رواية عودتني كل يوم اسمع انا صوتك -20
سلامة : شو ما بتسلم ع سارة ..؟؟..
و سارة اتطالعها بنظرات .. و الله بذبحج... ..
و مبارك من سمع طاري سارة افتر صوبها .. و شاف نظرات سلامة لحد فالحجرة .. جان يدز الباب .. و شاف سارة يالسه عالارض و الأوراق حولها من كل صوب ......
وقف مبارك شوي يطالعها .. مب مصدق .. و هي موخيه برأسها...... ..
مبارك و هو ما شل عينه من عليها : سلامة روحي هاتيلي ماي ..
سلامة : بييبلك من ثلاجة اللي في المطبخ التحضيري ..
مبارك و بعده ما شل عينه من على سارة : لالالا .. ما با .. هاتيلي من المطبخ اللي برع ..
سلامة : فهمنا .. بس الخلوه حرااام ... وسارة تستحي منك ...
مبارك و هو يفتر صوبها :أنزين طلعي برع شوي
سلامة:لا والله .....ماراح أطلع لو تموت ....
ما سوالها مبارك سالفه .. دفرها و رد الباب شــــــــــوي .. ...وتمت سلامة يالسه قدام باب حجرتها وتتحرطم ومدخله رأسها من الباب............
مبارك : ما بسكره .. عشان ما يقولولنا خلوه .. هههههههههههههههههه ..
ابتسمت سارة وكانت وايد مرتبكة من حركة مبارك .. ....
مبارك و هو يطالعها : حلوة القصيدة أو لا .. ؟؟؟...
تمت سارة ساكته ..
مبارك : دخيييييييييييييييلج رمسي ..
هزت سارة رأسها بحركة تعني أيووه ..
مبارك: حرام عليج .. و الله انج عذبتيني ليالي .....
مبارك بجد : سارة ..
أحبج ....
لك عهد مني ما دام الروح حيه .. ما اخونك يالغلا ترف الشبابي
لانك انته بك حلاة و جاذبيه .. و مفتند رمشك على سود الهدابي
من لحظ رمشك انا روحي ضحيه .. تهت في حبك و لا حد ٍ درى بي
مبارك : مستحيييييل يا سارة اني أفكر بغيرج .. انتي ملكتي الروح و القلب ..
استحت سارة منه و نزلت رأسها ..
مبارك : آاااااه .. ياويل حالي منج .. بتذبحيني ..
فهاللحظة ..
سلامة : لا و الله ؟؟.. وايد معذبتنك ..
افترت سارة و مبارك صوب الباب .. مع ان سارة كانت بعدها مكانها .. و مبارك بعيد عنها واااايد .. بس حست عمرها في موقف مشبووه ..
سلامة بجدية : عن المغازل ع تالي الليل .. لا و الله افظحكم في الحارة ...
سارة و بحركة لا اراديا غطت ويهها باديها .. استحت ..
أما سلامة تمت تضحك على سارة وتقول في خاطرها ياليت هذا الموقف يصير لي مع أحمد.... بس يوم صار هذا الموقف معي أنا وأحمد أنا صديته عني أفداه روحه ...بس أنا من حقي لانا كنا في البيت بروحنا... بس بيتنا غير موجود فيه كل الأعمار والإحجام والواحد ما يخاف على نفسه اذا يلس فيه .........
وتمت تضحك على عمرها في شو تفكر؟.!؟!.!.!؟!.!!؟!. ...........
و سارة تمنت موتها و لا هالموقف ..
سارة و هي تلم أوراقها : انا برووح البيت .. تأخرت واااايد ...
و قدها بتطلع ..
سلامة : لحظه بوصلج ..
سارة:لا بتصل لأمي علشان طرش الدريول ......
مبارك : وليش الدريول انا بوصلج..
سلامة:لا والله بصفة شو توصلها ...
مبارك:بصفتي حبيبها وزوج المستقبل أن شاء الله .....
سارة استحت يوم قال مبارك بأنه زوج المستقبل .....وبعد جدال طويل راح مبارك عنهن لانه تعب يوم راح دبي...و راحت سلامة هي وسارة تحت واتصلت بأمها علشان تطرش الدريول ... وكان سارة بتموت من الفرحة لانها شافت مبارك اللي ما شافته من أسبوعين ...وبعد ربع ساعة يا الدريول وراحت سارة بيتهم..أما سلامة راحت حجرتها علشان تنام وتقوم باجر من الصبح .....
باليمعه .. كالعادة .. الساعة 3 الظهر .. رجعوا مبارك وأحمد كلية زايد .. و سلامة و سارة تذاكرن ....في ميلس قوم سيف الخييلي ....
سلامة:تصدقين سارة ...
سارة:شو ...
سلامة:ما أصدق أن باجر أخر يوم في الامتحانات ...
سارة:حتى أنا أحس به حلم ....ما توقعت راح يجي ...من كثر ما أتمنه ...
سلامة وهي تحل معادلة :أقولج ؟؟؟؟
سارة وهي طالع فيها:هلا
سلامة:الحين خلص هم الامتحانات ,,,,هم ثاني مقبل علينا ...
سارة بضيقه :شو بعد .....
سلامة:النسبة ...
سارة:دخيلج لا تطرينها من أسمع طاريها أحس بطني تعورني ....
سلامة:وأنا مثلج ...سارة كم تتوقعين عمرج راح تيبين ....
سارة:ماني حاطه في بالي نسبة معينة ....
سلامة :عكسج أنا ...
سارة:كم حاطة في بالج ...
سلامة وهي تفكر :امممم ؟!؟!؟!؟!
سارة:كم ؟؟؟...
سلامة:أخاف تضحكين عليه ...
سارة:والله ما أضحك عليج ...
سلامة بتردد:بين 96% و97% ....
سارة من سمعت الرقم نقعت من الضحك ...
سلامة :ليش تضحكين أنتي وعدتيني ما تضحكين ....
سارة وهي تضحك :ما توقعت هذا الرقم ...قلت أكثر شيء بتجمعين 88 %....
سلامة:أنا هذا طموحي ...
سارة:ممكن تحصلينها ليش لا ...
سلامة:صح ممكن مو أنا حليت في كل الامتحانات بس الإنجليزي يعني ....
سارة:سلامي ...
سلامة:عيونها ...
سارة:شو راح تسوين باجر .....
سلامة:أاااااااه ....كل شيء
سارة:شو ...
سلامة:أول شيء بنام لين ما أخيس وعفن ....
سارة:وأنا نفسج ...وبعدين .....
سلامة:بخليهم يودوني السوق وأنتي بتروحين عندي ....
سارة:أه... لا تخلينا نحلم وايد ....
سلامة:ليش معتبرته حلم ...
سارة:السوق شوي صعبة .... ماراح يخلونا نروح أروحنا .......
سلامة:بنخلي اليازية والعنود والريم يرحون عندنا ....تصدقين سارة ..
سارة:شو ...
سلامة:أن ريموه حتى الحين تسألني عند هذا اللي أتفداءه يوم سمعتني أكلمج ...
سارة:خبريها ...عادي ما فيها شيء ؟؟؟؟
سلامة:أخاف تنشرها ...
سارة:لا ريموه شكلها اذا خبرتيها بسر ما تخبر حد عنه ....
سلامة وهي تغمزها لسارة : بس كل شيء بوقته حلو ...
سارة:أنزين خبريني أشلون حليت هذي المسألة ...
كملن سارة وسلامة مذاكرة ...
...............................
في الصالة الريم يالسة هي وعفراء حرمت محمد .........
الريم:والله ضيق ...
عفراء:شغلي التلفزيون ...
الريم:من الصبح وأنا أقلب فيه بس ما حصلت شيء يفتح النفس .....والله أني مشتاقة للجامعة كلها سوالف وضحك ..
عفراء:حشى ما وحيتي تشتاقين الا من أسبوعين عطلتوا ..
الريم:ما نروح مكان أكيد ب نضيق ....24 ساعة الواحد مقابل اليدااار.... العالم تسافر في الصيف وأحنا محروم علينا ..
عفراء: انزين قومي نطلع في الخيمة ...
الريم:حـــــــــــــــــر
عفراء:شو حر ....راح نشغل المكيفات ...
الريم:يالله قومي .....يا أم الكرش ..
عفراء:بنشوفج بعد عرسج بشهرين أنج تسحبين بطنج قدامج ....
الريم اكتفت بالضحك وما ردت عليها .....
يلسن في الخيمة ترمسن ....
وشوي افترت عفراء صوب راشد أخوه الي كان توه حادر من باب الخيمة .. و هو من دخل و عينه ع الريم .. الي كانت عاطيتنه ظهرها .... جان يبتسم ..
فهاللحظة وقفت الريم و افترت صوبه ..
راشد و هو يسلم ع عفراء و يشوف الريم : شحالج الشيخه ..؟؟..
و الريم قلبها يدق بالقو : بخير .. احم .. بخير ربي يسلم روحك ..
جان يبتسم زووود .. يالله فديت هالمنطوق ..
راشد:اشحالج عفراء ؟
عفراء:بخير يعني أفداك ....
راشد وهو ييلس عدال عفراء:علومج الريم ؟!؟!؟!؟!؟
الريم و هي تنزل رأسها و تلعب بايدها بطرف الشيلة من التوتر : طيبة ...الحمد لله ....
و فهاللحظة نزل راشد عيونه لصبوعها .. و هو يشوفها و هي تلعب بطرف الشيلة .. بطريقه وضحتله انها متوتره .. و هذا الي زاااده فرحه .. متوتره .. مممممممم .. .....
الريم وهي تقوم من مكانه :عن أذنكم ....
راشد: وين الريم والله أني ياي علشانج .,.,.,.,
الريم :ذكرت شيء ولازم أروح أسويه .....
راشد:خلاص خذينا عندج...
الريم طلعت من الخيمة وهي تضحك على راشد ......
وتمت يالسة وراء الخيمة تسمع راشد شو يقول لعفراء .......
راشد وهو يصبله قهوة:تصدقين يا عفراء ....
عفراء:شو ...
راشد:كل يوم تحلى الريم أكثر .....وتكبر في عيني.....
عفراء:الريم حلوة ..
راشد :حشى مب الا حلوة الا ملكة جمال في نظر عيني .....
الريم وهي تسمع كلام راشد وتقول في خاطرها :عني افداء عينك ....
عفراء:متى عرسك أن شاء الله ...
راشد:ممكن يكون 6-8 ما أدري حتى الحين .....
عفراء :ليش ما هو أكيد ...
راشد:على حسب حجز القاعة ...
عفراء:اهااااا...
راشد:وين هل البيت ...
عفراء: كلهم رايحين العزبة ...
راشد :ومحمد ..
عفراء:عندهم ....
راشد:حر في العزبة ....
عفراء:يشوفونه عــــــــــــــادي
راشد: خلاص أنا بروح شيء في خاطرج ؟!؟!؟
عفراء:وين رايح ...الحين الريم راح تي ....
راشد وهو يضحك:ههههه أنت ما تدرين عن الريم تقول بتروح ...وتروح وما ترجع ...تســـــــتحي عـــني أفـــــــداهــــا ...
الريم من سمعت راشد يتفدبها ربعت صوب الصالة وتمت توايق من الدريشة على راشد ...
راح راشد وركب سيارتة وكانت تسير عنده عفراء ووقفت تكلمه وهو راكب السيارة ......شغل راشد السيارة وطول للمسجل ع الاخر ..... أغنيه حمد العامري ((لايق عليك))...**وتم يطالع في البيت كأنه يقول للريم هذا إهداء خاص لعيونج *** .....
لايق عليك الحسن والزين
متميز بالوصـــــــــف فتان
تذبحني النظرة من العين
وأموت انا في بحر الأعيان
مرفوق ما بك زلة الشين
حشى ولا بك اي نقصان
اسمك وحرفك دايم يزين
سيد العذارى ريم الأوطان
مالك شبه سيد المزايين
الغر اللي بك العود رويان
شفت من نــــــورك يبين
شفت الزهر ف خدك الوان
فيك الغلا بد المـــــلايين
في خاطري يا أعز انسـان
روحي وروحك صدج روحين
في جسم واحد طول الازمان.....
الريم من سمعت الأغنية تخبلت ..وتمت توزع أبتسامات ..من زود الفرحة ...
*&*((الجزء الرابع عشر))*&*
بالباجر كانت سلامة بتموووت من الفرحة ....من كثر ما هي فرحانة ما نامت أمس وما تصدق أنها خلاص راح تخلص الدراسة.....
الساعة 6 الصبح راحت سلامة تتصل بسارة ......
سارة وهي ترد على التلفون:ألووووو ..
سلامة:أهليين سارة ....ألف ألف ألف ألف ألف ألف مبروك على انا خلصنا امتحانات ....
سارة:الله يبارك فيج و عقبال النسبة اللي تبيض الويه ....
سلامة: أن شاء الله .....علومج شو تسوين ...
سارة:أطلع التلفزيون ....
سلامة:حاطة على أي قناة ...
سارة:أطالع قناة النجوم ....
سلامة:يا ســـــــــــــلام الأخت مكيفة على الاخر ....تسمع أغاني ....
سارة:ليش ما أكيف شو ورانا ....
سلامة:بعدنا ما خلصنا باقي أمتحان واحد .....
سارة:أنا ما أعتبر اليوم امتحان.... وهو كله رياضيات ....
سلامة:يالله عليج يا سارة الرياضيات عليه ميه درجة ويباله تركيز ....
سارة :خلاص فهمنا ...
سلامة: سارة تعالين الحين ...
سارة وهي تشوف الساعة:الحين الساعة 6 الصبح ....
سلامة:عادي بنتريق مع بعض ...وبنسولف و بنضحك أمانة تعالي ...
سارة:خلاص راح ألبس وخلي الخدامة توديني صوبكم ...
سلامة:عيل أترياج ....
سارة:أوكية ...باي ....
سلامة:باي ...
وبعد نص ساعة يات سارة لقوم سلامة وكانت توها حادرة باب الدروازة لقت سلامة يالس في الحوش وفارشه الفراش وحاطة الدلال والحرارت ......
سارة وهي تسير صوب سلامة:ياويل حالي .....العيوز يالسة في الحوش ....
سلامة:عيوز في عينج يالخامة ....
سارة وهي تضحك : هههه والله أنج تقلدين العيايز ...
سلامة وهي تقوم علشان تسلم على سارة: حرام عليج ......
يلسن سلامة وسارة وتريقن وبعدين راحن المدرسة الساعة 7ونص وكنن البنات مرتبشات على أنه اليوم أخر يوم في الثانوي العامة ........ خلصت الامتحانات الثانوية العامه .. و ما بقالهم الا النتايج .. عساهن تبيضن الويه انشالله ..
..............................................
بعد أربع أيام من أنتهي امتحانات الثانوية العامة .....
في البيت سالم يكلم خويه محمد الكعبي ...
سالم : ياخي مرتبشين ..
محمد : افا .. ليش ..
سالم : ختيه وربيعتها في الثانوية العامه .. و نبى نعرف النتايج ..
محمد : فالك طيب .. عطني اسمائهن و أرقام جلوسهن .. و انشالله بحاول اظهرهن لك بسرعة .. عندي واحد من بني عمي يشتغل في الكونتر ...
سالم : و الله ....
محمد : هيه و الله ..
راح سالم وتخبر سلامة من رقم جلوسها ورقم جلوس ربيعتها سارة .....
سالم : اوكي ..ختيه .. سلامة حمد******.. رقمها 21399 ..وربيعتها سارة سيف ******* .. رقمها 22675
و محمد يسيف الأرقام و الأسماء في تيلفونه .. ...
بالمغرب .....
كانت سلامة والريم والعنود واليازية يالسات في الحوش من وراء ....وكانت الريم فاله شعرها اللي يوصل لين ركبتها ...وتعدل ظفورها ....
سلامة:عني أفداء سارة من كم من يوم وأنا ما شفتها ...
الريم:صج وين راحت ....مالها حس ولا خبر .....
سلامة:راحت الهير صوب بيت يدها ....
الريم:قولي جذي وأشوفج من كم من يوم وأنتي مب في حاله ....
سلامة:تصدقون نفسي أروح السوق ...
اليازية:خلاص خبري أمي أنج تبين أغراض وراح تخليج تروحين .......
سلامة:ظنج ...
اليازية:ما راح ترفض لج طلب لانج توج مخلصة امتحانات من حقج ترفهين عن عمرج ...
سلامة وهي تضرب رأسها :صج كيف نسيت ...
العنود:شو نسيت ...
سلامة:امممم .....
الريم:قولي الله يخذج ...
سلامة:حرام عليج لا تدعين عليه ...
الريم:أنزين تكلمي اذا ما تبيني أدعي عليج .....
سلامة:بقول لامي تودينا حديقة الهيلي ....
الريم وهي تصفق : و الله ونــــــــــــــــــــــــــا ســـــــــــــــــــــــة ....
سلامة:لا أنتي صكي في البيت ...
الريم:ليش عاد ...
سلامة:أنتي عروس ....والعروس عيب تحوط في الحدايق لازم تترتبين وتتعدلين علشان تطلعين حلوة في يوم زفافج ...
الريم وهي تضرب سلامة على كتفها :الله لا يوفقج سمعي أمي بعدج .....
سلامة:والله لاخبرها ...
الريم:خبريها ....قسم بالله لا أروح وأنتي حمارة ...
سلامة وهي تحاول تغيض بالريم:أن شاء الله يا ست ريم ..... أن شاء الله....
الريم انقهرت على سلامة وراحت ومسكت سلامة من أيدها وعضتها بقوا........
سلامة : أيييييييييييييييييييييييييي الله لا يوفقج يا لمجرمة عورتيني .....وتمت سلامة تمسح على أيدها ...
سلامة :يا ويلك يا راشد من الريم أكيد بتشوفك نجوم الظهر ....
الريم بنقمة :لا والله ....
سلامة وهي تشوف ايدها :حرام عليج ريموه والله أنج شوهتي أيدي أول شيء مبارك وأنت الحين ....
الريم:تستاهلين ...
اليازية وهي تلتفت للعنود:العنود شو فيج ...
العنود وهي اللي كانت في عالم ثاني وما أنتبهت على اليازية وهي ترمسها .......
اليازية وهي تغمز العنود بأيدها:حوووووووه شو بلاج ما ترمسين ...
العنود وهي تنتبه لليازية:هاه ...
اليازية:لا أكيد أنتي في عالم ثاني ...
العنود:شو تبين ...
اليازية:في شو تفكرين ...
العنود :ما شيء .....بس أحس بروحي أني تعبانة ...
اليازية وهي تغمز للعنود :اها ...تعبانة .....
فهاللحظة وصل مسج للعنود ....بس العنود من سمعت بالمسج أرتبشت وما قدرت تفتحه لان الريم وسلامة عندهن ...
سلامة:ليش ما تشوفين منو مرسل المسج ...
العنود:هذي الاتصالات ....أكيد ...
سلامة:شو دراج ....عطيني تلفونج علشان أشوف من مرسل المسج ....
العنود:ما با .....
سلامة وهي تحاول تمط التلفون من عند العنود: أقولج هاتي التلفون ....
العنود وهي تمسك التلفون بقوا :غصب ما راح أعطيج التلفون ....
راحت اليازية ومطت التلفون من عند العنود .....وما طاعت تعطي سلامة .....
اليازية:قويت بأس ...غصب..... ما تباج تشوفينه .....
سلامة:قسم بالله أن المرسل ريال ....ما عليه ما خبرت سالم ...
العنود من سمعت بسلامة أنها بتخبر سالم : لحظة ....شو خصه سالم ....في السالفة
سلامة وهي تحط أيدينها على خصرها :زوج المستقبل لازم يتحكم فيج من الحين ....
العنود:منو قالج أني راح أتزوجه ...
سلامة:الكل يقول .....مو أنا بس ....
العنود وهي تكابر :أطمني أنا ما راح أتزوج سالم ....
سلامة:بنشوف ...والأيام اليايه راح تثبت ها لشيء ......
العنود:بنشوف ....
فهاللحظة سمعن البنات حد يصيح هرن بقوا [[بيب بيب بيب بيب ]].......
اليازية:بسم الله من يصيح لا يكون حد صاير له شيء ...
الريم:أن شاء الله خير ......
وراحن البنات للحوش من قدام وشافن سيارة محمد واقفة .....
وسلامة وهي تربع صوب دريشة محمد: محمد ليش تصيح بقوا .....
محمد:وين أماية ....
سلامة:ما أدري عنه ..
محمد وهو معصب :روحي خليها تي هي قوم عفراء ....
راحت سلامة وتمت تخبر الريم بشو قالها محمد ....وبعد دقايق طلعن أم راشد وأم محمد وعفراء ...وكانن ماسكات عفراء من أيدينها ...العنود من شافت عفراء في ها لحاله ربعت صوبها .....
العنود:بسم الله عليج عفراء شو فيج
أم راشد:العنود فتحي باب السيارة ...ربعت العنود وفتحت الباب........
وساعدن أم محمد وأم راشد عفراء علشان تركب السيارة .................
العنود:أماية ما تبيني أروح عندكن ....
أم راشد وهي تركب السيارة:لا عني أفداج ....
اليازية:أنا بروح عندكم ....
أم محمد:لا اليازية يلسي عند خوانج أنتي ...
اليازية:أن شاء الله أماية .....
الريم:أماية اذا ولدت اتصالي علينا وخبرينا ...
أم محمد:أن شاء الله ....
وراحو صوب مستشفى توأم ...قسم الولادة .....دخلن الحريم عند عفراء ......أما محمد كان يالس في حجرة الانتظار على أحر من الجمر ......
في بيت بو محمد كان الجو ولا أحلى مع خبر ولادة عفراء ...الكل كان مستانس ويدعي لعفراء أنها تقوم بالسلامة .,.,.,.,.,
كان سالم توه حادر البيت والعايلة كلها يالسه في الحوش صغيرهم وكبيرهم ..........
وسالم وهو داخل بسيارته الرنج الذهبية الحوش مطول على الاخر للمسجل .......وراح وقف قدام الخيمة ونزل الدريشة ....
سالم وهو يضحك:علومكم أشوفكم كلكم يالسين برع ...
سلامة وهي تربع صوب السيارة (تموت على السيارات):علومك ....وصلك خبر شيء ...
سالم:خبر مثل شنو ....أه قصدج النسب بعدهن ما ظهرن ....
سلامة:لا عفراء راحت تولد وأسالك شو يابت ....
سالم:افاااااا من متى ها لخبر ...
سلامة:من نص ساعة راحو المستشفى ....
سالم:أي مستشفى ...
سلامة:ما أدري ...ممكن العنود تدري
سالم :وينها العنود ....
فهاللحظة كانت العنود تتكلم في التلفون .....
سالم وهو يصيح للعنود :عنــــــــــــــــــــــــود ...
والعنود وهي تسمع سالم يناديها ردت على التلفون:لحظة .....وراحت صوب سيارة ....
العنود:لبيه سالم ....
سالم:لبيتي حايه اشحالج ...
العنود:بخير الحمد لله ....
سالم:أقول العنود قوم عفراء باي مستشفى ..
العنود:في توأم ....
سالم:مشكورة العنود ....سلامة قومي من الدريشة ....
سلامة:ياسلام أبا أروح عندك ...
سالم:سلامة ما فيني على حشرة ....قومي عن الدريشة ...
سلامة وهي تقوم من الدريشة :أنزين .....
وراح سالم صوب مستشفى توأم ..... وهو في طريقه للمستشفى أتصل بمحمد .........
محمد وهو متردد يرد أو لا وبعد تفكير دقايق ....ما رد ..سكر سالم لان محمد ما رد عليه وبعد 5 دقايق أتصل مرة ثانية ....وبس هالمرة رد محمد...
محمد وصوته تعبان:ألووووو ....
سالم:أهليين بو حمد .....علومك ...
محمد:ما شيء علوم ...
سالم :ولدت حرمتك ولا بعدها ...
محمد:لا بعدها حتى الحين ما شفت حد علشان يخبرني ....
سالم:الله كريم أن شاء الله .....
محمد:وين أنت .........
سالم:والله في طريقي صوبكم ..
محمد:والله ما تي اذا ولدت راح أخبرك ....
سالم:خلاص أول ما تولد أتصل عليه.,.,.
محمد:أن شاء الله ....
..........................................
في البيت اليازية والعنود محتشرات تبين تعرفن عفراء ولدت أو لا .....
اليازية:ياويلي من أمي ما ترد على تلفونها ....
الريم:والله أنج رايقة .....اذا ولدت بتتصل علينا أمي ...
سلامة:هيه صدقها ريموه ....بس خاطري أروح أنام عندها في المستشفى ...
الريم وهي تضحك: ههههه الحين أنتي محتشرة علشان تنامين عندها في المستشفى ....
العنود:ظنج اليازية شو فيها عفراء ...
اليازية:أكيد ولد ...
العنود:ليش ....متأكدة ...
اليازية:أحس بمحمد مهتم فيها واااايد ....
العنود:بسم الله منج ...الحين الواحد اذا أهتم بزوجته يعني فيها ولد ....
اليازية:ايوه ...
العنود:غريبة أعتقداتج ....
في المستشفى طلعت أم محمد تبشر ولدها ....
أم محمد:مبروك الريال يا بو حمد ...
محمد:يابت ولد ....لك الحمد والشكر يارب ...علوم عفراء بخير ...
أم محمد:الحمد لله ما فيها شر ....
راح محمد واتصل بالسالم .....
محمد:ألووووو
سالم:أهليين ....بشر شو يابت ...
محمد:يابت ولد ...
سالم:ألــــــــــــــــــف مبروك ....
محمد:الله يبارك فيك والفال لك أن شاء الله .....برايك سالم بتصل بويه علشان أخبره ....
سالم:مع السلامة .....
وراح سالم وأتصل لليازية ............
اليازية وهي تشوف الرقم :هذا سالم أخوي أكيد عنده خبر.......
العنود:ردي عليه بسرعة ........
اليازية وهي ترد على سالم:ألوووووو
سالم:أهليين اليازية .,..,.,,.
اليازية:أخبارك سالم ....
سالم:أخبار الخير أن شاء الله .......
اليازية:هاه ولدت عفراء .......
سالم:أيوه .
اليازية وهي متحمسة :شو يابت
العنود وهي تغمز لليازية :قولي شو يابت ...
سالم: حطي على الميكرفون اليازية ...........
اليازية وهي تحط على الميكرفون :هاه قول شو يابت ..........
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك