رواية ويبقى خالد -3
تحبه حيل لان حفيدها الوحيد ،،
دخل خالد البيت متضايق شوي ،
خالد : السلام عليكم
ام عبدالله : وعليكم السلام هلا خالد،
خالد بضيق و ماله خلق شي : هلا يمه
ام عبدالله : وي وي وي ، شفييك خالد ؟
خالد حس انه الضيقه مبينه على ويهه و من نبره صوته ، : لا يمه ماكو شي
ام عبدالله : ولدي و اعرفك ، كل هذا و مافيك شي ؟؟ قولي يا وليدي شصار خرعتني ؟
خالد بعصبيه : يمه خلاص ماكو شي ،
خلاها و راح غرفته و قفل الباب ، غير ملابسه و حط راسه ع المخده و عقب دقايق نام ،
بعد ربع ساعه دخل عبدالله و قعد بالصاله مع امه و يوسف ، و بعد فتره قصيره نزلت ريم و يت فاطمه من الجامعه و غيرت ملابسها و نزلت حق الغدا ، و الكل تيمع على طاوله الطعام ماعدا خالد الي كان نايم ،
فاطمه : عيل وين خالد ؟ ليلحين ما وصل ؟
ام عبدالله : وصل ، دش و شكله متضايق و راح غرفته ، الظاهر نام
فاطمه : متضايق ؟! ليش من شنو ؟
ام عبدالله : والله مادري يا فاطمه ، كلمته قلتله شفيك يقولي مافيني شي ، خرعني اخاف في شي ، و ماحبيت اضغط عليه و اقوله شفيك لان شكله معصب ، و تعرفين اخوج لما يعصب ما يعرف منو جدامه ،
عبدالله : خالد يدلع ، من صغره مدلعينه ، يلا شوفي الحين شلون صار
ام عبدالله : بعد عمري خالد ، لا والله ما دلعنا ، هذا طبعه اهو جذي ، لي عصب مايبي احد يكلمه
عبدالله : الله يعين الي بتاخذه
فاطمه : وييييه ، شفييه خالد عسل ، و مليون بنت تتمناه
ام عبدالله : الله يهينه بحياته
بيت بو عبدالعزيز :
اسراء كانت قاعده بالصاله بروحها و مندمجه مع المسلسل ، خرب عليها صوت تلفون البيت ،
اسراء : هذا وقته تلفون ، ابي اكمل المسلسل ،
اسراء : الو ؟
اسيل : قوه
اسراء بلهفه : الله يقويج ، هلاا هلااا والله أسوول شلونج حياتي ؟؟
اسيل : الحمدلله بخيييير ، شلونج انتي شخبارج ؟ و شخبار امي و ابوي و عزيز ؟؟
اسراء : كلهم بخير و يسلمون عليج ، يالله اسول ماصارت سفر ، ترا لج وحشه
اسيل : انا بعد مليت من السفر ، و وااايد مشتاقتلكم
اسراء : شلون فهد و جنان ؟
اسيل : والله الحمدلله ، بس جنان ميننتنا وايد ، ماتخلينا نرتاح
اسراء : ههههه ، يحليلها بنتج والله
اسيل : عيل وين امي عطيني اياها
اسراء : امي تحوس بالمطبخ ، دقايق و اناديها
اسراء بصوت عالي شوي ، يمااااااا ، اسيل دقت عليج من امريكا تعالي كلميها
ام عبدالعزيز : اسيل دقت ؟! انزين انزين كاني يايه
و بخطوات سريعه طلعت ام عبدالعزيز من المطبخ و خذت السماعه من اسراء ،
ام عبدالعزيز : الو
اسيل : هلا يمه ، هلا بالغاليه
ام عبدالعزيز و الدمعه نزلت من عينها : هلا ببنيتي هلا اسيل ، شلونج يمه شخبارج و شخبار ريلج و بنتج
اسيل : الحمدلله يمه كلنا بخير دامكم بخير ، انتي شلونج و شلون صحتج ؟؟
ام عبدالعزيز : الحمدلله بخير و صحه و عافيه
اسيل : الحمدلله يا رب
ام عبدالعزيز : شلون امريكا ؟
اسيل : حلوه ، بس وين الواحد يستانس و عنده ياهل صغير
ام عبدالعزيز : هه ، قلتلج خليها عندي قلتي لا باخذها معاي ، يالله تحملي الحين عاد
اسيل : يالله بعد شسوي بتحملها ،
ام عبدالعزيز : يلا ما مليتوا ؟ متى بتردون ؟
اسيل : مفاجاة يمه ماراح اقولج
ام عبدالعزيز : تدرين فيني ما احب المفاجآت قوليلي الحين
اسيل : عقب باجر ان شاء الله نوصل الكويت الساعه 5 العصر
ام عبدالعزيز : ترجعون بالسلامه ان شاء الله
اسيل : اي يمه بس ما وصيج ، لاتقولين حق احد ، احنا بنيي من المطار لي عندج
ام عبدالعزيز : الله يوصلكم بالسلامه
اسيل : يلا يمه لازم اروح الحين ، تبين شي ؟
ام عبدالعزيز : سلامتج حبيبتي ، ديري بالج على ريلج و بنتج
اسيل : ان شاء الله يمه ، يالله مع السلامه
ام عبدالعزيز : الله يسلمج مع السلامه
ام عبدالعزيز تتنهد : الله يوصلج بالسلامه يا بنيتي ،
اسراء : هاا يمه ، شقالت اسيل ؟؟
ام عبدالعزيز : ماقالت شي
اسراء : يمه صارلج ساعه تكلمينها تقوليلي ماقالت شي :\
ام عبدالعزيز : قالت انها مستانسه و بترجع قريب
اسراء : ايي ، توصل بالسلامه ان شاء الله
ام عبدالعزيز : يلا انا بروح المطبخ
راحت اسراء غرفتها ، و حست ان في شي ناقص ما سوته اليوم ،
ماكلمت حبيبتي دلوول ، فتحت جنطتها و خذت تلفونها و اتصلت على دلال ،
اسراء: قووه دلول
دلال : هلا يقويج
اسراء: ويينج اليوم ماشفتج ؟
دلال : موجوده ، بس حتى انا ماشفتج
اسراء: ايي ، عيل سمعي ،
دلال : اسمعج قولي
اسراء: شفتي هذا الي امس لحقني ؟ لحقني اليوم مره ثانيه ، طول ما انا امشي يمشي وراي ، لما كلمته و خليته و مشيت عنه
دلال : زين تسوين فيه ، والله ما يستحي
اسراء: اي والله
دلال: ماراح تطلعين اليوم ؟
اسراء: والله ودي اطلع ، ودي اروح شرق من زمان مارحت
دلال : صار عيل، نروح شرق اليوم
اسراء: اوكي ،
دلال : يلا اخليج الحين امي تبيني
اسراء: سلمي عليها خالتي
دلال : يوصل ان شاء الله ، باي
اسراء: باي
بيت بو عبدالله :
صحى خالد من نومه و حاس بضيقه في صدره ، و ما لقى جدامه الا قوطي الزقاير ، سحب زقاره و طلع الولاعه و بدا يدخن ، يحس بالراحه لما يدخن و ينسى همومه كلها ،،
سمع خالد صوت الباب ،
خالد : منو ؟
فاطمه : انا فاطمه
خالد : دشي
دشت فاطمه الغرفه و شافت الغرفه مليانه دخان ، و لونها رمادي فاتح ، و ما قدرت تتنفس ،،
فاطمه تعجبت : خالد !! شفيك خالد ؟
خالد بهدوء: مافيني شي
فاطمه : كل هذا و مافيك شي ؟!
خالد ماسك اعصابه : فاطمه مافيني شي ،
فاطمه باهتمام : خالد لاتخش عني ، قولي شصاير لك ؟
خالد بعصبيه شوي : فاطمه قلتلج مافيني شي ! خلاص عاد
فاطمه : انزين خالد ، تكفى لا تدخن شوف شصار فيك من التدخين ، قوم غسل ويهك و قط السم الي بايدك و تيدد و صل ركعتين
خالد ياخذ نفس عميق : فاطمه خليني بروحي
فاطمه حست ان اخوها تعبان : اوكي خالد ، بخليك بروحك ، بس اذا بغيت شي تعالي انا موجوده .
طلعت فاطمه من غرفه خالد و راحت غرفتها و بالها كان مشغول في خالد ، و تفكر بـ اخوها ، شنو بكون فيه و ليش حالته جذي ؟
من صوب ثاني شهد ، الي كانت تفكر بخالد و حالتها معاه ، خلاها ولا يدري عنها ، كانت تفكر حيييل بشي تسويه يهز خالد و يخليه يتحرك ، و تتحرك مشاعره حقها ، بس ماكانت تدري شتسوي ، رفعت تلفونها و من غير ما تحس اتصلت على ساره ،
شهد بصوت حزين حيل : ساارون
ساره : هلا حبي والله
شهد : نقذيني يا ساره ، قوليلي شسوي مع خالد
ساره : خرعتيني عبالي فيج شي ،
شهد : كل الي فيني و تقوليلي مافيج شي ؟
ساره : انزين ، شتبيني اسوي يعني ؟
شهد : ساعديني ، قوليلي شسوي ، ابيه يتحرك شوي يحس فيني ، في بني ادم تحبه تحس فيه
ساره : اممم ، ماكو مخي واقف الحين ، ما اقدر افكر ،
شهد : شرايج تيين عندي و نفكر ؟
ساره : اوكي اوكي ، يايتج الحين ،
شهد : اوكي انطرج ،
ساره : يلا باي
شهد : باي
شهد تطمنت شوي ، و كان عندها امل كبير انها بتلقى حل ، وعقب نص ساعه وصلت ساره عند شهد ، دخلت ساره البيت و لقت ام شهد بالصاله ،
ساره مبتسمه : قوه خالتي
ام شهد : هلا والله يقويج ، هلا بنيتي هلا ساره
ساره : شلونج خالتي ؟
ام شهد : الحمدلله بخير ، و انتي شلونج و شلون امج ؟
ساره : الحمدلله ، تسلم عليج
ام شهد : الله يسلمها ، حياج
ساره : الله يحييج ، عيل وين شهد ؟
ام شهد : بغرفتها يمه ، روحيلها
ساره : ان شاء الله خالتي ،
كانت ساره تدل البيت فـ بسرعه صعدت فوق و راحت غرفه شهد و طقت الباب ،
شهد : منو ؟
ساره : انا ساره
شهد استانست : دخلي دخلي ،
ساره فتحت الباب بقوه : قوووووه يا الحلوه
شهد : هلا سارون
قربت يمها و لمتها حيييل ،
ساره :ها شفيج
شهد : فكري معاي ، يلا
قعدت ساره مع شهد و بدوا يفكرون ، و بعد فتره
ساره : شوفي شهد ، قولي حق خالد ان في واحد تقدم لج
شهد بصدمه : تقدم لي !!
ساره : اي ، قوليله خلاص الي بينا انتهى ، و انا لقيت ولد الحلال الي يستاهلني
شهد ماكان عاجبها كلام ساره و بخوف : اخاف يصدق و صج يخليني و يقولي خلاص الي بينا انتهى
ساره : اذا كان صج يحبج ماراح يقول جذي ، و بيهتم فيج و يتقدم لج
شهد اقتنعت شوي بس كانت خايفه : مادري يا ساره مادري ، اخاف اقوله و اندم
ساره : جربي و ماراح تندمين
شهد بخوف : يعني امشي على شورج ؟
ساره : الي يطيعني ما يضيع
شهد تتنهد : شورج و هدايه الله
بيت بو عبدالله :
حب خالد يطلع من البيت و يغير جو ، و ينسى الي فيه و قام خذاله شور دافي سريع يزيح الضيقه الي فيه ، بعدها كشخ و نزل يقعد مع الاهل شوي ،
خالد : قوه يمه
ام عبدالله : هلا يمه هلا ، شفيك خالد ؟
خالد : مافيني شي الحمدلله
ام عبدالله : مساع كنت متضايق ، عسى ما شر ؟
خالد بـ ابتسامه : يمه قلتيها ، مساع ، الحين انا غير [ و غمز لها ]
ام عبدالله و البسمه باينه على ويهها : الحمدلله لك يا رب ،
بيت بو عبدالعزيز :
كانت اسراء في غرفتها تتجهز لانها بتطلع ، لبست و نزلت تحت
شافتها ام عبدالعزيز الي كانت بالصاله مع ابو عبدالعزيز ،
بوعبدالعزيز : هلا والله ببنيتي
اسراء بدلع : هلا فيك يبه
بوعبدالعزيز : تعالي تعالي قعدي يمي
اسراء : يبه انا بطلع الحين
ام عبدالعزيز : وين رايحه بعد ؟ ترى كثرت طلعاتج
اسراء: يمه خليني استانس شوي ،
ام عبدالعزيز : ماقلت شي ، بس يا يمه صايره وايد تطلعين ،
بوعبدالعزيز : خليها تطلع تستانس ترفه عن نفسها
اسراء تقرب من ابوها و تبوس راسه : والله محد فاهمني بهالبيت غيرك ، الله لا يحرمني منك
بوعبدالعزيز : طلعي يبه طلعي استانسي
ام عبدالعزيز تتنهد : والله محد بخربج غير ابوج ، طلعي يمه طلعي ، الله وياج
استانست اسراء و طلعت
دلال كانت تنطراسراء في سوق شرق ، و بعد ربع ساعه وصلت لها ،،
دلال : اخيرا وصلتي !
اسراء : شسوي على ما لبست و ييت
دلال : خليتيني انطر وايد
اسراء : اي نطري عادي ،[ بدلع ] مو انا رفيجتج نطريني
دلال : هههه ، انطرج يا حبيبتي انتي ،
اسراء : امشي نتمشى ،،
بيت بو عبدالله :
خالد كان قاعد مع الاهل بالصاله و يتبادل معاهم السوالف ، ارتاح شوي و نفسيته صارت احسن لما قعد مع امه ، قطع سوالفهم صوت تلفون خالد ، كان المتصل جاسم
خالد : هلا جاسم
جاسم : هلا خويلد شلونك
خالد: تمام
جاسم : شعندك ؟ فاضي ؟
خالد : ماعندي شي ، ليش ؟
جاسم : عندي هدوم شاريهم و تصليح بروح اخذهم تيي معاي ؟
خالد : وين ؟
جاسم : شرق
خالد : جسوم مالي خلق
جاسم : يلا قوم ، جنك مره قاعد بالبيت ، يلا الحين بمرك و تيي معاي
خالد : يلا اوكي ،
جاسم : يلا عيل باي
خالد : باي
في سوق شرق :
اسراء كانت تتمشى مع دلال
اسراء : دلوول شوفي القميص هذا يهبل ، امشي بدش اشوف
دلال : ويي ان دشيتي ماراح تطلعين
اسراء: شورانا يلا دشي معاي
دشت دلال معاها المحل ، و بدت اسراء تشتري هدوم و دلال تساعدها ،
جاسم وصل البيت و اتصل على خالد
جاسم : يلا خالد انا بره انطرك
خالد : يلا كاني ياي
طلع خالد من البيت و ركب سياره جاسم
خالد : قوه
جاسم : يقويك
خالد : شعندك بشرق
جاسم : قلتلك هدومي تصليح باخذهم
خالد : اهاا اوكي ،،
بيت شهد :
شهد كانت تفكر بالخطه الي قالت عنها ساره ، و ماتدري ان سويتها شنو بصير ، كانت سرحانه و تفكر ، تقول حق خالد ان في واحد تقدم لها و تجذب عليه ولا تخلي الحال كما هو عليه ؟
سوق شرق :
طلعت اسراء من المحل عقب ما شرت القميص الي شافته ، دلال حست بالتعب من كثر المشي وقالت لـ اسراء انها تبي تقعد بستاربكس تشرب لها شي ،،
دلال : واي اسور خلاص ، تعبت خلينا نقعد بستاربكس شوي
اسراء : دلووول شفيج الله يهداج صايره جنج عيوز ، تو الناس نطري بعد شوي نروح ستاربكس ،،
دلال : انزين انزين ، بس تكفين لاتطولين
اسراء: انزيين
خالد و جاسم وصلوا سوق شرق ،
و اول ما نزلوا من السياره راحوا المحل " ديربي جينز " عشان جاسم ياخذ ملابسه ،
دخل جاسم و خالد المحل و خذا جاسم ملابسه و طلع ،
خالد : احس اني دايخ و تعبان
جاسم : من النوم الزايد
خالد : اي نوم ، اقولك تعبان و دايخ تقولي نوم
جاسم : امش نقعد بستاربكس اشرب لك شي و تصحصح
خالد : يلا عيل امش ،
و بعد ما دخلت اسراء جم محل و ملت راحت ستاربكس ،
اسراء : يلا حتى انا تعبت ، امشي نروح ستاربكس
sweet memy
البارت الثالث :
نزلت اسراء مع دلال و راحوا ستاربكس ، لقوا طاوله فاضيه و معاها كرسيين ، سحبت اسراء الكرسي و قعدت ، عدلت شعرها و ملابسها ،
دلال : شنو تبين اطلبلج ؟
اسراء : اممم ، vanilia frappuccino with caramel one time up
دلال : اوكي
قعدت اسراء بروحها تنطر دلال على ما تطلب ، فتحت جنطتها و طلعت موبايلها و قعدت تقرا مسجاتها ،،
خالد و جاسم كانوا قاعدين بالطاوله الي جدامهم ، بس اسراء مالاحظت خالد ولا خالد لاحظ اسراء ،
دلال : باااك ، تفضلي طلبج
اسراء : ثاانكس
شربت اسراء الفروبتشينو البارد و حسته يمشي داخل جسمها ،
فجأه يت عيونها على خالد ، و انصدمت !
اسراء و كانت متوتره حييل: دلال امشي نطلع
دلال مستغربه : ليش !! ؟
اسراء : بس قومي نطلع
دلال : شفييج شصاير ؟! ليش بتطلعين ؟
اسراء : هذا الي يلحقني بالجامعه ، كاهو جدامي ، قومي نطلع قبل لا يشوفني
دلال : ويييه عبالي عندج سالفه ، خليه يولي مالج شغل فيه
اسراء بخوف : دلال بليييز قومي نطلع مالي خلقه
دلال : ماشافج خلاص قعدي
حاولت اسراء تكون هاديه و ما تتحرك وايد علشان ما تلفت نظر خالد ، و فجأه
خالد عيونه طلعت من مكانها : اووووه هذي اهيا !
جاسم : منو اهيا ؟
خالد تسبه و نسى عمره : الحب يا جاسم الحب
جاسم : اي حب و اي خرابيط
خالد : خلني شوي ،
قام خالد من مكانه و راح لها ، اسراء انصدمت يوم شافت خالد ياي لها
خالد : قوه يا حلوه
اسراء قامت من مكانها و عفست ويهها: دلال قومي نطلع
خالد : وي وي شدعوه ، كل هذا عشان انا موجود هني ؟؟
اسراء : دلال يلا امشي
خالد : حط ايده على ايدها و قالها بصوت هادي ، قعدي حبيبتي انا ابيج
اسراء تنحت و ما استوعبت الي صار ، حست بشي غريب قاعد يصير
اسراء حطت عينها بعينه و بهدوء و بصوت ناعم : هدني
خالد : والله ما ودي اهدج ، بس بهدج
اسراء: !!!
دلال منصدمه و تشوف الي قاعد يصير و و مستغربه ،
مشت اسراء مع دلال جان يقولها خالد
خالد : تعالي كملي الفروبتشينو مالج
اسراء : عليك بالعافيه ، مابيه
خالد : كيفج ، خذا الفروبتشينو مالها و شرب عقبها و قال اااه طعمه أحلى عقبج يا عسل ،
طلعت اسراء و كانت حييل متضايقه من الي صار و معصبه ،
دلال خايفه : اسور شفيج
اسراء بضيق و مالها خلق تتكلم : مافيني شي ، يلا انا بروح البيت
دلال : شلون مافيج شي ؟ قعدي هدي شوي بعدين روحي ، والله اخاف عليج تسوقين و انتي متضايقه
اسراء : دلال مافيني شي ، لاتخافين ، يلا تبين شي ؟
دلال : سلامتج ، شوي شوي و ديري بالج
اسراء ابتسمت ابتسامه بارده : ان شاء الله
مشت اسراء و ركبت سيارتها و قعدت تفكر باللي سواه خالد ،
اسراء : هذا من صجه ! ياربي شنو هالريال ، ليش يسوي جذي ليش ،، نزلت دمعه منها و مسحتها بسرعه و كملت طريجها ،
خالد مع جاسم ظلوا في ستاربكس ،
جاسم : خالد شنو الي سويته انت ! حرام عليك ، احرجت البنت !
خالد من غير اهتمام : شسويت انا ؟ ما سويت شي
جاسم : كل هذا و ماسويت شي
خالد : جاسم احبها ، و ربي احبها ، بس اهيا ماتحبني شسوي !! شلون اخليها تحبني ،
جاسم : اففف يا خالد ، مليت من كثر ما اسمع هالكلمه ، احبها و احبها ، خلاص البنت ماتبيك مو غصب السالفه ! خلها بحالها يا اخي !
خالد : مستحيييل اخليها بحالها ، والله بسوي المستحيل عشان اخليها تحبني ،
جاسم تنهدت حيل : عنيد و الي براسك تسوييه
بيت بو عبدالعزيز :
وصلت اسراء البيت و ماكان لها خلق شي ، دخلت البيت و سلمت على الموجودين بالصاله ،
اسراء: السلام عليكم ،
ام عبدالعزيز : و عليكم السلام ، وينج يمه تأخرتي
اسراء: ماعليه يمه ، الشارع زحمه ، عن اذنج ،،
بخطوات سريعه راحت غرفتها و قعدت على السرير و تنهدت ، خذت لها نفس عميق ، سمعت صوت تلفونها ، فتحت الجنطه و خذت التلفون ، لقت مسج فتحته و قرت الرقم ، لقته رقم غريب ، ما اهتمت و قرت المسج ،
المسج : [ لا تتضايقين ، صدقيني مو كيفي غصبن علي اسوي الي سويته ، انا أحبج و ربي احبج ، خالد ]
هذا من صجه !؟ يحبني ؟! مستحيل !! ، اذا تحبني ليش تسوي فيني جذي حرام عليك ،
سكرت المسج و حطت التلفون بعيد عنها ، و قامت غيرت ملابسها و انسدحت على السرير غمضت عيونها و ظلت تفكر بخالد ،
يقول يحبني ، صج يحبني ؟ ولا يلعب علي ؟ و اذا يحبني ليش يسوي فيني جذي ؟؟
تنهدت حيل و طردت خالد من تفكيرها و عقب دقايق نامت ،
بيت بو عبدالله :
في غرفه فاطمه تحديدا ، كانت فاطمه تسولف مع محمد بالتلفون و مستانسه حيل ،
محمد : واي حبيبتي ما اقدر اصبر ، متى نتزوج ؟
فاطمه بدلع : حمودي حبيبي انا قلتلك ما اقدر الحين ، لما اخلص دراستي ،
محمد : يا حبيبتي و انا شنو الي يصبرني سنتين على ما تخلصين ؟
فاطمه : ماعليه ، سنتين بطيرون جنهم شهرين
محمد يتنهد : يالله نصبر ، بعد مالنا غير الصبر ،
فاطمه : محمد ، انت تحبني ؟
محمد : شنو هالسؤال السخيف ؟ طبعا احبج ، و احبج و اموت فيج بعد
فاطمه ماتت من الحيا : و انا بعد يا بعد عمري
محمد حب يحرجها : انتي شنو ؟
فاطمه استحت و ماتدري شتقول : محمد :$
محمد: وااي فديت الي يستحون ، يلا حبيبتي نامي باجر وراج دوام من الصبح
فاطمه : محمد انا مو ياهل عشان انام الحين
محمد : يلا سمعي الكلام و نامي ، يلا حبيبتي تصبحين على خير
فاطمه : ولو اني ما شبعت منك ، بس يلا ، بنام غصب عشانك ،
محمد : عفيه على حبيبتي ، يلا حبيبتي تصبحين على خير
فاطمه : و انتا من اهل الخير قلبي ،
محمد : مع السلامه
فاطمه : مع السلامه
حست فاطمه بالوناسه و سمعت كلام محمد و نامت و هي تفكر بحبيبها ،،
الساعه 8 الصبح ،،
بيت بو عبدالعزيز :
قعدت اسراء من النوم الساعه 8 الصبح ،
اسراء : امبيييه الساعه 8 ! مايمديني ، نص ساعه و تبدي المحاضره و انا توني قاعده من النوم ،
قامت بسرعه من النوم و غيرت ملابسها و تجهزت و خذت اغراضها و نزلت ،
ام عبدالعزيز كانت بغرفه الطعام تنطر بنتها ،
ام عبدالعزيز : وينج يمه تأخرتي
اسراء مستعيله حيييل : اي يمه حدددي متأخره ، يلا يمه انا طالعه تبين شي ؟
ام عبدالعزيز : قعدي تريقي
اسراء: لاا يمه حدي متأخره يلا مع السلامه
ام عبدالعزيز : انزين شوي شوي ديري بالج ع الطريج
ركبت السياره و بسرعه طااارت ، كانت تمشي سريع علشان لا تتاخر ، و وصلت الساعه 9 ، و نزلت من السياره و بخطوات سريعه مشت لين وصلت عند قاعه المحاظره ، فجأه طاحت اغراضها و كتبها و جنطتها ،
اسراء بصوت مسموع : أمبيييه !
خالد الي كان يتمشى على ما تبدي محاضرته و شاف اسراء تلم اغراضها ، قرب منها و قالها :
خالد : صباح الخير
اسراء و من غير ما تشوفه : صباح النور
خالد : خليهم ، انا اشيلهم عنج
ما اهتمت لكلامه و كملت
خالد نزل نفسه للارض و بدا يشيل اغراضها ،
اسراء شافت خالد و اهوة يلم اغراضها و مفتشله و ماتدري شتقوله ، رفع خالد نفسه و عطاها اغراضها ، و قالها تفضلي ،
سكتت اسراء شوي ، و بعدين قربت يمه وقالت له بحيا كبييير
اسراء : مشكور اخوي ماقصرت
خالد : ولو ما سويت شي ، يلا عشان لا تتاخرين( ابتسم لها )
حست اسراء بقلبها يدق و يحن لخالد ، مشت خطوتين و وقفت ، حست انه خالد يشوفها ، لفت ظهرها و شافته ، غمز لها خالد بحركه خفيفه ، ابتسمت ابتسامه تذوب الصخر و دخلت المحاظره بهدوء تااام و قعدت و طول الوقت كانت تفكر بخالد و بالموقف الي صارلها ،،
و عقب ما خلصت المحاضره طلعت و كانت هاديه ، خلصت شغلها و راحت الكافتيريا ، و لقت دلال قاعده بروحها ، راحت و قعدت معاها ،
اسراء : هاي دلول
دلال : هلا والله
سرحت اسراء بخيالها ، صوره خالد انطبعت في مخها و مو راضيه تختفي ، كانت تفكر فيه ، تفكر بشكله ، كان خالد جمييل ، جميل حيل .! حنطاوي طويل عريض عيونه متوسطه عسليه على بني غامجه و خشمه طويل دقيق حلوو عنده غمازه وحده على اليمين جسمه حلو كامل و الكامل الله ،
دلال : وين سرحتي ؟؟
اسراء صحت من سرحانها : ها ؟! معاج
دلال : وين معاااي ، بشنو سرحانه ؟
اسراء بربكه : ها ؟ لا مححد !
دلال ضحكت : هه مبين ، قوليلي بمنو سرحانه ؟
اسراء من غير ما تحس : تصدقين انه حلو ؟ و انه يحبني ؟
دلال مافهمت : شنو حلو ؟ و منو الي يحبج ؟
اسراء انتبهت لنفسها : انا شقلت ؟ شنو حلو ؟
دلال : بضحكه عاليه شوي ، امبييه اسور شفيج ؟ كل هذا و تقولين محد ؟ اعترفي قوليلي منو الي ماخذ عقلج و تفكيرج ؟
اسراء: خالد
دلال : خالد ! منو خالد ؟
اسراء: خالد
دلال : لايكون الي .. !
قطعت كلامها: اي اهوه
دلال : سرحانه بخالد ؟! ويين الي ما احبه و اكره و اتضايق لما اشوفه ،
سبحان من يغير الاحوال ، بيوم و ليله حبيتيه ؟
اسراء : دلال ، اهوه يحبني
دلال : مو كل واحد يقولج احبج يحبج ، وايد ناس يلعبون و ماخذين الحب تسليه
اسراء : بس خالد غير
دلال : كلهم نفس بعض ،
اسراء : لا يا دلال خالد يحبني ، ما يلعب
دلال : و انتي ؟ تحبينه ؟
ارتبكت و ماكانت تدري شتقول : انا ؟! ها .. مادري
دلال : والله شكلج تحبينه
اسراء بحيا : اي دلال ، احبه
دلال : يحليلج يا اسوور، والله قمنا نحب
اسراء: دلاال بس ، خليني شوي افكر
دلال : فكري على راحتج حبيبتي ، انا بخليج الحين عندي محاضره يلا اشوفج على خير
اسراء : اوكي
من صوب ثاني خالد ، الي كان مستانس و حس انها بدت تتغير شوي و بدت تحبه ، كان يفكر فيها و اهيا تفكر فيه و قطع تفكيره صوت التلفون ، كان المتصل [ شهوده]
خالد : من وين طلعتلي هذا بعد !
خالد : الو
شهد بصوت واطي و مو مسموع : شلونك خالد ؟
خالد الي ماكان سامع صوتها عدل : الحمدلله بخير ، انتي شلونج ؟
شهد : يهمك تعرف شلووني ؟ و اخباري ؟
خالد : شهد شهالكلام ؟
شهد : خالد ، انا بقولك شي
خالد : تفضلي ،
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك