رواية انقلبت الموازين -8
من امس وانا يالس افكر بسلطان...طاري على راسه سالفه يديه..يقول ابى يكون عندي ام شرا يمان..وربايعي الي بالروضه... كان عندهم حفله بالروضه بمناسبة عيد الام...وكان من ضمن الفقرات .. فقره انه كل طفل يقول كلمه لامه ويعطيها هديه هو بروحه مسوينها ..ولما ركب السيارة ...يلس يصيح... ويقول انا ما عندي ام...كلهم عندهم...حتى امايه ميعاد ...ما تي تنام بيتنا...تقول ما يصير تنام عندنا...وتباني انا انام عندها...ليش ما تيبها تسكن عندنا..بيتنا احلى من بيتهم ...انا وايد احبها...اكثر من يمان....وقفت السيارة ..وسرت احضه ..واهديه..وانا اقول بخاطري..ما توقعت انه محتاي لهاي الدرجه لام..اللحينه كيف بفهمه انه ميعاد معرسه ما يصير تسكن عندنا...قطع علي تفكيري..صوت الباب الي تبطل بقوة...وجفت سعيد يصارخ ويقول...
سعيد:لقيتها..لقيتها...جفت الدنيا اشقايل صغيره...
سالم:بسم الله الرحمن الرحيم..واسكنهم بمساكنهم...شو مستوي ..ومنو الي لقيتها
سعيد:بنت العم المصون ..عيوزنا اليوم بتفرح ..بضمير حي بعد
سالم:ومن وين لقيتها
سعيد:طلعت تشتغل عندنا بالشركه ..وحنا بخبر كان
سالم:شو الي يابها البلاد...
سعيد:تقول انها حصلت شغل ...وتبى تستقر
سالم:عيل سير بشر يدتك...فرح قلبها من متى وهي تحن على راسك
اسوم مب طبيعيه ..ما ادري شو فيها..من يين من الدوام وهي مقفله على روحها الباب ...والدموع متيمعه بعيونها..وحتى العشا ما رضت تتعشى...ما ابى اضايقها ..بس بنفس الوقت احاتيها...احسن شي اسير عندها واطمن عليها...اول ما بطلتلي الباب وجفت ويها..خفت عليها..جنه ميت عليها حد
جوري:بسم الله....اسوم شو فيج...ليش ويهج جي
اسوم:جفته اليوم...
جوري:منو الي جفتيه اليوم
اسوم:سعيد..ولد عمي
جوري:سعيد...ومتى جفتيه
اسوم:تذكرين الاتصال من قسم الماليه...كان هو الي يبى يقابلني
جوري:وشو كان يبى
اسوم:اول ما جافني ...قال وايد تشبهين يدوه...ويلس يسالني..من متى وانا هني..وسالني عن سامي..ووين ساكنين ...واول ما قلته انه سامي بامريكا...وانا بروحي هنا...جنه ركبه يني..يلس يصارخ ..ويقول يعني انتي وين ساكنه ..واشقال مخلينج بروحج هنا..وليش ما يتي عندنا...ويلس يقول شو هي سايبه ..ولا سايبه..كنت يايه اقوله الثانيه صراحة..بس احترمت نفسي..لانه كان معصب بضمير ...ولما طلب مني عنوان سكني...استغربت ..فقلته لتكون ناوي تزورني...تعرفي شو رد علي..قالي وحد قالج اني معجب فيج...عاد حد ويغلط علي..تعرفي ربيعتج ما حد يروم ييود لسانها...قلتله وحد قالك اني منتظرتنك تنعجب فيني...طبعا سفهني ..وقال اليوم تلمي قشارج وبوصلج بيت عمتيه...طبعا عصبت عليه ..قصوره يتحكم بحياتيه..بس هو قالي..ترى اذا ما يتي برضاج..بطرشلج عمج...وعاد تعالي وتفاهمي معاه..صراحة لما قال جي بلعت ريجي..لانه يى على بالي صورة عمي..لما درى بسالفة شردت اختيه...كانوا عيونه حمر..وكان يسب ويصارخ بصوت عالي...اول مره اجوف شخص عصبي ومرعب شراه...جوري..ما ادري شو اسوي..انا ما اتذكرها عمتيه..وبعد ما اقدر اتركج بروحج..
جوري:اسوم لا تفكرين فيني ..اقدر ادبر روحي..ولا تيبي مشاكل لروحج..عمج من لا شي كارهنكم..فلا تعطيه فرصه انه يطلع حرة اختج عليج..احسن لج تسكنين بيت عمتج..ولا انج تروحين بيت عمج..بعدين يدتج اهناك..يعني لا تحاتين
اسوم:وانتي يا جوري...اشقايل اتركج بروحج...
جوري:خلينا نكون منطقيين..انا صج اباج تكونين ويايه...ثنتين ولا وحده بالبيت..بس لا عمج ولا ولد عمج يايين يخلوج تسكنين عندي..خاصة بعد سالفة اختج...وانا الله معاي...ربج ما ينسى حد...وبتمضي الايام..وبعدين لا تكوني ناويه تنسيني ..وما تيين تزوريني ..انا بسير ارقد حور ..وابى اساعدج تلمي اغراضج...
يلست ارقد حور..وانا الدمعه بعيني...ما كنت ابى اكون ضعيفه جدام اسوم...كفايه الي سوته لي كل الفتره الماضيه..ما ابى ايبلها مشاكل...بس اشقايل اعيش بروحيه...اذا صابني شي..اذا طحت..اذا اغمى علي ..واذا مت..منو بيدري..وحور بتيلس تصيح ولا حد داري عنها...سمعت صوت الجرس ..استغربت..حنا ما نعرف حد هني..لا يكون سعيد ياي ..حشى مداه ..انتظر لحد باجر..طنشت الوضع..او يمكن حاولت اهرب من الوضع..ما ابى اعيش هاي اللحضه...سمعت صوت اسوم وهي تزقرني...طلعت..وجفتها تفرك ايدينها..يعني في مصيبه تنتظرني..اعرف عادتها ..
جوري:بسج تحكين يدج...ادري سعيد عند الباب ..ويباج تسيرين معاه...والله عادي اسوم ..لا تحاتيني..فكري بروحج ..رايتج بيضه ...وبعدين انا وانتي بنفس المكتب ..يعني كل يوم بشوفج ...شو تبين اكثر عن جي..
اسوم:خلصتي ...ما احيدج تحبين الكلام..حتى ما عطيتيني مجال اقولج منو عند الباب...
جوري:ليش مب سعيد الي عند الباب
اسوم:لا يا حلوه..ها واحد يقول انه يباج..
جوري:يباني انا..ما عرفتيه
اسوم:اول مره اجوفه..وبعدين خلصي ...الريال ناقع بره
جوري:تعالي ويايه...
طلعنا انا واسوم بالحوي ..نجوف منو الي عند الباب..ما احيدني حد يعرف اني بالبلاد...اول ما فتحت الباب..جفت ريال ساند ظهره على اليدار ومرفع ريل وحده ..ومنزل راسه الارض..
جوري:نعم اخوي ..بغيت شي
اول ما جاف علي..شهقت
جوري:ناصر
ناصر:اي ناصر يا جوري... اخوج ناصر..الي تربيتي معاه من وانتي صغيرة...اخوج الي كان كل هدفه بالدنيا انه يشوفوكم فرحانين ..ومب محتايين لحد...اخوج الي ياما ضحك معاج..الي ياما نصحج..الي ياما وصلج للجامعه...الي ياما ساعدج بالدراسه...اخوج الي تحمل مسؤليتكم ومن غير ما يشتكي ..اخوج الي الغريب ياي يقوله انه اختك بالبلاد واحنا اخر من نعرف..هاي نهاية العشره يا جوري..هاي نهاية تربية امايه لج..ها الي تعلمتيه من الغربه..انج تنكرين اهلج..انج اول ما اعتمدتي على نفسج..نسيتيهم ...وتكبرتي عليهم...ها يزاء الاحسان...هانت عليج جمان..الي من سافرتي وهي لحد اللحينه تيود صورتج وتقولها كل شي يستويبها ...الي بكل صفحة بكتابها كاتبه عليه اسمج...الي بكل صلاة تدعي ربها انه يحميج..ويردج بالسلامة...ولا هانت عليج ميعاد...ولا هانت عليج سارة...افا يا جوري ...هذا وانت دايما تقولين ..كله ولا جرح الجريب..لانه صعب ينسى..ولا جرح الغريب طز فيه...وبعدين وينه زياد..ومنو هاي الي بطلت الباب..شو يالس يستوي..شو ها اللخبطه بحياتج..
جوري:بس..حرام عليك...ليش تقول عني جي...انا عمري مب كنت ناكره الجميل ..ولا هاي كانت من اخلاقي...انت ما تعرف شو الي صار..وما تعرف شو الي حدني اني اسكن بروحي..ولا ايي عندكم..ما تتصور اشقايل مشتاقتلكم...تراوالك سهل علي انكم قراب مني ومب رايمه اوصلكم ...انتوا مب معرفة يوم او يومين..انتوا اهلي ..اقرب الناس لي...اقرب من روحي...عمريه ما عرفت اهل غيركم..عمري ما حسيت بالامان والحنان الا معاكم... ما حسيت بالغربه الا وانا بعيده عنكم....عمري ما حسيت بالضيم وانا بينكم ..عمري ما حسيت بان الدنيا ضايقه علي وانتوا حوالي..عمري ما حسيت بالخوف من باجر وانا بينكم... انا لو سويت شو ما سويت ...مستحيل ارد ولو شي بسيط من الي قدمتوه لي...فايشقايل تقول انكم هنتوا علي..واني تكبرت عليكم...ليتني ما سافرت ولا درست...ولا تركتكم..بس ها قدري وها نصيبي واللهم لا اعتراض...
ناصر:انتي شو يالسه تقولين...وشو ليتك ما سافرتي ...وشو سالفة نصيبي وما ادري شو..جوري انا بالغصب ماسك اعصابي..فهميني
ناصر:شو...ليش..وكيف..ومتى..وليش ما خبرتونا
كنت يايه ارد عليه..لانه شكله شويه وبينفجر ..واخاف يذبحني...بس جفنا سيارة يايه صوب البيت...اشر علي ناصر ادش داخل..سكرت الباب وراي وجفت اسوم واقفه ..لويت عليها ..يا الله الهمني الصبر..الي ينتظرني اعظم ...سمعنا صوت ريال ..يقول انه سعيد وياي ياخذ بنت عمه...ناصر طلب منه ينتظر ...شكله يبى يتاكد من السالفه ..لانه زقرني...
بعد ما سارت اسوم..ناصر طلب مني الم اغراضي ..وقالي مالج يلسه اهني...حاولت ارفض..بس هو ما عطاني مجال..طول الدرب بالسيارة وهو ساكت..شكله بعده مصدوم ...ومب مستوعب سالفة انفصالنا انا وزياد...وكان يحاول يتصل بحد ..بس ما يردوا عليه ..وهو واصل حده من العصبيه...سمعته يقول...الجبان مسكر تلفونه...
وبعد اسبوع............
يله يا جمان تاخرنا...شو هاي ساعه تجهز..جي حنا وين سايرين عرس...احيدنا سايرين المستشفى...شلت حور الي يالسه تناقز تبى يمان يشيلها..ذي البنيه ماشي امل منها..مضيعه السنع ..من متى اعلمها عيب تركضين ورا الاولاد..خليهم هم الي يركضون وراج بس ما منها فايده ..ما تصدق تجوف ريال ..واللحين حتى لو جافت ولد صغير ...تضيع علومها..ما ادري على منو ظاهره..ما ظنتي على امها ..ما حد غير ابوها..يبالي اسال ناصر عن ابوها ..خبركم الاخ ما تربى معانا...بوستها بقوة على خدها..يا ناس ..عسل ..عسل ..بس هي يلست تصيح..ويى هيرو زمانه ..يدافع عنها..لا بالله ضاع يمان.بسبة بنت جوري...على طاري جوري...تصدقون راحمتنها..ما تستاهل ..صغيره وحامله لقب مطلقه ..وبعد عندها بنوته...اتذكر اول ما دشوا علينا هي وناصر..شخصيا انصدمت صدمة عمري...بس ردة فعل جمان كانت غير متوقعه...توقعتها تروح تحضنها...تبوسها...لانها وايد كانت متولها عليها..بس هي يلست تلومها..وتقولها شبعتي من لندن ..ومن زياد..ويايه تغيرين جو عندنا...ولا ضميرج اللحين صحى ..وقالج لي اهل اروح اجوفهم...وركضت غرفتها...لحد اللحين مب راضيه تكلمها...مع انه جوري جم مره حاولت تكلمها..بس هي ما كانت تعطيها مجال ..والله هاي جمان وحدها سالفة..جنه جوري ناقصه الي فيها مكفيها...الي جافته ..حتى العدو يرحمها ...مصيرها جمان بترضى...اخيرا وصلت ست الحسن والدلال..
ظهرنا من الغرفه ..لانه ناصر قال اهله بره يريدوا يدشوا داخل ويجوفوا ريم...اغمى عليها من يومين..وبعد الفحوصات قالوا ما فيها شي..يمكن مجرد تعب..ورقدوها عندهم علشان يراقبون وضعها..لانها ابدا مب طبيعيه حتى الكلام الي تقوله مب طبيعي... ...عيوزنا يلست تساسرني ..وتقول ..مسود الويه نزل عيونك ..كليت البنيه...احشم اخوها ...والعثره...جي انا مفضوح...زين يوم بس عيوزنا لاحظت ...وقفي يا جمان اذا ما ادبتج ما بكون حمد..عيل تسكرين التلفون بويهي...يلست اتذكر ذاك اليوم ..الي يت بيتنا تزور ريم..اتصلت على ريم وطلبت منها تحط التلفون على الاسبيكر ...هي يلست تترجاني ما اسويلها مشاكل مع جمان..جي باكلها انا...بس هي رفضت تكلمني..وطلبت من ريم تسكر التلفون..كنت اكلمهم وانا اسوق السيارة..مطنش الدرب..وتركيزي كله على المكالمه...يلست استحلفها تقول مب هي الي كانت واقفه مع خليفه...ما كانت ترد علي..وريم كانت تترجاني اسكر الخط...طلبت من ريم تصخ..علشان اعرف اتفاهم مع جمان..وشكله من كثر انفعالي ما انتبهت انه السيارة الي جدامي ضربت بريك...وكنت اسوق بسرعه ..ضربت بريك قوي ...علشان ما اصدم السيارة...والحمد لله ما صدمتها..سمعت صراخ بس مب كان صوت ريم..ها صوت جمان..يالسه تصارخ وتقول حمد انا مب زعلانه منك والله بكلمك..بس لا تروح ..لا تموت...قلت بخاطري ..جان زين من زمان سويت حادث ..دامه النتيجه اني سمعت صوتج...وانج بعدج تحبيني...وبعد ما طمنتهم ..سالتها نفس السؤال ..بس هي سكرت التلفون بويهي...قطع علي حبل افكاري كلام عيوزنا...
ام سالم:حمد..منو ها الريال ..الي يالس يسولف مع ناصر
حمد:ها الله يسلمج...ها سعيد ربيع سالم..يايب بنت عمته تزور ريم..كانت مع جوري بالندن
ام سالم:الا اقول ناصر...جوري قررت تسكن معاكم
ناصر:اي نعم ...تراها اختنا ..وطول عمرها ساكنه معانا..يعني ما تغير الوضع..
ام سالم:اشقايل ما تغير الوضع...تراها اللحينه مب على ذمة اخوك...
ناصر:وان كان..هي عندها بنت..وانا المسؤل عنها ..لحد ما ييها نصيبها
ام سالم:اذا على النصيب..عيل بتعمر عندكم..ما ضنتي حد بيهها
:وانا ابها...وبملج عليها باجر
الجزء (23)
يالسه اطالع على اسوم...فيها شي متغير..صايره اهدى عن قبل..يمكن بسبب الظروف الي تمر عليها ...ولما سالتها عن معاملة عمتها لها..تقول ياليتها لو كانت جاسيه ..كنت بتحمل ..بس تقول انها ابدا ما تكلمها..يعني مسوتلها تطنيش قوي...ولا كانها موجوده بينهم..وتقول حتى بناتها ما يكلموها ابدا...بس يدتها...ومن كلامها عن يدتها شكلها وايد تحبها وتعزها..دايما تقولها انتي ريحه ولدي المتوفي..وريحة عايلته الي انحرمت منهم...ودايما تحضنها ...وهي ترقد معاها ..وتقول حتى وهي راقده تي تقرا عليها المعوذات وتحصنها وتسير ترقد...وعمها لحد اللحينه ما يعرف بوجودها لانه ما يى يزورها...سالتها عن سعيد...قالت انها تحس انه معجب ببنت عمتها سما...وشكلها هي بعد معجبه فيه..نظراتهم لبعض تقول جي...جفت صوب ميعاد..عرسها عقب باجر..بس شكلها مستهمه..بس ما ادري على شو ...جنها تنتظر مصيبه مب عرس ...لفيت راسي صوب جمان...الله يا جمان ...ما توقعتج جاسيه جي..ويطلع منج كلام يقطع القلب...معقوله سنتين يغيروا الواحد جي...نفسي ايلس معاها..نفسي اسالها شو فيها ..عيونها مليانين حزن وهم...نفسي اخفف عنها بالرغم اني ما اعرف شو فيها ..بس هاي بنتي انا ربيتها ...انا الي سهرت عليها...كنت ادرسها ..وكنت العبها ...ليته الزمن يرد ..وارد ياهل ..همي العابي وما اعرف شي عن هموم الدنيا
احس راسي بينفجر من كثر ما افكر بخواتي ...احس كل وحده عايشه بعالمها..وبمصيبتها الي تحاول تداريه عن الثانيه..ولا على بالهم اني حاس فيهم...ليتني بس اعرف شو الي صار بجمان..وخلاها تكبر عشر سنوات جدام..حتى اسلوب كلامها والكلمات الي تعقهم...جنها وحده الدنيا مورتنها الويل...جم مره سالت حمد عن الي صار من بينهم ..ولا واحد منهم راضي يتكلم ..وفوق ها يقول لا تنسى الوعد الي عطيتني اياه...قلتله وخطيبتك...قال اصبر علي وبفهمك كل شي..بس عطني وقت...وانا شو بيدي غير الصبر..وبنجوف نهايته معاكم ...وميعاد دايما شارده وتفكر..كل ها علشان عرسها جريب..حتى ما اجوفها فرحانه...عاد المصيبه الكبرى جوري...ما انسى ذاك اليوم لما سعود سالني عن حور وعن جوري...كنت طالع من البيت ساير صوب سالم..جفته طالع ومن بعد السلام ..سالني عنهم..استغربت شو استغربت..قولوا انصدمت ...قولوا السقف طاح فوق راسي...سالته انت متاكد انهم هنا..وهو اكدلي السالفه...بس سالته عن زياد...قال انه بعده بالندن..شو هاي اللخبطه...انا متاكد نهايتي على يد زياد...مب كافي انه بعيد ولا يسال ولا يقول يي ويزورنا...حسابك معاي عسير يا زياد ..خلني بس اجوفك...خلني بس اجوف هاي وين ساكنه...خمنت انها ببيت امها ..لانه هي مالها مكان ثاني تسيرله...طول الدرب لحد بيتهم وانا اضرب اخماس باسداس...احاول اتوقع اسوأ الاحتمالات ..واسوأ شي يي ببالي انهم متزاعلين...بس ما حطيت ببالي طلاق..طلاق مره وحده...ربي رحمك يا زياد...لانك لو كنت جدامي كنت ذبحتك...انا قايل من البدايه زياد ما يستاهلها..كل تصرفاته كانت تدل على جي...بس انا موصلني حدي ..انهم منفصلين اكثر من سنه..واحنا ما عندنا خبر..اسميني غسلت شراعها جوري وطلعت حرة زياد عليها..اشقايل تسكت طول الفترة الماضيه وما تقولنا..والمصيبة كانت ناويه تسكن بروحها...والغم تقول علشان كلام الناس..وحنا من متى نهتم بكلام الناس....بالرغم من كل ها كنت مرعوب اني لما اجوفها ترد مشاعري الاوليه صوبها...استغربت من نفسي ومن قلبي..كنت اجوفها شرا اختي وبس..ما ادري اشقايل تغيرت ولا الزمن هو الي غير مشاعري صوبها...يمكن حب سارة وتعاملها معاي من بعد ما تغيرت ...ما ادري..المهم انها شرات اختي ..وها الصح...انا اخوهم الجبير...وبس...بس تصدقون كل العصبيه وكل الضيقة الي كانت فيني اختفوا اول ما دخلت جناحي وجفت التغير المستوي ..وجفت سارة...ما صدقت انها جدامي ..تراوالي يالس اتخيلها..بس هي يت صوبي..وقالت انا اسفه على كل الي صار...مب بيدي..قلبي هو الي كان يحركني..وكنت مصيفه عقلي شويه...رديت عليها وقلتلها بس مصيفتنه....شكلج كنت معطيتنه اجازة مطوله..بس هي برطمت ...يا حلاتها وهي تتبرطم ..جنها ياهل...حضنتها بقوة ..بمقدار الايام الي بعدت فيهم عني..بمقدار الحزن الي بقلبي على خواتي...بمقدار الضيقه الي فيني من صوب زياد...حضنتها وانا متاكد انها هي الوحيده الي بتحس فيني..وبتقدر تخفف عني ...سرت اجوف يمان..يا اني مشتاق له ..صج لما قالوا الضنا غير..وحبه غير..بسته ولما يت اقوم جفت سارونتي واقفه عدال الباب..اشرت عليها شو فيج..يلست حذاي وقامت تمسح على شعر يمان..وبيدها الثانيه ماسكه فيه يدي..ويلست تقول عن خطتها هي وجمان...وطلبت مني اذا سالت ناديه عنها قول لها انها بعدها زعلانه وببيت اهلها ..ما فهمت ليش كل ها..وليش يالسه تجذب هاي الجذبه..بس نظرتها الي ضيعت علومي..خلتني غصبا عني اوافق على كلامها...قطع علي حبل افكاري ..سؤال خالتيه ام سالم...لا حول ولا قوة الا بالله ..تدرون هاي ثانيه مره تسال نفس السؤال ...ما ادري شو الحكمه من ها السؤال ..بس مضطر اجاريها وارد عليها...بس الي ضايقني انه مب وقت ها السؤال ...لانه كلنا شباب ومن غير سعيد وعمران ما يعرفونا ولا مداخلين معاهم كثير..
لحضه..لحضه...شو قال سعود ..يبى يعرس ..اكيد سمعت غلط..شكلي تخبلت على نهاية عمري ..من كثر هوسي بجمان ..حتى سمعي ضاع ...بس ردة فعل ناصر ...وانفعاله..اكدلي انه الي سمعته صح...سعود...سعود يقول هاالكلام..سعود يبى يخطب..ما ادري افرح ولا انصدم...شخصيا اجوف جوري هي انسب وحده لسعود...ما حد يعرف سعود كثري..هو يموت في شي اسمه يهال...بس هو من وين يعرف جوري....ليكون بس يبى يعاند امايه ....الي جافه من امايه ..مب شويه.. على الطالعه والنازله تعايره بامه ..ومن غير الضرب الي كان ييه ...ومن غير النغزات الي تعق عليه ..احس في سر من بينهم ما يعرفه غيرهم ...وشي يخص زياد..لاني مرة سمعتها ..تقول شي عم زياد...بس ما فهمت وهي لما جافتني صخت....
رفعت راسي اجوف على جوري...جفتها تكلم ربيعتها اسماء...قلبي عورني عليها..وايد ضعفانه جنها يايه من مجاعة صومال..ومن غير الهالات السوداء الي تحت عيونها..وويها شاحب...اكيد من كثر التفكير...ما هاين علي اقرب اثنيه على قلبي اجوفهم بها الوضع...انا مستحيل ازعل منها ..او اخذ بخاطري عليها..بس يالسه اتغلى ...ادري مب شويه الي ياها..كنت اظن انها مستانسه بحياتها ..وانها ناستنا ...سنتين ما فكرت ولا مرة تينا ..واحنا كل ما كنا نبي نزورهم..زياد كان يطلعلنا اسباب من تحت الارض علشان ما نسير صوبهم..مرة دراسة جوري..ومرة مرض حور..ومرة ما ادري شو..كنا نستغرب..بس ناصر كان يقولنا خلوهم على راحتهم..اهم شي يكونوا مرتاحين ...واللحين بس عرفت ليش كل الاسباب السخيفه الي كان زياد يقولها..كانوا منفصلين وما يبون نعرف..ذكاء صراحة ترى مصيرنا بنعرف..وما حد كان ياي يمنع جوري من انها تكمل الماستر..اصلا انا مب مقتنعه من ها السبب ..اكيد في شي ثاني جوري مخبتنه علينا...ان شاء اليوم بروح اراضيها...وبعدين ميعاد مصختها..مخليه حور تتعلق بها كثير..المفروض تتعلق بي انا اكثر ..انا اكثر وحده احب امها..وبعدين هي ماماتي شرا ما هي ماماتها ...جفت صوب ريم...يتني الصيحه..الي يجوف ريم وايد يرحمها..موليه مب طبيعيه...اكيد فيها شي غير طبيعي..كلامها غريب ..تصرفاتها غريبه...مستحيل انسى ذاك اليوم..سرنا انا وجوري وميعاد عندها على الساعه 11 الصبح..وفجاه قالتلنا..ليش ظلمت بسرعه ..انصدمنا كلنا لانه الدنيا صبح فاي ظلام تقصد..خفت تراوالي انها فقدت نظرها..بس هي قالت ليش الشمس غربت بسرعه...كنا مصدومين ..كل وحده تطالع الثانيه..وجوري سارت تزقر خالتيه ام سالم تي تجوفها...اما ريم يلست تسالنا انتو منو ..وشو تبون فيني ...انا كنت اصيح ربيعة عمري ما تعرفني ...وما ادري شو صابها..ويلست تصرخ وتقول طلعوا بره...وبعدين اغمى عليها..يلست خالتيه ام سالم تقرا عليها وهي تصيح...احنا طلعنا ..وكل وحده على راسها الطير...وفي اليوم الثاني سرت اطمن عليها بس البشكارة قالتلي انها على السطح...سرت فوق ..ولما سالتها شو تسوين هنا ..قالتلي انتي منو ..وشوتبين بغرفتي..ها غرفتي ..شو غرفتي..ويلست تقول اشياء غريبه عن طفولتها..وتعيد بنفس السالفه ...وتعيد نفس الجمله ثلاث مرات...صراحة خفت ..لانه عيونها زايغه ..جنها تجوف شي مب اجوفه...سرت ركض صوب خالتيه ازقرها..ولما يت ..نفس الشي سالتها انتي منو..وشو تبين...ولما طبلت مني خالتيه ام سالم اتصل على عمران...هي يلست تصارخ وتشد شعرها وترتجف...وتقول كلام غريب عن عمران...كلام مستحيل يدش العقل...حتى عمران الي كانت تموت على الارض الي يمشي عليها...صارت تكرهه..وما تبى تجوفه..واذا جافته..تيلس تقوله كلام يعور القلب..وهو صابر..لولا انه سالم طالب منه ما يى يزورها ..ولا هو كان مرتز وبايت عند باب بيتهم ...
اول ما سمعت الكلام الي قاله سعود..تصلبت بمكاني...شو ها موضوع ينضحك فيه...لانه عطى خالتيه ام سالم ابتسامه..جنها ابتسامة نصر...شو على بالهم خواتي.مرميات بالشارع ..جي يتكلمون عنهl جدام الغرب ...سرت صوبه ..ويلست اصرخ عليه..طلعني من طوري ...كنت شرا القنبلة الي انفجرت..شكلي طلعت الي فيني عليه ..بس يستاهل محد قاله ما يحشم
سالم:ناصر اهدى...
ناصر:اشقايل تباني اهدى وولد عمك ما يحشم حد
سعود:ومنو الي قالك اني مب حاشمنك..انا اتكلم بجد ..اباها على سنة الله ورسوله
ناصر:والي يبى وحده على سنة الله ورسوله..جي يخطبها
سالم ساسرني :اهدى يا ناصر...خلنا نتفاهم..فضحتنا يا ريال
مليت منها..من الصبح وهي تطرش مسجات ..وتقول متاكد انك مب ناسي شو اليوم...حد يفهمني شو اليوم...خلوني اتذكر.. اليوم الاربعاء..واحلى يوم بحياتي..جفت جمان...ركز يا حمد .. شو دخل جمان باميره...احصر تفكيرك باميرة ...عصرت راسي وما وصلت لنتيجه...سمعت تلفوني يرن..اميرة..حد يذكرني شو اليوم..شو المناسبه...رديت عليها..ول ول ..كلتني بقشاري...ماشي احترام...كله علشان اليوم عيد ميلادها ..وانا ناسي...شو اسوى راح عن بالي...بس شو هاي مضيعه السنع...ما تستحي..تقول جي فيس تو فيس..وين هديتي..لا وتبى ساعه شرا ساعة جمان..وخاتم شرا جمان الي عبارة عن حرف الحاء والي مكتوب عليه اسمي .....قلتلها شو رايج ..ما تبين جمان نفسها...لحضه ..لحضه..اميرة شو دراها انه الخاتم عبارة عن حرفي..ومكتوب عليه اسمي ..اذا جمان نفسها ما اكتشفت ها الشي..لانه اسمي مكتوب بخط جد صغير وبطريقة صعبه انك تكتشفها ...حتى ريم نفسها ما تعرف ......معناته انها ركزت على الخاتم ولبستها ...وانا اصلا طالب من ريم تستحلف جمان انه ها الخاتم ما حد يلبسه غيرها ...وجمان اذا حلفت معناته مستحيل تسوي الشي... ومواعدين بعض انهم ما يلبسون الخاتم الا مع بعض ..بيوم عرس وحده منهم ...وبعدين الاشاعات الي انتشرت كانت عبارة عن كلام....عن اثنيه كانوا ميودين ايدين بعض ...والبهارات الي زودها حضن وما ادري شو ....يعني ..ما حد يعرف عن الخاتم غير ريم وجمان...في شي غير طبيعي ...انا لازم اسير صوب بيتها ..واواجها فيس تو فيس..ومن ملامح ويها اعرف اذا تقول الصج ...ولا تتهرب
ما ادري شو فيه ناصر..وايد هادي وكله حاط يده فوق راسه..ويفكر..
سارة:حبيبي ناصر...بشو يالس تفكر
ناصر:سارونتي..يلسي ابى اخذ رايج بموضوع
سارة:امر ...تدلل..يا بعدهم كلهم
ناصر:ربي ما يحرمني منج يا سارونتي...احم الموضوع يخص جوري
سارة:شو فيها جوري
ناصر:سعود يباها
سارة:ها
ناصر:شو ها بعد..اقولج سعود ...ولد عم سالم يباها
سارة:وانت شو رايك
ناصر:انا ما تعاملت مع سعود بشكل مباشر...فما اعرف اخلاقه..بس سالم يمدحه..ما اى اظلمها ....بسها الي ياها
سارة:تبى شوري...انا اجوف سعود انسب واحد لجوري..هم الاثنين عاشوا اليتم...هم الاثنين محتايين لبعض وكل واحد منهم يكمل الثاني ...هم تقريبا مروا بنفس الظروف..سعود عانى طول عمره من ظلم خالتي ام سالم ومن بعد الاهل ...وجوري الي مرت فيه مب هين...يعني كل واحد منهم يقدر يحوي الثاني بسهولة...وبعدين حور محتايه حد يداريها محتايه حنان الابو...وشوري سعود هو انسب واحد يكون ابو لها لانه عاش من غير ابو..فيعرف اشقايل يعوضها عن ابوها البعيد..ويقدر يعوضها عن كل ها...انت قولها ..والشور الاول والاخير بيدها
رايحه ورداه من الغرفه..ويالسه اتنفس بقوة..توني مسكره من عند اسوم...وهي محتشره صياح..عمها اليوم يى بيت عمتها...ويدتها قالتله بسالفتها...وهو احتشر عليها...وما بقى كلمة تجرح ما قالها...ومن غير الضرب الي يايها..وحليلها هي شو ذنبها...في حره على اختها ..سير دورها وطلع حرتك عليها...وفوق كل ها خلها تلم اغراضها وتسير معاه بيتهم ..على قولته ما امنك ..لازم تكوني تحت عيوني...ابى اسير عندها ..وايد كانت تصيح وهي تكلمني..بس الوقت متاخر وما اعتقد عمها بيسمحلها تجوفني...شو اسوي..سمعت صوت الباب...لبست لحافي..وكان ناصر ..
ناصر:لتكوني راقده ..وازعجتك
جوري:لا مب راقده...
ناصر:جوري اباج بموضوع..ممكن تنزلين للصاله علشان نتكلم
جوري:في شي ناصر...خوفتني
ناصر:لا تخافين..كل خير ان شاء الله..ووينها دلوعة عمها
سمعنا صوت حور وهي تصارخ وتناقز تبى ناصر
جوري:ما يحتاي تسال عنها..بروحها منتزقه وبتييك
ناصر:علني فدى ها الريحه والبسمه ..انا بشل حور معاي ..انتي حصلينا تحت
شو السالفه...مب ناقصه بلاوي..شو هاي السنه اللي مب راضيه تنتهي على خير..الله يستر..نزلت الصالة..وجفت ناصر حاط حور على ريوله ويالس يلعبها ..وسارة يالسه حذاه..
جوري:مساء الخير..هلا سوسو اخبارج غناتي
سارة:مساء النور والسرور
جوري:اوه اوه ..سارة شو ها المزاج الرايق
سارة:احم احم...طول عمرنا طول عمرنا بس انت مش واخذ بالك مننا
ناصر:خيبه سارة...شو ياج امي
سارة:وايد فرحانه..من فرح حبايبي
جوري:فرحينا وياج
سارة:مب انا الي بخبرج..اخوج هو الي بيقولج
ناصر:جوفي جوري...ادري التجربة الي مريتها مع زياد مب كانت سهلة..وادري انج انظلمتي كثير معاه صبرتي سنين عليه..صبرتي على اهماله لج..صبرتي على عدم سؤاله عنج..ومن بعد ما خلاج سنين معلقه ..طلقج بمنتهى السهوله ...مهما كانت المشاكل من بينكم ...ومهما وصل سوء التفاهم..اكيد كان في حل لكل ها ..بس مستحيل كان يوصل للطلاق..لو كان يباج..كان تمسك بج...والي سواه ما راح امرره على خير..وادري اشقايل اخذ حقج منه...بس اباج تحطين ببالج ..انه هو الخسران..ولا واحد ييه جوهرة شراتج..ويرفضها..يكون يرفس النعمه بريوله...ما ابى افتح دفاتر مسكره..ومب ياي افتح الجراح..لانه الي ياج مب كان سهل...الشي الوحيد الي يغفر لزياد انه عطاج حور...
طول ما ناصر يتكلم ..وانا منزله راسي..ودموعي متيمعه بعيوني...المفروض خلاص تعودت على ها الموضوع...الفترة الي مرت المفروض تكون كفايه انه جرحي الي ياني من صوب زياد اندمل..صج انا الي تنازلت وانا الي هربت وانا الي تركت كل شي للجوهرة...كنت اقدر اواجها واتمسك بزياد..وابعدها من حياتي..بس شو الفايده اعيش مع واحد قلبه مب لي...مب يايه انتظر وقت اطول لحد ما يحبني..كفايه السنوات الي صبرت وانا انتظره ...بس شكله الي صار معاي ...شرا لم نصطدم سيارة ..سواء كان الاصطدام قوي او حتى بسيط...بس طول ما نجوف دم طالع من جسمنا..نقول خلاص ما صابني شي....ما تعورت ...يمكن من هول الصدمه اني سويت حادث..او يمكن انه الاصطدام مر على خير ...بس لما يمر وقت بسيط من الحادث ..يمكن ساعات او حتى نص يوم...راح نبدا نحس بالالم....نحس كل جزء من جسمنا يالمنا...شرا لما نمشي لمسافات طويله وبالساعات ..ما راح نحس بالم ريولنا..بس اول ما يمر وقت من مشينا او اول ما نرتاح نبدا نحس بالم ريولنا ...ما يقولوا ما راح تحس بالالم الي لما يبرد..يعني يمر وقت من حدوثه ..او يمكن لاني كنت كابته كل الالم بداخلي ما شاركته مع حد ...شرا لما يتوفى شخص عزيز عليج..سواء منج وفيج او حتى شخص لج مشاعر خاصه صوبه..بس من هول الصدمه تحاولين تتهرين من التعبير عن مشاعرج...تحاولي تكونين طبيعية...بس داخلج رغبه بالصراخ ...رغبه بالصياح بصوت عالي...بس كله تحطينه بداخلج ..ما تبين حد يعطف عليج..حد يرحمج...ولما تكونين بروحج تتهربين من مواجهة نفسج...واول ما حد يفتح معاج الموضوع..وتجوفين نظرة الالم الي بعينه..نظرة العطف ...تحسين نفسج منكسرة...كل المشاعر الي داخلج ينفجروا ..وتجوفين نفسك تصيحين من قلب ...ها الي صار معي اللحين..فجاه ومن غير سابق انذار انفجرت بالصياح ...لدرجة انه حور يلست تصيح معاي...سارة لوت علي وحاولت تهديني...جمان نزلت على صوت صياحي..ويت ركض ولوت علي..يلست تقولي كلام المفروض انه يهديني..لا تهتمي هو الخسران هو الي ما عرف قيمتح...وانا والله مب زعلانه عليج..سامحيني جان عصبت عليج..وصرخت بويهج ..وقلت كلام زعلج...بس لا تصيحين جي...بس بدل ما اهدى صحت اكثر..كلامها يى بالصميم ..يى من شي كنت اتهرب منه ..بس نظرة الخوف بعيونها ..مب بس هي كلهم ..ناصر ..سارة..وحتى ميعاد ..خلاني اهدى..على الاقل عندي ناس يحبوني...ناس يحسون فيني..يدارون علي...
جوري:اسفه...ما اعرف شو الي صارلي ...مب قصدي ازعجكم
سارة:لا تتاسفين ...ما صار شي ...كيفج اللحينه
جوري:ما فيني شي...س شكلي حبيت ادلع واجوف غلاتي عندكم
جفتهم كلهم يطالعون علي بنص عين...وميعاد كانت شايله حور...وبعدها تصيح..اشرت عليها تيبها...يلست احضنها واهديها..
ناصر:كل ها بقلبج..وساكته وتتظاهرين انه ما فيج شي وانه الي صار كان شي عادي عندج..ليش كل وحده فيكم تداري الي بقلبها عن الثانيه..ليش ما تتكلمون وتعبرون عن الي بداخلكم ..عن الي يضايقكم..بدل ما تكبتنونه..وتنفجروا مره وحده..ولا ييكم امراض نفسيه...شو تستحون من بعض..ولا ما تعتبرون بعض خوات...من بعد اليوم ما ابى اجوف وحده منكم شايله جروحها بروحها..سامعين ...وبعدين جوري انا بعدني ما قلتلج عن الموضوع الاساسي..الى اباج فيه...
جمان:غرد يا ابيه ...
ناصر:ابيه بعينج طل...بعدين ولش لج انتي بالسالفه
سارة:هذه ماخذه لقافة العالم..ما عندك خبر
ناصر:سعود..ولد عم سالم..ياي يخطبج..ويبى يملج باجر
جمان:والله...مبروك ..مبروك..صبرتي ونلتي..سعود ما فيه منه اثنين
طالعنا عليها كلنا بنص عين
سارة:لتكون الاخت متربيه معاه
جمان:ها...لا يعني ..ريم كانت تمدحه..وبعدين يكفي وقفته مع ريم
ميعاد:انتي مالج دخل بالسالفه...الشور الاول والاخير لجوري..بس هو ليش جي مستعيل..
ناصر:يقول انه يبى يستقر..وانه ماله داعي للتاخير..جوري خذي راحتج بالتفكير ولما تقرري عطيني خبر..بس قبل ما تاخذي اي قرار ..فكري بالموضوع من يميع النواحي ..وفكري بحور
نشيت من الرقاد..على صوت تلفوني المزعج...جيكت على ساعتي..جفتها 5 الصبح..بسم الله منو الي متصل فيني بها الوقت..الرقم غريب...اول ما رديت على التلفون ..وسمعت حس واحد وتنهيدته جنه هموم الدنيا فوق راسه...وقال
:تتزوجيني
طاح التلفون من يدي
الجزء (24)
هايسه من الصبح وراي برسنتيشن الاسبوع الياي...جدام المدراء كلهم....الله يعين..اسوم برسينتيشنها ها الاسبوع ...شكلها وايد مستهمه...اكيد جافت الويل من عمها امس ..ابى اسالها بس ما اقدر اسالها جدام الي معانا بالمكتب...يله باجي شوي على بريك الغدا...حشى ما بغى يي البريك...سرينا انا واسوم صوب المطاعم نتغدا..
جوري:يعني كل ها الحزن..علشان مستهمه من البرسنتيشن
اسوم:ولا داريه عن هوا داره..
جوري:عيل شو فيج...
اسوم:عمي ...امس شرشحني لحد ما قال بس...ما بقى حد من عايلتي ما غسل شراعه..شكله صبر السنوات الماضيه طلعهم علي امس..
جوري:وانتي شو رديتي عليه
اسوم:منو انا...الله يسلمج كنت صم بكم عمي...مب كنت يايه ارد عليه ...عمي ولزوم احترمه ...
جوري:يعني هو يدري انج يايه الدوام اللحينه
اسوم:ما اعتقد ...وانتي شو يديدج
جوري:سعود ..ولد يرانا خطبني...ويبى الملجه اليوم
اسوم:شو ..يملج اليوم..وليش جي مستعيل..وانتي وشو رايج..لا تقولين ما بوافق ..بضل طول عمري اربي حور..وما ادري شو..يعني كلام افلام
جوري:حشى بالعه راديو...بقولج كل شي..تذكرين اليوم الي جفنا فيه سعود بالمحل ...من ذاك اليوم وصورته مب راضيه تروح من بالي...انا كنت معجبه فيه من وانا صغيرة..يعني مب وايد صغيرة بالاعداديه..قبل ما زياد يملج علي...كنت كل ليلة افكر فيه..اتخيله فارس احلامي ...تدرين عاد مفعول المراهقة...دايما كنت اجوفه مثلي ...انه اكثر واحد حاس فيني....نظرته لما كان يطالعني وانا انتظر الباص ....انا وهو عشنا من غير اهل...على الاقل انا كنت عايشه وسط بيئه يحبوني ..ام واب يحبوني..بس هو وضعه كان وايد صعب..خالتيه ام سالم وايد كانت جاسيه معاه...بالاول كان على بالي بسبب امه...على كلام ريم...امه مب من اهلهم...وابوه لما خذاها ...وايد استوت مشاكل ...بس بعدين ردوا شرا قبل ...بس بالسنه الي سافر فيها زياد للندن..بنفس السنه ..خالتيه ام سالم ..جست عليه اكثر...ما كانت ترحمه..جم مره طردته من البيت ....جم مرة قللت من جيمته جدامنا...كنت وايد ارحمه..كنت احسه محتاي للحنان..صعب انك تحس نفسك محتاي لحد...تبين الصراحة..انا وايد خايفه..خايفه اوافق ويطلع شرا زياد يحب وحده ثانية...وخايفة ارفض..واحرم حور من انها تعيش شرا غيرها من الاطفال ..بين ام واب...
اسوم:جوري...محد يدري ربه شو كاتبله...هاي اشياء بعلم الغيب..تفائلي بالخير
جوري:الله كريم...
في شي مب طبيعي...هاي ثانية مرة اجوف شيخة واقفه مع خليفه..الي يعتبر علم فوق راسه نار من صياعته ولواته..ما مبقي بنيه بالبلاد ما غازلها....بس نظراتهم هم الاثنينه..صوب مكتبي..,هم ما عندهم خبر اني يالسه اراقبهم...يبالي اتجرب واسمع خططهم...شكلهم ناوين على مصيبه...شو الي يالسه اسمعه...مستحيل تكون شيخة وصلت لهاي الدنائه..سمعتها تقول لخليفة..بطلب منها نطلع انا وهي ..ومنها بوصلها لشقتك على اساس انها شقة ربيعتيه... انا متاكده انها تقصدني...نظراتهم صوب مكتبي...يا ربي اشقايل اتصرف اللحينه ...ناصر ..ماشي حل غيره...اتصلت عليه ..مرة ومرتين ..بس ما يرد...وعلى المرة الثالثة رد علي...بس شكله من ربكتي ...ما فهم شي...صالعت على ساعتي...رحت فيها ..راح يبدا الميتنج بعد خمس دقايق...
مستحيل ...الي قالته اميره..شي مستحيل..ما يدش العقل..معقوله...في ناس جي..تفكيرها جي..حنا وين عايشين...حسيت عمري بفلم..سرت صوب بيتهم...يلست اترياها بالميلس ...انا وسعيد...طلبت منه يزقر اخته ..بالزور اقتنع ..قلتله موضوع مصيري ..لازم اسمعه منها فيس تو فيس...واول ما واجهتها انكرت..ظلت تلف وتدور..وما رضت تعترف..بس كنت متاكد انها يالسه تجذب ..عيونها زايغه...وتبلع ريجها بين كل جمله...يبت المصحف...حلفتها بالمصحف ..تقول انها مب ورى سالفة جمان...يا ليت ما حلفتها..ليش ييت...ليتني كنت عايش على عماي...ولا سمعت الي قالته...مسكت راسي..لاني احس الدنيا تدور..حسيت الاكسجين خلص..حسيت السقف طاح فوق راسي...كل ها يطلع منج يا اميرة..ليش ...مهما كنت تكرهينها ..ما توصل تسوين الي تسويه....تصدقون كنت ناوي اصفعها...اذبحها بمكانها...بس سعيد سبقني ..وعطاها صفعه...طلعت ركض لغرفتها...ويابلي ماي ..علشان اهدي..لاني كنت ارتجف..حتى نص الماي انجب على الارض...يعني انا ظلمت جمان...يعني طول الفترة الماضيه كانت بريئه...
احس الغرفه تدور علي..شكلي يالسه احلم...ولا بسبب السهر الي سهرته امس وي جوري...يتراوالي سمعت حس حمد بالتلفون...رديت ارقد..بس تلفوني رد يرن ..مرة ثانية ...يودته ..وضغطت على زر الرد...
جمان:ح...حمد
حمد:يا عيون حمد...يا كل حمد...يا روحه
جمان:من وين يبت رقمي ...انت وين..وصوتك ليش جي
حمد:رقمج عندي من خمس سنوات ...جمان...انا تعبان..ظلمتج...سامحيني يا جمان...
جمان:واللحينه بس اكتشفت انك ظلمتني....وان شاء اشقايل عرفت
حمد:واجهت اميرة وهي اعترفت بكل شي
جمان:اميرة..شو دخل اميرة بالسالفة
حمد:ربيعتها هي الي كانت مع خليفة ذيج الليلة..وهي الي خذت اغراضج من السيارة
جمان:ربيعتها...ومنو الي ياب اغراضي بالسيارة...
حمد:تقول انكم ظهرتوا قبل الامسية وسرتوا المطعم تتغدوا ...وهي جافت الاغراض بسيارتج..وعرفت انهم اغراضج..وتقول انها سمعتكم انتي وريم تتكلموا عن الخاتم...
جمان:بس انا جيكت سيارتي قبل ما اسوقها ما جفت شي..ولما رديت البيت من بعد الامسية..الاغراض كانوا بغرفتي...
حمد:يا يهمني شي اللحينه..الي يهمني انج تسامحيني
جمان:بعد شو يا حمد ...بعد شو
حمد:جمان...
كنت يايه اقوله..يا حياة جمان..بس تداركت عمري...اسمع صوت البحر ..شكله مب راقد طول الليل
حمان:حمد رد البيت ...شكلك وايد تعبان
حمد:ما ابى ارقد..ابى بس اسمع كلمة انج مسامحتني...
جمان:ما اقدر يا حمد...انت كسرت شي جبير بداخلي..دمرتني..ضيعت ثقتي بالناس..خليتني اشك بكل الناس...تصدق كل الكلام الي انقال عني ..وكل الناس الي بعدوا عني ...ونظرة الناس لي...ابدا ما اثروا علي ..كثر ما اثر علي كلامك..شكك فيني...دمرني...اذا انت الي تربيت معاك ..شكيت فيني ..فاشقايل اللوم الغرب...صعب اسامحك يا حمد..صعب
حمد:جمان ..انا اسف...سوي اي شي ..عاقبيني باي طريقه..بس لا تبعدي عني...انتي الهواء الي اتنفسه..انتي روحي...القوة الي استمد عليها طول عمري..كل شي سويته ..علشانج...علشان اوصلج...لا تبعدي ...اترجاج يا جمان...
جمان:ما اقدر يا حمد...ما اقدر ..
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك