رواية بين ثنايا الايام -31
قالت : صباح النور .. تعال نايف اجلس افطر معيجلست معاها .. ماكان لي نفس الاكل .. فشربت حليب بس
قلت لها : وش فيك جالسه لحالك .. وين الناس
قالت : خالتي ام مشعل ورغد نايمين .. ومشعل راح الدوام
قلت لها : وبعد
ناظرتني .. وقالت : وبعد مين .... امممم رهف برا في الحديقه
سكت وشربت شوي من الحليب .. وقمت من مكاني .. طلعت من المطبخ .. ورحت الحديقه .. كنت بروح الدوام .. شفت رهف جالسه على كرسي بالحديقه ..قريب مني بس معطيتني ظهرها .. كانت تمسح دموعها ..شكلها اثر فيني اكيد تبي تروح المدرسه .. ولا وش مصحيها من الصبح .. دخلت داخل .. ورحت المطبخ .. جلست على الكرسي .. وقلت : نجود .. متى بتروحين الدوام
ناظرت للساعه اللي معلقه على جدار المطبخ .. وقالت : الساعه 8
قلت : قومي الحين
قالت : وليه اروح بدري
جلست افكر شوي .. وقلت لها : جودي ماتحسين رهف تكسر الخاطر
قالت : ومن وين طلعت لك هالمشاعر والاحاسيس المرهفه
قلت : لا جودي اكلمك جد
قالت : ايه والله نيوف .. هي تبي تروح المدرسه
قربت مني وقالت بصوت خفيف : لو شفتها يوم صحت الصبح .. قسم بالله كانت تبكي
قلت لها : قومي نجود ناخذها معانا
وهي تشرب الحليب ..هزت راسها يعني لا .. بعدت الحليب .. وقالت : ما اخاطر .. اخاف مشعل يذبحنا حنا الثلاثه
ضربت راسها وقلت : يا الخبله .. انا المدير .. ماراح اعطيه اذن انه يطلع من دوامه .. الا اذا رجعت رهف من المدرسه
مسكت يدي .. وقالت : بل عليك نيوف .. عليك افكار مو طبيعيه .. صحيح ولد عبد العزيز الله يرحمه
قلت : الله يرحمه .. يللا قومي البسي عشان تجين معانا .. وروحي قولي لها تلبس
قالت لي : بس تعال نيوف .. من بيرجعها من المدرسه
قلت : حنا بعد مين .. امر عليك اول واخذك .. بعدين نمر عليها وناخذها
قالت : مايحتاج تمر علي .. خذها على طول
قلت : ونصير انا وهي لحالنا
قالت : عادي اخو زوجها .. مافيها شي
قلت : لا مايصير .. يللا قومي
قالت : انا بروح ببدل .. وانت روح قول لها
قلت : لا انتي روحي
قالت : نايف ترا مافيه وقت
هزيت راسي ومشيت
وقفت وقالت : 1..2..3.. انـــــــطــــــــلاق
طلعت الحديقه .. ورحت لعندها
قلت : احم .. السلام عليكم
قالت بدون ماتناظر فيني .. وهي تلعب باصابعها : وعليكم السلام
قلت لها : رهف .. تبين نوديك المدرسه
لفت علي .. وقالت : انت توديني
ابتسمت وقلت : لا انا واختي جودي
قالت : لامشكور
قلت بصوت عالي : لــــــــيـــــــــــه
خفضت صوتي .. وقلت : قصدي ليه يعني
قالت : مشعل مايبـ ..
قاطعتها وقلت : بس انتي تبين .. ولا تخافين .. ماراح يعرف مشعل
كانت ساكته تفكر
قلت : يللا بسرعه مافيه وقت
وقفت .. وقالت : دقايق ببدل ملابسي .. وبجي .. انتظروني .. ماراح اتأخر
** رهف **
دخلت داخل بسرعه .. وكاني ماصدقت على الله .. واناراكبه الدرج .. نجود كانت نازله .. مسكت ايديني الثنتين .. وقالت : بسرعه بسرعه رهف روحي بدلي .. لا تتاخرين.. حنا تحت ننتظرك
قلت : اوكي ماراح اتاخر
تركتها .. ورحت الغرفه .. بدلت على السريع .. واخذت شنطتي والعبايه .. نزلت تحت .. شفت نايف ونجود .. واقفين عند باب الصاله .. يوم شافوني .. راحوا ركبوا السياره .. رحت وركبت ورا .. وحرك نايف
مو مصدقه اني رايحه المدرسه .. ان شاء الله مايعرف مشعل .. لاني بورط نفسي .. وبورط نايف ونوجود معي .. جلست اراقب كلام نايف ونجود طول الطريق
.
.
نجود : نيوف شوف الاشاره تشبه لك صح
نايف : ايه هو في الملامح تشبه لي .. بس الجسم مايشبه لي .. انا مو ضعيف .. بس انتي لو تشوفين الكوره تشبه لك في كل شي
نجود : وش قصدك انا دبه .. ان عضيتك لا تقول ماسويت شي
نايف : نجود لا تقربين لي .. ترا ان دعمتنا سياره .. بنروح فيها حنا الثلاثه .. ترا مالي خلق ادفع مصاريف مستشفيات
نجود : اما انا لو دعمتنا سياره .. ابي اموت على طول .. ما ابي ارجع البيت .. ويذبحني مشعل
نايف : اتحداه يلمس شعره منك .. تدرين انا لو دعمتنا سياره وش بسوي؟
نجود : صدق انا وانت دلوخ .. وش هالفال .. نتبلى على اعمارنا
نايف : ايه والله
نجود : بس انا نيوف ابي اموت قبلك
نايف : لا انتي عمرك طويل ان شاء الله .. انا ابي اموت قبلك
نجود : لا ما اقدر اعيش بدون اخوي .. ان شاء الله نموت جميع
نايف : الاعمار بيد الله
نجود : والنعم بالله ..... امممم نايف
نايف : هلا
نجود : وش هدفك في الحياة ؟
نايف : للأسف هدفي في الحياة طلع تسلل
نجود : هههههههههههههه من جدك
نايف : جدي الله يرحمه
نجود : هههههههههههههههههه نايف تنكت ؟
نايف : لا احاول
نجود : اجل ابشرك محاولاتك كلها فاشله هههههههههههههه
نايف : فاشله وانتي ميته ضحك .. ارحمي نفسك
.
.
اتمنى لو نجود اختي .. ونايف اخوي ..لو مشعل خذ شوي من نايف .. او شوي من نجود .. ماطلع عليهم ولا كانه اخوهم ؟.. نايف ونجود يحبون بعض .. ويحبون كل اللي حواليهم .. واحسهم يحبون مشعل بعد .. بس مشعل ثقيل دم وماينطاق مايحب احد .. مثل بنته رغد
**** نهاية الجزء الخامس عشر ****
...:::][ الجزء السادس عشر ][:::...
المدرسه ..الساعه:7:00 صباحاً
** الريم **
كنت جالسه ادور على رهف .. بين البنات بالطابور .. ماشفتها .. ليكون بتغيب .. العاده رهف ما تتاخر .. مسكت يدي صديقتي هند .. وقالت : وش جالسه تدورين
قلت لها : ولا شي
قالت : وش عندنا الحصه الاولى
لفيت ورا .. اناظر جات رهف اولا.. قالت : ريوم اكلمك انا
قلت : هاه .. ايه سمعتك .. عندنا رياضيات
قالت : اووف رياضيات من الصبح
قلت وانا اضحك : قولي الحمد الله مو فيزياء
ضربت كتفي .. وقالت : عاد في هذي صدقتي
شفت رهف حاطه شنطتها على الارض .. وتعدل شعرها ..على طول قلت لهند : لحظه هنوده بروح وبجي
رحت ودفيت رهف من ورا .. قلت لها : صباح الخير
ابتسمت .. وقالت لي : صباح الشين .. خرعتيني مالت عليك
سحبتها .. وقلت : يللا رهوف نروح نصف بالطابور
رحنا صفينا طابور ..انا اتكلم ورهف ساكته .. كنت اقول : تخيلي امس ساروه فشلتني ..طيحت وجهي قدام محمد .. فضحتني ماخلت شي عني الا وقالته ..اخر مره اخذها معنا مكان .. مع اني احس محمد حبها مره
هزيت رهف .. وقلت : رهوفه اكلمك
ناظرتني وقالت : ايه اسمعك
قلت لها : تخيلي مانمت شي .. نعسانه ودي ارجع البيت وانام
ساكته ماترد علي .. شكلها هي بعد نعسانه ..ناظرت قدام ..وشفت مدرستنا الفيزياء واقفه بجنب طابورنا
لفيت لرهف وقلت : شوفي شوفي .. وش تبي ذي واقفه بجنب طابورنا
اوف وش فيها رهوف ماترد علي ابد .. ولا كاني اكلمها .. كانت هند صافه قدامي .. مسكت كتفها وقربت منها
قلت : هنوده تشوفين مدرستنا الفيزياء
رفعت راسها .. وجلست تناظر هنا وهناك ..رجعت راسها على ورا .. وقالت : ايه ايه اشوفها .. ليكون بتاخذنا الحصه الاولى النشبه ذي
قلت : مانبيها .. قسم بالله غاثتنا .. حنا نبي رياضيات
قالت هند : على الاقل احياء
قلت لها : لا حصة الاحياء حلوه انا احبها
قالت : لا انتي اصلاً تحبين كل الحصص .. يادكتورة المستقبل .. انتي ورهف
قلت وانا ابتسم واحرك رموشي : طبعاً .. بكره ما بتسمعين الا اسامينا انا ورهوف .. الدكتوره الريم .. والدكتوره رهف ..على مستوى العالم .. نبي نصير بنفس المستشفى .. صح رهف
ناظرت في رهف ..ساكته .. قلت لها مره ثانيه : صح
قالت : ايه صح
قالت هند : يــــــاي
قلت : هنوده تعالي وين راحت مدرسة الفيزياء .. مو كانت واقفه هناك
قالت هند : ايه والله .. يمكن حست انها نشبه بزياده عن اللزوم .. واستحت وراحت
قلت : تهقين كذا
سمعت صوت صراخها بجنبي ..تقول : الريم وهند من بداية الطابور وانتوا تسولفون .. استمعوا للاذاعه
قالت هند بصوت خفيف : وليه نستمع للاذاعه .. ثقافه بالغصب هي
ضحكت انا .. بس ماتكلمت .. خفت تصارخ علينا مدرسة الفيزياء مره ثانيه .. وتفشلنا قدام البنات
.
.
.
رحنا فصلنا .. اول مادخلنا ..جلست رهف وحطت راسها على الطاوله
جلست .. وحطيت يدي على راسها .. قربت منها .. وقلت : رهوفه حبيبتي وش فيك اليوم
قالت بدون ماترفع راسها : مافيني شي
مستحيل مافيها شي .. من الصبح وهي مو طبيعيه .. انا اعرفها رهف .. اكثر من نفسها
قلت لها : الا فيك شي .. قولي لي رهف
رفعت راسها .. وقالت : تعبانه شوي
ادري فيها تكذب علي ..حسيتها يوم تقول تعبانه شوي .. قريب تبكي .. بس ان شاء الله خير
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك