رواية تعبت اشكي -64

 

رواية تعبت اشكي -64

حاولت أكلم أمي واقنعها بأني ماابيه..بس ماقدرت..
حاولت أصرخ واقول لا..تعبت..ونفس الشي ماقدرت..
كلمت روابي وطنشتني..
أبي أحد يفهمني...
لأني خلص تعبت..طفح الكيل..
طفح الكيل منه ومن تصرفاته..
كرهته...أقسم أني كرهته...
وانا اللي ماعمري كرهت أحد..
لدرجة أنه كرهني بنفسي..
ماصرت اهتم بشكلي..ولا بأسلوبي..ولابشخصيتي..
اهم شي أني أدرس واكل وأنام..
هذه حياتي اليوميه..
صارت روتينيه...
وين ظحكتي..
وين راحتي..ووناستي..
ماعاد لهم مكان هالوقت..

فكرت أني أكلم متعب..لأنه هو الوحيد اللي فاهمني وحاس فيني...

بس بعدها تراجعت..

ماأبي أعكر عليه وهو في بداية زواجه..

والمشكله هو مايعطيني مجال أتكلم فيه..

كل أحاول أفتح الموضوع معه..وأساله عن مريم وزواجه..

مايرد علي الا بكلمه وحده..

الحمد لله..

بس هذا اللي يعرفه...

طالع على مين ياهيفاء...!!

طالع عليك...!!

كل واحد منكم ساكت ومنطم..

ومش عارف الأيام وش تخبيله بكره...!!

فهد أنتي هنا وامي تناديك..!!يالخبل..

هيفاء أنت خبل..

فهد حلفي..

هيفاء والله..

فهد هيوفه..

هيفاء ها...

فهد ويقلد صوتها ها..الناس يقولون ..نعم ..هلا ..لبيه..مو ها..ماااااااااااالت عليك..المهم تعالي..العشاء..

هيفاء طيب يالخبل..جايه..

فهد بسرعه..

هيفاء ان شاءالله

فهد يالله

هيفاء طيييييييييييييييب..فكنا..

فهد أحترمي نفسك أنا اخوك الكبير..

هيفاء أن شاء الله عمي..

فـي غيـبتك كل المـلا عنـدي أغراب

ماأحـــد أبي قــربـه..ولا أحـــد يبـني

لا يــا غـــلا القرابــــة والأصـحـاب

ضاع العـدل في الناس لـــو تظلميـني

ضايع بدونها...!!

أحس نفسي مو أنا...!!

أحس أني غريب..!!

تركت كل شي..وابتعدت..

شغلي..

بيتي..

أهلي..

.ديرتي...!!

كل شي تركته...

ماأتحمل أعيش لحظه بدونها..

وبساعتها سافرت من أي مكان يذكرني فيها..

ورحت البحريين ...

لعل أنسى الشوق اللي ذبحني..

بس هيهات يافيصل تنسى...

كنت متوقع أنساها بزحمة الجو ..

أنساها بالمكان اللي تعودت أجلس فيه قبل ماأعرفها..

لكن للأسف كل محاولاتي باأت بالفشل...

لأن خــــــــــلاص..

حبها تغلغل داخل ضلوعي..

صرت اسير له...

صرت ماأعيش بدونه..

صرت لــ حنين..

لها لوحدها..!!

لكن ..

وينها..!!

وينها ..اللي علمتني أن الدنيا غير..

وين اللي نستني كل شي..

كل شي وحشني فيها..!!

أبتسامتها..

حنانها..

جمودها..

شخصيتها..

كل شي وحشني فيها..!!

حنين..

تسمعيني..!!

وحشتيني ياحنين..!!

صرت ضعيف بدونها..!!

صرت ضعيف بالحب...

ساره ..فيصل ارجوك أرجع...

فيصل بملل غيري الموضوع ساره...شخبار أمي وأبوي وأخواني..!!

ساره أمي متضايقه علشانك...أنت تركت البيت..وحنين تركته قبلك...وابوي نفس الشي ماتغيروأكيد أنت تعرف أخباره اكثر مني.. ..

وسوزان وخالد..كل واحد فيهم لاهي بخصوصياته...

فيصل بتردد طيب..ساره..

ساره وكأنها عرفت سؤال اخوها هلا

فيصل وغمض عينه مافي أخبار... عن حنين..!!

ساره لا ياخوي ..حنين على نفس حالها ماتغيرت..ولحد الحين ساكته مش راضيه تتكلم..

الله يعينها..شكل الصدمه قويه عليها..

فيصل بخاطره وانا اقوى ياساره...أقوى..

فيصل أوكي ساره ..سلمي على أمي..مع السلامه..

ساره بحزن مع السلامه

سكرت ساره التليفون..وهي متضايقه على حال أخوها مع حنين..

لحد اللحين زواجهم مش راسي على بر..

ماتدري توقف مع ميين..!!

مع حنين اللي تعبت من هالدنيا..!!

والا مع اخوها اللي حاس بالذنب أتجاه حنين..!!

وكل ماتتذكر وحدتها العميقه..تكره نفسها أكثر..

البيت صار فاضي..بعد ماكان ممزوج بالسعاده من كل جانب..

يأست من الصبر نفسه..

وزهقت من الأنتظار...

كل مره تقول الله بيفرجها عليها وحدتها..

ويوم تزوجت حنين من اخوها..فرحت كثيير لأنها بتلقى الأخت الللي بتعوضها الوحده..

(زي ماقلت لكم سابقا أن ساره من زمان مخلصه كليه ..ولسه ماجاتها وظيفه..)

وعاشت ساره في الأيام الأخيره سعيده مع تغيير جو البيت..

حتى اختها سوزان تغيرت وصارت قربيه منها...

وفيصل تغير بشكل ملحوظ جدا...

لكن اللحين..

وبهالوقت تحس نفسها وحيده...

وحيدة الأخت...

وحيدة الصداقه...

ومافي أحد حاس فيها..غير الله سبحانه...

عشان كذه..

بتظل صابره طول العمر...

يمكن الله بيفرج عليها وحدتها..

أم فيصل ساره..!!

ساره بابتسامه حزينه هلا يمه...

أم فيصل شفيك يابنتي...

ساره مافيني شي يمه...على فكره فيصل يسلم عليك..

أم فيصل بلهفه كلمك..شخباره...ووينه اللحين..ومتى بيجي...!!

ساره الحمد لله بخير يسال عنكم..والصراحه ماقالي متى بيجي..!!

أم فيصل حرام عليه..والله أن قلبي يتقطع ..أبي اشوفه..حتى مافكر أنه يدق علي..

ساره معليش يمه..فيصل متضايق هالأيام..وان شاء الله فتره وبتعدي..

أم فيصل آميين..والله البيت ماله طعم بدون فيصل وزوجته..المهم أنا بطلع غرفتي..تبين شي..

ساره سلامتك يمه..روحي أرتاحي...

طلعت أم فيصل لغرفتها..

وتركت ساره وحيده..

مثل ماكانت..

بين الدموع..والكتمان...

بين العذاب..والجروح..

بين الألم ..والأهات..

كان في قلب كبير وتعباان..

قلب شتته الدنيا من كل جانب..

قلب تعذب من صغره وبيظل يتعذب في شبابه..

قلب حنون..

قلب حي..ماماات..

قلب يون من الألم..

قلب يصرخ..

ويقول كافي عذاااااااب..

يادنيا أكتفيت...

يدنيا تعبت..

يادنيا أختسرتي لحظه..

أختسرتي فينا لحظة سعاده..

لحظة امان

لين متى بنظل بهالعذاب..!!

قبل مايموت مشتيتين..

وبعد مامات ضعنا...

أنجرفت

وانا اللي في وسط التيار..

صرخت..

ومحد منهم سمعني..

بكيت

وجفت دموعي من الصدمه.

مت أمس واليوم وبكره

ولا أحد درى عني

وبعدها يتسألون ويقولون علامها هالبنت..!!

وبسهوله يكملون

ترى عمركم الباقي..والحي أبقى من الميت..!!

وهو مانفعكم عشان تبكون عليه..!!

عيشوا حياتكم...!!

ولاتتذكرونه...

لابخيره..

ولابشره...

وأرد عليهم واقول..

أنا اللي ضحيت..بعد ماشكيت..

أنا اللي أبتليت بعد ماحييت..

يادنيا رسينا على بر...!!

والله مليييت..!!

أحداث قصتنا أنتهت بأحزان وبدت بأحزان جديده..

مرت الشهور عليهم غريبـه...صعبـه...بطيئـه

كلن تايه بجهه..

كلن ضايع بدوامه..

كلن ينتظر لحظة امل عشان يكمل مشواره..

ومرت ايام وأيام وهم على نفس الموال...

ومافي شي جديد يسعد حياتهم..

ياترى كيف بيكون الزمن معهم...!!!

معقوله بيوقف ضدهم بنهاية المشوار...!!

(2)

أم حنين العنود يمه..روحي نادي أختك خليها تتغدى..

العنود يمه أنتي تعرفين أنها مستحييل ترضى..خليها على راحتها مردها بتطلع وبتاكل ..

أم حنين بس ياحبيبتي هي ماكلت شي من امس...

العنود طيب هذا مو شي جديد..من متى هي تاكل أصلا...

أم حنين عنود...ماهقيتك كذه..شاللي غيرك...

العنود بضيق خلاص يمه..بروح اشوفها..

عمر اذا ماتبين بروح اناديها

العنود لا خلاص ياعمر بروح انا...

طلعت العنود من الصاله وهي متضايقه..

أمها فهمتها غلط..

تفكرها أنانيه...ومالها خلق لأتها...

بس اللي ماتعرفه أن العنود ماتبي تشوف أختها بهالحاله وتحاول قد ماتقدر أنها ماتناظر عيونها اللي الحزن بينفطر منها..

بس أكتمت بنفسها وهي تقوي نفسها عشان أمها ماتزعل.

فتحت الباب وشافت حنين نايمه على السرير..

وهذه عادتها ماتغيرها ..

تسوي نفسها نايمه عشان محد يكلمها..

قربت من اختها..وهي تتنفس بعمق..

العنود حنين...حنين...حنين قومي الغدى...

العنود حنين..حنين..

قربت أكثر وهزت كتفها

العنود حنين..حنين..

خافت العنود وأستغربت من هدوء أختها..

لفت الجهه الثانيه عشان تشوف وجه أختها..

واخترعت اكثر...

كان وجه حنين أصفر ومعرق وخصلات من شعرها مغطيه على عيونها المسكره..

مسكت ايدها وصرخت

العنود حنيــــــــــــــن....يمه لحق علي..

ركظ عمر ووراه أمه وسمر...بسبب صرخة العنود...

عمر العنود ..شفيك...

سكتت العنود ..ماقدرت تتكلم...الموقف أكبر منها

قربت أم حنين لبنتها وشافتها وحضنتها

أم حنين حنين يمه...شفيها بنتي...وأذرفت دموعها...يمه حنين..شفيك يابنتي ردي علي...ردي علي يايمه..

عمر يمه...بروح أشغل السياره لازم نوديها المستشفى لبسوها عباتها بسرعـــــــــه...

لبسوا حنين عباتها بسرعه ولبسوا عبيهم

وجاء عمر وحاول يمسك أخته من جهه والعنود من جهه ثانيه..

وركبوها بصعوبه السياره...

العنود تصيح على أختها وتمنت أنها تشوف أختها قبل ماأمها تطلب منها هالشيء...

حست بضيق بسبب تصرفها..

وندمت أشد الندم على هالشيء..

أما ام حنين ماسكه بنتها وتقرى عليها وهي ميته خوف ..بس تحاول تقوي نفسها...

وعمر كل شوي يطل من المرايه يطالع أخته اللي وجهها مافيه أي نوع من انواع الحياه...

الكل خايف..وخصوصا من المستقبل ..

ومايدرون وش تخبي لهم الأيام...

ولين متى بيعشون بهألالم..!!!

أخيرا وصلوا المستشفى

ودخلوا حنين أقرب غرفه وأمها دخلت معها وهي متجاهله كلام الدكتور..

وبعد أقناع من عمر قدر يطلع امه..

وجلسوا ينتظرون الدكتور بره...

أأأأأأأأأأأأأأأأي..يألم...مش قادره...بمووووت...

رهف ترفوا شفيك يالخبله...

ترف لحقيني رهف..راسي...أذني...أسناني..يألم..

رهف وتبرد أظافرها شفيك أنتي...وش اللي يألمك بالظبط...أسنانك ولا راسك والا أذنك...!!

ترف كلهم..آآآه كلهم يألمونــــــ ــــــي...رهف لحقي علي..بموووووت.. نادي أمي بسرعــــــــــــه

وجلست على السرير وهي ماسكه راسها اللي بينفجر بلحظات..

رهف ومبرده زين لاتصارخين....صبري شوي..

ترف رهفوا الله ياخذك..بموووت وأنتي مبرده...يالثلج يالبقـــــــــــــــــــره....نادي أمـــــــــــي بمووووت

رهف أوكي..وقامت ببرود وهي تبرد اظافرها ولمن سمعت صرخة رهف ركظت زي البرق

رهف يمه بنتك..ترف..

أم زياد شفيها...!!

ترف تعبانه...

وطلعت الأم أبرد من بنتها..

أم زياد ياربي على هالترف دلعها زايد ..يعني شفيها..تعبانه!!كل يوم على هالحال...

رهف لا يمه هالمره جد تعبانه..تعالي شوفيها تبيك...

أم زياد زيين..

راحت أم زياد لــ بنتها وأول ماشافتها ترف صرخت اكثر وهي تدعي على رهف المبرده..

وعلى طول راحوا المستشفى..

ترف دكتوره..مدري شفيني من يومين احس راسي يألمني وكله مصدعه وأسناني ذابحتني...

الدكتوره أنتي من متى ماشديتي أسنانك ...!!

ترف من أسبوعين..بس ماأتوقع هذا السبب...

الدكتوره طيب خليني أسوي لك أشعه وأشوف...

ترف لا دكتوره أخاف...!!

الدكتوره يابنتي أشعه عاديه مافيها شي...

ترف لا

ام زياد بصوت واطي ترف بلا دلع..والأشعه ماتضرك..

ترف بضيق أوكي..

طلعت ترف مع النيرس لغرفة ألأشعه...

وبعد جهد جهيد أنتهوا

وبعد ماخلصوا طلعوا على البيت لأن الأشعه نتيجتها بكره وأعطوا بعض الأدويه لـ ترف عشان الصداع..

≈ حـــــــــــــامــــــــــــل≈

رمى هالكلمه علينا وسكت....

حنين حامل وبالشهر الثالث...

ياربي...ياحبيبي...

شكثر أنت رحيم...

حضنت أمي ودموعها تسبق كلماته ..وهي مش مصدقه...

أخيرا بتصير جده...

وبعدها من فرحتي حضنت عمر اللي أول مره أشوف الفرحه بعيونه بعد هالحادث المشئوم...

ومسكت سمر وانا فرحانه..

واقول لها...

حنين حامل..

حنين بتجيب بيبي..

حنين بتصير ام...

الدكتور بس لحظه..أنا ماكملت كلامي..

ام حنين شفيه يادكتور...

الدكتور المريضه تعرضت لنزيف قوي...وفقدت دم كثير

أم حنين بخوف أيه..

الدكتور لأنها كانت مهمله صحتها والواضح أنها ماكانت تاكل وبنيتها ضعيفه جدا..لذلك

لولا رحمة الله كان الجنين ميت من زمان وخصوصا أنه في اشهره الأولى..

عشان كذه أنا مظطر أخليها عندنا أسبوع لمن تستعيد صحتها ..

عمر خرعتنا يادكتور الله يهداك...ولايهمك..أهم شي الجنين ماصار له شي..

الدكتور خافوا على أختكم أول لأن هي اللي حالتها مدهوره جدا..عن أذنكم..وتقدرون تشوفونها..

العنود واااي أنت فشلوه..

عمر بل..اللي يشوفه يقول خايف على أختي أكثر مني.مالت عليه..

يتبع ,,,,

👇👇👇

تعديل المقال