رواية أشكي للي بين ضلوعي -12

رواية أشكي للي بين ضلوعي -12

سلطان يبيها
لولو:ما دريت تعال عشان تسمع الخبريين....
ام محمد:وش الثاني...
لولو:أي يا عمري منصور خطيب جوهره....
سلطان من سمع خطيب الجوهره وهو عجز يستوعب السالفه واهله كلهم عادي كانهم سامعيين بالسالفه وكان شئ عادي يصير....وصار يناظر بام رغد بس ما لقى أي جواب..
ام محمد:لا حول ولا قوة الا بالله...
سلطان:وش فيه؟
لولو:اقولك طبوا عليهم مدري مخدرات مدري ارهاب ومسكوهم الشرطه ومنصور بالمستشفى...
سلطان:ومن متى هالكلام؟
لولو:توه ماله الا يوميين صديقتي يصيرون جيرانهم وهي اللي قالت لي....
محمد:واهل الحي كلهم يدرون عن منصور....
لولو:شكله ايه لانه كأني فهمت منها ان منصور جاي وقت المداهمه وصقعوه بالرصاص بس مايدرون من مين...
محمد:لا حول ولا قوة الا بالله...قوم يا سلطان خلنا نروح لبيت خالتي ونستفسر عنهم...ونطمأن عليهم وعلى سالفة منصور...
سلطان:يالله وانا باروح اخبر ابوي ونروح كلنا....
وقام محمد وسلطان وابو محمد وراحوا لبيت ابو فيصل....
لولو:والله تعجبني حركات الشهامه....
ام رغد:والله انك رايقه..امسكي رغد...
لولو:هلا برغوده..هلا بقلبي....
وراحت ام محمد تتصل على ام فيصل وتتطمن على منصور واهله....
ونوره اختهم الصغيره ملتهيه بالعروسه اللي مسميتها ريمي على المغامره ولا تدري وش اللي يدور حوالينها....وعبودي يلعب بالسوني وكالعاده كوره..

********************

سلمان:يمه يالله ما تبون تروحون لبيت ابو فيصل....

ام سلمان:الا بس حنان ما هي راضيه تجي...

سلمان:وما عرفتي وش فيها...

ام سلمان:لا والله مهيب راضيه تتكلم....

سلمان:خلاص انا اروح عندها واكلمها...

ام سلمان:كلمها يمكن تسمع منك...

وراح سلمان عند حنان ودق عليها الباب.....

حنان:ميــــــــــــن؟

سلمان:انا الحرامي : )...انا سلمان خان...

حنان:عاد سلمان خان مره وحده...قول شاروخان اخف شوي...

وفتحت حنان لسلمان...

سلمان:وش ناقصني انا عن سلمان والله ما يسوى ظفري...

حنان:هو من ناحيه اخلاقيه حتى ظفرك كثير عليه...

سلمان:يعني وشي ذي مدحه ودمج معها طنازه...

حنان:استريح انت سعودي يكفي هالمفخره وهو هندي مصيره يشتغل عندنا زبّال...

سلمان:قويه والله زبّال...

حنان:هندي لا تحط مقامك بمقامه...

سلمان:عاد ما كانك احتقرتيه مره..

حنان:احد قاله يصير ممثل..

سلمان:ههههههههههههههه

سلمان حب يدخل بالموضوع على طول ولا كانه داري عن شئ....

سلمان:وينك ليش ما تجهزتي تبين تاخرينا....

حنان:لا منب رايحه...

سلمان:يالله بلا دلع عشان ممرضه وراتبك زين اتدلعتي علينا....

حنان:اللي يسمعك وانت تطري الراتب يقول ذي طقة العشرة الاف..كلها سته الاف...

سلمان:نعمه سته..احمدي ربك مو انا يا حول الف الا عشرة ريال....

حنان:طيب صير موظف وبتلاقي ازين من هالراتب...

سلمان:شكلي باصير ممرض....

حنان:لا لاتصير والله متعب بعدين ما زالت شغله ماهي مشرفه بالنسبه للرجال وعار بالنسبه للحريم...

سلمان:واحنا وش دخلنا بالناس اللي ما ترحم وتتكلم وهي قاعده على كرسي ومرتاحه....يا حنان والله لو سمعنا لكلام الناس ما سلمنا وكل واحد له رأيه..والله لو واحد فيهم محتاج كان ما قال اللي قاله...وبالعكس شجع على العلم والشغل باي وظيفه....

حنان:أي والله انك صادق.....

ودخلت ليلى عليهم....

ليلى:يالله هذي ثالث مره يتصلون ويقولو ليش تأخرتو....

حنان:يتصلون والا تتصل....

سلمان:انا مالي دخل لا تناظروني : )

حنان:انا منب رايحه روحوا لا أأخركم...

سلمان ما حب يضغط عليها وقال:هالمره لكن المره الجايه بتجين غصبا عنك....

حنان:ابشر....

وراحوا ام سلمان وسلمان وليلى واختهم اللي بالمتوسط رانيه...

وخلود كانت محتاجه ليلى حيل اكثر من قبل تبيها تبي تحكي لها اللي صار تبي تفضفض لاحد وما عندها الا ليلى عشان كذا اصرت على ليلى انها تجي.....

وخلود واهلها ما زالوا ببيت عمهم...

حنان جتها حالة غريبه ما يدرون وش فيها جتها فتره ما تاكل معهم ولا تقعد معهم واتفاجأو كلهم بقرارها انها ما تبي تشتغل....وتبي تستقيل من وظيفتها حاولوا معها بكل الطرق بس ما في أي فايده... ولولا رحمة ربي ثم المستشفى اللي مره يبونها كان هي اللحين استقالت لكن المستشفى عطوها اجازه مفتوحه بدون راتب الين ترجع....

الكل مستغرب من حالتها والشئ اللي جاها..ومسيكينه ما تاخذ شئ من راتبها تحطه عند امها واللي يبي ياخذ منها ومعطيه امها كافة الحرية في التصرف براتبها واذا نقص عليهم أي شئ ياخذون من راتب حنان....

حنان انسانه عمليه تركت جانب المشاعر واهتمت بعايلتها اكثر من اللازم..ولانها مرت بظروف قاسيه وصحبه ماهي كويسه جتها صدمه من المجتمع وكرهت الصداقة وصارت تهتم بمواضيع الرجال واشتغلت واعتمدت على نفسها واللي ساعدها انه في ناس مثل تفكيرها....

رغم صرامتها وحدتها الا ان فيها طيبه محد يتخيلها تحب اخوانها وامها بشكل جنوني هذي هي عايلتها الماضيه وهذا هو متسقبلها هذا كان كل همها..تسعد اخوانها وتخفف عبأ ابوها تذاكر لهم تحفزهم وترغب فيهم طرق النجاح.....

الكل مشى معها وسمع لها الا احمد اللي عجزت تسيطر عليه...عجزت تتغلب عليه وتغير افكاره لان صحبة احمد سيئة وكثيره والكثره تغلب القلة....

*********************

في بيت ابو فــــــــــــيـــــــــــــــــــــــــصــــــــــ ـــــــــــــــــــــــــل

ابو فيصل:ها يام فيصل البيت ناقصه شئ تحتاجون شئ غير اللي كتبتوه بالورقه ترى بيقعدون عندنا اكثر من شهر...

ام فيصل:لا ان شاء الله بس هذا اللي ناقصنا...

ابو فيصل:اهم شئ لا يدرون انا بنقضي اغراض عشان ما يحسون بثقل...

ام فيصل:ان شاء الله...

ابو فيصل:وين الجوهره....

ام فيصل:تبيها...

ابو فيصل:أي ناديها...

ام فيصل:ابشر..

وراحت ام فيصل تنادي الجوهره اللي منهمكه تسمع لعهود وهي تسولف...

عهود:المهم انا ونوف قلنا اللحين ندرس اقتصاد وتنظيم حفلات وما عمرنا سوينا لاهلنا حفلات..

خلود:أي يا حول بس فاضيين للنت والمنتديات...

عهود:عاد اللي يسمعك تخلي لي مجال افتح..كل دقيتيين تكلمين ليلى...

غادة:عذرا على المقاطعه بس منهي ليلى عشان ندخل جو بالهواش...

جوري:هههههههههه...الله يرجك هذي بنت خالتهم...

عهود:انا ونوف شرينا كل شئ مثل بعض واتقنا على كل الفقرات....و...

ام فيصل:الجوهره كلمي ابوك...

غادة:احلى يالمهمه واحنا وراه خالي زعلان مننا...

جوري:حتى بابوي تبين تناقريني....المهم عهود لا تكملين السالفه الا اذا جيت..ثواني باكلم البابا(وتطالع بغادة وتضحك) واجي...

غاده:مالت عليّ محد مسوي لي سالفه حتى بدر من يوم ما جينا ما ناداني ولا مره....

عهود+خلود:ههههههههههههههههههه

جوري وغادة يحاولون يمزحون ويتناقرون عشان يخففون حدة التوتر والقلق اللي بخلود وعهود واول ما جو عهود وخلود ضاق خلقهم ولا كانوا يتكلمون..هم كانوا مستصعبين القعده ببيت عمهم ويوم دروا ان عمتهم بعد فيه..ضاق خلقهم على الاخر...

بس غادة وجوري ما تركوهم وونسوهم على الاخر وعلى طول اندمجوا معاهم بس خلود ما اندمجت كثر عهود...عهود اندمجت بشكل خيالي مع غادة..مع انها بنت عمتها الا انها عمرها ما قعدت معاها هالقعده وبغرفه وحده وقومتهم واكلهم واحد...

بيت ابو فيصل وسيع بس كل واحد يبي الثاني....الحريم يبون يكونون بغرفه وحده والبنات يبون يصيرون مع بعض والشباب بعد يبون يكونون بمكان واحد...

جوري راحت عند ابوها...وقابلت بطريقها بدر ولد عمتها..وانصدمت ما توقعت كذا يكون شكله من زمان عنه...وهي بعد نازله بدون جلال تتستر فيه..استحت مره من شكلها وهي آخذه راحتها وهي تدري ان بالبيت عيال..وخافت بدر ينقد عليها والا احد شافها وهي بالشكل ذا..بس حمدت ربها ان بدر منهمك يصلح الفيديو حق فيصل..وصارت تضحك على فيصل ما يترك عوايده حتى الضيوف ما سلموا منه شغلهم...وطلعت بسرعه عند غادة..

غادة:قضيتوا...

جوري:كله من عينك..تعالي معاي....

غادة:ليش؟

جوري:وانا نازله طحت ببدر..

غادة:آآخ يالقهر ليتني معاكِ عشان اشوف علبة الألوان اللي بوجهك...

جوري:تطمني ما شافني بس انا اللي شفته...

غادة:علينا(وتغمز لها)..

جوري:اقول لا يكثر بس..تعالي معاي باكلم ابوي...

غادة:عشان خالي والا انتي...

جوري سحبت غاده من يدها ونزلت هي واياها بجلال واحد...

غادة:والله انك مضحكه اللحين انا وانتي بجلال واحد الله يالزحمه...

جوري:عادي اهم شئ الوجه ما يشوفونا...

ونزلوا وجو بالصالة...

غادة رفعت صوتها وتقلد العيال اذا جو بيدخلون البيت:يا بنت يا بنت...

والتفت بدر على غادة ولقاها متغطيه بالجلال كان بيجي ويسحب منها الجلال بس حس ان الوضع غريب....

بدر:وش عندك..

غادة:طريق يا ولد...نبي نتعدى....

بدر:ما شاء الله كم راس..

غادة:عيب تسأل اعطينا مقفاك نبي نعدي نكلم خالي...

جوري يالله يالله كاتمه الضحك..غادة وهي تتكلم وتقلد العيال شكلها يموت من الضحك...جوري كل ما زودتها غادة تقرصها وغادة تقول:آآييييي...

فضيحه هالبنت....

بدر جا بيسلم على جوري بس ماهو متأكد هي جوري والا لا..وحس ماله داعي يسلم على أي احد طنش الموضوع وخرج برى الصاله مره وحده....

اما جوري ما صدقت انه خرج وعلى طول ابعدت الجلال عنها وضربت غادة...

جوري:والله انك فضيحه وش ذا..والله عيب...

غادة:يا بنت عادي..الدنيا فانيه...

جوري:منتب صاحيه الله يعيين اللي بياخذك...

غادة:لا تخافين باقعد على قلبك واخذ اخوك واناقرك....

جوري:اعوذ بالله ما لقيتي الا هالضعيف.لا ما ارضاها على اخوي...

غادة:من زينك انتي واخوك انا قلت عشان ما في احد تقبل فيه وعشانه ولد خالي وما يهون علي خالي وخالتي يقعد بكبودهم عشان كذا بآخذه واستر عليه...

جوري:يا الدبه صدق ما عندك سالفه..اللحين طلعتي فيصل قليل وما عنده سالفه ومسيكين وضعيف واحنا ما نبيه وانتي تبي تسترين عليه....اقول وخري عني باكلم ابوي...

غادة:بكيفكم انا قدمت مساعده وانتو اللي رفضتوها...

جوري تعرف ان المناقره مع غادة ما توصل لاي نتيجه وتبي تاخرها زياده عن ابوها....وراحت بسرعه عند ابوها......

وخرجت بسرعه للحوش وتلتفت يمين وشمال تدور على ابوها...

ابو محمد ومحمد كانوا بالمجلس مع ابو فيصل وفيصل وبدر وابو خالد وخالد..وسلطان خرج يجيب له غرض من السياره ويجي..ويوم دخل البيت وبيدخل المجلس اتفاجأ بجوري اللي واقفه عند الباب وعلى طول نزل راسه...وجا بيمشي بس سمع صرخه خلته غصبا عنه يرفع راسه وعرف ان مصدر الصوت من عند جوري وان فيها شئ جا بسرعه لها وقف بعيد شوي عنها..

جوري التفت يمين وشمال ما شافت ابوها يوم جت بتدخل البيت والا تشوف سلطان داخل من البيت بسرعه نقزت الدرجة اللي عند باب المدخل وجت بتدخل بس التوت ومالت رجلها ميلة غريبة وطاحت وصرخت..رجلها التوت بقوة وطقت عظمتها وصارت ما تتحكم برجلها وطاحت غصبا عنها.....

يوم جا سلطان لها صارت تبكي..ما تبي يجيها..تبكي من انه رجال غريب جايها اكثر من ان رجلها توجعها....وكل ما قرّب سلطان كل ما صارت تبكي وصارت تحاول تزفح تبي تدخل داخل البيت بالزحف ولا سلطان يجيها....

سلطان مسيكين ما يدري وش السالفه..هو يجي ويسعفها والا ينادي احد من محارمها واغتبشت الصوره عليه..

وما زالوا اثنينهم محتاسين كل واحد بوضعه..سلطان المسيكين مستحي لا يجي والموقف صعب لازم يسعفها يسوي أي شئ..وجوري اكبر شئ ان احد غريب يجي عندها او يمسكها..اقترب سلطان وجوري نزلت راسها تبكي وكل ما اقترب سلطان جوري تزيد بالبكا..

غادة اللي كانت بتطلع الدرج وسمعت صرخت لولو ورجعت جري على الباب وخرجت وشافت سلطان جاي مقترب ارتبشت هي بعد ودخلت داخل ومن العجله والربكه سكرت الباب..جوري كان كل املها بهالباب انها تزحف على ورى وتدخل جت غادة وخربت كل شئ بحركتها...سلطان جزم ونزل شماغه واعطاها اياها وراح لمجلس الرجال اللي كانوا بيطلعون يوم سمعوا الصرخه بس ما رضى لهم وخلى عم جوري وابوها هم اللي يطلعون..

اخذت جوري الشماغ وحطته على راسها وغطت شعرها..وجا ابوها شالها ودخلها الصاله....

جوري ميته من المستحى ويوم شافت ابوها زادت صياح ومنحرجه مره من هالموقف لصعب....

اما سلطان عقب هالموقف وكلام اخته لولو اللي ما يطمن صاير مختبص والدنيا تدور به..آخر شئ توقعه ان يصير موقف مثل ذا بينه وبين جوري وهو يعرف جوري لانها ما تغيرت مره عقب ما تغطت عنه....

نزلوا البنات عهود وخلود على الربشه اللي سمعوها بالصالة وغادة كانت بالصاله ما تدري وش تسوي عقب ما سكرت الباب واتفاجأت بخالها ابو فيصل اللي داخل بجوري...وجت ام فيصل وام خالد بدون جلال وكشفوا عن بعض والدنيا اختلطت عليهم ما يدرون هم يغطون والا يكشفون..وانحاست الدنيا عليهم عقب ما شافو جوري...

خلود انتبهت للموقف اللي صاير والدنيا والحوسه اللي بين عمها وامها وراحت بسرعه جابت جلاليين لامها ومرة عمها ام فيصل..لان ابوها وعمها ابو فيصل موجوديين....

اما ام غادة اخوانها لا غطا ولا يحزنون وكلن حاسدها..طلعوا الرجال عشان تتطمن ام فيصل على جوري والبنات قعدوا عندها بالصاله...وابو فيصل طلب الاسعاف..بس خلود ما رضت وطلبت حنان انها تجي ولا رجال يجي ويسعف جوري...وجوري ودها تحب راس خلود على هالخدمه...

اتصلت خلود على ليلى واضطروا انهم يرجعون البيت وكلموا حنان ووافقت على طوول وبسرعه تلبست وراحت معاهم...

الجزء الثامن عشر

لمياء تركت ابوها ينام وراحت للدكتور تسأل عن حالة ابوها والتطورات الي حصلت بحالته..واتطمنت عليه وعلى حالته اللي صارت افضل بكثير من اول..وأول شخص جا ببالها خالد.. بس ما عرفت شلون تبلغه او تكلمه واكيد اذا درى بحالة ابوها بيجي على طول..وعقب ما عادل سوى لهم سالفه هي وخالد عافت جيته وبطلت فكرة انها تخبره..وبعد لو احد جا من عيال عمها وخالد موجود بيثبتون كذبة عادل..وراحت للغرفة اللي مرقد فيها ابوها وقعدت عنده وابوها نايم.. وخرجت برى الغرفه عشان تكلم عيوش...

لمياء:هلا عيوش..

عيوش:هلا بك يا قلبي..

لمياء:الله يسعدك باطلب منك طلب..

عيوش تسدحت من الفرح اول مره تكلمها لمياء بادب وحست ان خطتها هي وصديقتها نجحت وان لمياء بدت تستجيب...

عيوش:آمري تدللي...

لمياء:ما يامر عليك عدو بس ركبي الماء على النار واطلبي من راشد يجيني باسوي لابوي قهوه..

عيوش:ابشري اللحين اكلمه...

لمياء:الله يسعدكم انتي وراشد والله اني متفشله منكم بس وش اسوي ما عندي احد..

عيوش:لا عادي..اكلمه وارد لك..

لمياء:الله يجزاك خير...

ارتاحت لمياء لعيوش وحمدت ربها على شفاء ابوها وتحسن حالته....وناويه تجيب فراس للمستشفى عشان يسلم على ابوه...

اتجهزت لمياء وحاطه ببالها وش الاشياء اللي بتجيبها من برى عشان تملا الغرفه ولا تحتاج لاحد او انها تشري من برى...

العم سعد:ها يا بنتي ما نمتي...

لمياء:صحيت من النوم...

سعد:والله نمت من التعب والا مليت من النوم...

لمياء:ان شاء الله كلها بس فتره وتطلع لنا ازين من الاول..

سعد:اللهم آمين...

لمياء:يبه انا باروح البيت با جيب قهوه وبعض الاشياء واجي اللحين...

سعد:طيب وبتروحين مع مين؟

لمياء:راشد ولد عمي بيجي هو وعيوش...

سعد:الله يجزاهم خير....

دقت عيوش على لمياء وسلمت على ابوها وخرجت بسرعه وراحت معاهم لبيت عمها...دخلت

لمياء البيت وبسرعه على المطبخ..لقت الابريق على النار والماء فايح حطت القهوه على الابريق وبسرعه راحت لغرفتها تاخذ لها اغراض وثياب وتحط لفراس ثياب وحطتها بشنطه متوسطه ونادت فراس وخلته يدخل يتسبح وراحت بهرت(يعني حطت هيل او هيل وزعفران)في الترمس.. وتجهزت وما با قي لها شئ الا اغراض بسيطه ببيت ابوها بتاخذ له ملابس لانها ما اخذت شئ من البيت وكلمت عيوش عشان تكلم راشد..وراشد حليله ما عنده أي مانع..اخذت كل الاغراض ولبست فراس الشماغ والعقال وحطت له عوده ولبست عباتها وعجلت بعيوش عشان تروح معاها لبيتهم عشان بتاخذ اغراض ابوها..

طلعت للصالة وراشد ينتظرهم بالسيارة بس جا ابوه من السفر وسلم عليه ودخل معاه داخل واول ما شاف لمياء صفقها كف بوجهها وطاحت على الارض ومسكها من طرف عباتها ورفعها وضربها مره ثانيه..وعادل وراه مبتسم لا حيا ولا حشيمه..جا من اللي يفرغ شحناته فيها ويطلع كل حرة خالد بلمياء..راشد انهبل من ابوه وما يدري وش السالفه....

لمياء:يا عم حرام عليك والله اني ما سويت شئ...

ابو راشد:حرمت عليك العيشه..فضحتينا ولك عين تتكلمين وتردين وجايه بعد بتخرجين...

لمياء:والله يا عمي اني ما سويت شئ..

ابو راشد:اقول ما جاك من الي يربيك زين..لاربيك واربي اللي رباكي...

لمياء:ابوي متربي ازين تربيه وانا مثله...

ابو راشد صفع لمياء صفعه ثانيه ونزل عقاله بيضربها بس جا راشد وفك لمياء من ابوه...

راشد:يبه ما يصير..ما سمعت منها شئ بس سمعت من عادل..

عادل:يعني باكذب انا..اقولك انا شايفها بنفسي...

راشد:وانت يا كثر كذبك..

عادل:لا يا شيخ يعني انت اللي مسوي فيها اخلاق...

راشد طنّش عادل وهو يعرف ان الكلام ما منه فايده ورجع يكلم ابوه..

راشد:ابوي والله ما شفنا منها الا كل شئ طيب وبعدين احنا تربينا مع بعض وتربيتنا وحده... مستحيل يخرج منها هالشئ..واحنا ما سمعنا منها شئ بس سمعنا كلام عادل...

ابو راشد:وعادل وش فيه رجال وكلمته تتصدق وهي بنت ما وراها رجال يراقبونها...

راشد:يا ابوي لا تدافع عن عادل وانت اكثر واحد يدري عنه..هذا كذبه اكثر من صدقه وما عقب ىخر سالفه اللي بغى يورطنا وندخل السجن كلنا...

ابو راشد حس صدق بالسالفه وكلام راشد منطقي خمسميه بالميه..بس كبريائه ما يسمح له انه يعتذر او انه يعفوا عنها بهالسهوله..واللي جننه اكثر انه عقب السالفه اللي كذبها عادل ونشر هالخبر ويوم درى انقهر مره ويوم درى انه بالوقت اللي كان بالمطار هي طلعت وراحت المستشفى جا معصب على الاخر ومولع منها..وكلام عادل يخلي الواحد ينقهر وينفعل ويولللع وغصبا عنه ينفعل....

اما عادل انقهر مره من راشد وكان يبي يتضارب مع راشد بس ابوه موجود ما يقدر يسويها.. اما لمياء دخلت غرفتها منهاره بعد ذا كله حتى عمها ما سلمت منه وما تدري عن راشد وعن دفاعها عنه وردت لها حالة البغضاء والقهر للعايله بكبرها وجتها حالة بكاء مستمر وما امداها تفرح بتحسن حالة ابوها وتندمت لو انها مخبره خالد كان جاب لها كل شئ وهي قاعده عند ابوها...

راشد دخل لابوها يحاول يهديه ويفهمه السالفه ويحاول معاه انها تقعد عند ابوها..وان ابوها ماله الا كم ساعه فاق من غيبوبته..وابو راشد رافض مره وحده ومستصعب السالفه..بس راشد وراه يحاول فيه ويبين له اخطاء عادل الكثيره..وما زالوا يتناقشون بهالمشكله...

ولمياء على نفس حالتها بكاء مستمر ممزوج بألم وقهر وظلم....وفراس عندها يصيح معاها وما يدري لمياء وش فيها بس اول مره يشوفها تبكي بهالشكل....

*********************

مشاري بحاله ثانيه غير عن الكل..فرحان بخطوبة اخته مريم وميت من الفرح وده يطير لانه نفس العريس اللي تمناه لاخته...

ونوره اخته مستانسه عشان بتفتك من حشرة مريم ولقافتها بكل شئ..اما امهم مسيكينه اول واحد يتزوج من عيالها وشايله هم مريم مره وكل ما تتذكر انها بتروح عنهم بمدينه ثانيه تصيح ولا يسكتها الا مشاري...

مشاري:مريوم تعالي بسرعه...

مريم بحيا:وش فيك...

مشاري:يا ناس على العرايس اقول هالحيا عند رجلك مو عندي انا اخوك...

مريم مبتسمه:......................

مشاري:لا والله مصدقه انك عروسه

مريم:هههههههههههههه

مشاري:اشوى يعني تقدرين تتكلمين احسبك على الصامت...

مريم:آمر تبي شئ...

مشاري:أي تعالي صورت لك القصر تعالي شوفيه وقولي لي وش رايك فيه...

مريم:يعني ملزمين يكون العرس كبير...

مشاري:اللي يسمعك يقول بنعزم العالم كلها..هم معارفنا وبس...

مريم:والله اني اشوف هالزواج ماله داعي خلاص رجال وبس...

نوره:نعم نعم ...مالك شغل انا بافرح بهالزواج وارقص لك وازغرد واسوي كل شئ...

مشاري:هي صادقه خلينا نفرح باول عروسه من عندنا...

مريم:بكيفكم...

مشاري:اصلا حتى مشعل يبي عرس كبير...

مريم:دام مشعل يبي اجل براحتكم سوو اللي تبون...

مشاري:اللحين انا اخوك وطول عمرنا مع بعض عطيتني طناش بقوه ومشعل ماله الا كم يوم صار يقر ب لك عطيتيه كامل الحرية في التصرف فيكِ...

مريم:انت تاج راسي وانت اللي تبيه سويه بس اصلا العرس على اهل العريس يعني اذا هم يبون يسوون...احنا مالنا دخل....

مشاري:أي والله انك صادقه..اجل عطينا رايك بالقصر...

اخذت نوره ومريم الجوال منه وصاروا يشوفون القصر..الصراحه جناااااااااااااااااااااان...مره حلو تنسيقه وجهة الحريم وجهة الرجال كان رااااااااائع بكل المقاييس...راقي لابعد الحدود...

جت ام مشاري وشافت القصر وكلهم عجبهم بس ما لزموا عليه لانهم يعرفون قيمة استئجاره انها غاليه وقالوا أي شئ من العريس نقبله....

اتصل مشاري على العريس واتفق على الموعد وقاله عن راي اهله بكل شئ..مشعل استانس على البساطه وعدم التكاليف وانه القرار لاهل العريس اولا واخيرا...واعجب مره باخلاقهم وحس انه اختار الناس الصح....

مشاري فقد جوري فقده مهيب صاحيه..كان يحب يقعد معها بين فتره وفتره..ويحب يسولف معها ويتناقش معها بامور كثيره ويشوف شلون رايها فيه..ويحب يعرف منها كيف البنات وصلوا..ولاي تفكير وصل تفكيرهم..ويحب يعرف شلون يتعامل مع شريحة البنات الجدد...واتصل على جوري عشان بيجيها...

مشاري:هلا والله بالقطوع...

غادة ردت على جوال جوري تشوف الاسم (مش مش) توقعت وحده من صديقتها....

غادة:نعم!!!

مشاري:جوري..

غادة:لا

مشاري:هذا مو رقم جوري..

غادة ببلاهه:لا الجوهره..

جوري سحبت من غادة الجوال..فضحتها وقالت اسمها...وردت على الجوال...

اما مشاري مات من الضحك وبالموت كلم جوري...

جوري:وين الناس؟

مشاري:بالدنيا وينك انتي؟

جوري:انا هنا..

مشاري:اخبارك؟وعلومك؟يالله افتحي لي انا عند الباب...

جوري:احلف عاد..

مشاري:وانتي يا حول ما تكذبين خبر..

جوري:اصلا لو تدري وش صار لي...

مشاري:وش بك تهاوشتي انتي وفيصل...

جوري:ليته كذا...

مشاري:اجل وش فيك..

جوري:يا وليه تراني جدتك اللحين...وطايحه على السرير...

مشاري:وش صار لك....

وحكت له جوري اللي صار بس بدون ذكر طاري لسلطان...مشاري مات من الضحك على جوري وخلاها تنقهر شوي وعلى طول راضاها واللحين بيجي عندها ويزورها....

***************************

خالد توه انسدح على السرير..خرج من عند الرجال وهو تعبان حيل ما نام الا ساعتيين قبل الفجر وراح بينام...بس قبل ما ينام اجتمع مع خواته عهود وخلود وقال لهم ان منصور ماهو متورط بشئ.. مروجيين المخدرات هم اللي دخلوا البيت والشرطه لاحقتهم وصار بينهم تبادل اطلاق نار وصابت منصور لانه توه موقف سيارته.. وما زال موجود عندهم عشان يتطمنون على صحته ويتاكدون انه مو من المروجيين...عهود وخلود تذكروا السالفه وصاحوا بس خالد كان شديد وما اعطاهم مجال انهم يصيحون....

خالد يوم درى ان حنان موجوده بالبيت حس بقلبه ينقبض ما يدري ليش وبيموت ويعرف وش سالفة حنان وليش استقالت وخاف انه ضايقها هو بزياراته او صار منه شئ ضايقها وما يدري وش فيها.. وصار مهتم بحنان يبي يعرف عنها أي شئ بس ما يدري يسأل مين....

تلحف زين وانقلب على جنبه اليمين ومسك جواله وبيحطه على الصامت الا دق جواله..وحس انه بالظلام مو شايف من الاسم وناظر زين والا فعلا

لؤي يتصل بك))

مسمي لمياء لؤي....

خالد:نعم

لمياء:خالد هي كلمتين ومني مكثره..ابشرك الوالد طلع من الطوارئ وهو بغرفة 210..

خالد عجز يستوعب الكلام الي قالته لمياء وبلا شعور قال:عيدي ما سمعت وش قلت...

لمياء تخرعت وش يبي ذا ما يسمع...وعادت له الكلام واستوعب خالد الكلام اللي تقوله لمياء ومن الفرح طار من عينه النوم..جاته الفرصه لحده انه يسمع كلمة قوية وشافيه ترضي ضميره..ويرتاح عقبها وكلم ابوه وقال له عندي مشوار وراح للمستشفى....

>>راشد اقنع ابوه بكلام العقل والمنطق ووافق ابو راشد على ان لمياء تزوره وماتت من الوناسه وبسرعه تولمت واخذت معها فراس وقومته من النوم لانه نام من الطفش...

وراحت لبيتهم واخذت ثياب ابوها وراحت على طول للمستشفى... اما عادل طلع برى البيت ومات من القهر وحس ان كل خططه المستقبليه بتفشل...

وفي الـــمــــســــــــتــــــــــــــــــشــــــ ـــــ ــــــــــــــــــفــــــــــــــــــــى

العم سعد:يا ولدي ليش تعبت نفسك

خالد:تعبك راحه يا عم..اهم شئ تكون راضي عننا..

العم سعد:يا ابن الحلال انا راضي عنك...

خالد:ابيك يا عم تقولها من قلبك..تقول راضي عنك وعن لؤي...

العم سعد:راضي عنك وعن لؤي..خدمتنا خدمه لا يمكن انساها وان شاء الله ربي يعوضك خير بهالقومه...

خالد ارتاح نفسيا وجسديا وكل شئ حس بروحه نشيط..وان بظروفه الصعبه هو واخوه جاي مكن يبشره ببشارة خير...ارتياح العم سعد اكبر شئ عند خالد...

خالد:ما سوينا الا الواجب...

العم سعد:وشلون شغلك؟

خالد:ابد مثل ما انا عليه ما تغير شئ....

العم سعد:الله يوفقك...

خالد:اللهم آمين..اي يا عم كثر من الدعاء لي ولؤي...

العم سعد:انا ما عمره مر عليّ واحد يعز صديقه هالكثر...

خالد:يا عم انا اعز لؤي واعز كل اهل لؤي....

العم:طيب يا وليدي وما تزعل مني....

خالد:ابد يا عم خذ راحتك....

العم:ليش ما تزوجت الى الان؟

خالد اخذ تنهيده خلا العم سعد يتندم انه طرح هالسؤال بس خالد بسرعه تكلم:والله يا عم اسباب تجمعت..اولا عقب الحادث كرهت نفسي وكرهت العيشه وكل شئ عفته..حتى اصدقاء عقب لؤي ما صادقت لاني ما لقيت ناس اخلاق مثل اخلاق لؤي..واللحين معي واحد من الشباب وبدأنا ندخل ببعض....

خالد ياخذ راحته مع العم سعد ويحب يحكي له عن كل شئ..وخصوصا بعد ما قاله اني راضي عنك انفتحت كل ابواب السعاده بوجه خالد وحس بروحه انها بتطير من هالسعاده اللي غمرته....

انفتح باب الغرفه ودخلت لمياء وفراس...

خالد نزل راسه ولمياء ما فتشت الغطا.....

فراس جا جري عند ابوه وصار يسلم عليه وهو ميت من الوناسه وعقبها رمى نفسه بحضن خالد... ويحكي لخالد كل اللي صار له ببيت عمه وعن الكاراتيه واللي تعلم فيها...فراس يموت بخالد ومعتبره اخوه..وخالد ما يقصر عليه بشئ...

جا خالد بيخرج من الغرفه بس العم سعد ما رضى لخالد وقال انت منتب غريب..اما خالد ولمياء كلن منحرج من اخر موقف صار بينهم...وسعد ما صدق جاته الفرصه لحده وتكلم....

سعد:يا عيالي انا ما صدقت ان ربي جمعني بكم وانا ما اظمن عمري....

لمياء:الشر بعيد عنك...

خالد:ما تشوف شر يا عم....

سعد:الشر ما يجيكم..بس الكلام اللي باقوله مهم لكم انتم الاثنيين...انا يا لمياء ما اظمن اني اعيش لبكره او يمكن اني اطيح ولا اصحى مره ثانيه..ويا خالد انت اكثر واحد اضمنه وأأمنه على اهلي....

خالد:آمرني يا عم....

العم سعد:ودي اذا الله وفق بينكم انكم تعرسون واشوفكم واطمن عليكم...

لمياء طاح وجهها بالارض واخر شئ توقعته ان ابوها يفتح معاها سالفه مثل كذا وقدام خالد يعني ما في مجال للمناقشه...

اما خالد استانس على الاخر وان العم سعد من نفسه فتح الموضوع..هو بيتزوج لمياء شفقه اكثر من انه رغبه بشخصيتها بس كان متخوف من اهله لانه ماهي من نفس طبقتهم..

خالد:الراي رايكم..

العم سعد:الراي رايكم انتو يالعرسان...

فراس:عم خالد يا ليت تتزوج لمياء ونعيش بيت الحالنا ويجي معانا ابوي....

لمياء:فروسي عيب تقول هالكلام...

العم سعد:ما وصلنا لنتيجه..فرحوني..بشروني قولوا أي شئ...

لحظة صمت صارت بالغرفه محد راضي يتكلم لا لمياء ولا خالد..ولا حتى العم سعد ما عنده أي تعليق يقوله بعد اللي قاله..حتى فروسي من سكوتهم سكت ولا تكلم....بعد فتره بسيطه..تكلم خالد وقال قراره الصارم وتحدى كل قوانيين عايلتهم وعوايدهم السخيفه وبهالقرار انفجرت كل براكين الفرحه بقلب العم سعد....

خالد:يشرفني يا عم سعد اني اكون نسيبكم واتمنى رضاك على طول العمر....

لمياء جتها لطمه قويه من قرار خالد وكلامه وما توقع انه ممكن يوافق وهالطبقيه بينهم وكم مره تحاول انها ممكن في يوم يتقدم لها خالد لكن اذا تذكرت عوايد وطبايع اهل خالد تراجعت عن كل فكره حطتها براسها..وعقب الحادث اللي صار لها مع اهلها محت خالد من ذاكرتها ومحت كل صورة طيبه عنه بس هي ما تقدر تخرب فرحة ابوها اللي ما صدقت تشوفه مبتسم وفرحان من هالقرار....وقالت....

لمياء:الشور شوركم وما ابي من ابوي الا رضاه عليّ وسعادة ابوي فوق كل شئ وفوق كل قرار...

انقهر خالد من كلامها وحس ان ما عندها استعداد تتزوجه وهي عشان ابوها وافقت واللي قهره اكثر ان عمره ما صدر منه شئ يضايقها او أي شئ يزعلها..وهو تعدى كل الخطوط الحمراء ووافق وهو يعرف اهله ومعارضته ويمكن يتركونه ويقطعونه لو وافق على هالزواج..وفوق هذا كله ترد بنفس ضايقه وتقول اهم شئ سعادة ابوي....

استسمح خالد من العم سعد ووعده انه يزوره بكره وخلا لمياء الحالها مع ابوها عشان تاخذ راحته معاه وما كان يبي يطول عشان ما يصير أي موقف محرج ثاني....

خرج خالد وراح معه فراس الى الباب وصاروا يسولفون وطولوا عند الباب وكان خالد متعمد يسوي هالحركه عشان تجي لمياء وفعلا جت لمياء....

لمياء:وش فيكم عجبتكم سواليف الباب؟

خالد مارد على سؤالها وفاجئها بسؤاله:انتي موافقه على هالزواج والا بس قدام ابوكِ...

لمياء بكل صرامه تقول:فروسي ادخل دخل....

فراس:مالي دخل ابقعد عندكم....

لمياء:لا تزعلني منك..ادخل بسرعه.....

ودخل فراس داخل وسكتت لمياء وخالد ينتظر منها جواب بس ما في أي تجاوب....

خالد:انتي موافقه والا بس عشان ابوكِ

لمياء:سعادة ابوي فوق كل شئ....

خالد:والمراد؟

لمياء:ابــــد

خالد:ما فهمت؟

لمياء:ولا راح تفهم...

خالد:صار شئ وتضايقتي مني..

لمياء:يعني جاي تلعب دور البريء اللحين...

خالد انهبل من لميا ومن كلامها وبيعرف وش اللي صاير:شلون ما فهمت؟

لمياء:الله يسهل لك دربك..روح لا يجي عادل ويسوي لنا سالفه ثانيه...

خالد انقهر من الاسلوب اللي تتكلم فيه لمياء وقال:مو الاول اعرف وش قرارك....

لمياء:انت طول الفتره الماضيه ما شفنا منك الا كل خير...

خالد:طيب وايش الاشكال عندك

لمياء:انت تضحك على روحك والا تضحك عليّ..لاتفكر ان سنه كامله تمحي كل شئ وتخليني غبيه ومغفله ...انت باختصار قاتل امي واخوي لؤي..فهمني شلون اقبل العيشه مع قاتل سفاح ولا بعد قاتل اهلي.....

**********************************

الجزء التاسع عشر

خالد انحرقت كل اعصابه من لمياء ما توقعها تكون بهالصورة وبهالحقد..كل مشاعره تجاهها تبدلت وولع وانقهر وعصب ما يدري شلون بلحظه انقلب كل شئ ضدها..خالد استرجع الحادث ومر من قدامه بكل حذافيره وزاد قهر وحقد من لمياء....

خالد رفع ايده بيضرب لمياء وتمالك روحه ومسك اعصابه ونزل ايده...

لمياء تتكلم بسخرية:الظاهر رجعت لك الالام والذكرى الحزينه..عموما هذا ماضيك وما تتهرب منه وين ما رحت وانت اللي سويته بروحك وتحمل جزا فعلتك...

دارت ظهرها لمياء بتمشي وردت تقول:واذا انت نسيت الماضي انا محفور بقلبي وما نسيته..

خالد اشتعلت نيران القهر والغضب بصدره ووده يكفخ لمياء بس ما هو متهور وكل اللي قاله (وطبعه بارد يتكلم بثقل يقهر اللي قدامه غصبا عنه)...

خالد:انا كنت ما ابي اقول هالشئ بس انتي اللي بتخليني اقولك هالشئ...

لمياء بسخريه:وشو الي كاتمه؟؟ اعترف وريح ضميرك وقول انك انت القاتل بلا واسطات.. عشان ترتاح عند رب العالمين....

خالد احترق زياده وقال:انا كاتمه عشان خويي ورفيق دربي لؤي..لؤي هو اللي قتل امك وقتل روحه وهو اللي كان يسوق وقال لي:ابي اخوف هالاسره شوف شلون الاب يتخرع..وانا اللي منعته بس ما طاعني..كنت امنعه من الشئ الخطير اللي بيسويه..بس سوى اللي سواه وسبحان الله طلع باهله..وانا كل الوقت ابي من ابوك يسامح اخوك لؤي موب انا وما كنت ابيّن عشان صديقي لا ينفضح بس اني انا اللي اصير قاتل بعيده عني... وماترمين اتهامات وما تدرين عن شئ..وروحي اسألي ابوك تأكدي منه وتعالي كلميني بس يا ليت بأسلوب أرقى لأني ما تعودت على الهمجيه....

ومشى عنها خالد ...خالد ما استوعب اللي قاله بس من القهر فضى اللي بقلبه واللي يصير يصير...اما لمياء انهارت كل قواها وسكرت الباب وصارت تصيح ولا قدرت تتكلم....

خالد راح عن الغرفه وحلف انه ما يرجع لها وحس ان وقته ضاع على شئ تافه ما يستاهل.. بس لما يتذكر صديقه تهون السالفه شوي عليه... لما يتذكر ابو صديقه( العم سعد) وكيف كان متحمل لعبهم وطيشهم.. تهون السالفه اكثر...

دخلت لمياء على ابوها واول ما شافته سكتت ودعت ربها انه ماسمع أي شئ..

العم سعد:ليش يا بنتي تخربين كل شئ انا ما صدقت انه وافق واطمنت عليك....

لمياء بتردد وتظن ابوه ما سمع شئ:اذا يبيني بيجي واذا ما يبيني بكيفه....

اصواتهم كانت عاليه شوي بس ما انتبهوا وكانوا اثنيناتهم مرتبكين ومقهورين من بعض ومنفعليين اكثر بالسالفه...

العم سعد:بعد الكلام اللي قلتيه تبيه يرجع لك..ليش تظلمينه؟؟

لمياء بكت زياده وعرفت ان ابوها سمع كل شئ وخافت انه تتدهور حالته:ابوي ما حصل شئ...

العم سعد نزلت دمعه منه:استعجلتي يا بنتي..استعجلتي..كل اللي قاله خالدصح..ما كذب بشئ.. خالد رجال تمنيته لك.. ما تمنيته يبعد عننا..ليش يا بنتي؟؟

لمياء:ما كنت ادري عن السالفه..الله يسامحك يبه..هذا اللي واضح قدامي وهذا اللي فهمته..

العم سعد:وشو اللي فهمتيه؟؟من اللي قالك...انا قلت لك شئ..احد قالك انه هو خالد...

لمياء زادت بكاء وحست انها انسانه حقوده وظالمه:لا بس اهتمامه الزايد ما فسرته الا انه ما ارتاح ضميره وخرج بواسطه...

العم سعد:وتحكمين على الناس من دون لا تتأكدين..يا بنتي خالد الوحيد بين اصدقاء لؤي اللي سأل عننا.. واهتم فينا وحاول اني اسامح لؤي وكل يوم والثاني يبيني اسامح لؤي..لين رضيت عن لؤي والا اللي سواه اخوك ما ينغفر له بس عسى رب العالمين يرحمه..

لمياء صارت تبكي وحست نفسها انها صغيره بنظر الكل..اللحين سنه كامله ما فسرت ولا شئ يسويه خالد الا مصلحه وانه لازم يتعاقب...شهامته واهتمامه باسرة كامله وباسرة صديقه اللي مات وموت اهله معه ...اهتم اشد الاهتمام وحس روحه هو المسؤل عنهم...كل اللي فسرته يطلع خطأ واطلع ظالمته بجميع المقاييس.سنه كامله وانا اعتبره انسان هامشي تافه يسوي روحه المنقذ الاول لان وراه سند وظهر قدر يخرج منها وبالنهاية تظلع ظنون غبيه وتافهه...آآآآآآآآخ ياربي..

انهارت لمياء وانقهرت من نفسها ما تدري هي تعتذر والا ما تلوم سواة ولد عمها واتهاماته فيها عشانها ظالمه..كل اللي سوته انها تبكي.....

العم سعد ما عرف شلون يكلم لمياء وعشانه تعبان سكت عنها وتمنى لو خالد يجي بس لو يشكره على كل اللي سواه ويعتذر له من لمياء بس ما عرف ان خالد حلف انه ما يرجع مره ثانيه اذا هذي جزاة المعروف....

*******************************

البنات كلهم بالصاله عند جوري..مسيكينه ما تقدر تطلع الدور الثاني وصارت متفشله مره لان العيال يجون الصاله وهي مثل العجايز تلبس الجلال وتمد رجلها ولا تقدر تثنيها والبنات طايحيين طنازه فيها واكثرهم غادة....

جوري:اقول يا عمري خلود تعالي عندي وابعديني من هالسوستيين وفكيني منهم..

خلود:ابشري كم عندي بنت عم..وحده وبادلعها...

عهود:عاد الروخانسيات واجتمعوا...

غادة:بلا روخانسيات تراهم اكبر نصابات...

خلود جت عند جوري وقعدت جمبها وحطت يدها ورى جوري:معليكي منهم يا جوري بنات متوحشات...ههههههههههه

جوري:ههههههههههههههههههه

غادة:عشتوا...والله وطلعتي مصيبه يا خلود...

خلود:اقول تلايطوا انتو الثنتيين..دلعوها يوم واحد حتى الانوثه ما تقدرون تتحملونها يوم...

عهود:من سمع تلايطوا قال الانوثه كلها عندك....

غادة:انا عن نفسي ما اقدر اتحمل الانوثه ساعه شلون يوم....

وصاروا يضحكون على خبالهم وهواشهم وهدى جو البيت..اول كانوا كلهم مكتئبين من حالة منصور وولا كان لجو المرح مجال بهالبيت....

جوري:اقول بنات وين ليلى بس حنان اللي قعدت يا حبيلها...

خلود:تعرفين انها مجتهده مره وما قدرت تقعد تبي تذاكر للاختبارات....

جوري:والله مستحيه مره من حنان..احرجتني والله....

خلود:لا والله حنان عسل وما تحط ببالها شئ وودها تخدم القريب قبل البعيد...

فجأة قاموا غادة وعهود من عندهم..ملوا من سوالف جوري وخلود وراحوا يدورن لهم أي شئ يتسلون فيه...

خلود:والله يهالبنتيين ما ينعرف لهم كل شوي ذالفين بمكان..

جوري:يالله اهم شئ يستانسون..

خلود:على قولتك..اي وين وصلنا..وصلنا عند حنان...

جوري:يا حبي لها..دخلت قلبي....

خلود:انا من زمان داخله قلبي....

جوري:علينا

خلود انهبلت وتحسب ان احد درى بسالفة سلمان معها..بس اذا اختها عهود ما تدري شلون جوري...

جوري(با بتسامة مكر) :وين رحنا؟؟؟

خلود:ابد ما ابعدنا....

جوري كانت متردده ومستحيه بس اهم شئ السوستيين غاده وعهود راحوا عنهم تقدر تتكلم براحه مع خلود...

جوري:خلود...

خلود راح بالها مع سلمان وآخر هديه جاب لها:هـــــا!!!

جوري:من قال هــا سمع

خلود:ههههه...وش عندك يا ام الامثال؟

جوري يبان بوجهها اذا كانت منحرجه بس ما تقدر لازم تسأل عن منصور:وش اخبار منصور؟

خلود:يا عمري عليه اللى الان بغيبوبه والتحقيق ماشي..

جوري:وما عرفوا شئ ولا توصلوا لاي نتيجه...

خلود:لا والله بس اللي دخلوا بيتنا مسكوا منه ثلاثه والى الان يحققوا معاهم....

جوري:طيب وحالته الصحيه؟

خلود:خالد يقول انه احسن من اول وان حالته تحسنت اكثر من اول....

جوري:الله يقومه بالسلامه ويرجع لكم...

خلود:اللهم آمين...بس اللي قاهرني انه الى الان ما سمحوا بالزياره لنا....

جوري:طيب لازم يثبتون برائته...

خلود:طيب بس نبي نشوفه يعني بني نخطفه...

جوري:ما في قانون الا له سبب او شئ صار عشان كذا منعوا الزياره...

خلود:على قولك واحنا وش عرفنا وين الخير له....

جوري:الله يقومه بالسلامه.....

خلود صارت تلعب بشعر جوري وتحكيها عن المدرسه وعن المعجبات وانها شلون تطنشهم...وجوري ساكته تبي خلود تتكلم لانها من يوم ما جت بس تسولف مع ليلى بنت خالتها ..واستانست جوري على ارتياح خلود لها....ودخلت جو معها بالسوالف....

>>جا مشاري وقعد مع العيال يسولف معاهم وطلب ام جوري وصار يسولف معها..... ام جوري شافت غاده وعهود يوم يروحون وتظن ان خلود معهم وخلته يدخل الصاله....

جوري كانت معطيه الباب ظهرها وخلود معها ويوم دخل مشاري ما انتبهت لصوته وهو يسولف مع ام جوري الين راحت المطبخ ووصل عند جوري والتفتوا جوري وخلود على مشاري وكل واحد منهم انهبل ما يدري وش السالفه....

جوري عجزت تستوعب السالفه هي خلود تغطي عن مشاري والا لا...وخلود يوم صار قريب منهم انهبلت وما تدري وش تسوي ما معاها ولا شئ الجلال قدامها بس من الخرعه فقدت أي تصرف.. اما مشاري انهبل على خلود وخق عندها اول مره يطيح بوحده وينهبل عندها وما عرف شلون يتصرف....

جوري كل اللي سوته صرخت...مشاري نزل راسه واستحى مره من نفسه وخرج برى البيت وخلود طلعت تركض فوق وهي شوي وتصيح وانقهرت من نفسها...وكل واحد يظن ان الثاني يحسبه ما يستحي وميتيين من الاحراج...

اما جوري ماتت من الضحك على سواتها وعلى الموقف اللي صار ونادت مشاري...ومشاري جا وهو منزل راسه الين جا عند جوري وتأكد ان ما فيه أي احد.......

جوري:يا عيني على اللي يستحون....

مشاري:وش اخبار العجيّز...

جوري تناظره بمكر وتضحك:اشوف بدا تصريف السالفه(وتضحك بصوت عالي)

مشاري:فضحتينا الله ياخذ ابليسك...

جوري:ههههههههههههههههههههه...صراحه ما ناقص الا جوال اصورك...

مشاري:جوري قفلي السالفه وتعذري لي منها والله ما كنت اقصد(ونزل راسه)

جوري:يووو يا قلبي والله

مشاري:جوري وبعدين معك..خلاص لا تذكريني...

جوري تسوي نفسها ماهي فاهمه:ليش؟؟؟

مشاري :جوري وبعدين معك ترى والله ضغطت على رجلك خليتك تتوبين وما تتكلمين..تكفين تعذري لي

يتبع ,,,

👇

تعديل المقال