رواية أحلى صدفه في حياتي -9

رواية أحلى صدفه في حياتي -9

راحت رغد جابت كاس مويه بارد وزياده على كذا حاطه فيه ثلج وكبته على عبير..
عبير: اوه اوه وجع انشا الله ..الله ياخذك يا البايخه..
رغد موصله معاها: قومي لا اذبحك هنا والثنتين ذولي معك..
العنود تهمس لريم: يمه اختك تخوف اذا عصبت ..
ريم: اسكتي بس ما شفتي شي ابوي يخاف منها..
العنود: مسكينه يا بنت عمي تعالي عندي وانا ادافع عنك بدال ذا النعجه اللي عندي..
ريم: ودي يا بنت عمي بس حكم القوي على الضعيف..
رغد: خمس دقايق وكلكم نازلين مفهوم..
ريم والعنود: مفهوم ابله..
رغد نزلت وضغطها مليون ما تشوف قدامها لانها رايحه المدرسه غصب ما تقدر تغيب تخاف يفوتها شي وخصوصا الاختبارات قربت..
بعد خمس دقايق نزلوا وتغدوا مع العائله وهم بطبعهم ما يتغطون يتحجبون بس..
مشاري: مشا الله عيال اقصد بنات عمي هنا..
العنود: ليش ما عجبناك..
مشاري: لا عاجبيني.. حيا الله من جانا..
ابو مشاري: وشلون ابوكم عساه بخير..
عبير: ليش عمي ما شفته بالشركه..
ابو مشاري: لا والله اليوم ما مر علي..
مشاري: مشا الله انتوا خلصتوا دراسه..ولا ايش..
العنود: لا وش خلصنا دراسه تونا..
مشاري: يعني اليوم ما داومتوا..
عبير: انت صاحي اليوم الاربعاء..
مشاري: واذا كان اليوم الاربعاء..
العنود: عندنا قاعده يا اخ مشاري تقول "لا دوام يوم السبت والاربعاء "..
مشاري: مشا الله عليكم ومين اللي طلع القانون الجديد ولا القاعده على قولتكم..
عبير: ماجلان.
العنود: لا يا غبيه هذا قاعدة"لا مذاكره من الكتاب.. تكون من الدفتر"
عبير: اجل منهو..
ريم: والله انك بقره على قولت اختك هذا ابن حيان..
عبير: ايه صح يا مشاري ابن حيان..
مشاري: ابن حيان قايل لا تداومون السبت والاربعاء..
الثلاثه:ايه..
مشاري: اجل ما جلان وش قال؟؟
العنود: قال ماجلان سلمك الله المذاكره الصحيحه ما تكون من الكتاب بل من الدفتر واسئلة الواجب واسئلة المراجعه..
مشاري: ممكن اسأل سؤال..
الثلاثه: خير اسال..
مشاري: كيف تنجحون؟؟
العنود: يا اخ مشاري نمشي على قانون روبيرتو كارلوس..
مشاري: اللاعب!!!
العنود: ايه اللاعب يقول ان الطالب او الطالبه المجتهد هو اكثر واحد يكتب براشيم ايام الاختبارات ..عرفت كيف ننجح.
مشاري: والله يصلح تالفون كتاب قواعد وقوانين للطلاب والطالبات اللي عقولهم دروج مثل عقولكم..
عبير: مشكور اخوي مشاري على المدح اللي تمدحه لنا..
العنود: وانشا الله نردها لك بالافراح..
مشاري: مع السلامه قبل يجي عقلي شي واصير مثلكم..
الثلاثه: مع السلامه..

&&&

بعــــــــــد الغدا..

جلسوا عند التلفزيون ويعلقون على هذا ويحشون هذي ويستهبلون ويقلدون..

العنود: اقول رويم ما ودك تتصلين على شجون..

ريم: ليش؟؟

العنود مصدومه: تسأليني ليش..افا ما هقيته منك وشلون تتغيرين في يوم وليله..وانا تاركتك زي الفل والحين وش جاك وين حب اللقافه اللي زرعته فيك..

ريم: الحمدلله حصدته وبعته في سوق الخضار ههه..

العنود: المهم كلميها بسرعه..

ريم: زين زين.. وطوا صوت التلفزيون"واتصلت عليها.."

ريم: الووو..

شجون: هلا والله..

ريم: كيفك وش اخبارك وعلومك والوالده والوالد والاخوان..

شجون: الحمد لله كلنا بخير..

ريم: ايه ..اقول شجون..

شجون: امري..

ريم: ما يامر عليك ظالم بس كنت بسألك متى امك راح تكلم ام فواز عشان فجر..

شجون: هي قالت المغرب..بس ليش؟؟

ريم: لا سلامتك بس حبيت اتطمن على بنت عمتي..

شجون: ترى ما حنا ما كلينها..

ريم: افا ما هقيتها منك..المهم ما اطول عليك ...مع السلامه.

شجون: مع السلامه.......غربيه ليش تسأل....هههههه ما غريب الا الشيطان يعني ريم واللقافه لازم تعرف كل شي يحليلها خبله..

&&&

عنـد البنات..

العنود وعبير: متى؟؟

ريم: المغرب..

ريم: تصدقون توني اكتشف إنا ملقف بزياده..

عبير: هذي فطره عندنا مو مكتسبه..ما نقدر نغيرها..

العنود: ودي اعرف طالعين على مين..

ريم:والله ما ادري بسأل امي وأشوف..

العنود: لالا امك ما لها دخل في السالفه اسألي ابوك..

ريم: صح اسأل ابوي..

عبير: قوموا يله عشان تقوموني رجلي ما ادري وش فيها..

العنود: اصلا انتي متى دريتي وش فيها كل يوم تقول نفس الكلمه ما ادري وش فيها..

ريم: يله بسرعه خلونا نجهز بس وين رغد..

العنود: نايمه..

ريم: اجل نروح نزعجها وبعدها نلبس..

العنود وعبير وعيونهم تطلع شرار من النذاله: يله..

راحوا عند رغد وازعجوها المسكينه لما بغت تصيح منهم وبعدها لبسوا ونزلوا عند ام مشاري..

ام مشاري: مشا الله لابسين على وين؟؟

ريم: يمه نسيتي اليوم عند عمتي ام فواز..

ام مشاري: طيب خلوها بكره..

ريم انفعلت: لالالا اليوم يعني اليوم..

ام مشاري: طيب تونا بدري..

العنود: خالتي وش فيك علينا بنروح بدري عشان ننبسط..

ام مشاري: بسلامتكم سلموني على ام فواز..

ريم: يوصل انشا الله يله بنات مشينا..

البنات: يله..

&&&

بيــــــــــــــــــت ابو فواز

نزلوا البنات من السياره وضربوا الجرس وبعدها دخلوا ..

ريم: عمتي ...عمتي..

ام فواز: يا هلا والله وسهلا تو ما نور البيت..

البنات: منور بأصحابه..

ام فواز: وش اخباركم وش علومكم.

البنات: الحمد لله بخير..

ريم: عمتي امي تسلم عليك..

ام فواز: الله يسلمها من الشر..

رغد: اجل عمتي وين نوف وفجر..

ام فواز: فوق اطلعوا عندهم..

ريم: يله مشينا<<مسويه القائده..

رغد: عيب عليك انا الكبيره..

ريم: بس انا صاحبه الفكره..

العنود: يا الكذابه انا صاحبة الفكره..

عبير: لا انتي ولا هي انا ويله امشوا وانتو ساكتين..

وطلعوا البنات وطبعا هم ما يدرون انهم راح يجون..

فجر: مين البنات!!!! يا هلا والله وغلا..

البنات: هلا فيك..

ريم: هلا بالعروـــــــــــــــــــــ

العنود تصقع ريم لما صقعت في الجدار: هلا والله بالزينه..

البنات ميتين ضحك على شكل ريم وهي طايره..

فجر:ههههه وش فيك عليها؟

العنود: ما عليك منها الملقوفه..

ريم: آآآآآآآآآآآآآآآآآه..آآآآآآآآآآآآه حسبي الله عليك طيرتيني..

العنود: احسن..

عبير: اجل وين نوف..

فجر: بروح اناديها.."وراحت"

رغد: ريم يا أم لسان طويل بغيتي تفضحينا..

العنود: المشكله من امس وهي توصي فيني وفي عبير..

ريم: زلت لسان ما تسوى علي.. عنيد وجع ما ادري انتي من ايش مخلوقه..

العنود: ترى بأعجنك الحين بصراحه رفعتي ضغطي زين ما حست ...

ريم: خلاص خلاص حصل خير مصيرها تعرف..

وبعدها دخلت نوف وفجر..

نوف: هلا والله ببنات خالي..

البنات يسلمون عليها: هلا فيك.

وقعدوا شوي يسولفون بعدين ذكرت ريم..

ريم تهمس للعنود: اقول العنود..

العنود: خير..

ريم: خلينا ننزل تحت عشان نحضر المكالمه وتكون معانا فجر لان اذا ما حضرتها ما راح تقول لها عمتي الا لما نروح وتصير جيتنا على الفاضي..

العنود: ايه.....احم بنات وش رايكم ننزل عند عمتي تحت مسكينه لحالها..

نوف: لا عادي خذوا راحتكم..

ريم: لالا راحتنا من راحت عمتي..

فجر: وش هالحنيه الزايده وش عندك انتي وياها..

رغد تبي تنقذ الموقف: لا بس حرام عمتي لحالها ما يصير لو امي معانا كان عادي..

عبير تكمل: خلونا ننزل احسن..

نوف وفجر: كيفكم..

ونزلوا تحت..

ام فواز: وش عندكم جالسين عندي انتوا بالعاده ما تحبون جلسة الحريم..

ريم: انتي يا عمتي غير عن كل الحريم..

العنود: انتي يا عمتي الجلسه معك ما تنمل..

عبير: ومن سوالفك و حنيتك وطيبتك الله لا يحرمنا منك..

ام فواز مصدومه: مشا الله وين سامعين هالكلام في أي مسلسل وش عندكم..

العنود: ليش شافتنا لين على غفله ..لا ابد هذا تعبير من داخل القلب..

ام فواز: ايه واضح من داخل القلب..

وبعدها رن التليفون..

الاربعه يطالعون بعض وفيهم الضحكه..

ردت العمه ام فواز على التيلفون..

ام فواز: الوووو...هلا......لا.......اخوي اقولك غلطان.."وسكرت السماعه"

طاحت وجيه البنات..

نوف: يمه مين كان عند التليفون..

ام فواز: هذا غلطان مزعجني من الظهر..

فجر: احقريه ولا عاد تردين على التليفون..

ريم بسرعه: لا وش ما ترد على التليفون لازم تردين يمكن شي ضروري ولا شي..

العنود تكمل وهي منفعله: ايه يمكن شي ضروري ..ردي واذا سمعتي صوته سكري في وجهه..

ام فواز: طيب طيب بس وش فيكم شبيتوا..

العنود: لا شبينا ولا طفينا بس يعني نحرصك..

ام فواز: انتو اليوم مو طبيعين..

فجر: من ناحية مو طبيعين مو طبعيين بس ما ادري وش عندهم..

الا التليفون يرن ...

الاربعه حطوا يديهم على قلبهم..

ام فواز ردت: الوو وبعدين معاك..

ام فيصل: هااو يا ام فواز وش فيك..

ام فواز تفشلت: معليش يا ام فيصل كان واحد مزعجني ومطلعني من طوري..

البنات سمعوا كلمة ام فيصل خلاص ما قدروا يضحكون بس تحملوا..

ام فيصل: ايه معليش وش اخباركم وش علومكم وش مسوين..

ام فواز: والله الحمدلله تمام بخير وش اخباركم انتي وشجون والعيال..

ام فيصل: والله كلهم بخير...الا يا ام فيصل..

ام فواز: امري..

هنا البنات كانوا يطالعون فجر ..وفجر كانت تطالع التليفزيون واذنها مع امها من يوم سمعت طاري فيصل..

ام فيصل: والله يا ام فواز ما ادري وش اقولك لكن بدخل في الموضوع على طول..

ام فواز: امري..

ام فيصل: والله ولدي فيصل نوى يتزوج فأنا قلت لو الف الديره كلها ما راح القى احسن من بنات ام فواز..

ام فواز:والله هاذي الساعه المباركه يا ام فيصل ولنا الشرف بعد..

هنا البنات خلاص راحوا فيها ..كانت العنود حاطه يدها على فم ريم عشان ما تضحك ورغد حاطه يدها على عبير عشانها ما عاد تقدر تتحمل اكثر..

ام فيصل:والله حبيت اخطب بنتك فجر حق ولدي فيصل..

ام فواز: والله ما راح القى احسن منكم نسب ولا احسن من ولدكم ..وانا من ناحيتي ما عندي مانع بس اشاور ابوها والبنت وارد لكم...

ام فيصل: ا نشا الله ومتى ما ردت سواء كانت موافقه ولا ما وافقت فأحنا اهل وحبايب..

ام فواز: اكيد يا ام فيصل..

ام فيصل: اجل تامرني بشي..

ام فواز: لا سلامتك..

ام فيصل: مع السلامه ..

ام فواز: مع السلامه..

فجر حاطه يدها على قلبها من الخوف وهذا اللي كانت حاسبه حسابه..نوف كانت مبسوطه لانها عارفه انه اكيد فجر مو هي .. والبنات يطالعون فجر ويستنونها تتكلم او أي شي..

ام فواز تطالع فجر وهي مبتسمه:والله وكبرتي وصرتي عروس يا فجر..

فجر خلاص ذابت من الحيا..

فجر تسوي نفسها ما تدري وش السالفه: انا كبيره من زمان"وتوها بتقوم"

الا ام فواز نادتها: تعالي يا قلبي بأكلمك وين بتروحين..

فجر : سمي يمه..

البنات يطالعونها وكأنهم يطالعون مسلسل..

ام فواز: هذي ام فيصل تخطبك لولدها فيصل..

فجر منزله راسها:................ وهي ميته حيا وجهها احمر وتحرك رجلينها وتفرك ايدينها من التوتر..

هنا ريم خلاص بتضحك بس العنود انقذت الموقف وحطت خداديه على فمها..

ام فواز: عاد انتي فكري زين يمه وترى الولد ما ينعاب ولا راح نلاقي احسن منهم..

نوف: احلى احلى يا العروسه..

فجر بصوت واطي: اسكتي انتي..

العنود خلاص ما قدرتتسكت وضحكت لانها اول مره تشوف فجر مستحيه..:ههههههه

فجر: عنيد والله انك با يخه.

وبعدها فقعوا البنات ضحك ":ههههههههه

فجر: والله سخيفين "وطلعت فوق"

ريم: هههههههههه يا حليلها والله تعرف تستحي..

العنود: وجها احمر من الحيا مسكينه..

رغد: آآآآآه يا قلبي صار يعورني..

عبير:هههههههه يمه ههههههههههه يمه بطني ههههههه سكتوني هههههههه

العنود: عبير خلاص عاد..

عبير: ههههههههه العنود ههههههه سكتيني هههههه بطني ما اقدر..

ام فواز: عاد اعقلوا عن بنتي تراها تستحي وعقبالكم وتضحك عليكم,,

العنود: والله يا عمتي بنتك متزوجه ما قدرت اتخيل شكلها..

ام فواز: وليه انشا الله ..

العنود: ما ينفع فيصل رومنسي وبنتك انواع العرابجه ما يصلح..

ام فواز: بسم الله على بنتي الدلع والرقه كلها فيها..

العنود: اذا الدلع والرقه في فجر اجل نوف وش تطلع..

ريم: المياعه هههههه

وفقعوا البنات ضحك..

نوف عصبت: والله انكم تافهات.."وطلعت فوق مع اختها"

والبنات يضحكون اكثر..

ام فواز: وانتوا جايين تطنزون على بناتي..

رغد: حشى عمتي بس نوف عاد دلوعه بزياده..

ام فواز: يحق لها..

عبير: آآآآآه آآآآآآآه بطني يمه بطني ..بطني يعورني..

ام فواز: احسن تستاهلون..

عبير: عمتي ترى نمزح مو جد..

ام فواز: هالامور ما فيها مزح؟؟

ريم: اقول خلونا نروح نراضي البنات كلهم زعلوا..

العنود: فجر بترضى بسرعه اما نوف حبي راسها عشان ترضى.

رغد: يله مشينا..

وطلعوا البنات وقعدوا يراضون فجر وفعلا رضت بسرعه اما نوف طلعت الشيب في راسهم لما نفخت عليها العنود نفخه مريعه وتعدلت بعدها.وعلى قولة العنود بنات ما يجون الا بالعين التركواز ..واثقه البنت وبعدها طلعوا ...وفي السياره انواع التعليقات والتوقعات لما وصلوهم لبيتهم وبعدها راحوا ريم ورغد لبيتهم وحكوا لامهم وش صار وبعدها نااااامواا

@@

فجر مسكينه حالتها حاله من يوم عرفت بالسالفه ..طول الوقت تفكر بفيصل وحتى يوم كانوا البنات عندها كانت طول الوقت سرحانه وتفكر ..وتذكرت المواقف اللي صارت بينها وبين فيصل ..كيف كان يطالعها وهي ما حست فيه ولا مره فكرت انه يحبها او أي احد ثاني يحبها او حتى انها تحب احد وبعدها جا على بالها موقف يوم كانوا يلعبون بالدبابات...

فيصل: فجر..فجر ممكن توقفين شوي..

فجر مستغربه"وش يبي هذا":خير امر..

فيصل مبتسم: ما يامر عليك ظالم بس خلينا ناخذ بريك شوي وبعدين نكمل..

فجر ما حست انه يبي يقعد معاها شوي:احس انه ماله داعي للبريك..

فيصل:طيب واذا قلت لك طلبتك..

فجر ما حبت ترده: خلاص خمس دقايق بس..

فيصل في نفسه"خمس دقايق بالنسبه لي خمس سنيين"

فيصل: احم..احم فجر انتي بأي سنه"وجلس وجلست فجر جنبه"

فجر انا بثاني ثانوي..

فيصل: ما شا الله الايام تمشي بسرعه..

فجر: ايه الله يعين..

فيصل: طيب انتي شاطره بالمدرسه<<ما عنده سالفه..

فجر في نفسها" وش ذا السؤال البايخ":ايه ما علي..

فيصل: ايه بسم الله عليك..

فجر تبغى تقطع عليه سوالفه: ما خلصت الخمس دقايق..كنها طولت..

فيصل: ليش مليتي مني بهالسرعه..تراني قايل خمس دقايق مو خمس ساعات..

فجر: ايه بس احنا في سباق..

فيصل: طيب عادي..

فجر"يا ليل ما اطولك": طيب انت وين تشتغل..؟؟

فيصل ما صدق على الله انها سألته وعطته وجه: انا ما اشتغل انا ادرس بالجامعه ادارة اعمال..

فجر:اها ما شا الله وانت الولد الوحيد صح..

فيصل فرح اكثر:ايوه وشجون هي البنت الوحيده..

فجر: ايه ما شا الله باين عليها دلوعه ومدلله بسم الله عليها..

فيصل: حتى انتي باين عليك انك رقيقه وهاديه<<من على جنب..

فجر استحت: تسلم..

فيصل: الله يسلمك..

فجر: اتوقع إنا تأخرنا يله نرجع للتحدي..

فيصل: شكللك متحمسه..

فجر: ابي اكسر روسكم يا العيال شايفين انفسكم..

فيصل: وانا منهم..

فجر: ليش انت ما تعد نفسك واحد من العيال..

فيصل تفشل: ايه هين اوريكم يا البنات..

فجر قامت تضحك على عمرها لانها ما انتبهت ان فيصل كان يحاول يتقرب منها ويسولف معها وهي حتى الاحساس ما حست فيه وغير هذا كله دفشه معاه

وتذكرت يوم رجعوا من المطعم..

فيصل قرب منها بالمره وهي تحته: احم احم..

فجر رفعت عيونها على فيصل بعدين نزلتها:.....

فيصل: فجر..

فجر وهي تربط الرباط حق الجزمه: هلا..

فيصل: أأأأأ وش كنت راح اقول..

فجر: اممممم..

فيصل في نفسه"طيب عطيني وجه": تصدقين نسيت..

فجر خلصت ووقفت: صدق!! اجل اذا تذكرت نادني..

وتوها بتمشي الا فيصل مسك ايدها: لحظه..

فجر انصدمت وشلون تجرا ومسك ايدها وصارت تطالع بأيدها وفيه وبعدين قالت بكل برود: ممكن تترك ايدي..

فيصل استوعب الحركه وتركها بسرعه: فجر لحظه اسمعيني طيب..

فجر بقلة صبر: تذكرت السالفه..

فيصل: هي سالفه وحده ما في غيرها..

فجر كتفت ايديها: اللي هي..

فيصل: فجر ليش تعامليني كذا..

فجر: وش تبيني اعاملك ا نشا الله ؟؟

فيصل: خفي علي شوي..

فجر: وبعدين معاك عندك سالفه ولا اروح..

فيصل في نفسه" عربجيه هالبنت وما عندها وقت بس اموت فيها": الا في سالفه..

فجر: اخلص وراي شغل..

فيصل اخذ نفس وقال بسرعه: فجر لو اجي واخطبك توافقين..

فجر وكأن احد كاب عليها مويه باردده اخر شي توقعته ان فيصل ممكن يقولها اخطبك:...

فيصل: انا حبيتا قولك انتي اول واعرف رايك بعدين اخلي امي تكلم امك وبعدها اجي اخطبك من ابوك رسمي..

فجر تحاول تجمع لها كلمتين تقولها لفيصل لان المفاجئه شلت لسانها: بصراحه ما ادري وش اقول لك بس انت فاجئتني بالموضوع..

وراحت بسرعه وتركته..

ماتت ضحك على اسلوبها وصارت تشوف الدنيا بنظره ثانيه حست انها بدت تتقبل فيصل..وبدت تحس بمشاعر غريبه اول مره تحسها بحياتها ..ولابتسامه ما فارقتها..

فجر: لازم استخير واللي كاتبه ربي بصير..

قطع افكارها صوت الباب..

فجر: مين..

نوف: اختك..

فجر ما ودها تجي نوف تخاف تحرجها: تفضلي..

نوف والابتسامه شاقه الوجه: اهلين فجوره..اهلين بالعروسه..

فجر بحيا: نوف اذا بتستهبلين اطلعي برى ترى مالي خلقك..

نوف: لالا خلاص ابعقل..تصدقين فجوره..

فجر: لا ما اصدق..

نوف: وهذا وانتي بتتزوجين اسلوبك كذا..

فجر: نويف ترى بأقلعك برى..

نوف: فجوره قلبي والله البيت من دونك ولا شي..

فجر ضاق صدرها وتوها تفكر انها بتفارق امها وابوها واخوانها واهم شي اختها:نوف تكفين لا تضيقين خلقي وبعدين انا ما قررت..

نوف: بس يا فجر قبل لا تاخذين أي قرار فكري وتذكري ان فيصل تراه رجال وما يعيبه شي وما اظن انك راح تلاقين احسن منه وخصوصا ان نعرفه ونعرف اخلاقه وامه ما شا الله عليها طيبه وحنينه وشجون بعد طيوبه..

فجر: والله صح الكلام اللي تقولينه بس بصراحه اول مره افكر بشي مصيري وانا اقرر فيه..

نوف: اكيد يا قلبي انتي كبرتي ولازم تتعودين على المسئوليه وهذي اول خطوه لك انك تتحملين مسئوليتها..

فجر: بصراحه يا نوف ولأول مره اعترف واقول اني خايفه..

نوف: اكيد بتخافين وانا لو مكانك جلست ابكي من الخوف..

فجر: طيب انتي وش رايك..

نوف: الراي الاول والاخير لك ..وانا اقول استخيري واذا حسيتي نفسك مرتاحه له وافقي وبدون تردد..

فجر: هذا رايك؟؟

نوف: ايه هذا رايي والراي الصح بعد..

فجر: والله محتاره..

نوف: انتي فكري على مهلك وما في احد راح يضغط عليك ويله نامي الحين وارتاحي وانا بعد بروح انام...

فجر: تصبحين على خير..

نوف: لالا اذا الزواج يعلمك الرومنسيه يا ريتنا زوجناك من زمان..

فجر: اقول ما ودك تنقلعين عن وجهي ..ما بقى الا البزارين..

نوف: تدلعي من حقك تدلعين علينا لانك اول وحده تتزوج في الشله حتى عبير الكبيره ما تزوجت..

فجر: الله واكبر كبيره..تراها اكبر مني بسنتين او ثلاث..

نوف: على طاري الدراسه بتوقفين ولا راح تكملين..

فجر: لا اكيد راح اكمل..الا تعالي تراني ما بعد وافقت..

نوف: بس عيونك تقول موافقه..

فجر: ترى اليوم خاطبيني..

نوف: عادي واذا صار ياما بنات من اول ما يسألونهم اهلهم يقولون الشور شورك يا يبه..يعني موافقين حتى بدون ما يفكرون لو ثانيه وحده..

فجر: ترى راسي عورني من كثر بربرتك يله روحي غرفتك انا وحده تعبانه وابي اناااام..

نوف: زين زين طلعت.."يوم وصلت عند الباب"طلعت يا العروسه العربجيه وما اقول الا الله يعينك يا فيصل "وسكرت الباب"

فجر محتاره: يعني لهدرجه انا عربجيه..بس انا ما احس نفسي عربجيه..اجل اصير مايعه مثل نويف لالالا مستحيل انا ما احب هالحركات انا ابغى اصير مثل العنود مثلي الاعلى في الحياة

وبعدها نامت من كثر التفكير في فيصل وغير فيصل يعني نفسها<<احلفي..

&&

↔

صباح يوم الخميس..

فيصل ينزل بسرعه من الدرج وراح عند امه وهو يفحط..

ام فيصل: خير خير وش فيك وش صاير.

فيصل: هاه يمه ردوا عليك..

ام فيصل: الحمد لله والشكر بس احد يرد على احد الصباح مجنون انت ولا مخك فاصل وبعدين يمكن يطولون..

فيصل: يطولون يعني كم ساعه؟؟

ام فيصل: كم ساعه!!! صدق يا وليدي انك مخفه على قولتهم قل كم يوم كم اسبوع مو كم ساعه..

فيصل: اسبوع !! ليش اسبوع..

ام فيصل: فيصل ترى طلعت الشيب في راسي ما تفهم انت هذا زواج مو لعبه..

نزلت شجون على صراخهم..

شجون: خير وش صاير على الصباح وليش هالصراخ..

ام فيصل: اخوك الحمدلله والشكر يسأل اذا اتصلوا وردوا علينا ولا لأ...

شجون: فصول اركد يا المرجوج خل البنت تفكر على راحتها..

فصل: جتنا الثانيه..طيب انا مستعجل..

شجون: والله لو انا خليتهم شهر بس افكر ..هذا مستقبل مو لعبه..

فيصل: ما اقول الا الله يعين اللي بتاخذينه بيطلع له قرون في راسه..

شجون: اصلا يحلم انه ياخذني..

ام فيصل: بسكم عاد هواش وانت يا فيصل اركد ولا ترج الناس معك..

فيصل: انشا الله يمه...انا طالع تبون شي..

شجون وام فيصل: سلامتك..."وطلع"

شجون تبي تعصب بأمها شوي: يمه صدق الجماعه ما ردوا..

ام فيصل عصبت: جتنا الثانيه ..اقوم ازين لي..

شجون: يمه تعالي امزح معاك..

&&

وبعد اسبوع من الاحداث...

نزلت فجر على امها..

وجلست جنبها..

فجر:يمه..

ام فواز: سمي..

فجر: يمه انا قررت بموضوع فيصل..

ام فواز: ايه وش قررتي؟؟

فجر: قررت...

وبعد اسبوع من الاحداث...

نزلت فجر على امها..

وجلست جنبها..

فجر:يمه..

ام فواز: سمي..

فجر: يمه انا قررت بموضوع فيصل..

ام فواز: ايه وش قررتي؟؟

فجر: قررت...............

ام فواز: يمه قبل لا تقولين أي شي فكرتي زين سواء كنتي موافقه ولا لأ

فجر: يمه انا فكرت زين واستخرت حسيت ا ني مرتاحه عشان كذا انا موافقه..

ام فواز وهي طايره من الفرحه وعيونها بدت تمتلي دموع: الله يبشرك بالخير..الف مبروك يا بنيتي والله يوفقك ويرزقك الذريه الصالحه قولي امين..

فجر: الله يبارك فيك يمه وامين..

ام فواز: اجل اروح ابشر الجماعه..

فجر وهي مستحيه ومنزله راسها: اللي تشوفينه يمه..

نزلت نوف بسرعه ووقفت في نص الدرج : خير على ايش الزغاريط..

ام فواز: حق مين بعد حق فجر عروستنا..

نوف: صدق فجوره قررتي ولا قلتي لي..

فجر: حبيت امي هي اول وحده تدري..

نوف: ما عليه بأسامحك عشانك عروس..

ونزلت وسلمت على اختها : الف مبروك يا قلبي والله ما ادري البيت بدونك وش بيصير..

فجر: احد قالك اني بروح لهم اليوم..

نوف: بس انك رايحه رايحه...

فجر: يله تزوجي والحقيني..

ام فواز تطالع بناتها وبدت تتخيلهم عرايس ويجبون عيال وتخليهم يلعبون في بيتها ويخربون هذا ويكسرون هذا ويملون عليها البيت وقعدت تصيح..

فجر: يمه الحين ليش تبكين..

ام فواز: والله يا بنيتي من الفرحه..

نوف: خبرتي يمه الجماعه..

ام فواز: لا الحين بروح ابشرهم..

واتصلت ام فواز على ام فيصل..

ام فواز: الووووو

ام فيصل: الووو..

ام فواز: السلام عليكم..

ام فيصل:وعليكم السلام...ام فواز!!

ام فواز: ايه ام فواز وشلونكم وش اخباركم عساكم بخير..

ام فيصل: والله الحمدلله بخير بشريني عنك وعن العيال والبنات..

ام فوا: الحمدلله كلهم بخير..

ام فيصل: بشري قررت فجر..

ام فواز: ايه والله قررت وتوها قايلته لي..

ام فيصل: خير انشا الله وش قررت..

ام فواز: والله البنت موافقه وين راح نلاقي اهل مثلكم ولا ولد احسن من ولدكم..

ام فيصل ودموعها تجمعت بعيونها: الله يبشرك بالخير ويفرحك بعيالك كلهم انشا الله مثل ما فرحتيني بوليدي..

ام فواز: اامين والمسلمين اجمعين.. اجل تامريني بشي يا ام فيصل..

ام فيصل: ابد سلامتك بس سليمني على مرت ولدي..

ام فواز: ابشري انشا الله يوصل..

&&

ام فواز: يا حليلها ام فيصل فرحت فرحه بصراحه ما توقعتها بتفرح لهدرجه..

نوف: يحق لها تفرح بتاخذ شيخة البنات فجر لازم تفرح..

ام فواز: حتى ولدها فيصل ما فيه شي يعيبه...

وبعدها دخلوا ابو فواز وفواز ومعه مرته وعياله وطلال..

ام فواز: هلا والله بدور بنيتي تعالي واجلسي جنبي..

بدور: هلا والله خالتي وشلونك وشلون البنات..

ام فواز: انا بخير والبنات شوفيهم مثل القمر بسم الله عليهم..

بدور: هاه فجوره كيفك انتي ونوف..

نوف وفجر: بخير..

ام فواز: شهوده ..دحومي تعالوايا بعد اهلي والله..

ابو فواز ما زال واقف عند الباب: يا عيال موكنا منسيين..

فواز وطلال: الا والله يبه..

ابو فواز: احم احم..

ام فواز: تفضلوا ما فيه احد..

ابو فواز: دارين انه ما فيه احد بس عطينا وجه..

وبعدها جلس ابو فواز وسلموا عليه فجر ونوف.. وفواز وطلال سلموا على امهم..

طلال جلس جنب فجر يبي يجننها شوي: هلا والله بحرم فصيّل..

فجر وهي ميته حيا.:طلال اعقل عني..

طلال: يعني صرتي عروس تدلعين علينا ترى احنا اخوانك ولا نسيتي..

فجر: بتسكت ولا اقوم..

طلال: لا قومي..

قامت فجر الا ابو فواز: وين يا بنيتي..

فجر: بابا شوف طلول خله يعقل عني..

ابو فواز: طلال جوز عن اختك تراها دلوعتي..

نوف: لا والله وانا وش اطلع..

طلال يبي يفتن: انتي ولا شي..الحين فجر هي الكبيره وهي العروس وهي كل شي..

نوف عصبت وبتبكي الا شوي:بابا وش غلاي عندك..

ابو فواز: والله ان غلاكم واحد هي الكبيره وانتي المدلعه..

نوف: ايه اشوى..

ابو فواز: إلا ما أشوف لين وينها؟..

فجر ماتت ضحك..

نوف: يبه لين في بيت خالي ابو مشاري..

ابو فواز: وانا كل ما سألكم عنها تقولون في بيت خالي هي تبات عندهم..

ام فواز: لا والله تنام في بيتنا بس من ترجع من المدرسه وهي عندهم..

فجر: حتى باص المدرسه ما صار يوديها لبيتنا على طول بيت خالي..

طلال: هذي البنت ما تستحي على وجهها ما فيها أي ذرة حيا طول الوقت عند مشيعل وهو مبسوط..

نوف: ليه منقهر..

فواز: بس كل شي له حدود يمه لا عاد تخليها تروح بيت خالي كل يوم خليها بين فتره وفتره..

ام فواز: ليه هي تشاور احد كل شي على كيفها..ما تدري عنها الا وهي متصله من بيت اخوي..يمه انا في بيت خالي..والله عجزت معها ما ينفع معها شي..

طلال: يمه تبيني أدبها لك..

ابو فواز: اسمع يا طليل لا تجي بنتي ولا تقرب منها ولا عليك منها انا ابوها وهذي امها ومالكم دخل فيها سا معيني..

طلال: ابشر يبه كل هذا عشان المنفعصه ذي..

فواز: اسكت لا يسمعك ابوي وبعدها صدق يفعصك..

طلال: وانت صادق..

ام فواز: اقول ما دامكم مجتمعين عندي لكم خبر ولا بكنوز الدنيا..

ابو فواز: فرحينا الله يفرحك..

ام فواز: فجر بنتي..

فجر في هذي اللحظه ودها الارض تنشق وتبلعها وما تدري وين تودي وجهها من الحيا..

ام فواز: بنتي فجر وافقت على فيصل..

ابو فواز: صدق الله يبشرك بالخير فيصل والنعم فيه رجال وما يعيبه شي...مبروك يا بنيتي..

فجر قامت وباست راس ابوها: الله يبارك فيك..

فواز: مبروك يا فجير..

بدور: مبوروك يا قلبي والله يوفقك انشا الله ..

فجر: الله يبارك فيكم..

طلال: مبروك يا حرم فيصل..

فجر: الله يبارك فيك..

نوف: فجر ما لاحظتي شي..انتي فجر وهو فيصل..

فجر: احلفي بقوه واصدقك..تصدقين ما دريت اني فجر وهو فيصل..

نوف: لا يا الحولا ما اقصد كذا اقصد انتي بحرف الفاء وهو بعد بحرف الفاء..

فجر استحت: ايه صح..

طلال: احلى بعد حتى الحروف مشتركين فيها..

فجر: لا والله خلص اشتراكي..

طلال: عروس وتنكت اقول اعقلي لا يدري رجلك انك عربجيه بعدين يهون..

فجر: انا عربجيه يا اللي ما تشوف..

طلال: لا يكون تحسبين نفسك رومنسيه ولا رقيقه تراك من شلة العنود..

فجر: عادي وش فيها اصلا انا كذا واحب كذا..

طلال: وزوجك بطلقك كذا..

نوف: طلال خلاص اقل عن اختي..

بدور: اقول خالتي ما قالوا متى راح يجون..

فجر هنا توها تنتبه انهم بيجون وفيصل احتمال يشوفها حست انها حطت نفسها في موقف لا يحسد عليه..

ام فواز: لا والله ما قالت بس اكيد بتتصل ونحدد موعد معاهم..

بدور : خير انشا الله..

فواز: بدور يله تراني تعبان حدي من الشغل خلينا نروح ننام..تصبحون على خير يا جماعه..

الكل: وانت من اهل الخير...

بدور اخذت عيالها: تصبحون على خير..

الكل: وانتي من اهل الخير..

وبعدها..

ابو فواز: وانتي يا ام فواز ما ودك نروح نرتاح بعد..

ام فواز: الا والله من صباح الله وانا صاحيه..

ابو وام فواز: اجل تصبحون على خير..

فجر ونوف وطلال: وانتوا من اهل الخير..

وراحوا..

طلال بنظره شريره: واخيرا توحدت فيك يا فجير وبطلع ريحتك..

فجر: ليش وش قالولك عني عشان تطلع ريحتي..

طلال: اقول فجر ترى فيصل زوجك يقول سلم لي على زوجتي<<طبعا كلها صوارخ..

فجر استحت: كذاب..

طلال: ليش اكذب احسن لا تصدقين كان قايل لي شي بعد بس ما راح اقول لك..

فجر: صدق طلال هو قايل شي ولا لأ..

طلال: اقولك هو قايل سلم لي على فجر وقلها..

فجر تحمست: ايه..

طلال: قلها..

فجر بدت تعصب: أيــــــــــــــه..

طلال وهو قايم يستعد لنحشه: يا العربجيه.."وهج"

فجر: هين يا طلالوه تلعب باعصابي جعلي اشوف فيك يوم..

طلال: في الاحلام يا قلبي في الاحلام..

نوف: تصدقين حتى انا تحمست..

فجر: جتنا الثانيه..ترى ماني ناقصه يله خلينا نروح ننام..

نوف: اقول ترى اهلي نسوا لين في بيت خالي..

فجر: خليها تنام عندهم يعني شي جديد..

نوف: ما اقول الا الله يعينهم عليها.

وبعدها طلعوا ينامون بس فجر صار عندها انها تنام شي من المستحيلات من يوم خطبوها تخلص من شي تفكر في شي ثاني....

&&

ناخذ لفه على كل بيت..

في بيت ابو مشاري وخصوصا ريم ورغد ما كان عندهم أي شي جديد غير الدراسه والاختبارات قربت.. ورغد شاده حيلها عشانها ثالث ثانوي صح الفصل الاول بس لازم تجيب نسبه عشان تساعدها في الفصل الثاني..وبالنسبه لتركي كان يوصلها سلامه عن طريق الهنوف وطبعا الهنوف ما كانت تقول كل شي يقوله تركي ..كانت تختصر الكلام في جمله وحده"تركي يقول سلمي لي على اللي في المدرسه"لانه صعبه تقول تركي يسلم عليك فهي الحين يقال لك غيرت من الود قضيه..

اما بالنسبه لريم ابعدت عن سليمان كثيييير.. حتى من ايام الشاليه كانت الظروف تجبرهم ما يشوفون بعض او يتكلمون مع بعض صح انها قوت علاقتها مع اخته مها بس تقريبا ما استفادت شي لان سليمان مستحيل يقول لاخته وما هو جرئ مثل تركي اللي امه تدري انه يحب رغد..وريم طول الوقت تفكر بسليمان حتى انها منشغله عن درستها بس تفكر فيه..

اما مشاري من زمان وهو مقرر انه يخطب الهنوف بس ما بعد جا الوقت المناسب وما وده يتكلم الحين يخاف يشغلها عن دراستها عشان كذا اجل الموضوع شوي..

اما مشعل فكبده منفقعه من لين اللي اربع وعشرين ساعه عنده ما تخليه لا يطلع ولا يروح ولا يجي وحتى اصدقا ما عاد صاروا يجونه لانها ما تخليه يبعد عنها خطوه وحده وخصوصا الفتره هذي ما تخليه يتنفس وهو كاره هذا الشي بس مسكين صابر عليها يخاف يزعلها..

&&

سليمان كانت حالته حاله كان يدرس .. مره يفكر بريم ومره الدراسه تلهيه عن ريم ومره ريم تلهيه عن دراسته..واللي اكثر شي يفكر فيه انه مشتااااق لها ووده يشوفها في اقرب فرصه بس اكيد من سابع المستحيلات لانه ما يدري وشلون وكيف ومتى..

&&

اما وليد كان يفكر برغد وانه يتقرب منها وقرر انه يخطبها في اقرب فرصه عشان ما تروح منه بس بس اول شي لازم يخليها تتقبله بس كيف هذا اللي ما لقى له حل ابد..

&&

فيصل...فيصل مسكين من سمع بالخبر وهو بدى يفكر في كل شي ..كيف بعيش مع فجر .وكيف بتكون حياتهم ..هل بتحبه مثل ما يحبها ..يعشون بسعاده ولا بشقى..كم بيجبون عيال وش يسمونهم وين بيسكنها فيه..كيف يرضيها ويخليها مرتاحه ومبسوطه معاه ووووووووالخ تعب مسكين من كثر ما يفكر واكثر شي انه بيشوفها وهذا اللي محمسه مره وتاعب عقله..

&&

العنود كانت تكابر على مشا عرها تجاه طلال ..تحس ان الحب عندها ضعف وش ما تقدر تصرح فيه وحتى في تفكيرها بطلال بعض الاحيان تكابر وتقول وشلون خليته يسيطر على عقلي ..وحاولت تشيله من راسها بس اكيد من سابع المستحيلات لانها ترجع تفكر فيه من بكره..

عبير صارت تعيش احلام ورديه ..وتحس ان طلال يحبها تصدق هالاحساس ومره تكذبه وتقول يتهأ لي ..طبعا ما راح تقول لاحد كمان لانها تحس يضعف من شخصيتها بس هي اقل من العنود بكثير..وساعات تقول واذا احب عادي كل البنات يحبون ومره تتراجع وتقول انا عبير يقولون عني ميته على واحد وهو ما يدري عني مستحيل..يعني بالعربي كانت تناقض نفسها وهذا اللي يعيشها في داوامه لانها اصلا ما تدري وش تبي..

&&

بعد ايام..

اتصلت ام فيصل على ام فواز وحددوا انهم يزورونهم يوم الخميس واليوم اللي اتصلت فيه كان الاثنين..

فجر من يوم سمعت بالخبر جتها صاعقه ما تحركت من مكانها كانوا يكلمونها ما ترد لحد ما جاب طلال مويه وكبها عليها ذيك الساعه صحت..

فجر: ودي اروح السوق اشتري لبس..

نوف: مشا الله ما يحتاج دولابك مليان ملابس وكلها حلوه اختاري احلى شي والبسيه..

فجر: هذا رايك..

نوف: ايه..

فجر: طيب وش البس..

نوف: ترى اليوم الاثنين وهم بيجون الخميس فيه يومين قدامك ..مستعجله ليش..

فجر: مو مستعجله خايفه..

نوف: عادي شعور طبيعي..

&&

طبعا ريم ورغد والعنود وعبير يوم عرفوا انه يوم الخميس فيصل بيشوف فجر قرروا انهم ما يفوتون هاليوم..

ريم: اجل الوعد الخميس..

العنود: اكيد..

عبير: بس اخاف تنحرج البنت اكثر..

رغد: لالا عادي..

ريم: فجر بتنبسط اكثر اذا شا فتنا..

رغد: لا عاد في هذي ما صدقتي ..اصلا فجر اذا شافت وجيهنا ما ادري وش بيصير فيها ..توقعوا انها في الانعاش او في الانعاش ما تروح بعيد..

عبير: صادقه والله يا رغد وخصوصا العنود وريم يخوفون بلد مسكينه خايفه خلقه يجون ذولي يكملون عليها..

رغد: لا تطلعين نفسك برى حتى انتي معاهم..

العنود: تراكم تحشون فينا واحنا ساكتين لكم.

ريم: ايه يا بنت عمي وريهم شغلهم..

العنود: فجر اصلا تبيني اوقف جنبها وادعمها دعم مادي ومعنوي..

ريم: لالا مادي ماله داعي بس معنوي..

العنود: معنوي ونفسي بعد..

رغد: انتي يا العنود تدعمين فجر دعم معنوي انتي بتدعمينها بالسياره وعلى طول المقبره..

ريم: المهم يوم الخميس نكون هناك..

الكل: اكيد..

&&

يوم الخميس

جا يوم الخميس المنتظر كانوا الحريم تحت والبنات فوق..

فجر: بنات حلو شكلي..

العنود: تهبلين كأنك قرده..

فجر: قرده في عينك يا البقره..

العنود: الله يسامحك انا بقره..بعدّيها لك لانك عروس بس..

رغد: فجر ما عليك منها تهبلين بسم الله عليك ملكة جمال..

ريم: بتجلطين فيصل..

عبير: الا بتاخذين عقله ..

فجر: والله رفعتوا معنوياتي شوي مو هذي العنز اللي جنبي..

رغد: بس فيه شي ناقصك..

فجر بروعه: وشو؟؟

رغد\: لازم تنسين العربجيه شوي..

فجر: ما اقدر حاولت بس ما عرفت..

العنود: لا تحاولين لاني انا زارعته فيك من يوم كنتي ضغيره وانا اعلمك الحركات عشان تصرين مثلي..وفعلا اكتشفت اني مربية اجيال ناجحه..

فجر: اقول روحي زين اذا انتي مربية اجيال عز الله الاجيال هذي فساد في المجتمع الاسلامي والعربي والعالمي بعد..

ريم: صادقه فجر لو العنود تربي طفل واحد مو جيل كان هذا الولد طلع افسد طفل في الكون منها ومن تربيتها ويحطون صورها معه في الاعلانات والجرايد ويقولون هذا الطفل اللي ربته العنود شوفوا وش طلع..

العنود: اقول فجر ترى فيصل يستناك<<تبي تخوفها..

فجر تذكرت: ايه صح يا ربي بنات حلو شكلي..

رغد: وللمره المليون اقولك تهبلين..

فجر: طيب مشيتي..

نوف دخلت عليها: تهبلين بس يله انزلي..

فجر: الحين....!!!!

نوف: لا بكره.ايه الحين يله بسرعه...

فجر : لا لا خلاص هونت..

نوف: هو لعب بزارين يله بسرعه انزلي..

رغد: يله يا فجر ترى كلها خمس دقايق وانتي طالعه..

ريم: ايه ترى شي عادي لا تخافين..

عبير: سمي بالله وتوكلي عليه..

العنود: فجر لالا تروحين ترى بياكلونك يا بلسانهم ولا كلوك بعيونهم..

فجر خافت: لا هونت..

ريم: عنيد اسكتي واللي يعافيك..

العنود: احسن خلها عشان مره ثانيه تتأدب..فجر يمه يمه ترى يخوف يخوف..

فجر وشوي بتصيح: ما ابي ما ابي..

رغد: العنود صدق انك با يخه خلي البنت تنزل..

العنود تصارخ: يله عاد بلا دلع بنات انزلي رجلك يستناك بسرعه يــــــــــــــله

فجر خافت منها: طيب طيب..

رغد: كان عطيتيها العين التركواز من زمان..

العنود: لا غيرتها شريت عدسات جديده..

رغد: وش لونها..

العنود: خضراء..

نزلت فجر عند الحريم والبنات وراها يطلون عليها من فوق..

سلمت على ام فيصل وشجون وقعدت شوي وبعد دقايق طلع طلال في نص الصاله

طلال: احم احم..

تغطوا اللي كانوا في الصاله واللي فوق ميتين عليه كان كاشخ ومرسم بالشماغ والثوب وطالع شي خطير ومعروف عنه انه احلى العيال..

عبير: مشا الله يهبل..

العنود: اليوم طالع غير..

ريم ورغد مايطالعون معاهم:كشفناكم..

عبير والعنود: بسم الله..

العنود: خير انتي وياها..

ريم: وش تطالعون الولد كلتوه بعيونكم..

العنود: تعالي شوفي واحمكي..

ريم طلت: هذا طلال..

جات رغد تطل: مشا الله عليه ..بسم الله عليه االله يحفظه..

طلال: فجر تعالي..

فجر وجهها يتقلب كل الالوان: انا ..

طلال وفيه الضحكه: ايه انتي اجل انا..

فجر: طيب جايه.."وراحت له"

طلال: فيصل يبي يشوفك..

فجر: انا ما ابي اشوفه..

طلال: هو على كيفك هذا من حقه..

فجر: طيب خايفه..

طلال: انا معك وفواز وابوي امشي بس انتي..

فجر مشت معاه وتحس قلبها قدامها يمشي من كثر ما يدق وتحس بحراره مو طبيعيه وريقها ناشف من الخوف ...

ودخلت المجلس ومشت اول خطوه ورفعت راسها شوي شافت فيصل واخونها وعلى طول نزلته..وصات تمشي وتحس ان مجلسهم صار كبير وانها مشت كثير وهي ما تحركت الا خطوتين..

طلال وهو جنبها: فجر تحركي ترى ما هي زفه..

فيصل من شاف فجر طالعها شوي بعدين هو استحى ومشاعره وخوفه ما يقل عن خوف فجر..

وبعده وصلت فجر وجلست جنب ابوها بحيث يكون فيصل مقابها على اليمين..

فجر: السـ سـلام عـ عليكم..

فيصل: وعليكم السلام..

وصاروا ساكتين..

طبعا البنات وما يخفى عليكم من اللقافه طلعوا برى في الحوش عشان يطالعون من الشباك ولا ن الشباك عاكس اللي برى يشوف اللي داخل بس الي داخل ما يشوفهم..كان الشباك عالي شوي واضطروا انهم يجبون كرسي ويرقون عليه..

رغد: انا الاولى..وطلت رغد وشافت فجر مستحيه وقامت تضحك..

العنود سحبت رغد وطلت..اول شي شافت طلال بعدين فجر بعدين دورت فيصل ما شافته لانه معطيها ظهره..

بعدها عبير سحبت العنود وطلت اول شي طلال بعدين فجر بعدين رجعت طلال وطولت..ريم ما تحملت تصبر طلعت معها في الكرسي وصاروا يطالعون والعنود ما استحملت هم يشوفون وهي لا قامت وطلعت معاهم فوق الكرسي..شوي واختل توازنهم وطاحوا الثلاثه على الارض وخبطوا خبطه اليمه لدرجه ان اللي داخل المجلس سمعوا..

ابو فواز: وش ذا صوته..

طلال: ما ادري..

فواز: قم شف..

فجر عرفت انهم البنات بس صارت تتوعد فيهم وبعدها قررت تطلع بدون ما تتكلم مع فيصل ولا كلمه لان فيصل بطبعه حيوي وفجر لو تموت ما تكلمت..

فجر: استأذن..

وطلعت..

طلال طلع يشوف وش اللي طاح..طلع شاف البنات طاحين والكرسي طايح وميتين ضحك..

طاحت عينه على عبير اول مره يشوفها بدون غطا لانها دايم تتحجب وبعض الاحيات تتلثم.. بس اليوم شافها كلها وبدون شي ..

العنود اول وحده انتبهت لطلال..

رغد كانت تضحك وبعدها سكتت وانحاشت وخلت الثلاثه طايحين..

عبير ميته من الفشيله وريم ما زالت تضحك ولا حست بأحد..

طلال كتف ايدينه وهو فيه الضحكه: كل هذا لقافه..

بعدها سكتت ريم شوي وبعدها رجعت تضحك من الفشيله وقامت بسرعه والبنات لحقوها..

طلال: الحمدلله والشكر مهبل واختي طالعه عليهم..

ودخلوا الصاله وتقابلوا مع فجر.

فجر: حسبي الله على بليسكم فشلتوني..

رغد ميته ضحك..

العنود: والله ما صبرت وكنا خايفين عليك فا حبينا نتطمن عليك..

ريم: وقلنا نوقف معاك في محنتك..

فجر: مشكورين وما تقصرون بس فشلتوني..

رغد توها تسكت: اووووووه.. يا بنت الحلال الولد والله ما درى عنك طول الوقت منزل راسه وانتي منزله راسك..

فجر: صدق كان منزل راسه.

العنود:ما رفعه ابد..

فجر ابتسمت: يا حلياه..

عبير: احلى احلى بدينا يا حليله اليوم ويا حبي له بكره..

فجر: عادي زوجي كيفي..

ريم: حلو؟؟

فجر: يجنن خيال يعذب..

العنود:لا البنت قلبت رومنسيه لهدرجه الارسال عند فيصل قوي..

عبير: شكلك فاتحه البلوتوث..

ريم: هههههههاي حلوه خطيره..

رغد: واستقبلته صح..

فجر: وبعدين معاكم وين اختي بس..

الا نوف جايه: هاه بشري تمام..

فجر:هذي الاخت ولا بلاش .. الحمدلله بس تفشلت ذولي المهبل كانوا يطلون علينا وطاحوا وابوي قال لطلال قم شف وان تفشلت ما عاد ادري وش اسوي وطلعت..

نوف: يا عمري والله ما تستاهلين بس كله من الملاقيف ..ما ادري متى تتوبون.

العنود: اذا صرتي مثلي وانا صرت مثلك ذيك الساعه عقلت..

ريم: اجل اذا حجت البقره على قرونها..

عبير: في هذي صادقه..العنود تصير مثل نوف ما تجي ابد..

رغد: ولا نوف تصير مثل العنود وعاد هذي ماتجي..

العنود: اقول بلا كلام فاضي امشوا خلونا نجلس ترى رجلي تألمني من الطيحه..

ريم: كله منك يا الدبى..

العنود: انتي حصلي جسمي بعدين تكلمي ..

عبير: اعصابك يا مريام فارس..

العنود: تصدقين عاد دايم البنات يقارنوني فيها بس اكيد مافيه وجه مقارنه انا احلى منها..

ريم: وربي وربي ما يناسبك الدلع..

العنود بعربجيه: وكذا يا ام الشباب..

ريم: ايه كذا تهبلين.. اقول خلونا نروح نجلس مع شجون..

رغد: تصدقون نسيتها..

ريم: حتى انا والله ما كأنها بنت خالتي..

البنات: يله..

راحوا البنات ونادوا شجون وطلعوا فوق..

الحريم اتفقوا انها تكون خطبه بس لحد ما تجي الاجازه اللي بين الفصلين يتملكون والعرس يحددونها بعدين..

وبعدها راح الكل على بيته..

&&

بيت ابو مشــــــــــاري

رغد: ايوه واتفقوا على كذا..

ام مشاري: زين احسن للبنت بعد يكون عندها اجازه العيد وبعدها اجازة اللي بين الفصلين..

ريم: ايه وعسى تلحق احس انه ما في وقت الاختبارات قربت وبيكون صعبه تلحق وحتى في الاجازه بعد يبلها وقت اكثر..

رغد: احسن شي تسافر وتتقضى من برى ترى يكون احسن واسرع واحلى..

ريم: يمكن كذا اسرع..

ام مشاري: الله يوفقها بس.

ريم ورغد: امين..

رغد: والله انهاا تنرحم اليوم خايفه بشكل مو طبيعي..

ريم: والعنود تزيد عليها..

ام مشاري: العنود الله يهديها معانديه..

رغد: في هذي صادقه ميه بالميه..

ام مشاري: عقبالكم ا نشا الله ونفرح فيكم..

رغد: انا توني صغيره..

ام مشاري: شوفي فجر بسم الله عليها اصغر منك ولا قالت شي.

رغد: يمه لاحقين على هالكلام..

ريم: بتتزوجين غصب ورى خشمك فاهمه..ماعندنا بنات يتدلعون الا انا ..

رغد: مالت عليك وعلى اللي بياخذك الحمدلله بياخذ وحده عقلها مفقود وحاطين اعلاناته بالجرايد..

ريم: بايخه لانك مقهوره..

رغد: الحمدلله وش انقهر عليه يا البزر..

ريم: المهم انا رايحه انام لان جسمي مكسر من الطيحه حسبي الله على ابليس العنود..

رغد: اشكالكم اليوم بصراحه تحففففففه..ياريت كان معي كاميرا كان صورتكم..

ام مشاري: وش طيحته؟؟

ريم ترقع: هاه...لا بس كنت جالسه على الكرسي جات العنود وطيحتني..

ام مشاري خافت: عسى ما عورك شي..

ريم توهقت: لا يمه ما فيني شي كنا نمزح بس نمزح..

ام مشاري: هالامور ما فيها مزح...

رغد: يمه لا تحاتين هذولا سكن ما يأثر فيهم..

ام مشاري: بسم الله علينا..

رغد: انا رايحه انام ..يمه تصبحين على خير..

ريم: وانا بعد تصبحين على خير...

ام مشاري: وانتوا من اهله.

&&

فجر من يوم راحوا البنات وهي جالسه تفكر بفيصل وحست انها بدت تحبه وانها صارت تناظره بنظره غير عن قبل وبدت تحس انه زوج المستقبل وقعدت تفكر بالتجهيز ووين راح تجهز وخصوصا بعد ما اقترحت عليها رغد انها تجهز يا في جده او دبي ونامت هي مقرره وين راح تروح..

&&

فيصل الدنيا مو سايعته من الفرحه يحس انه شوي ويطير.وما بعد صدق انه خلاص راح يتزوج فجر وقعد يتذكر وجهها وهي تدخل عليه صحيح كانت نظره بس اكفت فيصل في انه يحفظها عن ظهر قلب..

يوم السبت

في مدرســـــة العيال..

سليمان:تروك دريت باللي صار..

تركي: لا ..وش صار..

سليمان: ما عندك خبر ان فيصل خطب..

تركي: مشا الله خطب!!

سليمان حب يلعب بأعصابه:بس يا تركي انت ما تدري من اللي خطبها صح..باين عليك..

تركي خاف:لا ...مين...بسرعه تكلم؟؟

سليمان:مثل ما انت عارف ان اهلها اكيد راح يوافقون عليه وانه هو اولى من الغريب وما راح يردونه لو أيش..وخصوصا ولاحظ خصوصا ان فيصل والنعم فيه ما ينعاف..

تركي بعصبيه: تراك حرقت اعصابي..

سليمان بكل برود: طفها.

تركي وصلت معه ومسك سليمان من ثوبه: بتتكلم ولا شلون..

سليمان: خلاص خلاص بتكلم بس فكني..

تركي ترك سليمان: أنطق بسرعه..

سليمان: لهدرجه تخلي بنت تفرق بينا..بصراحه ما توقعت اني رخيص عندك لهدرجه..

تركي حس ان عيونه بتطلع منها نار:سليمان لا تخلي اليوم اخر يوم بحياتك..

سليمان: يعني من بتكون واضحه..فيصل كان واضح عليه انه يحب فجر..

تركي هدى وحس انه خلااااص ارتاح: فجر!!

سليمان: ايه ما لاحظت فيصل كيف يطالع فجر وفجر ساحبه عليه<<مسكين هالفيصل كل الناس حسوا الا هي..

تركي: الا صادق ..والله يستاهل فصول..

سليمان: فصول..هو اصغر عيالك..

شوي واكتملت الشله..

نواف: هلا بالشباب وينكم تعبنا وانا ندور عليكم..

تركي: يا اخي احس ان في مخك وش ..يسأل وينكم واحنا قدامه..

سعود: تركي يا الله صباح خير وش فيك علينا.

تركي: كيفي كارهكم ..ما اشتهي اصبح بوجيهكم..والله حاله..

سليمان: تروك وش فيك عيهم ..صح انهم ثقلين دم وما ينبلعون بس عادي اضغط على نفسك..

نواف: سعود ما تحس ان تهزئنا كثير..

سعود: الا ملاحظ ..خلنا نمشي بكرامتنا احسن..

تركي: اوقل اقعدوا بلا دلع ..نمزح والله نمزح..

نواف: اهم شي انك داري ان زعلنا لا يطاق..

تركي: والله اللي اعرفه ان وجهك لا يطاق قم قم لا بارك الله فيك..

سليمان: تركي تصدق ذكرتني بالشياب ايام الشاليه..

تركي: والله صدق ايام بصراحه شي..

نواف: والله من النذاله رحتوا ولا اخذتونا معاكم..

سعود: صدق من جد ليش ما اخذتونا معاكم..

سليمان: انا والله صديقي مشاري عازمني..

تركي: والله انا اختي عازمتها صديقتها اللي هي اخت صديقي مشاري اللي هي اخت هذيك اللي جات في المدرسه..

سليمان دف تركي دفه لما بغى يطيح منها بس مسكه نواف..

سعود: الحين انتوا راحيين مع اهل البنت..

نواف: مع ذيك المزيونه ولا قلتوا لنا..

سليمان من حقده على تركي لانه قالهم قام وطا رجله ودفه وهو واطي رجله عشان اذا طاح يعوره ظهره بس تركي طلع ذكي وتمسك فيه..

سليمان وهو معصب: وش نقول لكم تعالوا معنا صعبه..

تركي: خلاص حبايبي المره الثانيه..

سعود: صح يعني اخت البنت تطلع صديقة اختك..

نواف: ايه حتى اختها مزيووووونه..

تركي طلع له قرون..مسكهم من رقبتهم ودفهم: ممكن تمشون وانتوا ساكتين..

سليمان ميت ضحك: احسن تستاهل..شف شف يتكلمون عن حرمتك وانت ساكت.ازواج اخر زمن..

تركي مشى عنهم وراح..

نواف: وش فيه هذا..

سعود: ما عليك منه تراه قاضي ومنتهي..

سليمان: بس لو قعد هذا القاضي كان ذبحكم..

نواف: ليش ما سوينا له شي..

سليمان: امشوا امشوا ترى علينا فيزيا النشبه..

&&

مرت الايام بسرعه وما بقى على الاختبارات الا اسبوعين..اللي هي اسبوعين المراجعه..

رغد والهونف وتركي وسليمان كلهم غايبين اسبوعين عشان الاختبارات..

اما ريم فهي فالتها يوم تروح المدرسه ويوم تغيب ولا همها لا مذاكره ولا غيره لانها تمشي تحت قوانين اللي طلعتها العنود فا ما يحتاج تعب عمرها..

العنود نفس الحاله طول الايام غايبه الا اذا صديقاتها اعزموها عزيمه على المدرسه راحت وبالقوه بعد..

عبير في الجامعه فا اختبارتها كل يومين في الاسبوع او يوم واحد..واهم شي عندها انها تخلص قبلهم وتقهرهم..

نوف وشجون شادين حيلهم شوي خايفين يرسبون وبعدها ما راح يكون فيه سفره..

فجر مسكينه مره تذاكر ومره تفكر ومحتاره وتحس ودها تحول انتساب (منازل)بس نوف قالت لها ما يحتاج ياما بنات درسوا وحملوا وهم يدرسون وما حولوا انتساب واقتنعت بالفكره وصارت تذاكر على اساس تنجح لو بدرجه وحده..

العيال اللي بالجامعه وليد وطلال ومشاري فالينها على الاخر لانهم عارفين انهم راح يحملون المواد عشان دكاترتهم حاقدين عليهم ومستحيل ينجحونهم..

مشعل ما ننساه كان يذاكر والمسكين شاد حيله عشان بلاي ستيشن3..تجي لين

يتبع ,,,,

👇👇👇

تعديل المقال