بداية

رواية ارواح تسكن مشارق الشمس -3

رواية ارواح تسكن مشارق الشمس - غرام

رواية ارواح تسكن مشارق الشمس -3

سعود إي والله و هالمرة بصحراء أسبوع لا ومن غير يوسف
سيف الله يعينك إلا في أوراق حطيتها لك على مكتبك فيها كم شغله ضروري تشوفها
سعود اليوم لازم أخلصها ؟
سيف لا محتاجها يوم الأربعاء تكون عندي
سعود اجل خلاص اخلصها لك بكرة اليوم باقي الدوام عندي إجازة بمر أشوف يوسف واطلع
سيف الله معك
وصل سعود لمكتب يوسف و شافه ساند رأسه على الكرسي ومرجع شماغه والعقال لورى و عيونه مغمضه و باين على وجهه التعب تنحنح وهو يدخل لجل ينتبه لوجوده سلام
فتح عيونه اللي كانت حمراء وشكله ما نام طول الليل عدل جلسته وعليكم السلام هلا سعود اجلس لك مده واقف هنا ؟
جلس سعود على طرف الطاولة لا والله توي واصل
يوسف سلامات اجلس على الكرسي طيب ترى منت خفيف
سعود هههه قل ماشاء الله مستعجل والله طالع أنا
يوسف ماشاء الله هاه وترى مني عيان طالع على وين ؟
سعود الشقة اعطاني المدير باقي اليوم أجازة
يوسف حركات من ورآنا وش مسوي للمدير أنت ؟
سعود إلا قول وش مسوي لك هو راميني الأسبوع الجاي كله بربع الخالي
يوسف أوف تكفى لا تقول اني معك والله ماني ناقص
سعود لا لحالي والله ربك يعين إلا ما قلت لي وش صار معك أمس ؟
يوسف خلها على ربك يا اخوي زي كل مرة يتمشكلون على شي ما يستأهل و يكبرونها والمشكلة كل واحد فيهم اعند من الثاني قسم بالله لو لا أخواتي و محمد اني أقدم على بعثه و سافر ادرس ابرك لي من ذا الحال لكن الشكوى لله ماقدر أخليهم مالهم ذنب
سعود زين و إخوانك احمد و عبدالعزيز وينهم عنهم ؟
يوسف وهو يتنهد لاهين ببيوتهم و عيالهم ولا يسالون زين كان شفناهم من الجمعة للجمعة والله كل شي فوق راسي وانأ ساكت
سعود الله يصلح بينهم بس
يوسف أصلا خلاص أنا تعودت على ذي الحالة و ماراح ارتاح لين أزوج أخواتي وطلعهن من ذا البيت ومشاكله و محمد مرة بس يخلص ثانوية هالسنه بسفرة يدرس برى وأريحه
سعود شكلك ما نمت أمس جالس تخطط ؟
يوسف والله جاي الدوام مواصل
سعود وهو يوقف و يأخذ الملف معه باين من عيونك أصلا اجل أنا رايح الشقة بتجي بعد الدوام عندي وإلا بتروح البيت ؟
يوسف لا بجي عندك تعرف لو رحت البيت ما نمت وأنا ما غمضت لي عين أمس
سعود زين يلا نشوفك على خير
يوسف حياك
طلع سعود من الشركة وراح اخذ له غداء و مشى في الطريق لشقته رن جواله طالع الشاشة و هو يبتسم فديتها والله
سعود هلا والله بكل الغلا
أم سعود هلا بك يمه السلام عليك
سعود وعليك السلام يا الغالية شخبارك ؟
أم سعود الحمدلله بخير وأنا اسمع صوتك يمه طمئني عنك أنت وش علومك ؟
سعود الحمد لله بخير و نعمة و هذاني رايح لشقتي
أم سعود و عليه يمه ما خلص دوامك ليش طالع بدري لا يكون انك تشكي شي
سعود لا يمه ما فيه إلا العافية بس المدير عطاني باقي اليوم إجازة و يوم الأربعاء ماعندي دوام يعني بتلقيني من صبح الله خير عندك
أم سعود وش ورى الرضاء ذا كله عليك
سعود هههههه افى لا تكونين ما تبين تشوفيني بس ترى اطلع البحرين و اجلس فيها آخر الأسبوع كله
أم سعود كان تبي قلبي يغضب عليك يا سعود روح البحرين أشوف
سعود لا عاد كله إلا غضبك علي قسم بالله طول ما أنتي ما تبيني أروح اني ما اكسر كلمتك لكن أقولك بجي لك من بدري ها الأسبوع وأنتي الله يهديك كأنه ما هو عاجبك
أم سعود و الأسبوع اللي بعده ما أنت نازل صح ؟
سعود و بخاطرة حشى يا أم سعود منتي هيئنه طلعت عندك الحاسة السادسة تبين الصراحة إيه عندي الأسبوع الجاي عمل في بئر للبترول بالربع الخالي
أم سعود إيه أنا أقول
سعود عاد يايمه هذا شغلي لو ما سويته بيحطون موظف مكاني و اجلس أنا بلا شغل
أم سعود الله يعينك يمه عاد هذا رزقك بتاخذه لو من نص البحر دام ربك كاتبه لك
سعود ونعم بالله يا الغالية
أم سعود زين يمه بعد ما تطئمنة عليك خلني أقوم أصلي الظهر هذاني اسمعه يأذن وأنت يمه روح تغداء و ارتاح و خل كل شي بيد ربك
سعود الله كريم يا يمه هذا غداي معي بسيارة لا تشيلين همي ريحي بالك و رضاك هو اللي أبيه بس
أم سعود الله يرضى عليك دنيا وآخرة يا ولدي
سعود وهو يوقف سيارته بباركنات العمارة الله يطول لي بعمرك يلا يا الغالية هذاني وصلت شقتي توصين شي
أم سعود سلامتك يمه
سعود يلا اجل فمان الله
أم سعود فحفظ الكريم يمه .....


**************


جده الساعة الـ 12:30 مساء


دخلت هند البيت والي كان مفروض تكون موجودة فيه من ساعة لكن أبو منذر تأخر عليها و اضطرت تنتظره شافت الصالة هادية و ما فيها احد ببالها أكيد جدتي تصلي بغرفتها و أمي بالمطبخ من اليوم شغل الغداء كله بيكون عليها و محد يساعدها الله يعين بحاول اخذ عنها العشاء و أريحها خل أروح أشوفها قبل اطلع أبدل مشت هند باتجاه المطبخ و هي تسمع صوت أمها تعطي توجيهات غريب من عندها أمي؟؟ ,,, المنظر قدامها حلو و مضحك بنفس الوقت منوله عافسه الدنيا بالمطبخ بزعم أنها تساعد وأم نواف مبتلشه معها تبي تخلص الغداء و منال كل شوي تطلع لها شغله ابتسمت هند لهم سلام
أم نواف وعليكم السلام هلا يمه
هند وش ها الريحه الحلوة وش طابخين أنتي و بنتك من باب الصالة الروائح استقبلتني
أم نواف وهي تفتح الفرن وفيها الضحكة كل خير و بنتي ما خلت شي إلا سوته لك تقول هند بتجي جيعانه يا حرام
هند يا حرام إي والله اني على فطوري معكم
أم نواف اجل روحي يمه بدلي و صلي فرضك و تعالي تغدي هالحين يجي فهد و بعد الغداء حكيني وش صار معك
هند أن شاء الله يمه هاه منوله سويتي لي حلا ؟
طالعت فيها منال ببرأه و هي تهز رأسها بمعنى لا بس معي جالكسي جبته لك من المدرسة
هند زين حلو بروح أصلي و ارجع لكم ......


***********


الخبر الساعة الـ 3:00 فجرا


الأوراق في كل مكان بالصالة على الكرسي و الطاولة وحتى بالأرض وين مكان سعود جالس أصلا بين أوراقة و أكواب الشاي وأكياس الوجبة اللي طالبها من المطعم للعشاء بمعنى كان المكان حوسه عنده لكنه لازم يخلص الشغل اللي معه و يسلمه المدير الصبح طلع يوسف من غرفته بعد ما نام تقريبا 12 ساعة من ثلاث الظهر وهو نائم بعد ما استأذن آخر ساعتين من الدوام بحكم انه تعبان
يوسف وهو يتثاب وش ذي الحوسه ما نمت أنت ؟
سعود لا ما خلصت باقي لي شوي
يوسف الساعة ثلاث الحين متى بتخلص و تنام ؟
سعود أقلك لا تقعد تسال فوق راسي بروحي مصدع خلني اخلص
يوسف أوف السهر مآثر على الأخلاق كمان
طالعه سعود بنظرة وكمل شغله بدون ما يرد عليه ( سعود طبعه لما يواصل أو مايخذ كفايته من النوم يصير عصبي و نفسه ضيقه )
يوسف ههههههه زين زين سكت خلاص بس آخر سؤال فيه ي عشاء أو لا ؟
سعود لا روح سو لك شي من المطبخ و فكني
دخل يوسف المطبخ دقائق وطلع بتفاحة بيده اخذ الريموت وجلس يقلب التلفزيون يقترح عليك تروح تقدم بجمعية خيرية
سعود وليش ؟
يوسف مطبخك فاضي يصفر حتى اندومي ما فيه الواحد يصبر نفسه به
سعود وش أسوي أنساه وأنت ما تشتري لو ملح
يوسف الأسبوع اللي راح حاط فيه مئة ريال لكن ما تجلس ما عليك بعد بكرة الراتب و انزل لك كارفور و أعبي لك الثلاجة
سعود تطنز
يوسف افى والله أقول الجد
سعود الراتب يوم الأربعاء و أنا نازل جدة الثلاثاء في الليل وراجع الجمعة والسبت من فجر الله طالع مقر البئر الجديدة ليوم الجمعة يعني لمن بتشتري غير لنفسك
يوسف أوف ذكرتني أصلا الشقة بتكون كئيبة بدونك يمكن ما أجي هنا لين ترجع أنت
سعود وهو يمد الملف ليوسف خل عنك بس وشف لي المخطط وقول رأيك
يوسف بعد ما قلب الملف شويتين شغل عدل والله أنت لو يقولون لك خطط الربع الخالي شبر شبر خططته ما هو كم كيلو ماشاء الله عليك
سعود مكانك ناجح بمعدل أكثر مني أنت ووجهك
يوسف ههههههههه غاش منك طال عمرك
سعود وهو يجمع أوراقة يا شيخ بس قصر على صوت التلفزيون أنا رايح أصلي وأنام لي ساعتين قبل الدوام ابرك لي
يوسف وهو يسكر التلفزيون ابشر أنا بروح أصلي بالمسجد و أمر بيتنا و أجيب معي فطور سنع واجيك
سعود ما تقصر والله
يوسف يلا فمان الله .......


************

الجزء السادس

الاثنين


جده الساعة الـ 6:30 صباحا


صاحية اليوم من الفجر بكل نشاط وحيوية كيف و اليوم أول دوام لها و أمل جديد انفتح بابه قدامها لبست ملابسها وأخذت عبايتها و شنطتها و نزلت تفطر لازم تكون جاهزة قبل 7 لان أبو منذر بيوصلها بطريق ما يوصل بنته الجامعة والي تبدأ محاضراتها الساعة 8
هند صباح الخير
أم محمد و أم نواف صباح النور هلا يمه
جلسة على السفرة والي كانت مفروشة تحت على الأرض لام محمد إلي تتعبها جلسة الكرسي بعد ما باست جدتها و أمها على رؤوسهم اليوم أول يوم دعواتكم لي لا تنسوني
أم محمد الله يوفقك يا يمه حنا ما ننساك لكن أنتي انتبهي لشغلك إلي يعطوك و لا تفكرين بشي ثاني
أم نواف صادقة جدتك انتبهي تراك بتعامليين مع حريم كبار يعني طولي بالك و لا تتراددين معهن بالكلام
هند ابشروا من عيوني
أم نواف الله يحفظك يا يمه يلا افطري زين قبل يجيك أبو منذر
أم محمد الله يجزيه هالرجال كل خير ما يقصر معنى
أم نواف إي والله انه أحسن من أخواني إلي أشوفهم من عيد لعيد و لا حتى يرفعون السماعة و يقولون نشوف اختنا و عيالها يمكن محتاجين شي
أم محمد اذكري الله يا بنيتي و ادعيلهم الله يهديهم و يحنن قلبهم عليك و يرجع لك رجلك و يعوضك صبرك خير
أم نواف الله يسمع منك يا خالتي و يهدي لك عيالك و يبرون فيك
أم محمد وعيونها بدت تلمع من الدمع الله كريم ما ينسى احد
كانت تطالعهم و كل تفكيرها كيف ترجع له الوجهين البسمة لكن صعب يا هند صعب تصححين أغلاط غيرك و تفكيرهم خوالي إلي يحاولون في أمي تطلق ولا تبقى معلقة و لما رفضت قاطعوها وإلا أعمامي إلي قاطعوا أمهم جنتهم و نارهم بسبة فلوسها و أملاكها إلي تنازلت عنها لنورة وأعمالها عشان تحافظ لنا على هالبيت بزعم انه لهم حق فيها مثل محمد غريب أمرهم يبون يورثونها حيه أخذت نفس عميق تسترخي فيه جدتي يالله معي الحوش نمشي لين يجي أبو منذر
أم محمد و هي تمد يدها يالله يمه ساعديني أقوم
هند يالله بسم الله .....
*****************


الخبر الساعة الـ 7:00 صباحا


جالس يسوق وهو ميت ضحك على شكل سعود إلي كان فاتح عين و مغمض الثانية و ممكن ينام في أي لحظه و إلا النفسية إلي صايره عدم من قلة النوم سبحان الله الدنيا دواره قبل يومين كان هو بوضعية سعود ألان
يوسف أنت بتروح المدير اليوم ؟
سعود أكيد بودية الملف
يوسف وبتناقشه في المخطط ؟
سعود لا برميه عليه وأروح
يوسف انتبه بس ليطردك أنت و هالاخلاق ههههههههه
سعود اسكت بس وشف طريقك
يوسف وهو يلف على محطة البنزين عارف أنت ينطبق عليك المثل إلي يقول اتق شر الحليم اذا غضب
سعود وليش داخل المحطة البنزين عندك فل ؟
يوسف بشتري لك عصير ليمون تروق شوي قبل ترتكب جريمة في احد ماله ذنب
سعود لا مآبي ليمون جب لي كابتشينو أصحصح راسي شوي
يوسف وهو يفتح نافذة السيارة ابشر اثنين كابتشينو سكر وسط
العامل اوكيه
دقائق و جاب لهم العامل طلبهم أخذوه واتجهوا لعملهم و كل واحد يفكر بروتين حياته و متى يتغير .......
**************


جده الساعة الـ 7:45 صباحا


دخلت هند المركز قبل موعد دوامها بربع ساعة كانت متأكدة إن المبنى بيكون فاضي العالم تتأخر ربع ساعة ما هو تتقدم ربع ساعة لكن وش بيدها سمت بالله و طلعت الدور الثاني شافت الخالة أم عبدا لله إلي تنظف المركز جالسة تمسح الطاولات
هند السلام عليكم
أم عبد الله وعليكم السلام
هند حمد لله اني حصلت المركز فاتح و فيه احد
أم عبد الله ايوا أنا أجي هنا من سبع ونص ارتب و امسح لكن أنتي جايه بدري اليوم
هند وكل يوم بجي كذا لان إلي يوصلني يوصل بنته الجامعة
أم عبد الله يالله حصلت إلي يسولف معي روحي نزلي عبأتك وتعالي اصب لك قهوة
هند تسلمين ياخالة ما اشربها الصبح أنا اذا فيه وفريها لي الظهر
أم عبد الله ما عليه أسوي لك الظهر أنا أصلا أسوي للموظفات هنا شاي و قهوة
هند مشكورة والله ما تقصرين خالتي ......
راحت هند تحط أغراضها بالمكتب المخصص للموظفات جلسة على واحد من المكاتب وأخذت ملف المريضة إلي راح تشوفها بعد ساعة تقرا فيه حرمة كبيرة عمرها 58 سنه يبدو إن حالتها صعبة شوي لان عندها شلل رباعي هند بخاطرها الله يعينها و يعين أهلها ..
********


الخبر


الساعة الـ 9:30 صباحا


جالس بمكتبة يخلص أخر أوراقة لذ الأسبوع كان المفروض يكون ألان عند المدير يسلمه الملف و يناقشه فيه لكن طلع عنده اجتماع و اجل جلسته مع سعود لساعة 11 اخذ الملف إلي سلمه له سيف أمس و راح يوصله له بعد ما خلص شغله فيه مكتب سيف وعلي كان مقابل لمكتب سعود
سعود السلام عليكم
سيف و علي وعليكم السلام
سعود هذا ملفك جاهز تفضله
سيف تسلم عاد عندنا أمر ألان ما نعطيك شغل
علي و إلا خاطري أسلمك كل ذي الملفات
سعود تكفون عاد مسافر لبنان سياحة أنا منب أصلا رايح الصحراء شغل وإلا يمكن قالوا لكم رايح اكتسب لون برونزي و ارجع
سيف تبي اطلب لك شي ؟
سعود ليش قالبين كوفي وأنا مدري
سيف لا بس شي يهدي لك أعصابك روق شوي
سعود استغفر الله بس شارب اثنين كابتشينو من الصبح فكني خل ارجع مكتبي واهدءا شوي قبل أروح المدير
علي ترى ماراح اكتب لك ورقة فصلك لا تخاف
سعود تكفى يا سكرتير المدير من ورآنا خلك فشغلك لا تنطرد أنت هذرتكم انتم الاثنين زايده
غلطوا يوم حطوكم بمكتب واحد
يوسف إلي كان واقف على الباب من أول و علي بس إلي كان يشوفه وأنت ما عندك إلا تدور من مكتب لمكتب ما عمري جيت أبيك و حصلتك بمكتبك
سعود كملت وش تبي بعد أنت ؟
يوسف هههههه أتطمئن بس انك لسى بالشركة معنى
علي هههههههه لسى ما دخل للمدير تراه
سعود تكلم سكرتير المدير الجديد
يوسف وليش لسى ما دخلت ما هو مواعدك الساعة تسع ؟
سعود عنده اجتماع مع شركة فرنسية وقالي سكرتيرة أجي الساعة 11 أقوله لا يعني !
يوسف وليش تقول لا تكفى خلك ساكت
سيف أقول على مكتبك أنت و هو ورأي شغل
سعود وهو يقوم لمكتبة من كثر شغلك عاد كلها كم ورقة
سيف بس مرتاح بالمكيف ما هو زي بعض الناس من صحراء لصحراء
سعود سفه ولا رد كمل طريقة لكن يوسف استلمه وياويله من لسانه صحراء في عينك الصحراء هذي إلي مستهين بها ذهب مغني السعودية كلها لو لاهي تلقاك صياد سمك في الخليج الحين
سيف لا اله إلا الله وش قلت أنا يا أبوي الحمد لله على النعمة خلاص روح مكتبك أبي اشتغل ورأي عرس ما اني أكل حرام و آكل أهلي
يوسف يازين طاري العرس على ذا الصبح متى ربي يكرمنا يا علي ؟
علي اسكت بس قسم بالله أمي لها أسبوع فوق راسي أتزوج و أتزوج وشف فلان اصغر منك متزوج وعنده عيال وأنت لسى هالمرة شكلها ما بتحل عن راسي إلا خاطب
سيف وش فيها ترى أحلى شي فترة الخطوبة حياة حلوه والزواج لابد منه وهو سنة الحياة
علي أحلى يا عريس كلك مفهوميه
يوسف أقول يا علي ما تحس مثلي إن سيف بعد ما خطب صار عاقل أكثر شكل الحرمة مسنعته
علي هههههههه يمكن إلا أكيد
سيف الله يهديكم بس
يوسف أمين يالله بروح أكمل شغلي سلام
سيف و علي وعليكم السلام ......


**************


جدة الساعة الـ 30 :12 مساء


طلعت هند من دورة المياه ( أكرمكم الله ) بعد ما توضأت لصلاة الظهر دخلت المكتب وفرشت سجادتها بتصلي كبرت و بدأت صلاتها بخشوع أول مرة تصلي برى البيت قريت الفاتحة وسورة المسد كبرت لركوع بركوعها جأت وحده من الموظفات فرشت سجادتها وركعت معها و كملوا صلاتهم مع بعض بين ركوع وسجود وصلت هند لجلست التشهد الأخير سلمت على يمينها و شمالها وجلسة بمكانها تستغفر ربها لفت على وجه إلي صلت معها وابتسمت لها ..
هند تقبل الله
الموظفة منا ومنك يأرب جديدة هنا ؟
هند اليوم أول يوم لي
الموظفة وإن شاء الله أعجبك المكان
هند يعني أول يوم صعب تحكمين من أولها
الموظفة معك حق معك رؤى لي هنا تقريبا سنه
هند تشرفنا وأنا هند ماشاء الله سنه أكيد عندك خبره بتعلم منك
رؤى يعني مو كثير وأنا جاهزة في أي وقت ولا يهمك
هند تسلمين والله
رؤى خلاص قومي نتغداء و احكيك عن كل شي من اول يوم لي هنا حتى اليوم
هند يلا بسم الله ....
***********


الخبر
الساعة الـ 7:00 مساء


في احد شوارع الخبر الرئيسة يمشي بسيارته ما هو عارف وين يروح سعود من جاء من الدوام نام وتركه لوحده وماله خلق يروح البيت حتى سيف اتصل عليه واعتذر منه انه رايح يشوف امور القاعة مع اهله سمع صوت المسج وابتسم وهو يفتحه (( أسفه الغالي كنت نايمه لما دقيت توي صحيت )) يا حبي لها يا ناس فتح كتابة الرسايل وكتب لها (( نوم العوافي يا قلبي اقدر اسمع صوتك الحين )) ثواني وكان الرد واصله (( أكيد حبيبي دق الحين )) وقف سيارته قدام البحر وضغط على زر الاتصال بعد رنتين بس جاه صوتها الهادي إلي تعود عليه يوسف وصار يعشقه لحد الجنون ..
ساره الوو
يوسف هلا والله حيا الله الصوت
ساره بس الصوت ؟
يوسف هههههه الصوت من غير راعيته ما نبيه شخبارك يا قلبي ؟
ساره بخير والله أنت شخبارك ؟
يوسف بخير دامك بخير حبيبتي عسى ما أزعجتك وأنتي نايمه ؟
ساره لا أصلا مصمت الجوال ما توقعتك تدق العصر غريبة ما نمت ؟
يوسف لا والله ما جاني نوم ولا لقيت احد اطلع معه دقيت لك وكمان مارديتي وشوفيني من ساعتين أدور بشوارع الخبر والحين موقف قدام جسر البحرين شكلي بكمل واخذلي لفه بالمنامة لين 10 وارجع
ساره والله بس روح وشوف كان ما زعلت منك ولا عاد كلمتك
يوسف هههه نفسي اعرف ليش تكرهوني بالبحرين أنتي من جهة و سعود من جهة
ساره لنا نحبك ونبي مصلحتك
يوسف يعني أنا جاهل ولا اعرف مصلحتي ؟
ساره لا يا قلب ساره أنت رجال والنعم فيك بس نتكلم بصراحة أنت مستعد تحرق نفسك قدام إخوانك وتنسيهم المشاكل بدون ما تفكر بنفسك يوسف وحقها عليك تضل تراكم على قلبك لين ما عاد تعرف وش تبي إلا انك تنسى وعشان تنسى بتسوي أي شي لو غلط بس المهم انك تنسى وخلاص
يوسف أنتي متأكدة انك من الخبر ؟
ساره هههههه إيه وش دخل ألان هالسؤال ؟
يوسف شاك انك من جدة وأخت سعود الدب أسلوبكم في الإقناع واحد
ساره هههههههه لا والله من الخبر ولا عندي اخو اسمه سعود إلا على طارية وينه عنك اليوم
يوسف نايم من جاء من الدوام كان مواصل أمس
ساره اهاا قول كذا عشان كذا داق علي من بدري وسال عني
يوسف افهم إن هذي غيرة سوير
ساره هههههه لا تقول سوير يادب بعدين أنا واثقة من غلاتي عندك صحيح هو يشاركني كل شي بس يالله أنا سامحه له بمزاجي
يوسف ساره بطلبك طلب ولا ترديني
ساره اممم اذا غير الشوفة أمر
يوسف لا الشوفة خلاص حفظنا ردك شي غير
ساره تأمر يوسف إلي تبيه
يوسف بحط لك هدية بمحل الهدايا وخذيها شي بسيط مني أبيك تذكريني فيه
ساره يوسف وش براسك ؟
يوسف خليها ليومها وأقولك المهم تروحين تأخذينها يوم الأربعاء الليل اتفقنا
ساره زين لكن توعدني تقولي وش براسك
يوسف وعد يالله سوير بخليك الحين بروح أتعشى وأروح الشقة أنام
ساره اوكيه انتبه لنفسك
يوسف وأنتي بعد يالله فمان الله حبيبتي ..
*************


جدة
الساعة الـ 8:30 مساء


تمدت على فراشها بعد ما صلت العشاء اليوم مارجعت نامت الظهر عشان كذا تحس بصداع بيفجر رأسها سمعت الباب يدق بخاطرها اللهم اجعله خير
أم محمد ادخل
دخلت أم نواف و بيدها كاسة حليب تفضلي خالتي شفتك ما تعشيتي زين و سويت لك الحليب تشربينه قبل تنامين
أخذته أم محمد ليش تعبتي نفسك يا بنيتي الحمد لله شبعانه
أم نواف والله عيني عليك يا خالتي على السفرة ما كلتي شي
أم محمد الحمد لله إلا فهد و البنات ناموا ؟
أم نواف فهد راح غرفته يذاكر والبنات منال نامت من ساعة وهند توي نازله من عندها صلت و بتنام
أم محمد إلا ما قالت لك كيف شغلها عسى ارتاحت فيه ؟
أم نواف إيه تقول تعرفت على وحده معها لها سنه تشتغل وتقول طمأنتها
أم محمد الحمد لله عسى الله يكتب لها الخير فيه يأرب
أم نواف أمين يأرب ما ترتاح عيني لين أشوف هالبنت في بيت رجلها و أشوف عيالها حولها
أم محمد إن شاء الله بتشوفين عيالها وعيال إخوانها وقولي يأرب
أم نواف يأرب
أم محمد بس عسى ما قلتي لها عن إلي صار اليوم ؟
أم نواف لا يا خالتي هند ما هي ناقصة و الحمد لله إنها ما كانت فيه اليوم ......
**************

الجزء السابع



الثلاثاء
الخبر
الساعة إل 4:00 عصرا


طالعين من الدوام إحساسهم اليوم مختلف لا تعب و لا إرهاق و لا ملل يوسف تفكيره كله وش الهدية الي بيختارها لساره بكرة و سعود و هواء جده و شوقها يسري بجسمه بحرها و شوارعها و حتى زحمتها اشتاق لها جده غير بكل شي تسع سنوات له بالشرقية ما بين دراسة و عمل لكن ما نسته جده و أهلها تنهد من قلب وربي مشتاااااق لجده
يوسف ههههه قول مشتاق لامك يا النون عادي بفهمك
سعود هههههه إيه شوقي لها اكبر من شوقي لجده حرام يعني
يوسف الله يحفظها لك و يعوضني يأرب
سعود ما في أم إلا تحب عيالها وتخاف عليهم من الهواء الطاير بس يمكن أمك ما عرفت تحسسكم بحبها بسبة مشاكلها مع أبوك
يوسف يا شيخ أي حب وأي هباب أنام عندك بشقة ليالي ما تدري عني ولا تسال كان زين عرفت رقم جوالي فكنا بس ترى مزاجي رايق اليوم ولا أبي أعكره بشي
سعود غريب وش الي مروقك ؟
قالها يوسف بمزحه بفتك من وجهك ثلاث أيام شلون ما تبيني أروق
سعود ههههههههه اجل كذا إلا والله أنا الي برتاح منك و من حنتك على راسي
يوسف تكفى بس عاد لأرحت ماهو تنساني طمني عنك
سعود إن شاء الله بابا
يوسف هههههههههه بابا في عينك
سعود إلا ما قلت لي وش الي باسطك اليوم كذا بجد عاد ؟
يوسف كان بخاطره يقول ساره لكن ما كان يبي سعود يزعل فتذكر شغله مستأنس منها أكثر تعرف اختي الكبيرة محجوزة لولد عمتي من فترة وأمس كلمني يقول بعد رمضان يبي العرس باقي الثانية بس و محمد كلمت له واحد اعرفه قالي مرة اعتبر أوراقه جاهزة بس جيب لي شهادته لتخرج و ما يهمك بالباقي وساعتها عاد بتفرغ لنفسي
سعود أخبار حلوه والله وبتفرغ لنفسك بالعرس إن شاء الله
يوسف لا شي أهم
سعود وش الي أهم من العرس عندك خابرك مستقطع عليه ؟
يوسف وهو يوقف قدام المطعم بتعرفه بوقته لا تهتم أنت انزل بس جب لنا غداء و جب لي بيبسي معك
سعود ابشر دقائق بس.....


************


جده
الساعة إل 6:30 مساء
صلت صلاة المغرب و تمددت على سجادتها اليوم ثاني يوم دوام لها لكنه كان متعب أكثر من أمس أربع حالات تشرف عليها هند كانت اغرب حالة شافتها لبنت لسى ورده بشبابها عمرها 25 سنه ما رحمتها الدنيا سكر و ضغط و النهاية جلطة شلت حركتها الدنيا حقيرة لمن تشوف شخص يعجز عن ابسط الحركات اليومية البسيطة يعجز عن الأكل و البس وحتى قضاء الحاجة لوحده ( أكرمكم الله ) حمدت ربها على نعمته عليها وشكرته على فضله قامت ولفت سجادتها و حطتها بالصندوق ونزلت تحت تساعد أمها وتشوف جدتها اليوم الصبح حست أنها ما هي طبيعية و مخبيه عنها شي لكن ما هو على هند يا أم محمد جايتك و صلت عند باب غرفتها دقته وسمعت صوتها المبحوح و الواثق مع كل حرف تقوله جدتها تحس بثقتها بربها و بنفسها و قوتها و الي تعودت عليها من صغرها سلام يا نور البيت
أم محمد و عليكم السلام هلا يمه تعالي
كانت أم محمد جالسة على سجادتها و ماده رجولها الجلسة ذي تحبها هند تعودت كل ما حست بتعب و ضيق من الدنيا تحط رأسها على فخذ جدتها و هي تمسح على رأسها و تخفف عنها بحكمة الحرمة الكبيرة الي شافت من الدنيا أكثر من مما تتوقع هند.. حطت رأسها على رجولها و تمددت بجنب جدتها شخبار رجولك اليوم جدتي ؟
أم محمد لا الحمد لله بعد ما صرت البس الشربات خفت شوي علي
هند إيه الحمد لله
أم محمد هاا طمنيني كيف شغلك عسى مرتاحة فيه بس ؟
هند لا الحمد لله زين ما عليه
أم محمد الحمد لله يا بنيتي
هند إيه يا أم محمد ما تبين تقولين لي ؟
أم محمد وش أقولك يا يمه ؟
هند الي مخبينه عني ؟
أم محمد و الي بدت ترتبك ما اني مخبيه عنك شي يمه
هند علينا يا أم محمد غمزاتك أنتي و أمي من أمس ما راحت عن بالي و حاسة إنكم مخبين عني شي قولي بس قولي
أم محمد لا يمه هو ما في شي يستأهل
هند اهاا يعني فيه شي قولي و أنا اعرف اذا يستأهل و إلا لا ؟
أم محمد و الله يا بنيتي أنا بقولك لكن لا تزعلين وتحطين بخاطرك إحنا ما أنا متأكدين
هند متأكدين من شو ؟
أم محمد أمس الضحى دق على تلفون البيت واحد و قال انتم كم تبون في البيت ؟
تعدلت هند بجلستها أي بيت ؟
أم محمد هذا البيت يا يمه لكن أمك قالت له ما نبي نبيعه قال يمكن هو غلطان بالرقم
هند سبحانك لا اله إلا أنت أي غلطان و هو داق على البيت تلقين أبوي حاط البيت عند واحد من مكاتب العقار و ناسين السعر الي حدده لهم ودقوا يسالون
تكلمت أم محمد بحكمه يا يمه أبوك صح غائب عقله و لا يدري وش يسوي لكن ورآه وحده داهية ما راح تحط رقمنا عند مكتب العقار بتحط رقمها هي عشان تبيعه من غير حنا ما ندري بشي اذكري الله و إن شاء الله انه واحد غلطان زي ما قال
هند و الله مدري يا جده ما امن هالانسانة ابد
أم محمد قولي يأرب و خليها عليه أهم شي إخوانك لا يدرون تعرفين نواف و فهد ما بقى على اختباراتهم شي و قومي يمه هوني على قلب أمك تراها ما ارتاحت من أمس
هند إن شاء الله جدتي ....


*****************


الأربعاء
مطار الملك فهد بالشرقية


الساعة إل 1:00فجرا


يوسف يالله سعود خلصت لك الأوراق كلها بعد نص ساعة بتطير الطيارة

يتبع ,,,,,

👇👇👇
تعليقات
    حجم الخط
    +
    16
    -
    تباعد السطور
    +
    2
    -