم ... هذا ثالث يوم لي بالمستشفى ... احس بتطلع روحي من الملل ... ما اقدر اتحرك واجد وتعبت من السرير ومليت من المسشتفى
امس بعد ماطلعوا الشيبان من عندي ... مرني الدكتور وترجيته يكتبلي خروج .. بس ماش .. رافض وبقوة ... والسبب الاصابة تحتاج متابعة
وطوال الليل وانا نايم .. كنت ناوي اتصل على مها امس بس غلبني النوم ... مافيه الا انتظرها اذا جتني وقت الزيارة ... المشكلة كيف اطلب منها .. اقولها اتصلي على البنت .. اخاف تفهمني غلط .. عاد مها مايحتاج لسان طويل
وقت الزيارة
دخلوا علي امي وجدي وجدتي ... طالعتهم مستغرب ادور مها
عمر = وين مها ؟
امي بابتسامة = بنات عمك جن معي من عنيزة .. يقولن يبن يزورن مها و مدام اني رايحه لبريدة رايحة .. راحن معي
التفتت متضايق .. شي اكيد .. اخوات معاذ مايجي منهم خير... لولاهم كان زارتني مها وطلبت منها تتصل .. وش يصبرني الحين ... قلبي ماهو مرتاح لين اعرف رايد وينه
التفتت لجدي و طلبت منه يلح على الدكتور يخرجني .. رفض بالبداية بس لحيت عليه واقنعته وراح يكلم الدكتور
امي = وليه تبي تطلع الحين .. انت تعبان .. لازم ترتاح
عمر = ارتاح بالبيت .. مليت وانا هنا .. طفشت
قامت امي وحطت يدها على راسي وانحنت علي
امي = ابيك تصير عندي بالبيت بعنيزة .. ابي انتبهلك بنفسي واشوف احتياجاتك ( وابتسمت )
رفعت حواجبي متفاجأ من عرضها
انا اجلس ببيت عمي ... احس مكاني غلط .. خاصة ان شقة امي فوق و صغيرة ..
وفوق هذا امي حامل .. راح اتعبها بوجودي واصاباتي .. اعرج وقربة مشقوقة على قولت عبد الله .. و الدكتور معطيني حمية خاصة لمدة شهر
نزلت نظري لبطن امي بصمت ... انا ملاحظ كبر بطنها ... امي بنفسها تحتاج راحة ..
رفعت نظري لامي احاول ادور لها عذر يعفيني عن اجلس ببيتها
بس امي فهمت صمتي على انه موافقه
اعتدلت واقفة وهي مبتسمة برضى
امي = ابجيب من بيتك ملابس غيار وارسله مع مصعب العصر
تذكرت الدم اللي عند الباب الداخلي .. وماحبيت امي تشوفه .. و بيتي ماحد دخله الى الان واكيد كل شي على وضعه
عمر = لا يمه انا ابتصل على مصعب واقوله
امي بابتسامة = ليه ... انــ
وقاطعتها
عمر = انا اصلا ابي مصعب بحاجة
هزت امي راسها بايه والتفتت على جدتي تسولف معها
شوي ودخل جدي
جدي = خلاص قلت للدكتور يكتب لك خروج على مسؤوليتي
فرحت وقبل اتكلم
جدي = بس بشرط
اوووووه بدينا بالذل ..
عمر = فيها شروط بعد ؟
جدي = تجي عندي ببيتي لين تتحسن وبعدها عاد بكيفك
جدتي = ايه والله ياوليدي ياليت
التفتت لامي وانا ساكت
عارضت امي ووجهت كلامها لجدي
امي = بس انا قلتله يجي عندي بعنيزة .. انا ودي انه يكون عندي
التفت جدي لامي
جدي = بس يام عمر وشلون تبين ولدك يركب الدرج وهذي حالته .. ولدك تعبان والحركة ماهي زينه له
صح ماطرى علي العذر هذا قبل شوي
همست امي باقتناع
امي بهمس = ايه صح .. بيتي فوق ( وسكتت تفكر شوي ) خلاص ابستاذن من ابو معاذ واجي عندكم لين يطيب عمر
ابتسم جدي = الله يحييك
طالعتهم بصمت وانا اشوفهم يتفاوضون عشاني .. وابتسمت
العصر
جاني مصعب يزور بس على طول ارسلته لبيتي يجيب لي ملابس غيار .. نص ساعة ورجع ومد علي كيس
مصعب = جبت بنطلون وتي شيرت .. مدري يناسبك ؟
عمر = اللي يسمعك يقول انت اللي شاريه لي .. تراك جايبه من بيتي .. اكيد ماشريته انا الا انه مناسبني
واخذت الكيس منه ونزلت من السرير متوجه للحمام
مصعب = لا اقصد يعني غرفتك حوسه يالله يالله لقيت هذا
طنشته ودخلت الحمام
شوي وطلعت ولقيت مصعب جالس على السرير يحتريني
عمر = مارحت تكمل اجراءات الخروج ؟
مصعب = وليه انا اللي اكمل الاجراءات .. ليه مو انت .. مو انت دايم تقول مانت بحاجة احد ؟
وقفت بمكاني وانا اطالعه .. مسكها علي هذا .. كل شوي يعيدها علي
حطيت يدي على الجرح ببطني يوم حسيت بألم .. ورديت على مصعب بعناد
عمر = وانا صدق ماني محتاجك ... وآسفين غلطنا وطلبنا منك شي .. انا اللي راح اكمل الاجراءات .. انت خلك
اخذت اغراضي ( جوالي وبوكي والمفاتيح واوراق الموافقة من الدكتور ) وطلعت من الغرفة ومصعب يمشي بجنبي
انا بسبب رجلي والاصابة ببطني .. امشي ببطئ بالممرات واتساند على الجدار بتعب
ومصعب يمشي بجنبي وكلنا ساكتين ..لزقة مصعب هذا .. اذا كان مايبي يخدم وشوله جاي وناشب فيني
وقفت والتفتت لمصعب
عمر = خلاص رح لسيارتك .. اخلص اللي بيدي واجيك .. وشوله لاحقني ؟
مصعب = ماوراي شي
حطيت يدي على بطني لما حسيت بألم فظيع
غمضت عيوني .. احس الالم داخلي والمشي يتعبني بسرعة
مصعب = يعورك ؟
فتحت عيوني والتفتت لمعصب
عمر بعصبية = يا إما رح لسيارتك .. والا خلك ساكت
مصعب بعناد = ماني رايح لسيارتي وماني ساكت
سفهته وكملت امشي بممرات المستشفى الطويلة ..
ربع ساعة و خلصت الاجراءات وطلعنا من المستشفى وركبنا سيارة مصعب متوجهين لبيت جدي
وطوال الطريق ساكتين .. ولا واحد يكلم الثاني
تنهدت افكر بحالي ... والله حاله ... خاطوا الجرح اللي بفخذي للمرة الرابعه
وخاطوا الجرح اللي براسي للمرة الثانية
والحين بطني
صدق يعني صدق مليت .. صار جسمي كله خياطات
اعترف اني راعي هوشات وما ارتاح الا اذا رفعت ضغط احد بس عاد ماهو لهدرجة يرقع جسمي ورا بعض
طالعت الدريشة اللي بجنبي يوم تذكرت رايد
له ثلاث ايام مدري وينه .. وين راح ... اذا كان ماهو عند عمه .. وين يكون راح اجل ؟
معقول راح لخواله للرياض ... ودي اتأكد بس وشلون .. وشلون اقول لمها تكلم اخته .. لازم اخذها على جنب واقولها ...
مصعب = عمر
انتبهت على مصعب والتفتت له بصمت
التفت مصعب لي وبعدها طالع قدام وهو يسوق
مصعب = دايم ودي اسألك بس كل ماجيتك القاك معك احد ( والتفت لي ورجع يطالع قدام ) وش بينك وبين نايف ؟
قطبت حواجبي مستغرب من سؤاله
عمر = بيني وبين نايف ؟
مصعب = ايه .. الرجال طاعنك يعني ناويها ذبح .. واللي اعرفه انه يبي رايد مايبيك انت ... يوم اجيكم انت ورايد ببيتك علمني رايد انه يطارده .. واللي اعرفه انه انت ونايف بنفس الشلة وتسهرون بنفس الاستراحة .. وش اللي خلاه يقلب عليك وهو اصلا يبي رايد مايبيك انت ؟
التفتت للدريشة اللي بجنبي بدون ما ارد عليه
مصعب = ادري انك ماتدانيني ولا تداني معاذ .. ياخي لا تعتبرني ولد عمك .. اعتبرني خويك .. زميلك بالجامعة .. أي شي ... بس جاوبني تكفى
مارديت عليه اطالع السيارات بجنبي وساكت
مصعب بترجي = عمر ودي اعرف وش يبي هالكلب منكم .. تكفى رد علي
تنهدت ... رايد ماترك بيتي الا بسبب نايف ومضايقته لنا .. همست
عمر = مدري
مصعب = وش اللي ماتدري ... تكفى علمني وش اللي خلى هالكلب يطعنك ؟
طلعت بوكي من جيب بنطلوني وفتحتها وطلعت منها بطاقة عايلة رايد اتاملها .. ولا شعوريا فضفضت لمصعب
عمر = من كثر نايف مايضايق رايد وادافع عنه .. خلاه يعاف السكن معي ... وش ذنبي انا يتركني رايد ولا يزورني ... ( تنهدت وسندت ظهري على المرتبه وانا اطالع قدام بألم ) آآآه بعد ماتركتني امي قعدت بالبيت لحالي... وكل مادخلت .. اتخيل حركات وجنون ... بعدها سكن رايد معي وماكمل شهرين الا وهو تاركني .. بالضبط مثل ماتركني غيره .. سويت كل شي عشانه بس نايف ماكان يخلينا بحالنا .. كل شوي وهو ناط علينا ... هددنا باخت رايد وسكـتنا عنه ومابلغنا ... ياليتني ماسمعت كلام رايد وبلغت عليه .. كان ماتركني واختفى ... ماكنت ادري ان كل شي بـينقلب علي ... مدري وش استفدت الحين ... نايف حاول يذبحني ورايد تركني .... و ما الخاسر الا انا ( واخذت نفس احاول اهدي نفسي وكملت ).. كنا تونا جايين انا ورايد من برا ولقينا نايف يحترينا عند الباب .. الكلب يشوف رايد ماله احد ومستقوي عليه ... جانا يلهث يبي رايد يعطيه فلوس .. ( وابتسمت بسخرية ) هه يشوفه بزر ويخاف منه ولا يقواه قال خلني العب عليه ... وعشان انهي هالمهزلة كذبت على نايف وقلت انا اللي بلغت الهيئة مب رايد ... ثار نايف وزعل وعصب ... بس وقتها ماهتميت .... ماكنت متوقع انها بتوصل لهالدرجة .. ( نزلت نظري للبطاقة وابتسمت بسخرية ) هه والحين شف .. واحد يطعني والثاني يتركني ولا يزورني
مصعب = صح رايد غلطان بس كأني اشوفه قدامي .. مايدري وين يودي وجهه منك ..
قعدت اطالع البطاقة بين يدي واتأمل الاسماء فيها
مريم
رايد
دانة
بالذات اسم رايد ... اللي حسسني بمعنى الاخوة وراح ..
تاريخ ميلاده .. مكان الميلاد .. سجله المدني ... اصغر مني بست سنوات
اربع شهور او اكثر وهو قدامي .. من يوم كنا بالاستراحة الين دخلته بيتي وهو معي وناكل بصحن واحد وننام بنفس الغرفة ... يوم بديت اتعود عليه يرجّعني للوحدة مرة ثانية ...
= من بطاقته هذي ؟
انتبهت من سرحاني على سؤال مصعب
مصعب = اشوف ( ومد يده وهو يسوق يعني عطني البطاقة )
دفعت يده بعيد عني
عمر = لا
ودخلت البطاقة ببوكي ودخلتها بجيب بنطلوني عنه
مصعب = ليه لا طيب .. ماني ماكلها ياخي
التفتت للدريشة بجنبي وسفهته
مصعب = مدري على وش تكرهني ؟ ما اذكر اني سويت لك شي ؟
تنهدت بألم وسكت مالي نفس ارد عليه
حظي النحس يكرهني بكل الناس
لا ابو شفته بحياتي ... ولا ام تتحمل معي معاناتي .. ولا اخوان ولا اخوات ... حتى الشخص الوحيد اللي اعتبرته اخوي تركني لأتفه سبب .. لو انا اللي مضايقه قلنا معذور بس مب انا .. وش ذنبي .... ليه مايصير لي مثل مصعب ومعاذ .. اخوان
حى لو بأخو مستعار
وصلنا الحارة ونزل مصعب وحاولت انزل بحذر عشان الخياطة
وانا احاول انزل وقف مصعب عند بابي ..
مصعب = امك تراها هنا
نزلت من السيارة ووقفت قباله
عمر = ادري
ولان مصعب واقف مباشرة قدام باب الراكب دفعته شوي على ورا عشان اقدر اسكر باب السيارة
مصعب = تبيني اجيب سيارتك .. اقصد سيارة معاذ ؟
عمر = ايه هاتها
مصعب بابتسامة = طيب وسيارتك متى اجيبها ... الصراحة اشوفك زودتها مع معاذ
طالعته شوي
عمر = مر الورشة وشف اذا خلصوا منها والا لا .. وعطني خبر
طير مصعب حواجبي
مصعب = افهم انها يعني ماخلصت .. معقول ؟
سكتت ... انا قايل للتركي ياخذ راحته على الاخر ويبدّي أي سيارة بعدي .. ان شاء الله انها ماخلصت الى الحين
فجأة حسيت بشي يجر بنطلوني من تحت وصوت صغير ينادي
= هيييييه هييييه
نزلت نظري للارض مستغرب ... وشفت دانة ماسكه بنطلوني من تحت بيدها الصغيرة وتجره عشان انتبهلها وتطالعني بعيون بريئة وعلى وجهها احلى ابتسامة وصديقتها اللي دايم معها وراها
ابتسمت بفرح وغصب عني ضحكت
عمر = ههههههههه دانه
رفعت دانه يدها يقالها بتصافحني
ضحكت اكثر ... ومسكت يدها الصغيرة
حاولت انحني واشيلها بس ماقدرت بسبب الاصابة والتفتت لمصعب
عمر = مصعب شيلها تكفى ووقفها على كبوت سيارتك .. ودي اسلم عليها
ضحك مصعب .. وشالها وحطها مثل ما قلت
مصعب = تقولك هييييه .. الحرمة جايه تسلم ههههههه
ضحكت مستانس ... عرفتني .. وجت خصيص لي .. احس قلبي يرفرف من الوناسة
وقفت قدام الكبوت ودانة واقفة عليه .. ولفيت ذراعي حوليها وضميتها
عمر = احلى هييه سمعته بحياتي ( وابعدتها عني اطالعها واتأملها .. ابعدت شعرها الحوسة بيدي عن وجهها وسلمت على خدها وخدها الثاني وقربت وجهي من وجهها وهمست ) قولي عمر
دانة = عمل
ضحكت مستمتع بنطقها لاسمي .. والتفتت لمصعب اللي واقف بجنبي
عمر بفرح = توني ادري ان اسمي حلو هههههههه
ابتسم مصعب بدون ما يرد
التفتت لدانة وضميتها مرة ثانية ... شكلها اخذت علي لاني دايم اكلمها واشتري لا من الدكان ... توني ادري ان كم ريال بيحبب البنت فيني .. ابشجعها وارغبها .. خلاص من اليوم وطالع كل ماشفتها ابوديها للدكان
اخذت شوي وابعدتها عني وانتبهت على بنطلونها البني .. وتصنمت بمكاني وانا اطالع بنطلونها
تذكرت .. بنطلونها هذا نفس بنطلونها يوم كان رايد يراسل اخته ويرسله مع دانه ... ايه ( طالعت احدى جيوب بنطلونها ولا شعوريا دخلت اصبعي باحد جيوبها الصغيرة يمكن القى ورقة من رسايل رايد منسية هنا )
فاضي ... دخلت ابعي بالجيب الثاني ونفس الشي فاضي .. اخذت نفس والتفتت على ورا اشوف بيت عمها ابو بندر ... كيف فاتت عن بالي هذي
ليه ما اسوي نفس الطريقة واراسل مريم اسألها عن رايد ... هزيت راسي اطرد الفكرة عن بالي .. لا لا ..
مصعب مستغرب = عمر وش فيك ؟
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك