رواية ويبقى خالد -28
البارت التاسع و العشرون :
دخلت اسراء البيت و كانت تعبانه من حرارة الجو ، اما خالد فـ كان موجود بالبيت مرتاح و قاعد يقرا جريده و وليد يمه يلعب معاه
خالد : تأخرتي
اسراء : اي والله تأخرت ، كان عندي شغل وايد اليوم
خالد : انزين ، يلا يلا بسرعه غيري ملابسج و تعالي حطي الغدا ترا ميت من اليوع
اسراء : يالله شوي
وع الغدا :
وليد : بابااا ام
خالد : كاني والله قاعده اكل
وليد : بابااا آآه
خالد : يا يبه خلني آكل
وليد : بابا آآآآم
خالد : يلا يلا انزين
و وكل وليد ابوه و كان مستانس حييل و يضحك
اسراء : يلا تعال اوكلك
وليد : مااا
اسراء : تعال حبيبي مو زين ماتاكل
وليد : ماااا
اسراء : يلا حبيبي اكل بروح انام تعبانه
وليد : مااا
اسراء : كيفك مو تقولي بعدين ابي ام
و ورا الغدا ،
خالد : اقول حبيبتي ؟
اسراء : هلا حبيبي
خالد : مافكرتي تحملين مرة ثانية عقب السالفه ؟ ترا صارلج 5 شهور
تضايقت حيييل و تغيرت تعابير ويهها و حاولت تضبط نفسها : خالد تو الناس
خالد : لا مو تو الناس ، وليد الحين كبر عمره 3 سنين ، يحتاج احد يلعب معاه ، وانا ابي يهال
اسراء : مادري خالد يصير خير ( وقامت راحت غرفتها )
خالد : شفيها ؟ ملاحظ ان كل ما اييب لها طاري الحمل يتغير ويهها .. شصاير ؟
و قام راح لها ، ما تحمل يخليها جذي ، يبي يعرف السبب
قرب يمها و ابتسم لها : شفيج حبيبتي ؟
اسراء ( متضايقه ) : مافيني شي
خالد : مو علي ، اعرفج من عيونج اذا كنتي متضايقه ، قوليلي شفيج
اسراء : -----
خالد : ليش كا ما اييب طاري الحمل تتضايقين ؟ ماتبين تحملين و تونسيني ؟
اسراء : تو الناس ، وليد صغير و ماخذ كل وقتي
خالد : وليد كبر و اكثر وقته بـ الالعاب و التلفزيون ، و انا مو مقصر معاه بشي ..
اسراء : خالد مو بيدي
تنهد خالد : ابي ياهل
غمضت عيونها حييل و تنهدت : الي الله كاتبه بصير
خالد عصب شوي : انزين انزين ..
اسراء بقلبها : يعني انا الي ما ابي ! والله يا خالد اني ابي اونسك بس شسوي والله مو بيدي .. يعني يمكن اموت و السبه الياهل الي تبيه !
و مر على هالسالفه جم يوم ، و نست اسراء شوي اما خالد فـ مو ناسي ، و مصمم يعرف شسالفه ،
اسراء : خاالد يلا ماصارت
خالد : وين حاطه السويج ماكو شي بالدرج
اسراء : امبلا خالد انا حطيته مساع عشان لا يلعب فيه وليد
و قعد خالد يدور السويج .. لفت نظره شي انصدم حيل يوم شافه ! مايدري بشنو حس لما شافه ، حس انه وراه سالفه .. ما تحمل و عصب حيل
خالد قط عليها الحبوب و بصوت عالي و بعصبيه : ماتقوليلي شنو هذا !
اسراء : شنو ؟ شنو هذا ؟
خالد : مادري والله ، انتي ادرى شنو هذا !
شافت اسراء حبوب منع الحمل و حست بغصه ، ماتدري شتقول حق خالد ، خبت عليه وايد و لازم تقوله الصج و الواقع ..
خالد : تاخذين حبوب منع حمل و تقولين تو الناس ! وليد صغير ما اقدر و عندي دوام ومادري شنو ! ليش تسوين جذي علميني !
اسراء ( خايفه ) : خالد هد اعصابك شوي ،
خالد : شـ هدي ! انتي خليتي فيني اعصاب !
اسراء : خالد حبيبي شوي انطرني افهمك السالفه
خالد : شتفهميني ! السالفه واضحه وضوح الشمس ! انتي ما تبين عيال و من جذي قاعده تاخذين الحبوب !
اسراء : خالد خلني افهمك و اقولك السالفه ! تكفى هد اعصابك شوي
تنهد حيل و حاول يهدي روحه : قوليلي يلا !
اسراء كانت خايفه ، قلبها يدق حييل ، ماتدري شلون تقوله ..
اسراء : خالد .. انا خشيت عنك شي
خالد : قولي تكلمي
اسراء : خالد .. عقب ما سويت العمليه ، الدكتور قال اني صعب احمل و اولد ! ولادتي ماراح تكون طبيعيه و يمكن اتعرض للخطر انا او الجنين ، و الحين انا قاعده اخذ هالحبوب لاني اذا حملت يمكن اتعب و اموت او يموت الجنين ! آسفه خالد ما اقدر احمل ( نزلت دموعها من عينها ) ما اقدر اييب لك عيال ..
كان الكلام لـ خالد صدمه كبيرة ! حس انه انحرم من اليهال ، انحرم من كلمه ( يبه ) انحرم من احلامه ، انحرم من وايد اشياء ! واجهه الموقف بـ سكوت حاااد و صدمه كبيرة
اسراء حست بخالد : عشان احافظ على حياة الجنين و حياتي احسن لي ما احمل ،
خالد : ليش ما علمتيني ! ليش ما قلتيلي من قبل !
اسراء : خالد كنت خايفه ، و مابي اضايقك
تنهد حييل و طلع
اسراء : خاااالد خاااالد ويين رايح ؟
( ما سمعها و طلع )
و ع البحر :
قاعد على صخره كبيرة و حاطه ايده على راسه و يفكر ..
خالد : شهالمصيبه ، ( تنهد ) استغفر الله ،
جاسم : انت ما تقولي شفيك ، مناديني و صارلي سنه قاعد معاك و ليلحينك ما قلتلي شي ، تكلم يا اخي مخليني جذي جني اهبل
خالد : مصيبه يا جاسم مصيبه
جاسم : ايي شصاير قوول
خالد : ---
جاسم : اقلب ويهك زييين ، تعال و تعال و آخر شي منت قايلي
( و قاله السالفه )
جاسم : خالد ، هذا قضاء و قدر .. ما تقدر تعترض على حكمه ربك
خالد تنهد حييل : و نعم بـ الله
جاسم : الحمدلله عندك ولد
خالد : الحمدلله على كل حال
جاسم : قوم قوم روح البيت ، اكيد الحين قاعده تنطرك طلعت و خليتها بروحها
تنهد : يالله كاني بقوم ، يالله فمان الله
جاسم : فمان الكريم
البيت كان موحش و مخيف من غير خالد ، من اول ما سكنوا ما خلاها خالد بروحها دايما اذا طلع تكون معاه ، كانت قاعده بالفراش بروحها و خايفه ، حست بالضيق و الراحه بنفس الوقت ! متضايقه لانها خشت عن خالد السالفه ولا قالتله ، و مرتاحه لان صارحت خالد و حست الهم انزااح .. شافت ولدها منسدح يمها و بـ بدايات النوم ، ظلت تشوفه و تتأمل ملامح ويهه البريئة ، بجت يوم تذكرت انها ماراح تقدر تييب غيره ، قربت منه و باسته و دبخته لما ناام و هدت انفاسه .. و وصل خالد ، شافها لقاها منسدحه و مغمضه عيونها ، دش شوي شوي بحركه خفيفه ما سمعتها .. قرب منها شوي شوي و تنحنح
خالد : ليلحينج ما نمتي ؟
اسراء : ----
شاف آثار دموع على خدها ، خالد : حبيبتي قاعده تبجين ؟
اسراء نزلت دموعها و سكتت
خالد : خلاص ، الله كاتب جذي .. مابي اتعبج ومابي شي ( و ابتسم لها ، و مد ايده و مسح دموعها و باسها على راسها )
بحركه خفيفه و بهدوء غطت ويهها و نامت ،
خالد : الله لا يحرمني منج
شاف وليد نايم يمها و تضايق ما قدر ينام ، شاله شوي شوي و باسه على خده و حطه بـ سريره و ابتسم له ،
الصبح ،
صوت الفون كان حييل مزعج و خالد و اسراء في عزز نومهم ،
اسراء بصوت ناعم نعسان : خالد رد ع الفون
خالد : ---
اسراء : خااالد رد فونك ازعجني
خالد نعسان : انزين انزيين ، الو ؟
عبدالله : غلطااان جان ما ردييت
خالد : هلا عبيد ، خير شصاير ؟
عبدالله : فطوم ولدت
خالد قام من مكانه : ولدت ! ع البررركه ، شيابت ؟
عبدالله : بنت
خالد : مبرروك ، سلم عليها و ان شاء الله بعدين نمرها
عبدالله : الله يسلمك
اسراء : شسالفه
خالد : فطوم ولدت
اسراء بهدوء : مبرروك
خالد : يلا كملي نومج عشان بعدين نروح المستشفى
اسراء : ان شاء الله
و بـ المستشفى :
اسراء : مبرووك فاطمه ،
فاطمه : الله يبارك فيج ، الفال لج
ابتسمت ابتسامه بارده و تضايقت ، شافها خالد بسرعه و غير السالفه
خالد : فطوم اشوه انها ما طلعت عليج ، طلعت على ابوها
محمد : هههه ،
خالد : لو طالعه عليج جان تعقدت مسكينه
فاطمه : و شفيني انا شحلاتي
محمد : يلا عاد خالد كلش ولا فطومتي ترا ما ارضى عليها ام حصه
خالد : اووه فطووم صرتي ام حصه ،
فاطمه : واي خالد يا ملقك
خالد: و انتي يا حظي ليش ما تدافعين عنيي مو انا ريلج
اسراء : حتى انا ما ارضى عليك
خالد : ايي خليج جذي
ام عبدالله : يحليلك يا خالد ، من صغرك و انتا تحب اتينن الناس
خالد : عيل شلون عيل ، لازم الناس تتنرفز شوي مو كله تمدحونها ( و يشوف اسراء ) صح حبيبتي ؟
اسراء ( ضحكت غصبن عليها ) : صح حبيبي
خالد : يلا يلا ، ماتشوفين شر ان شاء الله و مبروك على حصه اليديده
فاطمه : الله يبارك فيك
خالد : يلا حبيبتي مشينا
و بـ السيارة :
وليد : باباا
خالد : عيون باباا انتاا
وليد : لوح ديد
خالد : ان شااء الله ، وين تبي تروح بس ؟
وليد : اعاب ( العاب )
خالد : يالله الحين نروح العاب
اسراء : لا لا خالد مالي خلق اروح مكان ، ابي ارجع البيت
خالد : ليش ؟ خلي الولد يستانس
اسراء : مرة ثانية .. الحين ابي اروح البيت
خالد : حرام عليج تبين تخلينه بالبيت بروحه محد يلعب معاه
اسراء : كيفك عيل ودني البيت بعدين وده الالعاب
خالد : يالله كيفج عيل
و وصلوا البيت ، نزلت اسراء و راح خالد مع وليد الافينيوز ماجيك بلانيت ، لعب وليد و استانس و ارتسمت البسمه على ويهه الطفولي ، شافه خالد و حيل حس بـ راحه ، فرح لان ولده مستانس .. تنهد يوم تذكر ان هذا اول و اخر ولد له ..
وعقب ما لعب ،
خالد : ها بابا ؟ نرجع البيت ؟
وليد : بابا تووف مادوداد ( ماكدونالدز )
خالد : يلا بابا الحين اشتريلك
و شراله خالد الوجبه ، مسك قوطي الوجبه و اهوه مستانس ، و ماسك اللعبه بـ ايده و يلعب و يسولف بروحه ، لما رجع البيت على طووول راح عند امه يضحك
وليد : مامااااا
اسراء : هاا حبيبيي
وليد : توووف
اسراء : اللله شنو هذا ، منو شرالك وجبه ؟
وليد : باباا
اسراء : يالله شاطر حبيبي اكلها
وليد يوريها اللعبه : توووف
اسراء : الله حلوة لعبتك ، يالله ماما اكل الوجبه قبل لا تصير بارده
وليد يطلع من القوطي بطاط : توف تات ( بطاط )
اسراء : يلا ماما اكل
وليد : ام ام ام
اسراء : خالد وده المطبخ خـ ياكل ، لا تصير ريحه الغرفه اكل
خالد : وليدان بابا تعال المطبخ عشان تاكل
و راح قعد معاه بـ المطبخ لما خلص اكل و قعد معاه بـ الصاله و ظلوا يشوفون بابايات لما داخ و نام ، شاله خالد و حطه بـ سريره و باسه على خده و راح عند اسراء
اسراء : وين وليد ؟
خالد : نام
اسراء : بعد عمري
خالد : طافج ماشفتيه شلون كان مستانس اليوم ، يلعب و يضحك و يسولف ..
اسراء : ---
خالد : شفيج ؟
اسراء : ولا شي .. دايخه بنام تصبح على خير
خالد بـ قلبه : غريبة هـ الايام !
sweet memy
البارت الثلاثون :
الصبح ،
قعدت من النوم حست بـ هدوء مو طبيعي ، صخخخه على غير العاده ، كل يوم كانت تسمع صوت التلفزيون و صوت وليد الا اليوم ، قامت من فراشها و راحت غرفه وليد لقت الغرفه مرتبه ! راحت الصاله مالقته ولا لقت خالد .. ماتدري شنو شعورها بـ هالوقت ! رفعت سماعه التلفون و دقت على خالد
اسراء : خالد ؟! ويينك ؟
خالد : طالع .. شفيج ؟
اسراء : وليد معاك ؟
خالد : اي معاي
ارتاحت شوي : ليش ماقلتلي انك بتطلع خرعتني يوم مالقيت وليد بالبيت
خالد : يعني وين بروح ، خذيته و طلعت
اسراء : وينكم الحين ؟
خالد : بالبحر
اسراء : و متى بتيون ؟
خالد : مادري لما نشبع وناسه
اسراء : خالد لا تتأخر انا بروحي
خالد : انزين ،
اسراء : يلا عيل باي
خالد : باي
قامت دشت المطبخ و طلعت مجموعه كتب طبخ و اختارت طبقين عشان تسويهم حق الغدا ، طول الوقت كانت بالمطبخ لما سمعت صوت وليد و خالد ..
وليد : مامااااا
اسراء : ولييد ! تعال حبيبي
خذته و لمته حيييل و باسته ، اسراء : ولهت عليك حبيبي من الصبح طالع ، وين رحت ؟
وليد : مااي ( قصده بحر )
اسراء : رحت عند الماي ؟
وليد : ايي
خالد : راح البحر و كلى برد و شرى العاب ، صح وليدان ؟
وليد : ايي ، ماما تووف العاااب
اسراء : اللله اشوف العابك
خالد : خليج من العابه الحين ، انا ميت من اليوع ابي غدا
اسراء : يلا دقايق و احط الغدا ، غير ملابسك و تلقى الغدا جاهز
وليد : ماماا ام
اسراء : بعد عمري يوعان ، ان شاء الله حبيبي الحين احط الغدا
بيت بو عبدالله :
فاطمه : يماا حصه من مساع تبجي مادري شفيها
ام عبدالله : يوعانه صارلها وقت ما شربت حليب
فاطمه : عورت قلبي من كثر ما صرخت
ام عبدالله : عطيني اياهاا ماتعرفين حق اليهال انتي
فاطمه : هاج اخذيها ، انا بروح ادق على محمد
خذت فونها بتتصل على محمد ولا يدق عليها
فاطمه : عمرك طويل توني بدق عليك
محمد : وينج يا حبيبتي ولهت عليج وايد ، يلاا ردي
فاطمه : حتى انا ولهت عليك وايد ، تأخرت علي متى بتيي
محمد : كاني ياي بالطريج ، شلون حصوصه ؟
فاطمه : بس تبجي مادري شفيها
محمد : شفيها اخاف يوعانه ولا شي
فاطمه : مادري عنها ، خذتها امي
محمد : اي امج ادرى بسوالف اليهال
فاطمه : يلا حمودي تعال
محمد : والله كاني ياي بالطريج ، دقايق و اكون عندج
فاطمه : انزين حبيبي ، متغدى ؟ ولا تبي غدا
محمد : واللله يوعان
فاطمه : خلاص اخليهم يحطون لك الغدا الحين ، يالله اخليك
محمد : يالله حبي باي
و ورا الغدا ،
خالد : من زمان ما مرينا امي ، اليوم نمرها
اسراء ( ساكته )
خالد : شفيج ؟ ترا كلللش مو طبيعيه هالايام مو عاجبتني
تهدت : مافيني شي
خالد : شلون مافيج شي حالتج منقلبه فوق تحت ، مو اسراء الي اعرفها ، قوليلي شصاير
اسراء : يا خالد مافيني شي خلاص
خالد : انزين قومي نطلع
اسراء : مافيني اطلع
خالد : ليش ؟
اسراء : مالي خلق
تنهد خالد : شفتي انج متغيرة ؟
اسراء : خالد لا تضغط علي تكفى ، انا تعبانه
خالد : تعبانه من شنو ! قوليلي شصاير
تنهدت حييل : بروح غرفتي ، خلني بروحي شوي
راحت الغرفه و قعدت بروحها و دمعت عينها ، سالفه الحمل وايد مضيقه خلقها ، تتمنى تييب ياهل بس خايفه ، خايفه من الي بصير بعدين ..
اسراء بقلبها : خالد وايد كاسر خاطري ، اهتمامه بوليد زايد وايد ، وليد صار حياته و مايقدر على فراقه ، على طول يطلع معاه و يضحك و يشتري له اللي يبي و لا يخلي بـ خاطره شي ، يشوف اليهال بكل مكان و يتمنى يكون عنده ياهل ثاني ، يشوف الناس تحمل و تولد و احسه متضايق و يبي ياهل ثاني ، يا ربي شسوي .. اشوف رغبته بـ الياهل بـ عيونه ، بس انا ما اقدر البي رغبته .. يارب ساعدني
سمعت صوت الباب
خالد : ادخل ؟
اسراء مسحت دموعها : تعال خالد
دخل و ابتسامه كبيرة على ويهه ، و قعد يمها : شلونج الحين ؟
اسراء : الحمدلله
خالد : كنتي تبجين ؟
اسراء متردده : لا !
خالد : اممم .. عيل شنو هـ الماي الحلو الي قاعد يمشي على خدج ؟
ضحكت شوي
خالد : اسورة حبيبتي قوليلي شـ اللي مضيق خلقج ، ترا ما اقدر اخليج جذي بهالحاله والله انج مو عاجبتني
اسراء : خلاص خالد مافيني شي والله ،
خالد : شوفي حبيبتي ، اذا سالفه الحمل مضيقه خلقج انا قلتلج ، مابي ياهل خلاص ، كفاية عندي وليد ، ماخذ دنيتي كلها و مفرحني ، الله عطاني وليد الحمدلله
اسراء : بس..
قطع كلامها : لا بس ولا شي ، هذا بلى من ربج ، خيره شدراج ، يمكن لي يبتي الياهل يكون شيطان يدوخنا ، او او او ...
اسراء : ---
خالد : يلا عاد ، ضحكي مابي اشوفج متضايقه
ابتسمت ابتسامه صغيره ، قرب منها خالد و قرص ايدها شوي
اسراء : احححح خالد ليلحين هذي سوالفك !
خالد : و لي باجر
اسراء : الله يصبرني عليك
بيت بو عبدالله :
محمد : حصوصه ، يا النمله ، يالله كبري كبري
فاطمه : شوف ملامحها ، بدت تقلب تصير مثلي
محمد : لاا ليلحين اشوفها تشابهني حيل ، شوفي عيونها و خشمها و لون بشرتها كلها انا
فاطمه : انطر عليها جم يوم و بتصير تشابهني
عبدالله : انتوا شفيكم تتهاوشون ، يبه لا تشابهك ولا تشابهج ، تشابه خالها
محمد : ههههه
فاطمه : لااا تشابهني
محمد : تشابهني اناا
ام عبدالله : لوعتوا جبد البنت ييبوها عندي ييبوهاا ، مسكينة قاعه تبجي منكم صايرين جنكم اول مرة تشوفون ياهل !
الكل ضحك
يوسف : ماما ابي بنت صغيرة مثل حصه
عبدالله : ان شاء الله ، الحين اروح الجمعيه اشتريلك وحده
ريم : لا ماما الياهل ما يشترونه ، انتا عندك ناصر و كا حصه العب معاها
يوسف : لا ابي وحده حقي بروحي
عبدالله : قول حق عمتك تعطيك اياها يوم
يوسف : عمتي عادي تعطيني اياها يوم اخليها تنام عندي ؟
محمد : جم تدفع
فاطمه : جنه بنتي صارت بضاعه ؟
محمد : نتغشمر يبه نتغشمرر
خالد : اوه اوه العايلة السعيده كلها متيمعه هني .. شلونكم
ام عبدالله : هلا والله خالد هلا يمه
فاطمه : ماكان ناقصنا غير خالد يملق عليناا
خالد : ايا الي ما تستحين يا فطوم ، الحين انا اخوج تقولين عني جذي .. عطيني بنتج خـ اشوفها
( وخذاها من امه )
خالد : يحليلها جنها قلبت عليج
فاطمه : هااا صدقتوا يوم قلتلكم انها تشابهني
محمد : لا تشابهني انا
خالد : شوفي مو قلبت على امها ؟
اسراء : اي ، وايد
وليد : باباا توف توف دادا !
خالد : ايي تبيها ؟ اخذها العب فيها
فاطمه : شفيكم على بنتي ! ، مساع يوسف و الحين ولدك ، ترا بنتي صجيه مو لعبه
خالد : ها بابا تبيها ؟
وليد : اي
خالد : هاك اخذها
فاطمه : هيييي خالد ييبها لا يطيحها
ام عبدالله : ها ها خالد عن الشطانه ، عطني اشوف ( و خذتها منه )
وليد : بابا ابي دادا
تضايقت اسراء حييييل و قامت من مكانها و محد حس فيها ، راحت غرفه قريبه من الصالة و قعدت بروحها ..
و تمت سوالف بينهم ...
خالد : وليد ؟ وين ماما ؟
وليد : مادي ( مادري )
سحب فونه من جيبه و اتصل عليها
اسراء : هلا خالد
خالد : وينج ؟ وين اختفيتي ؟
اسراء : بالدار الصغيره
خالد : يلا الحين يايلج
( و راح لها )
خالد : شمقعدج هني بروحج ؟!
اسراء : ---
خالد : شفيج ؟
اسراء : ابي اروح البيت
خالد : ليش ؟ فيج شي ؟
اسراء : خالد مافيني شي بس ابي ارجع البيت
خالد : متضايقه .. صح ؟
اسراء : -----
خالد : قومي نطلع انا معاج بعدين نرد هني
اسراء : ----
خالد : يلا قومي !
تنهدت و قامت معاه
و بالسيارة :
كانت ساكته و مبين مالها خلق شي .. و خالد ينطرها تتكلم و تقول شفيها
خالد : ماتقوليلي شفيج ؟
اسراء : خالد مافيني شي
خالد : كل هذا و مافيج شي ؟
اسراء : -----
خالد : ليكون متضايقه على سالفه الحمل بعد ؟
اسراء : -----
تنهد : يا حبيبتي ، قلتلج انا خلاص مابي شي .. كفاية وليد ! ماخذ كل وقتي و معوضني عن مليون ياهل
اسراء : ---
خالد : يلا عااد ضحكي ، ما احب اشوفج جذي ، اتضايق
اسراء : ----
خالد : يعني ما تبين تضحكين ولا تتكلمين ، خلاص ... عيل انا اروح ادور على وحده ثانية تسولف معاي دامج ما تبين تتكلمين
اسراء : خالد !
خالد : هاا
اسراء : ليش تقول جذي يعني ماتدري اني اغار ؟
خالد : يـ حلاتج لما تغارين والله ، اشوف ويهج ؟
استحت و نزلت راسها
خالد : اي ، هذا اسراء الي اعرفها ، مو مساع
و طلعوا و استانسوا و ردوا خذوا وليد و ردوا البيت ..
sweet memy
البارت الواحد و الثلاثون :
قعدت الصبح على صوته ،
اسراء : ها ماماا شنو تبي ؟
وليد : وينا باباا
اسراء : بابا بالدوام حبيبي
وليد ( يبجي ) : وينا بابااا
اسراء : يا ماما بابا بالدواام
بجا اكثر و مسك الفون و عطاها ( يعني دقي عليه )
اسراء تتنهد : ان شاء الله بدق
خالد : الو
اسراء : هلا خالد
خالد : اهلين
اسراء : هاك ولدك يبيك من مساع يبجي يبي يكلمك
خالد : بعد عمري وليدان وينه عطيني
وليد ( يبجي ) : باباااا
خالد : وليدااان ، شفيك تبجي ؟
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك