رواية برد وجفا ونسمة هوى -88


رواية برد وجفا ونسمة هوى - غرام

رواية برد وجفا ونسمة هوى -88

الكل كان متوتر وعلى اعصابه سواء اللي بالمستشفى والا اللي في البيت الكبير,,الحريم بالبيت كانوا جالسين على نار لأنه مافي احد راضي يرد على تلفونه ويطمنهم..
لكن الوحيده اللي كانت تعرف بااساس الموضوع هي راوين وهذا الشي خلاها تخاف وتحس بنــدم كبير تجهله..
حاولت انها تلهي نفسها باي حاجه..لكنها ماقدرت وهي تشوف انه الكل ساكت وخايف ويترقب أي اتصال من العيال..وكل ماتشوف البنات يدقون على اخوانهم ومايردون ينقبض قلبها اكثر..
وتكره نفسها اكثر..وآخر شي رد هيثم على فجر وكلمته على طول والبنات واقفين حولها وينتظرون منها أي خبر وماخذت اقل من دقيقه الا وهو مسكر منها والصدمه باينه بملامح وجهها..!
جمانه\فجر..قولي شفيه جدي..!
فجر كانت تتكلم ببطء وبعدم استيعاب\لالالا..جدي..
جمانه\فجــر حرام عليك وقفتي قلوبنا..
ابتسام\فجـر تكفين..يكفي اللي فينــا..
فجر\جدي سكته قلبيــه..وكملت وهي تحس بالغصه...دخل العنايه المركزه.. بيسون له عمليه عنده انسداد شريان في القلب..
من سمعت راوين كلام فجر ظلت تناظرهم بنظره تايهه وصارت تمشي بخطوات سريعه بدون شعور للطابق الفوقي وهي تحاول تخفي الدموع اللي بعيونها ..وما في احد حس بحركتها غير البنات اللي كانوا جالسين بالصاله الداخليه..!
دخلت غرفة البنات وطاحت على السرير وهي تبكي وقلبها يرجف..
والبنات على طول دخلوا بعدها ماعدا فجر اللي منهاره تحت...
راوين\انا السبب..انا الســبب..وصارت تضرب نفسها بالمخده وهي تحاول تعاقب نفسها..
غلا من سمعتها حاولت تحظنها وهي خايفه عليها\لا ياراوين..ليش تقولين كذا..
راوين كانت ترتجف وهي تتكلم\جدي اكييــ ــد تعب بسببي..انا سمعتهــم وهم يتكلموووون عنــ
جمانه\عن مييين.!
راوين صرخت\لااا ياربــي لاااا
جمانه حطت ايدها على قلبها\راوين لاتصرخين.. حراام عليك..
راوين\ليتني ماقلت لسلطان ..انا السبب
غلا\هدي الله يخليك راوين..ليش تتوقعين الأسوء..صدقيني مو انتي السبب من زمان جدي مريض بالقلب وان شاء الله بيقوم بالسلامه..
راوين\هذه انتي نطقتيها بلسانك..القلــب..معاه القلب.ياويلي عليك ياجدي..
غلا\ادعيله ياراوين..هو محتاج دعواتنا..
راوين من كل قلبها نطقت\يااارب..يااارب..انا خايفه كثيييير.. اذا صار في جدي شي مااراح اسامح نفســي..
جمانه صاحت على كلام راوين\الله يحفظه يارب.
ظلوا البنات شادين على اعصابهم وهم يشوفون راوين تبكي ولسانها ماوقف وهي تدعي لجدها..بعد فتره هدت راوين شوي وتكلمت..

راوين\كنت طالعه من غرفة الحريم بعد ماصليت العشاء وسمعت صراخ جدي..في البدايه ماميزت هو هو يصرخ او منفعل بصوته وفجأه انقطع صوته..وبعدها سمعت عمي ماجد يصرخ من جهه وسلطان يصرخ من جهه ثانيه..
جمانه\انتي تقصدين انهم كانوا يتكلمون عنك وعن طلال..!
راوين بكل ندم\ايييه وغرقت الدموع بعيونها.. سلطان تخانق مع عمي ماجد لأنه رافض انه يزوج طلاااال..ويلومه لأنه جدي تعب بسببه..لو تسمعون كلام سلطان لعمي ماتصدقون انه هذيلا اخوان وقلبهم على بعض..انا ماكنت فاهمه شي ومو مستوعبه اللي يقولونه لأني ماعمري شفت عمامي يتخانقون وشوي ويتضاربون وبدى يختفي صوتها وهي تحس بالحسره....ماكان ودي اكون السبب في مرض جدي..ولا كان ودي اكون السبب في الهواش اللي صار بين عمامي..واذا صار في جدي شي مااراح اسامح نفسي ابدا..
غلا ماقدرت تتكلم حطت ايدها على فمها وهي مرعوبه من اللي بيحصل,اما جمانه تكلمت بكل خوف
جمانه\هذا اللي سمعتيه بس..
راوين\ايــه.. ورجعت تصرخ بخوف.....ياويلي..ياويلــي..الكل بيلوموني.واولهم عمامي اذا دورا..حتى ابوي اذا درى وش بيسوي فيني..وتركـــي..تركي بيذبحنــي. اذا عرف..ليتني ماكلمت سلطان ولاقلت له..انا غبيــه..هذا حظي دووم كذا..شسوي قولوا لي..يارب ارحمنــــي..يااارب..
حظنتها غلا وبكت معها..وجمانه ماأستحملت وطلعت من الغرفه وهي تبكــي على حال جدها وحال راوين وطلاال اللي صاروا الضحيه..


الساعات كانت تمر بطيئه على عايلة العالي...ولحد اللحين مافي اخبار جديده..
لطيفه خذت عزيز وقررت ترجع بيتها وصابها كرم مفاجأ وتبرعت بسواقها لأم طلال ولأم احمد اللي رجعوا البيت بعد الساعه 12..اما البنات هو اللي ظلوا بالبيت وبالتحديد قبال تلفون الصاله يترقبون أي اتصال من أي احد من الرجال...ويمكن اكثر ناس متاثره هم البنات لأنه كل وحده فيهم كانت لها ذكرى حلوه مع جدها وهالأوقات هذه حرجه وصعبه بالنسبه لهم..ونور مرت عمهم ماتركتهم وظلت جالسه معهم لأنها حتى هي خايفه ومتوتره ومو قادره تغفي عينها..

راوين وبسبب سؤال امها عنها قررت تنزل وتجلس معهم عشان ماتثير الشكوك...لكن عيونها كانت متورمه من كثر البكي اللي بكته على جدها..
وبعد نص ساعه دق تلفون غلا وارعب الموجودين بعد الهدوء اللي بينهم..وكــان
غلا بصوت واطي\هلا
تركي\انتظرك بالسياره..وسكر الخط
استغربت غلا..وين تطلع هالوقت....وشافت العيون كلها حولها وحبت تطمنهم..
غلا \ تطمنوا..هذا تركي ..!
راوين من سمعت اسم اخوها حست بالخــوف..
اما نور رف قلبها \تركي بره..
غلا بحنيه\ايه..
نور\ماراح تنامون هنا!
غلا\ماأظــن..
نور بخيبة امل\الله يحفظكم
قامت غلا وطلعت فوق تاخذ عباتها وشنطتها .سلمت على البنات وحبت راس نور
نور\اذا وصلتوا طمنيني..
غلا\ان شاء الله..
وطلعت..
من اول ماركبت السياره والهدوء هو سيد الموقف..وماينسمع غير صوت التدفأه اللي مشغلها تركي..لكن هي خلاص تعودت على هالموضوع..تعودت الصمـت منه..
تعودت على تقلباته..ساعات يكون ساكت جامد..وساعه يعطيها ابتسامه جانبيه..واذا ظهر عواطفه يظهرها بكل قوتـها وينسيها حتى اسمها..
تركي مزيــج غريب بالنسبه لها..لازالت جاهله تصرفاته..

تركي\سرحــانه فيني!
فاجأها بصوته..ومن غباءها قالت\كيف عرفـت..
تركي\من عيـونك..
صارت ترمش عيونها بسرعه.. وماعرفت وش ترد عليـه.!ذوبها تركي
تركي\يالله نزلــي..
غلا\وين؟؟
تركي بأمر\نزلي وبـــس..
التفت للمكان..ونزلت بسرعه..
غلا بهمس\كوفــــي..
تركي\ايه وشفيك..!ماودك تروقين!
غلا ابتسمت له وبداخلها مستغربه من برود اعصابه..جدهم بالمستشفى وهو نفسه بكوفي.!
خذوا لهم طاوله وجلسوا فيها..وبعد ماطلبوا..
تركي\اكشفـي..
غلا هي تدري انه مافي احد..بس كانت منحرجه منه..
تركي لمن شاف وجهها ابتـسم..وهي اجهلت هألأبتسامه!

"..معقوله مشتاق لي..مثل ماأنا مشتاقه له!!
معقوله يحبنــي.!.."
هذا اللي خطر في بالها اللحين!
"ليتني اعرف..بس كيف..كيف ياغلا!"
تركي وهو يضغط على راسه\ورجعت مره ثانيه تسرحين فيني..!
غلا تفشلت\وليش هالثقه!
تركي\قلت لك..وبنظره غريبه وهو يمسك ايدها برقه..عيونك تفضحك..
ابتسمت بخجل وقلبها يدق..
تركي ذكي..وعارفها..واكيد عارف انها تحبـه..ليتك تبدالني هالشعور ياتركي..
صدقني بنسى بحبك ظلمك واهاناتك وجرحــك.
أحبــك..احبــك..واحبــك بس وين حبك وحبــي!


غلا\ممكن طلب.!
تركي\امري..
تركي\ليش ماتشيل هالنظاره اللي لابسها!
ظحك تركي على طلبها السهل..وفصخ نظارته..وحطها على الطاوله..ولمن شافت غلا انه نظارته على الطاوله ماقدرت ترفع عيونها له..اما تركي رجع يمسك ايدها وهالمره مسك خاتمها اللي اهداها لها يوم زارها بأايام الملكه وظل يتحسسه بنعومه وبشفايفه ابتسامه حلوه..
تركي\دوم تلبسينه..!.
غلا وغارقه بحبه\اهممم...
رفعت راسها والتقت بعيونه..وبتلقائيه قالت \كذا احلى!..اقصد....عيونك.!
ابتسم بهمس\عيونك الحلوه.!
غلا\........
تركي وقدرّ خجلها\اوكي لاتردين.!
سكت تركي..وسكتت غلا..وكل واحد فيهم عاجبه هالسكــون المريح...وهالمشاعر الحميمه اللي طاغيه على الجو..
تركي\على فكره بكره ماشين الرياض..!
غلا ماوحى لها تفرح بهالجلسه..وتضايقت من كلامه\ ياربي ليش! وجدي..
تركي\جدك ماعليه شرّ..عندي شغـل ولازم اكون بكره العصر بالرياض.
غلا\طيب ليش جينا...مدامك بنرجع بكره..!
تركي حس بسخريه من كلامها\تصدقين ماأعرف مين اللي كان يبي يجي يشوف اهله..
غلا\ماجلست معهم..اللي صار اليوم اربكنـا..
تركي\مو مشكلــتي اوكي غلا..؟؟؟
ماردت عليه وحررت ايدها منها بسرعه..
تنرفز من حركتها..وهو خلقه كان مصدع..!
تركي ورص على شفايفه ورجع يمسك ايدها بقوه\اوكي غلا؟؟؟
لمن شافت نظراته وايده القويه..خافت وردت على طول وهي حزينه وبعبره مخنوقه\اوكـي..
حرر ايدها ولف عنها..وهي مأاستحملت ودمعت..
ماكان وده يضايقها..لكن هي رفعت ظغطه..
تركي\غلا
غلا\.......
تركي\غلاااا
غلا بهمس\نعـم..
تركي\لاتتضايقين.!
غلا\انا..مو متضايقه..
تركي ابتسم وياكثر ماابتسم اليوم\خلااص آسفين..
ماردت عليه..
تركي\طيب ابتسمــي..عشاني طيب..!
ابتسمت بحزن عمييق وهي كارهه روحها اللي تحبه..ليش تحس بالضعف بقربه..!هي ماكانت كذا..!غيرها تركي.غير شخصيتها وحياتها وكل شي فيها..!.وأسرّها بعذابه..

تركي\تدرين..انــا آآرتـاح ويأأك..وسكت وهو يشوفها مفتحه عيونها الكحيله على ألأخير وشكلها متفاجأه من رده.!
تركي\قلت شي غلط!
غلا\لا بســ..ورمشت بتوتر وبحركه سريعه..ماتوقعتــ
تركي قاطعها\لاتوقعـي..غلا ناظريني..
غلا\همم
تركي بصوت حنون\انتي شي كبييير...شي كبير بحياتي...


باخر الليل رجعت هند البيت الكبير..واول مادخلت الصاله شافت نور قبالها وعيون الكل حولها..نور مااستحملت تشوف هند منهاره..ضمتها وهي تبكي واجتمعوا البنات حولهم..وهم متوترين..
جلست هند بعد محاولات نور الطويله وطلبت من جمانه كاس ماي لأمها..
هند بعد ماهدأت وشربت الماي\وين الباقي..!
فجر تكلمت بسرعه وهي تبي عمتها تنطق\كلهم راحوا..واحنا بقينا..!
هند وتناظر ساعتها\ليش كم الساعه.!
راوين بصوت واطي\ثلاث الا ربع.!
هند\تصدقون من عظم اللي صار ماحسيت بالوقت..
نور\بشري ياهند..شخبار عمـي!
هند تنهدت بحزن\آآه يانور..شقول بس..االظاهر السكر لعب دوره عند ابوي..وسبب له سكته قلبيه.وهالمره ماندري اذا بيقوم منها او لا!
نور\قالي بوتركي انها محتاج عمليه عشان يوسعون له شريان القلب..
هند ارتعبت من ذكر اسم العمليه \ايه..الله يستر..الله يســتر.الخوف انه تجيه جلطه قلبيه أثناء العملية... وحطت ايدها على فمها وهي تكمل....ادعوا له يابنات جدكم محتاج دعوااااتكمــ وغاب صوتها بالبكـي....
تأثروا البنات أكثر..وزاد همهم همين..!
وبلحظه كرهوا عمهم ماجد اللي ماهمه غير كلمته ماتنزل الأرض..
بعد هدوء قاتل استمر دقايق.
نور\طيب وأمي وينهـا!
هند\امي مارضت تترك ابوي..لكن لزموا عليها اخواني..واظن بتجي مع سلطان..!
نور\طيب قومي ياهند ارتاحي..الوقت متأخر.!
هند\وين الراحه وابوي بالمستشفى.!
نور\ذكري الله ياهند..والله يجيب اللي فيه الخيير..
هند\جمانه.!
جمانه\هلا يمه..
هند\وين اخوك.!
جمانه\نايم فوق مع الخدامه..
هند\وليش تركتيه لوحده.!
ابتسام\لا عمتي حرام عليك توها مطلعته فوق..
فجر\عمتي كلام نور صح...روحي ارتاحي..انتي مره تعبانه..
هند\وانتوا ماراح تنامون.!أكيد تعبانين اليوم الأربعاء..
فجر ابتسمت بحنيه\الا اكيييد..
هند تذكرت شي فجأه وابتسمت\ياحليلكم يابنات..والله فيكم الخير..امهاتكم كل وحده راحت بيتها وانتوا ظليتوا..الله يخليكم لبعض ويرجع لنا اللي فتح لنا باب بيته. قولوا آميين.
البنات بتلقائيه نطقوا\آميييييييين
ظحت هند عليهم..
ابتسام\بنات خلينا نعيد آمييين مره ثانيه مدام عمتي بتضحك هالضحكه الحلوه..
ظحك الكل..وقامت هند لولدها..وبعدها قامت نور..وظلوا البنات ..


وصلّ سلطان والعيال الجده البيت وعلى طول تحركوا وكل واحد فيهم يبي يبتعد عن هالجو الكئيب..وظلوا يتمشون بشوارع الخبر وكل واحد نفسيته تعبانه..
هيثم هو اللي ساق هالمره وخلى سلطان يركب مكانه..اما طلال كان ورى وساكت ورامي شماغه جنبه وعينه على الشوارع الفاضيه..
وقف هيثم السياره بواجهة الخبر..وطلال على طول نزل وخذ شماغه معه..
هيثم بهمس \و شالحل..المسأله تعقدت اكثـر..
سلطان كان يناظر طلال اللي وقف قبال البحر\هذا انت قلتها المسأله تعقدت اكثـر..واصلا انا عقلي مشوش..وماسك أعصابي..اللي سواه ماجد اليوم مو شويه..!
هيثم\تدري انه طاح من عيني..توقعته بعد مايشوف جدي تعبان يسكت..يحس بالندم..لكن انصدمت يوم كمل اخناقته مع عمي محمد يوم لامه على اللي حصل..!
سلطان\اصلا هو خسيس..والله لو صار في ابوي شي مااراح انساها له..انا مدري شلون يفكــر..قلبه صخــر..مايهمه إلا نفسه وكرامته..
هيثم\لا وبعد بكل قواة عين جاي المستشفى عشان يكمل خناقته..شكله ماصدق على الله انه عمي محمد يكلمه..!
سلطان\لاتذكرني ياهيثم احس اني بمووت من القهــر...يمكن أنت تفكر انه حاقد عليه وودي اأدبه..لكن والله ياهيثم انه يعز علي اخوي ولد امي وابوي يسوي كذا..وين ماجد اللي اعرفه.!الدنيا قسته وسودت قلبه..وماصار يشوف غير الفلوس..!
وصدقني احس انه بس كذا عناد مايبي يزوج طلال..يعني هو ماعنده سبب رئيسي..وطلال مابقى له شي ويخلص دراسته..لكن مايكون ماجد اذا ماعاند ..
هيثم\تدري انا اتوقع عمي بوتركي مايدري انه طلال يبي بنته..انت ماتشوفه كان ساكت ومستغرب من تصرفات اخوه..
سلطان\إلا صحيح..شكله مايدري..لأنه ابوي مامداه يتكلم الا وماجد هبّ بوجهه...
هيثم ابتسم بسخريه\أصلا لو يدري كان شفت تركي اول من يوقف مع عمي ماجد...
سلطان\اي والله..صادق..تركي ياخذ كثير من ماجد..
هيثم\وانا اقول هالتركي طالع على مين..!انا مأأعرف شلون مستحملته أختي..
سلطان\ليش هي شكت لك.!
هيثم\لا ماشكت..بس احسها متغيره..!
سلطان\يمكن إحساسك غلط.
هيثم تنهد وهو يفكر\يمكــن..
ظلوا الشباب يتناقشون بكل اللي حصل اليوم من احداث لمن اذن الفجـر..نادوا على طلال اللي كان لازال على وقفته..وراحوا يصلون...ورجعوا البيت بعد ماوصلوا هيثم بيته..اما طلال اعتـرض
سلطان\تصدق كنت بقولك تعال نام معي..بس أنت سبقتني..!
طلال\أنا مأبي أشوف ابوي بعد اللي صار..!
سلطان\ريح بالك ياطلال.,ومهما صار بيظل ابوك..!
طلال بضيق وهو يناظر الشفق الأحمر اللي بالسماء\انا مأبي اتناقش بهالموضوع اللحين..سكره رجاء..
سلطان\على راحتك..
وصلوا الشباب البيت..واول مادخلوا ماحصلوا احد بالصالة..طلعوا فوق بهدوء ولمن مروا غرفة البنات سمعوا اصوات كثيره..
سلطان\اكيد جمون وراوين مسوين هاللأزعاج بس لحظه كانه صوت فجر!
طلال من سمع اسم راوين انقبض قلبه...وهو يتخيل لو راوين عرفت بالموضوع وش راح تكون درة فعلها..لكن اللي مايعرفها طلال انه راوين سمعت كل شي..
ولأن صوت البنات عالي..سمعوا جمانه وهي تكلم راوين..

جمانه\خلاص ياراوين اذكري الله..ماتعبتي وأنتي تبكين....صدقيني تركي محد بيقوله وخصوصا بهالوقت الحرج..دخول جدي المستشفى مو سهله علينا..ولا عليهم..
راوين بصوت حزين \والله مو عارفه من وين الاقيها والا من وين!..من اخوي ولاابوي..والا هالخطيب اللي اعترض حياتي..كرهت كل شي بسببهم..!
:
سلطان\شفيك واقف ..عجبك الكلام..!
طلال بهت بمكانه..حس انه قلبه تفتت بصوت راوين الحزين.. وتأكد هاللحظه انها عرفت كل شي..مشى بسرعه لأنه مايبي يسمع اكثر..ودخل الغرفه..
سلطان كان واقف وهو محتار يدخل على البنات ويهديهم..والا يمشي.!
ولأنه التعب اهلكه..تبع طلال بعد ماطفى الأنوار..وبكره اكيد بتفرج..

يتبع ,,,,
👇👇👇
أحدث أقدم