رواية من أعماق أحضان مجنونة -71 البارت الاخير

رواية من أعماق أحضان مجنونة -71

رفعت راسها وهي تشوف اللي واقف قبالها

زينة بصدمة ـ احمد...

احمد بانكسار ـ ممكن اشوف مشاري....

زينة ـ مهو هنا....بالرياض عنده اجتماع ومابيرد الا الاربعاء خير في شي....

احمد ـ كنت ابيه بحاجة وماابيه يردني...

زينة ـ خير يااحمد.....

احمد بتنهيدة ـ كنت ابي وقفته معي...

زينة ـ احمد تفضل اقعد ليه واقف,,,

جلس وهو تعبان..

زينة ـ وش فيك يااحمد عاد؟وش اللي متعبك....

احمد ـ انا بضائقة مادية وبغيت سلف من مشاري....

زينة ـ بس هذا اللي متعبك....

احمد بتعب ـ ماتدرين عن شي يازينة....

زينة وهي تفتح دفتر شيكاتها ـ ولاابي ادري بعد...اللي اعرفه ان عمي بو احمد قاطعنا ها اليومين ومدري ليه وكل ماادق له مايرد وقررت اني ازوره بس مستحية اجي بدون موعد فاذا تبلغه سلامي بكون شاكرة لك....

احمد بتنهيدة ـ الوالد تعبان شوي..

زينة ـ لا..سلامات..وينه فيه..

احمد ـ عندي بالشقة...

زينة ـ اممممم...طيب بلغه اني ابشوفه....

احمد ـ هامك...

زينة بتنهيدة ـ عمي بو احمد من ريحة الوالد الله يرحمه...من زمان واحنا معه وهو معنا....ودايم اذا احتجنا لااي شي يكون جنبنا ومايتركنا وماابي انسى افضاله بصراحة..

احمد ـ فيك تزورينه باي وقت....

مدت له الشيك وعطته القلم وقالت ــ احمد اكتب الرقم اللي تبيه انا وقعت لك الشيك..

احمد تنهد ـ الله يعلم يازينة اني ماجيت الا وانا ضايقة فيني ارض الله وماتوقعت مشاري يردني وانتي ماقصرتي بس اللي ابيه شي كبير....

زينة ـ احمد انت اخوي اخوي بها الدنيا وانا اذا احتجت اكيد بلاقيك جنبي....

حط الرقم ياخوي ولاتستحي مني....الفلوس عمرها مابتفرق بينا وبينكم مهما كان...واللحين بالاذن انا عندي اجتماع وانت موغريب.....

احمد باعتراض ـ أي بس يازينة..

زينة وهي واقفة ـ شلون عبدالله وريم...

احمد ـ بخير...

زينة ـ تغير عن المرة اللي شفته فيها...امه تقول لا..

احمد ـ لاماتغير بس يبيلك تشوفينه علشان تحكمين..

زينة ـ قريب ان شاءالله...

قامت ودخلت الغرفة الثانية بعد ماعطته دفتر الشيكات...

دخلت علشان تمسح دموعها اللي طاحوا منها من شوفة احمد اللي ماتوقعتها...

زينة ماتوثق باي انسان غير مشاري بس شوفة احمد وهو مكسور كذا ذوبها....

وش اللي جاري عليك بس يااحمد.....

الله يهون لك امورك ويحميك يارب....

ــــــــــــــــــــــــــــــــــــــــــــــــــ ــــــــــــــــــــــــــــــــــــــ ــــــــــــــــــــــــــــــــ

في شركة ابو احمد .....

ابتسم ابو احمد يوم يدخل ويلاقي غسان مشغول بين الاوراق وبالاتصالات وظل يناظره من بعيد لين بعد فترة كان غسان رافع راسه وانتبه على ابوه ووقف بسرعة وراح لاابوه..

غسان ـ يبى حياك تفضل..

ابو احمد بابتسامة ـ ناقصتك الزوجة والعيال...

تنهد غسان وابتسم....

ابو احمد ـ وانا الصادق يايبى..

غسان بضحكة ـ يبى انا بدل البنت عندي ثلاث الله يخليهم؟؟

ابو احمد ـ هههههههه والله انهم قادرين عليك بنات مطلق واختك تقول صايرة تهددهم فيك كل ماعاندوها قالت بقول لغسان ويمشون سيده...

غسان ـ اه منهم البارحة شيبوني بالالعاب كل وحدة بجهة وكل وحدة براي بغيت اضيعهم وارجع عنهم بس قلبي ماطاوعني....

ابو احمد ـ الله يعطيك عيال يريحون بالك وقبلهم زوجة ان شاءالله مثل منت مريحني ...

غسان ـ يبى تعال مكانك هنا...

قالها وهو يفتح له الكرسي علشان يقعد عليه....

ابو احمد جلس على الكرسي المقابل للمكتب وقال ـ لايبى انت اللي شايل الشغل اللحين انا هنا مكاني..

غسان باعتراض ـ افا بس افا...انا ها المكان مايسوى ادخله وانت مو فيه....يبى انت الكبير وبظل دايم تحت امرك واتعلم منك....

تنهد ابو احمد وقال ـ الله يريحكم انت واخوانك يايبى مثل ماريحتوني.....

غسان بتردد ـ يبى وليد جابوه....

ابو احمد وهو يهز راسه ـ قالت لي هالة الصباح.....انت وش عرفك....

غسان ـ انا مريت الصباح اشوف اروى وخالتي اذا يبون شي واروى قالت لي....

ابو احمد ـ وطبعا مريم ماقابلتك؟

غسان ـ يبى مريم متضايقة لاتلومها اللي..

ابو احمد بقهر ـ لاتدافع عنها قدامي!!!لعن ابوها طحت قدامها طيحة مايوم رفعت سماعة تلفون وقالت يبى شلونك؟كاهي اروى الله هداها ومواصلتني بشقة احمد ومواصلتكم ...بس ذيك نسخة من امها الله يهديها بس....

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــ

طلعت من غرفة التبديل بعد مالبست ثوبها القصير الاحمر اللي كان شاريه لها البارحة احمد ...

جابت شعرها على جنب وحطت الروج الغامق...

تعطرت وراحت تقعد على الفراش تنتظره لانه قايل بيجي اللحين....

توها بتدخل الفراش الا مطلق فاتح الباب وداخل ومن شافها قام يصافر.....

مشت للسرير وبس رفعت الغطاء الا توقف مكانها وتتلاشى ابتسامتها....

مطلق يوم شافها تناظره تقرب منها بعد ماشال شماغه ورماه..وشاف بناته ثلاثهم نايمين على فراشهم..

دارين وهي تهمس له ـ راحت عليك الليلة؟

مطلق ـ علشان اذبحك قبلهم؟

دارين قعدت على الكرسي اللي عند المرايا وقالت ـ ياحرام نايمين وش بتسوي لهم...

شمر اكمامه للنص وابتدى يشيلهم وحدة ورى الثاني...

يشيل وحدة ويوديها فراشها ويرجع ياخذ الثانية لين خلص منهم ورجع وقفل الباب وقال بتعب ـ مابغينا...

دارين بدلع وهي قايمة فراشها ـ تصدق عاد انا تعبت تصبح على خير..

وقفت مكانها يوم تمسكها يد مطلق من خصرها وتلفها له وصار راسها بصدره وقال بهمس ـ جايك تعبان ومحترق وتقولين بنام وتعبانة شلون ها الحكي عاد؟

دارين بدلع ـ من زمان وانا انتظرك؟

مطلق ـ لاوالله الا انا اللي من زمان وانا انتظرك....

دارين ـ وليه ماجيت من زمان...

مطلق ـ الله ياخذ الشغل يابعد عمري..هو اللي اخرني....

اممممم قالتها وهي تلعب بياقة ثوبه.....

مطلق ـ اقول دارين..

دارين ـ قول يابعد طوايفي قول انا اسمعك....

مطلق وهو يحملها ويحطها بحضنه يوم قعدوا بالفراش ـ انا ودي بتغيير..

دارين شهقت ـ بتتزوج؟

مطلق مات من الضحك وهي تفشلت...

مطلق ـ لافهمتيني غلط؟

دارين ـ اجل...

مطلق ـ اقو لانا عند ي اربع بنات ابي اشوف ولد ....

دارين ـ عندك ثلاث ماعندك اربع....

مطلق ـ واللي قاعدة بحضني هاذي؟

رفعت عيونها له وابتسمت بحب ودلع واغراء وقالت ـ انا بنتك...

مطلق بتنهيدة ـ واقرب بناتي لقلبي بعد واحلاهم وانتي اللي بتطلعين الشيب براسي.....

دارين بهمس يادوبه ينسمع ـ احبك...

مطلق بخبث ـ اذا قدها جيبي لي ولد...

ماردت عليه بس رمت روحها بحضنه وحضنته بقوة وهو بادلها الحضن...

مطلق بهمس ـ دارين...

دارين ـ قول حبيبي....

مطلق ـ الا الليلة حليانة....

دارين ـ ماتدري ليش؟

مطلق ـ لا.....

دارين ـ لاني احبك مووت وكل ماجاني احبك اكثر واكثر ...ياربي مايحرمني منك ابدا...قول امين...

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــ

كانت واقفة تناظر بولدها اللي واقف بين شرطيين.....

ماعرفت شتقول ولاشتسوي.....

وليد بتذلل ـ يمه قصوا علي.....

ام وليد بغصة ـ تلعب بعقلي انا ياوليدوا....تقولي بنقل الحلال باسمي وبنتقاسمه انا وانتي وبرد التوكيل ولامن شاف ولامن درى...وانا بنفس الليلة اتصل فيك وتطنشني ماترد علي؟؟؟

وليد كان يبكي ومو عرف شيقول...

ام وليد ـ تستاهل اللي انت فيه تستاهل...

وليد ـ يمه سرقوني.....وبعدها ورطوني بقضية مخدرات مالي شغل فيها...

ام وليد ـ اللحين جايني بعد ماضيعت الحلال كله؟جايني بعد مابعت ابوك وعشرته علشانك؟ابوك طلقني ياوليد ورماني؟

استاهل يوم اني سمعت كلامك ياولد امس...

وليد ـ يمه لاتتركيني حطي لي محامي يطلعني منها وانا بوريك بعدين وش...

جاه كف ماتوقعه من امه بذيك اللحظة وقالت بكل قهر وبكي ـ انا اللي ماعرفت اربي انا؟ياليتني ربيتك مثل احمد وغسان ياليت؟؟يليتني تركتك تتعلم منهم وتتخالط معهم علشان تصير مثلهم ياليت؟؟؟

ماجبت لي غير الهم والاذية...ياليتني بس لو ماجبتك بحياتي ولا ابتلشت فيك....

فارق ماابي اشوفك...خيس هني لين تتاْدب وتتعلم...انا مالي شغل فيك...

وليد ببكي ـ يمه لا تكفين لا.....ابوس يدك...

لفت عنه وماكانها تسمع ترجيه لها...

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــ

كان قاعد بحضنها وهي تلعب بشعره وهو مغمض عيونه..

مشاري بهمس ـ قولي اني احلم واني مو بحضنك؟

بشاير بهمس ـ مشري تراك تحلم ومنت بحضني!!

ابتسم لها وفتح عيونه وقال ـ ليه قلتيها ؟

بشاير بحب ـ لاني مااخالف رايك واقول الشي اللي تبيه دايم؟

ابتسم وقال ـ خفت ان حياتي توقف اذا مااخذتك...

بشاير ـ انا شفت الموت بعيونك..

بشاير ـ.... والله مو قادرة اتصور كيف ظليت عايشة ذيك الايام!!!

مشاري ـ احبك...

بشاير ـ بتفرط فيني!!

مشاري ـ اللحين بعد ماتملكتك وصرتي بحضني مستحيل اضيعك مني....اه يابشاير اه لو تدرين انتي شنو بقلبي...

بشاير ـ بظل احبك طول عمري...

مشاري ـ وعد..

بشاير ـ وعد حبيبي وعد ااتركك الا على قبري ولا غيره مابيفرقني عنك....

مشاري ـ وبتجيبين لي عيال واجد..

ابتسمت له...

مشاري ـ ابي البيت يمتلي ترى هاذي مورغبتي بس هاذي رغبة زينة بعد...

بشاير حضنته بالقوة وقالت ـ مشاري خبيني بحضنك ماابي أي دقيقة تمر علي واكون بعيدة عنك ابي اقعد بحضنك بس.....

ــــــــــــــــــــــــــــــــــــــــــــــــــ ـــــــــــــــــــــــــــــــــــــــ

احمد اللي توه داخل غرفة النوم ـ ها نام...

ريم وهي تمشط شعرها ـ من زمان..

احمد ـ وليه مادقيتيلي حضرتك؟

ريم ـ ياسلاام على الابو المثالي اللي يترك ولده ينام ويرجع البيت مايبي يسمع صياحه..

ضحك احمد وشال شماغه وبدل ثوبه وتقرب منها وقام يناظرها...

ريم ـ في شي ياعمري..

احمد ركع لمستواهاوقال ـ ريم شعرك طول...اول مرة اشوفه طولان...

ابتسمت له..

قال باعجاب ـ واخيرا شفناه طويل مابغينا...

ريم ـ أي انا قلت الليلة اخليك تشوفه علشان بكرة بروح اطيره كله بالكوافير...

احمد ـ مالك امل ولاتلمسين ولاشعرة فيه سامعتني؟

ريم ـ يمه صاير تخوف....

احمد ـ كم صار عمر عبادي....

قالها وهو ماسك يدها ومقومها معه وداخلين فراشهم...

ريم ـ كمل الثلاثة شهور وداخل على الرابع....

احمد ـ خلاص بعد...

ريم ـ وشو اللي خلاص..

احمد ـ كبر...

ريم ـ أي الله يخليه ان شاءالله وش لك عنده؟

احمد ـ معناته لازم تجيبين لنا بنت بدل ولدك اللي كله يبكي؟

ريم تخصرت وقالت ـ ياسلاام...يعني ولدي صار كله يبكي؟وش رايك اتصل اللحين على عمي ولاعلى هالة ونشوف رايهم بالموضوع؟

احمد ـ لالاخلاص انسحبت اذا السالفة فيها ابوي ولاهالة انا منسحب ولدك احلى واحد بالدنيا وكل ليلة مايتركنا ننام عادي نفداه احنا عمرنا مانمنا بس ولا تشتكين علي..تعالي ارتاحي تراني مشتاق لك..

ريم بتهديد ـ فكرت بعد بتحط بالك وبال ولدي..

احمد بصدق ـ والله اغلى هدايا جوني بحياتي انتي وولدك..

لفت له وباسته على خده وقالت ـ عسى الله لايحرمني من حبك يااحمد ويخليك لي طول العمر ويقدرني ارضيك...

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــ

لبست ثوب نوم مغري باللون الاسود واللي عرفت ان جراح يفضله..

ورجعت شعرها كله لورى.....

الليلة بتكون فصل تغير بحياتها مع جراح....

بتسلمه نفسها وقلبها وحبها...

الانسان اللي يشتري سعادتها قبل تطلبها...

اللي يجيب لها نجوم السما ويقول تدلل وش تبين بعد....

حب جراح غزاها ومواقفه معها كبرته بعيونها لحظة ورى الثانية.....

ماتقدر تنكره ولا تبقى بعيدة عنه باقي العمر....

بظل سرحانها دخل وماانتبهت عليه غير يوم يحضنها....

جراح ـ وش ها الحلاوة ياعمري...

لفت له وقالت ـ متى وصلت..

جراح ـ قبل دقايق بس انتي سرحانة....

هالة ببتسامة ـ كنت سرحانة فيك...

بارتياح قال ـ صدق....

هالة ـ اممم...

جراح ـ في شنو....

فتحت يدها وكان فيها السلسال اللي عطاها اياه جراح بليلة زواجها من علي ومكتوب فيه احبك...

شاله من يدها وهو يناظر فيها وقال ـ لسه محتفظة فيه؟

قالت بصدق ـ دايم كان معي ومافرطت فيه مدري ليش؟

تنهد وهو يناظر بين السلسال وبين عيونها...

لفت له ورفعت شعرها وقالت ـ تلبسني اياه...

اخذ السلسال وتقرب منها وهو حاس بالربكة...الليلة راضية عليه ومخليته يتقرب براحته بدون حواجز وش بعد عندك ياهالة لليلة؟

لبسها اياه وضمها لصدره من ورى وصار صدره بظهرها..

قالت بتنهيدة ـ انت مرتاح معي...

جراح بثقة وهو يناظرها بالمرايا ـ عندك شك....

هالة ـ حتى مع اللي يقولونه عني...

جراح سكت فترة طويلة وبعدها دندن لها وهو لسه حاضنها ـ للواخسر الدنيا معك انا ربحان..

ماابي من الدنيا غيرك ابد انسان...

ومهما يعيبونك اذني ماتسمع فيك...

وانت غايب ولاانت بقربي والله راضي راضي عليك قلبي...

تنهدت بقوة ولفت له..وقال وهو يطالع بثوبها المغري وقال بهمس ـ الليلة متغيرة..

قالت بتاْكيد ـ امم..

جراح وهو يلعب بشعرها ـ والاسباب...

هالة ـ لسه ماعرفت..

جراح ـ لا..قولي انتي....

ذات ليلة...ساْلتني عن سرجمالي,,,وعن مصدر ابتساماتي,,وعن اللمعة في عيني,,,ذات ليلة ساْلتني مئة سؤال وسؤال ,,ساْلتني ماذا بدل من احوال,,؟

ذات ليلة راْيتني بدر مطل قبل الاوان..راْيتني حورية قبل الممات,,راْيتني ساحرة تسحر الكون بابتسامتها,,,

وانا ارد عليك مبتسمة..اءمعقول انك لم تعلم بعد!!امعقول انك لم تدرك بعد!!امعقول انك لم تعرف انك سر التغيرات التي

انت سبب كل التغيرات التي احدثت فيني بسبب حبك...

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــــــــــــــ

كان احمد قاعد يقلب بالبوم الصور يوم انتهت اخر صورة وانتبه من شروده وان هالة تناديه...

لف لها....وقال ـ وش تبين انتي؟

هالة ـ امي تناديك يالله حطينا الغذى....

احمد ـ هالة...انا كتبت قصة...

هالة ـ وينها...

احمد ـ كتبتها بخيالي..

هالة ـ عن منو ..

احمد ـ عنا كلنا انا وانتي وغسان ودارين ومطلق وجراح وخواتهم ووليد ومريم واروى..

هالة ـ مدام فيهم ها المغثة اكيد بايخة...

احمد ـ هههه

هالة ـ ليه تضحك....

احمد ـ لانك بالقصة ماتجيبين عيال ياهالة..

هالة بقهر ـ انت اللي مابتجيب انا بجيب..

احمد ـ لاانا بجيب انتي اللي مابتجيبن..

هالة ـ بروح اشتكي واقول لاامي يااحمد...

احمد ـ خلاص يبى لاتقولين لاتقولك انتوا بعدكم صغار توه عمركم عشر سنين تفكرون بها السوالف ركزوا بمذاكرتكم ولاكبرتوا يصير خير..

هالة باصرار وهي تمشي ـ بجيب عيال وبتشوف يااحمد...

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ

كان هذا اخر بارت لروايتي واذا الله كتب لنا لقاء اخر بيكون استودعكم الله وسامحوني كلكم والف شكر على كل كلمة قلتوها بحقي وحق الرواية

تجميع

زهور حسين & اســــ(DANIA)ـــــطورة !

منتديات غرام | أقلام لا تتوقف عن الإبداع

تعديل المقال