رواية توأمي لكن انا غير ومالي مثيل وراسي عنيده -47
صقر بهمس:ارتاحي ونامي
بعدها عنه وجلس بطرف الكنبه وحط راسها على رجله وهو يمسح على شعرها وبهمس:انا بجلس صاحي لحد ما تصحين
بانه اللي تحس انها مو وحيد ومعاها سند ارتاحت نوعا ما وغطت في النوم بعمق بعد يوم طويل ومتعب لها
&&&
اشرقت شمس الصباح
ومو دائما الشروق يعني صباح جديد ويوم جديد على الكل ولا يعني النسيان
صحت من نومها وشافت جدتها جالسه جنبها وبصوت مرتاح:صح النوم يا بنيتي
دانه اللي تحس راسها يعورها:اهلين يمه صباح الخير
جلست وهي تطالع جدتها:مانمتي
الجده:كيف انام وانا احاتيك
دانه قرب من جدتها وحظنتها وبهمس:ربي لا يحرمني منك
الجده:ولا منك
دانه وهي تبعد:راسي يعورني
الجده:الحين اوصيهم يجيبون لك بندول ويسكن العوار
دانه هزت راسه وهي ساكته وبدت تسرح
الجده:ترى العزاء بيكون في بيت امك
دانه وهي تطالع جدتها والدموع تملى عيونها هزت راسها بزين بدون ما تنطق بولا كلمه
الجده بحنيه: يا بنيتي الصياح ما يفيد قومي صلي لك ركعتين وادعي لها بالمغفره احسن لها
دانه وهي تمسح دموعها اللي طاحوا :ان شاء الله
قامت من المكان وهي تحس ان جسمها مكسر وتوجهت لدورة المياه(اكرمكم الله)تغسل وجهها وتتوضى وتصلي وتدعي لامها علشان تحس بالراحه
&&&&
جالس وساند نفسه على وراء ومغمض عيونه ويدها على راسها
فتح عيونه على صوت جواله مسك جواله وعطا المتصل مشغول قبل لا يصحي بانه
خذا مخده وحطها تحت راسها وقامت وطلع وهو يرجع يتصل على المتصل
ثواني وفتحت عيونها وهي تحس ان راسها ثقيل
رفعت راسها وعدلت نفسها وجلست
دخل عليها وبابتسامه خفيفه :صباح الخير
بانه اللي حاطه يدها على راسها:اااه راسي يعورني
صقر: هذا من السهر ويله قومي وصحصحي واخذي لك شور ينشطك وانا برسل الخدامه بحبوب بندول
بانه وهي تطالعه هزت راسها بتعب وقامت بكسل وبخطوات بطيئه لغرفتها تاخذ لها شور
صقر وهو يشوفها تطلع و يتنهد:الله يعين
عند الشباب
في الشركه تحديدا
واقف جنبه وبعد ما علمه:ها عسى فهمت يا مازن
مازن اللي يحك راسه:ايه فهمت افا عليك يالنسيب
معاذ:من شفت عيونك اللي تقول ما ادري وين الله حاطني وانا غاسل يدي منك
مازن:لا افا عليك فهمت الشغل كله
معاذ وهو يبعد:نشوف
بعد ما طلع معاذ
التفت مازن على يزن اللي يشتغل:انت فهمت شي
يزن اللي يطقطق على الكومبيوتر:اكيد
مازن:ول عليك مع اننا توام ما ادري ليه مختلفين بالذكاء انا ما فهمت شي
يزن وهو يطالع اخوه:هههه وليه ما قلت لمعاذ انك ما فهمت
مازن:احس لاعت كبده مني
يزن:ولا يهمك اجي الحين وافهمك
مازن:بعدي يا اخوي
يزن:يا شين المصالح ههههههههههه
&&&&
في مكان ثاني بالشركه
جالس ويطالعه وبعدها مال وهو يهمس:اقول معاذ
معاذ:سم يا مقعد
مقعد باستغراب:هذا وش جابه
معاذ باستغراب:ليه
مقعد:مو المفروض يكو مع زوجته باصعب اوقاتها
معاذ وهو يهز راسه:ما لقيت الا نادر اغسل يدك منه
مقعد:الله يعين بنت الخال على كتلة الجليد اللي مايحس
معاذ:ايه والله الله يعينها
سكتوا وهم يطالعون نادر اللي يشتغل ويشغل نفسه
في مكان ثاني
جالسه في المطبخ
دخلت عليها وهي تبتسم:صباح الخير
التفتت لها وبمجامله:صباح لنور
شمرت عن اكمامها وتوها بتساعد الا وقفتها:وش بتسوين يا سميه
سميه بابتسامه:بساعدك يا خاله بسوي القهوه عنك
ام حصين باستغراب:تعرفين تسوين قهوه
سميه بابتسامه:ايه اعرف قهوه وزنجبيل وشاهي وكل اللي يجي بخاطرك
ام حصين بنظرة اعجاب:هجل سويها ووريني الهمه
سميه:ان شاء الله
جلست ام حصين تتفرج وبدت سميه تشتغل وبدت نظرة ام حصين تتغير في سميه
&&
جاء وقت العزاء ناس داخله وناس طالعه ناس تبكي وناس مثل ما تدخل تطلع وما يحس بالنار الفرقاء الا واطيها
جالسه وجنبها امجاد سجيه
سجيه وهي تحظن بانه:اذكري الله كلنا بنموت الرابح هو من يفوز بها بالاعمال الصالحه والخاتمه الحسنه
بانه:الله يرحمها
امجاد وهي تشوف اللي دخلوا:بانه
بانه طالعت امجاد اللي تاشر لها على الباب
وقفت وقبل لا تتحرك شافت الرفض والغضب في عيون توامها خلاها ما تتحرك من مكانها
مشت وعدت من جنبها وجلست وجلسوا البنات بعد ما عزوا بانه
الجده وهي تعزي بانه:معليه يا بنيتي هي الحين معصبه ومقهوره بعد فتره بتهدى وبترجعون احسن من اول
بانه هزت راسها :ان شاء الله
سلمت بعدها على عماتها اللي قالوا نفس الكلام وجلست
سجيه وهي تطالع دانه اللي تبكي ومو معبره بان هوبهمس:وووول هذي شايله على اختها من قلب
امجاد :اسكتي لا احد يسمعك
مرت ساعات العزاء طويله على البعض وقصير عند البعض الثاني
همسات البعض يتحمد ربه لما سمع ان امهم مقتوله والبعض ينظر لهم بشفقه والبعض باستنكار
بعد مضى ساعات خفوا الناس والكل قام يروح بيته ويرجع لعياله والجرح ما يبقى الا في قلوب
اهل العزاء
الجده وهي تشوف سجي هوامجاد قاموا يمشون في جهه من البيت قامت وراهم وبهمس:بنات
التفتت لها سجيه وبخوف:نعم
الجده:ماله داعي الخوف انتي مالك ذنب انا اعرف وش تفكرين فيه
سجيه بندم وخوف:انا...
قاطعتها الجده:قلت لك ما لك ذنب الغلط غلطته هو لا تحملين نفسك شي مالك دخل فيه
كملت الجده وهي تطالعهم:انا ابغاكم في موضوع يخص بانه
امجاد وهي تعقد حواجبها:وشو بانه وش فيها
الجده:ابغى منكم تفكرون بطريقه نصلح بين دانه وبانه
امجاد طالعت سجيه ورجعت طالعت الجده :وليه كلمتينا احنا بالذات
الجده:لانكم اكثر ثنتين تعرفون بانه ومحد بينفعني في هالسالفه غيركم ..كملت وهي تطالع دانه:اعرف حفيدتي ما تعيش بدون اختها
كملت سجيه وهي تتنهد:وحتى بانه بدون اختها مو مرتاحه
الجده:هجل فكروا في طريقه وابغى نتعاون على اننا نصلح بينهم
سجيه بابتسامه:خلاص اعتمدي يا جده راح نفكر لك بفكره ما تخورش الميه وبعدها نرد عليك
امجاد طالعت سجيه والجده ودخلت يدها بجيوبها وما علقت
الجده:يعني اعتمد
سجيه بثقه:افا عليك اعتمدي
راحت الجده والتفتت امجاد على سجيه بعصبيه:انتي من ذكائك الزايد تطلعين افكار
سجيه بثقه:هالمره راح ابهرك بس خلي العزاء يخلص وانا بضبط كل شي
امجاد هزت راسها:لا بالله كدينا خير
راحت وخلت سجيه وراها اللي تطالع امجاد بعدم رضى وبهمس:راح تشوفين سجوي وافكارها اللهلوبيه وش بتسوي
مشت وراحت وراء امجاد وجلست وهي تطالع بانه ودانه والافكار تدور في بالها
&&
لهنا اوقف واترك لكم حرية التعليق
ودي وحبي لكم
قلب امي وروحها
&
توامي لكن انا غير ومالي مثيل وراسي عنيده
البارت الثامن والعشرون
الجزء الاول اهداء الى ايه و حمودي
جالسه في البلكونه وبهمس:اليوم كان اخر ايام العزاء ااااه خلاص الكل راح بيته ورجع لاهله وعيلته وانا اللي بقعد والحرقه في قلبي
تنهدت بحسره وعيونها تطالع قدام
بعد دقايق فاقت من سرحانها ولفت لبسام اللي مبين عليه انه نعسان
بانه:حبيبي وش فيك
بسام وهو يحك عيونه:ابغى انام وين امي طولت
بانه وهي تحطه على رجولها:حبيبي ماما مسافره
بسام:طيب بابا وينه
بانه وهي تتذكر سعد وبحقد :هو بعد مسافر ...كملت بهمس:وان شاء الله ما عاد راح نشوف وجهه وراح نرتاح منه ومن وساخته
بسام:انا فيني نوم نعسان
بانه وهي تحط راسه على صدرها:نام يا روحي نام
تنهدت وهي تكمل:نام وارتاح وخل الدنيا باللي فيها
بعيد عنهم شوي
فسخت نظارتها تمسح دموعها وبحزن:والله عورت قلبي وبعدين يا امجاد بنقعد نتفرج عليها
امجاد وهي تطالعها ويديها في جيبها:خليها تبكي وترتاح
سجيه:لمتى هالحزن والزعل لمتى انتي نسيتي ان ورانا حياه نعيشها وهي بعد وراها حياه تعيشها ومستقبل تفكر فيها لمتى بتقعد كذا سرحانه وتكلم نفسها
امجاد اللي تذكر نفسها لما مات اخوها بتنهيده:فتره وتعدي
سجيه وهي تحط يدها على كتف امجاد وامجاد تلتف لها وتبتسم باسى:راح تتخطى هالمرحله بانه قويه بس عطيها وقتها
سجيه وهي تعدل نظارتها على عيونها:لا يا عمري انا مابخليها كذا لازم ترجع لاختها كل وحده منهم مالها الا الثانيه
امجاد وهي تعقد حواجبها:وش تفكرين فيه
سجيه وهي تبتسم بخبث:بتشوفين
مشت وتركت امجاد اللي مو فاهمه شي وبهمس:الله يستر منك عسى ما تجيبين لنا مصيبه يا سجوي
رجعت التفتت لبانه اللي كانت حاظنه بسام وتبوس راسه وتبتسم وتغني له علشان ينام
امجاد ابتسمت بخفه وتوجهت لها وحطت يدها على كتفها
رفعت بانه راسها وطالعت امجاد اللي همست لها وهي تحاول ترفع معنوياتها:راح تتجاوزين هالمرحله انا متاكده من انك قويه
بانه بابتسامه باهته وبهمس:الله يعين
رجعت تطالع بسام وسرحت مره ثانيه وامجاد جلست قدامها وهي ملتزمه الصمت
&&
جالسه في سريرها ومسحت دموعها
:اليوم اخر كان اخر ايام العزاء ااااه يا رب ارحمنا برحمتك يارب العالمين
تذكرت شكل اختها وكيف كانت منكسره اول مره تشوفها بها الشكل تعودت على شقاوتها تعودت على غرورها تعودت تشوف التحدي بعيونها وبريق الاحلام يشق من عيونها المليانه بشغف للحياه
نزلت دموعها ومسحتها وهي تنزل من السرير وتروح للحمام(اكرمكم الله)
غسلت وجهها وتوجهت بتطلع من الغرفه واول ما فتحت الباب وصلها صوته
كان يكلم ومعطيها ظهره
ايه - انا قايل محد يساعدني غير قلبي - هههههه اكيد يا روحي ما يحتاج - تعرفين ان ما في القلب غيرك - ايه اثبتي انك تحبيني بعد ما جبتي لي اللي ابيه - حياتي انتي
حست بقهر وهي تسمع كلامه صكت الباب بخفه ومشت وطاحت على سريرها وبقهر:ما اقدر اتحجمل كل هذا امي تتركني واختي وزوجي اللي مفروض يكون سندي الوحيد يكلم غيري حتى ما بعد خلصت ايام عزاء امي
اهئ اهئ اهئ والله كثير على قلبي كل هذا كثير على قلبي
رفعت راسها وهي تمسح دموعها اللي تطيح غصب عنها:انا الغبيه ليتني ما كنت ضعيفه كان كل شي غير كل شي غير
رجعت دفنت راسها بسريرها وهي تشاهق من الحزن والحسره والالم وصوت نحيبها وشهقاتها تعلى
في الصاله
بعد ما صك المكالمه زفر:اوووف متى برتاح منها
رفع جواله واتصل وبعد ثواني وصله الصوت:الو هلا يوسف - ايه اخذ العنوان - ما عليك قدرت اخليها تجيب العنوان وبالراحه بعد - اخذ العنوان - شارع (...)مخزن(...) - اوكي اعتقد مهمتي مع اخته انتهت ولا انا غلطان - اخيرا ارتحت خلاص - يا شيخ اهم شي ما عاد تكلفني باشياء زي كذا تدري انا ما وافقت ومشيت معاك في هالسالفه الا لانك ولد عمتي - ماشي - الله يعينك ويوفقك في مهمتك - فمان الله
صك الجوال وهو يردد:الحمد لله اخيرا انتهيت منها والمعلومات اللي يبغاها يوسف اخذتها منها
فك جواله وطلع الشريحه وكسرها وتوجه للزياله (اكرمكم الله) ورماها فيه وبهمس:في اللي ما يحفظك يا زباله انتي واخوك
مشى متوجه لغرفته وقبل لايدخل انتبه على صوت البكاء والشهاق
تنهد وقرب من الباب ووقف يسمع بكائها وكلامها:ليه يا دنيا كل ما قلت بتفرحيني تبكيني وتقهريني اكثر واكثر ارحمي قلبي اهئ اهئ
مد يده يفتح الباب وقبل لا توصل يده لمسكة الباب انرسمت له حنان قدام عيونها
رمش بعيونه عدة مرات ورجع لوراء وبهمس:يارب
مسح على شعره وتوجه لغرفته وصك الباب عليه هو وافكارها اللي لقت طريقها له
&&&&
في البيت الكبير
جالسه مع رفيقة دربها
ردت باستغراب بعد ما سمعت اللي قالته:يعني انتي مو حاقده على بنت المصريه
الجده بحنيه:لا حرام البنيه وش دخلها اذا.... كملت بمراره :جدتها تزوجت خليفه هي مالها اي كلمه ولا لها اي دور حرام نظلم البنيه ونحكم عليها بالكره علشان شي هي ما لها دخل فيه
ام راكان سكتت وهي تطالع صديقة عمرها وتنهدت
الجده بابتسامه:بالعكس البنت حبوبه و وفيه لبانه وتنحط على الجرح يبرئ
ام راكان:علشان كذا متعلق فيها
الجده باستغراب:من تقصدين
ام راكان:ولدي
الجده بتفاجا:راكان
ام راكان:لا ولدي حسن يوم تكلمت عنها قبل يومين عصب وبين عليه الضيق وزعل ولا رضى اجيب سيرتها والله قلبي ناغزني يا خوفي قلبه يميل لها
الجده بابتسامه:واذا مال لها وش فيها
ام راكان:هووو وشلون وش فيها
الجده:البنيه تنحب تدرين انها جات تعتذر مني
ام راكان باستغراب:تعتذر معقوله
الجده:ايه شفتي ان قلبها ابيض
ام راكان سكتت وما رت
الجده وهي تحط يدها على رجل ام راكان:نصيحه مني لك وانا اختك لو جاء يوم وبغاها تكون له لا تردينه وتكسرين بقلبه
ام راكان سكتت
الجده:وش فيك سكتي ولا الكلام ما عجبك
ام راكان :لا بس اذا جاء ذاك الوقت يصير خير ان شاء الله
الجده طالعت ام راكان وهزت راسها بعدم رضى وام راكان سكتت ولفت وجهها تفكر في كلام رفيقة دربها
جالس على الكنبه وهي جنبه وحاظنها
شافتها سرحانه قرب وباس خدها وبهمس:وش فيها غصونتي سرحانه
طالعته وبابتسامه:ربي ما يحرمني منك
معاذ بابتسامه:ولا منك بس وش له هالدعوه
غصون وهي تتعدل في جلستها:ما تبغاني ادعي لك وانت حياتي وروحي
معاذ وهو يبوس راسها وياخذها بحظنه:وانتي دنيتي كلها
لاحظ ان غصون تمسك فيه وجسمها يرجف وكانها تبكي
معاذ وهو يبعدها علشان يشوف وجهها بس غصون تشد عمرها له وكانها خايفه يتركها
معاذ بخوف:غصون وش فيك
بعدها بخفه ورفع وجهها وبهمس:وش فيك يا روحي
غصون وهي تطالعه وتبكي:جعل يومي قبل يومك
معاذ:بسم الله عليك وش هالكلام
غصون:اليوم لما رحت العزاء وشفتهم وهم لابسين اسود ما ادري ليه حسيت بخوف
معاذ وهو يزفربخوف:بسم الله عليك تعوذي من الشيطان
غصون تكمل ومعاذ يمسح دموعها:فكرت كيف قدرت ابعد عنك طول ما كنت اظن فيك ظن السوء كيف ولقيت اني غبيه
معاذ وهو يحظنها وبقوه:ماضي انسيه
غصون:انا ما ابغى اعيش يوم واحد بدونك انا بدونك اموت
معاذ:بسم الله عليك انتي بس اذكري ربك والموت والحياه بيد الله
رفع وجهها وهو يكمل:وان شاء الله بيرزقنا ربي بطولت العمر ونكبر مع بعض وتصير عجوز تخوفين
غصون وهي تضحك من بين دموعها:يعني انت اللي بتكون وسيم
معاذ بضحك:احم اكيد انا معاذ
غصون:هههههه فديت قلبك انت مو معاذ انت معوذتي
معاذ:يا ليتك مزعلتني من زمان علشان اتدلل كذا
غصون بزعل:حرام عليك يعني ما كنت مدللتك
معاذ وهو يهمس في اذنها ويتنهد:الا مدللتني ومعذبتني ومهبله فيني ما تشوفيني بغيت استخف بدونك
غصون بخجل:وانا بدونك ولا شي
معاذ:يا ويل قلبك يا معاذ رحت ملح
باس خدها:افداك انا بك...
قاطعها فتحت الباب القويه وبصوت عالي:انا ديت
معاذ وهو يمسك مخدة الكنب ويعفسها:جات مهدمت الملذات
غصون:ههههههههههههه
مي وهي تركض وتنط في حظن ابوها:وث فيك
معاذ بقهر:لا والله يقهرني تسال وش فيك
غصون وهي توقف:هههههههههههه انا بروح اسوي العشاء
معاذ:روحي خلاص خرب كل شي
غصون وهي متوجه للمطبخ:هههههههههه ميوي حبيبتي اقعدي مع بابا لا تخلينه لحاله
مي وهي تبوس معاذ:لا تحافين بدعد معاه لين يدول بث
معاذ:لين اقول بس يا فرحتي الا لين انجلط واموت
مي وهي تمسح على خدها:مين يموت ان شاء الله كل الاثلال يموتون
معاذ:ههههههههه كل الاشرار هههههههههه
باسها وهو يشيلها ويوقف :وش رايك نروح نشوف ماما وش بتطبخ
مي:ايه
معاذ وهو يبوس خدها:يله يا روح ابوك
مشوا للمطبخ لغصون وجلسوا على الكراسي وبدت السوالف والضحك مع مي ويارب تدوم عليهم السعاده
&
جالس في غرفته وعلى سريره
عدل جلسته وهو يتافف:اوووف لمتى بظل افكر فيها معقوله يا مقعد تحبها لها الدرجه وش الشي اللي يجذبك فيها يا مقعد ليه تشوفها بكل شي حولك
تنهد وهو يبتسم:كيف ما احبها وانا كل ما اشوفها احس اني اغرق
سند ظهره على وراء وبهمس:
يامن بنظرة من عينيك سحرتنى وبهمسة من شفتيك دبت فى هواك
يا ذات الحس الرهيف لماذا ألقيت علي الشباك
لقد سقطت فى هوية لا أعرف مداها ألقاء أم فراق
ألا تنقذينى من ذلك اليم قبل أن أغرق فى الاعماق
تنهد من قلب وعدل جلسته ومسك الجوال ودور رقمها وهو يردد:انا اللي بنقذ نفسي او اغرقها معي
جالسه عند اخوها اللي نايم
انتبهت على صوت الجوال ورفعته وباستغراب:هذا وش عنده متصل
فتحت الخط:الو
مقعد باحراج:الو اخبارك يا بنت الخال
بانه:الحمد لله بخير الاهل فيهم شي
مقعد بسرعه:لا لا بس حبيت اسال ما يصير اتطمن على اهلي
بانه بابتسامه:فيك الخير والبركه والله
مقعد بارتباك:طيب مدامك بخير هجل مع السلامه
بانه باستغراب لانها حست انه موطبيعي:مع السلامه
مقعد بتردد:لحظه لحظه بانه
بانه :نعم
مقعد:لا لا خلاص مافي شي
بانه باستغراب اكثر:طيب مع السلامه
مقعد بتردد:لا لا تصكين
بانه بطفش:مقعد وش فيك انا حاسه من البدايه ان عندك شي اختصر
مقعد باحراج:هو في موضوع بس مو وقته
بانه بتنهيده:لا عادي قول
مقعد:كنت ابغى اعرف يعني بس لا خلاص مو وقته
بانه وهي متمله:قول عن امجاد واخلص علي
مقعد وهو متفاجا:وش عرفك ان هذا هو الموضوع
بانه:انا مو غبيه واحس بكل شي حولي
مقعد وهو متفشل:مو وقته..
قاطعته بانه:لا عادي قول اللي عندك
مقعد بجديه:ابغى اعرف كل شي
بانه:تحبها
مقعد وهو يحك راسه:لو ما احبها كان ما اتصلت صاير اتخيلها حتى وانا جالس على الاكل مكان الدجاجه
بانه اللي مالها خلق تضحك:ههههههههه الله يقطع ابليسك
مقعد بضحك:شفتي كيف حالة ولد عمتك كسيفه
بانه:طيب وانت ناوي على وشو من ناحيتها مقعد حتى لو انت ولد عمتي ترى امجاد اختي و..
قاطعها مقعد:موانا اللي يلعب يا بانه ولو عندك شك 1%اني لعاب صكي الخط الحين بوجهي
بانه بتنهيده وراحه:لا بس حبيت اسمعها منك والحين وش تبغى تعرف
مقعد بجديه:كل شي
بانه:ماشي راح اقولك كل اللي اعرفه اسمع.......
بدت بانه تتكلم عن كل شي يخص امجاد من ناحية اهلها واخوها وبعض الامور اللي عرفتها من سجيه الثرثاره وكان مقعد مجرد مستمع
وصله السائق عند البيت
نزل بعصاته بس نزل مو مثل ما كان ينزل من قبل قدام بيته
نزل هالمره وهو يحس انه ناقص وهيبته مسحوبه منه وكانه شخص غريب ومرفوض في هالمكان
قرب ودخل البيت ودخل لما وصل للصاله ووقف يطالع بيته ويتذكر كل شي فيه طالع جهة المجلس اللي كان يجلس فيه مع احفاده تذكر كيف كانوا ما يضحكون كثير معاه من خوفهم لا يتجاوزون حدودهم معاه
طالع الصاله الكبيره وتذكر ولده ونزلت دمعه وهو يردد:يا ليت الزمن يرجع لوراء كان حطيتك تحت جناحي يا عبدالعزيز اااه يا زمن انت ما قسيت بس انا اللي كنت قاسي واستاهل كل اللي يصير لي
طلعت من المطبخ وتفاجات بشوفته وبهمس:خليفه
الجد وهو يطالعها:كيفك يا خزير
الجده وهو تلف وجهها:بخير الحمد لله مدام عيالي واحفادي حولي انا بخير
الجد:انا جاي يا خزير وحاسس بالندم و...
الجده قاطعته وهي ترفع يدها:لا تكمل الندم ما يفيد انت طعنتني وبعت كل السنين والعشره
بعت اخلاصي ووفائي وحبي لك كنت اركض وراء رضاك وانت كل اللي كنت تسويه تركض وراء غيري وتعور قلبي بكلامك القاسي حتى عيالي واحفادي ما سلموا منك عذبتنا في حياتنا اللي فاتت خلنا نرتاح باقي العمر
مشت وعطت الجد ظهرها وتوجهت لغرفتها تاركه وراها الجد اللي يجر وراه اذيال الخيبه والحسره وطلع من البيت وهو مصر يرجع بين عياله واحفاده
في مكان ثاني
طفشت من الجلسه بالغرفه وبهمس:افف ياربي انا الغبيه اللي خذيت اجازه طويله انا ليش حابسه نفسي ليه ما انزل تحت
قامت من مكانها ووقفت قدام المرايه تتاكد من ملابسها وبهمس:كذا تمام
توجهت للباب وفتحته ونزلت الدرج ونزلت للصاله وجلست على الكنبه ومسكت الريموت وفتحت التلفزيون تتفرج
ثواني الا داخله عليها سوسن وهي تطالعها بنذاله ومشت باتجاهها وخذت الريموت من يد هبه وفرت القناه وجلست تتفرج
هبه وهي تطالعها:في شي اسمه استاذان
سوسن مطنشه ولا ترد
هبه بعصبيه:سوسن انا اتكلم
سوسن وهي تطالعها وببرود:اسمعك مو صمخا لا ترفعين صوتك
هبه:صدق انك ما تستحين قلة الحياء موجوده هنا وفي المدرسه
سوسون اللي وقفت وبعصبيه:انتي هيه لا تصدقين نفسك وتسوين علي زوجة ابو
هبه وهي توقف :استغفر الله بس
مشت من المكان وقبل لا تطلع من الصاله وقفت في وجهها سوسن:وشو استغفر الله ليه شايفه جني
هبه لفت وجهها بتطلع الا سوسن مسكت يدها :لما اتكلم ما تطنشيني فاهمه
لفوا ثنتينهم لصوت الباب اللي انفتح وكان يامن توه جاي من برا
سوسن بتمثيل وصياح:اهئ اهئ ااااه اهئ حرام عليك انا وش سويت لك
هبه وهي متفاجاه:انتي وش فيك وش تخربطين
سوسن وهي تركض لابوها اللي قرب منهم وتحظنه وبصوت باكي وبدموع تماسيح:اهئ يا يبه ضربتني
يامن بعصبيه وهو يطاله هبه:وشو
سوسون بكذب:ضربتني وقالت لي مو متربيه اهئ اهئ
هبه :لا تصدقها انا..
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك