رواية انا الضحية وانا الجلاد -38
تركي: زين ... بس أبي هاللي شايف نفسه... وعلى باله ما ينرد...
أبيه يحفظ لسانه ويحترم اللي قدامه...
ويعرف إن قال كلمه يتحمل نتيجته...
فيصل: أبد...تاب ما عاد ينتقص منك...
بس فكنا من هالسالفة... والله مايصير...
تركي: طيب...يصير خير...
***********
"في القصيم"
_مزرعة الخال عبدالرحمن_
يمسك خالد بيد نجود ويسير بها بأنحاء المزرعة
خالد: شوفي هذا الغريس أنا غارسه....
نجود: تعرف!!؟
خالد:ههههههههههههه
هو... !!!
وليش ما أعرف!!
أنا راعي فلايح أباً عن جد...
شوفي... هالنخل اللي هناك... بعد كم شهر إن شاء الله تدخل ذهب...
سكري يحبه قلبتس على كيف كيفتس...مبالدنيا كله مثل سكري القصيم..
نجود: ماشاء الله عليك...كلش تعرفه...
على إن جدي وعمي ناصر كانوا عايشين بفلاحة... بس أهلي ما يسون شي هم ...
بمزرعتنا العمال هم اللي يزرعون...
خالد يلتفت على نجود ويطوقها هامساً_:
النخله حبيبة... دلوعة ... مثلتس...لازم أراعيه بنفسي يوم بيوم ... لحظة بلحظة
نجود_تقطب حاجبيها وتخفي إبتسامتها_: خلودي أنا دلوعه!!
خالد: ياروح خلودي... قوليه ثانية!!
نجود: لا.... أنا مو دلوعه...
خالد: يا قلبي على الدلع....
نجود_بخجل_: أوووووووه خالد ترا أبزعل لا تقول دلوعه...
خالد: لالا.... دلوعتي زعول بعد...
نجود: خااااااااالد...
أنت اللي مدلعن ولا أنا....سنعه...
خالد_يمسك وجهها ويرفعه قائلاً_:
يا بختي من قدي...حبيبتي دلوعه...وسنعة...
نجود: خالد لا أحد يجي... وخر شوي...
خالد_يقترب أكثر_: وإذا ما وخرت!!
نجود: أبزعل...
خالد: ههههههههه إلا زعل نجيده من يقوى عليه...._يبتعد_هه وخرنا...
نجود_تحاول أن ترفع قدمها , فتظهر علامات الإمتعاض على وجهها_: خالد.... !!!
خالد: لبيه...
نجود:الصندل...غاص بالطين... شسوي...؟
خالد:هههههههههه.... ما يبي له...إمشي حافيه...
ولامن وصلنا بيت المزرعة غسليه...
نجود: لا!!!!
شلون أمشي حافيه... أخاف تبطن شوكة!!
خالد: بسيطه... أشيلتس للبيت.... أرفعي إيدينتس...يالله ..._ويمد يديه_
نجود: هـــــــــــــــــــــــــــو!!
خالد: وسعي صدرتس مابوه إلا عمال... وعيال أخوي...
نجود: البلاء من عيال أخوك... والله إن يمسكونه عياره...
خالد: وخلي الدنيا كله تمسكه عياره... بس ما تبط حبيبتي ودلوعتي الشوكة...
نجود: أووووووووووه خلودي....
**********
"الجزء الثاني والأربعين"
"في الصالة"
أفنان وعذبة يتحدثن بصوت عالي, نجلاء ونورة تتجادلان على الجلوس في الأريكة المقابلة للتلفزيون, بينما مها تتابع البرنامج , الذي على صوته..
عذبة: ليلى... جوالتس يرن...وه ما ينسمع من الإزعاج...
_تأخذ ليلى الجوال وترد.. ولكنها لم تستطع أن تسمع شيئاً فتخرج وعند الباب قابلت نواعم_
ليلى: هلا نواعم...
نواعم: وين نجلاء؟
ليلى_تشير للداخل وهي تتحدث بالجوال_: هلا والله إيه.. أرسلت العمل..
من شوي... تو طالعين البنات...
_تدخل نواعم فتسلم وتجلس بجانب نجلاء_
نجلاء: حيا الله نعنع...
نواعم: ههههه لا حبق أحسن!!
نجلاء: مير صبن شاهي منعنع لنعنع....
_تلتفت نجلاء على نواعم قائلة_:
زين نواعم ربي جابتس...
أبقولتس...
أنا ...
ما أبي أتزوج الحين... وتركي... مارديته لعيب بوه...
بس تعرفين وجعت راسي السالفة...
وتصيعبته... وما أبي لا تركي ولا مجيد...
_تبتسم نواعم قائله_:
مهو للسبب هذا جيت...زين جت منك
إن تركي يوم عرف بخطبه مجيد نفس الشيء تصيعب الموضوع...
نورة: رجل!!
نجلاء: توتس تدرين!!
نورة: إيه.....
نواعم: الله يسامحك اخوي رجل من زمان...
عذبة: وش عندكن؟
نجلاء: إيه بدت الرادارات تشتغل... سكتن يوم سمعن بسالفتن مجحودة...
أفنان: لا حبيبتي حنا نسمع بدون ما نسكت...
ما تبينهم كلهم... مبروك... رميتي الهم اللي على صدرك..
نورة: أصلاً هي بزر.... ولا بوه وحده تعرس بالثانوي... ثاني ثنوي... لعب بزران ذا..
نجلاء: والله ما أسرع ما إنقلب الكلام!!
نورة: لكل دولة رجال ...
ولكل وضع كلام... مادامت منتب معرسه... أبلعمتس الحقيقة...
أهم شي ما تاخذين أبو التواريك....
نواعم: وش فيه أخوي...
نورة: ولا شي... بس يحب يتطنز شوي...
يبي له ربط لسان ويغدي ما مثله...
مها: الحين كلهم ما تبينهم!!
نورة: إيه من كثر خطابه بارت!!
نجلاء: وجع يالخرتيت !!
ما برت...
تشوفين منهي اللي بتبور....
نورة: لا... أنا أوب بايرة... بيجي الفارس يخطفني على فرس أبيض...
نجلاء: ما يقواتس!!
نورة: هين... أوريتس يا العصلاء... بيقوان...
وشرطي على اللي بياخذن إنه يزمن... ويرقابي الدرج بعد..
وش حيت الفلم.. يرقى به الدرج وأنا لا!!
نواعم: أقول غني يا ليل ما أطولك....
*********
لندن بعد شهرين_
يجلس فيصل في أحد المقاهي, يرشف القهوة ويتأمل ما حوله, بدى غارقاً في تفكير عميق قطعه عليه رنين جواله...
ينظر للرقم فيرد بسرعة...هلا ...!!
ليلى: السلام عليكم...
فيصل: وعليكم السلام ...
ليلى: شخبارك فيصل..؟
فيصل: تمام التمام... أنتم شخباركم... شخبار نجلاء والبنات؟
ليلى: تمام... فيصل أنت عارف ليش أنا متصله...
فيصل: ههههه... والله كني شوي... وش عندتس؟
ليلى: أبي أسألك ... أنت طبعاً عارف إن عبدالعزيز خطبني...
و..........و......أبسألك عنـ.... أوه ما أدري شقول...
فيصل: وش تقولين يعني... عبدالعزيز عشت معه سنتين...
تبين تسألين عن أي شي أنا مستعد أجاوبتس وش بتعرفين عنه؟
ليلى: متفهم....؟
فيصل_يقطب جبينه_: متفهم!!
إيه عزوز عاقل.. ثقيل... وتعرفين بعد مب صغير... معدي الثلاث و الثلاثين من وقت...
العمر له دور إنه يعقل الواحد زود ماهوب عاقل...
بس ترااااو ثقيل مرة...بيكون صعب التعامل معه بأول الأمر بعدين بتتعودين عليه...
تراو مب خبل زي مجيد والسلمي... لا تحسبينه زي إخوانه...
و....
ليلى_تقاطعه_: فيصل... مو هذا قصدي...
فيصل: أجل وش قصدتس؟
ليلى: أنا .... أبيه ومرتاحه له... وعذبة بعد شجعتني عليه ....بس...
أخااااااااااااااااااااااف...
فيصل: تخافين!!
تخافين تتطلقين مرة ثانية يعني...؟
ليلى: فيصل... أبقولك شي... بس الله يخليك لا تعصب...
أنت لازم تفهم الموضوع كامل...
فيصل: يالله هذاي أسمع.....
ليلى: فيصل... أنا...أنا تزوجت مؤيد.... عشان..عشاني كنت أحبه...كان فيه علاقة بيننا قبل الزواج... و....وهذا اللي دمر زواجنا واللي خلاه يشك بي...
أخاف...أخاف عزوز يعرف بالسالفة...
ويطلقن بعدين... وخصوصا إن ما يعرف بالموضوع إلا خواتي وعمتي
ونورة ومجيد وتركي وخالي...بس...
ما أدري أقوله ... ولا أخلي نورة تقول له... ولا... ما أدري...
فيصل: ليلى.... الشرع ما يحاسب الناس على ماضيهم...وأغلاطهم اللي تابوا عنه...
والله لا يكلف نفساً إلا وسعها... وإذا بتحطين هالفكرة براستس...عمرتس ماراح تتزوجين... توكلي على الله... وعزوز.. ولا غيره... أنتي ما خنتيه...
هالعلاقة إنتهت قبل لا يصير بينكم شي... ومؤيد تزوجتس...
ليش قاعده الحين تسوين نفستس غلطانه...
أنتي غلطتي غلطه... نلتي جزاه... وخلاص...يكفي جلد الذات..
ومسألة تقولين لعزوز السالفة.... مالتس مصلحة...
مثل ما قلت... اللي صار صار قبل لايخطب...
وأسرع طريق لفشل الزواج .... معرفة الزوجين لماضي بعضهم العاطفي...
لا تقولين له... ومحد بيقول له... ومجيد هو اللي مقنعه يتزوجتس...
ونورة تعرفينه ما ينعرف اللي وراه ودونه... وتروك ماله مصلحه..
من بقى خايفة منه... خالتس ولا خواتس!!
ليلى: بس أخاف!!
فيصل: أنتي ليلى اليوم... مثله مطلقة... مجتهده.. رسامه ونافعتن مجتمعتس....
حلوة ومتعلمه...طيبة ومثقفة بنت أصل وفصل...
وش يبي عزوز أكثر من كذا!!
أنتي ألف من يتمناتس.... وصدقين أكيد عند عزوز أشياء ماراح يقوله لتس..
مب سوء بوه..بس مالتس مصلحه به ولا يلحقتس مضرة منه ..
يعني مثلتس... فلا تخافين... وإرمي كل شي صار بينتس وبين مؤيد ورا ظهرتس وإنسيه...
ليلى: الله يجزاك خير... ريحتني....الله يخليك لنا... بس ما تبيني أوصل سلامك لعذبة؟
فيصل: لا.... لو أبسلم على عذبة دقيت على جواله...
ليلى: سبحان الله أنت وياه ... وجهين لعمله وحده...
فيصل: بنت عمي ...كلش وارد...
*********
"في الصالة"
تتمدد عذبة على الأريكة وتتمدد نجلاء على الأريكة الأخرى مقترنتي الرأسين, ناصر مسنداً ظهره على الأريكه وممداً ساقيه فوق وسادة ضخمة, يقرأ مجلة أطفال...
نجلاء: عذبة... أمس ... شفت مجيد...
عذبة:هه أنا كل يوم أشوفه...
نجلاء: لا تميلغين علي عاد...
عذبة: طيب قال شي؟
نجلاء:ههههههه ما شافن... أنا كنت بالسيارة... ونورة نزلت عند باب بيتهم وهو كان بالحديقة يشرب شاهي... كان مشغول مرة... تخيلي طالع بالحديقة عليه سروال سنه... ما لبس ثوب... ومنحنى على أوراق كومه... أكيد الشغل شاد هاليومين...ولا؟
ناصر: نجلاء.....
نجلاء:هاه...
ناصر: قولي سم!!
نجلاء: إخس يالبزران!!
ناصر: أنا مب بزر... أنا بأولى ..قالوا لتس أنا بالتمهيدي عشان تقولين بزر...
نجلاء:إخس على هالحتسي...ما بلانا إلا مقابل هالطحوش... وش تبي...؟
ناصر: قولي سم أول...
نجلاء: لا..مر أقولك سم ... قالوا لك سعود ولا ماجد.. ولا خلف يا خلف عيني!!
ناصر: منهو خلف هذا!!
هع.... أستاد القراءة حقنا أسمه خلف... شيطاني ما أحبه...
نجلاء: خلف أبوي!!
ناصر: لا... أبونا ماجد...
عذبة: ناصر حبيبي... خلف أبوه... وحنا أبونا ماجد...
نجلاء: شلون تصير أختنا وأبوه خلف.. لازم يصير أبوه ماجد...ودي أشوف ماجد .... ما عمري شفته....
نجلاء: أنا أبوي خلف... وأنت أبوك ماجد.. وفكنا!!
ناصر: أجل ليش تعيشين ببيتنا إذا صار أبوتس غيرنا!!
روحي عيشي عند خلف...
عذبة:ناصر!!
نجلاء: أجل ليش تعيش ببيت فهد ومهوب أبوك فهد!!
ناصر: فهد أبوي ثاني...
نجلاء: وماجد أبوي ثاني!!
ناصر: إيه بس أهم شي أبوتس ماجد...
عذبة: وش تبي بنجلاء؟
ناصر: أوب قايلن له...زعلت.... ليش ما تقول لي سم!!
نجلاء: طققن رامض وعبدن حامض!!
تقلع يالله... قم يالبصوه ... بزران آخر زمن..
عذبة:هههههههههههههه
ناصر: أصلاً من زينتس...أبروح مع أحمد... بيوديه مجيد للشغل حقه..
عذبة: إيه رح معه.... بعدين... إذا صرت رجل بتشتغل هناك..
ناصر: لا... أنا بصير معلم فنيه...
نجلاء: أمحق طموح.... إيه حضري!!
عذبة: نجلوه!!!
تبينه يصير عسكري عشان يرقى لطموح بدوي!!
نجلاء: ههههههههههه
أقلد عمااااااااااااني لا تزعلين.... it is just jock !!
عذبة: خلاص رح... بس لا تبلش بمجيد...
ناصر: إذا أبلشت بوه قنع راسي....
نجلاء: يخسى!!
عذبة: إلا تستاهل ليش تبلش بوه...
_يقوم ناصر ويرمي المجله على نجلاء ويسير خارجاً_
نجلاء: وجع!!!
ناصر: read a book
أعرف إنقليزي إوب بس أنتي...مع السلامة..
عذبة:هههههههههههههههههههه
نجلاء: مبسوطه!!
عذبة: إيه أخوي خفيف دم..
نجلاء: قالوا لتس خف دم سعود
عذبة: الحق ينقال.... سعود شقي بس ما كان راعي دعابة..
نجلاء: لا اللي راعي دعابة مشاري هاه!!
عذبة: هو!!
نجلاء... و ش مناسبة هالكلام!!
وبعدين ترا مشاري خفيف دم... يقول الكلمه تضحكين عليه شهر...
نجلاء: هه هه هه .... ما من ورا تدربيه خف دم... مير الحب يعمي البصيرة...
عذبة: إلا على طاري الحب... كملي سالفتس أنتي ومجيد...وش صار؟
نجلاء: ما صار شي.. بس ناحف..ناحف مرة...
عذبة_تنظر لنجلاء بشقاوة_: إيه بس هو اللي ناحف!!
نجلاء: هاااااااااه أنا أسوي تمارين قاسيه هاليومين... آ.. آنت تشوفينن .عذبة..!!
عذبة:هههههههههههههههههههه
_ترتمي ليلى بسرعه على الأرض بين الأريكتين..وتصرخ_:
كلمته ...كلمته...
نجلاء: بسم الله... منهو عزوز!!
ليلى: لاااااااااااااااا توبه أكلم أحد ... قبل الملكة.... كلمت فيصل...
عذبة_تمط شفتيها_: وش قال المملوح؟
اكيد بيقول خوذيه وما مثله...
نجلاء: قلتي له سالفه مؤيد؟
عذبة: خبله.. لو قلتي له... بيجي الحين يموتس!!
ليلى: قلت له _تضع خصلات شعرها خلف إذنيها_ وش توقعون قال؟
عذبة: أتوقع ... الحين قاضبن مجيد تهزئ... ليش ما قال له..
و.....
نجلاء: وه... إسكتي... خليه تكمل أنا ما بقى بي حيل... وش قال..؟
ليلى_تبتسم_: قال لي ... هذي غلطه وأخذتي جزاه... ولا تقولين لعزوز شي..
عذبة_ترمش بعينيها مستغربه_: يعني ما هاوش... ما زعل!!
ليلى_تهز رأسها_: لالالا.... بالعكس.... كان كأنه عارف بالسالفة من زمان... ورايحه حرته... يمكن أحد قايلن له.. بس مين؟
نجلاء: أصلاً.. أنا أقولكم فيصل تغير عقب ما راح هناك...
مرة تغير ما صار يغار زي أول..... تخيلي ... ذاك اليوم يوم يجي قبل إسبوعين..
طلعت نورة ونواعم... وأنا كنت معهن... ولا جينا إلا الساع ثنتين..مع سواق نواعم
شفت فيصل عند الباب بغيت أنزل للبيت مشي من الخوف... بس مرينا من عنده ما قال ولا كلمه..
عذبة: ما شاء الله!!
ما قالتس شي... !!
إلا حمار... وهيس أربد وماعنده غيرة...ليش ما صفقتس لمين تعضين الأرض!!
ليش ما جيتي إلا ثنتين!!
نجلاء: هاااااااااااااااااااااااااااااااااااااااااااه.... كنت...
عذبة: يعني كود ما أسافر... ليلوه يالتبنه.. ليش مخليته على كيفه!!
ليلى: هاه... كنت نايمه..._تنظر ليلى لنجلاء بغضب_... أنا آسفه..
عذبة: يا نجلاء أنا أخاف عليتس... يعني لو كنتن مع فيصل مع تركي مجيد سلمان أي أحد ... بس سواق..لا... وش يفككن لامن وقفه أحد!!
ليلى_تضع يدها بين وجهي نجلاء وعذبة_: لا تهاوشون...إسمعوا الطامه الكبرى!!
عذبة: وش بعد!!
ليلى: من اللي ورا الخطبه كله؟
نجلاء: أمه... خالتي أم عبدالعزيز تحب الزين والطول!!
عذبة: مين؟
ليلى_تضحك_: مجيد....مجيد البثر!!
نجلاء:!!!!!!!!!!!!!!!!!!!!!!!!!!!!!!
عذبة: غريبة... أحسه للحين حاقد عليتس... بس مجيد رجل_وتنظر بطرف عينها لنجلاء_ و يبدي مصلحتس على كلش...
نجلاء: غرررررررريبه... بس ترا نورة بعد... بعدي هالبنت تفر بلد.. وقاعدتن تجدع على إذنه إنتس حلوة وبيضاء وصايرتن وش حليلتس... أهم شي صايرتن وش حليلتس... لأنه ما كانت تطيقتس بعيشة ربي...
ليلى: أدري!!
عارفين كنت مو متوقعه إن نورة ومجيد وتروك ينسون لي اللي صار...
طعنتهم بشرفهم ... والحين يخطبون لي ولدهم...
فعلاً هم أهلنا... وماضيعنا ربي يوم خلاهم لنا...
نجلاء: تتوقعين منى وش بتسوي؟
عذبة_تبتسم_: بتموووووووووووت... خليه.. دريتي... ساكنه هي وضرته بعمارة وحده!!
نجلاء: مبسوطه؟
عذبة: أكذب عليتس إن قلت لتس لا....
بس أحسه للحين مجروحه من أنا وأمي وسعود...
دايم تدق بالكلام... وللحين هي عاجبه عزوز...
ليلى: يمه... أخاف إن طلقه رجله تجي على راسي!!
عذبة: هههه لالا... تطمني عزوز عايفه.. أصلاً عاف الديرة كله عقبه وهج برا...
ثمان سنين بعيد... كله عشان يهج عن طاريه بس...
نجلاء: عذوب.. ليش هي منقهرة منكم؟
عذبة: يوم تشوفه أم عبدالعزيز إنهبلت عنده... وقالت لأمي أبيه لعبدالعزيز..
أمي عارفتن طبعه... قشرا وشرانيه... وما تراعي لا كبير ولا صغير...
وبس تبي فلوس وطلعات والأهم من هذا إنه ما كانت تحافظ على صلاته مرة...
نجلاء:
طيب وش يدري أمي عنه؟!
طول عمرنا برا!!
وحتى يوم تتزوج ..مالنا وقت جايين للسعودية!!
عذبة: يوم كنا نجتمع ببيت خالي راشد!!
نسيتي نقعد بالشهر وزود.. وتشوفه أمي...
ليلى: طيب ... وش صار بالضبط؟
عذبة: أمي الله يرحمه قالت لأم عبدالعزيز ترا البنت ما تصلح لعبدالعزيز...
أمي ما تبي تتفشل منه بحمولته!!
بس أم عبدالعزيز ركبت راسه.. طبعاً أمي ما قالت له ليش..بس نصحته..
حتى قالت لي وقلت لنجود... ونجود كلمت أبوه... وسعود بعد قال لعبدالعزيز...
عبدالعزيز أصلاً ما يعرفه ولا شي فقال خلاص أبنسحب عقب كلام سعود له..
لكن أمه وأبوه ركبوا روسهم... وصار العرس...
نجلاء: كان عزوز إنسحب قبل العرس وصار رجل... مو بعدين...
ليلى: نجلاء.. عزوز ماتركه عشان الكلام .. عزوز عافه...تدرين شلون عافه!!
نجلاء: شلون عافه... دايم أسمع العجز يقولنه...
عذبة: سبحان مثل الحديث اللي يقول ما أدري بالضبط نصه بس فيما معناه إن الأرواح جنود مجندة ما تأالف منها إئتلف وما تخالف منها إختلف..
يعني غصبن عليه.. مو أحيانا تحسين نفستس ما تتقبلين ناس أبد أبد لو إيش ما صار وتلاقينهم ما سووا لتس شي.. بس غصب عليتس تكرهينهم..
ليلى: لاااااا عذوب.. مب بين الناس.. العياف يصير بين الزوجين... يعني من أول ما تدخل عليه أو يدخل عليها يكرهها... أو تكرهه... عشان كذا إنشرعت شوفة السنه..
عذبة: يا ملحتس.. أنا أوضح له الفكرة العامه حقت الحديث بعدين أبقول كلامتس الخطير...
نجلاء: هــــــــــــــــــــــــــــو!!
أجل لامن خطبن أحد خلوه يشوفن وأشوفه..
ليلى: حنا عادي بس.. أخاف إن أهلتس يعيون!!
نجلاء: وه... روحي بس عمي ضاري حليل... وهو أهلي ...
عذبة: والله مب شكله حليل عيونه تخوف...
ليلى: بسم الله وش شوفك إياه!!
عذبة: هههه.. شفته... وبس..
نجلاء: أيا العوبا تشوفين عمي!!
قط أنتي عشقتيه!!
عذبة: هـــــــــو!!
نجلاء إنهبلتي.. من زينه!!
نجلاء: ههههه .. أقلد هيا أم لسانين...
ليلى: مرت عمتس؟
نجلاء: وع يا ملغه... إيه كملي سالفه منى بسرعة... أبي الحمام...
ليلى: الله يقرفك قومي إنقلعي للحمام...
لا تسوينه زي ذيك المرة .. يوم شفتي مساعد!!
عذبة: أخو فهد ..رجل مها!!
نجلاء: كولي تبن..كولي تبن..
خلاص آآآآآآآآآآآآآآآآآآآ ما أبي أتذكر...
ما أبي حمام خلاص... كملي السالفه..
عذبة: إيه بس تراتس بتقولين لي السالفه كله...
نجلاء: وعععععع ... ما أبي أتذكر...
ليلى: إبداع... هجينا وخلينا الشغالة تنظف المكان..ههههههه
نجلاء: ليلوووووووووه_وتمسك بشعرها_وبعدين معتس!!
عذبة: ههههههههههههه.... أمنه شغالة أمي عذبة حاقده عليكم...
نجلاء: كملي السالفة ما عليتس منه!!
عذبة: إيه... بعد ما عافه عزوز.. ما أدري منين وصله الخبر إن حنا كنا مانبيهم لبعض... هي فهمت إن أمي هي السبب وإنه تبي عزوز لي ولا لليلى...
وحقدت من ذيك المرة...
نجلاء: وع من زينه أمي تحط عينه عليه... طحش كبر قريح!!
ليلى: نجلاء... الرجال ما يضره كبره!!
عذبة: أحلى بدينا بالمدافع!!
نجلاء: وخري بس... شكل البنت خاقه... هو أنتي شفتي مليح الحلايا!!
ليلى: أعرفه... إذا جاء دايم يحوس بالحديقه...
عذبة: الله يعينتس عليه..تراو بيتوتي...
نجلاء: وخروا!!...وخروا!!.... رجعنا لفلسفة عذبة.... بيتوتي!!
ههههههههههههههههههه
عذبة_بغضب_: يعني راعي قعدة بالبيت... بتطفش منه!!
***********
"في غرفة نورة"
نورة تسمع أمسيه شعريه للأمير عبدالرحمن بن مساعد بالمذياع, وتكتب أبيات القصيدة:
عـلى مـدى الايام .. كان البحر بالنسبه لي
هـــــــــو الـــبـــحــر
رمــــــل .. امــواج..صــخـر
كـان الـبحر بـالنسبه لـي بـس الـبحر
وعـلى مدى الايام ماقد لمس فيني المشاعر
الا ذاك الـيـوم.. يــوم انــك مـعـي
يــومــهـا كــــان الــــوداع
وكـان الـبحر دفـتر والموج بيت من شعر
وبـيـتٍ ورا بـيت ومـوجه ورا مـوجه
تــكــتـب قــصـيـده حــبـنـا
وتــمـحـي الــجــراح بــجـراح
ومـثل الـفرح فـي دنـيتي كـان الـفجر
عمره قصير .. وبكل حب هدأ نسيمه وراح
وتـشرق الـشمس ..لجل الخلايق كلها تقرا
قـــصـــيــده حـــبـــنــا
ويـومـها مـاكـان لـلـشمس أي نـور
وبــعـض الـسـبب كــان الــوداع
وباقي السبب انتي خذيتي .. من سماها النور
ولـجل الصدق .. يومها كنتي انتي الشمس
وكان البحر عينك .. ودموعك امواج الشعر
وخــــــــدك الـــدفـــتــر
آه يـالـقى مـاخذت مـن طـبع الـبحر
..مــالــلــبـحـر آخـــــــر
آه يـالفراق .. مـاخذت مـن ذوق الـفجر
يـــمـــرنــا عــــابــــر
وآه يـالـعيون الـى انـا مـنها عـرفت
ان الـبـحر دفـتر وان الـقصيد امـواج
وان الــــغـــرام شـــاعـــر
"نورة" صوت يأتي من خلفها , فتفز وترمي بالقلم: بسم الله!!
مجيدوه يا .. يا حلو... متى دخلت وكيف وصلت؟
وشلون؟ .. جني أنت!!
_يبتسم عبدالمجيد إبتسامه باهته_:
دخلت وأنتي غارقة بالبحر....
نورة: ما سمعتك...
عبدالمجيد: قلت لتس غارقة بالبحر... نورة ليش تحبين تكتبين القصايد؟
نورة: إمممممم... أحبهن... أحب لمن أفتح دفتر الغثة أبلا عبير أفتح نفسي بقصيده...
عبدالمجيد: يعني أنتي مب للحين تحبين راعي البحر؟
نورة:هه..منهو.. إيه..ذيك السالفه..لالا.. بس أحب أكتب القصايد..بس...
عبدالمجيد: عطي شوي من هالرومانسيه لنجلاء...
خليه تحس بقلبه شوي...
نورة: لو أبعطي رومانسيه عطيت نجود... رجله قمه في الرومانسيه وهي من جنبه تحبه بس ما تعرف تقوله بأسلوب...هذي مصيبه الحاسب حتى المشاعر صارت أتوماتيك..
عبدالمجيد:ههههه... خلي الناس بحاله..
نورة: بعدين من قالك إن الرومانسيه إنك تقرا شعر غزل ...
عبدالمجيد: هه.. كان فيصل هو الوحيد بيننا اللي يحب الشعر..
كان دايم يشري دواوين خالد الفيصل...
و سعود إذا لقى شي لبدر بن عبدالمحسن أخذه لعذبة...
وأنا ما أحب الشعر ولا شي..
حد ما إبتليت بالحب...
نورة: إخس... وصرت تجمع قصايد....؟
عبدالمجيد: لا.... بس صرت لامن سمعت القصيده حفظته من أول مرة...
نورة: حالتك صعبه...
عبدالمجيد: أبسألتس سؤال صريح...
نورة: سم؟
عبدالمجيد: ليش نجلاء سوت بي كذا؟
أنتي قلتي له إني أنا اللي قايلن لأبوي إنه طقتن...؟
نورة: لا... هي ماعنده خبر بالموضوع.. بس هي منقهرة منك عشانك ما منعت أبوي... وبعدين بصراحة بصراحه .. انت دايم تقول عنه بدوية وما أدري إيش.. وأبوي.. ما يشوفه بطرف عينه... ودايم يطنز عليه...
عبدالمجيد: طيب... انا قلت عنه بدوية... وش صار يعني... هي تفتخر دايم بأهله..
نورة: أنت تقول له تتطنز وهذا اللي يختلف... يعني إذا ما عجبك شي.. قلت له بدوية..
عبدالمجيد: طيب... هي تدري إنه تسوى عيوني...
نورة: ياشيخ!!
هي تبيك تثبت له... مو تسوى عيوني وبس...
عبدالمجيد: شلون أثبت له ... وهي ردتن ووافقت على تروك .. اللي نكبه بالآخر...
نورة: أصلاً..._يرفع عبدالمجيد يده لفمه مشيرا لها بأن تصمت ويرفع صوت المذياع حيث يستمر الشاعر بإلقاء أحد قصائده...:
تـــخـــيـــلـــوا..!!
إن الـقـصيد إلـلـي كـتبت ..
كـــــل الــقـصـيـد..
أصـــبــح كـــــذب..
تـــخـــيـــلـــوا..!!
أصــدق إحـساس فـزماني..
يــصــبـح كـــــذب..
تـــخـــيـــلـــوا..!!
إنـي مـاكنت الوحيد في قلبها..
تـخـيلوا ..!! إنـي الـوحيد..
إلـــلـــي أبــــــد..
مـا قـد سـكن فـي قـلبها..!!
والغريب .. أحبها .. إلى هلحين ..
أحـــــبـــــهــــا..
تـــخـــيـــلــوا ..!!
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك