رواية غثيثة مزحة الايام -58

رواية غثيثة مزحة الايام -58

رواية غثيثة مزحة الايام -58

الجزء الخآمس و الثـــلآثون
◙◙◙




- وش فيك منـآديتني ؟ تقولين ضروري تراك خوفتيني
نجلا توها بتتكلم الا يدق باب غرفتها :أدخـلي ندوووش
دخلت ندى ..
ثوآني .. سلآم وندى تفصخ عبايتها ..




ندى بقـل صبر:نجلا وش فيك انتي مناديتنا كلنا ..
نجلا ثـوآني ..بدآ فكها يرتجف ..ووجهاا احمر وشوي وتنفجر من البكاء .. :انا انخطبـت !!
خجل جلست جنبها:طيب وش اللي يبكي فالموضوع .. مو انتي ماتبين ناصر جاك واحد غيره
نجـلا وصوتها يتطقع : اييييه اللي جآني محمد .. ياربييييه ليش يصير معي كيذا؟؟
ندى :أستغفر الله يانجلا ..ماينـدرى وين الخـيره
نجلا :بس أخـوان 2 .. انا مدري وش بيترتب على هالشي ..
ندى :نجـلا انتي مب صـآحبه وربي .. ابوك وش يقول
نجـلا :ابوي مب لازم تشـآورينه هماه ولد آل"..." فهوو موافق .. يقول خذي محمد انه شآريك .. ويبيك .. انا مو هذا الي مضيق صدري .. بس لييه اخو ناصر ..يعني لهالدرجه انا عادي عندهم يخطبني اخو يقول الاول ماأبيها يجي الثـأني يقول هاتها
ندى بقهر من تفكيرها:وش يخليك تقولين كذا ؟
نجـلا بصوت عالي كله قهـر:وآآآآآآآضحه!!! .. انا مو غبيه عشان ماأعرف ان ناصر ماقد عمره حبني .. بس ماتووقعت هالحركه ابد ابد .. "وهي تصييح وشفايفها مقوسه للتحت ووجهها احمر من البكي ".. يـآربي .. لا أهـل .. ولا احد ..حتى زووج ..زووج بس آبي واحد صآحي واحد عالاقل زوآج تقليدي ..ماأبي حب وغيره .. بس أبي حيآة زي النااااااس
ندى تضمها: يآقلبي يانجلا ..شلون مالك احد ..انا وخجل وين رحنـا .. انتي فكـري .. عطي محمد فرصه يمكن هو صدق شآريك ويبيييك




كنت أظن الحظ جابك و |إبتسَم
أثر أنا و ( الحظ ) . . . مانواطن بعض!!




خجــل !!
كانت في عالم ثـاني .. مصدومه لأخر شي .. تطالع نجلا وندى .. وتحس نفسها في عالم ثـاني ..كأن مشاعرها يوم فراس
يوم توقع على ملكتها عليه.. يوم زفتها اللي كانت نآقصه حييييييل
يوم تدري بـ موته ..
كل شعور شييين رجع لها ..ليه محمد اللي حبته ..سطـام اللي اخذ قلبها وعقلها .. صآر لأعز إنسانه لها ..
صديقتها واختها .. كاتمه أسرارها
ماصدقت ان كل شي هآن بالنسبـه لها .. كن الدنيـا جت على هي ماتبي .. فراس مات قبل لاتجرحه من غير لاتقصد .. لأنها تدري انها مراح تحبه ..
وبعدها صآر محمد ولد خالها وتقدر تتزوجه لأنه من العائله ..
رآح لـ نجـلا ..




فجـأه قالت بسرعه ونبرتها فيه مسحة حقد:دامك ماتبييينه ليه تتزوجينه ؟
نجلا طالعت في خجل .. وعينه مدمعه وخشمها الدقيق محمـر من البكا ..
خجل : أكيـد ناصر قايل له رح تزوجها لأني ماأبيها كلنا ندري انه مايبيك لاتضيعين نفسك يـانجلا مع واحد جاي يخطبك كذا
ندى عصبت :هيييه!! انتي وش تقوليييييين؟؟ وش اللي يخطبك كذا ..يمزحون معك هم ولا يلعبون حريم !! ..ياأنك قولي رأي صآحي ولا اسكتي
خجل بصوت عالي وهي مقهـوره ونبرتها قاسيه شوي :وش اسسسكت وهي بتاخذ اخو خطيبهـآ .."تطالع نجلا " ..نجـلا كيف تآخذين اخو خطيبك ؟؟ انا لو منك اجلس في بيت اهلي اكرم لي ولا أخذ واحد كنت في يوم من الايـام بصير زوجة اخوه
نجـلا كانت تطالع خجل بنظـرات جامده شوي .. وكأن كلام خجل ماأثر فيها زي ماكانت خجل متوقعه .. بس هو صدق انه ماأثر فيها؟ : آبغـآ اجلس لحالي
خجل :انا من رأيي يانجلا تفكرين بعقل .. ولا تسوين حركه يمكن تندميين عليها
نجلا بنبره :انا عشان كذا ابي اجلس لحالي .. عشان افكر بعقل ولا أندم على شي !!!




طلعـوا ندى وخجل .. خجل ركبت سيارتها وعلطوول عالبيت ..اما ندى تذكرت انها قايله للخالد يجيهـآ بعد ساعه دقت عليه
خالد :أهـلاً
ندى :هلا بك وينك فيييه
خالد :وش بغيتي ؟
ندى :ياربييييه منك هذا انت الواحد لين سألك وينك كأنها سألك عن اول ليله من عرسك وش سويت فيها
خالد :هههههههههههههههههه والله انك قليلة آدب ..المهم وش تبين
ندى :أبيك تجيني
خالد :ليه ؟
ندى :خلصت الزياره عندهم .. تعال
خالد :الله هالعايله احيانا احس انها خيره اني ماأخذت منهم .. اجل عندهم أوقات زياره
ندى : ههههههههه امزح ياذكي .. المهم وينك ؟
خالد : مدري شوفي ..نص ساعه اكون عندك لأن الملك فهد زحمه ويالله اجيك
ندى :ليه الملك فهد قد صار فاضي ..آآه بس انا لين اعرست بشرط اني ماأعيش فالرياض
خالد : ههههههه لا يكثر بس يالله




سكرت ندى فكرت ترجع فوق للنجـلا .. خافت يرتفع عليها الظغط .. بس تراجعت خافت انها تبي صدق تجلس لحالها
مقهـوره من كلام خجل للنجلا .. كانت قاسيه مع نجلا مرره ..
دخلت الفيـلآ الكبيره .. وهي متـردده تروح لها ولالا ؟ ..




- فيه أمـور كثيره يمكن ضآيقتني وانا ساكت لجل مانخسر بعضنا كنت احاول لجل ماأبعدك عني وانت بعاندك كذا تنهي املنا




جـآ للصاله يزيد وشاف ندى كانت واقفه .. عقد حواجبه .. ندى اول ما شافت يزيد وعلطول تغطت وراحت فوق .. وهي منحـرجه منه مرررره




يوم اختفت من عيون يزيد قال بصوت وآطي :ينعن ام الميـانه ياشيخ ..رقت ولا حتى كلمه وحده .."وتذكـر" هذي صديقة نجــلا ..




وصلت للغرفـة نجلا .. بس رنّ جوالها ..
المتصل>خالد
ندى :لا تقووووول انك جيت
خالد سكت شوي يستوعب ..بعدها قال :أصدمـيني وقولي انك بتجلسين والله إن اذبحك
ندى :هههههههههه
خالد :كبرك انا عشان العب معك ..اخلصي علي وتعالي انا عند الباب ..
ندى :ههههه طيب
ونـزلت ..وهي نازله كان يزيد يرقـى الدرج .. نزلت بسرعه ورأتجهت للباب وطلعت وهي متوتره مره لأنها لحالها معه
اما هو يوم مرت من عنده .. ماكان متوقع منها الا انها تركض للباب خطر تطيح من العجله
أتجـهه للغرفة نجلا .. طق الباب بس محد يرد .. هو متـأكد انها هنـا .. دخل وشافها عالسرير شك انها نايمه .. بس يوم سمع شهقاتها وهتزاز جسمها تحت اللحاف عرف انها تصيح
رآح لها وجلس على طرف السرير :نجلا !! وش فيك
نجلا من تحت اللحاف :مافيني شي !! ..
يزيد شآل اللحـاف:وش مافيك شي .. كل هالدموع ليه
نجلا جلست : قلت لك مافيني شي ..بس ابي انوم
يزيد:نوم الحين؟ نجلا تكفيين قولي لي وش فيك ..ساره سوت لك شي
نجلا :لأ .. محمد خطبنـي
طالعها يزيد شوي.. ثم :هههههههههههههههههههههههههههههههههههههههههههه
نجلا عصبت :وش فييييك؟
يزيد :ههههههههههههههههههههههه توني ادري انك خبله .. ياأم دمعه
نجلا :وش اللي يضحك .. تراااه اخو ناصر
يزيد بجديه ولو انه يبي يضحك عليها : شوفي يانجلا ..تبين رأيي ؟
نجلا بإهتمام :إيوآآ ؟
يزيد :خذي محمد .. وانتـي ربحـانه من جهتين .. اول شي ناصر لين الحين ماتحرك .. يعني لا اللي انتي متزوجه ولا انتي السسنقل يمكن تتزوجين
نجـلا :بس ترا محمد اخو ناصر يـأناااس افهمـوا
يزيد :طيب؟
نجلا وهي خانقتها العبره :إن وافقت على محمد بخسر خجل
يزيد مافهم :وليه؟
نجـلا :خـ .. "بلعت ريقها"..خجل تحب محمد
يزيد :هي قالت لك شي ؟؟
نجلا :لا ..بس انا اعرف خجل كثيير .. تحبه وربي حبها له مب شوي
يزيد بسخريه :أمدآها ذي تحبـه؟
نجلا : ماأدري ..بس اللي اعرفه انها تحبـه ومو شوي بعد ..
يزيد :وانتي وش عليك منها .. كلاً يدور على مصلحته ..
نجلا ماردت بس خنقـتها العبره ..
يزيد : نجلا انا مراح ازيف الحقايق عشان ماتزعلين ..بكون صريح معك وانا اخوك وآبي مصلحتك .. بالله علميني ان ماخذتي محمد .. وش بيكون مصيرك مع ناصر هاللي ماتحرك .. وبعدين ناصر مارضى ان محمد يخطبك الا انه بـآيع السالفه كلها بريـآل .. ولا مـآفيه واحد يرضى ان اخوه يخطب خطيبـته .. نجلا تكفيين فكري بعقلك وانا من خلال معرفتي فمحمد ..ترآه وربي رجال بمعنى الكلمه .. ولاتنسين انه عاش حياة قاسيه قبل .. واكيد انه رجل أستقلالي وعصامي ويقدر يعيش نفسه بنفسه ..وناصر عايش عيشة عز وترف .. كل شي واضح قدامك ..فكري بنفسك قبل لاتفكرين بـأحد ..
نجلا وهي تصيح :ماأبي اخسسر خجل
يزيد :طيب فرضاً انك رديتي محمد عشان خجل ..وخجل تزوجت وشافت حياتها ..بتلهى مع زوجها وبنفسها وعيالها وبتنسـآآآك ..وان ماخذتي محمد عشانها وش يضمن انه بيتزوج .. يعني لآ انتي اللي ربحتي ولا هي
نجلا :مـآيهمني ..تزوجها ولالا ..بس اهم شي مو انا ..
هي مقتـنعه بكلامه ..بس تبي زياده ماتدري ليه : مع انها سمعتني كلام قاسي اليوم وربي
يزيد :وش قالت ؟
نجلا : تقول شلون ترضين بمحمد وهو اخو ناصر ومن هالحكي .. حسستني اني عاله على اهلي وعلى ناصر ومحمد .. هي من كبر حبها له سوت كذا
يزيد :طيب .. خل نفترض انك رديتي محمد ورآح تزوج خجل .. وش مصيرك انتي اللي تركتي محمد للخجل ..هي بس يوم خطبك محمد سوت كل هذا .. اجل لين صار شي اقـوى والله ان تترك ولا عندها فيك ..شوفيها فكرت بأنانيه ودورت الاحسن للنفسها ونستك انتي يانجلا ياصديقة عمرها وبنت عمها .. فكري يانجلا .. "وببستامه وشوية مرح " ..والله لو لي سلطه عليك كان زوجتك أياه وبتجييين تشكريني وتحبين يديني بعد
نجلا :وآثق تراك ههه
يزيد يقوم :ألمهم فكري بس اتمنـــى من كل قلبي انك توافقين ..على الاقل تفتكيين من تعذيب ساره لك ..ومحمد رجـال وربي ..وربي يانجلا انك مراح تلقين واحد زيه وهو جالك للعندك لاترفسـين النعمه
نجـلا فكرت بـ كلامه ..صادق هو ..عالاقل ماصار زي خجل اللي من درت ان محمد جـآ يخبطها سمعتها هالحكي ..وهي اللي جابتها عون صارت لها فـرعون ..والحب غيرها .. حبها للمحمد خلاها تنسـى نجلا وكل لحظه حلوه جمعتها بنجلا ..


لحقت اخوها قبل لا يطلع :يــزيد
كان يزيد توه واصل للصاله :هلا
نجلا بخجـل .. وشعرها اللي كان على كتفـها جا على عيونها شوي يغطي حمآر وجهها :قـل لأبوي إني موافقه على محمد ..
يزيد انبــسط :جد؟؟!! .. مبرووووك والله إني اسعد انسان فالدنيـا
نجلا بخجل :هههه الله يبارك فيك بس قل لأبوي اول قبل لاتبـارك




◙◙◙◙◙




على السـاعه 11 ليـلاً
نزل من الطياره الخاصه .. تحمد له احد الخدم بالسـلآمه
رآح للسيـاره اللي كان احد السواويق جآي فيها مرسيدس بانوراما فتح له العامل الباب الورآني وركب هو ..
اتجهه للقصـر اللي كانت متربع بكل شموخ بالحي .. وماخذ حيز كبير من الحي اللي كل بيوته من البيـوت الفخمه ..
دخلت السياره من الباب الكبيـر .. ووصلته عند باب الفيـلآ .. نزل من السياره ودخل للفـيلا
وكانت امه فالاستقـبال




- الحمدالله عالسـلامه
ابتسـم وحب راس امه :هلا يمه .. الله يسلمك
مضآوي :أخبار جده؟
محمد :والله ماشفتها .. من الطياره للشركه ومن الشركه للطياره .. تسلم عليك
ابتسمت مضآوي :تراني مجهزة لك العشـا وابوك الحين بينزل
محمد :طيب دقايق بروح اغير ملابسي .. وبجـي




راح للغرفته غير ملابسه .. ونزل لقـآ الخدم حاطين السفـره على حاولة الاكـل ..
جلس مع امه وابـوه




ام محمد ببتسامه :هاه يامحمد .. وش اخبارك الشغل عسىى انهيت كلش؟
محمد : إيه يبـه .. ماكان فيه مشاكل كثيـر ..بس نادر يستهبل هههه
ابو محمد مبتـسم :مشكور والله .. تعبتك معي ..تقدر بكره تاخذ إجازه
محمد :تسـلم يبه .."وقال وهو يناظر امه وأبوه"..أمممم انا سويت شي اليوم واتمنـى انكم ماتزعلون مني
ام محمد :خير يامحمد ؟
محمد :الخير بوجهك يمه ..بس ..أمممم ..انا بصراحه اليوم خطبت
أنصــدموا من كلامه .. سأل ابو محمد :هذا اللي كنت تبي تقوله لي وقلت لك بعدين؟
محمد :أيه ..بس كل شي صار فجـأه ووو
ام محمد وهي خايفه من رده :ومنهي اللي خطبتها .. عسى ميب نجلا
محمد :إلا .."وبسرعه قبل لا احد يتكلم "..وابو فراس انبسطت بس قال بياخذ رأي نجلا
ابـو محمد :شلووون؟ ..محمد هذا وانت عاقل تسوي كذا .. وش بيقول عننا الرجال ..وناصر اخوك وش بتكون ردة فعله
محمد يناظر امه ثم يكلم ابوه :انا كلمت ناصر بهالموضوع ولا عارض .. وبصراحه انا ابي نجـلآ .. وشاريها مب احسن من ناصر اللي لا هو يبيها ولا هي تبيه
ابو محمد :انت تبي نجلا ؟
محمد :أيييه .. وشاريها بس خل توافق ..والله يبه ان تعيش عندي معـززه مكرمه
ام محمد :بس محمد حركتك ميب حلوه ابد .. يعني شلون تخطب وحده كانت بتصير مرة اخوك
محمد :كـــانت ..وانتي قلـتيها .."يغير الموضوع لأنه وتره" ..المهم يمه كل شي جآهر للجية امي
ام محمد ببستـامه :إيه يآبوي .. وصيت الخدم بكل شي
محمد :يخليك لي يارب




◙◙◙◙◙




-هاه يمه بشري !!
ام نواف :لين الحين ..بس حكــي
نواف :ماقالوا لك انهـم موافقين
ام نواف :وانا وش درآني .. وانت اترك عنك العجله تراهي ميب زينه
نواف :هههههه وش اسوي احتريت 27 سنه اكيد بستعجل
ام نواف :اركــد بس ..وان ردوا قلت لك




◙◙◙◙◙




نزلت ملاك وهي تغنـي بصوت عالي صـرخ فيها وهو منقر منها
-ووووجعه اسكتي!! من زين صوتك الحين
ملاك :مالك دخل مالك دخل مالك دخل
نوره :مالك ولا خـالد هههه
ملاك :لا عليـا
متعب :لا هيـآ ههاهاهاها
مـلاك : يـآرب عالظـراااافه




جت ام متعب .. وهي مبتـسمه ..:نوير وملاك .. ابيكم تتحهزون وتلبسون
ملاك ونوره :ليييييييييش؟
ام متعب :انتوا لو ربي يفككم من العجـله .. خلوني اكمل كلامي
ملاك :أسـلمي ياميمتـي
ام متعب :بآتسر بنروح للبيت محمد ..ام محمد عازمتنا .. وابيكم تكشخون وبيضون الوجه
ملاك :آآآآآآآآآآآلله واعرس على واحد من آآل "......." واصير غنيـه ويشار الي بالبنـان
متعب :لا وانتي الصادقه يشآر اليك بأبصع الرجل
نوره :هههههههههههههههههههههههههههههههههههههههه
ملاك :وووووووووجع! ..يممممممممممه شوفيه
ام متعب :ألمهم .. لاتفششششلوني مع الحرمه
متعب :انا من نآحيتي ظامن لك الفشسيله من جهت ملاك .. اول ماتدخل قصرهم تقل كأنها ماقد شافت قصر ولا بيت زين .. والله ان تفتح عيونها 3 سـانتي .. وتشششهق ذيك الشششهقه وطبعا كالعاده بتصكهم بعين ماشيه 200.. ويعلنون فالجرآيد عبدالرحمن بن محمد آل"...." يعلن إفـلآسه ويطلبون من اصحاب القلوب الرحيمه يسددون له ديونـه
ملاك :يمممممممممممآآآآآه شوفيييييه
نوره :ههههههههههههههههههههه
ام متعب :يـآشين حتسيك .. عدال ياللي ساكن في قصر اليمامه زريبه فالبطحآ وتخب عليك ...
نوره :هههههههه وهو صآدق يمه خلي بنتك تسمي وتقول ماشاء الله لا يفلسون آل"...."
ملاك :تمسسسسك اللي يسمعك يقول ابد ..تنافسين الوليد بن طلال ففلوسه
نوره : عيووني انا مجربه العز ..
ملاك :حتى لو ..مايمنع انك بنت فقـر ..
ام متعب :هذي اولها ..انا بدق عالحرمه اقولها تكنسل العزيمه
متعب :إيه والله يمه كنسلي العزيمه خن نحافظ على ماء وجهنا .. اذا هذا اوله ينعاف تاليه
ام متعب :لا إن شاء الله مب مفشلينا




◙◙◙◙◙




من بكـــره
كان محمد بـ مكتب ابو فراس لآنه طالبه




ابو فـراس مبتسـم :والله يامحمد البنت وافقت .. بس انا عندي شرط
محمد :آمـرني ..وكل شروطك موافق عليها ..باللي اقدر عليه
ابو فـراس :لآ هو تقـدر عليه .. او شي ..الملكه تكون بأسرع وقت ..اما الزواج بكيفك ..
محمد :والله ياعمي لو تبي الملكه الحين ماعندي مآنع .."وكمل مايدري قال كذا"...بس ممكن اعرف ليه تبي تعجل بالملكه ؟
ابو فـراس:اسمح لي يامحمد .. بس اخوك كان معلق بنتي .. وانا ماأبي اعلقها اكثر من كذا ..ودامك شآريها خير البر عاجله
محمد .. سكت شوي ..أخذ نفس وقال :وانا ماعندي أي مشكله ..
ابو فـراس :خـلاص خلها بكره الملكه لأني مسـآفر بعده
محمد انـصدم من كلامه ..بكره؟؟ ..قريب مره كان متوقع يقوله مثلاً الاسبـوع الجاي .. اللي بعده ..هذا اللي فهمه من قريب .. بس بكره؟؟
محمد :اللي تشوفه




◙◙◙◙◙




تذكرت آخر خدمه اسـداها لها بندر ..يوم سوآ لها عملية رتق للغشـآء البكاره ورجـع لها عذريتها ..
وبلغ عن إيـمان وخالها ..وأنسجـنوا .. ايمان انسجنت مايندرى كم ..اما خالها فـ إعدام لأنه مروج ..
آخـذ لها حقها اللي اخوها عبدالله ماخذا لها أيـاه
/
- مرام ..مــرام تكفييين قولي لهاللي اسمه بندر ..ماأبي انسـجن حرام عليك انا عمري بس 21 سنه حرام انسجن وانا توني صغيره
مرام :لا ؟! .. وانا مافكـرتي فيني .. ماقلتي حرام توها صغيره اضيع مستقلبها بالمخدرات !!
إيـمان تصيح :مرام والله آآسفه ..اتووب وربي بس خليييه يطلعني
مرام تقـفي عنها :لو تتطربق الدنيا على بعضها .. مراح اقوله شي .. ولو بيدي خليت مصيرك زي خالك


يتبع ,,,,

👇👇👇
أحدث أقدم