رواية انتفض قلبي -32

رواية انتفض قلبي -32

ميثه : حي و من متى الريال يشوف الحرمه قبل العرس .؟..
موزه : يالله عليج .. تراج تيلسين عند سلطان و هو مب مالج حتى ..
روضه : بس سلطان ولد عمها .. و رابيه عنده ..
موزه : حتى .. هذا بخيت حاسه ان فيه شي ..
روضه : تصدقين ميثوه ... موزه صدقها .. تعرفين من ملجنا ما يانا الا 3 مرات و كل هالمرات يكون يايب حرماته .. و الا هو عمره ما يانا و هو متعني لنا ..
ميثه : ليش رويض .. تبينه يبات و يصبح يطورج عليج ..؟؟..
روضه : وايه فقته .. لا اباه يطورج و لا ابى اشوف سودته ..
مريم : رويض ماقد ظربج فضول اتشوفين الريال الي بيكون ريلج ؟..
روضه : لا ..

موزه ة بخبث : و انتي مريوم ..؟؟؟..

مريم : انا ..!!..

موزه : اظني الا حفظتيه شكله ..

ميثه : ليش مريم حد خطبج و ما عندنا خبر ..؟؟؟!!!..

موزه : هههههه .. هيه انخطبت .. بس في احلامها السعيده ..

روضه : هههههه .. فارس الاحلام ..

ميثه : الفارس الملثم هههههههه ..

موزه : لا و رفجتكن .. راعي الرنج .. هههههه

مريم : اااااااه .. فديت راعي الرنج يا ناس ..

ميثه : حي و منو راعي الرنج بعد ..؟؟؟؟..

موزه : و منو غيره .. مبارك بن حمد الخييلي ..

مريم : حشى يا طويز .. اسميج فاظحتني ..

و روضه ميته من الغيره .. ما بقى الا مريم تتفدى مبارك بعد ..

ميثه : لا اله الا الله .. مسكين هالريال .. جنكن مب مخلياتنه في حاله ..

مريم : ليش .؟؟.. تره حد يطريه عندج .؟؟..

ميثه : بن عروه .. منو استهم منه مبارك ؟؟..

مريم : واااااااااااااااااااايدين الي مستهمين منه ..

روضه : جب جب ..

موزه : شبلاج ..؟؟..

روضه : و الله انكن ما تستحن .. شو لكن بالريال تطرنه ..؟؟.. من باجي هلكن .؟؟!!..

مريم : بسم الله .. شبلاج معصبه ..؟؟؟..

روضه : انتن .. حشى رفعتن ظغطي .. من تيلسن ما تطرن حد غير الشباب ..

موزه : لا و الله ؟؟.. منو هالشباب الي نطريهم ..؟؟..

روضه : من اصبحتن الا مبارك و مبارك ..

موزه : عاد روضه .. احنا ما طريناه بالشين .. و بعدين الي يسمعج يقول ما خلينا حد من الشباب ما طرينه ..

ميثه : اوكي اوكي .. خلاص انسن السالفه ..

و نشت عنهن روضه و رجعت بيتهم ..

مريم : حشى روضه شعندها ..؟؟..

موزه : انا ما شفت انسانه معقده شراتها .. ما ادري عالشوه متخققه ..

ميثه : موزه عيب عليج بنت عمج هذي ..

موزه : انزين والعافيه بنت عمي شو يعني ..؟؟..

و في هاللحظه دخل منصور الصاله ..

منصور : السلام عليكم ..

ردن : و عليكم السلام ..

منصور : رويض امبونها عندكم ..؟؟؟..

ميثه : هيه .. توها ظاهره عنا ..

منصور: هيه اشوفها ... شي فيها ؟؟..

موزه : زمت خشمها علينا و راحت ..

ميثه : مووووزه ..

منصور : شو هالرمسه بعد ..؟؟..

موزه : و الله صدق .. هي عالشوه متخققه .. ؟؟؟.. فقتها تتحسب الي خلقها ما خلق غيرها ..

ميثه : موزه تراج زودتيها ..

موزه : ااوووووه .. نشي مريوم ..

و نشت موزه و مريم عن ميثه و منصور ..

منصور : شعندكن ..؟؟..

ميثه : ماشي يلست موزه و مريوم يطرن بخيت و الشباب و جان تتغيض روضه ..

منصور بألم : لهالدرجه تغار عليه ..

ميثه : تغار عمنوه ؟؟.. بخيت ؟؟.. اصلا روضه ما تغيضت الا من طرو بخيت .. ما ادانيه و لا اداني طاريه .. ما ادري كيف بيعرسون ..

منصور : ليتها ما وافقت عليه ..

ميثه : يوم انا بوافق على سلطان هي بتوافق على بخيت ..

منصور : الله يسامحهم .. بيستاثمون في البنت ...

ميثه : هيه و الله ..

ميثه : اوه صح .. علوم دوامك ..؟؟..

منصور : الدوام ربي يسلمج زين .. بس لو سالم من دقت هالخطوط كل يوم .. سلمت من الشر كله ..

ميثه : انزين انت الا اروحك .. لو حد ٍ غيرك ما بيقهر كل يوم يسرح بوظبي و يرد ..

منصور : لا خلاص اللحين ادورلي سكن ..

الحمدلله الله فتحها على منصور و يشتغل اللحين في ادكو تبع ادنوك ..

و في رماح ..

ام مبارك : عبيد .. عبوود ..

عوشه : عبيد يتسبح ..

ام مبارك : اوووه .. بروك هنيه ..؟؟

عوشه : هيه ..فحجرته ..

ام مبارك : زقريه ..

عوشه : انشالله ..

و راحت عوشه صوب مبارك في حجرته ..

عوشه و هي ادق الباب : مبارك .. برووووك ..

و مبارك راقد و لا هب حاس بها ..

عوشه : مبااااااااارك .. و جان تفتح باب حجرته .. و راحت صوب مبارك ..

عوشه : مبارك .. نش فديتك ..

مبارك و هو دهمان : هاه ..

عوشه : نش فديتك المغرب اللحين ..

مبارك : انشالله .. و رد و لحف راسه ..

و في هاللحظه يته مسج ..

جان تفتر عوشه صوب تيلفون مبارك .. و لقت 8 مسجات يديده ..

عوشه : حشى .. يا مكثر المسجات ..

و من قالت مسجات نش مبارك .. و شل التيلفون ..

عوشه : خيبه .. كل هذا عسبات المسجات ..؟؟!!..

مبارك : عويش عن الحشره ..

عوشه : انزين نش .. امايه تريدك ..

مبارك : انشالله ..

و طلعت عوشه عن مبارك .. الي من ظهرت عوشه و هو يشوف المسجات .. و طبعا كل المسجات كانت من منى ..

" مبارك انت ليش متغير عليه جذيه "

" ليش تتهرب مني .. جن شي في خاطرك رمسبه "

" انا شو سويت عشان تجازيني بهالصد "

" خذاك القدر مني .. و باعد بينك و بيني.. و هذي حكمة المولى.. تفارقني و تخليني "

"هذاك وقت النعيم كان في قربك ... و اليوم وقتٍ على فرقاك يسعيبي "

" ليت قلبي ما عشق طيفك "

"مبارك .. ارجوك رد قول أي شي .. لا تخليني اتعذب اكثر من جذيه "

و المسج الثامنه كانت من خليفه ..

"اسميك عفنت من الرقاد .. من تنش اتصلبي "

لا حول .. اللحين شو اسويبها هذي منى بعد ؟؟.. يالله يساعدني ..

و اتصل مبارك بخليفه ..

خليفه : هلا و الله ..

مبارك : حيبه .. علومك ؟

خليفه : ايه بتخطف المول اليوم .؟؟..

مبارك : ليش انت في المول ؟..

خليفه : هيه ..

مبارك : خلاص بتسبح و بييكم ..

خليفه : غايته ..

و نش مبارك و تسبح و تلبس و توه بيظهر من الحجره و ان يايتنه مسج ..

" ممكن ما تتهرب مني "

لا حول ..

و ظهر مبارك من الحجره و ان امه و العاش و امنه و عبيد يالسين في الصاله ..

مبارك : وين نواري عنكم ..؟؟؟.

عوشه : فبيت عمووه نوره ..

مبارك : خاطريه اشوف هالبنت في البيت .. دومها في بيت عمتيه ..

ام مبارك : محد من سناها في البيت .. و بيت عمتك ما شالله كله بنات ..

امنه : و بمختلف الاعمار و الاحجام بعد ههههههههههههههههههه ..

ام مبارك : ما رمسك راشد .؟؟..

مبارك : رمسوني امس ..

ام مبارك : و ما قالك متى بيردون ..؟؟؟..

مبارك : انشالله ورى باجر بيردون ..

ام مبارك : الله يبشرك بالخير ..

مبارك : عبيد ما بتخاويني ..؟؟؟..

عبيد : الرحمن ..

مبارك : يا ريال نش .. بدل ما تيلس في البيت ..

عبيد : لا ما بيلس .. بويّه سويحان اللحين ..

ام مبارك : ودي و شعندك في سويحان ..؟؟..

عبيد : متواعد عند ربعي ..

مبارك : المهيري ..؟؟؟..

عبيد : هيه .. احمد ..

مبارك : خلاص عيل .. تاااامرونا بشي ..؟؟؟..

ام مبارك : سلامت راسك ولديه .. الا براض في الدرب ..

مبارك : انشالله ..

و راح مبارك العين .. و لاقى خليفه و معضد و عوض في العين مول ..

تمو الشبيبه يحوطون في المول .. و عوض ما سلمت بنت من لسانه ..

خليفه : لا حول .. بتخبرك لسانك يحجك انت ..؟؟.

عوض : خلنا نسترزق ..

خليفه : تسترزق عبنات العرب ..؟؟..

عوض : شوف هالبنات ما اين المولات الا عشان الشباب يرقمونهن .. و الا يعله في ذمتك هاذيج شيفتها شيفت وحده تبى الحشمه ..؟؟؟..

معضد : تبون الصدق .. ما جذب عوض .. البنات ظيعن المذهب ..

مبارك : ظيعن المذهب و الا ما ظيعنهن .. ما علينا منهن ..

معضد : لا مبارك .. ياخي اللحين الغشوه ما يعرفن دربها ..

مبارك : بنت العرب حاشمه عمرها بغشوه و بلا غشوه .. و الله يا بنات ما يعرفن الشيله و حشمات عامارهن زود عن بنات متنقبات ..

عوض : يا ويل حالي انا .. الشيخه .. و تم يرقم ..

مبارك : ههههههههههههههههههههه .. و تباني ايوزك ختيه بعد ؟؟.. بتبطي الساع ما قربتبك ..

خليفه : ليش عوض خطب ختك ؟؟؟..

عوض : لا بعدني ما ادبست بالخييليه بس على وشك انشالله ..

و من عقب راحو الشباب و شافو فلم في السنما ..

بعدها بيومين رجع راشد و شما من شهر العسل ..

يلست شما يومين في رماح و من عقب راحت الوثبه .. و تيمعن عندها البنات و سلمن عليها .. بس ما قدرت انها تبات عند هلها .. لان راشد كان عليه دوام .. و تمر الايام و شمامي و روضه متواصلات مع بعض ..

يدت روضه : هاه الميث خبروج متى العرس ..؟؟.

ميثه : هيه يدوه ..

يدت روضه : الفال لكن يا بناتي ..

موزه : يدوه مريم ما تبى تعرس ..

يدت روضه : ودي شعنه ما تبين تعرسين ..؟؟؟..

مريم : يدووووه محد ياني ..

روضه : لا يدوووه ايونها الا هي تتطلب عالرياييل ..

يدت روضه : لالالا .. بنت العرب ما تتشرط و تتطلب عالرياييل ..

مريم : حليلي لا تشرطت و لا تطلبت ..

يدت روضه : سلامتكن البنت من يظويها نصيبها لا تتشرط و لا تطلب ..

روضه : يدوووووووووه انا ابى فستاااااااااااان ..

يدت روضه : شوووووه ..؟؟؟؟؟..

روضه : ابى فستااااااااااااااااااان .. بثلاثين الف ..

يدت روضه : دكااااااااااااان تبين ..؟؟..

روضه : ههههههههههههه .. لا يدوووه .. فستاان فستااااااااااان بثلاثين الف ..

يدت روضه : دكان بعد تبى .. يا عنبو ذا الويه .. تبينا نتشرط عالريال بالدكاكين .. لا و ثلاثين الف بعد .. سلامتج غير ثلاث تالاف ماشي ..

روضه : عنبوه .. يدوووه الخدامات ينيابن بست تالاف .. و انتي تبينا نعرس بثلاث تالاف ..

يدت روضه : و انتن و الخدامات واحد اللحين .؟؟.. الخدامه تصبح تعابل و تبات تعابل .. و الا انتن ما منكن نفع ..

موزه : يالله يا يدووه .. اللحين الخدامات اخير منا ؟؟؟..

يدت روضه : هيه نعم .. الا انتن لا تطالعن عهالخايسه الي عندنا .. هاي ظوايا امج ( و تكلم روضه ) خايستكن غالبنها ويها ما تغسله ..

ميثه : ههههههههههههههههه .. اسميها الس مظلومه ..

يدت روضه : شوووووه ..؟؟؟..

ميثه : سلامتج يدووه ..

و في يوم يت حرمه بيت قوم روضه .. و كانت تريد اتكلم روضه ..

شما : روضوه ..

روضه : لبيه ..

شما : لبيتي حايه .. وحده تباج برى ..

روضه : تباني انا ..؟؟؟...

شما : هيه .. يختي ما ادري بس شكلها مغربيه تونسيه .. جذيه ..

روضه : و طالبتني انا ..؟؟!!!!..

شما : هيه و بالاسم بعد ..

روضه : غريبه .. جاد اتكون وحده من البياعات و حد مطرشنها صوبي ..

شما : عندها بنت و ولد ..

روضه : ما ادري ..

و نشت روضه و راحت صوب الميالس وين كانت يالسه هالحرمه و عندها ام روضه و يدت روضه .. سلمت روضه عالحرمه .. و يلست عندهن .. كانت الحرمه اتشوف روضه بنظرات غريبه .. الكل انتبه لهالشي ..

الحرمه : اخت روضه .. انا اريد اكلمج شوي ..

روضه : تفظلي اختي ..

الحرمه : على انفراد الله يخليج ..

روضه و هي مستغربه : انشالله ..

و نشت روضه و نشت معاها هالحرمه .. و راحن الميلس الداخلي ..

الحرمه : انا مب عارفه شو اقولج و الا كيف ابدى ..

روضه : خذي راحتج ..

و في الميلس الثاني ام روضه و شما حرمة محمد يالسات يتحرقصن ..

ام روضه : يا خوفي اتسوي شي ببنتي ..

شما : عموه ظنج شعندها هالحرمه ..

يدت روضه : رحيمه ..

ام روضه : اسميج متفيجه يا عمتيه ..

بعدها بنص ساعه طلعت روضه و هي تصيح من الميلس .. و ربعت صوب حجرتها ..

يتبع ,,,,

👇👇👇

تعديل المقال