رواية مجموعة مشاعر -10
اليوم الأربعاء , الكل يالس في الصاله . . و حالياً ليل في حدود الساعه 8:30 . .
مهره و بدور يتصاصرون و هند يالسه ع زاويه , حارب يبدل ع قنوات الأخبار و أم حارب تشرب قهوتها . .
عمير : أميه , شو رايكم نسير البر ..؟؟
أم حارب : بر .! , عديبي من سنين ما سرت البر . .
عمير : ممم , أميه سألت عمي و قال هم بعد يبون يسيرون و بنسير ضربه باجر . .
حارب : عثره , باجر .! , إنزين خبرنا قبل , خل الواحد يرتب أموره . .
عمير : عمي قالي اليوم , بيسير المزرعه و ترى المزرعه في بر . .
بدور تقول لمهره : أقص إيدي لو ما كان أخوج يتصوخ علينا البارحه . .
مهره تقرصها : و ليش هب عايبنج..؟؟ , أنا أول مره في حياتي أشوف أخوي يسوي سالفه حق وحده من بنات العايله و لا تستهبل عليه و يضحك .!
بدور : دخلتي المواضيع كلها في بعض , منو طرى كل ها السوالف . .
عمير : شو الراي ..؟؟
هند : زين براحتكم . . و نشت . .
مهره : هيه , هيه , نبى نركب ع البانشيات و نبى نسهر ع الظو , كوول كلنا في خاطرنا نسير صح دودي ..؟؟
بدور منحرجه : نو بروبلم , و نشت ..: بشووف هند . .
عمير : ها أمييه ..؟؟
أم حارب : خلاص تم عيل يا ولد بطني , باجر باجر . .
عمير رن فونه و ظهر خاري. .
هند و بدور في الحديقه . .
بدور : بلاج ..؟؟ , شو فيج من كم يوم ..؟؟
هند : سيف , من يومين ما أتصل . .
بدور : و إنتي ما أتصلتي به ..؟
هند : ها , لاء . .
بدور : شووه .! , و ليش ما أتصلتي به ..؟؟
هند : ما أدري . .
بدور : إنتي صاحيه ..؟؟ , هندوه , لا تضيعينه و هو بين إيديج . .
هند : بس أنا . .
بدور تقاطعها : هندوه , سيف يحبج , يبغيج و شارنج , يتصل تكلمينه بكلمتين و تسكرين جنج تبين الفكه .! , ما تتصلين يطرش مسجات تردين بالمفيد .! , وين تبين ..؟؟ ها يزاه لنه قرر يفتح صفحه يديده في الحياة و يخليج إنتي عنوانها .!
هند : دودي , ليش تدمعين ؟؟
بدور تضم ريلها لصدرها و تنزل راسها و تدمع ..: كنت نفسج , عازه نفسي ع الريال , كان زين و طيب بس أنا كنت متردده و خايفه و أقول لا خله هو يبادر خله هو يسوي , و آخر شي .. هو وين الحين ..؟؟ , عنده بيت حرمه و عيال و أنا تميت في نفس المكان و لا حد يباني , يدورون فيني بصل بصل يا بصل منو يشتريك . . !
هند : دوودي , شو ها الرمسه ..؟؟ , لا تقولين عن عمرج جيه . .
بدور تضحك بسخريه : هندوه خلج واقعيه , أنا أبوي بزنس مان , و الكل يعرف هو شو سوابكم , و هو مخلينا ع راحتنا و ع كيف كيفنا , عندي سياره و كنت أروح جامعه مختلطه و شبه موجوده في دبي مع أهل أمي , أنخطبت ملجت عقب قال الريال ما يباني لني ما أناسبه , يعني مطلقه الناس شو بيفهمونها ..؟؟ , إني كنت ياهل عمري عشرين ..؟؟ , بعدني في الجامعه و أبغي أعيش مثل أي بنت في عمري و مستواي الإجتماعي..؟؟ , لا فديتج بيقولون هاي بنت هب زينه و فيها و فيها . . و الدليل إني من فجو ملجتي محد من فينا حد أتجدم لها إلا يزوي كانت محيره من قبل . .
هند أستغربت , أول مره بدور ترمس بها الأسلوب وياها , أو حتى تصيح . .
بدور تكمل : لا تخسرينه , دخيلج هندوه الحياة فرصه و لا تضيعينه , نشي , روحي أتصلي فيه و قوليله إنج تحاتينه و زغتي عليه , الرياييل يبحون الحرمه اللي تحبهم و تداري عليهم خليه القهوة و كوني الفنيال.! , لميه بإحساسج و لا تنثرينه. .
هند : أنزين , نشي برد برع . .
بدور تمسح دموعها و تبتسم : ما عليه شر , إنتي سيري , بسرعه . .
نشت هند و هي ما تدري , ليش ها كله يصير الحين لها .!
بدور تمت يالسه و تشوف جدام . . حست حد ياها و يلس حذالها ع الكرسي . .
بدور يوم صدت أستغربت , شو ها الوقح ..؟؟ , بس ما كان لها بارض ترده و تتهازب وياه . .
عمير : ممكن أقولج شي ..؟؟
بدور بدون نفس : قول . .
عمير : إذا ما تبين بسير عادي . . و ياي بينش . .
بدور لا شعورياً : لا , لا وين ساير قول . . بدور حست ع عمرها , و صخت . .
عمير ضحك لنه عرف إنها قالتها بعفويه و ما كانت تقصد شي . .
عمير : تدرين , أنا توني كنت ظاهر من البيت أكلم جولي , أكيد بتقولين شو ها الوقح , و لا يرمس وحده شو أسوي به .! , بس جولي هاي وحده أكبر بتقريباً سبع سنين , هي يارتي , أنا ما أحبها , بس أحب اللي بيني و بينها , إنسانه زينه و عايشه عشان عيالها , نحن ربع , ما بينا حب بس ربع بينا علاقة صداقة حلوة , و لين اليوم هب قادر أتصور كيف إني ممكن لو أتضايجت و ما حصلت حد ما بتصل فيها و لا بقولها خلاص لازم ننهي صداقتنا , أنا أدري إني في مجتمع ما يتقبل ها الأشيا , عشان جيه , عموماً , خلينا من ها السالفه اللي ما أدري ليش أقولج إياها . .
بدور : خلاص قلتها , لا تفكر فيها الحين . .
عمير كان طول الوقت يشوف جدام و هي بعد . .
عمير : تدرين , كبرتي عن آخر مره طريتي فيها راسي . . يوم شفتج يوم رديت أستغربت كيف كبرتي , و الظاهر إنج كبرتي بس شكل , بس قلبج بعده عنيد , و مخج بعده يستوعب بعد الهنا بسنه .!
بدور ضحكت ..: و إنته شو اللي تغير فيك ..؟؟
عمير : ما أدري , بس يمكن قررت أستقر نفسياً و أصطلب , أتخيلي , مرت علي فتره الحينه من آخر مره رمست فيها بنات .! , غير جولي طبعاً . .
بدور : إنجاز .!
عمير : يمكن لني فكرت جدياً بوحده و قررت إني ما أتقدم لها لين ما أكون الإنسان المثالي . .
بدور أنصدمت و تقول في خاطرها . : وييه , ها كيف كبر .!
عمير يبتسم ..: المهم . .
بدور : المهم . .
عمير : ليش مستهونه في عمرج جيه ..؟؟ , أحسج وايد مصغره من حق عمرج .. صح إنفجت ملجتج , بس ما أظن هاي آخر الدنيا , ياما ناس صار لهم جيه بس قدروا يكملون حياتهم . .
بدور : سهل الكلام , هات لي اللي بيقبل بوضع جيه , من المستوى اللي أبويه يترياه . . ولد العرب البدوي بطن و ظهر .!
عمير : بيي اليوم اللي بييج الريال اللي يبا بدور , بدور بروحها , بقلبها بشخصيتها , بدور لأنها بدور هب عشان هي بدور بنت غانم أو أي شي ثاني . . سكت شويه . . بدور إنتي صدق غير عن كل البنات , صدقيني ع زود ما شفت بنات في حياتي إنتي من بدهن غير . .
بدور : و شو الغير فيني ..؟
عمير : قلبج أبيض , طيبه , و إنتي في الفئه القليله اللي من طبقتنا لا لج خص في علوم الشباب و لا في منكر بنات اليوم , تحبين الكل , و تحاولين تصلحين المواضيع و تناصحين جنج فوزه الدريع .! , ربشه ما تحبين الكآبه و تسوين جو في كل مكان تسيرينه . .
بدور : و إنته شدراك بها كله ..؟؟
عمير : هب مهم كيف عرفت , المهم إني أعرف . .
بدور سكتت , أول مره تتكلم مع حد من الأهل بها الأسلوب أو يكونون رواحهم , دايماً تتحاشى السوالف اللي تكون فيها وياهم روحها , لكن مع العايله عادي , و أول مره في حياتها تحس إنه عمير إنسان مختلف تماماً عن اللي فلعته بحصاه من كم سنه . .!
عمير : و بس , شكلي وايد رمست , و وايد قلت أشيا , بس المهم لازم تعرفين بيي اليوم اللي بييج الريال اللي يبا بدور لأنها بدور و بس , و آسف لني تدخلت في خصوصياتج , أو في اللي ما يعنيني , يلا تصبحين ع خير . .
بدور سكتت أصلاً سرحت , و يوم لاحظ إنها سرحت قام و راح داخل . .
فوق , وصلت العلوم حق شمسه , و شمسه قالت خير , و هند خبرت موزه إنها شمسه شكلها ما بتي , و موزه متصله بشمسه ..
شمسه ..: أنزين , بيي , بيي لا تحنين , بس سؤال , راشد بيي ..؟؟
موزه كانت يالسه ويا خواتها و راشد و فيصل : ها , ليش ..؟؟
شمسه بصوت خفيف ..: أبى أشوفه , أبغي أكلمه , المهم لازم يكون موجود . .
موزه : خير , خير بنت العم , بنترياج شمسووه , نحن بنغبش و بنتلاقى هناك , لا تحاتين , بييب كل شي ويايه ما بنسى الطشه .! , إنتي ع قولتهم حطي في ماعدتج بطيخه صيفي .. يلا تصبحين ع خير . .
و سكرت طوالي . .
شمسه أبتسمت ..
وديمة : ها شو شحلاتج و إنتي تبتسمين . .
شمسه : و أخييراً , عرفت أنا شو أباه من الأساس . .
موزه تسحب فيصل بعيد ..
فيصل : ها , بلاج ..؟؟
موزه : شوف بتقنع رشود إيي باجر , شمسوه تباه ما أدري شو تبى المهم خله إيي . .
فيصل : من الصبح أحايله هب طايع , إبليس راكب راسه . .
موزه تشوف ظل حد خاطف .. و تعلي حسها : عمووه حالفه , ما بتبات لو راشد و أمي قالت ما بتخلينا نبات لو مايا ويانا , دخيلك فصوول , دخييلك قووله . .
فيصل فهمها ..: خير , خير ماي سس بقووله . .
.
. . ( . . مجموعة مشاعر . . ) . .! *
(. . الجزء العاشر . .)
هند ما رقدت , تمت تشوف فونها طول الليل , على عكس بدور اللي حطت راسها ع المخده و رقدت بعد رحلة تفكير طويلة , شمسة و وديمة رقدن بعد ما خلصن شغلهن لنهن بيردن بوظبي ضربه , في حين إنه عمير كان طول الليل يكلم جولي و يشرحلها كل شي في خاطره , حارب كان تعبان عنثر الشغل و رقد , راشد رقد بعد حنة فيصل و مواز و بعد ما وعدهم أول ما يخلص شغل بييهم , طلت الشمس و الساعه الحين 9:30 . .
هند : أميييه , كل شي جاهز . .
شمسه : هيه أنا بعد أتجهزت . .
مهره : شو بتسوون باللي بيطوفكم ..؟؟
شمسه : ماشي , قردنا وحده نعرفها , دهنا سيرها و قلنا بنعطيها رصيد و بندفع عنها البترول أسبوع و قالت بتخبرنا بكل شي . .
بدور : ليش خويتج اللي وياج وين ..؟؟
شمسه : بعد بيسيرون مزرعتهم , تقول أبوها و عمها ماخذين مزرعه جريب في ليوا من جريب و مشتغلين فيها و معدلينها و جيه و الحين كلهم بيسيرون فما رامت تردهم . .
بدور : زين , زين , و الله في خاطري أشووف حصوه و فطامي . .
مهره : هيه , بعد بسيرون مزرعتهم , بس كانت مستعيله ما عطتني تفاصيل . .
شمسه : هندووه , لا أسكت لكِ الله حساً .!
هند : ها , لا لا وياكم بس شويه سرحت . .
و نشت طوالي . .
حارب دخل : يلا , يلا أزقروا أميه , قوم عمي جربوا و بنتلاقى وياهم ع الخط يلا دهديه أنقفضن ..
حارب لاحظ إنهن كلهن يطالعنه . .
حارب : في شي ..؟؟
مهره و البنات ينشن لا يغيظ عليهن ..
مهره : لا , لا و لا شي بس محلو زياده عن اللزوم بها اللوك .!
سارن يلبسن عبيهن و حولن . . ع الدري . .
شمسه : و الله لو شافته فطامي بتتخبل .!
مهره تقرصها : هيه و الله صدقج , لازم لو كانت مزرعتهم جريبه نيمعهم في موقف ..
شمسه : ما عليج , أم سيف لو عرفت إنه هنيه , لازم بتقول تبى تشوفه . .
هند دشت عرض في نقاشهم : وينه عمير ..؟؟
مهره : في سيارته . .
لسن و نزلن . .
أم حارب : قفظتن كل قشيراتكم ..؟؟
مهره : هيه أمايه , كل شي . .
أم حارب : يلا عيل . .
مهره : أقولج , هندوه , بتسيرين ويا عمير ..؟؟
هند : هيه . .
أم حارب : أقوولج , أستعيلي سوما لا يغيظ أخوج ..
مهره : يلا أمييه ..
شمسه : تعالي , دودي , نحن بنسير ويا عمير . .
بدور فجت عينها : أنزين , يلا . .
و ظهرن هي و هند و شمسه , بعد ما سون الإجراءات الأمنيه اللي وصت عليها أم حارب ( تأكدوا قفلوا كل البيبان , بندوا كل الليتات و كل شي يشتغل ما عادا الثلاجات , خلوا الكنديشنات ع التايمر) تأكدوا ما نسوا شي , و ظهرن . .
هند ركبت جدام طبعاً , شمسه ورى عمير و بدور ورى هند . .
الكل ساكت , و كل وحده مندمجه ف البلاك بيري مالها و ماشي غير صوت المسجل . .
وصلوا عن شيشة البترول . .
صبوا بترول , عمير سأل بس لا مجيب , أتجدم جدا الباركن و دح بريك . . !
هند : بسم الله , بلاك ..!!
شمسه : خضيت جبدي , شو فيك ..؟؟
عمير : لاحظوا إني سألت لين ما بح صوتي و أنا أقول تبون شي من الواحه ..؟؟
هند : لو سمحت , كابجينو ممزور شكر و أي نوع كافي . .
بدور : و أنا وياها . .
شمسه : أنا بحول بروحي وياك , أشوف وايد ملاح في الشيشة . .
عمير ضحك و نزل و نزلت شمسه . .
بدور : رد عليج ..؟؟
هند : لاء , تقول حصوه إنهم كانوا فالمستشفى , ياه هبوط وديه وحده . .
بدور : أوونه , قوولي و الله . . !
هند : و الله , يوم قلت لها ليش ما كلمني قالت إنها نشدته ما رد عليها . .
بدور : شفتي , معناته الريال شال في خاطره منج . . هندوه لا تستوين غبية و من نوصل سألي وينه و سيري له . .
هند : أنا أصلاً ما بسير له و بس , في أشيا في خاطري لازم أفجرها .!
بدور يايه بترد , ركبت شمسه السياره . .
هند : ها , شو يبتي ..؟؟
عمير يفج الباب و يناولها الكوب : اتفضلي الشيخه . .
هند : مشكور ..
شمسه : أتخيلوا شو صار ..؟؟
هند : شو صار ..؟؟
شمسه : شي وحده سخيفه تغازل أخونا . .!
هند : ما يبتي شي يديد , مزيون أخونا . .
شمسه : لا فديتج اليديد إنه أخونا عطاها نظره , ياخي يبسها في مكانها .!
هند تصد : أوونه , شمسووه شو أستوى ..؟؟
عمير : ما صار شي , بس أختج تبالغ , شمسووه , أسكتي لا تنضربين .!
شمسه تكمل : أقوولج قالت له الحلو ما فيسنا .! , قالها الحلوين ما يطالعون سبلان .!
الكل ضحك . .
بدور : أقوولج , ممكن نعرف شو يبتي لنا ..؟؟
شمسه : جنج ما خليتيني أكمل .!
بدور تضحك : ما يحتاي نعرف الباجي , المهم عرفنا إنه أخوج حرقها .!
شمسه : ها ..!!
بدور : شوفي ويهه , شويه و بيذبحج .! , أسكتي لا ينزلنا من السياره .!
شمسه تشوفه , عمير أبتسم و ما علق , بس طول ع المسجل . .
شمسه : أتفضلي , أنتقي اللي تبينه . .
بدور : بن عمي . .
عمير ما سمع . .
هند تقرصه . . : بدور تكلمك . .
عمير يشوفها من المنظره : آمري بنت عمي ..؟؟
بدور : شو تبى من الخريطه قبل لا نتجاسمها ..؟؟
عمير يبتسم : ممم لو سمحتي الرد بول مالي و السنكرز . .
بدور تظهر الأشيا و تناوله . .
بدور : هندوه شو تبين ..؟؟
هند : الحينه هندوه شو تبين .!
بدور : بلا هذره شو تبين .!
هند : أني ثينق ..
بدور ناولتها أي كافي و فجت الرد بول الثاني و بدت تشرب . .
رن فونها معناته حد يرمسها في البي بي مسن . .
كانت هند و مواز . .
هند (miss sugar ) , مواز(vip mwazi) , بدور (hope adductor) , ( مدمن أمل) .!. .
miss sugar : شمعنى بديتي عمير علينا ..؟؟ , دودي بديت أشك في تصرفاتج .!
hope adductor : لا و الله , مجرد إحترام , يعني هو اللي دافع لازم نبديه , عيب بعد . .
miss sugar : هيه , هيه صدقت . .!
و فجت ع طول محادثة موزه . .
vip mwazi : شو الأجواء . . ؟؟؟
hope adductor : ترتبيشن , و إنتوا ..؟؟
vip mwazi : زين , أكيد زين , دامج ويا عمير , نحن فصول مغير الجو علينا . .
hope adductor : ريشو وياكم ...؟؟؟
vip mwazi : لاء , يقوول بيي عقب ما يخلص شغل . .
hope adductor : زين , زين . .
vip mwazi : دوودي , شو عمير ..؟؟ , شو حسيتيه في ها الأسبوع ..؟؟
hope adductor : لا تتنشدين , يبالنا عشر ساعات عشان أشرحلج كيف متغير .!
vip mwazi : يا سلام و الله , ليكون طحنا في شباك الغرام.! . .
hope adductor : يقولون .!
و تمن يسولفن , و شويه يتضاربن , و شويه تسولف ويا شمسه . . و كل حد في ديناه . .
وصلوا , كيف وصلوا و عمير ما يدل , المهم وصلوا .!
المزرعه في مكان بعيد تقريباً , و هي في النص , بين مزرعتين و وراها سيح خالي و جدامها مزرعتين بعد . . المزرعه في فله كبيرة , و طبعاً خيمة و كراجات و مسبح كبير , و مكان الزرع و زريبة صغيرونه فيها كم بقره و كم عنزه و كم غنمه .!
أول الواصلين طبعاً , حارب و أبو غانم , بعدهم طوالي فيصل و خواته و آخر الواصلين عمير .! . .
نزلن البنات و نزلن أشياءهن و خلن الثجيل لعمير . .
بنات و أتلاقن , لا تتنشدون شو بيصير .!
الفله كانت أشبه بقصر , تصميمها فخم نوعاً ما , صالة دائرية كبيرة مقسمة كذا قسم , و دري كبير من اليمين و اليسار , و مقسمه أجنحة , قسم بعيد شوي و قسمين كبار حذال بعض , و بما إنه مهره كانت أول البنات وصولاً , خذت لفة سريعة و أختارت أحسن مكان , و خلته حق البنات , و حطت أشياءها في أصغر حجره اللي فيها شبريه وحده . .
و يوم وصلوا , كل كم وحده أختارت حجره ويا خويتها و يلسن . .
هند تتصل ب حصه . .
حصه : هلا . .
هند : أهلين , وينكم ..؟؟
حصه : جريب , الحينه شويه و بنلف جدا الفارم .!
هند : منو يايبنكم ..؟؟
حصه تصاصرها : سواف . .
هند : إنتوا في أي مربع ..؟؟
حصه عطتها التفاصيل . .
هند : أوونه , إنتوا حذالنا عيل , أنا بيي الحين , أمج وين ..؟؟
حصه : وصلوا قبلنا . .
هند : نتلاقى عيل باي . .
و سكرت . .
نزلت , كل حد مشغول في حاله . . شافت عمها خاري يعابل ويا واحد من العمال . .
هند : عمي , حميتي هنيه , في المزرعه اللي مجابلتنا , بسير لها . .
غانم بخبث : حميتج ها , و شقايل بتسيرن إلها ..؟؟
هند إستحت : ع ريولي عمي , بعد بشو بسير لها ..!!
غانم يضحك عليها .. : إنزين شوفي ها الموتر الغاوي , هو دراجه لكن ع شكل موتر . .
هند بأستغرب : و شقايل يسوقونه . . !
غانم يشرح لها , كان بسيط ما يباله شي . .
ركبت هند , و ع طول سارت جدا مزرعة أهل ريلها . .
كان جدام المزرعه ناطور , بس ما أنتبه لها يوم دخلت , كانت مزرعة أهل سيف شوي غير عن مزرعتهم , لنه الباركنات بعيدة شوية عن البيت الرئيسي , و شير و دنيا . . من لمحت فتك سيف و حست إنه هو فيها , بندت الشي العجيب اللي تسوقه و نزلت , كانت تمشي بثقه , و في نفس الوقت حست إنه الشي اللي تسويه وايد غبي و سخيف .! , شافته يالس يجلب في تيلفونه , ركبت و هو ما صد . .
سيف ما حس من زود ما كان مندمج , هند تحط إيدها ع الفون . . سيف رفع راسه و سبعين ألف علامة تعجب على ملامحه.!
هند قبل لا يقول أي شي إهتدت عليه : إنته عاقل و لا مينون .! , فهمني , كيف تترقد في المستشفى و أنا آخر من يعلم .! أتصل بك ما ترد .! , خبلتني , خليتني أستخف , ما ردقت من زود ما أحاتيك .! , تفهم شو يعني إني خفت .! قلت ليكون أستوابه شي , أوكيه أتصلبي طمني .! قولي إنته بخير , رد ع مسجاتي , ما تحقرني .! , يعني أنا صدق غلطت أول شي بس خذني ع قد قلبي و لا تسوي جيه .! , هند حست إنها أنفعلت و هو يتأملها و لا قال أي شي .!
هند بعدها منفعله : سييييف , رد لا تم جيه تشووف , أنا دمي ما فار إلا تبخر .!
سيف أبتسم إبتسامة حنونه : هند , ليش جيه معصبه ..؟؟ , حبيبتي هدي أعصابج . .
هند : إييه ع ها الريال اللي بيرفع لي ضغتي .! , يا إبن الناس , تقولي ليش معصبه , و هدي أعصابج .! , إنته أتخيل , بس أتخيل , يومين لا أتصلت و لا شي , أوكيه , أنا غلطانه , أنا ما أتصلت أنا كنت مقصره أدري , بس يوم بتصل بك رد عليه لا تخليني ع أعصابي . .
سيف يكمل محاولاته لأستفزازها .. : و ليش ها الموال كله .! , تدرين كنت مشغول بعدين تعبت , ليش ها الكثر مهتمه .!
هند تاخذ نفس عميق و ترفع عينها في عينه و تتكلم بهدوء و شويه و بتصيح ..: ها الموال كله لني خايفه عليك , لنك ريلي , لني أطالع الله ثم أطالعك مهتمه أكيد مهتمه , لني ببساطه أحبك . . ( فجتها مناحه ) . .
سيف وصل للي يبغيه , و زخ إيدها و هي تصيح .. : هند حبيبتي , خلاص , خلاص فديتج لا تصيحين . .
هند ترفع راسها و تشوفه و هو يبتسم ..: شو اللي يضحك..؟؟ , أنا أصيح و إنته تضحك .!
سيف :ماشي , بس حد قالج إنج أحلى يوم يغدي خشمج أحمر .! , جنج ياهل و شالين لعبتها .!
هند ما رامت تزخ عمرها و ضحكت ..: يا برود قلبك . . !
سيف يمسح دموعها : هيه , جيه أباج , دووم أبتسمي , لا تحرميني من ها الإبتسامه . .
هند : لا تدهن سيري . .!
سيف : ما أدري منو اللي مفروض يزعل .! و يصد الصوب الثاني . .
هند : لا , لا خلاص , سحبت كلامي . .
سيف يضحك ..
هند تلقط خريطة الأدوية من تحت ..
سيف : هندووه , خلي عنج . .
هند تشوف الأدوية : ما شاء الله فقر دم , حبوب حديد .!
سيف : أنا كنت بعقهن .!
هند : لا حبيبي , بتاكلهن و غصبن عنك بعد .!
سيف يطالعها بنص عين ..
هند : هيه , شو تتحسب .! , عيل بخليك جيه .! , لا تحلم . .!
سيف : أنزين , أنزين , حاضر مولاتي .!
هند تضحك : أنا الحين بروح ..
سيف : وين ..؟؟
هند : يعني وين , بيتنا اطري مزرعتنا , ييت و خليت فوني , ييت جيه , حشى تقول خبله .!
سيف : تبيني أوصلج ..؟؟
هند : لا , ما يحتاي , عمي عطاني شي ما أدري يشبه الدراجه أيي فيه ..
سيف : زين , عيل , و يبند سيارته . .
نزل وياها . .
هند : يلا , الله الله بعمرك . .
و ركبت دراجتها و شخطت فيها . .
سيف : إنتي أييه , شوي شوي . .
هند سمعت و ضحكت , بس راحت . .
حميد أخو سيف و اصغر منه ب ثلاث سنين ..: سواف , منو ها المزيونه اللي نزلت من سيارتك ..؟؟
سيف فز من محله : عوذ بالله زيغتني . .
حميد : اللي ماخذه عقلك تتهنا به . .
سيف يدحه : حووه , حرمتي هاي .!
حميد : هييه , أنا أقول ليش بكل ثقه يت و دخلت .!
سيف : حميد , شو وراك ..؟؟
حميد : لا , اميه أسطبتك . .
سيف يمشي ويا حميد جدا البيت . .
دخل حميد قبل . .
حصه : سوااف , شو تسوي في السياره .!
حميد : الحبيب كان عنده موعد غرامي ويا حرمته .!
فاطمه توقف حذاله : هاا , و أنا أقول ليش بطى ..
حصه : عيل وينها هندوه ..؟؟
سيف ضحك عليهم و لا رد على أي حد و راح , بمعنى آخر طنشهم كلهم و راح . .
وصلت هند , و ركبت حجرتها بسرعه قبل لا أي حد يشوفها . .
بدور : بسم الله بلاج ..؟؟
هند تناهي : حد سأل عني ..؟؟
بدور : الكل بس قلت لهم إنج تدورين في المزرعه , حتى أبويه لحف عليج . .
هند : الحمد لله , عدت ع خير . .
بدور : بلاج , شكلج صايحه ..
هند قصت عليها كل شي ..
بدور تلوي عليها : برااافو بنت عمي , و أخيراً صرتي فطينه .!
هند : بس هو كان بارد , أدريبه سيف , يستفزج لين ما تقولين كل شي عندج . .
بدور : عيل قومي أتسبحي , العيايز تحت يشوفن الأشيا و جيه بيشكون . .
هند : خلاص تم . .
نزلت بدور , كان الكل يالس تحت إلا عمير . .
بدور : حارب , وين أميه و عموه ..؟؟
حارب : في المطبخ ويا البشاكير . .
سارت بدور جداهم , شافت إنه مافي شي تسويه , موزه كانت خاري و ظهرت وياها . .
لفن ورى البيت , جدا المكان الأخضر و هو بعيد عن الفله نفسها . .
موزه : الحيينه , تقولين لي كل شي عن عمير خبلتيبي , أبى أعرف. .
بدور : و شو تبيني أقولج عنه ..؟؟
موزه : كل شي , كل شي . .
بدور تقرصها : ها يا البريئه .!
موزه : يلا لاااه , عمير جنه أخويه العود . .
بدور : عيل ليش تتشدين ..؟؟
موزه : أشوفج إنتي اللي متكركبه . .
بدور تضحك : تدرين , عمير , إنسان يديد .!
موزه : كيف يعني ..؟؟
بدور : ما أدري , البارحه كنت أرمس هندوه , خلاف يبت لها طاري ريلي القبلي في سالفه , عقب ما نشت ياني و يلس ويايه , تم يرمس , أحس رمسته دخلت سويدا القلب , صدق ساعتها شو سبب دقات قلبي القويه كل ما أشوفه .!
موزه بأمل : و أخيييراً , قوليها , قوليها دودي . .
بدور تحط إيدها ع ويه موزه و تبعده عنها : بس لااا . .
موزه : و بعد ..؟؟
بدور : تعرفين الغرشه اللي فريته فيها ملعلمه لين الحين ..؟؟
موزه : أوونه . .
بدور : و الله , أتذكر يوم فريته , محد قاله ييلس يغايضني بهاي اللي يعرفها . .
موزه : و شو حسيتي به ..؟؟ , يبادلج نفس الشعور ..؟؟
بدور : أي شعور ..؟؟
موزه : إييه , الحين لا تستوين شريفة مكة اللي ما تدري بشي , فكينا و قولي تحبين عمير و خلاص . .
بدور : و إنتي شدراج .!
موزه : أنا و يزوي و سلامي يلسنا نحلل و نفسر تصرفاتج , كل شي يقول إنه بدور تحب عمير . .
بدور تسحب موزه : يوعانه , خلينا نرد أحسن . .
موزه سكتت , لنها تعرف يوم بدور ما تبى تقول شي تتهرب . .
دخلن البيت , و سارن جدا المطبخ , توها الناس مأذن العصر من وشويه . .
اليازيه : أقوولكم , أنا أبى حد يسووي لي كوفي . .
بدور : أنا بسير أسوي , منو يبا ..؟؟
مهره : أنا .
سلامه : و أنا . .
هند : حقنا كلنا بإختصار . .
ظهرت بدور منيه , بدت الحلقه النقاشيه مناك . .
مهره : تدرون إنه أخوي وقع في الغرام ..؟؟
سلامه : أنا لا أدري يا إبنة عمي , و لكني أدري أنه أختي إيضاً وقعت في الغرام .!
موزه تضحك : أقوولكم أبلات العربي , ترى نحن ما نفهم . .
يتبع ,,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك