بداية

رواية ارواح تسكن مشارق الشمس -16

رواية ارواح تسكن مشارق الشمس - غرام

رواية ارواح تسكن مشارق الشمس -16

رمت الجوال على الكنب بقهر اووف مقفل وين راح المفروض يكون راجع البيت قبل نص ساعة و لا حتى قالي الصباح انه بيتاخر ياربي يكون بخير بس .. ركضت للباب اول ما سمعته يتسكر
هند سعود انت وين رحت تاخرت ؟
لكنه تخطاها و راح للغرفه بدون أي كلمه
تبعته للغرفه ملامحه متضايق .. شو صار له امس نام زين ليش وجهه عابس كذا هند سعود
بدون ما يلف عليها او ينطق همهم لها بنعم
قربت منه اكثر هند شلي مضايقك كذا و عابس وجهك ؟
سعود و لا شي
هند طيب ليش تاخرت و مقفل جوالك ؟
سعود رحت المطار
هند ليش ؟
سعود ابى حجز لجده
هند بفرح و لقيت ؟
سعود بس تذكره وحده
هند كيف ؟
سعود هند لا تزيدينها علي بروحي الخبر الي سامعه رافع ضغطي تذكره وحده لقيت رايح جده و حجزتها
هند و شو الخبر الي سامعه حد صاير له شي ؟
يارب سامحني سعود فارس متضارب مع واحد و داخل السجن و محد يدري عنه صاحبه قال لاهله انه عنده في الطائف و دق علي و خبرني
هند اووف من متى ؟
سعود امس
هند و انت بتروح له اكيد
سعود بس ما في تذكره الا وحده و انتي تبين اهلك
هند ما راح اقدر اروح لوحدي انا
سعود انا اصلا ما اتخيل انك تروحين من هنا لجده بالطيارة لوحدك
قربت منه و حضنت خدوده بيدها هند في اشياء اهم الان فارس هو الي يراعي امي و يشوف اخبارها الحين اكيد هي مفتقدته و انت ما انت مطمئن عليها لانه بعيد و بتجلس تفكر من يشوف طلباتها روح طلعه بس مر على اهلي و طمني عليهم قول لهم هند كانت بتجي بس حست بتعب و تبى ترتاح و رجعها نواف
سعود يعني انتي ما عندك مانع اروح ؟
هند لا بس الاسبوع الجاي تحجز من بدري تذكرتين
سعود و هو يطالع فيها ببراه امم الاسبوع الجاي ما نقدر زواج يوسف
هند طيب الي بعده
سعود باذن الله
هند زين بروح اجهز لك الاكل بدل و الحقني
سعود أي والله ميت جوع
هند و على وجهها ابتسامه و هي طالعه يخسى الجوع
بعد ما تاكد انه معاد يسمع خطواتها ابتسم بنصر ( سامحيني هنوده سامحيني لاني بديت اكذب عليك ).....


************


الاربعاء


الخبر
الساعة الـ 05:05


رتبت له شنطه بسيطه حق يومين جهزتها و حطتها على طرف الباب بداخلها زفرت بقهر هي خاطرها تشوف اهلها و مشتاقه لهم بس متاكده مليون بالمئه ان سعود ماراح يسمح لها تسافر لوحدها لازم تنتظر اسبوعين ثانيه كمان
طلع من الحمام بعد ما اخذ له شاور سريع شافها تطالع الشنطه و سرحانه في داخله تالم من فعلته فيها قرب منها و بحركه سريعه باسها على خدها سعود بتوحشيني
هند و انت كمان اول ما توصل طمني
سعود ابشري بس انتي انتبهي لنفسك و صحة الي في بطنك
هند ان شاء الله
سعود تبين شي من جده نفسك فيه ؟
طالعة فيه هند لثواني و بصمت قامت و فتحت الكبت طلعت منه كيس و رجعت جلسة بمكانها جمب سعود بس ابيك توصل هالكيس لمنال قولها هند اشتاقت تشوفك
سعود اقدر اعرف شو فيه الكيس و الا سر ؟
هند هدية نجاحها خلصت الفصل الاول قبل اسبوعين
سعود اهااا طيب انا اوصله لها
هند خلاص يالله ما بتروح الان الطياره تروح عنك
سعود و هو يطالع ساعته أي والله بتاخر بس وينه نواف كيف اروح و هو لسى ماجاء عندك ؟
هند ما عليك هو بيتاخر شوي عنده اختبار لين 7 و بيجي لا تشيل هم انت.


***********


الخبر
الساعة الـ 06:30 مساء


هذي المره العاشره الي يدق من امس و ما ترد و الان يقراء مسجها و يضحك (( القضاء العادل يعلن واحد من الناس حكم علي اسبوعين اعيشها في الاسواق بادلته الحكم بقطع الاتصالات لعدم التفرغ و شكرا ))
من قلبه كان يضحك فعلا معاها حق وين بتلقى وقت ترد على اتصالاتي و الا تجهز اغراضها احسن شي اخليها هالكم يوم تتفرغ لنفسها و حاجياتها بدون ما ازعجها بس خليك تجين عندي يا سوير و تشوفين بدل هالقطيعه وش يسوي بك يوسف
فتح الرسائل و كتب لها (( قبول عقلي بالحكم لكن القلب يحتج و يطالب بمسج قبل النوم و اخر عند الصباح رفعة القضية ))


الجزء التاسع و الثلاثون



جزء


الخميس


جده الساعة الـ 11:15 صباحا


كان واقف ينتظره يجمع اغراضه بعد ما انتهى من شغلته يبي يرجعه مكانه قبل يصحى و يشوفه و يثور و يتعب مره ثانيه
سعود خلاص كذا ؟
ايه
سعود زين يالله نمشي السيارة ما قصرت
هذا واجبنا ولو اخوي
سعود و هو يلتفت لشخص الثاني انا ماشي الان تبون شي ؟
لا بس ... تبى تشوفك
سعود خلاص انا ارجع لها المغرب الحين بوصل الرجال و بروح اصلي الظهر و برجع البيت
زين تعال تغداء معنى بعدين روح
سعود والله الوالده تنتظرني مره ثانيه
اجل تتعشى عندنا
سعود يصير خير يالله فمان الله...


***********


الخبر
الساعة الـ 11:45 صباحا


تحسست مكانه بالسرير عطره شماغه كل شي بالغرفه له فيه لمسه تفتقده اكثر من اول قدامه ما تقدر تسيطر على مشاعرها قلبها صار يشتاق له وين ما يروح حضنت مخدته بضحكة .. معقوله بديت احبه صدق و الا بس مجرد مشاعر بتخمد يوم اووف و ليش ما احبه ما هو زوجي و ابو الي بطني ياربي ما اقدر اسيطر على دقات قلبي طيب هو شو مشاعره تجاهي حب و الا مجرد واجبات زوج و بس ما اعرف بس الاهم اني اشتقت لصوته ضحكته اكيد الان هو صاحي خل ادق عليه و الي يصير يصير..


حمد ربه الف مره ان هند ما دقت الا بعد ما انهى شغلته و الا كان صدق بيرتبك و تحس انه فيه شي سعود هلا و الله بهالصوت
هند صباح الخير
سعود صباح النور حبيبي صباح الفرح و السعاده
هند صحيتك ؟
سعود لا صاحي من الساعة 8
هند و ليش ما دقيت لي طيب
سعود اتغلا شوي اشوف في ناس بتشتاق لي او لا
هند بالله
سعود ايه والله
هند بغياظ بس انا ما اشتقت لك
سعود و ليش داقه ؟
هند غلط بالرقم و لما مسك عندك ما حبيت اكسر خاطرك قلت اسلم
سعود حس بقهر من اول ما صحى وهو خاطره يتصل بس خاف انها نائمه و مابغى يزعجها طول الليل ما قدر ينام لانها ما هي جنبه و لا يشم رائحة عطرها الي صار يعشقه وهي قمة البرود عندها فيك الخير والله ما قصرتي
عضة شفايفها تكتم صوت الضحكة الي كانت بتطلع ليش تكابر يا سعود؟ هند سعود
سعود هلا
هلا هذي تنطق لما يكون الخاطر مش و لا بد هند انا ما اشتقت لك لانك موجود معي حتى لو ابتعدت بس الحقيقة اني افتقدتك
حس بقشعريرة في جسمه تمنى لو كان جمبها هالحظة يحضنها بعد هالكلام تنهد و ما قدر ينطق غير بكلمه وحده سعود أحبك....


*************


جده
الساعة الـ 04:30 عصرا


كان حاط بنت اخته الي عمرها سنتين على رجوله و يلعب معها ابتسم من خاطره متى يشوف ولده قدام عيونه يلاعبه و يبوسه كذا
سحر وش سر هالبسمه خالي وين واصل ؟
ام سعود اكيد عند ولده و امه ياربي متى اشوفه يلعب في هالبيت مع عيال عماته
سعود خليه يشرف يمه اول والله اتعبلي هنوده و هو لسى ما طلع لدنيا
ام فارس لازم عاد التعب هذا البكر كل شي تحسه جديد عليها
ام عزام ايه عاد و من زود التعب ما تنازل تنزل تسلم لنا ساعة هنا
سعود بهدوء هند ما نزلت جده معي
ام فارس عسى ماشر ليش ؟
سعود حسيتها شوي تعبانه ما حبيت ازيد عليها قلت ترتاح هالاسبوع و بعدين انزلها
ام فارس الله يهديك يا سعود كان جلسة انت كمان معها و نزلتوا الاسبوع الجاي
سعود فديتها والله هي لزمت علي الا انزل بعد ما حجزت و كمان عندي شغله ضروريه هنا اسويها
ام فارس بس عاد ما هي حلوه تخليها و هي تعبانه تعرف الوحده في اول حمل لها تكون نفسيتها حساسه و خوافه في كل شي تبى زوجها معها
ام عزام لا تخافين تلقينها ما هي مهتمه لشي و لا تحس بشي و اخوها عندها ما هو بعيد
سعود اظن الي تكلمين فيها زوجتي ما ارضى عليها بعدين وش الي يخليها ما تحس بالتعب ما هي بشر زيها زي غيرها..


**************


الخبر
الساعة الـ 05:30 مساء


ما بقى الا اسبوع على زواجه و هو ما خلص تجهيز الغرفه ( طبعا يوسف و ساره اتفقوا انهم يسكنون فترة عند اهل يوسف بحكم ان البيت فاضي لحد ما يستقلون ببيت لوحدهم فاضطر يوسف ياخذ غرفة محمد و يفتحها على غرفته و يعمل فيها حمام داخلي و صاله صغيره )
امل ما شاء الله حلو التصميم و الالوان
يوسف اكيد اخوك ذويق
امل بس عجل شوي بيخلص الاسبوع في لمح البصر وانت مالحقت تخلص يا مجنووون
يوسف اااه بس متى يخلص بس ليش تقولين علي مجنون افى بس وين الاخوة وين الاحترام
امل ههههههههه ما هو انا الي اقول هذي سوير
يوسف افى
امل تخيل داقه علي من كم يوم تباني اقولك تاجل الزواج شهر لجل يمديها تخلص اغراضها
يوسف فتح عيونه على الاخير شهر المفتريه قولي لها لا تشتري شي تجيني بملابسها الي في كبتها انا راضي
امل تبي الصراحة معها حق انت مره استعجلت
يوسف ادري والله يا امل بس ما اني عارف ليش استعجلت كذا احس في شي داخلي يقولي اتزوج بسرعه يا يوسف تبين الصدق بديت اخاف انه بيصير شي بس الله يستر......


*************


جده
الساعة الـ 07:30 مساء


طالع الكيس بين يديه يتذكر كلمتها ( هدية نجاحها ) لذي الدرجه هنود تعامل منال بمستوى الاحترام الحب العطاء و المكافة عرفت تقريبا انها هي الي ربتها بس ما توقعت انها مهتمه لكل التفاصيل حتى بعد ما ابتعدت عنها مد يده و دق الجسر و كان القدر ميسر له انها هي الي تفتح له دخلته الحوش و خلت الباب مفتوح تلتفت وراه تنتظرها تدخل..
سعود منوله حبيبي ليش ما تسكرين الباب ؟
منال هند ما بتدخل ؟
نزل لمستواها و حط يده على كتفها سعود اممم هنوده ما جت معي
منال بتجي بكره ؟
سعود لا هنوده جلسة عند عند نواف
منال يعني هي تحب نواف اكثر مني الحين ؟
سعود بذكاء مد لها الكيس لا تحبك اكثر و هذي الهديه منها هدية نجاحك شوفي ما نستك اشترت لك كل الالعاب الي تحبيها و قالتي اقولك سر
منال و هي منبهره باالالعاب شو هو السر ؟
سعود بس سر محد يعرف صح ؟
منال ايه صح وهي تعد على اصابعها الا انا وانت و هند و ربي اربعه
سعود صح هي جلسة عند نواف لانه امس طاح وجاء فيه دم في رجله ما تقدر تخليه لوحده صح ؟
منال صح
سعود و لا يقدر يجي معنى و تشوفه ماما و تبكي صح ؟
منال يعني هو يصيح ؟
سعود كان خاطره يضحك بس مسك نفسه شوي اول صاح شوي بس الحين سكت خلاص
منال عشان هند عنده هي تعرف تشيل الدموع و ما تخليه يصيح
سعود صح هنوده تعرف تشيل الدموع
منال انت تحبها ؟
قمة الاحراج لما طفل يسالك عن مشاعرك ببراء سعود ايه .....وسكت
منال عشانها تشيل دموعك صح ؟
هنا سعود ما قدر يكتم ضحكته اكثر انفجر مره وحده و سحبها لحظنه ايه بس هذا سر ما تقولين لاحد....


*************


الاربعاء


الخبر
الساعة الـ 10:35 صباحا


كانوا راجعين من عند الدكتورة بعد ما تطمنوا على صحتها و الجنين الي بداء يكبر و تقوى الروابط بينه و بين امه
سعود شو رايك نروح نفطر في أي مكان ؟
هند ماراح ترجع الدوام ؟
سعود لا ما في شي يستاهل ارجع له خليني معك احسن
هند والله و يوم السبت يتراكم عليك الشغل تدعي علي
سعود وهو يرفع اصبعه قسم زي الاطفال والله ما اسويها
هند هههههههه زين صدقتك خلاص نروح نفطر ليش لا
سعود وين تبين نروح طيب ؟
هند ابغي بطاطس مشويه مع الشطه و تبوله بس يكون اليمون فيها زايد شوي
طالع فيها يفتح و يغمض عيونه بسرعه سعود هذي من وين اجيبها لك هنوده ؟
هند مدري هذي طلبات ولدك نفذها
سعود ترى لك كم يوم ولدك و ولدك يمكن بنت وش عرفك ؟
هند احس انه ولد قلبي يقولي مدري ليش المهم لا تغير السالفة نبي طلباتنا يالحبيب
سعود استلم يا سعود طلبات بعد
هند هاااه ترى لو اشتهيت شي و ماتوفر يجي شامه في ولدك و انت السبب
سعود لا عاد لكه والا انا اكون السبب ابشري ناخذ لكم طلباتكم في مطعم بالظهران عنده بطاطس مشويه جنان بس على الله فاتح الحين.....


**************


الخبر

الساعة الـ 04:50 مساء


مجتمعين عندها و هي معلنه حالة الصفر كم ساعة بس و بتترك هالبيت و بتبدا حياة جديده كل شوي و نازله دمعه
منار ياربي معك انتي اغرقتينا
ساره والله بفقد امي
امل من بعدها عاد خطوتين وانتي عندها ما هو مثلي
ساره انا ما اتعودت يمر علي يوم ما اشوفها فيه
امل مشكلة والله لازم تعرض على الامم المتحده لنقاش الدولي
ساره تطنزين
امل يا بنت اعقلي انتي صرتي مدام و مسئوله عن تصرفاتك
منار يعني اتركي عنك حركات الدلع هذي والله انبلش اخوي بصياحه
ساره من ورى قلبها يا شيخه طيب روحوا زوجوه وحده ما تصيح
منار والله العنود جاهزه
ساره العنود هااه
امل هههههههههه ايه
ساره معطيتكم وجه انا
امل حلوه عليك الغيرة يا بنت
ساره خليك من غيرتي و امشوا ننزل تحت عند امي و خالتي
منار لا الغيره ماثره على الذاكره يا الحبيبه امي و امك راحوا يرتبون ملابسك و اغراضك في غرفتك هناك عند يوسف
ساره هاااه من متى لا تقولين يعني خلاص و دمعت عيونها
امل ههههههههههههه ايه يعني خلاص.......


*************


الخبر
الساعة الـ 06:45 مساء


حياة الروتين و الملل قاتله بعض الاحيان و تسبب ضيق نفسي واضح شافته قدام المرايا يعدل شماغه معناته طالع اكيد اخذة العطر من قدامه و وقفت بوجهه تعطره
هند بتتاخر ؟
سعود ما ادري والله ليش تبين شي من برى ؟
هند لا
سعود و هو ياخذ العطر من يدها و يحطه على الكومدينه بعد ما حس انها تعطره بطريقة عشوايئة قربت تخنقه وش الي مضايقك ؟
هند و لا شي
سعود الا فيه شي ؟
هند بس حالة ملل احسها يمكن من الروتين
سعود تبيني ابطل طلعه مع الشباب و نطلع انا وياك طيب ؟
هند انت اليوم من الصبح معي حتى دوامك مستاذن منه
سعود هههه اووف مليتي مني يعني ؟
رفعت نفسها لمستوى خده و طبعت عليه بؤسه هند لا والله بس انا مالي خلق اطلع اصلا مالي خلق لشي
فتح لها يديه مثل الي يقول تعالي هنا لحضني سعود هذا كله من تعب الحمل لا تتضايقين و لا شي انا معك و بحاول ما اتاخر عنك حبيبي..


************


جده
الساعة الـ 08:44 مساء


من وصل بينهم و هو يحس انها تطالعه من فوق لتحت مثل الي بيكتشف فيه شي جديد عليها ناداها جمبه و جلسها
نواف وش فيك منوله تبين شي ؟
منال لا
نواف و ليش تطالعين فيه كذا متغير انا يا فهد شي ؟
فهد هههههههههه مسمر شوي
نواف والله من شمس الشرقية تحرق ما هو بس تسمر
ام نواف يا قلبي على هند اكيد يطفشها الحر هالحين مع الحمل
نواف ايه لي ثلاث سنوات هناك ما سمعت احد قال يا قلبي على نواف
فهد طاح سوقك خخخ
ام محمد الا والله يمه تقول بس ما هو قدامك من ترجع الجمعه الا يغرق هالبيت هذا قلب الام ما يفرق بين عياله
نواف الله يخليها لنا يارب بس
فهد انا خاطري اروح ادرس عندكم بشوف حد يفتقدني و الا لا ؟
ام نواف انت بالذات مالك روحه لمكان بتدرس هنا في جامعة الملك عبد العزيز هو الباقي تغرب واحد و بيلحقه الثاني
فهد طيب ما ادخل الجامعه الا بعد ما نواف يخلصها يعني هو بيرجع عندك و انا اروح
ام نواف من شفت رجال اختك و انا غاسله يدي من رجعته ماله وظيفه الا هناك
نواف لا تقولين يمه سعود اصلا مقدم نقل لفرع ينبع بس مديره في الشركة مره متمسك به يمكن انا وضعي غير
ام محمد الله كريم يمه......


***************


الخبر
الساعة الـ 10:40 مساء


جالس قدام التلفزيون منسجم معه و يمسح على شعرها و هي نائمه على رجله تفكيرها في سؤال من فتره في بالها ما هي محصله له اجابة تريحها
هند سعود
سعود خاطري مره تقولين لي اسم دلع
هند اسمك صعب ما يدلع
سعود هههههههه طيب صعب هاااه انك تقولين سعودي
هند ههههههههه والله اعرف جنسيتك انك سعودي
سعود هههههههههههه تسلم لي هذي الضحكة يارب اصلا كل حرف انتي تنطقينه دلع
هند زين بسالك سؤال ممكن .؟
سعود ممكن و نص
هند انا دائما اسمعك تتصل في اخواتك و تسال عنهم و ما تقصر معهم بس الفترة الاخيرة احسك ما عاد تتصل في ام عزام بالذات زي اول
سعود يعني تشوفيني صرت مقصر ؟
هند لا فديتك مو تقصير انت ما تغيرت مع ام فارس بس ام عزام شوي احس كانك متضايق منها
سعود ام فارس احسها مثل امي ارتاح لها و تقريبا مربيتني مع عيالها عارفه ما بيني و بين فارس الا خمس سنوات كنت زي اخوه الكبير في البيت
هند و ام عزام ؟
سعود و هو يتذكر ذيك المكالمه فحب يسحبها بالكلام تضايقك ؟
هند لا لا من قال ؟
حس بارتباكها سعود لا وحده تكفي طيب وش فيك ؟
هند و لا شي خلاص سكر السالفة
سعود هنوده تذكرين اول ما حملتي لما كنتي معصبه في المطبخ
بلعت ريقها هند ايه
سعود انا سمعت مكالمتك الي مع اختي بس ما حبيت اقولك تمنيت انك تجين من نفسك تصارحيني بس انتي سكتي و لا كانه شي صاير
هند براحه لانه ما في شي يستاهل صاير مجرد كلام و انتهى
سعود بس عندي فيه شي يستاهل ان ام عزام صايرة تضايقك و انا ما ارضى عليك
هند هي اصلا ما هي متقبلتني كزوجه لك من اول جات الان على مضايقات كلام انا ادخل من هنا و اطلع من هناك
انصدم بكلامها هند تعرف ان ام عزام ما هي راضيه عن زواجي منها و ساكته أي قلب يسكن صدر هالانسانه سعود تعرفين و ما حاولتي تبينن لي شي ؟
هند وش بستفيد الا اني بخرب بيتي و ادخل في دوامات معك و مع اختك بخسرها انا زي الي قبلي
سعود قصدك مها ؟
هند ايه صحيح هي ما قدرت تصفي عقلها من وشوشات ام عزام و بين افعالك تلخبطة بينكم و انت ما فهمت اصل تغيرها عشان تريحها و تستمر حياتكم بنجاح
سعود ما انكر غلطي يا هند بس الله يشهد ما كنت ادري عن شي بينها هي و ام عزام
هند و الان كيف عرفت عن اسلؤبها معي ؟
سعود من اول ما اتزوجنا و انا اشوف اسلؤبها معك و طريقة ردك عليها ترى انا افهم النغزات الي بينكم مو غبي لدرجة اني ما احس بالي بينكم
هند و يمكن اساس رفضها لي من البداية اكبر سبب خصوصا ان مها مثل ما اعرف هي الي مختارتها لك
سعود احتمال
كانت بخاطرها تفكر تقول له عن زيارتها لهم قبل الزواج بس في النهاية تراجعت ما راح تستفيد شي لو كبرت بينهم حطة يدها على بطنها و تكلمت هند انسى الان كل شي لان عندي الي ادافع عنه عشان تستمر علاقتنا
سعود بس هو ؟
هند يعني شو ؟
سعود هند بصراحة لو لسى ما حملتي او نقول قلت لك لا تحملين الان كنتِ بدافعين عن علاقتنا بكل القوة هذي عشان تستمر ؟
هالمرة سمحت لقلبها يتكلم بكل ثقه هند و اكثر قوة من كذا كمان افعالك معي تعاملك مختلف قدرت تحتوي احزاني خوفي من اول ليله حسيت معك بالامان سمحت لي انام بكل راحه ساعتين وانت على وضعيتك ما تحركة و لا شكيت
سحب جسمها كله لصدره و حضنها مثل الاطفال سعود لو تنامين طول عمرك على صدري ما راح اشتكي ثانيه وحده..........


**************


الجزء الاربعون





الخميس


الخبر
الساعة الـ 11:30 صباحا


صحى على صوت جواله بباله يالله اليوم عرسي من الي مزعجني من بدري كذا حرام علي الراحه..سحب الجوال و طالع الرقم و ابتسم و هو يشوف مكتوب بالشاشة (( رقم خاص ))
سلام يا عريس
يوسف و عليكم السلام يالله حي راعي الصوت
محمد كذا ما عندك وقت تنتظر كم شهر لين اجي و تسوي عرسك ؟
يوسف كم شهر كمان انا خاطري اني معرس من شهر و انت تقول اجله كم شهر ما عندك سالفه
محمد ههههههه تعالوا شوفوا يوسف الي كان ما يحب حد يفتح له سالفة العرس الان مستقطع عليه اركد شوي
يوسف كنت افكر فيك انت و خواتك الان مريح راسي منكم
محمد افى كنا ثقل عليك ؟
يوسف هههههههه كبر جبال الحجاز
محمد ههههههههه اجل خلاص برجع الخبر اليوم و ابى غرفتي
يوسف مالك شي عندنا تصادرة
محمد نحط ستارة بينا
يوسف ههههههههههه عندك صك شرعي ان المكان لك قبل التعديل ؟
محمد اذا عندك صك الى ما بعد التعديل ؟
يوسف هههههههههههههه والله لك وحشه يا دب
محمد و انتم اكثر والله بس تعرف الان اختبارات
يوسف شد حيلك نبي الدرجات الي تبيض الوجه
محمد ابشر.......


**************


الخبر
الساعة الـ 09:15 مساء


سبب لها قلق فوق راسها رايح جاي لهدرجة يغلي يوسف كذا و ما يبي يتاخر عليه والله بديت اغار منه
هند ياربي سعود خلني اكمل لبسي بهدوء
سعود هنوده لك ساعة شوفي والله قمر ما هو ناقصك شي خلاص خلينا نمشي تاخرنا
هند قسم بالله بديت اغار من هاليوسف
سعود له ساعة يدق و كل شوي اقله بالطريق عشان خاطري يالله
هند انت معه من العصر توك تجي بس تبدل ما يصبر عنك ؟
سعود لا
هند سعود والله احراج الناس ما يجون الا بعد 10:30 او 11 و انا اروح الان و كمان ما اعرف منهم احد
سعود اهل يوسف مثل اهلي بس قولي عند الباب انك زوجة سعود و شوفي و شلون يستقبلونك
هند بنظرة بالله
سعود هههههههه والله حتى سيف راح يجيب زوجته ادق عليه و ادخلي معها اظن تعرفينها
هند زين خلصت خلني البس العباية بس.......


************
الخبر
الساعة الـ 10:45 مساء


ما سكينه الشباب طنازة من الصبح و هو ساكت عنهم شخص بينهم ثاير فضوله من كم يوم حالة السكوت و الشرود الذهني مسيطره عليه
يوسف علي ما قلت لي مبروك يا اخي ؟
علي ههههه ما حسيت لها لازم وانا من اسبوعين قايلها لك
سيف هههههههه في هذي صدقة
ناصر اسرع زواج في تاريخ عائلتكم هذا يا يوسف
يوسف لا فيه اسرع واحد خطب و ملك و اتزوج في شهر و نص
ناصر هههههه من تقصد ؟
يوسف واحد يعرف نفسه ههههههههههه
سعود اصلا يوسف عجل بزواجه عشان يكسر الرقم القياسي حقي بس هذا بعدك
سيف ههههههههه ايه والله صح انت لسى المتربع على القمه
ناصر ليش كم كانت مدة خطبتك كمان .؟
سعود ههههههههه ثلاث اسابيع خطبة و زواج على طول


يتبع ,,,,

👇👇👇
تعليقات



    حجم الخط
    +
    16
    -
    تباعد السطور
    +
    2
    -