بارت جديد

رواية شرع ربي ولا اعتراض -25


رواية شرع ربي ولا اعتراض - غرام

رواية شرع ربي ولا اعتراض -25

فنان حساس ومبدع!!!على ماعرفت انت صممت كل جزء فيه واخترت كل ديكوراته والوانه صح ولالا!!!)
تنهد من قلب ..شلون فهمته بس بدون مايكلمها؟؟؟وش معنى كلامها يوم قالت له ان في ناس تفهمها حتى لو ماعشت معهم غير يومين وناس لو تعيش العمر كله معهم مابتعرفهم!!!وش اللي هي حاسة فيه وتبي توصله لي ياترى!!!!وش قاعد يدور براسك يانجود بس!!!
وينك ياسالم شاغل لي بالك بالزواج وتدور لي عن بنت تناسبك وتاركني بهمي وانت خابرني اذا ضاقت فيني الدنيا اتعب ومقدر اشكي لااي احد غيرك!!!

اليوم الثاني
قعدت نجود بعد محاولات عديدة لها البارحة بالنوم بدون فايدة ..كانت كل ماتنام شوي تلاقي صورة فهد معها....وين ماقلبت نفسها.....
قامت وهي شبه متكسرة بس كانت لازم تقاوم لبست ونزلت للسايق وراحت المدرسة وكان مكتبها ملايان حلويات اشكال والوان وبمجرد شوفتها له عرفت انه من ملاك......
ها البنت فيها شي ووراها حكاية امس كانت تتكلم معي وكانها طفلة بعمر عشر سنين!!!
كانت عفوية ودللاها حلو على القلب بس مدري ليش احس ان عندها شي تبي تخفيه وتهرب منه!!!!
يالله شلت فهد من بالي ياملاك وبحطك انتي اتسلى فيك واعرف وش عندك لين تنتهي السنة وارد لشرقيتنا اللي واجد هواها احلى من جو الرياض اللي يخنق!!!!

في القرعاوي مول..
كان مشاي مع لمياء اللي شوي شاردة وشوي معه
كان مشاي مع لمياء اللي شوي شاردة وشوي معه يتمشون مثل ماوعدها واخذ الاجازة وطلع يغير لها جوها وتلاقوا مع ام مصعب ووحدة من صديقاتها الجخ...
صديقتها/مشاري..مشاءالله صرت شبه ابوك..شلونك؟
مشاري/احم..الحمد الله..عمتي شلونك..
ام مصعب بنفخة وهي تناظر بلمياء/طيبة...ماتشتغل اليوم؟
مشاري/ماخذ اجازة وقلنا نغير روتينا شوي...
ام مصعب/مريم نايمة كان تركتوها مع الشغالة بدل ماتخربون نظام البنت!!
لمياء/انا مااحب اتركها مع احد..
ام مصعب/عدال يابنت العبد الله!!!الا قولي مو متعودة يكون وراك احد يسال عنك وعن عيالك ويدير باله عليهم!!!
صديقتها/هاذي زوجة مشاري؟
مشوا وهي تتكلم بصوت عالي وبطريقة مستفزة تبين انها مو معجبة بلمياء/أي هاذي زوجة مشاري ياعيني عليه ها المسكين!!والله لو انا امه مارضيت ياخذها وزوجته اللي تناسبه وتناسبنا وترفع راسنا!!اللحين الفشلة اذا احد ساله من خوال عيالك شيقول لهم بس!!
صديقتها/يتزوج عليها ويفك عمره كل شي ولا سمعتكم عاد!!!!!
لمياء بحدة/هاذي الطلعة اللي بتغير لي مزاجي ونفسيتي فيها!!!!شكرا وصلت هديتك على الاخر!!
مشاري بارتبك/لمياء انا مالي شغل...انا ..
مشت لمياء بدون ماتلتفت عليه وهو دف العربة اللي نايمة فيها مريم ومشى وراها...
كانت تمشي وهي تحس ان دموعها بتخنقها وبتعميها ..تعودت من زمان على اسلوب ام مصعب معها من تزوجوا للحين صار لهم فوق الثلاث سنوات وهي يوم تزعل ويوم ترضى بس نفسيتها اليوم اصلا قالبة ودمها محروق وتبي الزلة من مين ماكان علشان تروح الشرقية وجاها كلام ام مصعب بعز الطلب ..اللحين يامشاري مالك أي عذر بانك ماتوافق!!!
قالتها وبنفس الوقت وقفت مكانها وقامت تبكي فعلا كلام ام مصعب اليوم بكاها لانها كانت بوضع حساس!!!!!
مشاري مسك كتفها علشان يطلعون ويتفاهمون بالسايرة وانتبه على دموعها اللي بعينها وحس بالغصة...فعلا حس بان لمياء متضايقة من الجو اللي هنا ولازم تقعد عند اهلها شوي لانه اذا ماتركها تروح بيظلمها؟؟؟
في مطعم دارين بالدمام..
بندر/لي عندك طلب..
جواهر/طلب لو شرط!!حدد؟
بندر/هههه بصراحة شرط مو طلب...
جواهر/لا..مو قلنا مافي شروط!!!
بندر يتمسكن/ولاعلشان بندر حبيبي قلبك وعمرك!!
جواهر بنعومة/قول كسرت خاطري!!
بندر/يابعد عمري ها المزيونة اللي بسرعة ينكسر خاطرها..
جواهر/واللي انت مستغل ها النقطة فيها ودايم تكسر خاطرها!!
بندر/افا انا!!
جواهر/ماقلت لي متى بتنتهي من دورتك بجدة!!
بندر يحاور ويناور علشان يغير الموضوع/يعني ماتبيني اتشرط واطلب تقومين تغيرين الموضوع!!
جواهر بصدق/والله موقصدي!!!يالله قول انا اسمعك....
بندر/اللحين غرفة النوم وش حاطة في بالك يكون لونها!!!
جواهر بسرعة/بنفسجية..
بندر باعتراض/لا انا ابيها بنية!!
جواهر/لا مو بكيفك!!!اذا هذا طلبك فمرفوض!!!
بندر/خليني اقولك ليش بنية طيب وبعدها قرري..وصدقيني بتوافقين!!
جواهر/وانت على بالك علشان احبك كل شي بوافق عليه!!لايابابا كل السزلنج قبل لايبرد ترى مو حلو اذا برد !!
بندر باعتراض/عمري..
جواهر/كل يالله كل ولاعاد تعارض كلامي مرة ثانية بنفسجية يعني بنفسجية!!!
في الفصل..
كانت ريحة البخور مالية الفصل كله وتذكرت نجود انها امس قايلة لملاك انها ماتستغني لاعن البخور ولاعن دلة القهوة بيوم من ايامها وملاك مايحتاج تحت التنفيذ طبعا...
نجود/مذاكرين الدرس القديم كويس؟
ملاك بثقة وفرح/ومحضرين الدرس الجديد بعد!!!
نجود رفعت عيونها لها/مشاءالله!!من متى ملاك تحضر دروسها!!
ملاك/احم احم..من اليوم...
نجود/طيب قومي ياشاطرة اشرحي الدرس انتي!!!
ملاك/لامايصير...
نجود/قومي يالله تعالي هنا....
ملاك بتردد/لا مايصير اخذ مكانك؟
نجود راحت مكان ملاك وبعدت الطاولة وسندتها للجدار وقعدت عليها../يالله روحي اشرحي لنا الدرس!!!!
نور/بجد ملاك اللي بتشرح الدرس اليوم ابلة نجود!!
نجود باصرار/واعتبروه مشروح..
وقفت ملاك مكان نجود عند السبورة ونجود كانت قاعدة على طاولتها باخر الفصل وقالت لهم/على فكرة انا اليوم ماكنت محضرة شي وقلت بخليها حصة فراغ وتصحيح دفاتر بس ملاك حضرت الدرس مايصير مانستغلها وهي نادرا ماتحضر!!!
في شقة مشاري ولمياء..
مشاري/خل نطلع نتغذى؟
لمياء/عمتك سدت نفسي!!وتسالني بعد من شنو انا متضايقة يامشاري وكانك مو داري!!
مشاري بتنهيدة/انا اسف ياقلبي...بس والله مالي ذنب بكلامها؟
لمياء بزعل/انا عارفة انك مالك ذنب بس انا مضغوطة حييل وانت مو مقدرني؟؟؟
مشاري حط كتفه على كتفه وقربها منه/صدقيني حاس فيك والله حاس فيك!!!بس انتي قلتيلي بتتعودين وماراح يهمك شي؟؟
لمياء بعصبية/وماتعودت !!!وضارني ها الشي زين!!!مشاري والله تعبانة ومو قادرة افكر بشي اصلا!!!
مشاري بحنان/معليش ياقلبي معليش انا معك للنهاية وماراح اتركك صدقيني!!!يكفيك اني ابيك ...يكفيك ولالا؟
لمياء/خليني برتاح شوي!!
مشاري/مايصير تنامين بدون ماتاكلين شي!!يكفي امس ماكلتي شي؟
لمياء/الليلة بطلع مع رحاب نتعشى برى انا متفقة معها من يوم الثلاثاء ان احنا نطلع نتعشى....
مشاري/ماتبين شي..
لمياء /لا...
مشاري غطاها وباس جبينها وطلع لبنته وبس سكر الباب نزلوا دموعها حاريين على وجنتها لمخدتها...
ماتدري وش اللي صاير فيها ولا ليش انقلبت كذا فجاْة!!!
معقولة شوفة الحبيب الاولي تسوي فيها كذا!!!
عمرها ماتوقعت تشوفه ولاحطت في بالها ها الشي!!
اصلا هي يوم تقدم لها مشاري وافقت بسرعة لانها مقتنعة ان العلاقات اللي عن طريق التلفون ماتكمل بالزواج !!وللحين مقتنعة فيها!!بس شوفة علي ودموعه وحزنه قلبوا لها كل شي..
اربع سنين تقريبا ماشافته من جت مع مشاري الرياض ويوم شافته تغيرت احاسيسها مرة وحدة!!
بس كيف تعرف أي شي عنه....وشنو الشعرة اللي بتوصلها له,,,نجود!!ومافي غير نجود..هي شافته يوم راحت تسلمها ثوب جواهر اللي استلمته هي بعدها لان نجود نزلت بالطائرة وماكان خلص وجابت هي معها يوم جت بعدين...
شافت علي في بيت نجود.....
لازم تدق اليوم على نجود وتعزمها تطلع تتعشى معهم هي ورحاب وتحاول تتقصى أي خبر عن علي!!!
وقت الفسحة...
الجازي/ماتلاحظين ان نجود بدت تغير معاملتها لملاك!!
الجازي بغرور/طبيعي بترمي لها كم ريال بوجهها مثل ماتسوي مع البالقين!!
مروة/لا مو صحيح نجود مو كذا اصلا منال دايم تقول انها تتكلم عنها وماتهاب شي ولاتخاف من احد!!
الجازي/وملاك حضرتها مخففة دمها على الاخر ومسوية انها طيوبة وبريئة وهي ياما تحت السواهي دواهي!!
مروة/وش علينا منها....
***مزنة/ملاك وين بتروحين!!
ملاك كانت واقفة/بروح اتطمن نجود فطرت ولا بعد!!
مزنة/سارة تبي تتمشى معك شقولها!!
ملاك/قولي لها ملاك مشغولة,,ولا اقولك تمشي معها انتي مو فاضية لها وانا عندي القمر نجود,,
العصر في بيت السبيعي....
هنوف بتدخل بيت عمها وناصر كان طالع وهو لابس نظارة شمسية ونافخ الكشخة ومسوي روحه هيبة ولابس تي شيرت وجينز ...
هنوف/مشاءالله الله يحفظ لك شبابك!!
ناصر/..........
هنوف/ناصر ..وش فيك ليش ماترد علي!!
ناصر/........
هنوف/انا مزعلتك بشي؟؟؟قالتها بخوف؟
ناصر شال النظارة من على عينه وقال بطريقة جادة ماتناسبه/خير ان شاالله...
هنوف/........
ناصر/معك توم كروز السبيعي بغيتي شي!!!!
هنوف/ههههههه طيحت قلبي الله ياخذك؟
ناصر/اقولها توم كروز السبيعي تقول طيحت قلبي ّّ!!صدق ماعندك ادراك للامور؟
هنوف/عدال ياتوم كروز السبيعي لايطيحون عليك البنات من يشوفونك بالشارع!!
ناصر وقف وكانه انتبه/صدق ذكرتيني!!!اللحين شسوي اذا طلعت الشارع وماتوا علي البنات وانهبلوا!!!
هنوف بجدية/صدق مشكلة؟؟كيف بتواجهها اللحين ياتوم كروز؟
ناصر/والله مدري يابنت العم!!بس بحاول اصير طيرازن واطير لو حاولوا يلحقوني!!
هنوف/هههههه
ناصر/هههه سلام ياحلوة..
طلع وتركها تبتسم لطيفه وهي تذكر الله عليه وتتمنى يحفظه ويوفقه بكل خطوة يخطيها وقبل لاتدخل بيت عمها انتبهت لعبير طالعة...غريبة هاذي ثاني مرة اشوفها طالعة ها الاسبوع بها الوقت بالذات وبعد مايطلع علي!!!ياترى وين تروح وهي ماعندها صديقات ولااحد تزوره؟؟؟ولاتجي وفي يدها اكياس من السوق؟؟؟غريب امرك ياعبير بس انا لازم اعرف وش وراك!!!
اتصلت لمياء على نجود تعزمها واتفقوا هي تمرهم علشان بالمرة تسال عن ام مشاري اللي دايم توصل لها سلام مع منال..
وبعد صلاة العشاء كانت في بيت الفارس....
ام مشاري/وليش زاحمة ومكلفة على نفسك عاد يانجود!!
نجود/ولافيها كلافة ولاشي ياخالتي شي بسيط كنت ماخذته لك من الشرقية وقلت اجي واسلم عليك بالمرة...
ام مشاري/تسلمي ياقلبي..دخلي شربي معي فنجان قهوة وبعدها امشوا...
رحاب/شلونك نجود..
نجود/هلا وغلا...
مابعد ولدتي!!
رحاب/ههه انتظر الفرج....
نجود/ههه الله يسهل ان شاءالله....
منال/تاخرت؟
نجود/تطلعينها مني لاني الصبح اتاخر عليكم مو!!
منال/بيوحشنا تاخرك على فكرة!!
ام مشاري/ليش؟؟
منال/خلاص بعد يومين وبتصير تروح وتجي مع سايقها بتكون كملت الشهر مع بو عبدالله..احمد/ماما بروح معك..
رحاب/ماما وش قلت لك انا
نجود/خليه يجي ..تصدقين من زمان خبري بطلعات البزارين!!!
ام مشاري/مو قلتي علي اخوك متزوج!!
بها اللحظة كانت لمياء داخلة وعندها بنتها ووقفت يوم سمعت ...علي اخو نجود!!معقولة وانا ماكنت ادري!!
نجود/أي الله يهدي سره مع مرته ان شاءالله ..صار لهم فوق الثلاث سنين من تزوجوا للحين بس الله كريم ويغير لهم حالهم..
رحاب/الله كريم..
لمياء حاولت تكون طبيعية ودخلت وسلمت
نجود/ولو اني عتابنة بس معليش بعديها..
ام مشاري/لا صدق يانجود صار لها كم يوم ومشاري يقول انها تعبانة!!
لمياء/شفتي صدقتيني اللحين!!عمتي اليوم غذاكم سمك مشوي؟؟
ام مشاري/لاتقولين ريحة بيتنا فيها؟
منال/عاد اذا قالت تكذب!!!مافي البيت ريحة؟
لمياء/ههه عمتي تخاف من ها الشي واللي يبي يضايقها يقول لها ريحة بيتكم سمك مشوي؟
ام مشاري/لا فعلا السمك المشوي ماتروح ريحته بسرعة رغم انه ينشوي بالمطبخ الخارجي بس ريحته تعلق بالبيت
منال/أي بس يمه يناكل داخل يعني الريحة تدخل تدخل....
نجود/شوفي خالتي لابغيتي تطيرين ريحة السمك المشوي مالك الا تاخذين سكر وتحمصينه بمقلاة كانك بتسوين كراميل واذا قرب يتحمر ويصير لونه بني بتطلع ريحته ارفعيه عن النار ودوريه بالبيت كله وبعدها اعلقي البخور ماراح تشمين غير ريحة البخور بتثت لك مية بالمية...
ام مشاري/شورك وهداية الله نجربها بعد يومين اذا سوينا السمك....
نجود/عاد اعزميني خالتي على السمك والله نفسي فيه ههههه
ام مشاري/حياك ياقلبي البيت بيتك باي وقت والله لو تجين كل يوم وتتغذين مع منال ..
نجود/لا ياخالتي امزح معك....
رحاب/ولو البيت بيتك يانجود
نجود/تسلمين....
لمياء بتوتر/يالله طلعنا...خالتي تعالي معنا؟
ام مشاري/لايمه روحوا انتوا وانبسطوا..
نجود/تعالي انبسطي معنا ياخالتي!!
ام مشاري/لاي مه انا مقدر اطلع وابو عيالي بيجي اللحين بشوفه وش يبي وش ناقصه بعدين الطلعة لاحقة عليها!!
نجود غمزت بعينها لمنال/يابختك يابو مشاري ههه
البنات/هههههههههه
طلعوا وكانت لمى واقفة مع ابوها عند بركة السباحة ودق قلب نجود وفهد لف للجهة الثانية بعد ماشافها لانها كانت كاشفة وجهها..
نجود(لاياربي لا,,ماابي اضعف كل ماشفته قبالي!!!انا شلتك من بالي يافهد خلاص ماعاد ابيك!!!لاتحاول تهزني من جديد؟؟)
فهد(وش اللي طرى لك يافهد ؟؟وش اللي قلب افكارك كذا كل ماشفتها لو سمعت طاريها!!!خليها تروح من فكرك ولاتشغل افكارك فيها اكثر من كذا!!!خلاص يافهد خلاص نجود ماتناسبك خلها تعيش حياتها وتقبل انت حياتك حتى لو ماكنت راضي!!)
لمى/مرحبا..
لمياء/اهلين فيك...شلونك بوفيصل؟
فهد بقوة/هلا ...حياك...
مجرد صوته بس يغير لها شعورها ويبدل كيانها ويخليها تعيش بعالم ثاني......
قالت بصوت راجف/شلونك بو فيصل؟
وقف قلبه يوم نطقتها وكان وده يبتسم بوجهها بشماتة ..هاذي انتي نطقتيها وقلتي بوفيصل يانجود!!وين تحديك ذاك اليوم وينه!!
قال لها باقتضاب وبدون مايلف عليها/بخير..
لمى/بتطلعون؟
منال/أي..ليش وين امك واختك؟
لمى/طلعت امي مع سارة السوق واخذوا فيصل وسارة مارضت اروح معهم..
رحاب/ياعمري وقعدتي مع ابوك طيب ليش ماجيتي قعدتي معنا!!
لمى ببراْة/قعدت مع البابا لانه قاعد بروحه؟؟
منال/ههه اوه ه حنونة حنونة بنت عمي ..الله يهنيك فيها يابو فيصل!!
اكتفى بانه يلف جهتهم بس بدون مايرد..
لمياء/طيب روحي لبسي وتعالي معنا عازمينك احنا على العشى!!!
لمى بتردد وهي تناظر في ابوها/مايصير لازم ...
منال/عمي معليش تجي معنا!!!
فهد بصرامة/لا...
وراها بكرة مدرسة..
نجود بنفس القوة وكانها تتحداه وتبي رده/معليش يابو لمى محنا متاخرين بنتعشى بس وبنرد احنا بعد ورانا دوام من الصبح ومو ناوين نسهر!!خلها تجي !!
ناظرها وهو مرتبك حييل وعارف انها ماقالت الا علشان تتحداه بس مايدري ليش حس بالضعف لحظتها وقال لها/اذا تبين تروحين يابابا روحي بس انتبهي على نفسك وقعدي مع بنات عمك لاتتركينهم!!!
ناظرته بانتصار وكانها نست اللي هي ناوية عليه واللي مقررة تسويه...
طلعوا السيارة وهي مرتبكة من نظراته اللي مافهمتها ولاتدري وش كان يقصد فيها!!بس تنهدت يوم شافت بنته ..لمى نعومة حييل وهو متعلق فيها مثل ماقالت منال ....هادئة جدا وكانها التضاد لسارة اختها!!!!
في البارت الجاي في صفعة على خد ناعم لمنو بتكون وليش ومنو اللي بيدافع عنها!!!
***قوليها يابنت السبيعي قولي انها خاينة وماتستاهل اسمي!!!
***لاتعطي نفسك اكبر من حجمك يافهد لانك ماتعنيلي ولاشي!!!
****وش فيها عبير يانجود/....مدري شقولك ياجواهر!!!
*******انت تحبها يافهد لاتقعد تكذب على نفسك وتتوهم !!!ارحها وشوف ردة فعلها ؟؟؟//مستحيل ياسالم مستحيل؟؟
****مو كانك دايم تتهرب من الاجابة على سؤالي!!!
مشكورين يالغلا على مروركم العطر فديتكم انا لاخلا ولاعدم,,,

البارت الواحد والعشرين 

نظراتها كانت مركزة على لمى وبس...
حتى وهي تسولف مع رحاب ومنال كانت عيونها عليها ....
زين يافهد زين شغلت لي بالي وفكري وحرمتني من الرقاد!!!ومسوي روحك مو مهتم لي !!!!
قلت لك انا افهم الواحد من عيونه!!!وعارفة وش اللي بعيونك يافهد بس صبرك علي,,,انت بتجيني برجلك ,,,,,,

علي دخل الشقة ومالقى عبير..
غريبة وين راحت هاذي...بالعادة حتى اذا بتروح بيت اهلها تعطيني خبر!!!!
ولا ماخذة الطلعة وناسة لها من وراي وانا غايب عن البيت!!!!
طيب لاننتظر ونشوف نهايتها معك ياعبير...
خليني منك اللحين وخليني اشوف وش نهايتها مع لمياء....
وتنهد وهو يذكر شكل بنتها واللي حاط في باله انها المفروض تكون بنته!!!!!
بس لوتزوجنا يالمياء وماتركتيني كان حياتنا بتكون غير ,,كل شي بينا بيكون غير.....بس شقول الله يسامحك على هجرانك لي وصدك ونكرانك....
بعتيني ونسيتي الحب وتزوجتي وعشتي حياتك,,,ليش تظلمها ياعلي يمكن انها متعذبة معه ولا ماهي مرتاحة مثلك وعيشتها تشبه عيشتك بالهم والغم!!!اسمع منها اول وبعدين قرر وش بتسوي واذا كان لك حق تلومها ولالا؟؟؟؟
رحاب لكزت منال وهم يتعشون وهم يناظرون بلمياء اللي كانت سرحانة ومو معهم..
منال بهمس/مشاري طول الامس يتشكى ..
نجود بنفس الهمس/خير صاير لها شي؟
رحاب/والله مدري..مشاري يقول من يوم الاربعاء يوم يروحون الشرقية وهي مقلوبة فوق تحت!!!
نجود/طيب يمكن اهلها فيهم شي؟؟
منال/المشكلة انه يقول ان اهلها سالوه شفيها!!!يعني هم كانوا مستغربين من سرحانها وضيقها وتعبها!!!
نجود اكتفت بانها تناظرها وماتزيد تعليقاتها وتتلفت للمى اللي كانت تشرب شوربتها بهدوء شديد..
نجود وهي سرحانة بلمى/ماتشبه اختها بالتصرفات ابدا!!!
منال/اممم لمى هادئة حييل وحبوبة ..وسارة تسبب لنا رعب بتصرفاتها الطايشة!!!!
رحاب بمرح/جربتيها يانجود ماله داعي نشرح لك؟؟
نجود بقوة/أي ....
ناصروهيا يتمشون على البحر....
ناصر/احم احم..
هيا/عيش ولحم ووجع ان شاءالله!!!!!
ناصر/قولي قسم عجبتني تصدقين هههه عيش ولحم بس خربتيها بها الوجع!!!
هيا/يامظرفك والله؟؟؟
ناصر/تدرين اللي يسوي فيك جميل انتي ونجود غلطان!!!
هيا/لاتجيب طاري القمر بشين لو سمحت!!!لاتترحم على نفسك؟
ناصر/وانا الصادق ..وانا اقول مسكينة اختي خلني اقوم اطلعها تتمشى حاسها مخنوقة بس المشتكى لله منكم يالبنات!!!
هيا/لاتعليق!!!
ناصر/تصدقين انك ثقيلة دم!!!يعني انا بعد غبي لو جايب نورة تتمشى معي مو ابرك!!اقلها اختي من امي وابوي!!!!
هيا/وليش ماجبتها معك ان شاءالله!!!
ناصر/وراها مرسة ومو حق سهر..
هيا/وانت من متى تسهر ياعيوني!!!خبري فيك ياتاكل يابالدوام ياتوصل امك لو خالتك لو مرة عمك مكان !!هاذي حياتك انت!!
ناصر بخجل/أي بس لازم اعود نفسي على السهر..
هيا باحتقار/وليش ان شاءالله!!!
ناصر بخجل اكثر/تعرفين بخطب بعدين وكذا..
هيا/محق وجهك وجه خطوبة وسهر!!!
ناصر/شسوي اشوف بندر مايرد من بيت مرته الا الفجر غرت منه قلت لازم انا بعد اتعود من اللحين اسهر علشان مااخطب الا وانا جاهز ومستعد للسهر مثله!!!!
هيا/الحمد الله والشكر يعني السالفة تقليد بتقليد!!!!صير مثل علي يسهر بروحه ويطلع بروحه لايدري عنها ولاتدري عنه!!!
ناصر تنهد وسكت....
هيا/ناصر شفيك؟
ناصر /اخوك مضيق خلقي ياهيا!!
هيا بهدوء/مضيق خلقنا كلنا!!!!امي ليل نهار تدعي له الله يصلح حاله!!!تصدق يمكن صار له فوق الشهر مامر على ابوي وسلم عليه!!وعادي عنده؟؟
ناصر/كنا متهاوشين انا معه قبل اسبوعين على ها الشالفة وسالفة بنت عمه بس صدقيني ياهيا حرمت احط لساني بلسانه تصوري انه فهمني غلط!!!
هيا/ساعات احسه مو منا وفينا!!مو متربي بنفس البيت اللي ربينا فيه كلنا ولاعاش معنا حياتنا!!!مدري ليش هو غير عنا رغم ان ابونا واحد وامنا وحدة وكلنا تربينا سوى!!!!
ناصر تنهد وناظر بالبحر بدون مايعلق بشي.....

نجلاء/شقاعد تسوي قبال البركة الجو بارد؟؟
فهد بصرامة/خايفة علي من البرد؟؟؟
نجلاء/منت صغير علشان اخاف عليك!!!بس مجرد سؤال؟؟؟وش اللي مقعدك هنا وتارك الباب مفتوح بيختر ب نظام التدفئة داخل والباب مفتوح يافهد الله يهداك!!!
فهد بعصبية/يعني نظام التدفئة اهم عندك مني!!!!!
نجلاء/انت ليش كل كلمة تاخذها بعصبية وماتتحمل شي ابدا!!!
فهد/معليش بس ضغط العمل شوي منرفزني!!
نجلاء/لايافهد احنا مااتفقنا كذا!!!ضغط العمل بالعمل لاتخلط امور شغلك في بيتك؟؟؟حنا لنا حق عليك نبي نشوف وجهك باسم ورايق مو
عليك نبي نشوف وجهك باسم ورايق مو متضايق!!!!
فهد/نامت سارة؟
نجلاء/اكيد انا قايلة لها تبدل وتدخل تنام!!!
فهد/نجلاء....سارة...
نجلاء/وش فيها!!!
فهد/يري بالك عليها...كلميها,, قعدي معها,,
افهميها ...
نجلاء/ليش ان شاءالله شايفها مجنونة؟؟
فهد/سارة بسن خطير وتحتاج متابعة ايمة منك يانجلاء .....
نجلاء/انت وش عليك منها بس يافهد!!!طالما انك عارف انها بسن خطير وبسن مراهقة خلاص مالك شغل فيها هاذي بنت مو ولد؟؟؟
فهد/انتي ماتشوفين علاقتها بللي حوالينها شلون!!بنات عمها تشوفين شلون تكلمهم!!!!
نجلاء/بعد بنات اخوك منافقين مثل ماقالت اختك ام مصعب!!!
فهد/ياسلاااام اللحين بنات اخوي منافقين وانتي اربع وعشرين ساعة معهم!!!
نجلاء/مضطرة اروح مو معي بالبيت لازم اروح ....
فهد بحدة/طيب خلي بنات اخوي وغيرتك منهم!!انتي شايفة علاقتها بلمى شلون؟؟؟؟؟هاذي بعد اختها على مااعتقد؟؟؟؟
نجلاء/لانك عاطي لمى اهتمام اكثر منها فطبيعي جدا انها تغار منها!!
فهد بعصبية/قلت لك مليون مرة انا عيالي كلهم واحد عندي!!!!!بس تصرفاتك انتي وسارة معها تدفعني اعوضها اكثر..اخذي مثلا اليوم شلون تروحين مع سارة وفيصل وتتركون لمى بروحها ؟؟؟لان سارة قالت مانبيها!!
نجلاء/فعلا سارة قالت مانبيها وانا ماابيها يكرهون بعض اكثر علشان كذا مااخذتها معنا!!!!
فهد بشماتة/خوش منطق هذا اللي عليك!!!!
نجلاء/فكنا واللي يعافيك كاهي من زمان راحت عليها نومة ولاتدري بالدنيا اللي حوالينها!!!
فهد بحدة/لمى ماهي هنا يانجلاء طلعت مع منال ورحاب تتعشى معهم...اللي على قولتك منافقين!!!!

بعد التمشية والسهر والرقص والفل قعدوا يودعون بعض لان بندر بكرة رايح جدة...
اخذهم التعب وغفوا وهم حاضنين بعض بغرفة جواهر...
دق تلفون بندر وماحسوا عليه بالاول...
رجع دق مرة ثانية ونتبه بندر له وشاف الرقم وعطى بيزي ورجع لحضنها بالمرة الثالثة رفعت جواهر راسها بعد ماصحت من غفوتها..
جواهر بنعس/بندر من على تلفونك؟؟
بندر بقلق/ها..لاتشيلين هم واحد من الربع المغثة!!
جواهر/طيب رد عليه ازعجنا الله يهداه!!
بندر/شسوي فيه بس...مايدري اني خاطب وها اللحظات ثمينة عندي الا يخربها علي!!!!
رجع صاح التلفون من جديد..
جواهر/طيب قوله انا مشغول ولاقفل جوالك!!!
بندر ضمها اكثر ويبي يلهيها عن التلفون/الحقران يقطع المصران ياقلبي!!
جواهر بجدية/صحيح بندر متى بتنتهي دورتك على جدة!!
بندر/وش رايك نقوم نطلع نتمشى شوي على البحر بها الجو الحلو!!!!!
جواهر قعدت على فراشها وصارت قبال بندر وقالت له بقوة/ماتلاجظ انك تتهرب من الاجابة على ها السؤال كل ماجيت اسالك اياه؟؟؟
بندر بارتباك بس عرف يتجاوزه/وانتي ياقلبي ماتبين مفاجاْت ابدا!!ماابي اقولك ابيك دفعة وحدة تشوفيني قاعد بصدرك!!!
جواهر/بندر..
بندر/ياعيون بندر انتي...عمر ي مانبي شي من العالم الليلةليلتنا انا وانتي وبس!!!!ولاانتي ناسية اني بكرة رايح وتاركك!!!
جواهر تنهدت/هذا اللي مضيق خلقي اني بشوفك بعدين بالاسبوع مرتين بس!!!


يتبع ,,,,

👇👇👇
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -