بداية الرواية

رواية جيتك امانة انقذيني -5

رواية جيتك امانة انقذيني - غرام

رواية جيتك امانة انقذيني -5

هنادي..اعلنت بصوت عالي:احــم احــم،سمو الأميرة هنادي وسمو الأميرة الرزان وصلوا
البنات التفتوا..وكلهم شهقوا مرة وحدة..
أصيل:ومخبية عنا كل هالجمال يالرزان!!
سديم:لا لا غطيتي عليّ،الصراحة اغار
الرزان..ابتسمت بس مو من قلبها:يـالله شلون تبالغون!،بسكم مجاملات
غادة:وربي مو مجاملات،اشبك انتي مافي ثقة ابداً،قمـر والله قمـر لو يشوفك واحد الحين يذوب عند رجولك
الرزان..بلعت ريقها بقوة(هذا اللي ابداً ماابيه ولا اتمناه):مابيه يذوب مشكورة
هنادي..ضحكت:تعالي بس تعالي،خلونا نفلها
أصيل..عطتهم قبعات مثل قبعة بابا نويل:البسوا هالقبعات،الآنسة سديم اشترتها خصوصي لحفلة اليوم
هنادي:هـا سديم الكريسمس اليوم وانا مادري!!
سديم..ضحكت:شفتهم واغروني اشتريهم،خطيرين مو؟
هنادي:بقــوة،من وين؟؟
سديم:بعدين اقولك،يـلا ارجعي شغليلنا Jingle Bells
رجعوا شغلوها وسووا دائرة وشدوا معاهم الرزان وهم يدورون ويصفقون ويرقصون ويستهبلون..
الرزان حاولت تدخل معاهم بالهالمزاج "الجنوني،المرح" لكن لقت صعوبة..
ظلت تصفق لهم وتشجعهم لكن يصرون يسحبونها وياهم بالرقص..راقبتهم يرقصون،
على ان اللي عندنا مايقصرون بالرقص خصوصاً ريمو..الا اني ماحبيت اتعلم ولا بغيت..جروني اكثر من مرة لكن ظليت ارفض والعب دور المشجع بس واكتفي بالتصفيق..اهز على الاغاني وانطرب أي بس ارقص مااحب.. بس احسه وناسة ومتعة.. وتفريغ للطاقة احياناً..لحظة انا تعلمت من ريمو اخس رقص..الرقص المصري..يعني انا انا ماتعلمت الا رقص مصري!!..مادري وشهالجنون والغباء اللي خلاني اتعلمه!!
،شافت هنادي ترقص على "مكانه وين" لـميريام فارس بدلع،
هنادي نعومة بقوة..ورقصها زيها ناعم وغنوج
،ابتسمت وهي تصفق لها..لأن الكل وقف واخلى لهنادي الساحة..وهي طلعت مواهبها بالهز والدلع..
هنادي..تتدلع قدام الرزان:تعلمي ياعمري تعلمي
كانت الأغاني تختلف من مصري..وخليجي..و الدسكو..غير الخبال..وفيها يختلف الرقص.. فشافت الرزان رقص ماشافته بحياتها!!،
اللي عندنا مايرقصون الا خليجي ولا مصري..هذول عندهم رقص استهبال..ورقص دسكو..والله هبــال!!
،جـات اغنية "يشهد عليـا" لـعمرو مصطفى >> تموت بأغانيه غادة..وتشاركها الرزان هالشي <<..
جرتها غادة عشان يرقصون هم الثنتين بس..وقعدت تعلمها كم خطوة..
وظلوا يرقصون مع بعض..وبعدين اهدوا لسديم اغنية "منتهى الرقة" لـرابح صقر وهي تكرهه فغصبوها ترقص عليها..
{في منتهى الرقة في منتهى الذوق..حبيبتي في كل حاجة عجيبه
إذا حكت تعرف تخليني اروق..واذا بغت اتجيب راسي تجيبه}
أصيل..تحمست:جيبي راسه يا سديم ما وصيج
سديم..بدلع وغرور:سديم بنت فهد الـ... تجيب راسه وراس عشر من امثاله
تحمسوا البنات (وووووو..ماقدر انا) وتصفـيق لها..وجات اغنية "يعشـقنـي" لـيوسف العماني واللي تموت فيها الرزان..
أصيل:تعالي تعالي بعلمك ترقصين عليها
وسحبتها وهي تعلمها بعدين تتركها تكمل الرقصة لحالها..وبعدين اتركتها ترقص لحالها..فانحرجت الرزان لما قاموا يصفقون لها بحماس..
هنادي:دلــع اكثر طيب
غادة:انتي احمدي ربك طلع هالرقص منها،بعد تبين دلع!!
هنادي..ضحكت:في منها امل صدقيني..راحت ومسكت خصر الرزان وهزته..كذا ياماما كذا
الرزان انتفض جسمها وغمضت عيونها بقوة..تكره احد يلمسها..
لكن حاولت تبتسم وتمثل ان مافي شي وكملت رقص حسب تعليمات هنادي..
وبعدين على اغنية "ينسـى" لـفايز السعيد الكل تحمس..وسديم نزلت تجيب عشاهم والكيكة اللي وصلت..
وجات اغنية"انت عارف ليـه" لـروبي >>يالغبــار!!<<..
طبعاً ماحد يضبط الرقص المصري الا غادة فهي اللي رقصت وجرت معاها الرزان يعنني بتعلمها لكن تفاجأت بالرزان تعرف ترقص مضبوط!!،
ادري ماتوقعوا يطلع مني هالرقص..انا الدفشة والاقرب الى الأولاد من البنات..اعرف ارقص مصري!!..غريب
،فضت غادة الساحة لها وجابت لها شيلة..هي رفضت يربطونها لكنهم اصروا..
و ابتسمت وهي تشوف اصيل تصفق جنبها وهي تهز فرفعت شعرها وميلت خصرها بدلع..
اصيل وغادة وهنادي مصدومين كيف كل هذا يطلع من الرزان وتقول ماتعرف ترقص بعد!!..
اللي كانت ماتحس بمتعة لما ترقص مصري..ماتهمها ان هالرقصة انثوية زيادة عن اللزوم..
كانت تحس بأنها نفسها بأنها سعيدة لما تطلع حرتها بالهز!!..دق الجرس وماحسوا فيه ودق مرة ثانية..
هنادي:هاذي اكيد سديم،هي ماخذت المفتاح؟!
غادة:لا مااخدتوا روحي افتحي لها
هنادي راحت تفتح الباب..وكانت سديم ومعاها أغراض الدنيا..عشان كذا هنادي افتحت الباب على آخره..
بعدين تفاجأت بفارس اللي جا ورا سديم شايل كرتون كبير وفوقه باقة ورد..
فارس كان مبتسم لهنادي واختفت ابتسامته لما انتبه للي وراها،
معقولة هاذي الرزان!!..لالا لا مستحيل الرزان اللي كلها رزانة وثقل..ترقص بهالطريقة!!..وبعدين على كل الثقل اللي فيها تعرف ترقص بهالطريقة!!..والله مو مصدق عيني..بس اول مرة انتبه انها بهالجمال وهالأنوثة
،سمع هنادي..


هنادي..تفاجأت ولما شافته فتح فمه استوعبت وردت الباب بسرعة:هاي انت ماتستحي على وجهك فاتح فمك بعد!!
سديم..ضحكت:ياشيخة انا بعد فتحت فمي،من متى هالتطورات!من متى الرزان الرزان ترقص مصري؟!!
هنادي:هاي انتي بعد،ياويلك تجيبين هالطاري قدامها..هددت فارس..وانت ياسواد ليلك لو لمحت قدامها انك شفتها والله لا تسوي بعمرها شي البنت لو درت انك شفتها
فارس..ابتسم:يمــا منج رعب،طبعاً ماراح اقولها،ليش انا غبي اروح اقولها والله وتعرفين ترقصين مصري يالرزان كنتي خطيرة الصراحة..وكمل وهو يضحك..ابدعتي
هنادي..اخذت منه الاغراض وضربته على كتفه:مالت عليك،صج قلة ادب
فارس..مازال يضحك:يــلا مع السلامة..وغمز..استانسوا بالحفلـة ماوصيكم
سديم..ضحكت:تـامر امر
ودخلوا هنادي وسديم الشقة..جهزوا البنات الأكل وبدوا ياكلون..الرزان انتبهت لباقة الورد الكبيرة اللي كانت عالطاولة..
الرزان:بنات من وين جات هالباقة؟!
سديم..ابتسمت وهي فيها الضحكة:هاذي من فارس شفته عند باب العمارة
الرزان..استغربت من هالأنسان:والله حركات،لج يعني بمناسبة الخطوبة!!
سديم:أي،عادي ترا رجعنا اصدقاء زي ماكنا قبل
الرزان..قربت منها وبصوت واطي:عالأقل طلع عنده ذوق بالنهاية
سديم..ضحكت وهي تتذكر وش قال قبل شوي:مسكين ليش ظالمته!!
الرزان..هزت كتوفها:ظالمته!!،مايهمني بشي لمجرد انه ذكــر
سديم:متى بترحمينا من عداءك اللي بدون سبب للذكور
الرزان:انتي ماتعرفين اسبابي بس صدقيني انها قوية ومقنعة
سديم:تراهم نصفنا الثاني زي مااحنا نصفهم الثاني،الذكور والأناث مايقدرون يعيشون بدون بعض بالنهاية
الرزان:بس انا اقدر اعيش بدونهم بكل سهولة
أصيل..انتبهت لهم:هاي انتوا بسكم مساسر،عن وشو تتكلمون
سديم:اسمعي الأخت الرزان وش تقول
أصيل:وش تقول!!
سديم:تقول انها تقدر تعيش بدون الرجال والذكور على قولتها بسهولة
الرزان:بكــل سهــولة
هنادي:عيني بعينك الرزان،تقدرين تعيشين بدون أخوانك!!
غادة..غمزت: تعالي هنا اقولك،تقدري تعيشي بدون خلــودي
سديم:بعد فيها خلودي!،وتقولين تقدرين تعيشين بدونهم!!
الرزان:هذا خالي،الصراحة لا ماقدر اعيش بدون طلال وخالد بس ولا البقية مستغنية عنهم لأن وجودهم زي عدمهم
سديم..حبت تتحرش:والمسكين فــارس!!
الرزان..استغربت ورفعت حاجب:ايش دخله؟؟!!!
سديم..طالعت بهنادي:ماهو صديق وعزيز عليك؟!ولا وجوده بعد زي عدمه
الرزان..ملت من تلميحات سديم:ماني فاهمة تلميحاتك،بس عادي عندي فعلاً وجوده زي عدمه،مايهمني بشي،مع احترامي لك ياهنادي
هنادي..وهي تخز بسديم:ولا يهمك،فعلاًهالأخ وجوده زي عدمه
أصيل:شف شف!! أنتي اخت جاحدة!!
هنادي:ياشيخة روحي مناك،اللي يقول حاطني على راسه من فوق،تبين الصراحة هو بعد الأناث عنده فيهم ولا بلاهم مايفرق عنده،يعني ممكن سديم كسرت هالقاعدة لشهور بس بعدين زي ماتشوف عينكم رجعت الحالة الأولى مايفرق عنده
الرزان:هذا احسن شي لازم مايفرق عنده،لأن كلا الجنسين يقدر يعيش بدون الثاني،يعني ماراح يموت بدونه!!
أصيل:اسكتوا بس غثيتونا،تراها حفلة خطوبة،البنت بتتزوج لاتخلونها تهون
سديم..ضحكت:لاتخلوني مااعزمكم،ترا اسويها
غادة:ازا كانت العزيمة بزل مانبغاها خلص،مو لازم نجي
سديم:لا ولو اصلاً بدونكم ماتصير شي
هنادي:زواج ولا الملكة بس!!
سديم:الزواج بالأجازة الطويلة مو الحين،الحين الملكة بس أمه تبغاها حفلة كبيرة وفخمة لأنه اول واحد يتزوج من عيالها واكبر واحد بعد
أصيل:تعالي ماقلتي لنا التفاصيل!!
سديم..ابتسمت:أي تفاصيل؟؟
أصيل:اسمه عمره،شفتيه من قبل ماشفتيه!!
سديم..ضحكت:متحمسة اصول!!
أصيل:فضول ياشيخة،اشبعي فضولي
سديم:من عيوني،الله يسلمك اسمه على اسم ابوي فهد عبدالرحمن الـ.....،عمره 29 سنة،رجل أعمال زي ماقلت يعني عنده شركة خاصة فيه
غادة:والله وطحتي لك طيحة محترمة يا سديم
سديم..ضحكت وغمزت:اعجبك،المهم انا شفته كثير لانه صديق اخوي الكبير سليمان
هنادي:يعني صديقه صديقه ولا عادي مع بعض؟!!
سديم:لا صديقه الروح بالروح من ايام الثانوي مع ان سليمان اكبر بسنة
أصيل:شافك من قبل؟؟
سديم:أكيد،كان يطلع معانا البر أحياناً والتقي فيه صدفة
أصيل:وسيم وسيم ولا عادي؟؟
سديم..قعدت تتذكر:آخر مرة شفته قبل ماأسافر بيومين كان جاي يتغدى في بيتنا،كان مازال هو هو لاني ماكنت شايفته شهور،طوله عادي بس بالنسبة لي اكيد طويل..ضحكوا لأنها قصيرة.. بس عيبه نحيف نحيف
هنادي:يعني انتي اللي متينة!!
سديم:انا مليانة شوي مو زي..التفتت على الرزان..هالعصقولة
الرزان:لاتحطيني مثال رجاءً،لان حالتي غير ترا كنت امتن منج بكثير
سديم..طالعت فيها:انتي!!اشك والله
أصيل:ماعلينا كملي،ماوصلتي لوسيم ولا لا!!
سديم:تقدرين تقولين وسيم،يعني المميز فيه خشمه شوي دقيق بس مو سلة سيف،والسكسوكة عليه شي ثاني تعطيه هيبة..حطت يدها على قلبه وهم يضحكون..ياويل قلبي على ذيك الهيبة، بس آخر مرة شفته كان مسوي سكسوكة ولحيته ستايل اماراتي يجنن
هنادي:الأخت قزت الرجال قز!!،اقول الأخت متأكدة ماكنتي معجبة مغرمة
سديم..ضحكت:معجبـة اكيــــد بس مغرمة لا
غادة:اصبري عليها اسبوع بعد الملكة وتصير هيمانة ومغرمة وعاشقة وكل حاجة
سديم:مو بيصير زوجي،حــلال عليّ اذوب عليه
أصيل:بي بي،اثقلي ياامي مو من الحين،بعدين لازم يشوفك ثقيلة..وغمزت لها..عشان تجيبين راسه بسهولة
الرزان..هزت راسها:صج فـراغة!!..خلصت اكلها وقامت..الحمدلله،يـلا تصبحون على خير
هنادي:وين وين!!،انثبري بس خلينا نقص الكيكة ونصور بعدين روحي اخمدي زي ماتبين
الرزان:من صجج!!،يعني مطولين؟
غادة..قامت:لا خلاص الحمدلله خلصنا عشا،الحين ثواني ونقص الكيكة وبعدين نصور
الرزان:مصدقين عمركم مع هالكيكة!!
أصيل:خلينا نحتفل بصديقتنا ترا مو كل يوم تنخطب وتتزوج
الرزان:افرحوا افرحوا ماني ماسكتكم
سديم..ضحكت:ايوا خليك عاقلة لاتصيرين هادم اللذات ومخرب الحفلات
الرزان:استغــفر اللــه
قصواالكيكة كل مرة وحدة مع سديم وأصيل تصور..ومرة وحدة كلهم مع بعض يقصونها مع سديم وضبطوا الكاميرا وصوروا..
بعدين صوروا مع بعض >> مرة وحدة مدام كاشخين<< وكل وحدة مع الثانية وحركات واستهبال بالصور >> على كيف كيفك<<..
وكانوا مصورين كل الحفلة من اول بكاميرا الفيديو كانوا حاطينها ومثبتينها وأحياناً تاخذها أصيل وتستهبل وهي تصورهم >> عاشقة التصوير أصيل <<..
وانتهت الحفلة اللي بدت رسمياً الساعة 9 مساءً الساعة 2 صباحاً.. تمددت وهي تلبس بجامتها..
تحس جسمها مكسر من الرقص خصوصاً انهم خلوها ترقص اكثر من مرة مصري..
بس اكثر شي استانست عليه رقصتها هي وهنادي على اغنية"مشتاق لك موت" لـ أحمد الهرمي رقصوا برواقة..ابتسمت لنفسها بالمرايا،
شاللي صاير رزون بديتي تتغيرين!!.. في منك امل على قولتهم!!..يمـــكن..مو يقولون مافي شي مستحيل..بس فعلاً احس نفسيتي تغيرت شوي..بديت اضحك احياناً!!..ابتساماتي كثرت!!..اليوم انجزت شي مهم وتعلمت اشارك واتأقلم مع البنات اكثر..ابتسمت بالصور واستهبلت مع غادة بالصور..تحملت ان احد يكون لاصق فيني ويضمني!!..تعلمت رقص الدلع على قولة هنادي..استانسي رزون انجــزتي شي مهم اليوم
،التفتت على هداياها اللي بزاوية الغرفة مقطوطين بأكياسهم،
انجزي اكثر وافتحي هدايا عيد ميلادج
،الكل جابوا لها هدايا..حتى خالها وعدها بهدية لما ترجع..ونورة وريمو..
راحت وشالت الأكياس وحطتهم عالسرير..وبدت في كيس كبير اسود وكشخة شكله،
هذا من هنادي الظاهر!!
،فتحته وطلعت منه وحدة من العلب..علبة فوشية دائرية كبيرة فتحتها وتفاجأت بـ بجامة شتوية كروهات فوشي وبرتقالي ومعاها روب شتوي لونه فوشي ومن داخل برتقالي..
طلعت علبة ثانية اصغر منها سوي تفاجأت اكثر لما فتحتها،
ander wear ياهنادي!!..لا وبعد المقاس مضبوط!! ..ودي اذبحك بهاللحظة..شلــون شلــون عرفتي المقاس!!
،انقهرت ورمتهم من يدها..كانوا ملابس داخلية برتقالية،
يقالك مطقمة مع البجامة
،وكانوا من النوع اللي تكرهه الرزان "انثوي زيادة عن اللزوم"..تجاهلتهم وفتحت آخر علبة صغيرة بالكيس..
كان فيها شبشب برتقالي >> كله تطقيم مع البجامة<< بس باين على الأشياء كلها ماركة وغالية..
بالأخير فتحت البطاقة اللي كان عليها صورة بنت so cute ولابسة بجامة،
إلى ست البنات..الحلوة..الأمورة الــرزان.. كل سنة وانتي احلى البنات ياقلبي هالبجامة عشان لما تنامين تذكريني..والروب عشان لما تتدفين بعد تذكريني..والـ ander wear to be ..... be ..... girl و عيشي حياتك..(اللــه ياخذ العدو ياهنادي وش هالكلام!!يعني هذا اللي تعلمتيه من الانجليزي)..اما الشبشب عشان حتى لما تمشين وانتي دفيانة تتذكريني..بكــل لحظة تذكرينــي لأني صديقتـك الحبوبة هنوده..بوســة لك منــي اموووواه..(استغفرك يارب البنت مستخفة من يوم يومها!!..بس نردها لك في الأفراح ياهنـوده!)
،ابتسمت فجأة ورجعت الأشياء بعلبها وحطت الكيس على جنب..ومسكت كيس صغير بس راقي..
ماتذكرت من مين.. فتحته وطلعت منه علبة فتحتها وتفاجأت بساعة جلد صفرا مستطيلة وميناها ذهب اصفر ومن داخل بيضا ويحيطه الماس باجيت بشكل غريب نازل وطالع حول مستطيل المينا..
قرت الماركة "BACKES & STRAUSS"،
ياويلي لاتكون من محل المجوهرات نفسه اللي مرينا عليه انا وسديم ذيك المرة!!..لا مو معقول..بس الا هذا اسم المحل واسم الماركة..بس مين اللي بيشتري هالساعة الغالية لي انا!!
،انتبهت لأسوارة بنفس علبة الساعة..اسوارة ذهب اصفر ناعمة وفيها باجيت الماس اصفر كبير والماس عادي صغير،
وااااو..صرت ابي اعرف من اللي جابها اكثر واكثر
،طلت بالكيس ما شافت الا علبة اصغر فتحتها كان فيها حلق ذهب اصفر الماس نعوم..دمعةصغيرة من فوق تقابل دمعة اكبرمن تحت..مسكت شهقة من حلاة الحلق ونعومته،
رغم اني اكره الأكسسوارات والمجوهرات بجميع انواعها..الا ان هالحلق حببني فيها..ياويلي على لمعته..صج صج الالماس يخطف الانفاس
،تأملته دقيقة وبعدين رجعت العلب بالكيس اللي كان بدون بطاقة ولا شي!!..
حاولت تعصر مخها وتتذكر من اللي عطاها هالكيس بس ماقدرت تتذكر احد عطاها هالكيس..
اللي عطوها هداياهم بايدها هم هنادي وغادة وطلال بس!!،
من مين ياربي!!..من أصيل!!..مستحيل.. ونفس الحالة سديم هي تتمنى اصلاً احد يعطيها بس خاتم الماس..يبقى عندنا فارس!!وخالد!!!.. بس خالد!!لا لاماظن..فارس!!بعد ما اتوقع..من مين ياربي!!!..ابسأل غادة بكرا اذا شافت احد يحط هالكيس عالطاولة!!
،رجعت تطل بالكيس وشافت بطاقة صغيرة مندعسة بالزاوية..بسرعة سحبتها وكلها حماس وفضول قرتها
[جيــتك أمانــة انقــذينــي من الخـوف
خايف بدونك والشتا محتويني
شوفي شفاتي فوقها ترجف حروف
حروف منها {من الشتا احتويني}
ضمي ضلـوعي الولــه يحرق الجــوف
واضح على نظرات عيني حنيني
من السهر..والخوف..والبرد..ماشوف
على ذراعك لاغفيت اتركيني
قولي طفل جاني من البعد ملهوف
من الشتات المر فيك اجمعيني
واضح على وجهي من البرد مخطوف
شوفي بدونك كل شي يبيني
مدام يتك والمجي كله اظروف
خايف بنفس الشارع اترجعيني
جيتك امانة انقذينــي من الخــوف
لاتتركيني والشتــا محتوينــي]
استغربت وانصدمت من هالأبيات،
ومكتوبة بخط اليد بعد!!..واضح ان اللي كاتبها واحد!!..مين ياربي مين!!!..وش انقذيني!!واحتويني!!.. تعرفني!!.. تحبني!!..وشالقصد!!..ميــن تكون؟؟؟..احس اني باستخف فجأة!! ..بس مصيري اعرف
،رجعت البطاقة في الكيس وحطت الكيس على جنب مع اللي قبله..مسكت علبة حجمها وسط ماتدري من مين بعد..
عجبتها العلبة نفسها جلاد نحاسي وفوقه نقش بالمخمل الأسود ومربوطة بشريطة سودا كبيرة >> فخامــة<<..
فكت الشريطة و فتحت العلبة..كان فيها شنطة تقريباً كبيرة >>بحجم شنطها المعتاد للجامعة<< من "BURBERRY" ومن آخر مجموعة لهم..
شافت بالعلبة شال من نفس الماركة وتفاجأت بشوز "فلات" نفس الشنطة..بابتسامة كبيرة،
انا دايماً باحتفل بعيد ميلادي عشان تجيني هالهدايا السنعة..صح خالتي ايمان وخالي مبارك وخالد وخواتي واخواني مايقصرون..وما انكر هدايا خالد الغالية من الشنط والعطور والساعات..بس ماعمرها وصلت الى ساعة الماس..رزون احمدي ربج ولاتصيرين جاحدة لاتنسين شنطة L.V اللي منه..ولا ساعة BURBERRY..يـلا عاد انثبري..بس ونـــاسة..ياويلي من صجي صرت استانس فجأة عالهدايا اللي ماكنت احسها بقيمتها قبل!!!..شاللي صاير بالدنيا!!
،رجعت الأغراض وحطت العلبة على جنب بعد مااخذت البطاقة المحطوطة تحت الشريطة،
إلى أخت صديقي العزيز..وأختي التي لم تلدها أمي قط..كل عام وأنتي بصحة وسعادة..عام جديد تنفتح لك فيه دروب جديدة "بأذن الله"..اتمنى لك عمراً مديداً وحكماً سديداً "على قولتهم هههههههه" ..اخــوك/خـالد..ملاحظة:والله ماجيت عشان عندي دوام..والله..اعذريني عاد وانا اخوك
،سكرت البطاقة وهي تبتسم وتضحك،
اهبل هالخالد والله!!..بس ذوق بعد..انا استبعدت من الأول يكون صاحب ذاك الكيس..الحين يبقى فارس!!بس احتمال ضئيل يكون هو
،رجعت البطاقة مع العلبة .. ومسكت كيس مربع داخله علبة مربعة فتحت العلبة...وتفاجأت بعد بكاميرا وباقي اغراضها مرتبة بطريقة حلوة..بس مافي بطاقة مع الكيس ولا العلبة!!،
اظنها من أصيل..يمكن لهوسها بالتصوير تهدي الناس كاميرات!!..عالعموم خطيرة هالهدية ومفيدة بشكل فظيع..عشان أصور فيها قبل لا اسافر
،قعدت تحوس وتشغل الكاميرا..وقررت تصور الهدايا بعد ماتفتحهم..وصورت الغرفة بعفستها..
حطت العلبة والكيس على جنب..واخذت كيس غادة..كان صغير وفيه علبة صغيرة فتحتها وشهقت..
كان فيها سلسلة وتعليقة فضة ومرصعة الماس واحجار كريمة باسمها بالعربي طبعاً>> مثل اللي يسونها بالفضة..
بس هاذي مرصعة الماس واحجار كريمة..وراقية<< وجاية على شكل دائرة ..
تذكرت كلام غادة يوم تقول "ترا جاية طلبية ومخصوص هالهدية..وغالية لأنو الغالين مايليق بمقامهم الاالغالي"،
تسلميلي يا احلى دودي..الله لايحرمني منك يالغالية
،ابتسمت ..حطت العلبة وكيسها على جنب..مابقى الا هدية طلال وكيس..هدية طلال كانت بعلبة..
عجبتها العلبة لأنها نفس علبة هدية خالد بس هاذي اصغر..الظاهر شارين العلب مع بعض!!..
فتحتها وكلها فضول وش بتكون هالمرة..ابتسمت وشالت الكورة الزجاجية >>عرفتوا الزينة..
مادري وش يسمونها..لها قاعدة من تحت وفوق نص كورة زجاجية وبداخلها يكون تمثال ولا شي وحولها ياثلج يا لماع!!..عرفتوا!!<<..
كانت هاذي هداياه من اول ثانوي وهو يعطيها نفس هالكور..بس كل مرة لها معنى مختلف وشكل مختلف..كان في ورقة لاصقها على الكورة،
شغلي اللمبات من تحت!!
،قلبتها وحركت الزر اللي تحت..وشافت كلمة Happy Birthday وعلى حرف وحرف لمبة كأنها شمعة..
ولما هزت الكورة صار يتناثر حول الكلمة لماع ملون،
وااااو يجنن..بس ياترى شالمغزى ياطلال!!
،شالت البطاقة اللي مع العلبة وقرتها،
ليكون عيد ميلادك لهذه السنة مختلف..لتبدأي بحياتك من جديد مع دخولك ااـ19..كــل عام وتألقك وجمالك وسعادتك تزداد "بأذن الله" بدأً من هذا اليوم..تذكري ان هذا 13/12/2008 كان مختلفاً بكل ماللكلمة من معنى هذه السنة..إذ لم يكن يوم المصائب!!..أترين ان هناك أمل بالحياة..حتى النائم بغيبوبة منذ سنين قد يفيق يوماً..وانــتِ لك يوم وترين الحياة فيه بمنظار مختلف "منظار ملون"..إليك يانجمةً اخفيها بعيداً عن اعين الناس "لكني اتوق بكل حماس أن أريها لهم" من أخيـك العــزيز
،وبتوقيع من طلال..اثر فيها كلامه..حطت كل شي على جنب واستلمت آخر كيس..
طلعت منه شي >>اغلب الظن انه لوحة<< ملفوف بورق..شالت الورق ..تفاجأت وانصدمت بلوحة لنفسها!!..
راسمين وجهها وشعرها زي ماهو بالرصاص وعلى وجهها ابتسامة لكن تطيح من عينها دمعة!!،
لا هاذي اغرب من سابقاتها!! ..شالقصة..وشالمقصد من ورا هالرسمة!!..ليش ابتسامة ودمعة!!..هالناس تبيني استخف بالغصب!!
،انتبهت للي مكتوب تحت {تتظاهــر..انك سعيد..وانت بعيونك حزن!!..تمثل الابتسامة..وتطيح من عينك الدمعة!! ..انت..مرتــاح؟!..ولا..تصنع الراحــة؟!}..استغربت..وانفجعت!!كانت مشوشة ومرتبكة..
{ لاتتظاهــر..انك مثل معظمهم..تراك غصب..طيب..غير عنهم..تدري معاك..اعرف صج ان..المظاهـرخداعــة!!}..
حست نفسها كتاب مفتوح لهالشخص!!،
كيف يدري عني هالأشياء!!.. مو معقولة تكون من سديم!!أبداً مو معقولة!!
،طلت بالكيس..شافت فيه اشياء مغلفة بالورق بعد اثنين بس..شالتهم كانو خفيفين وكأنهم ملابس!!..
شالت الورق عن وحدة..استغربت اكثر لما شافت مايظهر انها بلوزة..فوقها محطوطه بطاقة،
عليـك بالعافية البسي هالفستان واكشخي فيه.. بس اتمنى اكون موجود لما تكشخين فيه..لانك بتكونين فيه غير عن باقي البنات..وانتي طول عمرك مو مثل باقي البنات
،بدون توقيع بدون شي!!..شكت بشي وقامت بسرعة جابت البطاقة اللي مع الساعة الألماس..وتأكدت،
مين تكون!!..الله ياخذ عدوك هبلت فيني!!.. يعني هديتين منك شالمناسبة!!..شهالهدف من كلامك الغريب..والله ناوين عليّ انتوا!!
،نفضت الفستان وشالته وطاح منه حزام..كان فستان صوف ناعم وخفيف بني "بس درجة غريبة من البني" قصير الى الركبة بالضبط واسع واكمامه طويلة وطرفها واسع ..
مع الفستان حزام جلد اصلي ويلمع عريض اصفر وجاي مع الساعة تماماً!!..فتحت اللفة الثانية وقرت،
هذا اكيد ماقدر اشوفها عليك.. بس اكيد اكيد بتطلع عليك تجنن..لحظة..لاتقهميني غلط..واي صح..الشبشب تحت عشان تدفين عدل
،انقهرت..وهي تشوف قميص شتوي ثقيل بأكمام طويلة وقصيرإلى الركبة لونه اصفر وعليه رسمة كبيرة لأرنب كيوت بالوسط..
كان حلو وهذا اللي قهرها اكثر!!..شافت المقاس xs وانقهرت بعد يعرف مقاسها!!..
شالت الشبشب من الكيس..كان بني ناعم ومنفوش ويدفي،
مادري ليش القهر ان ذوق هالأنسان حلو!!..والأشياء اللي يشتريها حلوة!!..بس لازم اعرف مين يطلع.. لحظة انا ليه مكبرة السالفة!!..لا كلامه بالبطاقة الأولى كبير!!..والرسمة واللي مكتوب!!.. والله غريب
،قررت تطنش وشالت الأوراق قطتها..ورتبت الأغراض مع بقية الهدايا عشان ترتبهم..بس لحظة،
وين هدية سديم اجـل!!..صحيح جابت باقة ورد بالأخير اختربت..بس انا متأكدة جابت شي ثاني!!
،التفتت تدور حولها..لقت كيس طايح جنب السرير وبين بقية الأكياس..سحبته وفتحت كان فيه علبة طويلة،
الظاهر اسوارة!!
،وطلع تخمينها صح..اسوارة ذهب ابيض ناعمة وفيها كرستال احمر..وابتسمت الرزان وهي تقرا البطاقة،
شوفي والله مايغلى عليك شي..تراها ذهب ابيض مو فضة..والكرستال شوارفسكي اصلي >>كل كرستالة تقول الزود عندي<< ..وترا غلاك بالقلب اكبر يــالغــلا كله..انتي بمليون كرستالة شوارفسكي اصلية >>خخخخخ..تشبيهات مادري من وين اطلعها<<..اسمعي عشان افتن بس..ترا اصوله جايبة كاميرا وهنوده جيابة بيجامة وملابس داخلية >>قلتلها استحي يابنت بس اصرت..تصدقين فكرت اجيب لك ذاك الشي "عرفتيه!!"بس هونت خفت ترتكبين فيني جريمة<< ودودي طلبت تعليقة بأسمك من السعودية >> عجبتني فكرتها..ياليت سبقتها فيها..يـلا الجيات اكثر<<.. كل سنة تمضي من عمرك وانتي اصغر واصغر >>خراط<< وكل سنة وسعادتك اكبر واكبر >> ياحي ياقيوم<<..عن اذنك >>ســدومه ^_^<<
،ضحكت وضحكت،
قال عن اذنك قال!!..رجه ياسدومه بس بذوق
،رجعت البطاقة و الأسوارة للكيس وحطته مع باقي الأكياس..وصورت الهدايا كلها مع بعض..
بعدين شالت اللي تبيه وحطته بالشنطة وشالت بقية الأغراض حطتهم بمكان محترم..


وجهزت وش بتلبس بكرا وهم طالعين للمطار وهي تبتسـم ابتســامة خبيــثة!!..

[..الجـزء السابعــ ..]


لبست وتأكدت من شكلها مضبوط بالمرايا..طلعت وراحت غرفة غادة..
الرزان:غادة؟
غادة..كانت تلف حجابها:هـ،ايش هدا!اش الكشخة دي!اش الروعة هادي!!،يكون كله تأثير امس!!
الرزان..ابتسمت:بعدين اقولك،ممكن بوت بني لو سمحتي؟
غادة:بس كدا!من عيوني،طويل ولا عادي!!
الرزان:طويل اكيد
غادة:فكرت يمكن تتهوري وتتشخلعي علينا
الرزان..ابتسمت:لا تطمني ماوصلت لهالدرجة من الانفتاح العقلي
غادة..انتبهت للساعة اللي بيد الرزان وشهقت وهي تمسك ايدها:واااااااو،ايش هدا؟!،من فين جبتي هادي الساعة؟؟من اداك هيا؟؟
الرزان..بابتسامة خبيثة:هـدية
غادة:نعرف هدية،بس من مين ياحلوة؟؟
الرزان:اذا تعرفين قوليلي!!
غادة..استغربت:كيــف؟!!
الرزان:تبين تعرفين!،جيبي لي البوت وتعالي الغرفة
طالعت نفسها لآخر مرة بالمرايا..الفستان البني والحزام الأصفر..وحجاب اصفر..
ولبست ليقنز اصفر مناسب من سديم >>كثير يتبادلون ملابس واشياء!!<< والبوت البني الجلد >>يشابه جلد الحزام الاصلي اللامع<< طويل و كعبه العالي >>وش سالفة غادة مع الكعوب!!<<..
وكاشخة بالساعة والاسوارة..اليوم لبسها بناتي وانثوي حده!!..لكن مااهتمت بس في سبيل تعرف صاحب هالهدايا!!..
ورت غادة الهدايا وسألتها مين ممكن يكون حطهم!!..
غادة:ماانتبهت!!،مين ممكن يكون؟؟
الرزان:مادري،بس على وشك استخف لان كلامه غريب!!
غادة:بقــوة!!،يـلا ماعليكي اهم شي طلعتي بهدايا حركات وكشخة
الرزان..ابتسمت:على قولك،اهم شي،بس انا خمنت انه ممكن يكون فـارس؟!!
غادة:فـارس!!لالالا مو هو،هو اللي جاب الكيكة وباقة الورد
الرزان..ابتسمت:اهـا الباقة منه!!،كنت افكرها من سديم،يـلا بالنهاية بعرف من مين هالهدايا
طالعت ساعتها..الساعة 9:35الصباح..خلصوا لبس كلهم..وقفلوا الشقة وشالوا شناطهم لما وصل فارس ومعاه طلال..
ركبوا كلهم معاه طلال قدام والبنات ورا..طلال قعد يستهبل على الرزان >>على كشختها<< وحاط لها اغنية "هذا اللي شايف نفسه" لـ فيصل الراشد..
وشوي "ارحمني" لـ فايز السعيد..وقعد يغني ويغمز لها..والكل يضحك عليه..
{ارحمني ارجوك كافي لعب باحساسي..ماتخاف ربك بهذا اللي مسونه
عام(ن) ورا عام حالي حال ياناسي..وان سجينك مابين النار والجنه
ارحمني..ارحم..ارحمني ..ارحمني..ارحم... }
الرزان..ابتسمت:طلال يـلا عاد بلا سخافة!!
طلال:ارحمنـي ارحم،ارحمنـي ارحم،ارحمنـي ارجوك
الرزان:وبعدين يعني!!
طلال..ضحك وغمز لها:شسوي استخف،استخف اذا شفتج كاشخة،تعالي لايكون فرحة بالرجعة للسعودية
الرزان..تلقائياً:لا وع..تداركت نفسها..مو لهالدرجة!
طلال..فهم عليه:اجل وش سر الكشخة؟،لايكون لايكون يابنت محمد طايحت لج طيحة من وراي؟! ،بس انتي مشكلتج لاطحتي ماحد يسمي عليج،اعترفي واقري!!
غادة:والله زليوتها،يعني حرام تتزين وتتكشخ
طلال:مو حرام عندج انتي وغيرج بس هي عندها حرام،فـلازم يكون في انه وقصة وسالفة ورا الكشخة،خصوصاً ان وحدة كانت تبي تكون ولد لسنين طويلة فجأة ترضى بواقع انها بنت وتكشخ مثل باقي البنات؟!!!
الكـل شهق:ولــد!!
هنادي:لاتصدميني بحياتي يالرزان،وتقوليلي ان البنت نفسها اللي امس تبي تصير ولد
سديم:بعد ذاك الـ...ضربتها هنادي ووقفت عن الكلام
فارس..ضحك على اشياء و اشياء:والله ناس محتارة بعمرها،اللي يبي يصير بنت واللي تبي تصير ولد!!..وبجدية اكبر..ليـه مو عاجبتكم خلقة ربي!!متكبرين عليها!!وتبون تتحكمون بخلقة ربي!!
طلال..ابتسم:صـادق والله،عطها خل تسمع الغبية،هذا اللي شايف نفسه...
الرزان..قاطعته:بس الله يخليك،انا ماتكبرت استغفر الله،ولا تذمرت اعوذ بالله،بس مجرد تمني لاني لو كنت ذكر..(يمكن كانت امي حبتني اكثر..يمكن ماكان صار اللي صار)..يمكن كانت حياتي اسهل
سديم:بس امس ماكنتي تبين الذكور!!
فارس..باستهبال:ماتبي الذكور!!،ليه مو مالين عينك!!،اجل ليش تبين تصيرين وحدة منا!!
طلال:لاتتعب نفسك موقفها متناقض معنا،أحياناً تبي تصير وحدة منا،أحياناً ماتطيقنا وتبي تذبحنا،أحياناً احنا العالم كله بالنسبة لها

يتبع ,,,,

👇👇👇
تعليقات
ليست هناك تعليقات
إرسال تعليق



    وضع القراءة :
    حجم الخط
    +
    16
    -
    تباعد السطور
    +
    2
    -