بارت

رواية أشكي للي بين ضلوعي -18


رواية أشكي للي بين ضلوعي -29



رواية أشكي للي بين ضلوعي -18

عادل مسك يد عيوش وعوجها لها بطريقة مؤلمة مره:اذا اتكلمت انا تسكتيين وتقولين تامر أمر....

عيوش وهي تتألم:منب قايله الا لأمي وابوي.......
عيوش كانت عنيده وما تحب السلطة خصوصا من عادل اللي يبي يفرض رأيه على الجميع...
عادل ضغط على ايدها بقوه وقال:غصبا عنك وعن اللي جابك تسمعين كلامك.....
عيوش وعيونها تدمع:اترك يدي....اتركها....
عادل:باتركها بس لا تصيحيين علينا..
عيوش راحت غرفتها وهي تبكي انقهرت مرررررره من عادل...والام وآمنه ما علقوا ولا تعليق خلاص تعودوا على اسلوب عادل معهم...
عيوش:وقح ما يستحي على وجهه... ويقول عنك وعن اللي جابك..ما كأنها أمي قدامه...الله ياخذه ونفتك منه.......
ابو راشد وتوه داخل البيت:وش فيها اصواتكم.......
ام راشد:ابد تعرف لعب العيال.....
ابو راشد:الله يصلحهم......
عادل:بغيت اكلمك بموضوع يبه...
ابو راشد:تكلم مافي شئ خاص بينا....
قامت آمنه تسوي القهوه لهم.......
عادل بكل ثقه:ابي اتزوج.......
ابو راشد بإبتسامه:يالله صباح خير....
راشد ساكت ما يحب يتدخل بمواضيع عادل بسبب الحساسية اللي بينهم....
ام راشد:ما شاء الله بتسبق اخوك وبتتزوج.....
عادل:والله ولدكم ما يبي يتزوج بس انا ابي ومستعجل.....
ابو راشد:ما شاء الله شكلك مخطط لكل شئ......
عادل:تقريبا....
ام راشد:ومنهي قلنا عشان نخطبها لك.....
عادل:اهم شئ انتو موافقيين.......
راشد وهو مستغرب مررررررره من قرار عادل اللي عمره ما فكر بالزواج...
ابو راشد:ايه موافقيين....بس منهي؟؟؟
عادل:لمياء بنت عمي....
ابو راشد سكت وما قدر يعلق وام راشد بعد...سكتوا من الصدمه.....عادل اللي اكثر واحد يكرهها هو يبغاها...آمنه كانت بالمطبخ وشهقت وسمعوها اللي بالصالة....آمنه عارفه وش نواياه وعارفه وش يخطط له....وخايفه من تجرأه وعدم خوفه من ربه....
اما راشد كان له تصرف ثاني مع عادل......
راشد باستهزاء:من اللي تبي...ما سمعت......
عادل يسوي نفسه عادي:لمياء بنت عمي...قلت شئ غلط.....
راشد:لمياء اللي هي لمياء ما غيرها تبيها....
عادل بدى يعصب:ايه لمياء...وبعدين انا اكلم ابوي وامي لا تتدخل انت.....
ابو راشد:بس يا عادل....هذا اخوك الكبير.....
عادل:المهم انا ابيها وابي استر عليها...هي يتيمه ومالها احد غيرنا...
ابو راشد:والله لي فتره وأنا افكر بهالموضوع وشايل همها....
عادل:وعشان كذا باصير المحرم لها بهالبيت....
راشد:وهي أكيد ما تبي منك هالمحرمية......
عادل:البنات مالهم رأي....
راشد:من قال؟؟
عادل:عادل قال......
راشد:يخسى عادل وأمثاله....
عادل وهو يصرخ:راشد لا تتدخل وخليك ساكت ازين لك...انا اتكلم مع ابوي وانت تسكت....
راشد:منب ساكت لو تموت....البنت لازم ينأخذ رأيها...مو عشانها يتيمه خلاص تسكتون عن حقوقها....
عادل:يتيمه والا مي يتيمه البنت ما ينأخذ رأيها والشور عند ولي امرها.....ها ابوي....
ابو راشد:لا بعد كملوا هواش...ما تستحون على وجيهكم لا تحترمون ابوكم ولا امكم.....
عادل:ولدك هو اللي تلقف...انا باستر عليها وبافكك من همها واصونها وهو يقول كلامه ماله معنى....
راشد:انا ما قلت شئ غلط قلت خوذوا رأي البنت...
عادل:عمرنا ما اخذنا راي البنت...ولي الامر هو اللي يحدد وهو اللي يعرف مصلحة البنت....
راشد:وانت تظن انك مؤهل للزواج....
عادل:وانت مالك الا الكلام واللقافه...لو فيك خير كان سترت عليها وخطبتها....
ابو راشد:عادل يقول الصح...البنت لازم تتزوج ويصير لها محرم بهالبيت...
راشد:اذا ما تبونها ودوها لبيت خوالها...كلهم قالوا يبونها...ولا تضايقكم ويخرب مستقبلها....
عادل:ولد عمها اولى بها من الغريب...وهو الاحرص عليها واذا انت ساكت انا باتكلم....
ابو راشد:وش تبي الناس تقول عننا اذا ودينها لخوالها...يقولون متضايقيين منها.....
راشد:خوالها مثل عمانها...وبالعكس في بيت خالها ما عنده أي مانع انه ياخذها هو اللي قالك يوم العزا وكل شوي يدق عليك يأكد عليك انه يبيها عنده وان ما فيها شئ.....واللحين مر وقت وهي عندكم عادي لو راحت عند خوالها.........
ابو راشد بين ناريين....راشد ولده الكبير العاقل اللي يوزن اموره وكلامه مقنع...وكلام عادل اللي يحس انه اقرب له..........
عادل خاف يخرب راشد كل شئ وقال:البنت لولد عمها وانا ابيها منك....اتركونا من سالفة السكن لانها بتتزوج ها ابوي موافق.......
ابو راشد:خلها بعدين....
راشد:وخافوا الله في بنت العم...وتراه امانة عندكم وشاورها هذي مهي بنتكم عشان تفرضون عليها كل شئ......
عادل:اذيتنا امانه وامانه اذا خايف عليها تزوجها ولا تقعد تنصحنا......
ابو راشد:أي والله يا راشد كانك خايف عليها تزوجها......وخلاص انا موافق على هالزواج.........
ويسمعون صرخه قوية من غرفة لمياء واغمى عليها...وودوها للمستشفى..........
******************************

ام رغد:يا لولوة انتي وش دراك بهالسالفة.....
لولوة:شفتي عهود بنت عم الجوهرة...صديقتها نوف اختها معاي اللي هي امجاد اللي دايم اسولف لك عنها.....
ام رغد:وش قالت بالضبط......
لولوة:قالت ان منصور يبي بنت عمك وهي ساكته ما ردت قالت بعد ثالث...وتقول ان عهود تقول شكلها مهي موافقه لانها تأخرت بالرد...بس منصور مره يبيها.....
ام رغد:وصارت خطبة رسمية والا لا....
لولوة:والله مدري...بس الظاهر انها قالت اول ما تخلص اختبارات بتصير الخطبه لانهم بيخلون الزواج باخر الصيف.....
ام رغد:الله يعين.....
لولوة:ليش تسالين؟؟؟؟؟
ام رغد:غريبة ليش خالتي ما تقولنا شئ حتى امي ما تدري بالسالفه.......
لولوة:طيب ما صار شئ رسمي شلون تبينهم يقولون كل شئ........
ام رغد:يعني اذا صديقتها تعرف حنا اولى اننا نعرف.......
لولوة:الا قصدك سلطان يبي يعرف....تحسبيني غشيمة ما افهم...
ام رغد:والله انك داهيه...طلعتي حيه من تحت التبن........
لولوة:ههههههههههه....عشان تعرفون اني موب شئ يستهان به.......
ام رغد:المهم أي اخبار قولي لي......
لولوة:هو مره يحبها......
ام رغد:اقصري صوتك لا احد يسمعنا.....
لولوة:محد فيه.......
ام رغد:ايه يعزها..........
سلطان دق الباب:ام رغد....
ام رغد:هلا........
سلطان:تعالي ابيك شوي.........
لولوة:روحي للعاشق الولهان...مالت علينا......
ام رغد:استحي يا بنت.......
لولوة:والله...على العيال عادي والبنات لا........
ام رغد قامت من عند لولوة وراحت لسلطان....ولولوة من يوم ما خلصت اختبارات وهي ببالها تبي جمعه للأربعاء الجاي باحد الحدايق عشان يشوفون مباراة الهلال لانها حمست كل البنات لانها تقولهم المبارة وجمعة بنات احلى شئئئئئئئئئئ...حتى البنات اللي ما يتابعون مباراه تحمسوا ودهم لو يشوفون هالشلة وهي معهم فص فص وبيبسي وبطاطسات...يبون يخربووووووونها على الاخر...
سلطان:ها وش صار؟؟
ام رغد:والله ياخوي شكل البنت اليوم خطبتها.....
سلطان وفقد آخر خيوط الأمل:لا تقولين........
ام رغد:الولد خاطبها من العام وهي اهلها قالوا صعبه ثالث خلوها بعد الاختبارات وشكل الولد مستعجل يبي يخطبها وبيكون الزواج باخر الصيف........
سلطان:لاحول ولا قوة الا بالله....يعني ما في امل.......
ام رغد:ان ربي كاتبها لك بتكون لك حتى لو بعدين........
سلطان:خلاص البنت مخطوبه....اصلا انا الغبي اللي مسوي فيها فاهم بالاصول....اكيد هي ماخذه مني موقف...تحسب اني ما ابيها مثل ما رفضها محمد....انا كنت ابيها تقولي ايه موافقه مو مواقف والا ضغوط من الاهل تجبرها انها توافق......
ام رغد:يا سلطان اذا على الموقف انا اصلحها واقولها...
سلطان:وش تقولين لها...تقولين لها انه كان يبيك... ويبيك تقولين الموافقه من طيب خاطر وهي اللحين مخطوبه....صعبه والله صعبه....
ام رغد:هي صعبه بس لازم نلقى حل...........
سلطان:مافي أي حل...البنت اكيد كرهتني بسبب غبائي......
ام رغد:بس لازم نبين لها انك ما تقصد انك ما تبيها........
سلطان:خلاص دام البنت انخطبت خلاص مافي أي مجال اننا نرجعها للماضي.......
ام رغد:طيب وش رايك لو نجيبها بطريقة ملتويه......
سلطان:شلوووون؟؟؟
ام رغد:يعني مثلا نقول ان الولد ما كان عنده وظيفه وما يبي يربطها...من هالكلام...
سلطان:برضو صعبه...البنت مخطوبه واي شئ يمكن يأثر بخطوبتها.....
سكتوا ام رغد وسلطان وهم يفكرون وش يقولون لها لو اعتذار...اي شئ يبين انها غاليه ومهي رخيصه.....
لولو سمعت كل شئ وراحت تبي تكلم بنت خالتها جوري اللي تعزها من بين بنات خالاتها وبنات عمها....
لولو:الو.....
فيصل اللي كان نازل من غرفته وسمع صوت التلفون بالصالة ورد:نعم...
لولو:السلام عليكم........
فيصل:هلا والله وعليكم السلام...لولو....
لولو باحراج:ايه....
فيصل:وش اخبارك؟؟؟
لولو:بخير.....
فيصل يحس ان لولو بعدها صغيره ويعاملها كانها اخته الصغيرة:وينك من زمان عنك؟؟؟ها بشري راسبه...
لولو:ههههه لا اعوذ بالله....ان شاء الله ناجحه بس مدري كم النسبه....
فيصل:ياي يالنسبه اولى ثانوي انتي صح....
لولو:صح....
فيصل:اجل لاتهتميين بالنسبه اهم شئ ناجحه....
لولو:يالله الحمدلله.....
فيصل:اكيد تبغين الدوبه...اصبري اناديها....
لولو:ايه ابي جوري.....
فيصل:ثواني.........
لولو يعجبها فيصل مره لانه ينكت ويفرفش ويعجبها الولد المهبل اللي بس ينكت ولا بعد عشانه يشجع الهلال...حاسه انه احسن ولد...بس تفكيرها ما زال طفولي وما زالت تعتبره مثل اخوها....
فيصل:الجوهره...ارفعي السماعه.....
جوري:طيب....
الجوهره:هلا والله.....
لولو:هلا بك...وش اخبارك يالدوبه؟؟؟؟
الجوهره:بخير...علومك انتي يالقطوع؟؟؟؟
لولو:ازقح...عال العال...
الجوهره:ها بشري ناجحه........
لولو:الحمدلله بس ما شفت النسبه وحده قالت لي اني ناجحه....وانتي؟؟؟
الجوهره:لا تذكريني انا اشوفها من النت.........
لولو:الله يعينكم............
الجوهره:وش رايك تجين عندنا اليوم........
لولو:مدري والله على حسب الشايب اللي عندي لان محمد يبي يسافر ومافيه الا سلطان....
الجوهره حست بقلبها يقبض يوم سمعت اسمه:لو ابوك ما عنده أي مانع ارسل لك السواق...
لولو:هاهاااااي....الا السواق......
الجوهره:معاه الشغاله زوجته محرم........
لولو:والله لو عائلته الكريمه معاه...الا السواق........
الجوهره:اجل الله يعينك حاولي فيه ان شاء الله يرضى....
لولو:هو لو اقوله جوري تقول كان على طول يجيبني...بس انا مسوية شديدة وما استغل المواقف الحساسة......
جوري انصدمت من كلام لولو اللي ما يدل الا على شئ واحد وهو سلطان يحبها وما زال والا وش تقصد بكلامها....
لولو:جوري اذا عندك احد صرفيه ابي اقولك سالفه.......
جوري:لا ما عندي احد....
لولو:صراحه وعلى بلاطه السالفة ان: اخوي سلطان يحبك ويموت فيك...وكان ما يبي يتقدم لك الا اذا صارت معه وظيفه وخاف انه يعلقكي ...وغير كذا فصخ الخطوبه عشانك
سلطان رفع السماعه وصدم بلولو وقال بهواش:لولو سكري الخط....
لولو:مني مسكره وباعلمها وش السالفه.....
سلطان:لولو سكري السماعه.....
لولو:فصخ الخطوبه عشان يبيك توافقين انتي مو عشان المشكله اللي بين ابوي وابوك......وكان بيجيكي هالسنه بس ما صار نصيب..
سلطان:.........................
جوري:.............................................
لولو:وهو موب عارف كيف يعتذر...وانا اقولك انك انتي غاليه علينا وما فرطنا فيك.....
جوري:مشكوريين يا عيال الخاله...والله انكم انتو اللي رايتكم بيضاء.....
وسكرت الخط.....
جا سلطان عند لولو وهو معصب على الاخر.........
سلطان:افتحي باب الغرفه.......
لولو:مني فاتحه اكيد بتضربني..........
سلطان:ليش سويتي كذا يا لولو......
لولو:سويته عشانك...انت تحسب ان الجوهرة عادي عندها السالفة...تخطبها وبعدين تفك الخطوبه بعد كم سنه....
سلطان:طيب افتحي الباب....
لولو:ما تسوي لي شئ.......
سلطان:مني مسوي لك شئ.........
لولو:طيب وفتحت الباب............
سلطان دخل ومهوب مستوعب اللي يصير.........
لولو:والله سويته عشانك...جوري ما تتكلم ولا تشتكي ولو تموت ما تقول ليش سويتوا كذا... لا تحسبني صغيره وما افهم...يعني اثنيين من عيال خالتها ولا واحد فيهم يبيها وش بيكون موقفها... وانت بعد اشد كأنك تبي تنتقم من عمي اللي ازعج ابوها...خليتها كم سنه وعقب فكيت الخطوبه ولا قلت لها شئ ولا اعتذرت لها ولا قلت ابي الاقي وظيفه ولا شئ...انا لو مكانها كان قطعت علاقتي فيكم كلكم لانها اهانه كبيره...
سلطان:معقوله جوري ماخذه هالفكره عني....
لولو:جوري ما تتكلم بس السالفه واضحه وبتزعل هي والا غيرها وش ما كانت شخصيتها وش بك انت ما تحس تراها بنت وانجرحت مرتيين......
سلطان:بس لو جبناها بطريق ثانيه ازين.....
لولو:الى متى؟؟؟خلاص البنت بتاخذ واحد يموت فيها ويبيها مررررررره.....
سلطان:ليش وش دراك انه يبيها مره؟؟؟
لولو:الاخبار توصلني وولد عمها شاريها ويبيها.....
سلطان ما قدر يتحمل...وخرج من عندها....الجوهره اللي تمناها له تروح لغيره ولا اكيد كارهته...كلام لولو قطع ذرة الامل اللي كانت باقيه فيه وخلته يتحطم على الاخر....يعني مو بس انها ما راح تصير له...لا بعد آخذه منه موقف سئ مررررررره...
واللي قاهره مره انه كان يبيها بعد سنه....بعد سنه يبيبها تقول:أي موافقه هذا ولد خالتي اللي ابيه... كان يبي يجيها وهو خاتم القرآن ومتخرج ومتوظف بس النصيب ما صارت له.......
خرج برى البيت وراح لاي مكان اهم شئ يبعد عنه هالشعور الغريب اللي جا على قلبه يوم درى عن سالفة الجوهره..............
>>جوري....جوري اتحطمت نفسيتها مره....سلطان يبيها...ايه يبيها ويحبها.....سلطان ما تغير...سلطان هو القديم هو الجديد...مافي شئ تغير...حبها له واحساسها كان صادق.... حب الطفولة اللي بينهم باقي وما راح وكبر معهم....كانت ما تدري ليش ماهي راضيه تقتنع بكلام غاده... تحسه غير...حاول تعرف السبب بس مهي قادره......
جوري رجعت تتذكر كلام لولو: صراحه اخوي سلطان يحبك ويموت فيك...وكان ما يبي يتقدم لك الا اذا صارت معه وظيفه وخاف انه يعلقكي وغير كذا فصخ الخطوبه عشانك... فصخ الخطوبه عشان يبيك توافقين انتي مو عشان المشكله اللي بين ابوي وابوك...... وهو موب عارف كيف يعتذر...وانا اقولك انك انتي غاليه علينا وما فرطنا فيك.....
جوري صارت تبكي....ياربي شلون اتخلص من هالكابوس...اقل لمنصور ما ابيك.....شلون وش السبب... سلطان اللي مهوب راضي يروح عن بالها.....سلطان تحبه باللي فيه..قبل لا يتلزم وبعد ما التزم...وحتى يوم فصخ الخطوبه كانت تظن انه من ابوها ومره تقول انه من سلطان ما تدري ليش تحس ان السالفه فيها شئ....وخلاص لولو أكدت لها ان احساسها عن سلطان صادق وما تغير....
بس وش تقول لابوها....تقوله ما ابي منصور عشاني احب سلطان وابيه.......
سلطان يبيني اقول موافقه...يبيني انتهي بس من ثالث ويخطبني....ايه اكيد كذا قصده ما يبيني عشان يغطي غلطة اخوه....آآآه ياربي...وش اسوي........سلطان يبي يجي وهو كامل ويخطبني رسمي مثل أي خطوبه...آآآآآآآآه ياربي.......
جوري راحت بدوامة بكاء عن مصيرها اللي ما تدري وين...........
من منصور اللي بدت تقتنع فيه بس موب مره وانه هو شاريها والا من سلطان اللي يحبها بجنون وتبادله نفس الحب......................
>>بغرفة عهود وخلود...كانت عهود مع الحريم بالصالة وخلود سكرت باب الغرفة وراحت تكلم ليلى....
خلود:ايه ليلوه وش صار بعد؟؟؟؟؟
ليلى:وش صار...قولي وش ما صار...خلاص الاسبوع الجاي واحنا عندكم يا مرة اخوي....
خلود ووجهها احمر:ياربي لاتحرجيني........
ليلى:لا احراج ولا شئ.....بس فاااااااااتك البيت............
خلود:حمستيني مره كل شوي تقوليين البيت والبيت........
ليلى:والله يا ليت تقدريين تشوفينه....صراحه كوووووووووووول ناقصه العروسه بس.....
خلود:كيف الالوان؟؟؟؟
ليلى:غريب البيت تحسينه قرابيع....قطعه من هنا ومن هناك على كيفك......
خلود:وااااااااااو....ياربي....نفس الاثاث اللي احبه....
ليلى:ما شفتي ولا شئ...صراحه طلع ذوق سلمان يجنن.......
خلود:الله يسعده هالسلمان الي خابلني......
ليلى:عيب لا تقولينها اللحين........
خلود:ليش متى اقولها...ياربي حاسه اني باطير.......
ليلى:شوي شوي.....تراكي انهبلتي مثله...اركدوا عيب عليكم......
خلود:واااااااااااو لا تلومينا...ما جربتي الحب.....
ليلى:ولا راح اجربه مجنونه انا تبيني اصير مثلكم.........
خلود:الجنون اذا صار كذا ابيه........
ليلى:طيب ما رديتي علي عادي لو خطبناكي وعهود محد جاها......
خلود:عادي...قد جا قبل كذا لي بس نقولهم مخطوبه......
ليلى:اوكي باخبر الخبل اللي عندي...والله اخر موضه معاريس خبلان.....
خلود:سلمي لي عليه......
ليلى:ابشري واقوله تراها انهبلت مثلك...........
خلود:مع السلامه..............

محمد اقنع امه انه يرجع نهى وتفاهم معها وراضاها ولو انها ما تقتنع مره بس محمد ولدها اللي ما تقدر ترده اذا كان هو مقتنع مره........
فتح الباب محمد لنهى وقال:نورتي بيتك.....
نهى:منور باهله.......
محمد دخلها البيت وقعدها بالصالة....نهى تحس انها رجعت عروس مهيب قادره ترفع راسها وتناظر محمد.........
محمد:اللحين اقعد بالبيت...اللحين نستانس اللحين ترجع لنا الايام الحلوه.....
نهى:الله يسعدك...........
محمد:ياااااااااااااااااااي...ياربي يسعدلي هالوجه....يالله ما نبي نضيع أي فرصه بناخذ اغراضنا ونسافر قبل لا يروح علينا موعد الطيارة........
دخلت نهى غرفة النوم ولقتها متغيره فوق تحت....مغيرها وهم بيسافرون استغربت نهى مره وما درت ان محمد ناوي يخليها تقعد عنده........
محمد:ان شاء الله عجبتكي الغرفه..........
نهى:ليش كلفت على روحك واحنا مسافريين...........
محمد:وبعد السفر؟؟؟؟؟؟؟؟؟
نهى انصدمت مره وتعلق لسانها ما تدري وش تقول:شلون؟؟؟؟؟
محمد:اجلسي اول.....
جلست نهى واعصابها مشدوده على الاخر............
محمد:يا عمري عرفت حالتك بالضبط....وسألتهم كلهم....والكل أيدنا اننا نعيش مع بعض وعادي ما في أي خطر بيننا.....
نهى:بس.......
محمد:انا حريص على العلاقه الي بيننا...وانا كلمت كل الدكاتره اللي رحتي لهم والمشايخ....وقالوا ان الوضع عادي...بس الجنيين هو اللي ما نقدر نخليه يعيش بيننا الا اذا مع السنوات تغيرت احوالنا(ويتعمد يقول بصيغة الجمع عشان ما يجرحها)..نقدر نجيب عيال.....بس احنا عشان ما يصير شئ نندم عليه...تستمريين على الحبوب او تشيليين الرحم مره وحده....هذا اخر حل....
نهى باحراج:يعني اكيد......
محمد:اكيد الأكيد...وكلمت اخوانك وكلموا ابوكِ وقال اللي يريحهم يسوونه.....
نهى سكتت ما قدرت تعلق على أي شئ خلاص سوى كل شئ وانتهى لصالحها...ما تدري شلون تشكره....شلون تعبر له عن حبها له عن امتنانها عن اللي سواه.......
محمد:ما يحتاج تقولين أي شئ...ابتسامتك هذي تكفيني .....
وحضنها بحب وحنان خلاها تحس ان مافي احد بهالدنيا غيره.....
وسافروا لابها......
ابو فيصل طلب من الحريم انهم يسوون قهوه للرجال ويطلعونها لهم بالمجلس الخارجي..... وطلب من كل العيال انهم يجوون............
ابو خالد طلب من ابو فيصل هالطلب يبي يفاتحه بموضوع الخطبه عشان يريح ضميره.....
ابو فيصل كان متوقع من ابو خالد هالطلب....وخالد وفيصل جايين ومهم داريين وش السالفه....
فيصل يقهوى الرجال....وابو خالد ينتظر من منصور يفتح السالفه بس منصور مهوب راضي يتكلم... وحس باحراج ابو خالد وفضل انه يبدا بالموضوع.........
فيصل وخالد حاسيين بتوتر الموضوع بس ما بيدهم شئ وفضلوا السكوت.....
ابو خالد:انت تعرف يابو فيصل انا خطبنا بنتنا لولدنا منصور...واللحين خلصت البنت ونبي الرد ولا تستحون منا ما بيننا شئ....
ابو فيصل:واحنا ما عندنا ازين من منصور...رجال وما عليه كلام.....
فيصل:الله يا عريس...يا كشخه....
منصور حس انه بينخنق من هالسالفه ما ابي اظلم بنت الناس وشكلها ما تبيني ويرجع له الموقف اللي صار بينهم...وتعامل سلطان.....يبيها انا وش دخلني....
منصور:بس يا عم لو تسمح لي...سنه كامله مرت ولا رديتوا علينا...هل البنت مي موافقه ومستحيين منا(وهو يتمنى ان عمه يقول ايه)
ابو فيصل انقبض قلبه وش يقصد منصور:افهم من كلامك انك منت معزم على هالزواج....
ابو خالد:وشو مهو معزم....الا معزم بس هو يسأل عن السنه الكامله اللي مرت من دون رد....
ابو فيصل:قلنا عقب السنه نكلمكم....
ابو خالد:وانت صادق ياخوي وانت تعرف الشباب هاليوميين عجوليين ويبون كل شئ بسرعه.....
ارتاح ابو فيصل وقال:الله يصلحهم.....
منصور اللي خربها لان نفسه ضاق مره:بس انا ما ابي الزواج اللحين.....
ابو فيصل:شلون يعني؟؟؟
ابو خالد:انت اللي ازعجتنا تبي الزواج بسرعه وش غيّر رايك....
منصور:اللي غيرني الحادث...نفسيا مني مرتاح لاي شئ...
فيصل عصب مره:يعني بالعربي ما تبي الجوهره....
منصور:ما قلت كذا..الجوهره وابوها واخوها على العين والراس....بس نفسيا ما اقدر ماني متهيأ...موب قادر ارجع منصور الأولي.....
فيصل:هالكلام ما عندنا...تخطبها ونرد الناس اللي جاينها وبالنهاية تقول ما ابي نفسيتي تعبانه... اختي مهيب لعبه عندكم انت وغيرها كل واحد يمسكها فتره ويتركها...تراها بنت واللي عليك صعب عليها اصعب واصعب....
خالد:يا فيصل صل على النبي......
ابو فيصل من الصدمه سكت ما قدر يتكلم هذا ثالث موقف يصير له...ومن اقرب الناس له من قرايبه.....
ابو خالد:ابو فيصل منصور تعبان هالفتره وازمه وتعدي......
منصور:وش دراكم انها بتعدي...انا ما ابي اظلمها ما ابي عاداتنا تكون حجاب عن سعادتها... لو انا سكت بس عشانك يا عمي وعشانها بنت عمي ما ارح اسعدها...لاني والله يا عمي اني تعبان ومقامك انت وبنتك فوق الراس.....
ابو فيصل:وصلنا العلم....يكفي........
فيصل:لا حول ولا قوة الا بالله.......
ابو خالد:سامحنا يا ابو فيصل والله اننا نبي السعاده لبنتك...وما كنا نبي الموقف يصير وببيتكم بعد... بس الشكوى لله....
فيصل:العتب مو عليك يا عم والا انت رايتك بيضا.......
منصور:يعني اغشكم عادي...اقول ايه ابيها وانا الى الان ما قدرت ارجع لدوامي...عمي ابيك تسامحني...والله ودي ارضيك باي شئ.....

>>البنات حسوا باصوات الرجال لان اصواتهم صارت عاليه مره واول مره يصير هالشئ.... عمرهم ما سمعوا هالازعاج وواضح ان النقاش حاااااااااد مره.......
عهود:الله يستر وش فيه عند الرجال؟؟؟؟؟
خلود:مدري....نطلع نشوفهم...........
ام خالد:خبله انتي تطلعين عندهم والله يذبحونك...........
ام فيصل جت الصاله:تسمعون اللي اسمعه...........
ام خالد:ايه الله يستر..........
ام فيصل:انا قلبي حاس ان فيه شئ من يوم ما اجتمعوا بالمجلس ومايبون احد عندهم.....
جوري:بناااااااات تعالوا فوق.......
عهود:تعالي انتي تحت وشوفي وش فيه........
جوري على نياتها بتوريهم مقاطع بلوتوث جديده ولا هي حاسه بشئ لانها تبي تسلي نفسها من اللي فيها واخترشت مره يوم شافت التوتر عليهم كلهم.....
جوري وهي جايه ركض:وش فيه؟؟؟؟؟
جوري:وش ذي الاصوات؟؟؟؟؟؟؟
عهود:شكلها من الرجال.......
خلود اللي راحت بعالم ثاني وتخيلت سلمان وهو جاي يخطب:يمكن نقاش عادي تدرون الرجال لا تحمسوا بموضوع..........
جوري:لا مستحيل ابوي وعمي عمرهم ما رفعوا اصواتهم.......
عهود:الله يستر........
جوري قبضها قلبها وخافت ان السالفه تكون عليها وجلست بالصاله تنتظر معهم وش اللي صاير بالمجلس..........
<<بالمجلس..............
منصور:اتمنى يا عمي تكون فهمتني والله اني مني مهيأ للزواج وهذا خالد عندكم اسأله شلون كنت وكيف اللحين صرت.....
ابو فيصل وهو شايل بقلبه هم هالبنت:حصل خير.......
ابو خالد اللي حاس ان وجهه ضاع من سواة منصور:الله يصلحك ما خربك الا هالعلم اللي طايح فيه....
خالد:تقبل بي يا عم اكون زوج لبنتك....واوعدك اني احفظها بعيوني.......
الكل بدت على وجههم علامات الاستغراب...واخر ما توقعوه ان خالد يتكلم لانه من تكلم منصور وهو ساكت ولا نطق بشئ...... منصور اللي وده يقول لخالد:لا لا تتهور...لا لا تتخذ قرار ما تدري عنه...
لا تاخذها من باب الشفقه......
خالد ما يحمل لجوري أي مشااااااااااااااعر....بس حفاظا على كرامة عمه ويبي يكون ر اس ابوه مرفوع دوم الدوم...........
فيصل:لا اختي مهيب لعبه ومتنقله بينكم......
ابو فيصل:استهدي بالله يا فيصل.......
خالد:انا عند وعدي......
ابو خالد يحس ان خالد رفع راسه مره :الله يرفع مقامك يا خالد...............
منصور سكت ولا رد عليهم وشايل هم هالزواج اللي مدري شلون بيكون.........
فيصل معصصصصصصصب مره ولا يبي يتناقش بالموضوع لانه يمكن يقول كلام يفرق بين العائلتيين.......
ابو فيصل:وانا ما راح الاقي ازين من عيال اخوي...تمنيتها تكون لواحد منكم......
خالد:الله يجزاك خير....بس لو تشاورنها افضل.......
فيصل:اكيد بنشاورها...........
هدى الجو...وتصافت النفوس ولو ان الزعل باقي......بس يضلون عائلة متفاهمه.......
والبنات ما زالوا ينتظرون وش بهم الرجال..........
سكتوا ولا اتكلموا.....والحريم ماقدروا يسألونهم وتفرقوا برى البيت كلن راح لمكان.....
وجوري حاسه ان فيه موضوع كبير والا الان ما تدري وش اللي بيجيها......

الجزء الخامس والعشرون



اتقلبت على سريرها بس النوم موب راضي يجيها بسبب اليومين اللي شبعت نوم فيها لانها كانت ما تبي تقابل احد...وعقب سالفة الرجال اللي تخوف ولا احد طرى عليها شئ.....
جوري عايشه بصراع نفسي قوي....تحس ان سلطان تغلغل داخلها بالقوه...من اول وهي مجنونه بحبه...حتى يوم تركها تتذكر غادة يوم قالت لها سبب فك الخطوبة..حتى يوم فك الخطوبة وهي تحس انه مرجلة منه وصدق..يبيها خطوبة مثل خلق الله...احبت شهامته وانه محترمها ومقدرها.... وانقهرت من منصور لانه صار عائق بينها وبين سلطان....ولما تأخر سلطان او على الاصح فترة وجود عمها عندهم وتعب منصور...حزنت عليه بالمرة وصارت تفكر بالموافقة وكانت تبي تقولها لامها...بس ما لقت أي فرصه تقولها لها.......بس هالفترة مشاعرها هي اللي تكلمت مو عقلها وتفكيرها.....لان مشاعرها وقلبها وتفكيرها ما يبون الا سلطان......
رجعت ذاكرتها لورى يوم كانت ظالمة ابوها وتوقعت انه هو اللي رد سلطان ما يبيه لانه يتوقعه انه يكون مثل عمه..اللي ما يعرف بالدين غير اللحية...مربيها على الفاضي لا اخلاق ولا علم شرعي....وبسببه ابوها كره كل الملتزميين....
معقوله ابوي يكون تفكيره محدود....هذا شيخ المسجد اللي ابوي ما يمل اذا جاب طاريه وبس يمدحه... لا اكيد السالفه فيها سر....ابوي ما قال عن سلطان شئ موب زين...
اكيد يعرف ان موب كل من ربى لحيته يعتبر الملتزم الصدقي....
جوري كرهت عم سلطان بكل ما فيه...ليش يشوه السمعة الطيبة اللي نعرفها عن الملتزميين... اكيد ناس كرهوا عالم الملتزميين بسببه..... وين اخلاق الملتزم وين علمه؟؟ ووين روحه المرحه اللي الكل يعرفها بهالمطاوعه......وعرفت ان سلطان هو اللي فك هاخطوبة موب ابوها اللي رفضه... وعرفت ان قلبها مجنون بحب سلطان لدرجة انها كانت فتره تكره ابوها بسبب هالسلطان....
والسؤال اللي حيرها...ليش انا ما كرهته عقب ما دريت بالسالفه...صحيح كان يقصد انه يحافظ على كرامتي...بس كان يقدر يطلبني رسمي من دون فك الخطوبة....هو تركني وقالت لي غاده واستوعبت السالفه وصدقت كل شئ ليش ما كرهته...وليش ما فرحت بخطوبة منصور...هالكثر احب سلطان وحبه عماني عنه....
.جوري حاولت تكون طبيعيه عقب اللي سمعته من لولوة بس عجزت..سلطان هو هو ما تغير وانا انا ما تغيرت ولا شئ تغير فينا...حبنا هو نفسه ما تغير...حاولنا نكون طبيعيين وما في شئ بيننا بس ما فيه أي امل...وانفضحنا على طول....صرنا نحبب نفسنا بالاشياء اللي نحبه...
تذكرت البيبسي اللي كان سلطان ما يحبه لانه يسبب السمنه بس يوم عرف اني اموت بالبيبسي صار مدمن هو بعد بيبسي.....
وتذكرت يوم عرفت انه يحب الفص فص اللي كانت ما تداني ريحته...صارت هي بعد تحبه.....
اشياء كثيره جت ببالها وكلها من سلطان...فيه احتكاك بينهم كبير الين تغطوا...وحتى وهي متغطيه كانت مقهوره وبالبداية كانت تكلمه بس كبرت وعقلت وابعدت عنه بس القلوب متقاربه لدرجه كبيره.....
تذكرت المكالمه....صوته وكلام لولوه قلب كل تفكيرها....غيّر آرائها وخلاها تعشق سلطان اكثر من قبل....واحد يقدرها ويحترمها ويبي رآيها ما يبي الزواج بسبب ضغوطات....آآآآآآه يا سلطان وينك عني.......لا ويبي يعتذر بس موب قادر.....آآآآآآآآه يا قلبي والله اني احبه....
بس وش تسوي...شلون تقولهم ما ابي منصور.....فكرت انها تكلم غادة وهي تكلم عهود...هذا آخر حل عندها...تقول انهم الاثنيين ما يبون بعض وما يصير أي خلاف بالعائلة....
بس اخاف منصور يزعل وما يرضى يسوي هالاتفاق ويقول هي ما تبيني.......جوري حست بضيق كبير وقامت من فراشها وراحت قدام المرايه تعدل نفسها.........
وحست انها ضايعه بهالتفكير ومشوووووووشه على الاخر...سلطان موب راضي يخرج من قلبها... حتى تعاطفها مع منصور ومعرفتها انه يعزها ويقدرها بس ما غيّر أي شئ تجاه سلطان....بالرغم انهم بعدوا عن بعض من تغطت عنه ولا حصل بينهم أي شئ بس يكفيها انها تعرف اخباره وهو بعد يعرف اخبارها ويسوون روحهم ما يدرون عن بعض وهم ما يصدقون تجي اخر السنه عشان يوصلون المباركة بالنجاح.......
دخل عليها فيصل ولا انتبهت له.....بس موب فيصل اخوها واحد ثاااااااااني.......
فيصل:قلنا السلام عليكم......
جوري دارت وجهها على ورى وببرود قالت:هلا والله وعليكم السلام.......
فيصل:وش اخبارك؟؟؟؟
جوري:تمام...شلونك انت؟؟
فيصل:بخير....(متردد حيل بالسالفه يبدى بها والا يتركها تستانس)....
جوري(بابتسامه مصتنعه):آمرني بغيت شئ......
فيصل:والله اشياء كثيره باقولك اياها.......
جوري باهتمام:تفضل...قول وش عندك؟؟؟؟..........
فيصل:اول شئ نتيجتك مطنشتها ليش؟؟؟ما سألتي عنها ولا بشرتينا بشئ.....
جوري:أي والله مطنشه.... افتح النت ولا افتح نتيجتي....ما أدري ما ودي اشوف شئ.....
فيصل:افا هذي الطموحه اللي كانت معروفه بنجاحها...وين كلامك عن نتيجتك انها بتسعدنا كلنا.....
جوري:يا شيخ الطموح يوميين ويروح........
فيصل:لا يا الجوهره تراك متغيره مرررررره ولا يأثر عليك هالتحطيم اللي عايشته......
جوري:عادي كلنا بنموت ومحد باقي بهالدنيا........
فيصل:الله يستر منك...تجيكي حالات الواحد يخاف منها.........
جوري:ههههههههه....اذا تبيني اريحك اللحين افتح النت معاك........
فيصل اللي كان وده يشوف الروح العاليه بوجه جوري:يالله بسرعه.....
جوري كانت الصفحه الرئيسية للنت هي المنتدى اللي تفتحه....ونست لا تسوي تسجيل خروج فتحت النت واول ما فتح جتها رسالتيين من المجروح.......جوهره انصدمت مره وحست بروحها بتطلع من الخوف.........
فيصل:انتي مشتركه بمنتديات....
جوري بخوف ورجفه:ايه.....
فيصل:وش رساله خاصه افتحيها...........
جوري من الصدمه انشل لسانها ولا عرفت شلون تفهم اخوها ولا شئ......خافت ان أي تصرف يفقدها الثقه بينهم وفتحت الرساله الاولى..........

الرساله الاولى::::::
(الصراحه من كتاباتك جزمت انك صاحبة فكر عالي ولكي مستقبل لبنات جيلنا وتمنيت لو تكون علاقتنا خارج محيط المنتدى وتكبر ونصلح افكار اللي حوالينا عشان نتقدم....عموما انا مستعجل اللحين عندي اختبار بارسل لك رساله ثانيه....اعذريني العاده ارسل لك تصميم بس هالمره مستعجل.....
المجروح)

جوري ارتجفت وماتت من الخوف....شلون تفهم اخوها....الرساله ما فيها أي امل انها بريئة....صارت مثل الصغير اللي ما يتكلم وهو موب مذنب ولا يعرف شلون يبرر المشكله اللي طاح فيها.........ومادرت ان الجاي اكبر واكبر.......
فيصل:افتحي الثانيه......
جوري بدون أي التفات لفيصل فتحت الرساله الثانيه.......وتحس انها بيغمى عليها بس ما في أي مفر فتحت الرساله وهي تتمنى يكون فيها توضيح ان ما بينهم أي شئ......

:::الرساله الثانيه:::
(هذي هي الرساله الثانيه بس كنت مصدوم منك....عقب الماسنجر والمحادثه لاني قريتها....
و يا قلبي مسحت رقم جوالك لكن حطي ببالك اني ما راح انساكي طول عمري واتمنى ان فكرك يتغير للأفضل وتصيرين عايشه مثل العالم والناس لكن تبقى صداقتنا للأبد محفوظة وإن حبيتي نجددها أنا موجود بكل الأوقات.........
المجروح: (وحط رقم جواله)

جوري كان ودها تموت بهاللحظه....يصير بالبيت زلزال...يصير أي شئ...ولا تنحط بهالموقف المحرج.....
جوري حاسه وجهها صغير قدام اخوها اللي اكيد بيفقد الثقه اللي كانت بجوري..... شلون افهمه وحتى لو فهتمه وش يضمني انه صدقني........
جوري نزلت راسها وسكتت....ولا قدرت تتكلم....ولا قدرت تناظر فيه...........
فيصل عاد قرى الرسالتيين وناظر بجوري.......
فيصل يحاول يتجاهل الموضوع:افتحي نتيجتك اللحين.........
جوري كأنها عبد مأمور وفتحت تتيجتها واللي كانت نسبتها 96% بس مالها أي طعم ولا قدرت تبتسم كأنها راسبه مو بس ناجحه ومتفوقه...........
سكرت النت جوري وقررت انها تتكلم مهما كانت الظروف...حتى لو فيصل ما يعرف بالمنتديات بافهمه واخليه يشوف كل الرسايل بس المشكله انها مسحت كل الرسايل حتى اللي بجوالها حذفتها.........
جوري:ترى....
قاطعها فيصل بسرعه: مبروك على النجاح..........
وقام بسرعه من عندها............................حس انه مخنوق ولا هو قادر يتكلم كان بيهاوش ويصرخ ويضربها بس قام بسرعه لانه ما يتحكم بغضبه وحتى المباركه ما يدري شلون قالها....خرج من عندها وهو متغير مرررررره وكره اخته مرررررررره......
جوري حست انها مخنوقه لازم تعلمه والله مايصير وفيصل متهور ممكن يسوي أي شئ.... لحقته على غرفته وقالت له:فيصل ممكن انا اتكلم............
فيصل حس انه مخدوع يبي يجي ويدافع عنها عن اهم قضيه بحياتها...سالفة زواجها..... يبي يسندا وما يسمح لاي كان يتدخل بهالزواج مهما كانت الظروف بس يتفاجأ باخته تخونه ولا هي مهتمه مو بس سمعتها..سمعة اهلها واخوانها.......وعائلتها كلها............وما يبي يفقد اعصابه
فيصل:اللحين ما ابي اشوفك.......
جوري قربت من عنده:اوكي لا تشوفني بس لازم تعرف وش السالفة..........
فيصل ما تحمل وقام لاخته وعطاها كف فرغ فيه كل شحن الغضب:وش تبين تفهميني.... خلاص الرساله قالت كل شئ.........ما يحتاج ما ابي أي تبرير.......
وابعد عنها وعطاها ظهره وهو متوتر وحاس انه بيتهور ويقتلها.......
جوري منصدمة ولا هي عارفه شلون تبدأ تبرر له الموضوع ومن صدمة الكف سكتت ولا قدرت تتكلم..........
فيصل:انا مسوي فيها اني اخوك الكبير واتهاوش مع الرجال عشان...خايف على مشاعرك...وانتي..... آآخ منك....ما اهتميتي لا للسمعه ولا للناس ولا خفتي من رب العالميين.... انتي ما عندك حيا..الثقه اللي عطيناكي اياها ما تعرفين تصونينها وتحافظيين عليها.......
فيصل متوتر على الاخر وكل شوي يفرك ايدينه ويضرب بيده على الجدار لانه مقهوووووور مره ورفع صوته:انتو البنات المفروض الواحد ما يربيكم الا على الحجر وما نخليكم تروحون وتجون.... ولا نعطيكم ولا شئ لانكم مهبل متخلفيين ما في وحده منكم تعرف تحافظ على شرف اهلها وسمعتها... تصدقون هالداشريين الضايعيين............
وما اتحمل جا عندها ودفها بقوه على الارض بكل خشونه وقال:جوال نت تلفون انسيها....وملكتك من خالد قريب........
وبسخريه يتكلم وقتل فيها كل مشاعرها:تراكي صايره لعبه ومتنقل بين العيال وتستاهليين اللي جاكي انا من اول راحمكي بس اللحين قلعتك محد يستاهلك وزين ان منصور خلاكي لانه طموح وانتي ما تستحقينه وخالد خطبكي بس عشان ما يفشل ابوه.....مافي نقاش متى ما حدد خالد الزواج وافقنا......
فيصل:انقلعي عن وجهي ما ابي اشوفك................
الجوهره سكتت وتركت كل مشاعرها متناثره بالغرفه...وفقدت اهم عنصر بحياتها اخوها اللي كانت تظن انه هو بيحل لها اكبر مشكله بحياتها....وبكل بساطه طلعت من الغرفه....طلعت انسانه ثانيه....نشف دموعها اللي كانت تنزل... وتغير وجهها صارت مثل جدار قديم محد يناظر فيه ولا تغير هو......
جوري صارت انسانه ثانيه....هي من منصور تغيرت وصارت كارهه اشياء كثيره....شلون تفقد ثقه وهي اهم شئ بحياة أي بنت...وتصير لعبة وسلعه رخيصه محد يبيها.....وآخرتها كل طموحاتها وآمالها ومستقبلها يضيع وتطيح برجال ما يبي الا انه ما يفشل ابوه......
الجوهره ما تعرف تتصرف بهالمواقف لانه اول موقف يصير ها ولا عمره احد مد ايده عليها..... اللحين مهيب غلطانه وتنمد ايدها عليها ويجيها كلام يسم البدن ويقتله.......
دخلت غرفتها وقعدت على سريرها تبي تفهم كلمه من اللي قالها فيصل.......صرت انا سلعه مهيب مرغوبة الكل ما يبيني وبالنهاية ياخذني واحد شفقة....وش فيه فيصل قلب عليّ.... ما ادري يمكن ما هو فيصل....وانا موب الجوهره..........
سكتت ورجعت للواقع المر اللي هي فيه....انا وين الاقيها من فيصل اللي ما فهم ولا شئ ولا من خالد اللي ما عرف الا اسمه............
حضنت مخدتها وانهارت من البكاء......تفرغ كل اللي فيها بالبكاء.....شلون ارجع ثقتي باخوي... ليش ما صدقني وعلى طول صدق الرساله..........
اسودت الدنيا بعين جوري وقفلت كل ابواب الأمل والسعاده...نست شئ اسمه سعادة ورفضت تقابل أي احد خلال يوميين.......
جوري انحرق كل لحظة سعاده بحياتها وحست انها بتنهار بيصير لها أي شئ ولا اللي يصير لها هالشئ.....
فيصل اللي يندم بلحظه على كل شئ وباقي الوقت يحس انه سوى الصحيح وتستاهل اللي تخون اهلها....... فيصل اللي قاهره انه عمره ما شك فيها ابد.....انقهر شلون يضحك على بنات الناس وتربيتهم وبالنهاية يلاقي اخته من هالناس........
فيصل ما توقع انها تكون ردة فعله كذا....بس الا الشرف والسمعه محد يسكت عنها...
*************************************

راشد:ها عايشه شلونها؟؟؟
عيوش:والله حالتها ما تسر والممرضه مدري وش تخربط ما فهمتها.....
آمنه:الله يستر هي من اول عندها فقر دم وصارت ما تاكل........
راشد:طيب روحي يا آمنه اسألي الممرضه....
آمنه:ما اعرف انقليزي.....
راشد:طيب اروح الحين واسألها.......
راح راشد يسأل الممرضه عن حالة لمياء اللي طاحت عليهم فجأة......
عيوش:كله من ابوي وعادل حسبي الله عليهم.....
آمنه:لا تدعين عليهم....حرام عليك.....
عيوش:حرام عليّ والا عليهم.....ما تشوفين وش يسوون فيها عشان محد عندها.....
آمنه:بس فضيحتينا عند الناس......
عيوش:بادخل عندها........
آمنه:وانا معك.........
ورجعوا للغرفه دخلوها وكان منظر بنت عمهم ما تسر ابد....تعبانه حيل وباينه بوجهها صاير لون وجهها اصفر باهت وانه ما في أي دم......وابر المغذي عليها........
كانت لمياء تعبانه مره بسبب عدم التغذيه لان جسمها ما يتحمل......
عيوش:يا حرام والله ما سوت شئ.....يا ويلهم من الله.....
آمنه:بس اذيتينا...كلمي ابوي وعادل وقولي لهم هالكلام موب تصرخين بوجهي.....
عيوش:والله انتي الكبيره المفروض انك انتي اللي تتكلمين.......
آمنه:اخوي وابوي واعرفهم اذا احد تدخل فيهم......
عيوش:ايه خلينا ساكتيين لين تجي المصايب لينا واحنا ما نقدر نتكلم......
آمنه:يالله بس خلينا نطلع نشوف وش سوى راشد؟؟؟؟
وطلعوا برى ولقوا راشد ينتظرهم....
راشد:ها بشروا شلونها؟؟؟؟
آمنه:تونا شايفينها وقلنا لك....إنت اللي بشر وش قالت لك الممرضه؟؟؟
راشد:والله تقول حالتها ما تسر ابد....وحالتها بتتدهور لانها تعبانه من فتره ولا جبناها.....
عيوش:طيب شلون الزيارات وش نسوي لها يعني؟؟؟؟
راشد:الدكتور يقول ادعوا لها....وكل يوم تجون تزورونها........
راحوا البيت الثلاثه وهم خايفيين يصير لها شئ وهي ببيتهم...لانهم خايفيين يصير القصور منهم... ام راشد ما قدرت تترك البيت وهي فيها طيبة بس عليها تصرفات تقهر......اما عادل وابوه ما فكروا فيها ولا سألوا عنها وتظاهروا ان عندهم شغل........اما فراس ما يدري الى الان عن شئ.......
راشد شاف فراس بالصالة وهو في حالة ذهول.........
راشد:ها فراس وشخبارك؟؟؟
فراس:بخير.....
قعد راشد وصار يناظر فراس....وحس انه مقصر بحقه...شلون ما اهتم فيه هو يتيم....وماله
ولي امر ولا احد حريص عليه....وهو بمرحله خطرة...بيقبل على مرحلة المراهقه ويمكن ينحرف ويروح مع هالشلل الفاسده.....
فراس:راشد....
راشد:هلا حبيبي....
فراس:ابيك تصير ابوي......
راشد:.............................
فراس:طلعت الأول وقالي الاستاذ وين ابوك؟؟وقلت له ما عندي ابو...وابيك تصير ابوي عشان اذا سألني الاستاذ باقوله انك انت ابوي.......


يتبع ,,,
👇
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -