رواية يا لبيه يا الدنيا العجيبة -21
البارت 15
نزل خالد وقف بنص الدرج كان يمشي على اقل من مهله: يمه وين جوري
ام طارق: تو كانت عندي..رقت غرفتها
خالد: مريت غرفتها مافيه احد..
ام طارق: يمكن عند ريم.. شفيك تسأل عنها
خالد: تركي دق علي يقول ماترد..
ام طارق: لايكون متهاوشين؟
خالد: لا ما اتوقع هو بالطريق جاي يقول بيوديها حفله ومدري وش
ام طارق: ايه حفلة جمانه
.............
فوق في غرفة ريم
كانت ريم مخلصه وجالسه قدام التسريحه تحط اللمسات الاخيره
وجوري متوسده المخده ومنسدحه ع السرير
ريم: متى بتقومين ياكسلانه يالله على غرفتك اجهزي
جوري: بقوم بقوم.. وماقامت
ريم: مالك داعي والله بنتأخر وانا متحمسه ابي اشوف وجه ساره
لما تعرف ان الحفله تمويه وجمانه مسويتلها عيد ميلاد
جوري: عشان كذا انا متحمسه
ريم: أي متحمسه وانتي منسدحه!
دخل خالد وشاف اوضاعهم
خالد: ماشاءالله ريم جاهزه
ريم: ايه احتري جوري تجهز
طالع في جوري كانت ماسكه صدغها وتضغط ( الصدغ جوانب الراس خلف العين)
خالد: شفيك؟
جوري: شوية صداع..
خالد: كليتي بنادول
جوري: ايه لاتخاف
خالد: على كذا ما اتوقع تروحين
جوري: وليش ان شاءالله
خالد: شوفي وجهك وعيونك تعرفين السبب
جوري: لا بروح.. انت بتودينا؟؟
خالد: والله ياليت.. بس انتي عارفه المسافه من بيتنا لهناك طويله..
وانا ما اقدر اسوق هالمسافه..
جوري: معذور.. خلاص بنقول لطارق
خالد:لاتقولين لطارق ولاشي زوجك في الطريق جاي..
جوري:تركي جاي ماعلمني
خالد: دق عليك مارديتي ليش
جوري: والله جوالي بغرفتي" اكيد بيسويلي مشكله"
خالد: طيب قال لي ابلغك.. مايبي ينلطع تحت لاتنسين تراه يكره شي اسمه انتظار
ريم: اجل خلاص تكشخي والبسي في بيتكم..
مو توصلين وتغيرين رايك
جوري: لا بعد ماقالت لي جمانه بعيد الميلاد رايحه رايحه
خالد: قولي ان شاءالله
جوري: مشيئة الله فوق كل شي بس ماراح اغير رأيي وبروح الله لايعوق بشر
ريم: اجل نتقابل هناك.. لاني بطلع الحين
بعد عشر دقايق دق على خالد وقال له انه تحت..
مادق عليها خايف يكون مصير اتصاله مثل الاتصالات الباقيه
فتحت باب السياره وركبت
ارتعدت فرائصها وجهه مايبشر بخير استنتجت انه بسبب عدم ردها عليه
لان آيات الضيق كانت واضحه وضوح جلي على ملامحه
جوري: السلام عليكم
تركي: عليكم
ساد الصمت فتره
استأنف: ليش مارديتي
ضغطت بطرف أناملها على راسها: مادريت انك داق كان بغرفتي
تركي: وش فيك
جوري: قلتلك والله مادريت كان....
تركي: اقصد وش فيك ماسكه راسك
جوري: مصدعه.. يلا بس سوق مانبي نتأخر
طنش وكمل سواقه
..............
قبل ماتنزل من السياره
- : ساعه وراجع ..
رشا: وش اللي ساعه تراها حفله مو زياره
- : احمدي ربك اني جايبك
رشا: تمن ؟؟..
- : لا بس هالساعه تقدرين تقولين عربون شكر مقدما عشان العضوه اللي كلمتك عنها
رشا: يعني الدعوه مصالح
- : عليك نوووور تعجبيني.. امووووت على ذكائك
رشا"الله ياخذك"
ونزلت
وصلوا
هي دخلت جناحهم على طول
وهو راح لندى عطاها الهدايا وقال لها كلمه وطلع بدون ماييسمع منها رد
اتجهت جوري لغرفة الملابس وغاصت في الدولاب تدور شي يناسب الحفله
دخل وشافها عقد ذراعه على صدره وطالع فيها
تظاهرت انها ماتشوفه
تركي: الحين حنا يوم ناخذ الادويه عشان تتصورين معها
ابعرف ليش ماتشربينها كل يوم وش بيضرك؟؟
جوري: ترا والله مالي خلق للمشاكل
بحده: ولا انا بس بعرف هالحركات اللي منك
جوري ببرود: ماراح تخاف علي اكثر من نفسي..
وبعدين تطمن اصلا المفروض استخدمها وقت اللزوم شكلك سمعت الدكتور غلط
اتسعت حدقة عيونه: ايش
مشت من قدامه وحطت الفستان ع السرير وراحت التسريحه سحبت الكرسي وقعدت:
اقول شكلك سمعت الدكتور غلط ماقال كل يوم ..
يمكن قال تنتظم يعني استخدمها وقت الضروره..
هم كبار السن اللي يستخدمونها كل يوم .. اما اللي في عمرالعشرينات فهي كمثبط للدم يساخدمونها عند اللزوم..
يعني ماراح يجيني شي حتى لو ما استخدمتها اسبوعين
تركي: وش دخل هالموضوع
جوري: ترا ادري فيني الضغط!!!! !!!
تراجع بصدمه: وش هالخرابيط وش هالكلام
اخذت البلاشر ومررته على خدودها ولفت عليه: حتى الغبي بيعرف..
سوء التغذيه ادويته فيتامينات ولاحديد اما هالحبوب شكلها غريب..
ما اكذب عليك انا يوم شفت اهتمامك قلت اكيد فيني سرطان حتى قعدت كم من يوم افكر وين شايفه هالحبوب قبل..
من سخرية القدر ان ابوي يستخدمها وانا اللي اعطيه اياها بيدي
لسانه مربوووط للاخر
جوري: الحمدلله عندي ضغط ولا سرطان..
واردفت باستهزاء: وسع صدرك
سمع صوت امه متوجهه لبابهم.. وراح يفتح قبل ماتدق هروب منها
................
نوف: يمه الحين شلون
ام فيصل: عطتكم البنت خبر عن الحفله من فتره ليش ماجهزتي بدري؟
نوف: شعري يالله ضبط هو اللي أخرني
ام فيصل: تستاهلين
نوف: والله ماتوقعتهم بيروحون عني هذا حمد كله منه..
وقعدت تتحلطم: ليت السايق هنا ولا هالذل
ام فيصل: ومن بيعطيه راتبه حنا يالله يكفينا اللي معنا علشان كذا فنشناه
سكتت نوف معبيه قهر فل
ام فيصل قلبها رق عليها: طيب روحي مع ندى
نوف: دقيت عليها توها طلعت
ام فيصل: وريم
نوف:اي والله شلون طافتني.. بروح ادق عليها
شالته من اول رنه:هلا نوف
نوف:هلابك وينك
ريم:بالسياره
نوف: تقدرين تمرين لي
ريم: سحبوا عليك هههههههه
نوف:ههههههه بقوووه يلا انتظر
................
المكان حافل بالبنات
رقص واستهبال و وناسه
جمانه: ياااربي ليش ماجت
دانه: والله انتي ماشفتي حمد مستعجل ولو حنا بعد تأخرنا كان ماشفتي وجيهنا
جمانه: يعني تفركشت الخطه
دانه: لا تطمني تو ريم كلمتني قالت بيمرونها
جمانه: الحمدلله حلو.. طيب تكفين اتفقي مع نوف ت...
دانه: لاتوصين كل شي تمام
خمتها وباستها مع خدها: وه ويلوموني فيك يابنت عمتي
تبوسمت دانه
في الحفله عند المرايات اللي بالمدخل
ندى: ها شكلي مضبوط
ساره: رووووعه
ندى: من جا ومن ماجا
ساره: كثييييييير ادخلي وتشوفينهم.. الا وين جوري وجودها مهم
ندى: يختي مدري دخل علي تركي معصب الا بركان
عطاني الهديتين وقال هذي لك وهذي لجوري خذيها عطي جمانه
لان جوري ماراح تروح تعبانه.. وطلع
كنت بروح اطل عليها بس من شفت نظراته خفت..
ويوم جيت اطلع سألتني امي عنها قلت تركي يقول انها تعبانه ماراح تروح
ساره: يمكن اللي خبري خبرك
ندى: لا ماظنيت هي اصلا ف... وسكتت
واردفت: ماعلينا ان شاءالله تطيب
ساره: ان شاءالله
لاحظت ندى ان ساره فيها شي
ندى: مو على بعضك وشفيك
ساره: وساوس ابليس
ندى:عسى ماشر
ساره: تبين الصراحه ضايقه ما ابي اشوف ريم من بعد اللي صار
ندى: سويره والله حرام عليك مفروض نسامحها وحنا عرفنا اعذارها
ساره: مدري بس احس اني مدري شلون تجاهها
ندى: والله مسكينه تنرحم لاتكونين قاسيه معها
ساره: زين امشي ندخل
كانت رشا قاعده على طاوله اختارتها بعنايه ليتسنى لها رؤية الداخل من الخارج
مانزلت عيونها من البوابه متى وتجي جوري
قربت دانه والبنات يسلمون عليها
بس مانتبهت لأنها مشغوله بتفرس وجوه الموجودات
جمانه: هيييه انتي
رشا: هلا هلا وسلمت عليهم وحده وحده
جمانه: ياحلاة الجمعه والله ناقصنا جوري ومنى
دانه: منى نفاس
جمانه:طيب وجوري ليش ماجت ياندى
ندى: تعبانه شوي
جمانه:لايكون تتوحم
ساره: ملقووووفه امشي امشي بس خل نرقص
كرهت كل الموجودات ودها لو تبيدهم من الوجود
دانه بدون نفس: بتجين معنا
رشا: لابقعد
نوف: بقعد معها
دانه: اجل عن اذنكم
...............
نرجع لام تركي اللي توها داخله جناح تركي وجوري
دخلت بوجهها البشوش وبخطوات سريعه
مشت لين عند جوري: يمه جوري شفيك
باستغراب: وش فيني
ام تركي: ندى قالت لي انك تعبانه
جوري: من قال لها
تركي: انا
ام تركي: وش يوجعك؟
جوري ونظراتها على تركي كان ودها تقول له من "سمح لك تقول لها": ابد صداع بس كنه خف..
ام تركي:اكيد من الضغط انا طالعه بجيب لك شي
جوري" وش دراها!!!": لاخاله مايمدي لاني بلبس والحين تركي يودينا انا وندى
ام تركي:ندى راحت منذو مبطي
جوري: راحت؟؟
ام تركي: ايه راحت ومنتيب رايحد بهالحاله.. واردفت: شوفي دقيقه وبجي.. وطلعت
التفتت لتركي:ليش تقول لها ان فيني الضغط
تركي: هي كشفتني
جوري: ومن سمح لك تقول لندى تروح بدوني
تركي: لمصلحتك
كانت اجاباته قصيره مايبي اصتدام معها كفايه عليه الالم الحبيس المتأجج في صدره
من شوفته لرشا
رجعت ام تركي كان بيدها مشروب ساخن:خذي حبيبتي اشربي بينفعك للضغط
تناولت الكاس من يدها ميزت ريحة المشروب كان فيه حبة البركه السوداء
جوري: لاخاله والله مقدر
ام تركي: اجل لو اني قلتلك كل صباح تشربين ليمون مع فص ثوم
جوري: لالالا واللي يعافيك خاله استغفرالله انا اكرهه في الاكل تبيني اشربه
ام تركي: والله اني قايلته بترفضين بس ياحبيبتي بيفيدك
وانا بنفسي بتابع الضغط معك بجهاز عمك محمد واذا تعدل نوقف الثوم
جوري: لا وربي مقدر وتأشر ع اللي بيدها كافي ذا مدري شلون بستصيغه
ام تركي: اجل شدي الهمه ما ابي اشوف قطره
ترددت مره تقربه من فمها ومره تبعده
تقدم منها تركي واحاط ايدها اللي ع الكاس بيدينه وقام يشربها: حياتي عشاني حاولي
قبضته الدافيه محت الشعور اللي كانت تحس فيه تو تجاهه ..
"صح هو يمثل بس حلو هالاحساس وانا لازم اجاريه قدام خالتي"
: حبيبي والله مو قادره بس بحاول عشان خالتي وعشانك وصار يشربها حبه حبه
ام تركي شافت وجودها ماله داعي: اذا خلصتوا وفيكم حيل انزلوا ونسوني
تركي: ابشري
طلعت ام تركي.. وهو لازال ماسك ايدها
جوري: خلاص وخر
تركي:انتي ليش مو طايقتني
بنظرات تعجب: مو انت تكرهني؟؟
ارتبك: وش هالسؤال
جوري: نفس سؤالك توقعتك تعرف الاجابه وترا المسأله نسيبه اللي يكرهني اكرهه
تركي: والله العظيم حالتي النفسيه في القاع لاتزيدين الطين بله
جوري: طيب تفاداني وابعد عني
تركي: كملي هذا وببعد
جوري: انت وبعدين معك ما ابيه
شد قبضته على ايدها: ارجووووك ياجوري كمليه
انصاعت لطلبه اول مره يقول لها هالكلمه حست ان فيه شي ودها تعرفه بس مستحيل تسأله
خلصت الكاس
تركي: بالشفاء ان شاءالله
وقفت: انا نازله عند خالتي
تركي: انا بتسبح وانزل وراك
................
بعد ماوصل رشا توجه للاستراحه
شباب / وبنات / ومنكر
حفله صاخبه وماجنه كل انواع الفساد فيها ..
على قولهم الفاضي يعمل قاضي ..
كل من فتره وفتره يسوي حفله والمناسبات تافهه..
المناسبه الاخيره كانت احتفال بانضمام عضوه جديده لشلة الدمار..
وكان القائم على تنظيم الحفل ثلاثه هذول الثلاثه حاطهم على يمناه..
الاول ملقب بتوت ..متخصص في توزيع كاسات الخمر ع الضيوف لزوم الضيافه..
الثاني ابو المجد.. كان جالس بالوسط قدامه طاوله دائريه كبيره عليها انواع الخرابيط ..
كان يضبط للموجودين المزاج ويسوي دعايه لبقية الاصناف الموجوده
اما الثالث ينادونه النمر كان يتصيد بنات من مختلف الاماكن ويجبيهم الاستراحه
بعد اغوائهم ورضاهم التام ويرتب وضعهم مع رواد هذي الحفلات ويجزلون له العطاء نظير هالخدمه..
كان مستعجل شرب كاس صغير تصبيره وبيروح ياخذ رشا وبعدها يرجع ويمخمخ زين
..................
دقت عليها: حنا برا
دقيقه وطلت جمانه: ادخلوا
دخلوا ماشافوا شي المكان ظلام دامس
مشوا اربع خمس خطوات ووقفت جمانه
ريم: وربي اخاف من الظلام لحظه بطلع جوالي
جمانه: لا لاتطلعينه هاتي ايدك
تعثرت نوف في بعض الشجيرات الصغيره: آآه
جمانه: ها شفيك
نوف: مافيني شي
جمانه: زين يادبه لاتنفخين
ريم: والله مو بس نفخ الا قبص
جمانه: افا ليش
ريم: حفله ويعنني واخرتها الكهرباء مقطوعه شكلكم ماسددتوا الفاتوره ههههههههه
جمانه:ههههههههههههههه
تعالت همسات مكتومه و وشوشه
وفجأه اضيئت انوار ساطعه في انحاء الحديقه..
happy birthday To You
happy birthday To You
happy birthday To rayoma
happy birthday To You
وصفقوا وريم مبهوره ماتوقعت ان الحفله لها طالعت في جمانه بود ودموعها تحكي فرحتها..
القت بنظره سريعه ع المكان شافت الحديقه منسقه تنسيق سمبل بس جذاب وفيه لوحه كبيره عليها صورتها بأكبر حجم
التفتت يسار شافت حول المسبح طاولات وكراسي وبلونات باللون الفوشي اللي تحبه..
التفتت يمين شافت البوفيه طويل وكبير ومرتب وفيه طاوله فيها قاتوه كبير يالفانيليا نفس ماتحبها..
سحبتها جمانه وراحت فيها للكيكه عشان تقصها.. للحين ريم تعتبر نفسها في حلم فيه احد يفكر فيها..
قصت الكيكه
وشغلوا الدجي وحطوا اغاني اعياد الميلاد والتموا حولها يرقصون
وهي الفرحه مو سايعتها مستانسه وتضحك والانبساط يشع من وجهها
بعد ماخلصوا كل وحده تقدمت منها وعطتها هديه
جمانه تكلم دانه: وين المايك
دانه: هذا هو
شبكت المايك وتكلمت
زحمه وضجه محد سمعها
ارتفع صوتها :بنات لو سمحتوا شوي هدوء
سكتوا
جمانه: اليوم اول مره اسوي حفله وبالذات عيد الميلاد
والله ماعندي قناعه فيه بس لقيته فرصه نعبر عن محبتنا لصديقتي واختي الصغيره ريم..
طبعا كنت ابي كل وحده منكم تاخذ المايك وتقول كلمه لريم
بس عندي فكره اتمنى تعجبكم وهي ان كل وحده مننا تسحب
_كان فيه اوراق في قزازه كبيره _
اللي تبي تقول شي لريم ومو عارفه كيف ماعليها الا تسحب ورقه وتاخذ المايك وتقول وش مكتوب فيها..
دانه:يعني كل وحده وحظها
جمانه: مضبووووط .. وطبعا الاوراق فيها كلمات مختلفه ممكن دعوى ممكن شعر ممكن استهبال وزي كذا
عطت المايك دانه تقدمت دانه سحبت ورقه وقالت:
عساني حي .. وأحضر كـــل أعيادك ..
واهديك وردات الـــغلا فوق صرحه ..
ازداد عمـــرك .. صح!.. لكنه ازداد لك ..
في خافقي لك بالــغلا ألف صفحــه ..
والثانيه كانت من صديقات ريم سحبت ورقه : يطول عمرك في ظل والدينك وملتمه حول اخوانك
ارتفعت الايادي آمين
تقدمت نوف:
كل عام وآمالك وأمانيك تتحقق
كل عام وأنت أغلى ما في الحياة يا كل الحياة
بعدها ندى جلست ساعه تختار ورقه
دفتها جمانه اخلصي
ندى: ههههههه طيب طيب واستقرت على ورقه فتحتها وغرقت ضحك
ضحكوا معها من غير مايعرفون لان ضحكتها كانت تضحك
واخيرا قالت: يطول عمرك وتتزوجين اصلع واكبر عيالك تسمينه قضعان ههههههههه
الكل ضحك لان طريقتها وهي تقول مره مضحكه
وكل البنات مروا على المايك بالسرا تعليقات وتريقه
يوم جا دور رشا قامت وهرولت للحمام مالها نفس لهالسخافات
آخر وحده كانت ساره كان باقي 4 اوراق احتارت اي وحده تاخذها ورست على بر فتحت الورقه
!!!!اتقي شر من احسنت اليه!!!!
راحوا تعشوا .. وبعدها اتفقوا ان كل مره وحده ترقص..
ومشت الامور على خير مايرام
تعدت الساعه ثلاثه
وراحوا المعزومات ماباقي الا البنات
تراخوا على الكراسي كل وحده تهمز رجلينها
جمانه: اليوم الفايزه في الحفله صراحه دانه كانت شييي
دانه:ياااااااالبا بس
ندى: وع
دانه: وع في عينك
ساره: لاتقولين وع
ندى: يمه كلوني بقشوري التوأم القبيح
قامت لها دانه ودغدتها لين طاحت من فوق الكرسي: انا قبيحه؟!
البنت مو قادره تتكلم من الضحك
انقذتها ريم: خلاص دندون مايحتاج انتي حلوه تهبلين
دانه كانت بهية الطلعه كانت قمة البساطه لابسه فستان اسود كت وشعرها مسيحته نفس طريقة جنيفر انستون
ملامحها حلوه وجذابة الطلعه بوجه عام
بس بملامحها الدقيقه جذبت العيون
جمانه: خلونا من دانه بسألكم رشا متى راحت
دانه: ماطولت حتى ما امداها تشوف المفاجآت والوناسه
جمانه: اصلا كانت متوتره مدري وش فيها انتي صديقتها مفروض تعرفين
دانه: هذاك اول اما الحين اقلبت البنت
ساره: اكثر شي يقهر بعد هالعشره تتزوج ولاتعزمك
جمانه: امااااانه بالله جد؟
ساره: اي والله حتى دانه طرطعت يوم درت
جمانه:بنت اللذين والله لو ادري ماعزمتها
دانه: ع الاقل معرفتك فيها سنه ونص لكن انا 3سنوات قمة القهر وربي
ريم: يمكن عندها ظروف وش يدريكم
دانه: انا عن نفسي مستحيل اعزمها على مناسبه ثانيه لنا
نوف: والله قلت لها تمايم عيال اخوي قريب وهي عزمت نفسها
دانه:لاااااه وقلتي لها متى
نوف: لا قالت بينا اتصال
دق جوال ساره كان حمد
حمد: دقيقه وحده ما القى وحده بالشارع باتوا عند جمانه
ساره: لالالالا طالعين
دانه : الحمدلله عبايتي عندي بلبس وانتظره برا
نوف:ياحماره عشان تركبين قدام
دانه: هههههه
ندى كانت داخل تكلم امها تطمن على حالة جوري.. خلصت قفلت
رجع دق الجوال نادر
ندى: هلا ندور
نادر: صرت قريب اذا دقيت اطلعي
ندى: اوك
.................
يتبع ,,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك