بارت مقترح

رواية شرع ربي ولا اعتراض -21


رواية شرع ربي ولا اعتراض - غرام

رواية شرع ربي ولا اعتراض -21

بندر ماكان يبي يكذب ها الكذبة عليها بس كان مضطر يبين سبب تركه لها وبعدين حس ان ها الشي راح يفرحها وقال بتاكيد وهو شابك يدينه بيدينها/وانتي عندك شك ياقلبي!!!من زمان وانا ابي ها اللحظة بس الظروف ؟
جواهر حست ان دموعها بتنزل بس صوت محمد اخوها من ورى بندر وقفها..
محمد/كنك قلبت فلم هندي يابندر واللي يعافيك!!!
بندر بقهر وضيق/محمد شكلك ماتعرف الحساب!!!قلت بترككم خمس دقايق مو خمس ثواني!!!
محمد باصرار/واللي يعافيك يالنسيب قوم توكل خليتكم سبع دقايق مو خمس وهاذي علشان الجيرة اللي بينا!!!!
اتفقوا ان الاسبوع الجاي ليلة الجمعة تكون الحفلة بقاعة الاندلس وصاروا رايحين جايين بها اليوم مع نجود اللي قررت هي تاخذ ثوب جواهر من الرايض على راحتها بطول الاسبوع لانها ماتعرف تتسوق بنص يوم وبوقت ضيق....
ورجعت علاقة بندر وجواهر بحب اكبر ولهفة وشوق اكثر من قبل خصوصا ان جواهر حطت في بالها انه تركها علشان يتقدم لها رسمي وكبر بعينها اكثر واكثر.....

فهد بها اليويمن كان يحاول يشيل نجود من باله رغم انه ماكان يقدر بكل الاوقات بس كل مامرت في باله شغل حاله من هنا وهنا لين عدى عليه الخميس والجمعة السبت....
بيوم الاحد كانت مناوبتها ومنال وهاجر راحوا من زمان وظلت هي ووداد ونوير اللي مشوا وقالوا لها مابقت غير طالبة وحدة وسايقها جاي بالطريق...وهي كلمت بوعبدالله وقالت له لايرجع بتكلم سايقها يمرها....
وظلت تنتظر ها البنت يجيها سايقها وماجا....وظلت مقهورة ورايحة وجاية عليها بدون ماتتكلم لين نفذ صبرها راحت عندها وقالت بعصبية
نجود/مطولة؟
البنت/.................
نجود/كلمتيه انتي؟
البنت/.................
نجود بعصبية/اكلمك انا ماتسمعين؟؟؟
البنت ردت بعد تردد كبير/كلمته من جوال الحارس ومارد كان مقفل جهازه؟
نجود/ولساتك قاعدة كذا!!!طيب كان كلمتي البيت؟
البنت/دقيت ماحد يرد...بس امي اذا شافتني تاخرت بتطرش سايقنا اكيد..
نجود بشماتة/متى!!بكرة الصباح!!!
البنت/..............
نجود انتبهت على مريول البنت اللي كان طالع من تحت وقال لها/انتي من بنته!!!انتي مو من ثانوي صح؟؟من المتوسط؟
سارة بعد تردد/ها..اي انا من متوسط..
نجود بعصبية/وش مقعدك مع بنات الثانوي بالله وانتي من زمان طلعتي!!!!
ركزت بالصوت وكانها انتبهت له ..سامعته من قبل بموقف مو حلو....
نجود/انتي من بنته؟
سارة/بنت الفارس..
ماصار عندها أي شك ....هاذي سارة بنت فهد.....
عطتها جوالها وهي ماهي متمنية يجي طاري فهد لها ابدا/دبري حالك كلمي امك ولاابوك...
اخذت جوالها بعد ترد وخوف لان ماكان في غير نجود وهي والحارس بغرفته...
دقت بيتهم كان مشغول واجوال امها ماترد واتصلت اخيرا على جوال ابوها اللي من شاف الرقم شاله بسرعة وكانه ينتظر اتصالها بس ماتكلم لين تكلمت هي...
سارة/بابا..
فهد بصدمة/منو معي!!!وناظر بشاشة الجوال وهو متاكد ان الرقم رقم نجود اللي كلمته عليه من قبل؟
سارة/بابا انت راجع اللحين البيت انا عند المدرسة والسايق ماجاني ومي غايبة اليوم؟
فهد بخوف/معك احد... ولالا؟
سارة/أي في هنا ابلة؟
فهد/خلاص خلك معها وهذا انا جايك....
سارة عطت الجوال لنجود بدون كلمة شكر.......
نجود/ها بيجي؟
سارة/أي..
ق قلبها من ها الطاري ...بتشوفه حتى لو من بعيد اليوم عيونها بتشوفه...ماتدري ليش حست ودها تبكي من شوفتها له.....
ومسكت جوالها تدق على السايق يجيها ومارد....
بندر/وشلونك ياقلبي...
جواهر بنعس/مشتاقة لك ياقلبي..
بندر/ها تجهزتي لليلة الجمعة؟
جواهر/اسكت لاتذكرني ماسويت شي ابدا!!!
بندر/وش فيك صايرة كسلانة وسوداني وشغلتك بس تبين تنامين وماسويتي شي؟
جواهر بنعس/انت بعد ماتدور سوالفك الا اذا توني رادة من الدوام!!!
بندر/ههههه هذا شغل اللعانة ياقلبي!!!
جواهر/حبيبي....متى بتنزل ها الاسبوع؟
بندر بخبث/خايفة على شبكتك؟لاتخافين بتاخذ لك...
جواهر/اقلب وجهك عني قال خايفة على شبكتي!!!!
بندر/ههههههههه
نجلاء/اقول ام مشاري مروة ماجت مع مي؟
ام مشاري/مي اليوم غايبة بس مروة جت وصلت ونامت ليش تسالين!!!
نجلاء/سارة طافت حزتها ومابينت للحين؟؟
ام مشاري بخوف/يو...متاكدة ماجت ونامت وانتي ماانتبهتي؟
نجلاء/انا كنت بالصالة اكلم وماشفتها دخلت!!
ام مشاري/خل اروح اسال مروة اذا شافتها لو قالت لها شي؟
وصل فهد باللحظة اللي كانت نجود تكلم سايقها ونزل من سيارته وتقرب منهم..
نجود/شلون يعني؟؟؟وانت شلون سويت الحادث ياعيوني!!!ياسلام يعني من سواقين اثنين مافي احد وارد بلموزين؟؟؟؟طيب انت وينك اللحين؟عشت انا معك ......يالله بقوم ادبر حالي...
سكرت وانتبهت على فهد اللي كان واقف يناظرها وعلى سارة اللي قامت وراحت عند ابوها......
فهد/السلام عليكم..
نجود بلامبالاة/وعليكم السلام....
فهد/شكرا...
نجود بعصبية/عفوا بس ياليت مرة ثانية ماتقعد بعد ماينتهي دوامها لان احنا بعد ناس ورانا مشاغل!!!مو قاعدين لها؟
فهد/انا اسف بالنيابة.....وشكلك متورطة؟
نجود/اوووف..بو عبدالله راح وانا قلت له لايرجع لي وكل ماادق له مقفل والسايق حقي مسوي حادث وكاهو بالشرطة ...
فهد/لا انا مصر اوصلك مو كافي قاعدة مع سارة....
نجود/لاماله داعي باخذ لي تاكسي وبروح..
فهد باصرار/والله ماتطلبين التاكسي؟؟؟بعدين منال شبتقول لو قلت لها اني تركتك تروحين بتاكسي؟؟اصلا انا قريب من مكان سكنك عندي اجتماع هناك ..تفضلي....
ماشافت بد من انها تقوم معهم لان الوقت تاخر وهي تعبت من الانتظار وكانت فرصة انها تقعد بمكان يجمعها هي فهد......
في بيت الفارس...
ام مشاري بتانيب/انتي وينك من زمان واحنا ننتظرك؟
سارة دخلت بلامبالاة وقالت/موجودة...
نجلاء/منو جابك؟
سارة/البابا..
نجلاء/فهد!!!!ليش؟؟
سارة/لان السايق هذا غبي فكرني اقوله لاترجع لي وانا قايلة له تاخر شوي عندي كم واجب بنقله ومارجع لي وظليت انتظر ودقيت على البيت مشغول وانتي ماتردين ..
نجلاء/أي جوالي فوق مانزلته..
سارة/طيب قولي لنفسك بعد ليش تلوميني بعد!!
ام مشاري بحدة/تكلمي عدل يابنت!!هاذي امك وخايفة عليك؟\
سارة /وانا وش ذنبي اذا التلفون مشغول وجوالها ماترد عليه...
نجلاء/طيب ماعلينا كيف ابوك جابك..
سارة/دقيت عليه وقلت له يجيني وقال انه جاي بالطريق ..
نجلاء/طيب ووينه اللحين.
سارة:/كلمك اكثر من مرة ماتردين لاعلى البيت ولاعلى الجوال وقال لي اقولك انه بيتغذى مع عمي سالم ومابيرد....صحيح راح يوصل نجود اول...
نجلاء/أي نجود؟
سارة/هاذي البقرة اللي مدري على شنو شايفة حالها؟
ام مشاري/تادبي وانتي تتلفظين ياسارة عيب!!!
سارة/طول ماهي قاعدة معي وهي متنرفزة ومعصبة !!حشى لله ا1ا منتي بقد تاخذين مناوبة لاتقعدين!!
ام مشاري/أي بس نجود تناوب بالثانوي وانتي من المتوسط يعني بتتضايق من وجودك لاسيما انكم تطلعون قبلهم بساعة وشوي!!!وش كنتي تسوين فيها؟؟هذا كله واجب تنقلينه؟؟طيب من منو كنتي تنقلينهوينها اللي معك ؟؟
سارة سكتت ونجلاء ماعجبها يكلمون بنتها كذا..
نجلاء/يالله الجمد الله ان مافيك شي قومي صلي وبدلي ونزلي نتغذى مدام ابوك ماهو جاي...
سارة/منتي مكلمته!!!
نجلاء/مو تقولين بيروح يتغذى مع عمك سالم خلاص بعد شكلم فيه؟
في السيارة
نجود بعنف/مو هذا طريق سكني!!!
فهد/انا عازمك على الغذى..
نجود/وانا مو قابلة عزيمتك!!!وردني البيت بصلي وببدل وبحط راسي وبنام بنتك ماسوت فيني خير اليوم قعدتني بالشمس لين انفجر راسي!!!
فهد وقف سيارته عند سكتنها وقال بلهجة امر/جيبيلي اوراق السايق اللي عندك؟
نجود بذهول/ليش!!!
فهد بهدوء/مو تقولين انه مسوي حادث وموجود بالشرطة؟؟كيف بيطلع بالله!!بروح اكفله؟؟
نجود:/,,,,,,,,,,,,,,,,
فهد بلهجة امر/يالله بسرعة وصلي بسرعة وبدلي كلها نص ساعة وانا راجع اخذك نتغذى والسالفة مالها أي نقاش؟؟؟

نورة/يعني وين تبين نروح بالله!!!
هنوف/أي مجمع ياحظي ....
نورة بلامبالاة:/لسه باقي وقت بعد باقي اسبوع تونا اليوم السبت والحفلة يوم الخميس!!!
هنوف/لاحبيبتي انا ابي اخذ راحتي بالتسوق ولاانتي ناسية اني اخت العريس ولازم اكشخ..
نورة/مقر عليك يااخت العريس!!!
هنوف/اقول نوير بلا زفاتة وكثرة حكي وقولي لناصر يودينا الجمعة سنتر ؟
نورة/دقي عليه انتي مو انتي اللي تبين تروحين انا مو فارقة عندي باخذ لي شي بسيط جدا,,,,
هنوف تبيها من الله/ماعندي رقمه!!!
نورة/وش ها العذر بس!!!!كاهو رقمه بجوالي!!!!
كانت قاعدة بشقتها وهي مترددة ..مابين تطلع مع فهد ولالا؟
عطته اوراق السايق وراح يخلص لها الموضوع...
حست باحراج لو انها رفضت طلبه!!!اي احراج يانجود عادي مافيها شي هو اللي طلب منك الاوراق مو انتي قلتيله يروح!!!!
بس غريب ها الفهد كلامهم عنه شي وتصرفاته نص تنصفه والنص الثاني توقف ضده!!!
انتبهت على صوت الجوال وعلى رقمه اللي كانت حافظته بمجرد تشوفه....
ردت بثقل بعد ثالث دقة رغم انها كانت تقاوم نفسها وتبي تسمع صوته..
فهد/الو...
نجود/نعم...
فهد/انابو فيصل!!...
نجود باحتقار/يعني بكون ماعرفتك؟؟عارفة انك فهد وش بغيت؟
فهد بعصبية/قلت لك اسمي بوفيصل مو فهد!!!
نجود بعناد وتحدي ماتدري وش اللي طراهم على بالها :/بتظل عندي فهد وبظل اشوفك فهد وبس!!!!
فهد/ليش العناد!!!
نجود/وش صار؟
فهد/انتي عندك شك فيني!!!
نجود باحتقار/والله ماجربتك علشان اوثق فيك!!!
فهد/انزلي بسرعة كاهو سايقك تحت ينتظرك؟
نجود/ليش؟؟؟
فهد/لك خمس دقايق لو مانزلتي...
نجود بتحدي/وش بيصير؟؟
فهد/.................
نجود/..............
فهد/.............
نجود ماتدري ليش سكوته فجاة كذا خوفها وحست انه ممكن يعصب قالت بعد تنازل/انا نازلة.....

وصلوا لمطعم ميراج وكانت القعدة كلها احواض اسماك وتجنن قال لها تدخل هي قبل ويوم دخل ماظل قريب منها وها الشي ضايقها وماخلتها بقلبها اول ماقعدوا وقبل لاتمسك المنيو قالت بعصبية/انت ليش جاي معي يوم انك خايف احد يجي يشوفك معي!!!!
اكتفى بانه يناظرها وبس ويطلع باكيت سجايره بس كانت يد نجود اسرع وسحبته منه بالقوة وعيونها كلها شررر,,,,,
ولمست كفها كفه يوم سحبت منه الباكيت وظلوا يناظروا بعض ثواني طويلة لين قال فهد بعصبية/عن الجنان الزايد ورديه؟
نجود:/انت مو عازمني حضرة جنابك!!!ليش مستحي مني ؟
فهد/انا لي سمعة بين الناس شبيقولون لو شافوني داخل معك بالله!!!!
نجود بروحها كبريت ومالحقت سمعت ها الكلمة منه الا ومسكت شنطتها ووقفت بتطلع,,,,,,,
لبنى بفرح/خطوبة بندر بتكون ليلة الجمعة ماتدري شقد انا فرحانة له ياعبدالعزيز...
عبدالعزيز/الله يوفقه ويسهل عليه....
لبنى/ولاجا في بالي انه يفكر فيها ابدا!!!رغم ان احنا من سنين طويلة مع بعض؟
عبدالعزيز/مو شرط تكونين انتي انتبهتي للي بينهم يالبنى.....يمكن يكون الشي من زمان بس ماحسيتي وهم ماحسسوا احد من اللي حواليهم فيه؟
لبنى/يمكن بس الحمد الله احس امي بتطير من الوناسة...يمكن فرحتنا ببندر تنسينا شوي ضيق عبير؟
عبدالعزيز/للحين تعاني المسكينة؟
لبنى بتنهيدة/وبتظل تعاني ياقلبي...مشكلة عبير ماتتكلم لااحد عن مشاكلها مع علي!!!على بالها ان احنا مو عارفين وضعها معه كيف صاير؟
عبدالعزيز/طيب وابوك ليش مايتدخل؟
لبنى/ابوي!!!!!ابوي كانت الفكرة فكرته هو وعمي واللي عليهم انهم زوجوا علي وعبير وبس!!!
عبدالعزيز/شنو يعني مايهمهم سعادة علي وعبير؟
لبنى باسى/للاسف ابوي يتجاهل ها الشي ويعتبرها غباء من عبير نفسها انها مو قادرة تسعد علي علشان كذا امي ماتفتح معه السيرة كثير....
عبدالعزيز/ياسلاااام؟؟طيب وعمك؟
لبنى/عمي طيب ودايم يكون واقف مع عبير لو شافها زعلانة بس ابوي غير ساعات كثيرة اتمنى ابوي يكون عمي بوعلي بس ماحد يقدر يغير حياته واهله ياعمري...
قالتها وسكتت وساد الصمت بينهم وكانهم يفكرون بمصيرهم اللي متوقف على كلمة من بوبندر !!!!
مروة ومي بالحديقة مع سارة...
مروة/امي قالت انك اليوم رديتي متاخرة؟وانا ماشفتك طلعتي وين كنتي؟
سارة/يعني وين بكون ؟؟بالمدرسة....
مروة/أي بس وحدة من البنات شافتك مع ملاك وش كنتوا تسسون لنهاية الدوام!!
سارة بلا مبالاة/عادي نتمشى ونسولف...
مروة/بس كل الناس طلعت ماظل غيرك بالمدرسة انتي ماتخافين!!!
سارة/وليش اخاف بالله!!!!
وقامت عنهم وراحت لقسمهم..
مروة/يوم عن يوم تثبت لي قلة ادبها؟
رحاب من وراها/منهي؟
مروة بضيق/بنت عمك في غيرها؟
رحاب قعدت/علشان سالفتها اليوم؟\
مي/انتي بعد دريتي؟؟؟امي ماخلت احد ماقالت له؟؟؟
رحاب/عمي اكيد مشغول لو هو فاضي كان وراها بس خله يرد ماراح يفوتها لها ..
مروة/المشكلة ان نجلاء عادي ولااهتمت تقول شنو اهم شي انها مافيها شي ولاصاير لها شي؟
رحاب/هي كل يوم كذا يامي؟
مي بخوف/لا بس لاني اليوم غايبة واخذت راحتها ولا كل يوم تخاف افتن عند امي وتهاوشها وهي ماتحب امي لانها تصارخ عليها على قولتها..
مروة/حبها فار قولوا امين!!
رحاب بنرفزة/فار عاد!!!مالقيتي غيره؟
مروة/ههههه هذا اللي طلع معي ....متاثرة بحصة الامثال الشعبية اليوم.
رحاب/ماقلتي صحيح شسويتوا اليوم ..متحمسين نعرف بليتينا يوم الخميس انتي وامثالك القديمة؟
مروة بفرح/.وناسة ...مالها حدود!!تصدقون اول مرة اشوف ضحكة نجود السبيعي من قلب ...ضحكت على امثالنا ضحك مو طبيعي ..وكانت الحصة روعة وماتمنيناها تنتهي ..قسمت الفصل بطريقة حلوة وخلتنا نشيل الطاولات والكراسي ونقعد بالارض على شكل حلقات ..كان الجو حلو والحصة كلها مرح ووناسة ياليت لو كل يوم كذا بس دوام الحال من المحال عند ابلة نجود لانها بنهاية الدوام انقلبت بركان علشان مناوبتها!!
رحاب/هههههههه
بعد مامسكت شنطتها وهي بقمة عصبيتها وكانت فعلا واقفة وبتمشي وقف فهد ومسك يدها وقال لها بعصبية/انتي مجنونة رسمي!!!وين رايحة؟
نجود والنيران تطلع من عيونها/مو قاعدة معك دقيقة وحدة؟؟؟واعتبر عزيمتك مردودة!!!انا؟؟؟؟انا نجود السبيعي تقولي ها الحكي؟؟؟لكن الغلط مو عليك الغلط على اللي وافقت من الاساس تجي معك !!!
فهد/قصري صوتك ولاتصارخين كذا احنا بمكان عام عيب!!!
نجود وصوتها ارتفع زيادة كنوع من التحدي وهي فعلا غضبانة/عيب!!!!ويوم انه عيب ليش طلعت معي من الاساس!!!!!
فهد/قعدي خلنا نتفاهم؟
نجود/موقاعدة؟
زاد من مسكته ليدها بقوة وتالمت وهو يقول لها باصرار وبقوة/قلت لك اقعدي!!!!!
نجود/انا مو عيالك علشان اسمع كلامك!!!ولااني نجلاء اللي تقولك حاضر وعلى امرك ياسي السيد؟؟انا نجود ..نجود يافهد وخلني على بالك زين!!!!اللي يفكر يذلني يتعب كثير..كثير.....
فهد حس انها بتطول/خلاص حقك علي...قعدي؟
نجود بشماتة/ليش يابابا هي بالبساطة هاذي!!!انت ذليتني واهنتي وانا لايمكن اقعد معك ياحضرة المحامي المحترم!!!!
سادت لحظات صمت بينهم وهو بعده واقف قبالها وماتفصلهم غير الطاولة ويده ماسكة كتفها بقوة......
فهد بتردد/طيب وش تبين اللحين؟
نجود باصرار/ابي اطلع مو قاعدة معك دقيقة؟
فهد بخبث مايدري من وين طلع منه/بس عيونك تقول تبي تقعد؟
ماتدري ليش ارتبكت لحظتها وحست انها مو قد كلامها لهدرجة يبين عليها ومعيونها فاضحتها....
هي صدق زعلت من كلامها بس بنفس الوقت تبي تظل جنبه ليش ماتدري....
فهد حس بتاثيره عليها وان كلمته اخذت مجراها ظل يتاملها وهي واقفة قباله ومتمني لو تشيل نقابها.....
بعد ماهدات شوي وتراخت لمسته عليها ثارت شياطينها مرة ثانية وابتعدت عن الطاولة ..
فهد/وين؟
نجود/قلت لك مو قاعدة معك انت عندك سمعة وكرامة بين الناس!!!وانا بعد عندي فوق سمعتك وكرامتك مرتين ومايشرفني اقعد مع واحد مثلك!!!!
قالتها وطلعت بسرعة قبل لاتمسكها يده وتجبرها عيونه على القعدة....
ركبت سيارتها ورجعت شقتها ويوم دخلت حست بالضيق وانها ماكانت تبي تسوي ها الشي....وتمنت لو انها معه اللحين تاكل من نفس الاكل اللي ياكله وتسولف معه وتعرف وش يبي وليش عزمها!!بس لا كل شي له حدود وكرامتك يانجود فوق كل رجال الدنيا!!!!
العصر...
لمياء/حبيبي اليوم انا باخذ اجازة من مريومة وبتكون معك طيب ياقلبي؟
مشاري/حبيبي وقلبي مو مني لله !!!الا تبين ترمين البنت علي!!وين على الله؟
لمياء/هههههه زين انك فاهمني....طالعة مع منال ونجود السوق...نجود بتاخذ ثوب لحفلة جواهر وتعرفني انا ام ها السوالف ...
مشاري/ومتى بتروحون والله؟
لمياء/بعد نص ساعة؟
مشاري/ياحبيبي..وليش توني ادري؟
لمياء تقربت منه وباسته بخده/علشانك دريت بدري ولامتاخر مارح ترفض ومالك الا الموافقة ياعيوني!!!
مشاري تحسس مكان البوسة/أي مو لاني بزر عندك تقصين علي بكلامك!!!اه منكم يابنات الشرقية!!!!قومي بس مريومة نروح بيت جدك ونقلب المخدة وننام هناك؟
دلع/أي وش عرفت بعد؟
السكورتي/ليلة الجمعة بتكون حفلته...
دلع/ومادريت لي وين بتكون حفلته؟
السكورتي/بلى بصالة الاندلس بالدمام....
دلع/حلو حلو....طيب يابندر ظل على حقرانك لي والوعد ليلة الجمعة؟؟؟؟؟؟
كانوا بالسوق واللي قايمة بعملية التسوق لمياء بحكم انها عارفة جسم جواهر واللي يناسبها ونجود كانت شبه سرحانة طول الوقت بفهد..
منال اخذتها على جنب/نجود علامك؟فيك شي؟
نجود/ها لاولاشي...
منال/شلون ولاشي....شوفي شلون طول الوقت سرحانة وماكانك نجود اللي اعرفها ؟لهدرجة خطبة جواهر ماثرة عليك!!
نجود ابتسمت وهي تخفي اللي فيها/لامو كذا بس قاعدة افكر شنو اسوي لها وهيك شغلات....
منال دزتها بكتفها/دوريلك عريس ترى بتنشغل هي عنك وبتحسين بالوحدة ومالك الا تنخطبين انتي بعد!!!ههههههه
ها المرة نجود ضحكت بس كانت تضحك وهي ودها تبكي من القهر اللي لقته اليوم على يد فهد!!!!
لمياء/بس لقيته؟؟هذا بيطلع يجنن عليها.....تعالوا تعالوا...
سالم/انت مو صاحي!!!بجد ممنت صاحي...كيف تقولها ها الحكي يافهد كيف؟
فهد بشرود/مدري طلع معي وقلته؟
سالم/وارتحت اللحين؟
فهد/وللي يسلم لي عمرك ياسالم بروحي متضايق لاتزيدني انت بعد!!!!
سالم/تبيها وتبي تتكلم معها وتشوفها وتملي عينك منها تقوم تقولها انا اخاف الناس تشوفني معك علشان عندي كرامة!!!!لاتلومني بس انت صدق متخلف...؟
فهد تنهد بقوة......
سالم/طيب والحل؟
فهد/مدري.......
سالم/..................
فهد........................
سالم/..................
فهد بعد تردد قال/المشكلة اني حسيت بالفرق معها عن نجلاء؟نجلاء تسمع وتسكت واذا جت تناقشني ماتحاججني؟هاذي غير ياسالم اول ماجذبني لها شخصيتها القوية واللي مايهزها أي شي...وصار يتردد في بالها صوتها وهي تقوله بالمطعم(انا نجود..نجود يافهد واللي يفكر يذلني يتعب كثير كثير)أي والله يانجود شكلي بتعب بتعب كثير معك وعلشان ارضيك....
كان مشاري منسدح على الكنبة ومغطي وجهه بالمخدات واحمد مريم وفيصل يلعبون برجله وهم ميتين ضحك عليه..
مروة/اقول مشاري....
مشاري/.................
مي/لاتقولين رايح فيها ....
مروة/اخوي الغالي مشاري!!
مشاري/.................
جت وقعدت عند راسه وهي ماسكة الطاولة تطق عليها وقالت بقوة/وانا نايم دق التلفون..فزيت كنتي مجنون...قالت ياعمري صح النوم,,يامشاري متى بتقوم....قلت ياعيوني مفهوم...الو الو..بابا فين؟
رمى عليها المخدة وهو يضحك..
مروة/اشوف هاذي بس قومتك؟؟على بالك الحبيبة دقت ....
مشاري/ههههه انتوا هيه وخروا خلاص غربلتوني الله ياخذكم ماتنعطون وجه؟؟بعد بنتي واصبراه الباقي وش لهم عندي!!!
مضى الاسبوع كله بدون أي احداث تذكر بين فهد ونجود اللي كان دمه محروق يبي يكلمها ويعتذر بس ماهو عارف ومتردد وعارف انها بترده وعرف انها مشغولة بحفلة صديقتها فقرر انه ياجل الموضوع للاسبوع الجاي...
وجواهر وبندر كل يوم كانوا يتطمنون على اخبار بعض وبندر عاطي دلع اكبر طاف وهو مو داري عنها وانها عارفة انه خطب....
وقبال الحفلة بيوم يعني يوم الاربعاء بالليل..
علي كان طالع من البيت وبنفس الوقت كانت وحدة طالعة من بيتهم ومبين انها جاية لوحدة من خواته وكانت معاها طفلة صغيرة تمشي وراها ووقفت الطفلة قريبة من علي وشالت ورقة شجر كانت مرمية جنبه..
لمياء وهي ماانتبهت لوجود علي بعد/مريومة تعالي بسرعة لااذبحك يالله تاخرنا على بيت جدك!!!
ها الصوت وقف علي ووقف قلبه لانه عارفه زين,,,,,,,,,,او بالاحرى ذاكره زين,,,,كيف وهو كان يسمعه كل يوم من فترة طويلة مرت!!!!
لفت لمياء وشافت علي واقف وتجمدت مكانها......
كانوا اثنينهم مترددين وهي اللي قطعت الترد وقالت بصوت واطي/علي!!!!!
علي ماكان مصدق نفسه ولا اللي واقفة معهقال بسرعة/لمياء!!!!مستحيل؟؟؟وينك انتي قطعتيني فجاءة وماعدت عرفت عنك شي؟
ظلت تناظره وهي مكانها ماتغير...كل شي فيه مثل ماهو ..علي اللي حبته بايام الكلية وكانت تشوفه بعض الايام مع نجود وهي مو عارفة اذا كان اخوها لو ولد عمها......
علي اللي حبته قبل لاتتزوج مشاري ويوم خطبها مشاري واقتنعت فيه تركت علي بالمرة وغيرت ارقامها وراحت مع زوجها الرياض وابتدت حياة جديدة!!!!
بس وش ها الصدفة اللي مو محسوبة من عمرها ابدا!!!!علي وبعد ها الغيبة اللي بتقارب ثلاث سنين شافته!!!!!!!!!!!!!!!!!!!!
علي/لمياء.....حبيبتي..انا..قاطعته لمياء وهي تتلفت حوالينها وخايفة لايشوفها احد/علي لو سمحت لاتقولي ها الكلام !!انا متزوجة وعندي بنت!!!
علي بصدمة/تزوجتي!!!!!!!!!!
بعدها قال بخيبة امل/توقعت ها الشي.....ونزل لمستوى مريم وهو يتاملها ودموعها بعينه/مريم...اسمها مريم......
مريمببراة/أي اسمي مريم....حلو مو..عشانه مثل جدتي!!!!
علي بحزن قطع لها قلبها وهي حاسة دموعه بعينه/هاذي كانت المفروض تكون بنتي يالمياء؟؟؟
لمياء/لا..لا ياعلي لاتقول ها الحكي.....امشي يامريم امشي!!!
علي/لا ماراح تمشين؟؟ابي افهم منك كل شي واعرف ليش تركتيني؟؟؟؟

بيوم الحفلة كانت جواهر ملكة الحفلة بحق وحقيق وكانت لابسة ثوب ذهبي في عاجي من العهود الاندلسية القديمة(عاجبتني وقلت لازم اكتبها مالكم شغل فيني هههه)مسكر لفوق الرقبة وتجي حوالين الرقبة وبالبداية كانت فيه عقيقة كبيرة والاكمام فرنسية طويلة شيفون تنزمعند المعصم وتتكركش,,,ويتخصر من الصدر لين ينزل لتحت وعلى جنب فيه شيفوانات متداخلة باللون العاجي والذهبي ويكونون عكس بعض وشعرها كان مرفوع بشكل غجري وعلى جنب اكسسوار كبير وملفت باللون العاجي ومكياجها كان هادى....
وماننسى وصيفتهانجود واللي كانت الاميرة الثانية للحفل بعد مضاوي اللي ماكان احد يقارن بجمالها وكانها طفلة..

يتبع ,,,,

👇👇👇
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -