رواية انا الضحية وانا الجلاد -50
أنا أكيد كنت بحلم..لا كنت بكابوس!!!
تخيلي... تخيلي تو جاء مشاري.... مشاري جاء!!!
أفنان: شيبي ذا!!!
عذبة: تخيلي .. فيصل ماله دخل بسالفة طلاقي...
بس.. أبوي ناصر....يووووووووووووووه... يا أفنان أبي أفهم الموضوع ..شلون أبوي يرضاه علي شلون!!
أنا لازم أكلم فيصل... لازم أفهم منه كل شي..
أفنان: إجلسي وتعوذي من بليس....
عذبة: لا... ما أقدر أجلس.. أحس إني بدوامه ... أبكلم فيصل..
أفنان: الساع ثنعش ونص!!
الصباح رباح..
عذبة: لو خمس ماعلي.... ما أقدر أنام... شلون..لالالالالا
لازم أكلم فيصل ولا أروح له...
أفنان: لا والله يالصاحية تروحين له...!!
عذبة: أي شي بس أبسأله...
*************
"صالة بيت أبناء العم"
_يدخل فيصل وهو يضع (شماغه) على كتفه ويعتلي (عقاله) طاقيته, مشمر الأكمام, قفزت نورة نحوه وهي تصرخ_:
عمي شخبار نجود؟
فيصل: طيبه........
_ويتجه للدرج ونورة تتبعه_
نورة: ولدت؟
فيصل: ما أدري.... دخلت الغرفة وجاء رجله... عاد انا رجعت...
نورة: مالك داعي... شلون تخلي نجيده بهالظروف!!!
المفروض إنك ماجيت...
فيصل: قالوا لتس مرتي هي؟!!
عنده أمتس ومجيد وخالد وش لي داعي..
يعني أنا أخصائي نساء وولادة!!
نورة روحي سوي لي قهوه...
نورة: منتب صاحي قهوة الحين؟
فيصل: إي والله مشتهي قهوة....
نورة: أنا أسويه؟
فيصل: فيه أحد غيرتس نورة؟
نورة: مابوه أحد من الشغالات والطباخة نايمة... أخاف من الفرن..
فيصل: يا بزر... ماتعرفين تسوين قهوة... وخري أنا أسوي..
_يقف عند الدرج ويلتفت لينزل الدرج مجدداً ليذهب للمطبخ_
نورة: والله ما تنزل... عاد شيفكن من لسانك... أنا أزين لك...
رح أنت لغرفتك وشوي وأجيبه لك...
فيصل: يالله...
_تنزل نورة الدرج متجه للمطبخ, وفيصل يدخل غرفته, يرن جواله, يفتح أزارير ثوبه بيد ويخرج الجوال بيد أخرى, نظر للرقم فتجمدت نظراته وهمس_:
شتبي ذي هالحزة!!!!
ألو..
عذبة_بصوت مرتجف_: فيصل..........
فيصل: إيه... وش تبين؟
أحد من البنات تعبان... محتاجات شي؟
عذبة:..................
فيصل: موب فاضين لتس!!
عذبة: فيصل.. تعال أبي أتكلم معك...
فيصل:هههههههه تتكلمين معي!!
وليه... مو أنتي طردتين وماتبين تشوفين وجهي!!
شصار على آخر الليل تبين تتكلمين معي؟
عذبة: لازم تجي الحين..
فيصل: لا... عندك شي مهم تجين أنتي موب أنا!!
عذبة: مو وقت العناد..
فيصل: وش عندتس؟
عذبة: تعال وتدري...
فيصل: موب جاي.. وش بتسوين.. ؟
عذبة: فيصل... لا تذلن...
فيصل: أنا ماعمري ذلتيس..
أنتي اللي عادتن عدو وكلش من تعتبرينه مذله..
عذبة: لازم تحط النقط على الحروف.........
فيصل: وأنا ما أتلقى أوامر منتس..
عذبة: شلون أجيك هالوقت؟
فيصل: وشلون أنا أجيتس هالوقت!!
عذبة: فيه بندر نايم بالملحق وفيه أفنان..
فيصل: والكوبه ...
عذبة_بغضب_: فيصل تجي الحين يعني تجي!!
فيصل: إخس... يمه... تدرين خفت..
مانيب جاي واللي يقصر من جدران بيتكم ولا بيتس بمعنى أصح كمليه بجدران بيتنا...
تصبحين على خير...
عذبة: فيصل... إسمع...
فيصل: لاحول ولا قوه إلا بالعلي العظيم!!
عذبة: فيصل.. أنا.. لازم..لازم أشوفك الحين..
أنت ماتدري وش صار..
فيصل: وش صار؟
عذبة: فيصل... ليش ماتجي.. أبي أفهم ليش تعاند هالوقت؟
فيصل: لأني مو مجبر أمشي بأوامرتس... أنا مو مجيد.. أنا عندي شغلي الخاص ولا لتس كلمه علي... وإسلوبتس هذا ما يمشي معي...
عذبة: طيب.. أنت مو تقول أنت المسؤول عنا؟
فيصل: إيه هنا يختلف الكلام .. بس أنا مسؤول إذا كنتوا محتاجين..
هو أنتي محتاجتن؟
عذبة:..............
فيصل: يعني منتب محتاجه... ولانيب مكلوف أجي لتس...
عذبة: إلا...
فيصل: إلا وشو؟
عذبة_بتردد_: أنا محتاجه ....
فيصل: محتاجه لمين..؟
عذبة: م....محت...اجت......ك
فيصل: وأنا بالخدمة... وعند كلمتي... إسمعي... أفنان ما أبيه تصير معنا...ولا أحد..
عذبة: شلون فيصل..!!
شلون مايصير خلوة... فيصل.... !!
فيصل: أبجيب نورة معي....
عذبة: مايصير... نورة......ماتخاف تعرف أشياء مكتومه عنه؟
فيصل: هه... لاتخافين علي......نورة ما يخفاه شي...
دقايق وأصير عندتس... طبعاً مو بالصالة.... بمجلس الرجال.... إفتحي الباب..ولا صح معي مفاتيحه...
عذبة: هـــــــــــــــــــــــاه!!
فيصل: أقول ... أنا جاي ..
"في مجلس الرجال"
نورة: يمكن مشاري يكذب!!!
فيصل: طيب المطلوب؟
عذبة: أبي أعرف ليش سكت!!
ليش تسكت يوم أقولك خربت زواجي.. ليش أبوي ناصر سكت... ليش رضى إني أتطلق ورضى إني أصير خاينه...
ليش؟
فيصل: تبين تعرفين ليش؟
عذبة: إيه..........
فيصل: أبقول لتس كل شي.... بس لاتقاطعينن...
أنا يوم دريت إنتس تطلقتي ما فرحت بس إستغربت, وبنفس الوقت رحمتس..
عذبة: شكرا, أنا مو محتاجه رحمة من أحد.....
فيصل: نورة إمشي........
عذبة: لالا..خلاص هه أصك إثمي....آسفه..ما أقاطعك...
فيصل:.............. ترا إذا قاطعتين بكلمه أبطلع ولا أقول كلمة بعدين...
عذبة: طيب...
فيصل: بعد فتره شفت عمي مهتم, جان ضايق صدره وقال لي إن مشاري لقى رسايل يقول إنه منك.. قلت له ياعم أنت تشك إني أسويه؟!!
قال لي _يبتسم_" لا ياوليدي... أنا أشك بروحي ولا أشك بك.. بس أنا جاين أبسألك وش السواة"
قلت له يخلي مشاري يجيب الرسايل واللي يقوله ونعرف بعدين وش السالفة, ويوم جت الرسايل وسمعت الشريط عرفنا إنه سعد ومرت أخو زوجته منى ورى السالفة كله, أنا قلت له إن سعد لازم يتأدب على اللي صار وإن اللي سواه موب سهل وقال لي عمي" عشانه موب سهل ياوليدي... إن فضحت سواته فضيحه لعايلتنا كله, وإن أدبته مانيب مأدبه تأديب سهل, لو بأدبه أبلقعه بالسجن وأنا أقدر عليه مير أخاف الشماته, وإن دري إني داري وساكت يتجرأ على بناتي بشين أكود, مير نسكت ونسكت مشاري بقرشين ونلفز عليه , وأنت ولد عم البنت وماله غيرك, ولا آثق ببنتي على غيرك يا فيصل" وكلم مشاري وقال له إستر عالموضوع , وعمي كتب كلشي باسمتس يبي يصير تحت رايي كان مايبي إخواني يزعلون لامن عطان وماعطاهم ومايبي كلام الناس, وقال لي" لا تزعل ... ترا اللي خليته لعذبة خليته لك, وأنت وياه واحد" وبعد ما توفى عمي بغيت أقول لتس السالفة وأحطتس قدام الأمر الواقع وأترك لتس الخيار بإنتس توافقين علي ولا تبين مشاري, وكان شرط عمي الله يرحمه إن لا بغيتي ترجعين لمشاري تتركين الشركة لي أنا أديره لكن..
أدري بتقولين ما علمتن وماقلت لي شي, بس أنا عرفت إن عندتس علم بالموضوع من حذف الكلام الي تجدعينه علي بين وقت ووقت واللي أكد لي إني إكتشفت المحاسب المصري يدور شي علي , بعد مامات عمي قاعدتن تدورين علي شي يبعدن عن وجهتس صح؟
عذبة:....................... آنا....أنا..كنت.....
فيصل_يبتسم_: متأخرين مره على الأعذار, أنا ما ألومتس بس ما إنكر إني إنجرحت وإنجرحت مرة... أنا عمري يوم ما مديت يدي على قرش واحد موب لي وأنتي تعرفينن من صغري.. آآآآآآآآآآه...
نورة: وبعدين يا عم وش صار؟
فيصل_ينظر للستارة_: الحاصل إني واثق أصلاً من سجلي لكن اللي عرفته إن المحاسب لقى الملفات اللي قال لي عنه عمي واللي قال لي عنه المحاسب, ملفات تثبت سرقة سعد لأشياء كثيرة من الشركة, يمكن سعد ما يهتم ياخذ راي أحد بس ما كان يتقصد يسرق...
عذبة: تسمح لي أتكلم؟
فيصل_يبتسم_: ههههههههههه من مات سعود... عمري ما سمعتس مؤدبة زي اليوم.. تكلمي...
عذبة: سعد هاللي سواه كله وقاعد تدافع عنه... وسعد مو بس سارق من الشركة , سعد كان يستخدم عمارة من عماير أبوي ماجد يسرق حلال أيتام وكمل عليه بإستخدام واحد من أفضل المحلات اللي بعمارة نجلاء اللي على طريق الملك عبدالله بدون وجه حق!!! سعد مجرم... لا تدافع عنه...
فيصل_يشد شعره الكثيف_: موب هذا اللي سبب كل هالمصايب... ياعذبة أنا يوم دريت إن الملفات طاحت بيدتس ما قدرت أحصلهن, وخفت إني لامن قلت لتس السالفة تطالبين سعد وتسجنينه, وهذا اللي عمي كان ما يبيه, عمي خطط لشي وتحمل المصايب عشان يحفظ إسم العايلة وأنتي ببساطة تبي تنتقمين منه!!
حبتس للإنتقام هو اللي جرنا لكل هالمصايب, مشكلتس بالحياة إنتس آخذته حرب, يامعي يا ضدي, أنتي منعميه على إننا أهلتس ولو قسينا عليتس مالنا غير بعض, قطعه لحم وحده إن إنجرح منا مكان نزفنا كلنا عشانه...
عذبة: أنا مو إنتقامية... أنا لقيت نفسي فجأه بدون أحد, والإنسان اللي أنا عاندت الكل عشانه تخلى عن, أنا تهت ماعرف عدوي من صديقي, خفت على خواتي يحسون بالضياع والخوف اللي أنا حسيته... إذا خفت على خواتي إنتقمت وإن.... وإن صار لي الإنتقام والله أصفح وأسامح وأنت أول واحد صفحت عنه...
فيصل_بغضب_: وش صفحتي عن بوه!!!
يا سيده الرقة والإنسانية... شوفي حالي... وكل اللي وصلت له بسبب عنادك وغرورتس...
عذبة_تصرخ_: ما يكفي تخوني قبل ملكتي ومع شغالــــــــــــ...............
فيصل_يصرخ_: بس!!!
خلاص يكفي... أنا ما خنتس... أنا كنت أبسعدتس بس أنتي والشر اللي تحت راستس قلبتيه علي... أنا ما واعدت شغالتس ... أنا مواعده إن جابت لي الأوراق اللي كانت بغرفتس أبعطيه الفلوس اللي بيدي...
بس..بس .. هي جابت لي صور .. وش أبي أنا من صور ما دام الأصل معتس , وجت لي هي تبين بس والله إن كان قصدي شريف, ويوم تدخلون علي وأنا كنت أقول له هالفلوس مقابل الأصل مو مقابل عرضه ولا الصور اللي جابتهن لي, يوم دخلتوا علي ما قدرت أقول شي...
قلت خله بالقلب تجرح ولا تطلع براه وتفضح هذي كلمة عمي يوم قلت له مايصير نسكت عن سعد...أنا كنت أبي آخذ الملفات عشان أكشف لتس كل شي.. وتختارين تعيشين معي ولا ترجعين لمشاري ولا اللي تبين بس الأهم إننا ما نتملك وأنتي ما عندتس خبر بالموضوع..
فهمتي...فهمتي ليش أنا كنت مع الشغالة, وإذا موب مصدقتن, عندي الحين الصور أجيبهن لتس.. وإتصلي على الشغالة أكيد تلقين رقمه بالشركة مع ملفات العمال… وعلى فكرة.. أنا كنت متلبس وكاشخ عشاني معزوم عن خالي وأهلي يعرفون إني كنت معزوم…
عذبة_تجلس على الأرض_: يعني... إيه ذكرت... الملفات إختفت ويوم قعدت أدورهن ومالقيتهن قلبت البيت صراخ, بعدين جيت لقيتهن بنفس مكانهن بعد ساعة, شكيت إني ما شفتهن, إيه, أتذكر إني شفت الطباخة الخايسه كانت تدور فوق, حتى إستغربت ليش هي رقت فوق .... يعني.. يعني فيصل أنت فيصل اللي أعرفه... فيصل اللي أرفع راسي فيه....
فيصل_يضع يديه على خصره ويبتسم بسخرية_: بدري ترفعين راستس ... بدري...
عذبة: بس .... لا.... شلون يصير كل ذا... نورة... نورة!!!
نورة_تبكي بحرقة_: عذبة... حرام كنا ظالمين عمي فيصل...
فيصل: الحق مصيره يبان....
وأنا ماكنت مستعجل بس بما إن منى إعترفت مالي إلا أبين كل شي...
عذبة_تصمت فتره ثم تقول بانفعال_: بس أنت خنت سعود... إيه خنت سعود... أنت قلت لسعود إنك بتنتبه لنا وبتهتم بنا وماتخلي شي يكدرنا صح!!؟
لكنك تخليت عنا , ورحت إيه رحت, ولا حتى كلفت خاطرك تهتم بنا وتسأل عنا, أنت بس تجي وتضرب وتهزء وبس!!!
عمرك ما إعتذرت, ما قلت أنا غلطان... لا تلومن إن كرهتك وحقدت عليك..
فيصل_يبتسم ويهز رأسه_: أنا معتس بكل لحظة... وماتخليت عنتس أنتي بالذات, لكن حبي لعمي وحق عمي علي أكبر من إني أضيع وصيته عشان ارضي كبرياءتس... وأرضي سعود...لكن صدقين أنا ما تخليت عن عهد قطعته على نفسي...
عذبة: أنت معي بكل لحظة!!!
أنا ما أشوفك إلا تدخلن المستشفى, بس هذا اللي فالح فيه...
فيصل: لأني أعرف متى أنتي بتنهارين وتدخلين المستشفى, صح أنا بعيد لكني أعرف عنتس أكثر مما اللي ببيتس يعرفونه...
عذبة: تستهبل؟
فيصل: لا... أنا وفاء خليفة ...
عذبة: !!!!!!!!!!!!!!!!!!
فيصل: أنا وفيت لسعود بوعده إني إني أكون له خليفة.... وكنت بعد أعلم عبدالمجيد بكل شي بالشغل , يعني أنا معتس ومع عمي وشركته بوقت واحد...
عذبة: كذاب... كذاب.... وفاء عمتي ريم... إيه عمتي ريم.. نواعم قالت إنه بأمريكا...
فيصل: ونواعم هي اللي دخلت إيميلي الثاني وعملت له إستضافة...مو مصدقتن إسأليه...أكيد نواعم بتبعدتس عن مكاني لآني شددت عليه إنه ما تخليتس تشكين… وبنت أخوي ما قصرت…
عذبة: يعني... أنا كنت أكلمك أنت طول هالسنين وأشكي لك!!
أنا أبوح لك بأسراري اللي خواتي ماعرفوا به!!
لا... شلون... مستحيــــــــــــــــــــــــــــــل
فيصل: عذبة... عرفتي الحين كل شي.... أتمنى إنتس تفكرين بعقلتس وتسامحين سعد على غلطته لأن اللي فيه مكفيه, وسعد مارضى لتس المذله وحرق قلبه إنتس رقصتي بعرس مشاري, ووقف معتس بمرضتس وتذكرين كيف كان معتس.... أتمنى... أتمنى إنتس تنسين اللي صار..
نورة: عم... مانتب راجعين لبعض؟
فيصل_بغضب_: إنطمي!!!
أنا لو تطلب عيوني أبعطيه مو عشانه عشان سعود وعمي ولا هي اللي جان منه كفاية...
عذبة: فيصل... تكفى سامحن... أنا غلطت بحقك... أنا غلطانه وراكبن الغلط من راسي لرجليني... الله يخليك إرجع للشركة وبعطيك نصفه , اللي هو أصلا من حقك , وبتصير أنت زي ما كنت المدير العام , بس إرجع لنا, محتاجين لك... أنا ما أبيك تخطبن لا… أبيك تسندن… تعبت وأنا أشك بالناس من حولي.. أبي أرتاح…
فيصل: معليش ... بعد مذلتس لي وطردتس لي برا قررت أبني نفسي بنفس وخصوصا إني لقيت نفسي عالحديدة, رحت هناك وفتحت شركة مع مجموعة شركاء, فما أقدر أترك عرق جبيني عشان أجي أجير عند عذيب...
عذبة_بصوت جاف_: فيصل سامحن عشان سعود, وإرجع خذ حقك… أنا ماتعودت آكل لأحد حق..
فيصل_بغضب_: أنا ماقلت لتس هالكلام أبي منتس شي… الشي الوحيد اللي أبيه إنتس تسامحين أخوي, وتسامحينن على سكوتي كل هالسنين … رغم إني كنت مجبور…
****************
"في المستشفى"
خالد: مبروك...مبروك يا نجود..
نجود_بصوت مبحوح ومنهك_: الله يبارك بك... وش بتسميه؟
خالد: بسميه حلا لأنه حلوه مثل أمه..
عبدالمجيد: جاد أنت!!
لا سموه موالح أحسن..ههههههه
أم عبدالعزيز: وشو حلا!!؟
نجود: حلو يمه... بس الله يعين على نورة...
خالد: ونورة هي حملت به وتعبت عليه!!
أهم شي أعجبتس؟
أم عبدالعزيز: يعني أنتم ما إتفقتوا على إسم قبل؟
خالد: إلا يا خاله كنا بنسميه عبدالرحمن بس .... صارت بنيه...
نجود: الله يحيه, والله فرحتي به بالكون كله...
يمه ... شوفي شلون تناظرن!!
_في البيت_
نورة_تركض نحو غرفة فيصل_: عاااااااااااااااااااااام عم عم.. قم قم..
_يقفز فيصل من سريره_: عمى وشو!!
نورة: صرت خاله!!
فيصل: ولد ولا بنت..؟
نورة: إما ولد ولا بنت...
فيصل: يا سبحان الله...وشو..
_تدخل العجوز تتكأ على العصا_
الجدة: وشبكم؟
نورة: يمه...يمه.. نجود جابت بنت..
العجوز_تبكي_: لا ياعمري بنتي طبيعي ولا قيصري؟
فيصل: يمه ليه تصيحين؟
نورة: رحمت نجود...هههههه
طبيعي يمه , بس البنت أربع كيلو بهذلت به نشبت ههههههه
الجدة: هــــــــــــــو!!
وش هالحتسي!!
إستحي على وجهتس موب عند عمتس!!
نورة: أمي تقوله, طيب وراتس تصيحين للحين؟
فيصل: وش بتسوين عاد لامن جت ولادة نورة....
الجده: إيه.... نورة.... إسمعي أنتي مرتن عاقلة وأنا فكرت إن بندر نعم الرجل لتس, فكري بعقلتس وخلي عنتس العناد واللي ينصحتس بوه أبوتس سويه, أنا قلت لعبدالله يكلم بندر يقول إنتس موافقه, وش قلتي....
فيصل:!!!!!!!!!!!!!!!!!!!
نورة_إحمر وجهها وإبتسمت بخجل_: يمه أللي تشوفونه....
_تتجه العجوز نحو غرفتها وهي تدعي لنجود_
فيصل_يقرص نورة_: إخس اللي تشوفونه...ههههههههه
نورة: فيصـــــــــــــــــــــــــــــــل!!
ما تشوف أمي قلبته علي!!
فيصل: ههههههههههههههههه
*******************
"في غرفة عذبة"
جلست عذبة على المكتب فتحت جهازها المحمول وفتحت بريدها الإليكتروني وكتبت:
"جنازة الخفق الأخير"
الإهداء / إليهم جميعا .. سواك..!
في مهب الحلم كنت أنا و كنت أنت.. كنتُ أحكي لك حكاية الأحلام المشيعة مساء في عهد الوعد المسفوك قربانا لأول خيبة تركها فيّ.. الخذلان..
أحدثك عن جرح أودى به كبرياؤه و تركه يترنح بين نزيف منك و نزف عليك..
أقصُّ عليك كيف يكون الوجع عندما تذبحه اللهفة و تفزعه شجاعة الاعترافات..
و كنت أنت تتلو في حضرة خوفك مني تعاويذ الصمت و ابتهالات السكون ..
أنظر إليك فيلمع في عينيك تاريخ من اللحظات النازفة فرحا و بهجة.. و تنظر إليّ فتبرق في ذينك العينين إغضاءة أنهكها الندم واستوطنتها حسرة مجهشة اللون.. علقمية الصوت ..
أقولُ ( لي) و أنا أنصت مذهولا لصمتك : لماذا يجرني إلى أكثر زوايا النبض ضيقا و عتمة..
لماذا يضطرني أن أكون الأقوى/الأضعف معه.. لماذا يقتلني مرتين .. باقترافه الخيانة أولا .. و بطلبه العفو بعد ذلك..!!
ليتني أستطيع الخلاص من جرحك..!
روحي التي تعودت أن تمر على ضفاف الحلم دون أن تخوض فيه ما بالها اليوم تزمع الإبحار بعيدا.. بعيدا..
و ذاكرتي التي استمرأت ارتكاب معصية النسيان ما بالها مع خطيئتك تتوب و تحفظها عن ظهر وجع..!
مازلت أتذكر ركضي في ممرات نبضك مخدوعا بحواس البياض.. بحثي في تضاريس روحك عن ملاذ أواري فيه قلبا أتعبه السفر و أنهكته الغربة..
مازلت أتذكر قولي لك - ذات جنون - : إن علاقتنا ستطول كحرب البسوس.. ربما كنت يومها أقول دون وعي إن علاقتنا ستنتهي (بطعنة ظهر) كما ابتدأت البسوس..!!
أتدري..!
سأحزن كثيرا كى أنساك
وسأبكى كثيرا كى أنساك
وسأختنق كثيرا كى أنساك
وسأتخبط كثيرا كى أنساك
وسأنسى كثيرا كي أنساك
وسأحيا كثيرا كي أنساك
وسأموت كثيرا كى أنساك
وسأفشل كثيرا كي أنساك
لكننى أبدا لن أعفو عنك!!
أتدري لمه..؟
كي أحافظ على جمال علاقتنا من التشويه.. و من أجل أن أحافظ على ما تبقى منك.. فما قتل ( الأحباب ) كالعفو عنهم..!!
منقول
_وأضافت إيميل مشاري الذي حفظته عن ظهر قلب,تم نقرت على أيقونة (send), مسحت دمعة عن خدها ثم إبتسمت وهي تخرج دفتر مذكراتها وتكتب:
والدي العزيز, مر ثلاثة أشهر على معرفتي بحقيقة طلاقي, لم أستطع أن أكتب لك لأنني مازلت مصدومة, لم أستطع أن أستوعب كل ماحدث...
حقيقة أشعر بأنني كنت أخوض حربا لا أعرف فيها خصمي فحاربت نفسي دون أن أعرف, أحرقت نفسي, وكنت " أنا الضحية وأنا الجلاد !!!!"
شعورا يعتريني بأن ما فعلته كان ضرورة لحماية أخواتي وكما قالت أفنان إن الضرورة تبيح المحرمات, ولكن تأنيب الضمير يعصر قلبي تجاه نفسي وتجاه الآخرين الذين قسوت عليهم...رغم قسوتهم علي... شعرت بمراره تجربتهم , ربما لأنني كنت أقف في صفهم وأحاربهم في آن واحد....
لست أدري هل هذه القسوة مصدرها جهلي بالواقع أم أن غروري وكبريائي ألبسني نظارة قاتمة فبدت كل ألوان الطيف باللون الأسود...
والدي... كما أخبرتك أن السعادة طرقت أبواب بيتنا بزواج ليلى وحملها هاهي مرة أخري تطرق بابنا , نجلاء ستتزوج عما قريب...
العذووووووووووب
******************
******************
"بيت سعد"
عبدالمجيد: وين عمي؟
تركي_يحك شعره_: ما أدري... يبه.... يمكن منداخل..
عبدالمجيد: ألحين أنت من جد....بتروح القصيم وتجيب هيله من كراعه هنا؟
تركي: شسوي أبوي معيي يروح للقصيم, بروح أجيبه والحمدلله..
عبدالمجيد: بس حراااااااااااااااام!!
تركي: حرمت عيشك يالبرميل...
عبدالمجيد: أنا برميل!!
تركي: سامن يالدب... بس عاد لاتصدق بريميل مو برميل..ههههه هذا أبوي جاء..
_أقبل سعد على كرسية المتحرك_
عبدالمجيد_ينحني ويقبل رأسه_: هلا عم... قال لي أبوي إنك بغيتن؟
سعد:إيه إجلس أبكلمك, تركي رح تجهز وراك سفرة اليوم وعرس هههههه
تركي: أبد إن شاء الله اليوم أبنام بذا....
من بعد القصيم عاااااد...
سعد: نم هناك ولامن أصبحت تعال!!
تركي: يبه مشوااااااااااااااار... ما أحب أنام إلا بسريري..
_يقبل رأس والده ويغادر الصالة_
سعد: أنا مانب لاف ولا داير, أنا بقول لك وش عندي وأبي رآيك بصراحة وبدون ماتستحي من, بنتي متقدم له شاب على خلق ودين مير أنا قلت قبل لا أعطيه قلت أسألك لاتصير تبيه ولا شي وأنت أولى منه..
عبدالمجيد_يحمر وجهه ويتلعثم_: بس.. عم... والله نسبك مايرد...لكن أخاف البنت تصير تبي الرجال...!!
سعد: وعلى بالك بغصب بنتي عليك!!
أنت لامن وافقت سألت البنت وخيرته بغتك ولا بغت الرجال... وش قلت؟
عبدالمجيد_يبتسم_: اللي فيه خير ربي يقدمه
سعد: موافق؟
عبدالمجيد: إيه موافق يا عم بس عساه هي توافق...
سعد: إيه هي موافقه
_إختفت الإبتسامه من وجه عبدالمجيد_: وأنت وش يدريك يا عم؟
سعد: أحس... بنتي وأنا أعرف ذوقه...
*********
"في صالة بيت عذبة"
تجلس عذبة بجانب نجلاء وتمسك يدها وتضع أوراق على حجر نجلاء, مها تمسك بكتاب ناصر فتهتف ضاحكة: شفتن أخوكن.. ألحين إيقالني بدرسه, عطان الكتاب وفرك!!
عذبة: لا تدرسينه خليه يعتمد على نفسه...
مها: عشان يدج همن يفضحن فهد!!
عذبة_تلفت على نجلاء_: شوفي نجلوه, إختاري وش لون المفارش والبوفيه اللي بيقدم بالعشاء, شوفي هذا اللون الوردي والأبيض روعه, يناسب فستانتس والكوشة, جاي هادي بفخامة, وهذا العنابي ما أدري, أحسه ما يناسب ستايل الفستان والكوشه ولا وش رايتس, شوفي ذا بعد...هيه أنا أتكلم على نفسي!!!
نجلاء:...........................
عذبة: إخس يا نجلاء وش بتس ولا مساعد آخذ عقلتس؟
نجلاء: عذبة... أحس العرس موب طالع ذاك الزود....
عذبة: روحي... والله والله لأحط لتس أحلى عرس بالرياض إلا بالسعودية تدرين بالخليج كله, لأخلي نجلاء بنت خلف أحلى عروس وزواجه أحلى زواج, أنتي وكليه علي بس... ولمن تكون عزبة معاك حتحط ببطنك بطيخة صيفي..
مها: أقول عذيب لا تكلفين من عندتس... حمولتي ترا موب راعين مظاهر بالعكس ينقدون..
عذبة: خلهم ينقدون ... أنا ماهمن وش يقولون الناس, أنا ترن بإذني كلمة أبوي يوم يقول أبحط لنجلاء عرس أحلى منكن لأنه قعدتي...
نجلاء: وش ينفع العرس بلا أهل... كل البنات يصيرون أهلم معهم بالعرس وأنا من معي!!؟
أمي فرح ماتت وأبوي ماجد مات...
عذبة: قلت لتس مليون أبوي ما مات...
نجلاء: مات ما مات بس موب موجود!!
أبوي خلف الله يرحمه وما بقى لي إلا أمي ريم.... ومستخسرة تجي عشاني..
ليه كل البنات ينزفون معهم أمهاتهم إلا أنا!!
لو أمي غيبه القبر ما قلت شي... لكن تصير حيه وتعيي تجي أجل ليش هي تعتبر نفسه أمي!!
عذبة: نجلاء تعرفين أمتس إذا طلعت يمكن ما ترجع!!
نجلاء: أنانية.... تخلي رجله وتجي كله كم شهر وياخذ الدكتوراه..بس هي مو راضيه
_إنفجرت تبكي وضمتها عذبة بقوة_
*******************
"غرفة تركي"
يدخل تركي وعروسه غرفتهم ببيت والده, يخلع تركي ثوبه ويفتح الدرج ويخرج بيجامه فخمة ويغلق باب غرفة الملابس ويخرج على هيلة التي بدأت بخلع مجوهراتها , إلتفتت عليه فانفجرت ضاحكة....
تركي: خير؟!!!
وش فيه يضحك؟
هيلة: هههههههههههههههههههه
تركي هههههههههه
تركي: ههههه وش بتس؟
هيلة: الحين أنت مصري لابس بجامة ههههههههههههههههههههههه
تركي_بإستغراب مشوب بشيء من الغضب_: يعني تبينن أنام بثوبي!!
هيلة: لا... إلبس ثوب نوم, خل عليك سورال سنه وفنيلة, موب بجامه مخططه بعد!!
تركي: يا هيلوه هذي تدرين بكم؟
هيلة: لا... بس أدري إنه ماركه هههههههههههههههههههههه
ياربيه, تركي بسألك سؤال الحين ليش تشري بيجامه نوم وماركه
تكشخ للنوم؟
تركي:الشرهه على اللي كاشخن لتس!!!
هيلة: تكفى إلبس سروال وفنيلة أصرف
تركي: لا... أبنام بذي عاجبتس ولا ترا... أبختار لتس أنا وش تلبسين...وحدة بوحدة...
هيلة: لالا.. خلاص نم به إن بغيت بعد رح به للدوام
هههههههههههههههههه
تركي: هيله
هيلة: سم...!!
تركي: على إنتس مليغة إلا إني أحبتس..
هيلة:................
تركي: بس لاعاد تعودين له أنتي وروجتس اللي تقل (...........)
هيلة: تركي!!!
تركي: زعلتي؟
هيلة: إيه
تركي: تبين أراضيك؟
هيلة_بذعر_: لالالالالا موب زعلانه أبد!!
*************
"غرفة عبدالمجيد"
عبدالمجيد يخلع شماغه ويعلقه على العلاق, يفتح أزارير ثوبه ويخلعه , يرميه بشبك الغسيل, يتجه للدولاب ويخرج ثوب نظيف, تدخل نورة وتقف خلفه وتصرخ:
أخووووووووووووووووووووووووووي...
عبدالمجيد_يقفز مذعوراً_: وجــــــــــــــــــــــــــــــــــــــــــــع!!! !
نورة: بسم الله عليك...هبلتك!!!؟
عبدالمجيد: الله يهديتس فضختي قلبي .... وش تبين؟
نورة: صدز اللي سمعته؟
عبدالمجيد_يلبس ثوبه_: وشو اللي سمعتيه....؟
نورة: إممممممم... ماقال لك عمي شي؟
عبدالمجيد: نوير أنتي تستخدمين الجن؟
نورة: لا... سمعت أمي وأبوي يتكلمون...يقولون إن عمي عطاك بنته...
عبدالمجيد: والله الربع طابخين الطبخة!!
نورة: هههههه... لاتستهين بأمي تراه موب سهله...
تدري يوم عجزت عنك خلت أبوي يقول لسعد يقول لك...
والله حطوا البنت بروسهم حلم تاخذ غيره..
عبدالمجيد_يرش العطر_: نورة شمي حلو؟
نورة: يهبل....
عبدالمجيد: هديه هذا من بندر... أجل أمي هي اللي مدبره هالزواجه؟
هين أمي محد يقواه قالت نواعم يعني نواعم...
بس أنا...........
نورة: ماتبيه؟
عبدالمجيد: هو الجد...ما تعجبن طريقته ... بس مادام ما حصلت لي نجلاء خلاص متساوية...
نورة: ترا نواعم حبيبه وعاقلة, وتراه منتالي صايرتن تغطى وعدلت عباته, من راحت لبيت ماجد وهي متغيرة وهي أصلاً طيبه ومابه شر, ويكفي يكفي إنه تغلي أمي وتقدره.....
عبدالمجيد: أخاف إني ما أقدره.. ولا أحبه... أخاف ..بس إستحيت من عمي ولا أمي وأبوي قدرت عليهم..الله يهديهم أحرجون... يالله أنا بطلع إنقلعي بقفل الباب..
نورة_تلحقه للخارج وتتأمله وهو يقفل الباب_: إممممم
عبدالمجيد_يبتسم_: وش عندتس؟
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك