رواية فارس احلامي -3


رواية فارس أحلامي - غرام


رواية فارس احلامي -3

ساره: مااسمح لك ترى

مشاعل: ههه طيب
وصاروا يدوروا من 7ونص لما الساعه 8وربع بالعليا عند الفيصليه عند المملكه بالثلاثين
بالتحليه وانواع المواكب والاستهبال
لحد مااتصل احمد وساره خلاص انجنت
مشاعل: ردي يله خلينا نخلص
ساره: ميشو خايفه مره
مشاعل: خايفه ليه انا المفروض الي اخاف انا الي بقابله
ساره: اوكي اسكتي برد
ردت ساره على موبايلها
ساره: الو
احمد: هلا قلبي ,,, وينك الحين
ساره: انا الحين بالثلاثين تجي
احمد: اوكي تعرفي لازرتيج
ساره: ايه
احمد: اوكي انزلي انتي وصاحبتك ولما اوصل بدق عليك تطلعي علشان اشوفك وانت تمشي
ابي املي عيوني منك
ساره: اوكي قلبي بس مقدر اكلمك وانا بالسياره اخاف السواق يحس
احمد : انشالله حبيبتي
ساره: اوكي لما توصل دق باي
احمد:باي
ساره: ميشو يقول انزلوا (لازرتيج) ولما اوصل بدق عليك تطلعي من هناك
مشاعل: اوكي يوسف روح لازرتيج
سويف : ابشري
ووصلوا هناك ونزلوا وتوهقوا لان الي هناك نشبوا لهم على بالهم بيشتروا لما جاء الفرج
ودق احمد على ساره
ساره: هلا وصلت
احمد: ايه حبيبتي انا برا اطلعي
ساره: اوكي
ساره : ميشو يله برا هو
مشاعل: اخيرا نفتك من هالنشبات الا تشتروا
وطلعت ساره قبل وعيونها على سياره احمد الكاين وشافته وانجنت عليه وابتسم لها وبعدها
طلعت مشاعل ولحظتها عين احمد ما نزلت عنها كانت عيونه كلها اعجاب لدرجه انه ماحس
بوجود ساره
ساره لحظتها حست بالقهر وابد ماتوقعت انها بتتضايق لهدرجه انا قدامه ومافكر حتى
يطالعني
ركبوا السياره
مشاعل: خويك هذا ماشاف خير والله كنت بطيح من كثر مايطالع انحرجت
ساره بضيق: ايه لاحظت
مشاعل: سارونه انتي زعلانه
ساره: لاعادي ليش اتضايق انا عارفه من اول مارقمنا انه يبيك
مشاعل: وربي مايستاهلك
ساره: يمكن انا الي مااستاهله
مشاعل: سارونه لاتكبري الموضوع ترى كله واحد لاراح ولاجا طنشيه وياكثر الي يتمنوك
ساره: على قولتك شكلي ماراح ارد عليه
مشاعل: يكون احسن
وصاروا يدوروا من شارع لشارع واحمد اتصل على ساره يمكن 70 مره وهي ماترد
مشاعل: تعبت من الدوران راسي صار يدور,, سارونه شرايك ناخذ لفه بالتحليه ونرجع
للبيت
ساره: يله انا ودي بعد اخذ لي كم رقم قبل الاختبارات لان امي اكيد ماراح تخليني اطلع
وبعدها انتي عارفه الصيفيه يعني بسافر ودي اتعرف على احد قبل اسافر علشان اشوفه برا
مشاعل: مشينا
تذكرت مشاعل ان حسين مادق عليها لايكون بس مع سلمان لان سلمان دق عليها كثير
وماردت خافت تدق على حسين ويكون سلمان جنبه ويقول ليش مارديتي علي
مشاعل في نفسها" يالله خليني ادق على سلمان واشوف اذا حسين جنبه"
مشاعل: هلا سلومي
سلمان: هلا وينك اتصلت عليك 1000000 مره حسين كان يبي رقمك
مشاعل: طيب كان عطيته بعدين هو يعرف رقمي
سلمان: مو شريحته احترقت وانحذفت كل الارقام وقلت بسالك اول قبل اعطيه الرقم
مشاعل: شكرا ياقلبي خلاص انا بدق عليه
سلمان: خلاص حبيبتي وكلميني اول ماتقفلي منه
مشاعل: باي (مشاعل ماتحب احد يامرها اذا بتكلم بتكلم بكيفها مو هو الي يقول لها )
دقت مشاعل على حسين
حسين: الو
مشاعل: هلا بالاف بي اي
حسين: وينك انتي ذبحتيني لي ساعه اترجى سلمان يعطيني رقمك مو راضي والله مربيته
صح يخاف منك
مشاعل: هذا مو خوف هذا حب ياغبي
حسين : ايه طيب المهم ماتبين علوم عن خوينا راعي الفراري؟؟؟
مشاعل: احلف بالله عرفت شي
حسين: هههه جبت لك قراره افا عليك بس
مشاعل: قول بسرعه
حسين: لا سلم واستلم عطيني رقم اي وحده مو خوياتك واعطيك المعلومات
مشاعل: لا والله البنت تبي تفكر وتقرر وبعدين انا مابي اعرفك على اي وحده ابي اختار لك
وحده تستاهلك
حسين: اجل اكيد بتعرفيني على جنيه لانك تكرهيني ,,, المهم بلا حركات نص كم اشم ريحه
خيانه في صوتك اخلصي بس عطيني الرقم
مشاعل: ماراح اعطيك شي لحد مااستاذن من البنت
حسين: اوكي اذا خويتك قررت علميني علشان اعطيك المعلومات
مشاعل: حسينوه بتعطيني والا شلون... انا وعدتك
حسين: نو وي مستحيل اذا جبتي الرقم تاخذي المعلومات وتذكري ان المعلومات قيمه
مشاعل: اوكي شكرا مابي شي خل المعلومات لك تامر شي انا بقفل
حسين: لاتسوي نفسك زعلانه ,,, انا مو سلمان... عطيني رقم اي وحده يله
مشاعل: طيب لحظه
مشاعل تحاول تقنع ساره انها تعطي حسين رقمها وساره وافقت على طول
مشاعل: خلاص خذ الرقم يالزقه
حسين: ومتى ادق عليها لازم اتاكد اخاف تصير شنب
مشاعل: شنب بعينك بتتلكم والا شلون؟؟؟
حسين: طيب طيب اسمعي الله يسلمك
الاسم : طلال ال....
العمر: 27 سنه
لوحته: .....
وبدا يعطيها معلومات عنه
حسين: هاه ايش رايك فيني؟؟؟
مشاعل: بطل ,,, وكيف عرفت هالمعلومات
حسين: ابد هو عنده بالبيت مجلس كبير يجتمعون فيه الشباب كل يوم وكل واحد يجيب اخوياه
وواحد من الي اعرفهم يروح هناك وقال لي عنه وتراه توه راجع من السفر كان عايش برا
5 سنوات كان عايش عند امه لانها اجنبيه
مشاعل: اها حلو
حسين: بس يقول لي الولد انه وسيم مره لايكون بس انتي معجبه فيه وتبين تشبكين وتسحبين
على ولد عمي سلمان
مشاعل: حسين لاتسوي فاهم بس على فكره معلوماتك مافادتني
حسين: ايوه ,,, وليش انشالله
مشاعل: انا ابي اعرف وين يطلع وين يروح ,, يعني تبيني ادخل بيتهم مثلا ايش راح استفيد
من اسمه والا بيته والا لوحته
حسين: طيب انتي اصلا ماينفع معك المعروف باي
مشاعل: حسينوه امزح المهم اذا شفته باي مكان بليز دق علي وقول لاصحابك كمان اذا
شافوه لازم يقولوا لي ,,, لو استدعت الحاله عطهم رقمي اوكي
حسين: والله اني بديت اشك فيك ايش هالحرص معقوله كل هذا على شاان انتقام ,,, عموما
انا بروح اليوم لبيته مع الولد الي يروح له وبشوفه
مشاعل: طيب كلمني وانت هناك بليز
حسين: طيب ,, اقطع يدي ياميشو اذا ماكنتي خاقه مع الولد
مشاعل: اذا تحسبني ابي اتعرف عليه فانت ماعرفتني
حسين: طيب نشوف يقولوا المصريين الميه تكذب الغطاس ويقولوا بعد ياخبر النهار ده
بفلوس بكره يبقى ببلاش والا ؟؟؟؟
مشاعل: اوكي نشوف اذا ماخليت التحليه كلها يتكلموا عنه ويضحكوا عليه ماكون ميشو
حسين: طيب وش راح يكون اسمك لانك اكيد ماراح تكوني ميشو ههههههه
مشاعل: انقلع بس ولاتنسى اذا شفته واتصلت علي راح تكسب جائزه
حسين: جائزه؟؟؟ وش هالجائزه علشان اتحمس؟؟
مشاعل: رقم بنت ثاني هههههههه
حسين: والله لاحفر الارض علشان اجيبه واستني علي
مشاعل: اوكي بايو
حسين: يله باي
ساره كانت مذهوله من الكلام الي سمعته مين هالشاب الي مشاعل حريصه تعرف عنه كل
شي واتضايقت لان مشاعل مخبيه عليها السالفه
اما مشاعل فانتبهت اخيرا ان ساره معاها بالسياره وهي الي نست ان معاها احد لما اتصلت
على حسين وقال انه يعرف معلومات عن طلال وشلون بتبرر لساره الحين اكيد ساره زعلانه
وظلوا كلهم ساكتين ,,, وعند اشاره بيت ساره قررت مشاعل تبدا بالكلام وتدور اي تصريفه
تقنع فيه ساره بس قبل لاتتكلم كان صوت بوري السياره الي جنبه مزعج التفت مشاعل
وانصدمت لانها شافت سياره صفراء تعرفها كويس ومظلله واكيد الي داخلها الحقير طلال
حست بفرح لانها تقدر الحين تنتقم وبنفس الوقت انقهرت لانها بالاشاره ماراح تقدر تسوي
شي
انفتح الشباك وكانت مشاعل متحمسه تبي تشوف طلال هل هو وسيم والا يمكن لما شافته
كانت تتوهم انه وسيم
بس للاسف كان اكثر وسامه كان مسوي ديرتي فيس وشكله خطير ولابس تيشرت اصفر كان
مبين لان الفيراري نازله مره وتقدر مشاعل بسهوله انها تشوف الي جوا السياره لان مستوى
اللكزس اعلى من الفيراري
استغربت مشاعل لان طلال كان ياشر لها تفتح الشباك
بدون ماتحس لقت نفسها تفتح الشباك وتطيع امره وهي الي ماتحب احد يامرها
طلال يطلب من مشاعل تفتح الشباك ليه؟؟؟؟
الجزء الرابع راح يبين



الجزء الرابع

استغربت مشاعل لان طلال كان ياشر لها تفتح الشباك
بدون ماتحس لقت نفسها تفتح الشباك وتطيع امره وهي الي ماتحب احد يامرها
طلال: اقول لو انا منك مااطلع مع البنت هذي
استغربت مشاعل من كلامه وبان في وجهها علامات التساؤل
كمل طلال كلامه: يعني وحده مثلك المفروض تطلع مع بنات بمستواها مو تطلع مع قمر مثل
الي جنبك بصراحه انتي جنبها مالك اي كرت ولا دور
مشاعل قررت انها ماتنخدع بجماله لازم تعلمه من هو
مشاعل: على فكره يااخ طلال ... لا تحسب نفسك قوي وذكي لانك جزمه وحقير وماعندك اي
ذوق واخلاق بس مو غريبه ,,, امك مو عربيه واكيد كافره ربتك على ..
قاطعها
طلال: اووووه البنت علاقات ماشالله كويس الي عرفتي عني هالمعلومات وفرتي علي شي
كثير
استغربت مشاعل ايش ممكن اوفر عليه وفتحت الاشاره وصارت البواري تطلع من كل
سياره الناس كلها تبي تمشي وسياره طلال ومشاعل ساده الشارع
السواق: عمتي الاشاره فتحت بمشي
مشاعل: لا استنى لاتمشي
طلال: اسمعي بما انك تعرفي عني هالمعلومات ,,, بسالك قدرتي تجيبي رقمي؟؟؟
مشاعل: مايشرفني اعرف رقمك
طلال: قهر ,,, يالله مو مشكله كنت ابيك تعطيه الي جنبك ,,, اوكي لحظه
وراح اخذ قلم وصار يكتب شي على كوب ورق مبين عليه كوب عصير
طلال : اسمعي كتبت رقمي فيه عطيه للحلوه الي جنبك اوكي
وكانت مشاعل بتقفل الشباك قبل لايجيها الكوب كله على وجهها
مشاعل انصدمت دايما كانت تكب اي شي بيدها على اقرب واحد يغازلها والحين هالحشره
يكب عليها هي وقدام مين صاحبتها على مااستوعبت الموقف التفتت بتنزل من السياره
علشان تضربه ,,,او تقتله ,,, المهم تنتقم لقته مشى والبواري مزعجه وسواقها المسكين
ينتظر امر العمه
السواق: امشي الشارع صار زحمه والا شاره بتسكر
مشاعل صرخت: امشي ايش تستنى؟
ساره كانت مصدومه من الي شافته وماتدري ايش تقول اول مره يمر عليها هالموقف ولمين
لمشاعل المغروره الي ماترضى احد يمس كرامتها والولد الي من شوي مو هز كرامتها الى
مسح بها الارض
طالعت مشاعل الكوب لقت رقم طلال مكتوب عليه ومكتوب فوقه ياليت اسمع صوتك اليوم
طلال
ظلت ساكته لحد ماوصلوا بيت ساره
ساره كانت تبي تقول لمشاعل تنزل تغسل وجهها من اثار العصير بس كانت خايفه لان شكل
مشاعل كأنها كلمه وحده وتنفجر وخافت تنفجر عليها
ساره وهي تفتح باب السياره بتنزل: باي
مشاعل: ساره ,,, لو سمحتي ممكن اروح للحمام
ساره: اكيد حبيبتي البيت بيتك تفضلي
مشاعل دخلت الحمام وغسلت وجهها ويدينها وشعرها وماتبي تتذكر ايش صار علشان
ماتنهار فقررت انها ماترجع للبيت خلاص الموضوع مكشوف واكيد ساره عرفت كل شي
بعد مافضحها طلال وشرشحها قدام صاحبتها لازم تصارحها ومنها تشكي لها لانها تعبت
من الكتمان واذا ماصارحت صاحبتها مين تصارح
طلعت مشاعل من الحمام ولقت ساره مجهزه لها ملابس علشان تغير وعبايه من عبايات ساره
لان عبايه مشاعل غرقت بالعصير
مشاعل: اممممم سارونه ماعندك بيجاما؟؟؟
ساره: اكيد عندي لحظه اجيب لك
مشاعل: سارونه ممكن انام عندك اليوم؟؟؟
ساره بدت الفرحه عليها: من جد ميشو لاتفرحيني بعدين تقولي امزح
مشاعل: انا في وضع مقدر امزح فيه
ساره: الله يحييك هذا بيتك قبل يكون بيتي
مشاعل: تسلمي ,,, بدق على السواق علشان يرجع للبيت ويمرني بكره الصباح علشان اروح
البس علشان الجامعه
ساره: ميشو شرايك بكره نطنش الجامعه ونسهر ونفلها ؟؟؟
مشاعل ابتسمت اخيرا: براسك نفلها هههههه
ساره فرحت لفرحه صاحبتها
وبدت السهره بتوتر لان ساره تنتظر مشاعل تتكلم عن الي شافته اليوم ومشاعل كانت
منحرجه ماتدري من وين تبدا
واخيرا تجرأت مشاعل وحكت لساره عن كل شي من اول يوم شافت طلال فيه لحد اليوم
ساره: صدق انه حقير ,,, بس حركته غريبه ,, يعني ليش يعاملك كذا ,,, ميشو انتي مره حلوه
وماحد يختلف على هالشي ,, ايش الي خلاه يقول عنك قبيحه ,,, اكيد الموضوع فيه شي هو
باين عليه يبي ينرفزك ,, بس ليه ماعرف..
مشاعل: ولا انا ,, بصراحه من حقارت الكلمات الي يقولها احس اني مقدر ارد
ساره: غريبه احس انه يتعمد ينرفزك وعارف ان البنت اكثر شي ينرفزها لما احد يسب
شكلها ,,,, وهو باين عليه متعته انه ينرفزك
مشاعل: ايه انا لاحظت هالشي ,,, بس ماعرف ليه؟؟؟
ساره: ميشو تذكري يمكن كلمتيه قبل وسحبتي عليه وحقد عليك تذكري
مشاعل: وربي اول مره اشوفه ,,, مستحيل انه رقمني قبل لانه لو كان مرقمني كنت اكيد
بتذكره ,, شكله مميز ومستحيل انساه
ساره تطالع مشاعل بخبث: مميز هههههه انا اشهد انه يجنن يجنن شكله خطير تصدقين من
اول ماشفته لحد ما مشى وانا مانزلت عيني عنه ,,, على كثر مااحمد يجنن صار عنده ولا
شي بس على طاري مميز شكلك غارقه لشوشتك هههههههههه
مشاعل: الله ياخذه هو وشكله ,,,وووع اصلا عادي انتبهي له كويس من قريب ترى مره
عادي وبعدين ليش غرقانه حبيبتي ماشفت خير ,, لو ابي واحد احلا منه كان بنظره مني
اخليه يركض وراي ,, ولاتنسين طلال مو من الاشكال الي تعجبني
ساره: ايه بس مو اي واحد بيركض وراك واظن طلال اثبت لك هالشي
مشاعل: صدقيني لو ابيه بجيبه بس صدقيني مايعجبني
ساره : عموما حلو والا مو حلو احنا ماراح نخليه ,,, يعني لاهو اول واحد حلو يمر علينا
ولا اخر لازم نفكر شلون نخليه يجي يتاسف لك ويبوس راسك بعد
مشاعل: لا لا ,,, لايبوس راسي ولا ابي اشوفه اصلا ,, بس قبل لااقفل سيرته من حياتي
بخليه يندم على الي سواه صدقيني
ساره: ايش راح تسوي قولي لي بليز انا صاحبتك
مشاعل: لسى مافكرت ,,, بس انتي خلي علاقتك مع حسين حلوه لان اكيد راح احتاجه
ساره: يالله بظطر اني اتحمل حسين وثقل دمه ,, تكفين خلصي الموضوع بسرعه
مشاعل: انا مستعجله اكثر منك ,,, الا تعالي ماقلتي لي بتردين على احمد والا لا؟؟؟
ساره: مدري محتاره ياميشو ,,, اخاف ارد واقول له الحقيقه يزعل ويتركني واخاف اسكت
اموت بقهري
مشاعل: بعد عمر طويل انشالله ,, ماتلاحظين انك معطيته اكبر من حجمه؟؟؟
ساره: لا هو مقاسه اكس اكس لارج ههههههههه
مشاعل: ههههههههه ايه هذي سارونه الي اعرفها
ساره: الا تعالي ايش صار على اخوك مشعل ماخطب؟؟
مشاعل: لا للحين ليش ناويه تخطبيه؟؟
ساره: ودي صراحه اخوك يجنن ماشالله وعاقل ,,, اقول اخطبيني له ,, ايش هذا خويه ماتنفع
مشاعل: هههههههههههههه ياليته يوافق يتزوج ,,, مسكين سعود بينجن يبي يتزوج الهنوف
وابوي مو راضي يزوجه قبل مشعل,, يقول لو الهنوف طارت مني والله لدعي عليك تعنس
هههههههههههههههههه
ساره: هههههههههههههههههههههههههههه ,,, الا على طاري الهنوف ماشفتيها؟؟؟
مشاعل: لا ,,, يقول سعود بعزمك على العشاء وبقول للهنوف تجي ,, تدري منجنه ابي
اشوفها احسها مره قرويه
ساره: ليش ايش الي خلاك تحسي هالاحساس؟؟؟
مشاعل: مدري من كلامه عنها ,,, اقول له من وين تشتري ملابسها الهنوف وقال لي اسماء
محلات حتى خداماتنا مانشتري لهم منها
ساره: ياااااي مره قرويه ,,, بس حرام اخوك يحبها واذا تزوجته انتي عاد كشخيها
مشاعل: ياشيخه اذا هو راضي بقراوتها بكيفهم ياداخل بين البصله وقشرتها ماينوبكش الا
ساره: ريحتها ههههههههههه
مشاعل: ههههههههههههههههههه
وتمت السهره كلها ضحك ووناسه وناموا الساعه 7]

في بيت طلال كانت السهره مثل كل يوم الشباب متجمعين وكان مجلس طلال عباره عن كوخ
خشب كبير مكون من دورين الدور الاول كان جلسه وتلفزيون اما الدور الثاني كان مفتوح
على الدور الاول وهو عباره عن صاله بلياردو كان كل يوم يمتلي هالمجلس فوق 40 شاب
البعض اصحاب طلال والبعض حتى مايعرفهم
عبدالله: طلال
طلال: سم ابو عابد
عبدالله: سم الله عدوك ,, من هو الي جالس يسولف مع ابو خليل
طلال: والله مدري يمكن هو عازمه
عبدالله: طلال الولد هذا مارتحت له من اول ماجاء وهو يطالعك ,, الله يهديك صاير مجلسك
كل من هب ودب يدخله
طلال: شسوي ياعبد الله صعبه اطرد الناس من مجلسي واذا اتصل علي واحد وقال بجيب
خويي معي صعبه اقول له لا ,, مو من عوايدي
عبدالله: بس انت ماتعرف حتى هم مين ,, ولا ايش اخلاقهم ,, بكره تجيك مشكله والا مصيبه
محد ينفعك والله
طلال: اهم شي ان مجلسي مو في البيت ,,, ولو كان مجلسي في البيت مستحيل ادخل احد الا
اذا كنت عارفه تعرف علشان اهلي
كان بيت طلال في حي من ارقى الاحياء وكان بيت كبير جدا وكان يعيش معاه ابوه واخوه
الاصغر منه نواف واخته هيفاء ولمياء وامه ,,, وفي الجهه المقابله من البيت تقع استراحه
ابو طلال الي كانت كلها مجالس للشباب ولابو طلال بحيث اذا جت عزيمه رجال تكون في
الاستراحه وكان يفصل بين بيتهم والاستراحه شارع علشان كذا طلال واخوه يجمعون
اخوياهم كل يوم
عبدالله: انا معك ياطلال بس انتبه شوف بس الاشكال الي تجي عندك والله احسهم مجرمين
طلال: هههههههه لا تكبر الموضوع وعموما اجازتي خلاص قربت تنتهي يعني مافيه سهر
ولا راح تشوف هلاشكال
دخل حمد بالسالفه وكان طول الوقت قاط اذنه: افهم من كلامك انك تطردنا ؟؟؟
طلال: هههههههههه انا قلت هالاشكال ليش انت اشكال؟
حمد : ههههههههههه ايه ,, واحلى شكل بعد
طلال: اعجاب المرء بنفسه دليل على صغر عقله
حمد : ايه مثل خويتنا مشاعل هههههههههه الي معجبه بنفسها
طلال: ههههههههه مسكينه وربي حزنتني ,,, اليوم كبيت عليها العصير الي اشتريته من ماما
نوره وطلع بايخ طعمه ,, قلت فيها ولا في الزباله هههههه
عبدالله: هههههههه اكيد دخنت اذانها من التعصيب
طلال: اوووه ياليتك شفتها ,,, لا ومعاها خويتها ساره بعد هههههههههههه
حمد: هههههههههه خلها تستاهل ,, اقول طلال خلنا نسوي حركه فيها حلوه تخليها تكره
تطلع من بيتها ايش قلت؟؟؟
طلال: مثل ايش ؟؟
حمد: يعني مثلا وهي راجعه من الجامعه نحدها ونركبها السياره وناخذها مزرعتكم والله فله
ولاتنسى البنت حلوه والله بننبسط
طلال: اسمع ياحمد انا وعدت الرجال اني اهينها واعلمها قدر نفسها مو معنى كلامي اني
اضيع مستقبلها ,,, وبعدين عيب عليك هالحركات والله عيب انت رجال ,,, ماتستحي تستقوي
على حرمه
حمد: ليش هذي تسميها حرمه,, هذي حتى ماتجلس بالبيت لو عندها اهل يربوها كان ماسوت
الي تسويه
طلال: ايش سوت ؟؟ خانت خوينا خلها تخونه هو عارف اصلا انها ماتحبه ,, بس انا قهرني
اسلوبها معاه قلت باعلمها قدر نفسها وبيني وبينك مليت من هالدور انا اهنتها مافيه الكفايه
وخلاص اظن اني اكتفيت والرجال شكرني على الي سويته فيها ,,, وانت ياحمد مالك دخل
بالبنت اتركها بحالها ,,, ترى عندك خوات
حمد: افا ياطلال والله تشبه خواتي بهذي ,,, كرم خواتي ,,, مايسون مثلها ولو حسيت ان
خواتي ممكن يسون ربع الي تسويه والله لدفنهم عند باب البيت
طلال: طيب مشالله عليك رجال ,,, بس ياليت تثبت رجولتك باشياء ثانيه
حمد: ايش قصدك ؟؟؟
طلال: قصدي ابوك اللي عينه ماجفت من الدموع وهو يتمنى يشوفك رجال تهتم بمسؤليات
البيت ابوك كبر ياحمد ولازم يرتاح ومن واجبك انك تريحه وتشيل عنه الحمل يكفي انه رباك
واهتم فيك وانت صغير ,, جاء دورك انت الي تهتم فيه لما كبر
حمد: انا مو مقصر مع ابوي بشي .. بعدين انت ايش عرفك شاكي لك هو؟؟؟
طلال : ابوك مايشكي بس الحزن يتكلم بعيونه
حمد: صاير محلل نفسي ماشالله عليك
عبدالله: ياشباب اذكروا الله وهدوا مايسوى تراكم اخويا
طلال: حمد تكلم زين ترى انت قدام رجال مو بزر عندك تعلم شلون تحشم الرجال
حمد: لاتعلمني ياطلال شلون اتكلم انا احشم الرجال بس مااحشم الي يدخل في الي مايخصه
طلال: مايخصني اني انصحك هاه,, الشرهه مو عليك الشرهه على الي معتبرك رجال
ومدخلك مجلسه ,,, قم من مجلسي واذا شفتك هنا لحش رجولك حش
طلع حمد معصب وطلال كان هادي لان من طبعه مايهزه واحد مثل حمد
هذي حياه طلال ببساطه

موبايل مشاعل يدق اكثر من 10000 مره وازعجها الصوت واخيرا قررت ترحم الي يتصل
وترد عليه,,, كانت الساعه 3 العصر
مشاعل: الو
ام مشعل: هلا حبيبتي وينك خوفتيني عليك
مشاعل: هلا خالتي ,,, انا في بيت ساره صاحبتي
ام مشعل: خفت عليك يابنتي شفت سيارتك بالكراج قلت اكيد ماراحت للجامعه واتصل على
خط غرفتك ماتردي ولا جوالك قلت اكيد صار لها شي بسم الله عليك
مشاعل: تسلمين ياخالتي ,,, بس امس رجعنا متاخرين وقلت ماودي ارجع للبيت مع السواق
لوحدي
ام مشعل: الله يكملك بعقلك يابنيتي ... والسموحه اني صحيتك
مشاعل: خالتي لاتقولي كذا وصدقيني لو ما انتي تدوريني وتسالي عني كان انا منحاشه من
زمان ههههههههههه
ام مشعل: بسم الله عليك انشالله انا وياك الي بنحش ام سلطان
مشاعل: هههههههههههههه انشالله
ام مشعل: يالله حبيبتي كملي نومك بس قومي صلي العصر ترى اذن
مشاعل: ابشري ياخالتي
ام مشعل: مع السلامه
مشاعل: مع السلامه
قامت مشاعل تتوضا وتصلي وصحت ساره علشان تصلي الضهر والعصر
ساره: شرايك نروح نتغدا
مشاعل: غدا الحين قولي عشاء الساعه 4
ساره: ايش عرفك هذا غدا متاخر وعشاء مبكر
مشاعل: مو الحين خلي الشمس شويه تروح حررر
ساره: يله بس انا ميته جوع
مشاعل: مشينا يله من يقدر عليك
طلعت ساره مع مشاعل وكانت مشاعل فيها نوم وحطت راسها على شباك السياره
وغمضت عيونها
ساره: شرايك نروح الريف اللبناني؟؟
مشاعل: اي مكان بس خلصينا
حست مشاعل ان السياره وقفت اكيد عند الاشاره لان المطعم مو قريب لهدرجه فتفحت
مشاعل عيونها كانت جالسه يمين طالعه كوفي المساء وفكرت ليش المساء مايدخلون الا
شباب واحنا يالبنات ليش ماحطوا قسم لنا وش هالنذاله فيهم
مشاعل: سارونه بسرعه ماتعرفي محل حلويات هنا بسرعه
ساره: ايش حلوياته نبي نروح نتغدا
مشاعل: يالله منك بسرعه اي محل ماني قادره افكر بسرعه
ساره: طيب طيب
واتجهوا لاقرب محل حلويات ,,, نزلت مشاعل اسرع يمكن من البرق حتى انها كانت بتطيح
اكثر من مره
مشاعل: لو سمحت ابي اكبر كيكه عندكم
البائع: حاظر,, بس شو بدك شوكولا ولا فرواله ولا..
مشاعل قاطعته: اي شي بس خلصني بسرعه
البائع : اوكي تعي شوفي الاشكال واختاري
مشاعل قفلت اخلاقها من برودته احر ماعندها ابرد ماعنده: اوكي هذي
كان اختيارها كيكه متوسطه الحجم ,, دفعت له باسرع من السرعه وركبت السياره قبل حتى
ساره ماتركب
مشاعل: بسرعه روح على طول
ساره : ممكن افهم ايش السالفه
مشاعل وهي فرحانه: راح تعرفي بس استني شوي
ساره: مدري ايش صار لك هاليومين غامضه
مشاعل: يالله هالاشاره الله ياخذها طولت مره
ساره: ميشو بليز قولي لي ايش فيك
مشاعل: اوكي بس بس وقف هنا
ساره: مجنونه انتي وين بتروحي هذا الكوفي مافيه قسم عوائل و...
ماسمعتها مشاعل لانها نزلت
كان كوفي المساء كله درج يعني كانها طالعه قلعه وماهتمت صارت تركض وتركض
وتركض لحد ماوصلت الباب وكان برا جلسات كلها شباب بس كويس انها كانت فاضيه لان
الشمس ماتساعد احد يجلس فيها
دخلت من الباب وكانت كل الانظار عليها من هالبنت الجريئه الي تدخل مكان كله شباب
ومافيه قسم عوائل وممنوع اصلا انها تدخل
جاء واحد يركض له
: بليز ممنوع تدخلي هون ... هيدا بس للشباب ممنوع الصبايا يفوتوا هون,, ازا بدك شي
ابعتي الشوفير وانا ببعت لك طلبك معو
مشاعل: اسمع بعطيك الي تبي بس بعد عني
: بليز ممنو..
ماكمل كلامه لان مشاعل من اول مادخلت وهي تدور بين الشباب وكانها لقت الي تدور عليه
وطنشت الي كان يكلمها ومشت للمكان الي كانت تطالع فيه ,,, مشاعل طبعا ماكانت تتغطى
بس لما دخلت الكوفي تلثمت ,,
ساره مره استغربت حركتها وصارت المسكينه تلحقها من مكان لمكان يمكن تقدر تلحق المصيبه الي اكيد بتسويها ميشو
وقفت مشاعل عند طاوله فيه 5 شباب وكانوا يطالعونها منصدمين
حطت مشاعل كرتون الكيكه على الطاوله وطلعت الكيكه وعلى طول في وجه طلال
كل الي بالكوفي انصدموا ايش الجرئه الي تخلي بنت تدخل مكان شباب وتبعد اي واحد
يحاول يمنعها او يعترض طريقها وتوقف عند طاوله شاب وتطلع كيكه وتعرزها في وجه
واحد
كل الشباب الي كانوا موجودين ماتوا ضحك,, اما اصحاب طلال محد تكلم مصدومين وفي
هاللحظه خذت مشاعل منديل ومسحت عيون طلال وفكت لثامها
مشاعل: مره ثانيه لاتتجراء حتى انك تتحداني
ومشت وكانها ماسوت شي
وماكانت تسمع الي صوت ضحك الشباب وصوت الي حاول يمنعها من الدخول يتكلم بكلام
فهمت بعضه وبعضه لا بس الاكيد انه كله سب فيها واهم صوت سمعته والي اعجبها صوت
الانتصار داخلها حست كانها اخذت جائزه كانت تتمناها من قرون
ركبت السياره وركبت بعدها ساره
مشاعل: اوكي الحين انا ياسارونه ميته جوع روحي وين ماتبي
ساره قالت للسواق يروح للمطعم وسكتت ماتدري ايش تقول عن هالموقف الي شافته
وبعد ثواني انفجرت ساره من الضحك ومعاها مشاعل وظلوا يضحكوا لما وصلوا للمطعم
حتى بعد ماطلبوا الاكل وهم يضحوا
بعد ماهدت ساره
ساره: تدري انك اجن بنت قابلتها بحياتي وهذا الي عاجبني فيك
مشاعل: حبيبتي انا قلت ماراح امشيها له وشوفي ايش سويت
ساره: بس شلون عرفتي انه هناك
مشاعل: ههههههههه بالصدفه طاحت عيني ع الكوفي وقلت غريبه انه مافيه قسم عائلات
وصرت اطالع السيارات الي موقفه برا وشفت سياره الغبي طلالوه وقلت هذي فرصتي
ساره:ههههههههههههههه ايش موقفك لو مالقيته
مشاعل: كنت بتحطم ويمكن احذف الترم هذا واقضي يومي بالشارع ادور عليه ههههه
ساره: ههههههههههههههههه, شفتي رده فعله هو واصحابه؟؟؟
مشاعل: لا بصراحه كنت ابي اهرب اخاف يسوي لي شي
ساره: فاتك وربي , تخيلي اصحابه ودهم يضحكوا بس اظاهر خايفين منه ههههههههه
مشاعل: هههههههههههههههه
ساره: وهو كان مو مصدق يطالعك وياطلع اخوياه وكانه يقول لهم قولوا لي انه حلم
مشاعل: هههههههههههههههه خلاص يكفي سارونه وربي بيصير لي شي اليوم من كثر
ماضحكت
ساره: بس انتي بايخه ليش ماقلتي لي علشان اصور الموقف وربي حرام يروح كذا بدون
تصوير
مشاعل: اسكتي انا كنت مره خايفه كنت بضرب الكيكه بوجهي مو بوجهه لما شفت نظراته
لي يمه مره يخوف
ساره: غريبه ماعرف عيونك
مشاعل: هو شكله استغرب مين هالبنت الي تطالعني ههههههههههههههه
ساره: ااااه وربي احلى موقف مر علي بحياتي

يتبع ,,,
👇👇👇
أحدث أقدم