رواية مجموعة مشاعر -11
ظهرت بدور منيه , بدت الحلقه النقاشيه مناك . .
مهره : تدرون إنه أخوي وقع في الغرام ..؟؟
سلامه : أنا لا أدري يا إبنة عمي , و لكني أدري أنه أختي إيضاً وقعت في الغرام .!
موزه تضحك : أقوولكم أبلات العربي , ترى نحن ما نفهم . .
هند : لا و الله صدق , أحس جييه بعد . .
اليازيه : دودي تحب عمير و عمير يحبها صح ..؟؟
نزلت أم راشد و أم حارب . .
أم حارب : و منوه يحب منوه ..؟؟
موزه تغير السالفه : نقول عموه لين متى عمير بيتم عزابي .!
في المطبخ كانت بدور تصخن الماي و تشوف الأكواب وين حطوهن . .
دخل عمير . . كان يرمس في الفون هب منتبه لحد و سار جدا الثلاجه . .
عمير : أحمدوه لا طفربي أقولك أحبها تقولي روح قولها , هاي زين منها تسوي لي سالفه , ياخي بنت عمي و أعرفها . .
بدور تمنت الأرض تنفج و تبلعها , جان تتنحنح . .
عمير صد و أنتبه لها , أنحرج . .
عمير : يوم أقول إنه ما إيي وراك إلا المشاكل .! , يلا مع السلامه . .
بدور أنشغلت أونها تغسل الأكواب و جيه ما تبى تتجابل وياه فيس تو فيس . .
عمير فج الثلاجه , و أونه ما صار شي . .
عمير : لو سمحتي بنت العم وين الكوفي ..؟؟
بدور : تبى ..؟؟
عمير : هيه ..
بدور تشل الماي من ع الظو . . : خلاص أنا مسويه حق الكل ..
عمير : بتوفرين عليه , شكراً . .
بدور صبت الماي الحار في الدله , و حطت الأكواب في الصينيه و شلتها . .
عمير شل الدله . .
عمير : بروحج يابسه .! , وين ترومين تشلين صينيه شكبرها و و دله لترين.!
بدور ما علقت , و أبتسمت . .
طبعاً في البيت , الكل كان محتشر و يرمسون عن بدور و عمير . .
يوم دخلت بدور و وراها عمير الكل صخ وديه وحده و ضحكوا وديه وحده .!
حطت بدور الصينيه , و عمير حط الدله . .
بدور : و شو اللي يضحك ..؟؟
هند : لا أبداً و لا شي , بس لنه كنا نرمس عنكم و دشيتوا مره وحده .!
شمسه : من متى أخونا نفاع و يشل دلال .!
سلامه : ناس و ناس يا شميس .!
مهره : لاا , فديته أخويه و الله دووم يساعدني عادي و يشل و يحط . .
أم حارب و أم راشد يتصاصرن . .
بدور كانت تحط النسكافيه في الأكواب و تحاول تكون طبيعيه . .
عمير : ليش أحس إنه وراكم شي . . !
شمسه ضحكت . .
عمير : العيايز يتصاصرن , شعندكم.!
أم حارب : عمير , ما تخيل .! , الحينه نحن عيايز .! , عيز حيلك صبي .!
أم راشد :وايه لهله منه صبي , منو المقروده اللي بيطيح في جبدها .!
مهره بخبث : هيه , المقرودات وايد صح بنات العم ..؟؟. .
تموا يضحكون . .
عمير ينش و ييلس حذال شمسوه و يزخها و يتم يقرصها و يقرقرطها . .
شمسه تضحك و تصيح : ريرو و الله دخيلك , بس و الله آسفه , توووبه , و الله توبه. .
عمير : قولي شو كنتوا بتقولون ..؟؟ , و ليش ضحكتوا . .
شمسه تتفجج منه بس ما تروم : و الله بخبرك و الله , بس فجني أول بادي . .
بدور نشت , سارت أونها بتيب شكر . .
عمير : يلا قولي . .
شمسه عقب ما فجها : ماشي , بس كنا نقول إنكم إنته و دودي تيلقون ع بعض و إنك تحبها , و ضحكنا يوم شفناكم دخلتوا ضربه .! , كنتوا وايد لايقين ع بعض .!
عمير يطالع أمه بأستغراب : و الله إنكم هب هينات .!
أم حارب : ها أبويه , شو الشور ..؟؟
عمير يشل كوب من صينيه و يْجبل جدا الباب .. : ماشي شور .!
مهره : ما قلت لكم , عمير هب مستعد لأي شي . .
أم راشد : ياغير أحسن حطيناه جدام الأمر الواقع . .
اليازيه شهقت : وين دودي .؟؟
هند : نشت , قبل لا ترمس شمسوه . .
يت بدور و جنها ما سمعت شي و لا عرفت شي . .
أم حارب : عيل يلا بنصلي العصر . .
موزه : عموه , ع فكره أنا يوعانه .!
أم راشد : يا السنيقيه .! , أتريي الحين الجدر يصخ ع الضو بتتهيرين لا تحاتين .!
موزه ضحكت , كل وحده شلت كوبها و أنفض المولد . .
فوق , كانت موزه و شمسه في حجره , مهره في حجره بروحها , بدور و هند في حجره , سلامة و اليازيه بروحهن . .
الشباب ( عمير , فيصل , حارب ) , يعابلون ويا عمهم و يشوفون البناشيات و كل الأشيا . .
في جهة ثانية كانت العايلة مجتمعه بعد صلاة العصر . .
سيف و العايله كلها متيمعه في الصالة . .
سيف : ما أدري أمي , إسأليها بروحج .!
أم سيف : و شقايل أسألها بروحي .! , البنت أكيد بتخيل , و إنته أول بادي إنشدها خلاف رمستنا نحن الحريم . .
سيف : أميه , تونا بنكمل أسبوع و بقولها متى العرس .! , لا , لا هاي سوالف حريم . .
فاطمه : صدق أمي , نحن بنسأل جان ما بتسألين . .
حصه : لا تسألون و لا شي , حرمته و يتفاهم وياها . .
سيف يزخ المخده ..: حصوه بتنفرين بالمخده .!
بوسيف : هيه صدقها بنتي حصه , هو بروحها يتنشدها خلاف نحن نرمس . .
حميد : إنزين سواف شو المشكله , إسألها . .!
سيف بيأس : إنزين , بنسأل , أفف منكم .!
حصه : هيه , هندوه خذت أخونا و نستنا .!
فاطمه : يبالنا نسير عندهم خلاف .!
سيف يطالع بنص عين : وين بتسيرين .؟ , أخوانها و عيال عمها كلهم هناك .!
حصه تقول لفاطمه بصوت واطي : و ها المطلوب , لبدنا نطيح ع حارب .!
فاطمه تقرصها : يا الهرمه , لبده الريال ما يذكر شيفنا .!
بو سيف : سواف , خلهن يسيرن , جيه هن بييلسن يتقهويون وياهم .!
أم سيف :وايه ع منكر ها الصبي أنا .!
حميد يضحك : قولوا إلا ما يباهن يسيرن عند حرمته و يلعبن براسها .!
حصه : هيه ثرها جيه السالفه ..
سيف : ناقصنك أنا بعد .!
شوي إلا صوت مريمي بشكارتهم . .
مريمي : مافي مسكل , تعالي داخل , مافي حد غريب , مافي يستحي إنتي الحينه باباه سيف وايف .!
هند تبى مريمي تفج إيدها : مريمي , الله يرضا عليج , نادي حصه , قوليها هند تحت . .
مريمي تسحبها , هند صدت ع يسارها و شافت عمرها واقف في الصاله و الكل صاد جداها .!
هند أرتبكت , و أختصبت . .
مريمي تأشر عليهم : سوف , مافي حد جديد .! , كلو نفر قديم هند يعرف .!
أم سيف حست بربكة هند : مرحبا , مرحبا الساع , توه ما نور البيت , أقربي أميه , أقربي محد غريب. .
هند موخيه راسها : النور نورج عموه . .
و أتجدمت و حبت عمتها ع راسها و حبت عمها ع راسه . .
هند : شحالك عمي ..؟؟
بو سيف : بخير يسرج الحال , إنتي شحالج..؟؟
هند : الحمد لله بخير يسرك الحال عمي . .
و تسير جدا حصه و فاطمه , وايهتهن . .
هند توايه حصه و تصاصرها : من الصبح أتصل , حلو الموقف السخيف الحين .!
حصه : عادي , إنتي الحين وحده منا و فينا . .
هند : قلت بيي , لا تقول حصوه خذت أخونا و نستنا . .
حصه : فديت قلبج . .
فاطمه : ها كله موايه .!
و تصد جدا فاطمه و توايها . .
هند : لا يطوفج , حروب بلوك يديد , و الله ما بترقدين الليله . .
فاطمه شرقت : لا تقل لي , لكن دعني أرى .!
يلست هند حذال هند بين حصه و فاطمه , حميد رن فونه و ظهر . .
سيف كان ساكت , و يمثل دور الإنسان الهادي .!
حصه أنطلقت , و أم سيف كذلك . . بو سيف ظهر يشوف بو راشد و سيف كان منمدج ع الآخر في شغله ع اللاب و ما حس إنه أم نشت و محد تم غير فطامي و هند و حصوه يسولفن . .
حصه : شوفي , ها الحال ما يتغير , و إن ما كان اللاب كان الفون , ما يخلص شغله . .
هند : و هامل عمره , شوفي شقايل مبين إنه تعبان . .
فاطمه : أمسات في المستشفى , هو تعبان , حاطين له مغذي و ما يدري بعمره , يهاذي بج .!
حصه تضحك : هييه , أقوولج يقول لي أحبها , يبولي هند . .
هند بين ضحك و حيا : أوونه ..؟؟
حصه : و الله . .
فاطمه : وييه , لا سمعنا و نحن نتصاصر . .
سيف شل عينه من ع اللاب : أووه , جنه محد تم غيري .!
حصه : جنه .!
سيف يسكر اللاب . . : عيل بسير أطالعهم خاري . .
رن فون هند ..
هند : ألووه , هلا دودي , الحين بيي خلاص ..
حصه :ويين ..؟؟
هند : دودي , تقول بتسوي بثيثه , و تباني أيي أدلج السح وياها . .
حصه تنش : قومي بنوصلج . .
فاطمه تسحبها : أقولج , سيري شوفي عيالج , و خليها تسير سواف خاري . .
حصه فهمت و غمزت لهند : لو ما كان برع أتصلي بي بييج . .
فاطمه : ع فكره , أمي سارت عند أمج و شلت دلالها و سامنها و سارن ع النقا . .
حصه : يلا , عيل بسير ألبس الصغاريه و بنسير . .
ظهرت هند عنهن . .
كان سيف خاري , راكب ع البانشي , بينطلق . .
سيف أنتبه لها : وينه موترج العجيب الغناه ..؟؟
هند : ما ييت فيه , ييت ع ريولي . .
سيف : أركبي عيل , بوصلج . .
هند : لا , سيف من متى ما ركبت دراجه . .
سيف : يلا , يلا تعالي عن البزا . .
هند : تتجدم و هي زايغه , سيف بس هب تسرع , أدريبك ..
سيف : إنتي أركبي أول شي . .
هند تركب وراه . .
سيف : أتقبضي عدل ها . .
هند : أوكيه . .
و أنطلق .
.
. . ( . . مجموعة مشاعر . . ) . .! *
(. . الجزء الحادي عشر . .)
هند كانت خايفه بس كانت مستانسه لنها تحب تركب دراجات و ها السوالف , كانت دوم يوم تسير البر تركب و ما تقر . .
سيف : خايفه ..؟؟
هند : لا , ليش أخاف دامك ويايه ..؟؟
سيف سكت , اللي تقوله هند وايد عليه . .
وصلت لين جدام باب الفله مالهم . .
سيف : هندووه . .
هند بنتزل : لبيه ..
سيف : شوفي , اليوم أميه سألتني , قالت لي أسأل حرمتك متى تبى العرس . .
هند فاجأها السؤال : ما أدري , إنته متى تباه ..؟؟ و نزلت من وراه . .
سيف : أنا أسألج و إنتي تردين تسأليني ..؟؟ , أنا شدراني بسوالف الحريم .! , كانوا يطرون زهاب و ما أعرف شوه .! , عاد إنتي شوفي شو اللي يناسبج . .
هند ضحكت : ما أعرف .!
سيف يبتسم : تقولين , ها الناس بلاهم مستعيلين .! , بعدهم ما سوو حفلة الملجه و يسألون متى العرس .!
هند : أمك خايفه لا تغير إنته رايك , من جيه قالت لك إسألني . .
سيف : هيه أغير رايي .! , الحين أبويه أنا علقت .! ما أروم أتفجج . .!
هند أونها عصبت : ما سمعت .! , تتفجج .! , بشووه رابطنك أنا الشيخ سيف .!
سيف إبتسم : فديت اللي عصبوا , خلاص سحبت كلامي ..
هند : لا , لا , الحينه أنا ما تروم تتفجج مني .! , زين بسيطه . .
سيف : هنووده , حبيبي خلاص سحبت كلامي . .
هند : سواف , بس لااه , تحسسني إني ياهل .!
سيف : ها يزايه الحينه أبزيج .! , المهم الحين شو أقول حق أمي ..؟؟
هند تضحك : خلاص أنا سحبت كلامي , قول حق أمك ترمس أميه و هن يخبزون الموضوع بروحهم . .
سيف : أميه تقول تبى تقفض كل شي قبل لا أسافر الأسبوع الياي , و هي لمحت حق حصوه إنها تبى تسوي العرس في الصيف عشان مطر يكون موجود و حصوه تكون بعد ردت. .
هند : خلاص عيل , أنا ما أعرف في ها السوالف . .
سيف يرد يشغل البانشي : عيل أنا بنطلق الحينه . .
هند : سيف , عادي أركب بانشي ..؟؟
سيف أستغرب من سؤالها : هيه أركبي , بس ليش تسألين ..!
هند : اميه تقول لا تشكين خيط في إبره قبل لا تقولين حق ريلج , قلت يمكن ما ترضى أركب بانشي .!
سيف : لا عادي فديتج , إركبي , بس أتحملي ع عمرج . .
هند : و إنته بعد , لا تم تترايس وياهم . .
سيف ضحك : لا الحين باخذ لفة ع البانشي خلاف دور الموتر , بس لا تحاتين بتحمل ع عمري . .
و راح . .
من راح ظهرن البنات . .
بدور : حشى يا هندووه , ما بغيتي تخلصين ويا ريلج , طفرنا و نحن نتريا نبى نظهر . .
هند : أنزين وين أمي و شمسوه ..؟؟
موزه : أمي و أمج و عمتج سارن النقا , و دودي و مهاري في المطبخ ما أدري شو يعابلن و شمسوه عقت بعمرها عقه ع الشبريه و رقدت و حروب و عمير و فصوول أخويه و أبويه ساروا بعد . .
هند : عيل أنا بسير أشوفهن . .
بدور يايه : خلاص خلصنا , سايرين جدا الكراج بناخذ لنا دراجات نبى نفرفش . .
حصه تزاعج من بيعد و هي ع الدراجه : نحن يينا . .
و من وصلت , سلامات و سالفه . .
مهره : وين عيالج ..؟؟
حصه : وديتهم عند أمي ويا بشكارتهم . .
بدور : ماشاء الله , حصوه ناويه بعد تيبين ..؟؟
حصه : لا , لا الحمد لله يكفي , آخر ثنينه مشيبين لي راسي ..
فاطمه : وويه , سواف و هندووه , لا تطرينهم . .
حصه : عاد هندوه و شطانتها , و لا دلوعة خالها , من تسوي شي تسير تنخش عنده تدريبه بيداري عليها . .
مهره : هيه , لازم , ع إسم الغالية كيف ما بيدلعها .. . !
فاطمه : هييه , عليج النوور . .
هند : بس , بس بدينا , خلونا نسير . .
اليازيه : أوونها إستحت . .
هند سارت تشغل بانشيها , و لحقنها يزوي و بدور و مهره . .
سلامه ما عندها جرأة تركب بروحها , ركبت ورى مهره . .
ظهرن بخبالهن , ( مثل أي بنات في البر .!) . .
كانو الشباب ويا بعض , شويه يسولفون , شويه يترايسون . .
أما البنات فكانن معلنات حالة خبال تام .!
هند : أقولكم بنات , شي عرب هناك , ما بنسير جداهم . .
مهره : هيه , أقوولكم , خلنا نسير بعيد عن العرب . .
كانت شلة بنات بعد ويا بعض . .
أتلاقوا ويا بعض . .
هند تصرخ : ودووووم . .
وديمة صدت , جدا الصوت . .
هند يت حذالها ..
وديمة : هندووه . .
و ين البنات ورى هند . .
هند توايهت وياها . .
وديمة : عيل وين شمووس ..؟؟
مهره : ربيعتج أبويه خامده , ما طاعت تنش . .
وديمة تضحك : إنتوا وين مخيمين ..؟؟
مهره : منيه , مزرعتنا هاذيج اللي هناك . .
وديمة : عيل بنسير جداكم ..
هند : هيه , عقب المغرب تعالوا صوبنا , أكم أميه و عموه فوق الحدب . .
وديمة : خلاص تم نتلاقى ع خير . .
و ردت كل وحده ركبت دراجتها , و أنطلقوا مره ثانيه . .
لعبن لعبتهن , و يوم بدت الدينا تظلم , سان جدا أمهاتهن . .
أم حارب : بسكم , يلا , أذن المغرب . .
هند : أوونه , ما وحلنا نخترش ع أصول .! . .
أم سيف : هيه , الدنيا شتا , ما يوحيلج تصلين العصر إلا أذن المغرب . .
اليازيه : عيل بنرد البانشيات و بنرد نصلي هنيه . .
أم راشد : هيه صلن ع التراب , خلنه يشهد لكن يوم القيامه . .
و ردن , كل وحده و أتمسحن و أتلاقن عشان يركبن النقا . .
فاطمه : لا تقولين اللي لابس كاب أحمر حارب .!
مهره تقرصها : خيبه يا فطووم شقايل لقطيه .!
فاطمه : مهرووه , أخوج غدا ريال .! , و الله ما عرفته .! , بس لأنه ولد عمج يبن عليه صغير و أخوج ينعرف من لوكه . .
مهره : أسكتي عنا , نحن رواحنا ما عرفناه , أول مره نشوفه جيه , دومه بالكندوره و لا بالبدله الرسميه ما قدر شفناه بلوك سبورت .! . .
فاطمه تضحك . .
مهره : تدرين , مي أتصلت بي , تقولي اليوم غيث ما داوم , و أمره خطف جدامي واحد , جنه هو .! , لكني أستبعدت ها الفكره , لنه بو حمد ما ظني راعي ها السوالف . .!
فاطمه : ليش ..؟؟ , وحليله بعده صغير يمكن هو . .
مهره : لا , لا ما ظني . .
فاطمه : برايج . .
و ركبن يصلن ..
تقريباً الدينا بدت تظلم , شمسه بعدها راقده . .
ع الجهة الثانيه . .
وديمة : عمي وين ساير ..؟؟
غيث : عمي .! , ودوم شو وراج , هب بالعاده تحشمين و تقولين عمي .! . .
وديمة : ها يزايه الحينه , أنزين ربيعاتي هناك , ع هاك الحدب تشوف وين الليتات , أباك توديني عندهن . .
غيث أستغرب : إنتي منو تعرفين هناك..؟؟
وديمة : إنته منو تعرف عشان أخبرك ..؟؟
غيث : أعرف عمير . .
وديمة : أيوا , عمير صقر , أنا أعرف خواته . .
غيث : خواته .!
وديمة : حبيبي , غيث , ليش تسأل ها الكثر ..؟؟ , شمسه أخته الصغيره خويتي . .
غيث : أنزين يلا أخطفي جدامي . .
مشت وديمة وياه . .
وديمة : أقوول بو حمد . .
غيث : قولي . .
وديمة : شحالها حبيبة عيالك ماما مهره ..؟؟
غيث : زينه . . إلا تعالي , هاذيج اللي لابسه نظاره راي بان عاكس و بنيه , و متلثمه بشيلتها و وقفتي تسولفين وياها منوه ..؟؟
وديمة : هاي , أخت ربيعتي العوده ليش تسأل ..؟؟
غيث : لا , بس مجرد فضول , يعني شكلها كان غير من بدهن و مألوفه لي . .
وديمة تجمع معلومات في مخها و صرخت وديه وحده . .: فهمتها . .
غيث : بلاج تباغمين ..؟؟
وديمة : سوالف شمسوه عن مدير أختها مهره و عياله , عيالك و موال ماما مهره مافي شراتها , سؤال عن أخت شمسوه , و البنت اللي عموه عليا تقول إنها طر و ما فيها حيله و السالفه اللي سمعتها و إنته ترمس خليفة ربيعك , يقول إنه مهره هي وحده .! , مهره هي أخت شموس هي نفسها اللي يحبها عمي غيث , هيه مهره صقر مافي غيرها . .!
غيث منصدم : حووه , شو ها الإستنتاجات .! , لا تمين تفسرين ع هواج .!
وديمة : عيل عطني تفسير واحد لأهتمامك فيها و شي يقنع , ما في غير إنك تحبها . . !
غيث ما عرف شو يقول لها , و في نفس الوقت طفر من معاير خليفه له و قرر يقول لوديمة بعد ع سره الباتع .!
وديمة : بلاك صخيت ..؟؟ , يلا إعترف و لا بسوي دعايا في العايله كلها . .
غيث : لا , لا دخيلج ما فينا , بقولج بس وعد ما تخبرين حد ..
وديمة : و حياتك يا عمي , دق في لوح .!
غيث : ما أعرف , أنا أستلطفها , قمت أحس إنها إنسانه غير عن الملسونه اللي لسانها ذراعين في الدوام , يعني صارت شخصيتها تعيبني , و يوم كانوا عيالي عندها حسيت إني مرتاح يوم هم وياها أكثر من وجودهم الحين عند عليوه أختي , هذا كل شي . .
وديمة : و أخيراً صرت صريح , ياخي أخطبها و فكنا , و لا تنسى إنك ما تصبر عنها و لا جان ما رديتها بعد . .
غيث : إنتي وايد مستعيله , بس بعد , أحس لو ما طاعت تداوم كانت بتكون مشكله كبيره , أتعودت عليها و ع صدعتها ما أقدر أشتغل إلا بعد هذرتها .! , لكن كل شي في وقته حلو . .
وديمة توقف لنه قربوا من المكان : الموضوع ما يتأجل , ياخي أسمع قلبك لو مره وحده , عيالك أكم يكبرون و إنته بعد تكبر وياهم , أرتاح و ريحهم .. و اليوم لازم ترمس يدوه في السالفه . .
غيث يضربها ع راسها : و قمتي تعطيني نصايح يا الفصه .! , بس تدرين , شورج و هداية الله , أصلاً عليوه رمستني في ها السالفه . .
و يخطف عنها . .
وديمة : حووه , أقوولك , غيييث , أترياني . .
البنات يالسات ع حصير بعيد عن حصير أمهاتهن . .
هند : أسمع حس .!
يزوي : أمييه , شوا أكم شي ثنينه يايين جدانا . .
مهره : أصبرن , بلاكن هبيتن وديه وحده . .
أتقربوا الإثنين . .
وديمة : هووووود . .
غيث : حووه , خفي حسج . .
وديمة تتقرب من البنات : يلا , فارج لو سمحت , و يوم بتخلص خبرني , هب تخليني في السيح و تسير..
غيث يطالعها بنص عين : هيه , الحين فارج , حسابج بعدين . .
وديمة تيلس ..: مشكووور عمي , ما تقصر . .
هند : حووه , ودووم منو هاا..؟؟
وديمة : عمي , دلوع يدوه , آخر العنقود من عمامي . .
بدور : وحليله , شقايل تقوليه فارج .؟!
وديمة : عادي , لا تحاتين , عادي بيني و بين غيث بس ست أو سبع سنين , هو شرا ربيعي , ما أقوله حتى عمي إلا نادراً . .
مهره ساكته و تقول في خاطرها : وراي , وراي ها الغيث .! . .
وديمة : مهرووه , عمي مديرج صح ..؟؟
مهره : يمكن , ما أدري . .
وديمة تضحك : هو خبرني عنج . .
مهره أستغربت ..: و شو قال ..؟؟
وديمة تضحك : كل خير , لا تحاتين , وينها شموس بعدها راقده ..؟؟
مهره : هيه , نشي قومي بنسير نوعيها . .
وديمة : يلا . .
و نشن . .
من راحن بعيد ..
وديمة : غيث قال إنج ملسونه و لسانج ذراعين .!
مهره : ها .!
وديمة : و قال بعد ( قالت له كل شي قاله غيث حرفياً) . .
مهره تمت صاخه . .
وديمة : أنا وعدته ما أخبر , بس ما رمت أقبض لساني و ما أخبرج . .
مهره أبتسمت بحيا : ما أظن شعوري يختلف وايد عن شعوره . .
وديمة تضحك : إصبري , أطري إيلسي شويه , بقولج بعد شي . .
مهره يلست . .
في ها الوقت , شمسه توها ناشه و متسبحه و بتدخل المطبخ و تغني ( إياك تلحقني , مخطوبه , مخطوبه بن عمي يعشقني و الغيره أسلوبه ) , يوم دخلت ما أتوقعت تحصل حد داخل , بس للأسف كان راشد داخل , كان يدور جبريت . .
يوم شافها انصدم و صد عنها ع طول و طاحت عينه ع الجبريت و ياي بيظهر . . شمسه بسرعه عدلت شيلتها . . و تمت واقفه عند الباب . .
شمسه : ممكن نرمس شويه ..؟؟
راشد ما رد عليها و خطف عنها . .
شمسه تمشي وراه ..: هيّد بن عمي . .
و وقفت جدامه . .
شمسه : إنزين أصبر أرمسك أنا . .
راشد : شمسه من الآخر شو تبين ..؟؟
شمسه : أول شي , حرام اللي تسويه بعمرك , و الله أنا ما أستاهل ها كله منك , ثانياً ( نزلت راسها ) أنا آسفة و الله ما كان قصدي , أنا بس كنت متلخبطه و ما أعرف شو أبى ما أبى , و ما أعرف بعد .!
راشد : أنزين و المطلوب الحينه .!
شمسه : لا تسافر و إنته شال في خاطرك مني .! , أنا صدق ها المره بقول اللي في خاطري و إنته ع هواك , قولي هاي ما تخيل مافيها مذهب , المهم , أنا أباك مثل ما إنته تباني و قلت حق أمي اليوم . .
راشد : لا تسوين شي إنتي هب مقتنعه فيه , هذا مصيرج لا تقررين بها السرعه خذي وقتج . .
راشد قال ها الكلام و مشى , كان هب مقتنع فيه , بس يداري كبريائه . .
شمسه أنفجرت صياح , صدق كانت كل دمعه من خاطرها . .
راشد أستوقفه صوت صياحها و رد ريوس جداها . .
كسرت خاطره , شكلها صدق متلومه فيه . .
راشد نزل لها . . : شمسه , أميه نشي لا تصيحين جيه ...
شمسه تصيح : ما أبى , إنته طفرت مني , بتخليني إنته الحينه ما تباني . .
راشد أتعاطف وياها ..: شمووس , يلا نشي من ع الأرض , لا تمين جيه تصيحين جنج ياهل . . يلا قومي . .
شمسه بعدها تصيح و خاشه ويها بإيديها . .
راشد : شمسه , حبيبتي بس عاده , لا تصيحين , أنا ما بودرج , و لو ما أباج جان ما خطبتج من الأساس , كل شي في خاطريه جداج بيتم مثل ما هو ما يقصر بس يزيد , قومي عاد , لا تمين جيه تصيحين , قطعتي قلبي . .
شمسه هدت شويه و هي تمسح دموعها ..: و الله ما قد صحت ها الكثر من أتوفى أبويه . .
راشد يبى يغير عليها جو ..: الله , ها الكثر أنا غالي . .
شمسه تصد ما تبى تشوفه : و أكثر . .
راشد : نشي , نشي عن الأرض . . ( و ناولها كلنكس ) : مشي دموعج يلا . .
شمسه خذته و مشت دموعها . .
نش راشد و نشت هي . .
راشد : شو تسوين هنيه و كلهم فوق النقا ..؟؟
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك