رواية برد وجفا ونسمة هوى -87


رواية برد وجفا ونسمة هوى - غرام

رواية برد وجفا ونسمة هوى -87

هيثم\اقولك انت من صجك تسأل عن بنت الجيران..!ليكون ناوي تخطبها..!
سلطان بااستهبال\مدري.. تصدق..!
هيثم\اقولك..سمعت انه جدي مسوي اجتماع يوم ألأربعاء لعمامي..!
سلطان\وانت وش دراك..!ماأّذكر اني قلت لك..
هيثم\سمعت الوالد يقول لأحمد.
سلطان\ايه..والله يستر..
هيثم\تتوقع عن ايش..!
سلطان\مو عارف ياهيثم..بس احساسي يقول عن خطبة راوين..
هيثم\لالالا ماأظن..اتوقع الموضوع اكبر من كذا؟؟
سلطان\الصراحه جدك يخــوف..
هيثم\تفاؤل بالخير..
سلطان\ان شاء الله خير..لكن قلبي مو متطمن ابدا..!
هيثم\طيب ليش الأربعاء بالذات..
سلطان\عشان الكل بيكون حاظر ذاك اليوم


شفيك ياحلوه..انا غلا ..والا نسيتي..!
حطت جمانه السماعه على اذنها الثانيه وتنهدت
غلا\ياربي..جمــون..بلا هالتنهد..عروتي قلبي كثر ماهو معورّ..تكلمي..!
جمانه بهمس\غلا..ليش احنا مانقدرّ نتحكم بمشاعرنا..ليش دايم نجري ورى عواطفنـا..ليش يصيبنا الندم اذا سمعنا لقلبنا..ليش؟؟
غلا\آآآه جبتيها على الجرح ياجمون..لأننا بشر..لنا احساسيس ومشاعر.نجري وراها ومانتهتم بالعواقب..دايم نسمع لدقات قلبنا...نحلم ونتمنى..نعيش ونتخيل..وبعدها..ننصدم بالواقع المرّ..لأننا نحب ياجمون..لأننا نحبّ..
جمانه\ليش نحبّ..ليش ماندوس على هالقلب..ليش مانستفيد من تجاربنا..!
غلا\جمــون..شفيك حبيبتي..؟
جمانه\غلا انا احب الوليد..تعرفين شلون احبـه..

غلا انصدمت من اعتراف جمانه الغير متوقع والصــريح..
..كانت دوم تكابرّ وتبين العكس..هس تعرف انها تميل له..لكن تحبّ..ماتوقعتها..!
ابتسمت على هالصغيرونه الخبله اللي تحب..
غلا\حبيبتي والله..اخيرا اعترفتي...
جمانه\ليش احبه.ليش..ماأبي حبه..حبه يألمني..يتعبني..
غلا\جمانه انتي قلتيها اذا حبينا مانعرف شلون وليش.!الحب يدخل بدون مايطق بابه..وبعدين ليش هالعذاب..!ليش معيشه نفسك بهالعذاب...الوليد يحبك وهذا الشي واضح من مو اقفك معه..وغير كذا هو انسان طيب ويبي يخطبك وانتي اللي رافضه والا نسيتي..!
جمانه\مو فاهمتني..انتي مو فاهمه..
غلا\ياربي..شنوا اللي مو فاهمته..الوليد حبه واضح زي الشمس..ومايبي غير ألأستقرار بقربك..لاتخلين ظنونك تلعب بك..
جمانه حكت لغلا كيف انها كلمته ومارد عليها وسفهها..
غلا\وقسم بالله انك سخيفه..طيب يمكن ماأنتبه لرقمك..
جمانه عصبت\غلوه..دقيت عليه مرتين..انا غبيه..غبيه لأني خايفه عليه..وغير كذا توه داقه علي بسوم وتقول انه بخير ومافيه شي..شفتي شلون انا مجنونه لأني دقيت عليه..!اكرهه حبي له..اكرهه..
غلا\لاتظلمينه جمون..يمكن انشغل..اووو
جمانه طفشت من حالتها\لاتبررين ارجوك..خلينا من سالفتي انت شو اخبارك..
غلا هدى صوتها\انا..انا كل مالي واغرق بتركي اغرق بحبه وبكل شي فيه...لكن مدري ليش احس اني بندم بيوم..!
كل شي يسويه وحتى لو ماكان قاصد اتأثر فيه..اتاثر بلسماته بنظراته بشكله بلبسه..ياربـي جموووون امووت فيه..
جمانه\حسبي الله على بليسك ياتركي جننت في بنت عمي..
غلا رمشت بحالميه\احلى جنـــه..
جمانه\تصدقين اشتقت لبيت جدي وجمعتنا..ولعبنا..وسهرتنا..
غلا\اي والله صادقه..انا انتظر ألأربعاء..ابي انزل الشرقيه..واشوفكم..بتجون انتوا..!
جمانه\ان شاء الله..احنا ماصدقنا نخلص زفت امتحانات..
غلا بهمس\حلو..اقولك..بسكر
جمانه بزمجره\ليش..
غلا\حبي اتى..
جمانه\ههههههههه ياعيني..اقول بس ترفقي بقلبك لايذوب..
غلا فعلا ذابت \بااااي..


جالسين بالقهوه..وكل واحد فكره مشغول وسرحان لبعيد..
تركي كان يفكر بصفقه بتربحه ذهب..لكن بتكون مجازفه وفيها خطوره..لكن هالصفقه تترتب عليها امور كبيره ولازم ينفذها..لكن كيف يقدر يتخذ هالخطوه..يحس انه وقته ضيق جدا وامور كثيره شاغله باله...والمصيبه انه لازم يقرر خلال هاليومين والا بتضيع الفرصه..
اما مبارك اللي كان قباله كان يفكر براوين وردها اللي تأخر..لكن ماعنده القدره انها يسال تركي عن سبب التأخير..!
حاول كذا مره لكن يحس انه لسانه يخونه..ومو قادر ينطق

وفجأه
مبارك\اقول تركي..
تركي رفع عينه له..
مبارك\أحم...
تركي تملل\تكلم..شعندك..
مبارك\مو عارف كيف افتح الموضوع معك..بس بجيبها من الآخر..مو كأنكم طولتوا الردّ
تضايق تركي..هو وين..وتفكير مبارك وين..!
صج انك تافهه..
تركي\ليش مستعجل.!
مبارك تفشل\لا..بس انت تعرف اني ودي استقرّ من زمان..
كان ينقزه لأنه مبارك من زامن وهويعرض عليه انه يخطب اخته..
تركي\خير ان شاء الله..وسكت..وارغم مبارك على السكوت..
وبعد فتره
تركي\اقولك..بكره بالصبح ابيك تجيني الشقه..قبل ماتمرّ المبنى..!
مبارك حس بالأحباط. توقع يناقشه بالموضوع.لكن ماعنده حلّ ثاني..بيصبر وبيشوف اخرتها..مع تركي..واخته!


مرت ألأيام سريعه على لؤي اللي يعد الليالي بفرقا يوسف..ومرت بطيئه على يوسف والوليد اللي يحترون يوم الخميس..ومرت قاسيه على ياسمين وامها اللي رجعوا بيتهم بعد ماجلسوا يومين في البيت الكبير ودفعوا المبلغ..
لمن انولد يوم جديد غريب بأاحكامه وقراراته..
يوم ألأربعاء اجتمعوا عايلة بو يوسف في البيت الكبير..والكل بعيونه الفضول لمعرفة سبب هالأجتماع سواء حريم والا بنات والا رجال..!
البنات فرحانين بلمتهم ومشتاقين حق بعض .,ومن جهة
كل وحده تحكي من جهه..وصارت ألأحاديت مختلطه بين الدراسه والأمتحانات والأجازه
جمانه تعلي صوتها من جهه عشان تثبت وجودها والكل يسمعها..وغلا تسكتها بصوتها الناعم وتعيد سالفتها..
راوين كانت هي الوحيده اللي بينهم المستمعه لأنها كانت تحس بالخجل وهي تعرف انه الكل يدري بموضوعها وموضوع طلال..وفكرة انه اسمها يقترن بطلال يحرجها على ألأخير..
جمانه انتبهت لها وصرخت بدفاشه
جمانه\لو سمحتي كوني عنصر فعال وشاركينا..كفايه سرحان..
خزتها راوين وماردت عليها..
ابتسام\يمه منك..خلي البنت في حالها..
جمانه\ليش اخليهالحالها..مو زين عليها التفكير..
غلا\لا..اقول اسكتي وكملت بأحراج..اخت زوجي ومأأرضى عليها..
جمانه\ومن متى حبيبتي..!
غلا\ظحكت\من زمااان..
ابتسام\بنات تصدقون والا ماتصدقون..!
فجر\لا ماارح نصدق..
ابتسام\فجــر..ليكون علمتك جمانه النذاله..
فجر\لا وربي امزززح..
ابتسام\ اشتقت لخبالنا..
جمانه\لو سمحتي انا مو خبله..
مسكت ابتسام المخده ورمتها عليها..
ابتسام\انطمـي..
غلا\اووووش..اوووش اقول.
جمانه\لا انا اللي بقول..شوفوا اليوم كلكم بتنامون هنا..غصبن عنكم اوكي..!
غلا\لا مو اوكي..مالي دخل لاتنامون..
جمانه\صج نذله..اذا انتي متزوجه احنا وش دخلنا..محد قالك تتزوجين..
فجر\لا انتوا سمعوني..بكره بنروح لسماح نزورها عشان نوسها شوي..
ابتسام\اي والله صادقه..خذيني معاك..
فجر\من عيونـي..
جمانه\ترى مولله تقولك خذيني معك..وعاد انتي فهميها..!
ظحكت فجر ومسكت ظحكتها يوم مسعت ابتسام تصرخ..
ابتسام عصبت \انا كم مره اقولك ممكن تنطمين..!


بجهه ثانيه كان هناك نقاش حاد بين الجد وعياله واولهم ماجد اللي مو راضي بزواج ولده سواء كانت راوين او غيرها..
وطبعا الجد يوسف ماذكر اسم راوين لكنه عصب بااصرار ماجد على كلمته..لكن ماجد كان عارف وش قصد ابوه..
واللي مو عارف عن الموضوع هو بو تركي اللي كان مستغرب من تصرفات اخوه ..وتركي اللي حظر الأجتماع وساكت..
طلال كان متوتر وماوده الأمور توصل لهالحد...ولا وده جده يعصب من ابوه..لكن الأمور زادت للأسوء بتعب الجد يوسف اللي انهار فجأه وطلبوا له ألأسعاف ودخلوه الغرفه الثانيه بسريره عشان يرتاح..
وماجد كالعاده مو معطي مرض ابوه أي اهميه وكلمته هي اللي بتتنفذ وهو يتوعد ولده بعيونه..

سلطان\ممكن افهم انت ليش مصرّ على رايك..ولا راضي احد يتناقش معك..
ماجد\وانت وش دخلك..لو سمحت اسكت..ولا احدي يتدخل رجاء وكان يقصد الكل..
سلطان\الشرهه مو عليك..على اللي يكلمك باحترام..
ماجد\والله وطلع لك لسان ياسلطان..تعال اكفخني بعدّ..
مسك طلال ايد سلطان يبي يهديه..وماجد لاحظ هالحركه..
ماجد\لا يادكتور ماشاء الله عليك..حب راسه بعدّ..
طلال\يبـه,,
قاطعه ماجد\ولاكلمـه..
سلطان التفت الجهه الثانيه\استغفر الله..
ماجد\سلطان انت مو قدي..فأحسن لك تسكت..
عبدالرحمن\خلاص ياسلطان اقصر الشر..ماتشوف ابوك تعبان,,
ماجد صـرخ\اي شر انت؟؟؟ّ..انا قلت لكم اكثر مره مالكم شغلي فيني ولابولدي..!ومو انت اللي تفهمني..
عبدالرحمن\انا مالي كلام معك اصلا.
ماجد ورماه بكلمه قويه وهو يصرخ عليه\ولا انا اتشرف اني اتناقش معك..
ابتسم تركي على كلمه عمه..وهو يقول بنفسه"والله وماطلعت هين ياعمي"


صراخ الرجال انسمع بوضوح عند الحريم اللي جالسين بالصاله..والجده ماقدرت وقامت وهي خايفه على عيالها وهند وراها وهي ماسكه ولدها اللي كانت ترضعه..ويوم شافت بومحمد طايح على سريره ووجهه ابيض وجنبه محمد..صرخـت بأعلى صوتها..والكل سمعها ..
سلطان ركض لأبوه لمن الكل اجتمعوا بالغرفه وهم مرعوبين..
كلها لحظات وألأسعاف وصل ونقلوا بو محمد المستشفى على صراخات ام محمد وصياحها والحريم مذهولين من اللي يصير ومو عارفين وش الموضوع..! وللمره الثانيه ماجد يكون السبب في نقل ابوه للمستشفى..

ام محمد ركبت مع سلطان السياره وتركت الكل وهي خايفه ..وكل ماتتذكر شكله تصرخ ..اللي يشوفه يقول خلاص هو مفارق حياته وبيموت..
كانت تطلب من سلطان يزيد من سرعته وهي تشوف سيارة الأسعاف تتخاطهم وتدخل قسم الطوارىء.

:

من بديت قصتي وانا اقول انه الجد يوسف هو اللي جمع عايلة العالي..معقولة نهايته قربت وبيضيع كل شي حلو بعده..!

ياسمين هل بتقدرّ تتحمل حياتهم الجديده!

لؤي وقربت لحظة الرداع

وراوين وطلال..وش راح يكون مصيرهم بعد اللي حصل.؟

والأهـــم..

رحله تحدد موعدها بيوم الخميس..نقطه على السطـر

انتهــى الجزء
اختكم
وصيت قلبي عليك


الجزء الواحد والأربعون

قـــال الـــودااااع

الا ليـت الفجر .. ما بااان ..
سهرنا والهوى واحد .. وصرنا والفراق إثنين
حبيبي قلبي اللي كان .. وفينا والزمن خوان
صبرنا والسؤال سنين ..
سقا الله روض خلاني .. رحلت وما رحلتوا بعين
ولا روحٍ .. ولا وجدان ..
نسيتوا بداركم إنسان .. نسيتوا وما نساني البين

يبي رحمــه..يبي نــور..يبي راحه..يبي يحس باأمان ويبعد هألألــم اللي ينغز فؤاده..
يبي يرحم هالعيون اللي تدمع ..يبي يثبت هالروووح اللي بتضيع بيوم فراق يوسف..
وش بيكون حاله بكره..وهل هو اصلا بيقدر يعيش بكره..! هل بيقدر على بعده..!
وبعد بكره ..وش بيكون حاله..! وبعده..وبعده..وبعــده!!!.آآآه يالؤي ياطول هالليالي وياقساوتها على قلبك
يوســف وينه يوسف!!ابيك والله ابيك..ماأتحمل فرقاك ياخوي..
انا كذاااب..انا اكذبت على نفسي يوم قلت لك برجع..انا حكمت على روحي بالمووت يوم ظنيت اني بتحمل..!يوسف انت وينك..لاتخليني..ارجووك ابيك..!
ابي قربك..ابي حبك..ابي صوتك وحنانك وعطفك..!
ليش احس اني اشوفك آخر مره..ليش كنت أظن فرقاك علي سهله..!
هذه أخر مره اكون وياك فيها مجتمعين وهمنا واحد..هذه نهايتنا يايوسف..هذه نهاية عشرتنا الحلوه.!شلون قولي شلون بتحمل حياتي بدونك..!
صحاه يوسف من سرحانه بصوته الحنون..وكأنه عارف انه يناديه ويبيه قربه..!
يوسف\هذا التلفون بيكون بيني وبينك واحد لي وواحد لك..!..بكلمك كل يوم..وحتى اذا بتنام بكلمك غصبن عنك.. لأني اعرفك بتسهر مع عبير وبتنسى نفسك..!..!واذا كلمتك لازم تقولي وش سويت..!تغديت تعشيت..مين اللي قابلت..ورحت شغلك او لا.!فهمت..!
لؤي وبتقائيه قال\طيب نسيت شي..!
يوسف \شنوا.!
لؤي كان يعبرّ بدون مايحس بنفسه..كلماته كانت تطلع من عظم الحزن اللي بداخله..اخوه..اخو عمره بيفارقه..قاسيه يادنيا!\مين اللي بيغطيني وبيدفيني بهالبرد.!انت تعرف برد باريس مو مثل أي بررر... وظغط على شفايفه وهو يحاول يمنع نفسه من الكلام..


كلام لؤي خلى الدموع تتجمع بعيون يوسف وماقدر غير يضم لؤي\تدري انك حمار ودب بعد..!وابتعد شوي عنه..انا وعدتك ووعدت الوليد اني مااراح ابكي..!لأني اعرفك بتبكي معي.!
وفعلا هذا اللي صار مع لؤي..
قرب يوسف منه وهالمره مسك كتفه وظل يمشي معاه قبال الجسر اللي يحبه لؤي وهو يناظر السماء المغيمه
يوسف\.. ماارح اجي هنا مره ثانيه تدري ليش..لأني باذن الله بشوفك بالبحرين..!بشوفك ببلادك اللي تحبها وتعشقها..وبنتمشى مع بعض لكن مو بهالبحيره ولابهالجو البارد..لا لالا..بنمشي وبحر البحرين قبالنا..والنسيم الحار يهب علينا..وبحط ايدي على ايدك..وبنتذكر ايامنا الخوالي...واحنا ندوس على رملها..بالله عليك مااشتقت لرملها..!
لؤي بنظره حالمه وبنفس الوقت مجروحه\رملها..انا اشتقت لرملها وارضها وسماها وهواها..
يوسف ابتسم وهو يلطف الجو\هه وحرها مافقدته..!
لؤي\اقول عااد لاتغلط على حرها..من حلاة حركم عااد..!؟ والله انه مايسوى نسمه وحده من هواها..تجيك لفحة هواء وحده تنعشك وتخليك بو تسع سنين..!
يوسف ظحك على لؤي\ههههههههههههه قويــه كل هذا بـ هوا البحرين..!
لؤي\ههههههههه عيل شنوا!..هذه البحرين يبه اصحــى..
يوسف\والنعم والله.. ههههههههه..
وقف لؤي عن المشي ووقف معاه يوسف..
يوسف\علامك..تعبت..!
لؤي ابتسم وهو يناظر النهر اللي تحته\يعنــي..تدري انه الدكتور سمير عرض علي اشتغل معاه.!
يوسف\ايه دريت..بس مو كأنه جاء بوقت متأخر..!
لؤي\ليش!
يوسف\انت مو محتاج لشغل اللحين..لأنك بترجع يالؤي..
حس بغصه لؤي\صحيح كلامك لكن انا حتى لو رجعت ماارح ارجع لمن اثبت نفسي.وبالعكس شغلي مع الدكتور سمير جاء بوقت حلو..لأني مثل ماقلت لك من قبل مستحيل ارجع وانا على هالحال..!
يوسف علا صوته\كلاام يالؤي كلاااام.. من تشوف الجواز بأيدك..وتحس انك حــر طليــقّ..بتحارب الدنيا كلها عشان ترجع لأهلك..وحتى لو خسرت كل شي بحياتك..!صدقني الوطن غالي..والأهل اغلـى واغلـــى..!
سكت لؤي لأنه ماعنده شي يقوله ليوسف بهاللحظه..

مر الوقت..وكل واحد يحاول يلطف الجو الحار اللي بينهم..
يوسف يحاول يخلق البسمه بوجهه لؤي بذكرياتهم
ولؤي يضحك والقلب يبكي ويرثي يوسف..
اتفقوا اتفاق انهم يقضون هالساعات بدون ذكرى الفراق وينسون احزانهم ويستغلون اخر لحظاتهم بهالمدينه بذكرى حلوه..
لكن وين النسيان ووين هاللحظات الحلوه!..ولحظة الفراق قربت..!

يتبع ,,,,
👇👇👇
أحدث أقدم