رواية الفتاة الهاربة -6
ام علي : ( تصبله ماي وتحطله عود و تعطيه ) تفضل يا بعد روحي
علي : ( شرب ماي وشرق وقعد يكح وحس بألم قوووي بصدره وتم يكح وكل ماكح زاد العوار )
ام علي : اسم الله عليك اشفيك
ابو علي : عثمان ناد الدكتور
( علي يكح ويطلع صوت مثل المخنوق اللي يبي هوا مو قادر يحصله )
ام علي بجت على ولدها وعالية وسارة واقفين صوب الباب خايفين
يه الدكتور ومعاه ممرضة شاف علي ويهه احتقن وقاعد يكح بسرعه خلاها تحطله اكسجين كمام و عطوه ابره مسكنة
الدكتور : من شنو اختنق؟
ابو علي : قام عطشان شرب ماي وشرق
علي : ( يطالعهم بس عيونه بدت تغمض بعدين نام )
ام علي : ( حاطه ايدها على قلبها ) اشفيه ولدي
الدكتور : تطمني مافيه الا الخير نام الحين .. عطيته مسكن قوي
ام علي : ( تبجي وتبوس راس علي ) الله يشافيك ويقومك بالسلامه
عثمان : يمه لاتخافين انا بنام عنده
الدكتور : لا مايحتاي اهو حاليا مخدر ويحتاج حق راحه تامه خلوه اليوم نايم ماراح يصحى الا الصبح
( شوي ويه ابو سالم وام سالم ومعاهم غلا و ندى ومشو بسرعه لأن علي نايم وماراح يصحى الا الصبح .. بعدين الكل رجع البيت بس تمت ام علي وعثمان قاعدين عنده وماردو البيت الا متأخر )
-------------------
منار تمت طول هالوقت قاعده وتفكر باللي صارلها وتفكر بعلي و تضايقت لأن ماصار يزورها ..
منار : ( بقلبها ) ادري ان اهو الحين مايبي يشوفني ويبيني اطلع اروح أي مكان .. بس لو طلعت وين اروح ؟؟ وماودي اطلع قبل لا اكلمه عالأقل يقولي أي شي .. لو بيطردني هم راضية بس خل يتكلم معاي آخر مره عالأقل
منار : ميخالف بدق عليه وخل يصرخ خل يقول أي شي
( منار امسكت التلفون ودقت عليه وقلبها يرقع خايفه من ردة فعله اذا سمع صوتها )
( عثمان كان منسدح بينام عشان اول مايطلع الصبح بيروحون حق علي .. شوي ورن تلفون علي كان حاطه يمه عالميز عشان أي احد يدق من ربع علي يقولهم اللي صار )
عثمان : الو ؟
منار : ( ساكته )
عثمان : داقين تبون علي؟؟
منار : ( ماترد لاحظت ان مو صوت علي )
عثمان : ( عرف انها بنت لأن ساكتين ومحد تكلم ) اذا كنتو تبون علي تره سوه حادث امس واهو..
منار : ( قاطعته ) حادث؟؟ واهو الحين اشلونه ؟؟؟
عثمان : منوم بالمستشفى
منار : ( حست انها اهي السبب وحيل خافت عليه ) واشصار فيه اشلونه الحين؟؟
عثمان : راح يكون بخير بس فيه رضوض وراسه فيه خياط اهو الحين نايم
منار : أي مستشفى ؟
عثمان : العدان .. بس تره من الصبح الاهل كلهم اهناك مايمشون بالليل
منار : زين انا ودي اشوفه اشلون؟
عثمان : زين اول منو معاي؟
منار : منار
عثمان : هلا والله انا اخوه عثمان .. خلاص باجر اذا صحى اكلمه واقوله انج سألتي عنه
منار : لا .. لا تقوله اهو ما.... بس لاتقوله انا بروحله فجأة من غير لا يدري عفيه لاتقوله شي
عثمان : ( لاحظ من صوتها انها بتبجي وحس جنها تترجاه ) خلاص ماراح اقوله أي شي واول مايروحون اهلي ادق عليج على هالرقم واقولج عشان اتيين اوكي؟
منار : تسلم ومايشوف شر ان شاءالله
عثمان : مشكورة يللا تصبحين على خير
منار اقعدت تبجي وتلوم نفسها وتلوم احمد وتلوم كل شخص له علاقة بالحالة اللي اوصلت لها
منار : ( واهي تبجي ترفع ايدها وتدعي ) يارب شافي علي وقومه بالسلامه وسهل علي اموري واغفر لي يارب
--------------
صار اليوم الثاني علي قام و ياله المحقق وقعد يسأل علي عن الحادث واشلون صار
علي : ( يتكلم ويحس بألم بس هالمرة مو من عضلات صدره كان يتذكر منار واللي قالته له ) انا كنت مسرع شوي بروح مزرعه بالوفرة وكنت دايخ غفلت شوي عن الطريج وبس ماذكر اللي صارلي بعدين
( كمل المحقق معاه شوي بعدين راح )
عقب الكل كان زاره حتى العم بو سالم واعياله
وعلي كان يسولف معاهم عالخفيف .. وكل ما عمور قال سالفة يظحك علي ويتألم من صدره .. لين عصبت الام وخلت عالية وندى ياخذون عمر ويتمشون بالمستشفى ..
عثمان : يبه ربع علي بره بيدشون يسلمون عليه
ابو علي : يللا عيل احنا نمشي وانخليك معاهم
ام علي : يللا يمه ماتشوف شر باجر من الصبح اكون عندك ومسويتلك الاكل اللي تحبه
الكل سلم عليه ومشى وتم عثمان معاه واقعدو الربع عنده بس تعب من زيارتهم وايد لأن كانو يسولفون ويظحكون واهو حس ان صدره بده يعوره وايد
عثمان : ( لاحظ ان علي متعور ) علي اشفيك اناديلك الدكتور
علي : لا بس شوي تعبت ودي ارتاح
محمد : يللا عيل احنا نمشي وانت نام وخطاك السو ان شاءالله
وسلمو عليه واحد واحد ومشو
علي : يللا انت بعد روح انا دخت وبنام
عثمان : اذا صدرك يعورك خل اناديلك احد يعطيك مسكن؟
علي : لا لا خلني راح انام وماحس بشي
عثمان : ( وده يقوله ان منار دقت بس قال لا خل اخليها مفاجأه له احسن وطلع بره الغرفه دق عليها )
منار : الو؟
عثمان : تقدرين اتيين الحين لأن انا ماشي وتم بروحه وبينام ؟
منار : اكيد .. الحين اطلع
عثمان : اذا وصلتي سألي عن غرفة علي جاسم العلي
منار : اوكي
عثمان : يللا مع السلامه
( منار انزلت تحت وكانت الساعه 9 بالليل لقت مصطفى قاعد عالرسيبشن )
منار : ( متردده ) مصطفى ؟
مصطفى : اهلا انسه منار ... أأمري ؟
منار : علي مسوي حادث و اهو بالمستشفى
مصطفى : ايه؟؟ جرالوه حاجه مش كويسه لاسمح الله؟
منار : ان شاءالله يكون بخير .. انا بروحله الحين بس .... مادري اشلون اطلبك
مصطفى : أأمريني؟؟ ده كولنا فدا الاستاز علي
منار : بروح بتاكسي وماعندي ادفعله فبغيت سلف وعلي يردهم لك اول مايطلع بالسلامه ان شاءالله
مصطفى : ( يطلع من بوكه 5 دنانير ) فضايل الاستاز علي كبيره اوي .. تفضلي .. تحبي اطلبلك تاكسي ولا طلبتي واحد خلاص؟
منار : ( تاخذهم منه واهي متضايقه من الحاله اللي اهي فيها ومتضايقه عشان علي ) تسلم مشكور .. طلبت وكاهو بره ينطرني .. مع السلامه
اوصلت منار المستشفى واسألت عن غرفة علي قالولها ان الزياره خلصت بس ترجتهم يدخلونها ماراح تاخذ الا 10 دقايق وتطلع
علي توه بدى يغفى جان يتبطل الباب ودشت منار اهو مابطل عينه عباله الممرضات لأن اهم كل شوي داشين عليه
منار واقفه عند السرير وشافت شكله جان تقعد عالكرسي يمه وتمسك ايده وتبجي
علي حس ان جسمه كله انتفض واهي ماسكه ايده وتبجي فتح عينه وطالعها ماقال ولا حرف
منار : ( تبجي ) علي ماتشوف شر والله اني آسفه .. آسفه على كل شي سببته لك بدون غصد
( علي بيسحب ايده من ايدها بس اهي ماخلته تمت ماسكه ايده حيل )
منار : علي كلمني قول أي شي الله يخليك قولي انك بخير
علي : ( يبلع ريجه ) منار ..
منار : هلا علي ؟؟؟
علي : هدي ايدي شوي
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
** البارت الثالث عشر **
علي : هدي ايدي شوي
منار : ( هدت ايده ودموعها على خدها )
علي : ( حط ايده تحت الغطى وغمض عينه ولا جنها موجوده بالغرفه )
منار : علي؟؟ زين قولي أي شي الله يخليك كلمني؟؟ عالأقل طالعني شوي
علي : ( مغمض ومايرد عليها )
منار : ( ايدها ترجف ومدتها غصب وحطتها على جتف علي اللي في كدمة زرقه )
علي : ( حس بيدها على جتفه وكان وده يمسك ايدها بس تم مسكر عينه وماتحرك )
منار : انا بروح وآسفه لأني دخلت حياتك وأذيتك معاي وماتشوف شر
منار : ( حاولت على قد ماتقدر تمسك بجيتها بس ماقدرت وافلتت منها ) مشكورعلى كل شي .. مع السلامه ( راحت لي الباب بتطلع )
علي : ( بصوت واطي حيل ) منار؟
منار : ( لفت عليه و ويهها كله دموع ) ناديتني ؟؟
علي : اي تعالي
منار : ( امسحت دموعها وراحت يمه )
علي : ( حس ان قلبه يعوره حييل بس طلع ايده من تحت الغطى ومدها لها )
منار : ( اول ماشافته مد لها ايده اضحكت وبجت بنفس الوقت وامسكت ايده ) علي انا ..
علي : ( طالعها وضغط على ايدها وغمض عينه وعقد جواجبه )
منار : علي ؟؟ انت بخير؟؟
علي : ( فتح عينه وطالعها ) صدري ..
منار : اناديلك احد ؟
علي : لا خليج شوي
منار : بس شكلك تعبان وايد خل اناديه عشان ..
علي : لا مايحتاي اذا نمت اصير احسن
منار : عيل بروح واخليك تنام.. ومشكور على وقفتك معاي و مشكور لأنك كلمتني حتى لو كانت آخر مره
( دشت الممرضه لقت منار عنده )
منار : ( اسحبت ايدها من علي )
الممرضه : لو سمحتي الزيارة انتهت منزمان لازم تمشين الحين
منار : الحين ماشيه .. علي تعبان عطوه مسكن
علي : منار لاتطلعين من اهناك ... نطريني خل اصير احسن وراح اقعد معاج واكلمج
منار : ( تبتسم ) اوكي .. مشافى ان شاءالله
( راحت منار والممرضه عطت علي حبوب مسكنه وخلته عشان ينام واهو تم يفكر بمنار حس بشعور غريب مو عارف اهو استانس لأن شافها او تضايق اكثر؟ بس اللي يعرفه ان ماكان يبيها تطلع واهي تبجي )
-----------------
اوصلت منار العمارة وحاسبت التاكسي وانزلت
مصطفى : اهلا يا آنسه .. ازاي الاستاز علي ؟؟
منار : الحمدلله تعبان شوي بس راح يصير احسن ان شاءالله
مصطفى : طب الحمدلله .. عايزاني اوصلك لغاية فوء؟؟ اصل الاستاز علي موصيني عليكي اوي
منار : لا مشكور انا اصعد بروحي
اصعدت منار ودشت الشقه اسبحت وصلت ودعت حق نفسها وحق علي ان الله يقومه بالسلامه وبعدها سكرت الليت و انسدحت بفراشها
منار : ( حاطه ايدها على بطنها ) مادري شسوي جان زين اطلع مو حامل ويطلع اختبار الحمل مال الصيدلية غلط .. استغفر الله ربي سامحني و افرجها يارب
-----------------------
الفير قام علي من النوم وقلبه مقموت حلم ان منار بقفص ضيج ومو قارده تطلع منه تعوذ من ابليس ورد نام ..
الصبح ماكان اكو احد مع علي الا امه وعمور وعثمان بس عالية كانت بالمدرسه وابوه بالشركه .. خواله زاروه وراحو واهو صار شوي احسن بس للحين اذا ضحك او كح يحس عضلات صدره وضلوعه تعوره
عثمان : يللا انا اخليكم عندي شغل وراح ارد العصر
علي : لا .. لاتروح بكلمك بموضوع
ام علي : يللا كلمه وخله يروح
علي : ( ابتسم ) لا بعدين
ام علي : عيل ماراح تكلمه لأني قاعده لي العصر اذا نمت بروح
علي : ( يسوي روحه بيقوم من مكانه ) خلاص انا اطلع اكلمه بره
ام علي : ( خافت على ولدها ) لا يمه اشفيك خلك بمكانك انا اروح اشتري حق عمور شي ياكله وارجع .. يللا كلمه ( اطلعت مع عمور )
علي : عثمان تلفوني كان عند منو امس؟
عثمان : عندي انا والبنت اللي يت امس كلمتني وقلتلها انك بالمستشفى
علي : ( سكت )
عثمان : علي منو هذي؟
علي : وحده
عثمان : ادري وحده ماقلت واحد .. بس ماسمعتك تتكلم عن وحده اسمها منار
علي : ليش يعني لازم امشي واتكلم عنها ؟
عثمان : لا بس استغربت لأنها كان مبين انها تبجي يوم قلت لها انك بالمستشفى يعني اشلون تأثرت لهالدرجه وانا ما دريت ان في وحده تحبك الا امس
علي : ( عصب يوم سمعه قال تحبك ) وانت شكو تدري عنها
عثمان : زين هد اعصابك لا يعورك صدرك
علي : انا ناديتك اهني ابي منك خدمه
عثمان : شنو تبي؟
علي : انا عندي شقه ماتدرون عنها
عثمان : ( منصدم يطالع علي ) جد تتكلم؟؟
علي : عثمان والله اني تعبان وصدري بدى يعورني منك مو وقته تسأل وايد .. انت انصدمت لأني قلت اني عندي شقه عيل لو كملت كلامي اشبتسوي؟
عثمان : وفيه اكثر من جذي؟؟ كمل يللا قبل لا امي اتيي وتسمعك يا بو الشقق
علي : ( خز عثمان خزه ) اسمعني ومابي اسمع أي تعليق من تعليقاتك البايخه .. بعطيك عنوان الشقه وروح لها .. تلقى فيها البنت اللي امس كلمتك
عثمان : ( مصدوم اكثر ويطالع علي ) عليوي؟؟؟؟ شمسوي انت؟؟ والله انك طلعت من تحت لي تحت
علي : ( صرخ ) عثمانو اسمعني ( غمض عينه حييل.. حس بعوار بصدره من الصراخ )
عثمان : علي انادي الدكتور؟
علي : لا بس عفيه اسمعني ولا تعلق والله انك بتذبحني قبل لا اكمل الموضوع
عثمان : والله بسكت قول بسرعه امي بتيي الحين
علي : روح الشقه وطق الباب قول انك عثمان واني مطرشك عليها وعطها 100 دينار بعدين انا اسحبهم لك من حسابي و قولها خليهم معاج واذا انا طلعت راح اروح لها و اسألها اذا تحتاج شي اوكي؟؟
عثمان : ( مصدوم ماقال ولا شي بس متنح بويه علي )
( دشت ام علي مع عمور )
ام علي : ها خلصتو السالفه المهمه
علي : اي خلصنا
عثمان : ( للحين ساكت يطالع علي )
ام علي : عثمان اشفيه ويهه قالب انت اشقلت له ؟؟
عثمان : ( لف ويهه على امه ) لا يمه ماكو شي يللا انا ماشي مع السلامه
علي : عثمان؟؟
عثمان : بعد لاتقول ان اكو شي زياده؟؟؟؟
علي : عثمانو .. ( وعطاه خزه واهو معصب ) بدزلك مسج بالعنوان زين
عثمان : اوكي انا ماشي باي
ام علي : اشفيه عثمان؟ وعنوان شنو اللي بتدزه؟
علي : يمه سالفه عن الربع .. ( يطوف السالفة ) ها عمووري الحلو شنو شريت؟؟
عمور : ( يمدله الجيس ) شريت حلاو تبي؟؟
علي : ( يظحك ) لا حبيبي مابي شي بالعافيه
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
** البارت الثالث عشر **
منار هالأيام صايره ماتاكل لأن نفسيتها وايد تعبانه بس تشرب عصير ومرات تاكل شبس عشان تسد اليوع اليوم قامت من النوم تعبانه وراحت بسرعه الحمام ترجّع – عزكم الله - وتبجي لأن لوعة الجبد خلتها تتأكد أكثر انها حامل .. راحت انسدحت بالصاله لأن ماكانت تقدر توقف من التعب ..
----------
عثمان سحب الفلوس واهو رايح بالطريج حق العنوان اللي دزه له علي
عثمان : ( بقلبه ) انا اعرف اخوي اكثر من نفسي لا يمكن يعيش مع وحده بالحرام .. اخاف متزوج بالسر .. ولا اهي ليش بجت يوم درت ان مسوي حادث و لو كانت وحده يحبها هم مايسكن معاها .. السالفه فيها سر وياخوفي يطلع متزوج والله امي تموت
( عثمان وصل وصعد حق الشقه وطق الجرس )
فزت منار من سدحتها توقعت يكون علي لأن محد يطق الباب عليها الا اهو والمطعم اذا كانو طالبين ..
منار : ( راحت عند الباب طلت من العين السحريه شافت عثمان بس خافت يكون من طرف ابوها فاسكتت ماردت )
عثمان رد طق الباب : منار انا اخو علي انتي اهني؟؟
منار : انت منو؟
عثمان : انا عثمان اللي امس كلمتج
منار : ( بطلت الباب واهي خايفه )
عثمان دش وتم واقف عند الباب وخلاه مطرف طالعها كان ويهها اصفر وعيونها حمر
عثمان : السلام اشلونج؟
منار : هلا الحمدلله .. اشلون علي؟
عثمان : الحمدلله احسن وطرشني اعطيج هالفلوس يقول خليهم عندج مصرف واهو لي طلع يكلمج
منار : ( اتطالع ايده فيها فلوس و مادها لها ) لا ما احتاجهم مشكور
عثمان : انا مالي شغل اهو قال خلهم عندها وقالي اسألج اذا تحتاجين شي
منار : ( خذتهم منه وحدها منحرجه ومن الاحراج والتعب اللي تحسه الدنيا افترت جان تتسند عالطوف )
عثمان : عسى ماشر فيج شي؟
منار : لا بس تعبانه شوي .. وتسلم مو محتاجه أي شي الا ان الله يقومه بالسلامه
عثمان : آمين .. زين عيل انا امشي مع السلامه
منار : مع السلامه ( سكرت الباب وراه )
اول ماراح اقعدت عالقنفه حست ان ريولها ماتشيلها من التعب
------------
مر اسبوع على علي واهو بالمستشفى وترخص اليوم بس الدكتور قال ان لازم عالأقل يتم نقاهه بالبيت 10 ايام
الكل استانس على طلعته بالسلامه ورجعته للبيت وسووله عشى اعزمو فيه الأهل بمناسبة طلعته من المستشفى
علي قاعد عالقنفه ويحس ان جسمه متكسر وده يروح داره يرتاح بس ابوه قاله خل يتحمل جم ساعه لين يروحون الناس عقب يرتاح
سارة يت واقعدت يم علي
سارة : ماتشوف شر والحمدلله على سلامتك
علي : الله يسلمج
سارة : كل يوم كنت ادعيلك انك تقوم بالسلامه
علي : ( ويهه يبين ماله خلق ) شكرا
سارة : بتعدل السيارة ولا تاخذ غيرها ؟
علي : مادري والله
( تمت مده تسولف معاه وبعدين صار العشى واقعدو شوي وراحو )
علي : انا صاعد ارتاح بغرفتي
ام علي : عثمان قوم يمه وصل اخوك
علي : لا مايحتاي اقدر اصعد
( راح علي وانسدح بغرفته كان لابس شورت ومنسدح يفكر بمنار وده يدق عليها بس متردد )
علي : ( بقلبه ) لا ماراح ادق اذا طلعت امر عليها واكلمها
( ام علي طقت الباب ودشت )
ام علي : ( اقعدت يمه عالسرير ) ها يمه اشلون اتحس مرتاح ولا تبي اييبلك شي؟
علي : لا يمه مابي شي بس بنام
ام علي : ( شافت صدره للحين لونه ازرق بس اللون خف وايد عن قبل صاير ازرق على احمر ) علي ؟ يمه ليش فاصخ بلوزتك للحين صدرك ما طاب .. يللا حبيبي البس بلوزه لايدش بصدرك هوا ويعورك زياده
علي : لا يمه والله ماعرف انام وانا لابس بلوزتي خليني جذي مرتاح ولاتحاتين راح اتلحف عدل
ام علي : زين يمه على راحتك ... علي ادري ان مو وقته بس ودي اقولك اللي بخاطري قبل لا انام
علي : خير يمه؟
ام علي : انا وابوك ودنا تفرحنا وتتزوج و..
علي : ( يقاطعها ) يمه انا اذا ابي اتزوج بنفسي اييلج واقولج بس الحين خلوني على راحتي
ام علي : يمه اسمعني شوي .. بنت عمك ساره بنت حلوه واخلاق و..
علي : شوفي يمه اذا قررت اتزوج انا بختار البنت .. ماحب احد يختارلي
ام علي : يعني تتزوج وحده تعرفها من بره؟؟ وبنت عمك موجوده ومبين انها معجبه فيك وبأخلاقك
علي : يمه خلاص تعبت ودي انام .. وانسي هالموضوع انا اذا ابي اتكلم فيه راح افتحه
ام علي : ( قامت ) الله يهديك يا وليدي تصبح على خير
علي : وانتي من اهله سكري الليت معاج
( رن تلفون علي وكانت منار اللي داقه )
علي : ( يطالع الرقم قلبه عوره بس حطه ميوت ومارد )
---------------------
منار منسدحه وتفكر : اشلونه الحين وشيسوي ؟ ان شاءالله يكون بخير..
( ومثل كل يوم تفكر بحالها وتحط ايدها على بطنها وتقعد تبجي لين تنام )
----------
مرت 6 ايام وعلي ماطلع من البيت ولا كلم منار بس كانو ربعه يزورونه بدوانية البيت ويرد يرتاح بداره .. بس كل يوم بالليل يفكر بمنار لين قرر ان يروح لها
الساعه 7 بعد المغرب علي دق على عثمان
علي : عثمان رد البيت ابي سيارتك
عثمان : انا بسوق شرق وين ارد الحين
علي : عثمان محتاج السياره بطلع
عثمان : ماخلصت فترة نقاهتك
علي : هي انت لا تسوي روحك مهتم وخايف كل هذا عشان ماترجع.. اقول تعال ابي السياره ضروري
عثمان : بتروح لها صح
علي : عثمان لاتنرفزني مالك شغل و ارجع الحين
عثمان : انت ماقلتلي شنو سالفتك بالظبط ليش اسويلك خدمه يعني؟
علي : ( حده منقهر منه بس قرر ياخذه بالسياسه ) خلاص تعال عطني سيارتك واذا رديت اقولك كل شي
عثمان : يللا نص ساعه واكون عندك
( علي نزل تحت ولابس ملابسه وناطر عثمان بالصاله )
ام علي : يمه ليش كاشخ ؟
علي : بطلع
ام علي : وين تروح ؟؟ للحين مايصير تطلع
علي : يمه يعني شايفتني طايح بالسرير ولا ماقدر امشي؟؟ عادي صرت زين الحمدلله وبطلع
ام علي : زين يمه خل عثمان يوديك وين ماتبي
علي : لا باخذ سيارته واطلع بروحي ودي اتمشى
ام علي : ( استسلمت ) بس الله يخليك دير بالك على نفسك وانتبه عالطريج
علي : ان شاءالله
( دش عثمان )
عثمان : خليت السياره شغاله .. دير بالك عليها عدل وعلى قد ماتقدر خلك عاليمين مافيه شبات اهناك
ام علي : ( اتزف عثمان ) عثمانو اتخاف عالسياره وماتخاف على اخوك؟؟
علي : ( يطلع من البيت ومايرد عليه )
-------
علي وصل ودش العماره
مصطفى : استاز علي ؟؟ الف الحمدلله على سلمتك
علي : الله يسلمك ( وصعد فوق )
( وصل عند الشقه وطق الجرس وتم واقف وماكو أي رد )
بطل الباب بالمفتاح وطقه
علي : منار؟؟ ادش؟
( محد رد عليه )
دش الشقه وماكان فيه احد بالصاله جان يروح يطق باب الغرفه ومحد رد عليه .. بطل الباب ولقى منار نايمه بس وضعها غريب نايمه بالعرض وعلى طرف السرير وكانت لابسه نفنوف حفر لي تحت الركبه
علي : منار؟؟ نايمه؟؟ منار؟؟
علي : ( حط ايده عليها وهزها شوي ) منار؟؟ ( حس انها وايد حاره )
علي : ( هزها اكثر ) منار؟؟ قوومي منار
منار : ( بطلت عينها غصب كانت تحس بتعب قوي وماتقدر تتحرك اول ماشافته انصدمت ) علي؟؟؟ انت ييت؟؟
علي : اي
منار : ( مريضه و عبالها تحلم كان ويهه فيه آثار جروح وصوب يبهته لي بداية حاجبه اليسار فيه أثر الغرز .. ارفعت ايدها اتجيس يبهته مكان الغرز )
علي : ( منصدم وساكت واهي تتحسس يبهته )
منار : ( استوعبت ان مو حلم استحت وقامت اقعدت يمه ) الحمدلله على سلامتك
علي : الله يسلمج .. حرارتج مرتفعه من متى مريضه؟
منار : مادري بس حسيت اني تعبانه ونمت ( فجأه حست ان معدتها قالبه وكانت بتروح الحمام بس اول ماقامت بغت اتطيح من التعب )
علي : ( مسكها وقعدها عالسرير ) منار اشفيج؟
منار : ( اشرت له عالزباله – عزكم الله - )
علي : ( يابها لها بسرعه )
منار : ( حطت راسها فيها واقعدت اترجع بس مايطلع شي غير ماي )
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك