رواية دنيتي مني إكتفت -11 البارت الاخير

رواية دنيتي مني إكتفت -11

نوف : طيب انت حاولتي معه

تنهدت : وربي ما ادري وش اسوي احمد مو احمد اللي اعررفه فررق كبير بينهم وصراحه ما الومه هذي امه وعمتي االلي ما شفت منها الا كل خير الله يرحمها بس ما ودي يظل احمد كذا

نوف : طيب علي قرييب منه مررره

رديت : حتى علي المسكين مرره تعب معاه نووفا داريه انه من ماتت عمتي الجوهره دمعه منه ما نزلت حتى كلام ما تكلم عن وفاتها يا خوووفي يكون ضاغط على نفسه طوول هالفتره ويجيه شي بعقله

نوف : لا ان شاء الله تفائلي خير وانت حاولي ولا تملين انت عارفه ان احمد يحبك وشاريك بس هالفتره مو بيده اللي يصير معه

دمعت عيوني : وربي عارفه بس انا ما يهون علي اشووفه كذا ولا اسوي له شي حتى انه مو راضي يتكلم مو راضي يسوي أي شي

نوف : هونيها وتهوون وزي ما قلت لك كلها فتررره

رديت وانا مبتسمه : بس عاارفه اليووم راح الدوام مرره فرحني لما قال لي انه بيداوم

نوف وهي مبسوطه من كلامي : طيب حلوووو هذا بحد ذاته تقدم اليوم بدا يشتغل بكرا بيرجع احمد المزووحي اللي يملا المكان بسوالفه

طالعتها وانا متشوووقه لهاليووم : الله يسمع منك


وعلى المغرب جهزنا اغلب الاشياء ما باقي الا الاطباق الرئيسيه اللي كلمتني خالتي وقالت انها هي بتجيبها معها ولما رجع احمد تغدا ونام على طول ونوف راحت على اذان المغرب عشان تلبس وبتجي مع عمي ونواف

ولما تأكدت ان كل شي صار اووكي رقيت فوق وشفت احمد للحين نايم قربت منه وكنت اتمنى اشووفه يقووم ويضحك لي زي اول قعدت شوي اطالعه بعدها رحت اخذ شور لي وطلعت ولبست فستان يوصل لتحت الركبه بشوي وكان لونه زيتي بتطريز خفيف وردي واستشورت شعري و حطيت مييك اب خفييف مره ولما خلصت نزلت اشوف الشغاله وش مسويه و بخرت البيت واخذت معاي بخور عشان ابخر احمد ولما رقيت حصلت احمد قام من النوم وكان لابس ثوبه واول ما التفت قعدت يطالعني شووي وانا استحيت منه وبنفس الوقت فرحت اني لفتت انتباهه يعني خف برووده شوي وتوقعت اسمع منه كلمه بس خيب املي

احمد وكان يطالعني : جا احد

ابتسمت له : لا يا الغالي ما احد جا للحين بس قبل شوي كلمني علي يقول انه بيجي قبل عمي فهد وخالتي

احمد : اهااا

قربت منه ومعي البخور : خلني ابخرك حبيبي

وبخرته ولما نزلنا سوا وطبعا كان ساكت جا علي وقعدنا بالصاله علي كان يضحك ويحاول يطلع احمد من مزاجه

علي : اييييييي يا احمد من قدك هالحلا كله عندك

انا طالعت علي وضحكت

احمد : احد ماسكك تزوج

علي يطالعه بطرف عين : اعصااابك شوي ويطق فيك عرق مب وجه نعمه يا اخي

احمد : احلف انت بس

علي : وقسم باللي خلقني انك صاير ماصخ بالله جودي كيف متحملته

انا هنا استحيت ما ادري وش ارد

علي : شفت حتى جوودي مستحيه تقول انك مللتها

طالعت علي : عليييييي

علي : ههههههههههه يا عيون علي

احمد كان يطالع وساكت

قلت له : خلاص علي خل احمد على راحته

علي : الله يعقل هالاحمد اللي شايل الدنيا على راسه


ونص ساعه الا الكل مجمتع كان الجو حلو وضحك ومرررره اشتقت لهالمه وتمنيت من كل خاطري انها تغير بأحمد شي واللي بسطني اكثر ام سعوود جت


هلا : ايييييييي يا شوووشوو في ناس مستحين ومصلبين

شوق : ههههههههههههه الله يكون بعوونهم بس ما قلتي لي مين

غلا : الناس اللي هناك

وكانو يقصدوون نوف اللي وجهها احمر من كلامهم

منار : هههههههههههههههههههههههه بعذرها والله اهل حبيب القلب عندنا لازم الحيا

غلا : هيييي انت يعني انت ما تستحين من عمي عادل

منار : لا

طالعت منوو : عيني بعييينك منووو

منار استحت ونوف ماتت ضحك : ههههههههههههههههههههه أي مسوين جريئين وهم من جنبها هههههههههههههه

شوق نطت هنا وهي معصبه : ايييييييي نووفا اخوك السخيف قوولي له يبعد عني لا استاثم فيه

نوف : نايف

شوق : وفي عله بحياتي غيره

غلا : ههههههههههههههههههه شووق وربي انك تحفه قسم بالله تضحكيني لما تقولين هكر جهاااااازك

هلا : هههههههههههههههههههههه

شوق وهي منقهررررره موت من نايف : لا تضحكوون ترا فيني شياطين الدنيا اي نوووفا قوووولي له تقولك شووق لو ما تعدلت يا وييلك مني

قلت لها : شوشو طيب انت وش مسويه له

شوق : وربي ما سويت شي بس هو هوايه عنده التنكيد 4 مرات يهكر جهازي ومن قلة حياه يتصل على جوالي يقوول لي والا يرسل لي مسج وربي اني ودي اقتله

نوف : هههههههههههههه يا اختي اخووي ما ادري وش به صاير مفترررس

هلا : هههههههههههههههه لا واللي يعافيك حديقة حيوانات حنا الا صاير اكشن عارف يلووووي شووق يالذراع اللي تعورها هع هع

شوق وترمي المخده على هلا : انطمي يا الدووبا

منار : اعصااابك شوشو

شوق : انا اليووم بعلمه الادب عشان مره ثانيه يعرف كيف يطاالع لفوق

كلنا طارت عيونا لشوق اللي كانت تتكلم بجد لانها اذا نوت شي بتسويه لو تعرف تخسر كل شي بحياتها

انا حاولت اعرف وس بتسوي : شوشو ترى ما تسوى تعصبين عشانه

شوق اخلاقها واصله H : لا تسوى ونص

هنا دخلت ريما علينا : سلااااااااااااااا....

وقعدت تطالع شوووق وتناظرنا بعيونها تسأل وش صاير

هلا : هلا هلا هلا برييييما زييييينة البنات ابد طال عمرك ما صار شي مجرد سوووء تفاهم مع السيد نايف بن عادل

ريما ضحكت وراحت باست شووق : يؤ يؤ الحلووه زعلانه ما تسوى ترى

هنا نظت غلا وقعدت تغني اغنيه من عهد نوح : هيلااا يا رمانه الحلوه زعلانه مييين يراضيييها انا ارااضيها عاااااااشو كوووولووووليييييييييش

وهلا بدت تطق وشوق ضحكت ع الوضع وكلمنا الجلسه طق ورقص ونست شوق السالفه

بعدين انا نقزت : اييييييييي حسبي الله على بلييسكم نسيت لا اروح اشيييك ع المطبخ ومن زين شغلنا تاركين عمتي وحريم عماني لحالهم الله من زين الدبره عندي

منار : ههههههههههههههههه يا شيخه تلقين امي والباقين دبروو الموضوع

طالعتها : اووووص بروح انا واذا بتجون حياكم والا اقول انطقوو هنا منعا للازعاج

ريما : لاااا انا بجي معك مالي دخل فيهم

طالعتها : يالله طيب تعالي




ومريت ع المجلس وقعدت مع حريم عماني وسلمت على ام سعود ولما اخذنا الاخبار رحنا المطبخ


ريما : جوجو وين السفره بتكون

رديت عليها : بالمقلط لان الحريم بنحط اكلهم برا بالحدييقه الجو حلو اما الرجال جوا

ريما : خلاص اجل واخذت ريما السفره وراحت وحده من الشغالات معها

ورن جوال ريما اخذته ووديته لها

ريما : يوو سعود شعنده داق الحين

انا ضحكت : ليييت نوفااا هنا عشان نشوووف الوان الطيف على وجهها

ريما : هههههههههههههه اسكتي سعود موب صاحي هاليومين

ضحكت وسألتها ليه

ريما : مشتب يبي يعرررس وامي قايله له انتظر ليييين كل شي يرجع طبيعي واحمد نفسيته تزين ونسووي الزواج قبله لا تفكر

انا تضايقت لان احمد يأست من حالته ترجع زي قبل : ريما لا لا تطيعين امك حاولي معها واقنعيها خلاص الله يرحم عمتي بس مو معقوله تتوقف الدنيا واحمد ماحد يدري متى بيرجع زي اول

ريما : يا شيخه يصبر شوراه خليه ينتظر

طالعتها : بروح اشوف المدخل والمغاسل بشيك عليهم قبل ما اكلم احمد

ولما رحت كانت المغاسل مرتبه وويوم جيت اطلع اتفاجئ بعلي طالع لي

علي : هههههههههههههههه تعالي انا علي

انا من الروعه صنمت : يا الدوووووب خوفتني

علي : هههههههههههه احسن بعد وش جايبك هنا

رديت علي : جايه اشووف المغاسل لان العشا حطيناه

علي : ههههههههههههه وجهك لوونه رايح

تنهدت وطالعته : كيف احمد يسوولف والا ساكت

علي : اسكتي قسم بالله يبغاله تأديب نسحب الكلام منه تسحيب

رديت عليه : لا تلومه يا علي

علي : وش الومه بس هو رجال وين احمد اللي ما كان يطيع ويخلي زملاءه الا وهو مخلينهم مؤمنين ان هذا قدر اللي يشوفه الحين يقول هذا يبي يموت نفسه

حبيت اغير الموضوع : علي يالله قلهم العشاء جاهز

علي : طيب يالله روحي


وحطينا العشاء للرجال

وانتهينا من عشا الحريم والكل راح بعدها الا علي اللي كالعاده قعد شوي معي انا واحمد

علي : احمد شرايك تخاويني بروح الامارات يومين بخلص شغل لبوي وبرجع

احمد : لا ما اظن عندي شغل

علي : شغلك اللي وقفه طول هالفتره بيوقفه يومين

احمد : يا اخي قلت لك لا مووب رايح

علي عصب وطالعني : جود انا طالع تامريني بشي

طالعته : لا سلامتك

ورحت اوصله لعند الباب وقلت له : علي لا تزعل منه

علي : انا ما زعلت منه بس هو اللي ينرفزني شوي حتى عماني اليوم مرره متضايقين من حاله

طالعته وهو يطلع لاني ما كان عندي شي ارد عليه


ولما رجعت حصلت احمد معه ملفات وقاعد يشتغل انا رقيت فوق واخذت لي شور وبدلت ملابسي وتكحلت وحطيت قلووس ونزلت واحمد على حاله كان قاعد ع الملفات رحت سويت له كوب شاهي و لما دخلت عليه رفع راسه

وعطيته الكوب

احمد طالعني وتنهد : مشكوره

ابتسمت له : العفوو ..

طالعت الملفات الكثيره وقلت : احمد شرايك اساعدك

رد بدون لا يرفع راسه : لا مشكوره مو محتاج ولو تبغين روحي نامي لاني مطول

حسيت انه مو راغب بوجودي قمت وانا دمعتي بتنزل


ومر الاسبوع و شهر وشهرين وحال احمد نفس ما هو بس الجديد ان تمت خطبة ريما وعلي وملكوو وتحدد زواجهم بعد شهر ومنار ونواف تزجو وهم مسافرين شهر العسل و نوف وسعود برضو ملكو وزواجهم بعد زواج علي وريما كل الامور كانت حلوه وتونس الا شي واحد كان مكدرني وهو ان خالتي بدت تسألني عن الحمل وهذا الشي اللي ما كنت حاسبه له حساب واحمد مره ما يتكلم وصار كأنه مو مع الدنيا


ويوم كان طالع للدوام وقال انه بيتأخر وانا ما ادري وش اسوي من الفراغ حتى الجامعه اعتذرت الترم ثاني وكنت اتأمل ان وجودي بالبيت بيغير احمد لكن للاسف ما في أي تغير واتصل علي وقال انه معه ريما وانهم بيمرون علي انا طرت من الوناسه رحت بدلت ملابسي ونزلت زينت القهوه وكنت مسويه حلا لاحمد بس ما جاء فحطيته لهم


ويوم فتحت لهم الباب : حيالله المعااااريس

علي و ريما : الله يحيييييييك ويبيقيك

طالعتهم وابتسمت : تو ما نور البيت

ريما : يا حركات يا جوود سنعه

علي : ههههههههه اي من زمان وجود سنعه تعلمي منها

ريما استحت وانا ضحكت : هههههههههههه علي من الحين خلوونا نتفق ممنوع شغل الاحراجات خلني استانس بجيتكم

علي يضحك : ههههههههههه تامرين امر طال عمرك

واول ما قهويتهم واكلو الحلا رحت اجيب الشاهي ويوم رجعت كانو يطالعون بعض ويطالعوني وحسيت ان براسهم شي يقولونه

: شفيكم تطالعووني كذا ترى شكيييت بروحي

ريما : ابد ما في شي

علي : الا في اصلا احنا جايينك نبي نكلمك بموضوع ولازم توافقين عليه

انا مستغربه : طيب بأيش تبغاني اوافق

ريما تطالع علي : امممممم جود انت مو عاجبك وضع احمد ولا عاجب الكل و لو تبغين تساعدينه سوي اللي يقوله لك علي

كنت اطالع علي انتظره يعلق

علي : شووفي جود اللي ابي اقولك عليه هو شي واحد انا ابي اخذك كم يوم بدون لا يدري احمد

انا هنا صنمت ومن كلام علي كيف يبغاني اترك احمد بدون لا اقوله

ريما : جوودي يمكن بالطريقه يرجع زي ما كان اول

طالعتهم : بس انا ما ابي اترك احمد

علي : يا الغاليه انا ما قلت اتركيييه بس مو معقوووله انه مطنشك للدرجه هذي لا تقولين انه مو مقصر معاك بشي ادري ماديا ايه غيره لا ما اشووف صراحه وعشان كذا اسمعي كلامي وتعالي كم يوم بحيث انه ما يدري انت وين

ريما : لا تخافين خالي فهد يدري بالموضوع يعني ما دام عمك داري انت اسمعي الكلام حتى انه ايد الفكره

كنت ساكته افكر بكلامهم مع اني حاسه انه ما بيتغير شي

علي : ها جوودي شرايك انت وافقي وبتشوفين اذا تغير او ان نشوف لك حل ثاني لان مو معقوله بتظلين على وضعك هذا لا انت اللي متزوجه ولا انت اللي مطلقه

انا هنا خفت لاني ما ابغى انفصل من احمد : بس انا ما ابغى اطلق مستعده اعيش طول عمري كذا بس اهم شي ما انفصل عن احمد

ريما : جود يا قلبي مو معقوله بتظلين عايشه مع شخص مو حاس بوجودك

علي : اسمعي كلامي يا جود ونشوف اخرتها

رديت بقلة حيله : طيب وش اسوي

علي : اسمعيني باخذك وبحجز لك بفندق ابغاك تقعدين اسبوع واحد هناك بشرط انك تقفلين جوالك لانا بنووهم احمد انا ما ندري انت وين وطبعا ابوي داري فلا تشيلين هم عماني لانا بنحاول نخفي الموضوع عن الكل وبنشوف اذا صحى من حالته هذي او لا

طالعته وحسيت الفكره مو داخله مخي : علي ترانا مو فلم عشان اختفي والبطل يدور علي فكر فيها علي

علي يضحك : هههههههه شدراك يمكن هالفلم يصحي اخوونا بالله اللي راااافع ضغطي بتطنييشه

ريما : جوودي وافقي تراها تجربه يا تصييب يا تخيب

رديت وانا مررره مو مقتنعه : طيب واذا خابت شلون بيصير لي وجه ارجع له مو شغل بزران المسأله

علي : عندي امل انها بتغيره بس انت اجزمي وبكرا باخذك اذا راح احمد الدوام بس انتبهي لا يحس فيك مع اني داري انه مطنش

رديت عليه : طيب علي خليني افكر شوي

علي : لا انا الحين اقول لا تراني مأجل سفرتي كله عشانك انت واحمد وببدا من السنه الجديده لا تخليني اندم اني ضيعت على نفسي وقت

كلام علي ما خلا لي مجال اني ارفض : خلاص شورك وهداية الله

ريما ضمتني بفرح : حبيييبتي جوودي ولا تخافين بقول لامي بمر عليك كل يوم ولو حدت بنام معاك

علي وهو يضحك : احم احم تراني ناوي انام هناك

هنا وجه ريما انقلب احمر وانا ضحكت : ههههههههههههههههههههه علي قلبت كيان البنت

علي : ههههههه شسوي قلت اعطيها خبر مو لما تشووفني هناك تنهبل

ريما : علييييي خلاص

علي يضحك : ههههههههه خلاص خلاص كم ريما عندي الا صح جووودي ما دريتي فيصل بيسافر يكمل ماجستير..التفت على ريما .. اخوك حاس انه متأثر بسالفة احمد و شكله موووب جايز لي ابدا

ريما وملامحها تغيرت وما ندري وش السبب : والله ما ادري بس هو من زمان خاطره يكمل برا

علي : يالله ربي يسهل عليه بس مافي رووحه قبل لا يحضر زواجنا الا صح ليش ما تزوجونه قبل ما يسافر

ريما : ورينا همتك واقنعه راسه يابس

انا قلت : طيب ليش ما تسألونه يمكن في بنت بباله

ريما بقووه تغيريت ملامحها : هو كان في بس هي تزووجت فعشان كذا حالته حاله

انا حزنت علييه مررره : يالله الله يعوووضه باللي احسن منها

علي : امين يا رب اقول على وعدنا بكرا بعد ما يطلع احمد للدوام بتصل عليك تجهزين نفسك بمر باخذك طيب

طالعته ورديت : ان شاء الله

علي : يالله ريما تأخرنا الله يعين على اخوووك هالعله

ريما ضحكت :ههههههههههه اسكت لا يسمعك

انا وجههي علامة استفهام طالعني علي ورد : يا اختي منرررفزني ناااشب لي

شكل هذي حوووبة احمد فيني


وطلعو علي وريما وحسيييتهم مره متفاهمين وفرحت لهم من قلبي الله يديم عليهم


و ع الساعه 9 جا احمد ولما قلت له اسوي لك عشا ما رضا وراح وقعد بالصاله ومعه ملفاته كالعاده

وطوول الوقت كنت اطالعه لاني بشتاااق له صح انه ما كان يتكلم بس وجوده يخليني بعالم ثاني كله احمد وبس


ومن بكرا بعد ما راح احمد اتصل علي مع اني كنت برفض بس ما عطاني مجال

جهزت شنطتي ونزلت وانا كنت اطالع كل شي بالبيت ويوم جيت اطلع شفت صوره لاحمد ببرواز اخذتها لاني حااسه اني بنحرم من شي غالي علي

ويوم طلعت اخذ مني الشنطه وشاف البرواز

علي : يا الله يا جوودي وشوووله اخذه صوورته وربي انه ما يستاهل

انا ما احب احد يتكلم على احمد : علييي ترى ما ارضى لا تقووول شي

علي : اسفييييين طال عمرك كذا حلو

طالعته وابتسمت : اي حلو

علي : طيب تفضلي اركبي

وركبت ولما وصلنا الفندق حصلت عمي فهد ينتظرنا هناك والتفت علي وقال

: هو اللي قال بيجي يطمن عليك

انا حسيت كل اللي يصييير ماله داعي بس علي راكب راسه

ويوم دخلنا الجناح وقعدنا

عمي فهد : ادري انك مو راضيه بالموضوع بس لا تخافين مو مخلينك لحالك ابد وبنظل معاك لان احمد يبغاله صدمه جديده عشان يرجع زي اول

علي : علمها يا بووووي ذبحتني مرررره

طالعتهم : طيب كم بقعد هنا

عمي فهد : لييين نشوووف الوضع كيف


وطووووول ما الوقت يمشي احس بتوتر اكثر من قبل واحس الوقت يمشي شوي شوي عمي فهد راح و علي كان قاعد عندي ويسووولف بس بالي ابد مو معاه جا المغرب احمد ما دق وهذا اللي حز بخاطري يعني معقوله ما اعني له شي وما حس اني مو موجوده في البيت

علي : يا بنت الحلال روووقي خلاص ادري مستغربه ليش ما اتصل بس يمكن اتوووقع انك عندنا في البيت

طالعته : بس انا عمري ما طلعت بدون لا اقوله مو معقوله ما حس اني مو موجوده

ودمعت عيوني وعلي قرب مني

علي : افااا وشووله الصياح الحين هذا وحنا اول يوم

تنهدت وسكت لاني حتى الكلام ما كنت مشتهيه اني اتكلم

وبعد العشاء رن جوال علي وكان المتصل احمد ورد علي عليه

علي : هلا والله

احمد : هلا بكـ شخبارك علي

علي : تمام وانت علوومك غرييبه مو العاده تتصل

احمد :ما الغريب الا الشيطان بس بغيت اسألك جود عندكم

علي ومسوووي مستغرب : جود

احمد : أي جود لانها مو في البيت من رجعت من الدوام ما شفتها

علي : احمد من جدك والا تستهبل

احمد : علي مو وقت استهبال على ما اظن جود عندكم والا لا

علي : لا يالشاطر مو فيه

احمد متووتر : يعني ويييين راحت وجوالها مقفل

علي مسوي انه خايف : يا الله يا احمد في احد ما يعرف زووجته راحت وين

احمد : علي لا تخوووفني زياده مو بالعاده جود تطلع بدون لا تقوول لي

علي : لا حول ولا قوة الا بالله اهم شي لا تكلم احد لين اجيك واشووف وش السالفه فاهم

احمد : اي بس بسرررعه لا تتأخر

علي : خلاص جايك الحين مع السلامه

سكر علي الجوال وهو يضحك

علي : هههههههههههههههههههههههه رجلك توووووووحفه وهو متووتر

انا اطالعه : ما يضحك يا علي

علي : لا والله يضحك هالجلييييييد بدا يذوووب بس خليه نترررركه كم يوم لييين يطيح اللي براسه ويرجع لعقله

لفيت وجهي لان كلامه موو عاجبني

علي : بكلم ريما تجيك الحين وانا برووح لحبيب الالب

طالعته برجا : علي هده مو تخليه يفقد اعصااابه

علي : ابشرررري يا ماما اوامر ثانيه

هزيت براسي بنفي

وثلث ساعه وريما جايه عندي

لما دخلت علي على طول طلع


ريما : جوود خووذي هالعصير رووقي ترى ما يصير كذا شووفي لونك شلوون باهت ما في حياة

طالعتها : ريما والله ما يهوون علي انا راضيه بوضعي بس لا تتعبون احمد

ريما : يؤ يؤ يا جوود ترى اللي نسويه يمكن يرجعه زي ما كان واحسن ويعني ما تبيييين تعرفين غلاتك عنده

رديت عليها : مو بهالاسلوب يا رييما

ريما : اسكتي انا امي ما وافقت الا يوم قلت لها السالفه حتى هي تراها ناويه تمر علي تاخذني وبتسلم عليك

طالعتها وانا متفشله : يووووو يا رييما فشيله من امك احس اني مالي داعي على هالتصرف

ريما : هيييييييي انت اعقلي عاد تصدقين اول شي امي عارضت بس بعدين قالت يمكن صدمه تفك صدمه يا جود

رديت عليها : الله يسمع منك


وع الساعه 10 جت ام سعود ودخلت

ام سعود : هلا والله ببنيتي شخبارك يا جود عساك بخير

رديت عليها وانا مبتسمه : بخييير دامك بخيييير يا خالتي

ام سعود : الله يديم عليك وعسى ما ازعجتك هالملسوونه

ريما طارت عيونها : يمااااااااه حرااااااام عليك انا ملسووووونه

انا حبيت اغااايظها : ملسوووونه وبقووه بعد

ام سعود : انا ما ادري وين يختفي هاللسان يوم انها تشووف علي

انا ضحكت وريما وجهها انقلب : هههههههههههههههه خالتي لازم شغل الحيا

ريما : شف من يتكلم بس

وشوي ويجي علي ويوم دخل سلم على ام سعود وقعدنا شوي وطلعو

واول ما دخل علي

علي : بقووووولك داري انك بتسأليني

طالعته : طيب يالله تكلم وقلي عسى ما صار فيه شي

علي : انا بقووولك بالتفصيل اول ما رحت له كان الرجال مختبص وحالته حاله

وسألني اذا كلمتك اليوم او لا وطبعا قلت له لا وانا مسووي مو عارف شي وكنت احسسه بالذنب كل شوي لدرجه اني حسيته بيصيح وكان طوول الوقت يحاول انه يتماسك وتدرين قال يمكن راحت لخالي اللي هو ابوك وانا قلت له لا ما اتوقع وقلت له بعذرها يوم طلعت من بيتك ما دام حضرتك مو مهتم ولا مقدر ولا محسسها انك عايش معها طول الوقت ساكت وما تتكلم وين تبيها تصبر عليك وانت على هالحال اللي متعب الكل وطول الوقت كان متوتر وقال نبلغ الشرطه وانا عارضت وقلت له تبي تفضحنا وظل على حاله صراحه احس ان هالحركه بتجيييب نتيجه يا جود لو تشوفين شكله ما تقولين هذا احمد اللي له كم شهر مطنش الدنيا كنت اشوف بعيوونه خووف الدنيا

انا دموعي كانت تنزل : علي حرام من جد حرام اللي نسويه

علي : أي حرام يا جود اقتنعي ان كل اللي يصييير من صالحك انت ولنا كلنا ومن صالحه هو نفسه جوودي جد لو تشوفينه تحسين ان قناع التطنيش والصمت اللي كان لابسه راح وانشااااال عنه

طالعته وانا ادعي من خاطري ان الموضوه ينتهي على خير : علي بدخل انام تبي شي

علي : لا سلامتك وانا بتفرج ع التلفزيوون شوي


ومر يومييييين وكان علي طوول الوقت ضاغط على احمد اللي كان يوووصل لي عنه انه منهار مررره

علي : جود انا وابوي اليوم بنجي هنا بالفندق وبنخلي احمد يجي هنا خلاص

رديت والتعب والتفكير والصياح خلا صوتي يروح : علي خلاص انهي الموضوع انا تعبت منه

علي بحنان : خلاص يالغاليه اللي كنا نبغاه حصل واليوم بتشوووفين احمد القديم رجع مررره ثانيه

تنهدت وقلت : الله يسمع منك


وجا المغرب ودخل احمد وعمي وعلي وقعدو بالصاله وانا كنت اطالعهم من الغرفه ولما شفت احمد حسيت اني لي عهد ما شفته كان خاطري ارتمي بحضنه واقوووله مشتااقه لك حييييييل بس احمد كان ناحف وباين عليه الارهاق والتعب

وكنت اسمع نقاشهم


احمد : خالي مو معقووله بنظل ساكتين كذا

علي : يعني وش براايك نسوي وصراحه انا لو تسوي جود اللي تسويه انا معها لانك من جد انسان لا تطاااااااق يا احمد طوول الفتره اللي راحت

احمد ونزلت دمووعه : وربي اني اتمنى المووووت بس ترجع جود عارف اني مقصر معها بس وربي اني احبها وانا ما ادري وش صار فيني طول الفتره اللي راحت خالي الله يخلييييييك لازم جود تررررجع لازم انا ما اقدر اتخيل حياتي بدونها علي خلنا نبلغ يمكن نحصلها او يمكن عند خالي حمد لييش انت مستبعد هالشي

عمي فهد : احمد انت رجال وشووله الدمووع الحين اذكر الله

احمد : لا اله الا الله

عمي فهد : احمد تذكر يوم وافقت لك على جود وش قلت لك

احمد بنظرات مو مفهوومه

عمي فهد : انا قلت لك حطها بعيوونك واحفظها ورااااعيها مو بعد وفاة امك الله يرحمها ينقلب كل شي انت رجال لازم تصبر وترجع حياتك زي ما كانت لان كل اللي قاعد تسويه تتعب نفسك وتتعبنا معاك وجود اولنا

احمد بندم فضيييع : سامحني يا عمي وربي اني مقصر عارف هالشي بس الحين وش نسوي

عمي فهد : لو ترجع لك جود ترجع احمد اللي قبل

احمد بتحسر : لو ااااااه يا خالي انت بس خلها ترررجع وبعدها بسووي اللي تامر فيه

عمي فهد كان يطالع علي

علي : توعدني يا احمد

احمد مستغرب : اوعدك ؟!

علي : انا وابوي بنطلع الحين واذا تبي جود شفها بالغرفه هناك وحالتها مثلك انا اللي قلت لابوي انا ناخذها عنك كم يوم ليت تصحى وترجع لعقلك

احمد وهو مو مستووعب شي : يعني جود هنا

علي مبتسم : أي هنا ويالله عش حياتك من جديد وارجع احمد الاول اللي الكل مشتاق له

عمي فهد : انا طالع الحين جود عندك وزي ما قلنا لك مو عايدين الكلام يا احمد

علي : احمد هيييييييي

احمد وكأنه تنبه لعلي اللي كان يكلمه : هلا

علي : احنا طالعيييين الحين

احمد : طيب بسرررررعه ممكن

علي طارت عيوونه : حشاااا طرررده اشووف

احمد وضحك : أي طرده يالله اخلص بسرررعه

علي : ههههههههههههههههههه يا حوووبي لك يا اخي وانت تضحك

وضم علي احمد وابتسم له وطلع


انا كنت سامعه وشايفه كل اللي صار و شوي الا احمد يطق الباب ويدخل انا كنت منزله راسي لاني ما كان لي وجه اطالعه احمد وقرب مني وقعد على ركبه ومسك يديني

احمد : سامحيني يا الغاليه

رفعت راسي وشفت النظره اللي لي شهوووور ما شفتها مسك يديني وخلاني اقووم وكان يطالعني بشووق وحب ومررره كنت حاسه اني بحلم

احمد : جود يا الغلا سامحيني عارف اني مقصر وكل شي بس سامحيني

طالعته بحب : مافي شي اسامحك عليه يا احمد

احمد : وكل اللي سويته لك ومو زعلانه

رديت عليه بحيا : ما اقدر ازعل علييك يا احمد لاني احـ ـ ـ ـ

احمد ابتسم : انت اييييش يا قلب ورووح وعيوون وكل شي بأحمد

انا ذبت من كلامه اللي مشتاااقه له حيل

احمد وضمني وهمس بإذني احبك يا جود واووعدك اني بعووضك عن الايام اللي فاتت

طالعته بحب : حبيبي يكفيني انك معي هذا الشي الوحيد الي ابغاه

احمد وباسني على خدي : حبيبتي والله ربي لا يحرمني منك


ومرت الليله وكانت احلا ليييله بعمري لان حبيبي كان معي كان معي برووحيه وكل شي فيه

وبالصباااح كان جوال احمد يرن فقمت انا وياه ورد احمد وهو يتأفف

احمد : يا نعم

علي : ههههههههههههههه يا اخي رد السلام طيب

احمد : ممكن اعررف وش مشكلتك الحييين في احد يتصل من صباااح ربي

علي ميت ضحك : يا اخي شدراااااني بعد انك نايم بالعسل احسبك بتجي الدوام

احمد : ها ها ها ما يضحك لا مووب جاي للدوام وارفع لي اجازه شهر لاني ناوي اسافر زين انك اتصلت

علي : يا حركاااااات يا حموووود كأنك ما صدقت خبر تشوووف القمر عشان تسحب ع الشغل

احمد يضحك : هههههههههههههه أي في احد عنده جود ويجي الدوام

انا استحيت من كلامه ورجعت انسدحت وتغطيت

علي : ههههههههههه وين هالكلام قبل كم شهر

احمد : ايي اسكت لا تذكرني يالله ورى ما تسكر الحين

علي : اسفين طال عمرك ونعتذر عن هذا الازعاج الفني

احمد : ههههههههههههههه طيب اقلب وجهك

علي : على أي صفحه

احمد : ها ها ها ما يضحك يالله علي بناااااام

علي : خلاص رحمتك يالله نام نووووم العوااافي


لما سكر احمد من علي سحب اللحاف

احمد بضحكه : داري انك ما نمت يالله قووومي خلاص يكفي

طالعته : احمااااد تونا بدري

احمد : أي معلييش قومي بدلي وخلينا نرووح نفطر بأي مكان

ابتسمت له : على امرك ي الغالي

احمد قرب مني وضمني : وربي انك احلا شي بحيااااااتي يا غلاهم ربي حفظك لي ويسخرني لك داااااااااائما وابدا

وطالعته : احمد انا امممممممم احبك

احمد وضحك : انا اموووووووووووووت فيك يا قلب احمد


ومــــــرت الايـــام وكانت احلا ايام حياتي وجا الخبر اللي اسعد قلبي وقلب احمد خبر حملي اللي الكل فرح لنا وبنفس الوقت جاني خبر اتعبني فتره بس وجود احمد جنبي خلاني اتعدا هالمرحله جاني خبر ان ابووي بالمستشفى وانه مصاب بالايدز وانصدمت لما عرفت بالشي وزياده على كذا رفضه اني ازوره تعبني مره لكن زي ما قلت لكم وجود احمد كان هو اللي خلاني ارجع اشوف الحياة من جديد

و خالد مسكوه بقضيه اخلاقيه زياده على الاختلاس وكان ملفه مليان قضايا

وعلي تزوج ريما وسافر يكمل دراسته و سعود تزوج نوف

وكان الكل مبسووط بحياته وانا بعد كنت احس اني شي ثاني لا صرت مع حبيب قلبي احمد

وحسيـــــت ان الدنيا عكس ما كنت اتصور انها ما تكتفي من احد لان لكل الم نهايه ولكل مشكله حل اذا صار عندنا اراده والفرحه نقدر نزرعها ونساهم كلنا بنمووها واحلا شي نزرعه هو الحب لان الحياة بتستمر فيه و بتظل حياتنا مشعه بكل الوان الحياة اللي تدفعنا للاستمرار والعطاء واهم شي الحب ..



,

,


تـ م ـت


سطور لقرائي


في البدايهـ اشكر الكل لتفاعلهم معي واعتذر عن تقصيري الدائم وعدم انتظامي الفتره الاخيره

وكانت

.. دنيتيـ وهيـ دنيتيـ منيـ اكتفتـ ..

تجربتي الاولى واتمنى اني اكون اتقنت هذي التجربهـ

وكل الحب والاخلاص لامي الغاليهـ اللي دفعتني للامام و حمستني للكتابهـ

ويعوود الشكر لكم قرائي الغاليــن

ولمنتدى .... الذي يحتضن مبدعين كبار وكلمة ابداع قد تكون اقل مما يستحقونه او يليق بهم


واخيــرا وليس اخرا عشت مع ردودكم لحظات حلوه حمستني دفعتني للامام وبفضل الله ثم فضلكم قدرت اكمل الروايهـ للاخر


تقبلوا روايتي البسيطهـ


ودعاوتكم لي ولجميع طلاب ثالث ثانوي



اختكم


بنت نـ ج ـد


تجميع ورد جوري


منتديات غرام

تعديل المقال