رواية بين ثنايا الايام -37


رواية بين ثنايا الايام - غرام

رواية بين ثنايا الايام -37

مر نايف على باسكن روبنز ..قال : تبون شي اليوم من باسكن
لفت نجود تناظر للدريشه .. وقالت بقهر : والواحد له نفس ياكل

وش صاير ..شكلها نجود زعلانه من نايف .. ومالها نفس تاكل ..بس نجود ونايف مايتزاعلون !!!

يوم قربنا للبيت ..سمعت نايف يقول بصوت خفيف : جودي قولي لها ان زوجها بالبيت .. عشان على الاقل ماتتفاجأ

حطيت يدي على قلبي ..وقلت : مشعل بالبيت

لفت علي نجود .. وقالت بتوتر : بس لا تخافين انا ونايف معك

مااهتميت لدموع الخوف اللي طاحت من عيوني ..اللي يهمني وش اسوي الحين بهالمصيبه .. ياربي بيذبحني مشعل .. بخلي نايف يرجعني البيت

قلت : نايف رجعني البيت

قالت نجود بسرعه : لا نايف .. مالنا شغل

ولفت علي وقالت : وش بيسوي يعني مشعل ..ليه خايفه لهذي الدرجه

قلت ودموعي تطيح : الله يخليك نايف رجعني .. الموت اهون من اني اقابل مشعل الحين

كان نايف يحرك يده على الدركسون .. كانه يفكر

قالت نجود : خلونا نروح البيت .. يمكن مشعل موهناك اصلاً

قال نايف : متأكد انه هناك .. انتي نجود مثل ماقلت لك .. مالك شغل بالسالفه خير شر

وصلنا البيت .. وقف نايف السياره بالحديقه .. بس محد نزل

قال : وش فيكم جالسين

قالت نجود : ما ابي انزل اول وحده

قال : يعني وشلون بتجلسون بالسياره لليل

فتح الباب بينزل .. وفتحت الباب انا بعد .. حسيت ان نايف هو اللي بيوقف معي هالوقت .. عشان كذا قلت له : نايف خليك معاي

ناظر فيني .. ابتسم وهز راسه بأيه

نزلنا من السياره .. ودخلنا الصاله .. شفنت مشعل جالس على الكنبه .. اول ماشفته دقات قلبي زادت .. نزلت راسي .. ماابي حتى اناظر فيه .. رفعته مره ثانيه ..شفته يوقف ويناظر بالساعه .. ويقول : تأخرتوا..من زمان انتظركم

قال نايف بثقه : ابد الطريق كان زحمه

ابتسم مشعل .. وقرب مني .. مسك يدي وقال بهدوء : تعالي رهف بكلمك

مسكتني نجود من يدي الثانيه .. وقالت : لا رهف بتجلس معانا الحين

قال مشعل : نجود .. شيلي يدك عن زوجتي

مستحيل اروح مع مشعل .. ادري عنه بيذبحني .. قلت وصوتي كان يرجف : مشعل بجلس معاهم

عطاني نظره حاده .. قالت نجود : اتركها مشعل .. حنا ماسوينا جريمه

ناظر فينا كلنا وقال : بالنسبه لي اللي سويتوه اكبر جريمه

جلس نايف على الكنبه .. واشر على مشعل بصبعه .. وقال : بالنسبه لك انت بس
قال مشعل وشكله بدا يعصب : اصلاً انت وهذي اللي بجنبك .. وش دخلكم بزوجتي

قال نايف بهدوء : مشعل .. كلمنا زين لان حنا نكلمك زين .. اللي بجنبي .. اسمها اختك نجود

قال بصوت عالي : ادري انها اختي

سند نايف راسه على الكنبه وقال : زين انك تدري

حط يده بجيبه .. ورما الجوال على مشعل ..وقال بثقه : دق على اهل رهف .. وقول لهم بكل السالفه .. شوف مع من بيوقفون

انا مستغربه شي واحد .. ثقة نايف وبروده !!

مسك مشعل الجوال .. وصوته بدا يعلى اكثر : طبعاً معي انا .. لاني زوجها

ابتسم نايف وقال : انت الحين ليه تصارخ .. شايف احد غيرك هنا يصارخ ؟

ناظرفينا انا ونجود وحرك كتوفه وقال : والله مستغرب منه انا !!

كانت نجود كل شوي تضغط على يدي .. احسها تقول لي لا تخافين دام نايف معنا

ومشعل يناظر في الجوال بعصبيه

قال نايف : اقولك دق وش فيك واقف ..،،، اشر لنا ،،، تعالوا اجلسوا .. خلونا نسمع اهل رهف وش بيقولون .. يللا مشعل تعال سمعنا

المصيبه لو دق ورد اخوي يوسف .. ناظرت في مشعل .. ماكان يسوي شي .. فجأه رمى جوال نايف على الكنبه

رفع نايف حاجبه .. وقال : شفت ماتقدر .. يللا مو مشكله .. تصدق انا بموت جوع ،،،، صرخ ،،،، خــــــــالـــــــتي فـــاطـــــــمــه...خــــــــالـــــــتي فـــاطـــــــمــه

شوي و طلعت من المطبخ خالتي ام مشعل .. وقالت : نايف ناديتني ؟ .. ماسمعتك لاني برا عند باب المطبخ الخارجي

قال نايف : وش الغدا اليوم

قالت : كبسة لحم

تنهد وقال : الله من زمان خاطري فيها.. بروح بشوف
؟؟؟؟؟؟؟؟


انا مره مستغربه من برود نايف .. لفيت على مشعل ..شفته يعض شفايفه .. اكيد من القهر

اشر لي اروح وراه المجلس.. شلت يدي من يد نجود .. قالت : بتروحين

هزيت راسي لها .. كاني اقول عادي .. اصلاً مشعل مايقدر يسوي شي ..نايف طيح وجهه قدامنا كلنا .. لو الحق معه كان دق على اهلي ماخاف


بيت الريم ..الساعه:2:30 مساءً


** الريم **

جالسه اكلم محمد .. في التلفون .. نتكلم عن العرس وتجهيزاته

محمد : اتخيلك بتطلعين مره حلوه في العرس

حتى انا اتخيل نفسي بطلع مره حلوه.. قلت له : وانت احلى

قال : الا تعالي ريمي .. وش لونه فستانك في عرسنا

قلت له بتفكير : امممم للحين مدري وش اللون

سمعته يضحك .. ليه يضحك ؟؟؟؟.. يووه تو استوعب انه يسأل عن لون فستان العرس .. ياربي انا دلخه .. اكيد ابيض .. اجل وشو .. بقول له كنت احسبك تتكلم عن عرس ثاني .. لا بيدري اني ارقع لانه قال في عرسنا .. للحين يضحك : محمد فستان العرس له الوان مو بس ابيض .. يعني سكري .. او

قاطعني وقال : وش فيك ؟ لايكون تحسبيني اضحك عليك .. انا اضحك على اخوي سعد .. جالس يدغدغني

قلت بزعل : اووف حمودي لا تفشلني

ضحك بصوت عالي .. وقال : امزح معك .. يللا عاد .. مو لاني احبك تتدلعين علي

قلت وانا العب بشعري : الدلع مطلوب

قال : فديت الدلع .. وصاحب الدلع .. وفديتك ريومتي

قلت : فداك اللاش

قال : ريمي

قلت : عيونها

قال : تحبيني

قلت على طول : اكيد

قال : اكيد وشو

قلت بخجل : احبك

قال : وانا احبك واموت فيك و... لحظه

شكله حاط يده على السماعه .. ما اسمع شي .... تأخر

رجع وقال : الوو .. اووف روح عني .. اتركني .. شيل يدك عن السماعه .. ترا بطقك

قلت : محمد وش صاير .. مين اللي بجنبك

قال : هذا .. اووووووف انقلع اقولك اترك السماعه ماتفهم انت .. ايه قلبي هذا سعد الغبي .. يبي يكلمك .. خرب علي الجو الشاعري اللي كنت فيه

ضحكت وقلت : خليه يكلمني

قال : طيب .. بس لا تعطينه وجه .. ترا اشكال سعد .. ماتنعطى وجه

عطى سعد السماعه .. قال سعد بصوته الطفولي : الوو .. السلام عليكم

قلت : وعليكم السلام ورحمة الله وبركاته .. اخبارك سعودي

قال : زين

سمعت محمد يقول : خلاص هات السماعه

قلت لسعد : قول له يطلع من الغرفه .. عندنا مواضيع مهمه

قال له سعد : تقول لك الريم .. اطلع من الغرفه .. مانبيك .. عندنا اسرار ومواضيع مهمه

اخذ محمد السماعه وقال : حلوه ذي

جلست اضحك .. قال : لا تضحكين .. اليوم انا بصير مجرم .. بذبحك .. وبذبح هالكمخه اللي معي

شهقت وقلت : تذبح خطيبتك

قال : اذا خطيبتي تخوني مع اخوي .. اذبحها واذبح ابوها

قلت له : بص ياحماده دنا حقرقرك ( اجرجرك ) في المحاكم

قال بضحكه : ماتقرقريني ياختي

قلت : اه واللهي

قال بسرعه : ايه صح .. ريوم بنطلع اليوم

قلت : لا انا من اليوم ببدا اذاكر

شهق وقال : من اليوم بتحكمين علي بالاعدام

قلت : وش اعدامه هههههههههههه .. ماتبيني اجيب نسبه حلوه ؟

قال : الا ياعمري طبعاً ابيك

ابتسمت وقلت : اجل خلاص

قال بزعل : بس اليوم بنطلع

قلت : لا

قال : يللا عاد قلبي

قلت : لالا

قال : والله بس اليوم

قلت : محمد قلت لك ماراح اطلع

قال وشكله عصب : 5 دقايق وانا عندك

قلت : محمـــ..........

قاطعني وقال : يللا باي اشوفك بعد شوي

قلت : زين باي

قفت الجوال ورميته على طاولة الكمبيوتر وكتفت يديني .. يااربي محمد عنيد .. لكن انا اوريه
مابعطيه وجه لا جا

فتحت الدولاب وطلعت لي برمودا وردي مع سير ابيض وبلوزه بيضا وطلعت عقد وحلق لونهم وردي

والا عندي فكره احسن .. ماراح انزل له اذا جا

رميت الملابس اللي طلعتهم على السرير

واخذت كتاب الرياضيات وحطيته على الطاوله .. قربت الكرسي وجلست

فتحته على الصفحه الاولى .. وجلست اذاكر

نص ساعه .. وسمعت طق على الباب .. قلت : ادخل

فتح الباب اخوي خالد وقال : ريوم محمد تحت ينتظرك اوكي

قلت : اوكي الحين بنزل

راح اخوي خالد وانا كملت مذاكره

&مستحيل انساك& يتصل بك

~~)(~~ دنياك دنياي هو حد يسواك في القلب وياي وفي البال وياي
يا الغالي وشلون تضن ابنساك كيف الهوا يهون والقلب يهواي~~)(~~

ناظرت في شاشة الجوال .. وطنشت محمد

بعانده مثل ماهو يعاندني

مثل ماتوقعت وصلني مسج من محمد

ريوم حياتي انا تحت اوكي


خلاص بنزل شكله بيعصب علي الحين

وصلني مسج ثاني

انا تحت يعني انزلي
يعني مليت وانا انتظر
يعني طفشت
يعني بتجين والا ارجع البيت


يتبع ,,,
👇👇👇
أحدث أقدم