رواية الفتاة الهاربة -7
منار : ( استوعبت ان مو حلم استحت وقامت اقعدت يمه ) الحمدلله على سلامتك
علي : الله يسلمج .. حرارتج مرتفعه من متى مريضه؟
منار : مادري بس حسيت اني تعبانه ونمت ( فجأه حست ان معدتها قالبه وكانت بتروح الحمام بس اول ماقامت بغت اتطيح من التعب )
علي : ( مسكها وقعدها عالسرير ) منار اشفيج؟
منار : ( اشرت له عالزباله – عزكم الله - )
علي : ( يابها لها بسرعه )
منار : ( حطت راسها فيها واقعدت اترجع بس مايطلع شي غير ماي )
علي : ( حس وده يمسكها ويخفف عنها و بنفس الوقت وده يطلع من الشقه ويخليها بروحها بس مو مطاوعه قلبه )
منار هدت شوي ارفعت راسها طالعته لقت ملامحه مبينه ان متضايق وقام طلع من الغرفه جان تبجي
أول ماطلع بجت لأن حالتها النفسيه تعبانه وفوق هذا علي قاعد يتضايق منها
شوي جان يدش وبيده فوطه مبلل طرفها بالماي
علي : ( ماقال شي بس قعد يمسح ويهه بالماي عشان ترتاح )
منار : ( زادت بجي )
علي : خلاص بسج بجي قومي اوديج الطبيب
منار : مابي اروح
علي : ويهج اصفر وذبلان انتي ماتاكلين؟؟
منار : لا ومابي اكل خل يطيح ( حطت ايدها على بطنها وتبجي بصوت عالي )
علي : ( سكت مده ) .... انتي ماتبينه ؟
منار : ( مغطيه ويهه بيدها وتبجي ) لا مابيه
علي : ( سكت مده يفكر ) بس اهو ماله ذنب وانا مو موافق انج تذبحينه
منار : ( وخرت ايدها وطالعته )
علي : ( هاج كلينكس مسحي دموعج وسمعيني عدل )
__________________
** تابع البارت الثالث عشر **
علي : ( هاج كلينكس مسحي دموعج وسمعيني عدل )
منار : ( امسحت دموعها ) وساكته اتطالعه
علي : انتي الحين مسخنه ومريضه وترجعين وهم ماتبين تروحين الطبيب؟ انا هالشي مايرضيني .. وراح تروحين معاي الحين ومابي اعتراض
منار : بس ..
علي : قلت مابي اعتراض
منار : علي انت توك مسوي حادث مابي اتعبك اكثر معاي
علي : انا ما اجذب عليج واقول اني ماتضايقت يوم دريت بس الحمدلله على كل حال .. وانتي لازم تتأقلمين على هالشي وتتحملين هالغلطه مو تحاولين تذبحينه
منار : بس اشلون يعيش واهو .. ( اسكتت وعينها غورقت )
علي : ( مايدري ليش اذا قعد يمها يحس بشعور غريب ومايبيها تبجي كلش ) منار قومي لبسي ناطرج بالصاله وبنروح الطبيب
( البست منار وراحت معاه انزلو عيادة بالجابرية )
الموظفه اللي على الرسيبشن اطلبت بطاقة منار
علي : بوكها ضايع وقاعدين انطلع بدل فاقد احنا انقولج بياناتها واذا تبين بطاقتي موجوده ..
الموظفه : لا ماله داعي ( طالعت منار ) بس نبي اسمج الثلاثي وعمرج
منار : منار سلطان ناصر وعمري 23
الموظفه : خلاص بس ادفع حق فتح الملف وكل ماتبي تراجع حياكم ملفها موجود
علي : ( دفع ) اوكي مشكورة
الموظفه : العفو .. استريحو شوي و اتدش عالدكتور
علي قاعد يم منار ناطرين واهي كانت ترجف من الارتباك والخوف
علي : ( يحط ايده على ايدها ) هدي نفسج ماكو شي
( نادوهم ودشو عند الدكتور )
الدكتور : ها عسى ماشر ؟؟
منار : ( ساكته واتطالع علي )
علي : اهي تعبانه ومسخنه وبتسوي فحص حمل لأن جربت التست بالبيت اطلعت حامل فنبي نتأكد
الدكتور : اول شي خل افحص الحراره وبعدين اطرشكم تسوون الفحص وتردون
( قاس حرارتها اطلعت 39 وخلاهم يروحون يسوون التحليل )
( علي ناطر بره ومنار دشت تسوي تحليل دم و بول - عزكم الله - عطوها عصير لأنها مو ماكله شي واطلعت اقعدت يم علي وناطرين النتيجه )
علي : ها اشلونج دايخه؟؟
منار : شوي
علي : شربيه كله عشان لاتطيحين
منار : ان شاءالله ( ايدها ماسكه علبة العصير وترجف )
علي : منار خلاص اهدي اللي الله كاتبه بيصير وبنحمده على كل شي
( بعد فتره دخلوهم عالدكتور )
الدكتور : مبروك .. حامل هذا اول حمال؟؟
( منار اقعدت ترجف بس علي مسك ايدها وضغط عليها عشان تهدى )
علي : اي الحمدلله .. زين واشلون صحتها؟ اهي صايره ماتاكل وكله تعبانه
الدكتور : انت اهتم فيها لأن اول حمال دايما يكون صعب .. ( يكلم منار ) وانتي لازم تتغذين عدل وتغذين اللي ببطنج معاج .. كثري من الاشياء المفيده واللي فيها بروتينات وانا بكتبلج على حبوب حديد وفيتامينات تخليج احسن وتقوي الجنين وبعطيج حبوب تنزل الحراره
علي : مشكور ( تم ماسك ايد منار اللي ماقالت ولا كلمه ودفع حساب الفحص والأدويه ومشو راحو السياره )
- بالسياره –
علي : ادري ودج تروحين الغرفه وتبجين بس ماله داعي حمدي ربج والأدويه راح تاخذيهم بحزتهم مفهوم؟؟
منار : ( ماقدرت تمسك نفسها اكثر وانفجرت تبجي وتصرخ عليه ) اشلون ماله داعي .. انت مو حاس باللي احسه .. اتقول عادي وحمدي ربج بس انا ماقدر اقول عادي مااقدر
علي : انا مو حاس؟؟ والله يامنار اني حاس اكثر منج بس نبجي.. ندعم .. نلوم نفسنا.. وبعدين؟؟؟ الدنيا ماشيه ماشيه تعلمي تغلبينها وماتنغلب الا اذا سايرتيها ورضيتي بالمكتوب لأن طول ما عانتديه ماراح تعيشين مرتاحه
منار : ( تمسح دموعها ) علي ودي ارتاح والله ودي بس ماقدر مو بيدي
علي : انا معاج وراح تقدرين
( مر على مطعم وياب اكل معنها مو راضيه بس حقرها وياب بعدين اوصلو الشقه وخلاها تاكل غصب وقف على راسها لين خذت الحبوب وماطلع الا لين نامت )
-------
علي رد البيت اول مادش كان ابوه وامه بالصاله
ابو علي : ليش ماترد عالتلفون كنا اندق عليك جذي تخلي امك تحاتي انت ماكو احساس ابد؟؟
علي : مانتبهت كان بالسياره وانا نازل عند الربع
ابو علي : وبعدين شمطلعك الدكتور مو قال ارتاح 10 ايام شمطلعك قبل 5 ايام هاا؟؟
علي : يبه خلاص صرت تمام ومافيني الا الخير
ام علي : يمه انا كنت احاتيك اكيد انت احسن الحين ؟
علي : اي يمه احسن الحمدلله
ام علي : زين تعشيت ؟؟
علي : اي الحمدلله ( باس راسهم ) بصعد فوق ارتاح تبون شي
ابو علي : اي ابيك تحس بأمك وماتخليها تحاتيك مره ثانيه .. وابيك تسوق نفس الأوادم
علي : ان شاءالله .. بعد تبون شي؟؟ ولا اروح انام؟؟
ام علي : لا يمه روح الله معاك نوم العوافي
( علي صعد غرفته شوي جان يدش عليه عثمان )
عثمان : وين السويج؟
علي : هاك ( حذفه عليه وانسدح ) ويللا الحين بنام سكر الليت
عثمان : والله ماطلعت من اهني الا اتقولي السالفه من الألف لي الياء
علي : مو الحين حدي تعبان وبنام
عثمان : اذا كان عبالك تقدر اتقص علي فماراح تقدر قاعدلك اليوم لين اعرف السالفه كامله ( قعد تربع عالسرير صوب ريول علي )
علي : ( قام قعد وصار بويه عثمان ) هذي وحده احبها منزمان وماقلت حق احد لأن كنت ابي اتأكد انها تحبني
عثمان : من متى منزمان يعني؟
علي : من سنه
عثمان : علي سنه كامله وانا مادري؟؟ زين وليش مسكنها بشقتك انتو متزوجين بالسر؟
علي : لا
عثمان : علي انا مو مستوعب انك عايش معاها بالحرام .. صج ان المظاهر خداعه
علي : عثمان انا ماقعدت اكلمك عشان تعطيني محاضرة حسن سير وسلوك .. وبس الحين روح خلني انام
عثمان : ( قام سكر الليت وطلع من الغرفه )
( تم علي يفكر وقرر قرار .. معنه في شي بداخله رافض هالفكره بس اهو مصمم ان ينفذها لأن يحب منار ومايبيها تتعب اكثر من جذي )
----------------
الصبح قام وتريق معاهم والكل طلع ابو علي راح الشغل وعالية راحت مع عثمان يوصلها المدرسه وعمور خذاه باص الحضانه وام علي يوها الجيران يزورونها وقاعده معاهم بصالة الضيوف ..
علي دق على مكتب تأجير سيارات وطلب جيب انفينيتي رمادي وصلوه له لي البيت وسوه الاوراق واستلمها وقال حق امه ان بيطلع عشان لاتحاتي ..
وصل ودش الشقه كانت منار للحين نايمه طق عليها الباب وقعدها
قامت منار وبطلت الباب
منار : ( لابسه بجامه واسعه – بنطرون وبلوزه – وشكلها يظحك مع شعرها معفس شوي من النوم )
علي : ( طالعها وحس وده يلمها حيييييييل لأن شكلها كان عاجبه ) منار بسرعه غسلي وتعالي ابيج بموضوع
منار : اوكي ( وراحت اتغسل )
منار : ( اطلعت من الحمام ) بس دقيقه اصلي واييلك
علي : اوكي ناطر
بعد شوي منار يت واقعدت يمه
علي : ها مشطتي شعرج؟
منار : ( تبتسم ) اي
علي : منار انا بدش بالموضوع من غير أي مقدمات
منار : والله بديت اخاف اشفيك؟
علي : ابي عنوان ابوج
** البارت الرابع عشر **
علي : منار انا بدش بالموضوع من غير أي مقدمات
منار : والله بديت اخاف اشفيك؟
علي : ابي عنوان ابوج
منار : ( انصدمت اتطالعه ) مافهمت
علي : شنو اللي مافهمتيه ؟ منار انا احبج ( مسك ايدها ) والله العظيم احبج وابيج
منار : ( منصدمه ) بس انا .. انت تدري ان انا ... اشلون ؟
علي : ( تضايق حيل و حس ان في شي قاعد على صدره ) ادري ان انتي حامل وادري ان مو من ظهري طالع .. بس دام هالدنيا اظلمتج و دام هالياهل من بطنج والله بيكون ولدي مثل ما اهو ولدج
منار : ( انزلت ادموعها وماقالت ولا شي )
علي : عطيني العنوان وخلي الباجي علي
منار : علي انت ماتدري اشقاعد تقول .. هالشي مايصير .. اشلوون؟؟
علي : ( يمسح دموعها بيده ) مابي اشوف هالدموع خلاص .. وكل شي راح يتصلح وهالياهل ماله ذنب واذا كان مقدر له ينولد بهالدنيا فبيدنا انخلي حياته حلوه بدل لا يعيشها واهو مظلوم
منار : علي انت مو مجبور تستر علي وتاخذني وانا بطلع من اهني واخليك تعيش حياتك مرتاح مثل ماكنت عايشها قبل لا ادخلها واعفسها
علي : ( عصب وصرخ عليها ) منار انتي دشيتيها وخلاص صار اللي صار والحين انا ماقدر اخليج تروحين
منار : ( تبجي ) بلى تقدر وراح اروح اليوم
علي : ( سكت مده عشان لايزفها وتبجي اكثر ) ماراح تروحين مكان .. ( يكلمها بصوت هادي ) منار انتي دشيتي بكل خليه فيني والله انج تطلعيلي حتى بالحلم وبكل وقت وانا صاحي افكر فيج .. و اذا خليتج تروحين بتعذب وانا افكر باللي صايرلج .. خلاص عاد رحميني تره والله تعبت من التفكير وتبعت من كل شي خلينا نرتاح وعطيني العنوان
منار : ( تسمح دموعها ) علي انا مشاكلي وايد ويمكن راح تلحقنا لي بعد الزواج ويمكن تخسر اهلك بسبتي .. لا ماقدر والله ماقدر اسوي فيك جذي
علي : ( مسك ايدها وباس راحة ايدها من داخل ) انا راضي فيج وبمشاكلج
منار : ( قطت نفسها على علي ولمته واقعدت تبجي حييل )
علي : ( اول شي انصدم بس بعدين ابتسم و حوطها بيده ) خلاص لاتبجين ماراح يصير الا الخير
منار : ( وهي لامته وتبجي ) علي ليش انت طيب معاي لهالدرجه
علي : ( يهمس باذنها ) لأني احبج واحب كل شي فيج
منار : ( وخرت عنه وابتسمت وامسحت دموعها ) وانا بعد أ..
علي : ( حط ايده على حلجها ) اششششش .. لاتكملين مابيج تقولين شي انتي مو حاسه فيه .. انا ادري اني قدرت اكسب معزتج وادري اني صرت غالي عندج بس الحب لا تطرينه الا اذا حسيتيه .. وابيج توعديني ان ماتقولين هالكلمة الا لي اطلعت من قلبج مو من السانج وبس
منار : اوعدك
علي : ( ابتسم لها ) يللا العنوان
منار : علي لاتروح وانت تعبان انطر جم اسبوع لين يروح كل اثر بجسمك
علي : ( تضايق وطالع بطنها ) لا ماقدر انطر اكثر
منار : ( اسكتت افهمت ان يقصد اللي ببطنها وان صارله شهرين وكل ما طول اكثر بتصعب عليه السالفه خصوصا مع اهله )
منار : انا ما اعرف العنوان بس ادل البيت و... واخاف اروح اهناك
علي : قعدي ورا ماتبينين انروح اهناك بس اتدليني البيت ونرجع
منار : بس انا مابيك تروح اهناك ماتدري شنو ممكن يسوون
علي : وليش انا مينون اروح بيتهم و اقولهم بنتكم عندي؟؟
منار : عيل شنو بتسوي؟
علي : خلي هالسالفه علي .. بس لاتخافين مايصير الا كل خير
( تم علي قاعد معاها ويسولفون لي الساعه 12 طلب غدا وكلو وخلاها تاخذ الأدويه ورد البيت )
قعد مع العايله بالصاله اهم يتغدون واهو عالقنفه يلعب مع عمور منزمان مولاعب معاه
ام علي : عمور ماما لاتطق علي مريض مسكين بعدين يبجي
عمر : انا قوي ( ويطق علي )
علي : يمه خليه يلعب معاي والله منزمان مالعبنا صح عمور؟
عمر : اطقك طق
علي : ( يظحك ) اي انا اكسرك تكسر
عمر : ( نطح علي نطحه قويه على صدره )
علي : اخ ... خلاص انت الفايز يللا روح
ام علي : ( تصرخ ) عمور؟ وخر عن اخوك خلاص
علي : يمه لاتزفينه ياهل
ابو علي : ( ياكل واذنه معاهم ) انت اشكبرك غيرك عنده 4 يلعبهم وانت قاعد تلعب مع اخوك
علي : قريب بتزوج ان شاءالله
ام علي : ( مو مصدقه ) صج ؟؟ والله فرحتني لو اعرف ايبب جان يبتت
عثمان : ايي عليوي والله انك مو هين اخوي طلع بلوه
علي : ( فهم غصد عثمان ) اقول كمل غداك واكرمنا بسكوتك
ابو علي : خلاص بنخطبك ساره اشرايك؟
علي : لا يبه انا اختارها بنفسي
ابو علي : واشفيها بنت عمك ساره من شنو تشكي يعني؟
علي : يبه ماتشكي من شي بس مابيها
عالية : تزوج ندى عشان انصير انا واهي بنفس البيت وناسه
علي : شبي فيها اربيها يعني؟
عالية : اللي يسمعك يقول عمرك 50 عادي بينكم 10 سنين مو وايد حيل
عثمان : يبه انا ابي غلا
ام علي : والله انك انت البلوه حاط عينك عالبنت وماتقولي عشان نحجزها لك؟
علي : اي والله يمه زوجيه لأن ان ماتزوج ينحرف
عثمان : والله اني سيده ولا عندي شقق ولا شي
ام علي : اشهالكلام عيب استح على ويهك
علي : ( يخز عثمان بس ساكت ماقال شي )
ابو علي : يستاهل عثمان ازوجك غلا متى ماتبي انت بس قرر
عثمان : ( مستانس ) اي بتزوجها اول مانتخرج بس ودي تخطبها رسمي
ابو علي : ان شاءالله ومايصير خاطرك الا طيب
عالية : غلا اصغر منه بسنه وحده .. اخطبله ندى احسن
عثمان : اتزوج ندى عشان تقعد اليوم كله عندج وتخليني؟؟ خوش زواج والله
علي : ( يطالع عثمان ويقول بقلبه ) جان زين سالفتي سهالات مثلك
( رن تلفون علي وكان رفيجه صلاح )
علي : الو هلا صلوح
صلاح : هلا فيك .. ها اشلون صرت؟
علي : تمام الحمدلله
صلاح : ودنا انيي نلعب اورقه عندك
علي : لا انا اللي ودي اييلكم تعبت من البيت
صلاح : يعني امرك اخذك؟
علي : لا أجرت سياره وانا بمركم
صلاح : خلاص صار تعال 4 دوانية محمد كلنا اهناك
علي : اوكي بس ييب السي دي معاك
صلاح : أي سي دي؟
علي : تره انا ما انسى
صلاح : ( ظحك ) خلاص اييبلك بداله 10 سيديات بمناسبة طلعتك بالسلامه بس تعال
علي : اوكي 4 اكون عندكم ( سكر الخط )
ام علي : علي يللا قولي متى اخطبلك يعني؟
علي : قريب ان شاءالله
-----------
صارت الساعه 3 ونص علي طلع من البيت رايح حق ربعه ودق بالطريج على منار
علي : الو ها مو نايمه؟
منار : لا قاعده احاول انام
علي : لاتفكرين وايد وراح تنامين
منار : علي .. متى راح تروح لهم؟
علي : اليوم بالليل راح اتدليني المكان وباجر الصبح اروح لهم
منار : بس انا خايفه عليك
علي : لاتخافين ان شاءالله خير انتي بس ادعيلنا
منار : ان شاءالله
علي : يللا الحين نوم العوافي يالغالية .. انا بروح عند الربع
منار : اوكي ... مع السلامه
علي : مع السلامه
( علي وصل عند الدوانية وسفط السياره ونزل )
علي : السلام عليكم
الشباب : ( قامو يسلمون عليه ) وعليكم السلااااام الحمدلله عالسلامه
علي : الله يسلمكم
محمد : انا ماني قاعد بشوف السياره اللي أجرتها ( طلع بره شوي ورد )
الانفينيتي لك؟
علي : اي
محمد : ايي هذي الناس تدعم بالاكس فايف وتأجر انفينيتي عقب جم يوم تشتري بنتلي
علي : والله محد بيفقرني الا انت يخي انت ليش كل سوالفك عن الفلوس
محمد : اشفيك اتغشمر معاك افا عليك بس
( اقعدو كلهم العبو جنجفه جم قيم وطلع علي عشان يروح حق منار وياخذها تدليه البيت )
------
وصل حق منار ودق عليها عشان تنزل .. بعد دقيقتين انزلت واصعدت معاه السياره
منار : علي والله انا خايفه حيل ماودي ادش المنطقه بكبرها
علي : خلاص سمي بالله وقوليلي يللا الوجهه أي منطقه؟؟
منار : كيفان
علي : اوكي يللا بسم الله ( حرك السياره ومشى )
( قربو يم كيفان ومنار خافت ازياده .. علي مد ايده عالكشن اللي وره وعطاها جريده )
علي : هاج شريتها عشان تفتحينها جنج تقرين ومحد راح يشوفج
منار : ( خذت الجريده وبطلتها و ادفنت راسها فيها حتى السيارات اللي على يمينها مايشوفون غير الجريده )
علي : ( يظحك ويحاول يلطف الجو ) زين جذي الناس تقرا جريده الله يهداج لافتها عليج جنج هديه مغلفه
منار : ( ماوخرت الجريده ) علي اسكت عني والله خايفه
علي : زين بالله اشلون بتدليني وانتي لافه نفسج فيها .. اسويلج فتحات حق عيونج؟
منار : ( تظحك واهي خايفه نزلتها شوي بس طلعت عيونها )
علي : ( يظحك ) والله شكلج نكته
منار : خلاص علي لاتظحك امانه والله بموت من الخوف ( صعدت الجريده على ويهها بسرعه ) هذي .. هذي اللفه فوق تحت يسار
علي : ( لف ) والحين وين ؟
منار : ( نزلتها شوي ) الحين يمين
علي : زين؟؟
منار : ( صعدت الجريده لي السقف عشان مايبين منها شي ) البيت العود على يسارك لونه بني بأبيض
علي : عندهم بره طراد؟؟
منار: اي .. عفيه يللا امش
علي : اوكي ( ورجع فوق تحت وطلع عالخط السريع ) يللا نزليها خلاص
منار : ( نزلت الجريده وقلبها يرقع من الخوف )
علي : لاتخافين منور طلعنا من اهناك ( مد لها ايده )
منار : ( حطت ايدها بيده جان يضغط عليها وتم طول الطريج ماسك ايدها )
علي : يللا نزلي ارتاحي ولاتنسين تاخذين ادويتج انا بروح انام هذي قعدتي من الصبح ( يبتسم لها ) وباجر عندي مشوار مهم
منار : علي امانه دير بالك على نفسك والله لو صارلك بعد شي بسبتي صدقني راح..
علي : خلااص منار ماراح يصير شي يللا نزلي
منار : اوكي
( نزلها علي ورد البيت )
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
لا احلل مسح اسمي من على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
** البارت الخامس عشر **
منار : علي امانه دير بالك على نفسك والله لو صارلك بعد شي بسبتي صدقني راح..
علي : خلااص منار ماراح يصير شي يللا نزلي
منار : اوكي
( نزلها علي ورد البيت )
---------
علي راح البيت وقعد يم امه واهي تصلي ونطرها لين خلصت الصلاة
ام علي : ها يمه اشفيك تعبان ؟؟
علي : لا يمه الحمدلله مافيني شي بس ودي تدعيلي
ام علي : شنو تبي ادعيلك ؟
علي : ان الله يسهل علي موضوع باجر
ام علي : ( ترفع ايدها وتدعي ) يالله يارب يا كريم يا حليم يا منان يا رحيم أسألك اللهم بأسمائك الحسنى التي علمتها والتي لا اعلم ان تسهل درب ابني علي وتوفقه وتيسر له اموره كما يحب وترضاه اللهم امين
ام علي : ( تطالع علي ) الله يوفقك يمه ويحفظك
علي : ( باس راس امه ) الله لايحرمني منج
ام علي : ليش احس انك متكدر وايد هالأيام .. يمه قولي اللي يقلبك خل اساعدك
علي : يمه ابيج بس توقفين معاي حتى لو الكل كان واقف ضدي عفيه يمه
ام علي : زين اول شالسالفه؟؟
علي : راح تعرفينها قريب انا الحين صاعد انام
ام علي : الله معاك ونوم العوافي ربي يوفقك بكل خطوه ان شاءالله
( علي دش غرفته تسبح وطلع انسدح ويفكر اشلون راح يكلم ابوها باجر توه بدى يغفي جان يرن تلفونه )
علي : ( صوته تعباان ) الو؟
منار : علي نايم؟
علي : هلا منار فيج شي؟
منار : لا .. بس ماقدر انام
علي : ( يغمض عينه وده ينام ) لاتفكرين بشي وراح تنامين
منار : علي لاتروح لهم الله يخليك
علي : منار خلاص هالسالفه منتهين منها وباجر الصبح انا رايح
منار : علي الله يخليك اترجاك لاتروح
علي : منور نامي وباجر بيعدي على خير لاتخافين
منار : بس انت ماتعرفهم كثري صدقني و
علي : ( للحين مغمض عينه وحاط التلفون على اذنه ) أحبج
منار : ( اسكتت ماعرفت شتقول من الفشله )
علي : منور.. والله احبج
منار : انت شكلك نايم وماتدري شنو قاعده اقولك .. تصبح على خير باي
علي : ( يظحك ) عرفت اسكتج ها؟ يللا انتي بعد نامي نوم العوافي
(ابتسم و سكر التلفون وبسرعه نام من التعب )
اليوم الثاني الصبح علي قام مبجر عالساعه 6 صلى ولبس دشداشه وغتره وطلع قبل لايقومون اهله ..
وصل عند بيتهم وتم واقف شوي بعيد و ناطر بسيارته مل من النطره جان ياخذ الجريده اللي امس منار غطت نفسها فيها
علي : ( ابتسم تذكر شكلها واهي متغطيه بالجريده ) يارب سهل الموضوع
( بعد ساعه تقريبا طلع من البيت شاب وركب سيارته نوع بي ام )
علي : ( نطره لين راح ) اتوقع هذا فهد مبين ان مو الكبير
( بعد نص ساعه طلع ريال كبير لابس دشداشه وشكله رايح الشغل .. علي شغل سيارته ولحقه لين وصل عند شركة خاصه ونطره ينزل ونزل وراه لين عرف أي مكتب دش )
علي : ( يسأل موظف من الموظفين ) الاستاذ سلطان اللي توه دش اهو المدير؟
الموظف : اي نعم السيد سلطان اهو مدير الشركه
علي : اوكي مشكور.. ( راح لي المكتب طق الباب ودش ) بسم الله
لقى السكرتيره قاعده بالمكتب الداخلي الصغير
السكرتيره : هلا اخوي آمر ؟
علي : مايامر عليج عدو .. بس بغيت اكلم الاستاذ سلطان ضروري
السكرتيره : بس عفوا لازم يكون عندك موعد مسبق
علي : ادري بس انا ماقدر انطر .. لو سمحتي تكلمينه وتقولين في واحد بيكلمك بموضوع يهمك شخصيا
السكرتيره : بس يا اخ مايصير اهني في نظام لازم ..
علي : انتي قوليله اشراح تخسرين
السكرتيره : اوكي ( تكلمه بالجهاز اللي عندها ) استاذ لو سمحت في شخص يطلب يقابلك بموضوع يهمك شخصيا
ابو ناصر : اذا ماعنده موعد مشيه
علي : ( خاف شوي لأن مهما كان هذا ابوها وكانت نبرته عصبيه ) قوليله يخصك ومايتأجل
السكرتيره : استاذ بو ناصر .. يقول الموضوع يخصك ومايتأجل
ابو ناصر : خليه يدش
السكرتيره : تفضل ( خذته لي الباب وخلته وردت مكتبها )
علي : ( بقلبه ) بسم الله الرحمن الرحيم اللهم لا سهل الا ماجعلته سهلا
( دش علي المكتب ووقف بويه بو ناصر )
( بو ناصر كانت ملامحه مبينه ان ريال عصبي وماتمر على خشمه ذبانه – يعني نفسيه - )
بو ناصر : استريح
علي : ( قعد ) انا يايك بموضوع شخصي وماله شغل بالشركه
ابو ناصر : موضوع شنو؟؟
علي : موضوع بنتك منار
ابو ناصر : ( انصدم وبطل عينه وعقد حواجبه قعد يخز علي )
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك