رواية مجموعة مشاعر -4
في الطياره اللي سارحه جدا لندن , راشد عنده كم شغله يقضيهن و هند رقدت من التعب اللي فيها .
على البرد الثاني , سيف كان مشغول وايد و لميا مغيضه عليه و متحلفتله على اللي مسونه و زعلانه و ما ترمسه إلا في المفيد .
.
. . ( . . مجموعة مشاعر . . ) . .! *
(. . الجزء الرابع . .)
الساعه 10 المسا في بوظبي .
أم حارب : أمي مهره , سوي حق هند أشوفها بطت و ما أتصلت بنا .
مهره تلاعب حمد : أمي بلاج متواكله .؟ , هي قالت يوم بتوصل و بتستريح بتتصل بنا .
أم حارب : إنتي يا الهيزه ! , هب هامتنج ختج .؟ , أشوفج إلا هب مسوتلي سالفه .!
مهره تزخ الفون و تتصل بهند و حط ع السبيكر : ها أمي أسمعي , أكيه تقولج الهاتف الذي طلبته مغلق أو خارج الخدمة حالياً .!
أم حارب أستسلمت : إنزين و هاذيل أبوهم ما أتصل يتنشد عنهم .؟ جنه إلا يبى الفكه .
مهره : ما أدريبه , لبده يتصل الحينه .
أم حارب تلاعب حمده : وايه فديت الحلوة , باجر بنسير ناخذ لهم قشار .
مهره : الحمد لله قبضت المعاش قبل لا أتفنش .
أم حارب : أنا بتنشدج ها المعاش كل شهر وين تودينه .؟
مهره : ماشي و الله , أكثر عن النص يتم في البنك ما أصكه بس البترول و البهانس مني و مناك .
أم حارب : أشوى , أتحسبتج تصرفينه كله .!
مهره : لا , شو أتخبلت .! , أصلاً ما عندي شي أصرف عليه , بس إلا بزى بنات , و لا أنا هب في حايته حتى .
أم حارب : سيري رقديهم , أكم دهمانين , لا يرقدون على الغنفه .
مهره : إن شاء الله .
و شلتهم فوق , على كثر ما أتحاتي هند و راشد بس كانت بارده جدام أمها عشان ما تزيدها , و ما ظنت إنه حد بيزيد على قايمة المحاتاه غير عمير .
رقدتهم , و شويه إلا رن تيلفونها على يوم شافت الرقم إنتبهت إنه من برع , أتوقعتها هند فردت .
مهره : ألووه .
......: ألو , مهره .؟
مهره صخت بها الأرض , أتوهقت ما تدري شو تقول , منو ها اللي متصل ها الحزه و يزقرها بإسمها حاف .!
مهره : نعم , آمر أخويه .؟
..... : أوه الحمد لله , اتحسبت إني غلطت ظهرت حافظ رقمج , علومج مهره .؟ و شحالهم الصغاريه .؟ إن شاء الله ما تعبوج.؟
هنيه عرفت شو السالفه .
مهره : هيه , مرحبا أستاذ غيث , هيه بخير كلهم بخير .
غيث : شو ما طفروج و لا قذوج.؟
مهره : لا , لا أبداً فديتهم هادين و مأدبين مول ما يلعوزون .
غيث تنفس بعمق : و الله ما أدري شو أقولج يا مهره , و الله ها المعروف ما بنساه لج طول عمري .
مهره : لا , أفا عليك أستاذ كم لعزوناكم بطولة لسانا . إنته لا تحاتي أنا لو ما أقدر ع الشي ما بدز بويهي .
غيث : عيل وينهم حبايبي الصغار.؟
مهره : اليوم خلصوا , بدت عندهم إجازة نص السنه , و باجر بوديهم يلعبون . و الحينه من شويه رقدوا .
غيث : فديتهم والله , بس لا تكلفين على عمرج , و لا تبزينهم وايد , أخاف يختربون .!
مهره : لا , لا , ما يصير أوامر عليا عندي عشان أوديهم و ألعبهم .
غيث أستوعب : ليش ماشي دوام .؟ , و لا خذتي إجازه .
مهره ما حبت تغثه و تقوله طرت مني و فنشوني مناك : تقريباً و طويله بعد .
دخلت أم حارب .
أم حارب : منو هند .؟
مهره : لا أمايه , أستاذ غيث .
أم حارب : طاوليني التيلفون برمسه .
ناولتها التيلفون .
أم حارب يلست ترمسه و تدعيله بالخير و تشكره على اللي سواه عشان مهره و تقوله إن ها أبسط شي ممكن يسوونه له .
أم حارب و هي زاخه الفون توها مبنده : وحليله , شكله ريال خيِّر .
مهره كانت سرحانه: ها أمي سكرتي .؟
أم حارب : أقولج ريال خيِّر تقولين لي بندتي .؟ , صدق عانه الله ريلٍ بياخذج.!
مهره : أنزين , هو ريال خيِّر ما قلتي شي زود عن المعروف .
أم حارب : إلا و ليش طلق.؟
مهره : و الله ما أدري , شو بتنشده شعنه طلقت .؟! , و حتى لو تنشدته بصفتي شو أيلس أتنشد و أنبش في ماضيه.؟
أم حارب : حسه صغير و شكله هب عود وايد .
مهره : ظنتيه تسع و عشرين ثلاثين هب أكثر .
أم حارب : و الله إنه ريال خيِّر , قلبي يقولي إنه ولد حلال و فيه الخير .
مهره تضحك : شو ياي يخطب عندنا و أنا ما أدري .؟
أم حارب : خس الله عدوج , أنا أمدحه حتنه رمسني بالطيب و بالإحترام , و ما راغج من الدوام , و لا منو يصبر على عوافتج.؟
مهره أونها زعلت : أفا , الحينه أنا عوفه .؟ , بعدين لازم أكون عوفه و لا تبيني أضحك ويا اللي ساير و اللي ياي.!
أم حارب تضرب على جتفها : اشهد إنج ذيبه .! , عاشت بنت صقر .
مهره تضحك : من شابه أباه فما ظلم , إلا أمايه , شكلج مستانسه على غيث.
أم حارب : وحليله , راعي سوالف جيه ما أستانس عليه , و الله بدَّعاله من أفادي ربي يوفقه ب بنت الحلال اللي تسعده و تحن على عياله .
مهره : آمين .
أم حارب : جنها هَـ التومينه ظاهره من لب أفادج .!
مهره ما فهمت : كيف يعني من لب أفادي .؟
أم حارب : قولي آمين .
مهره : آمين .
أم حارب : الله يجعله من نصيبج .
مهره مبرجه عيونها اللي جنهن فناييل: شووو .؟ , أمي أكيد تمزحين .؟
أم حارب : و جيه أمزح .؟ , و الله إنه ريال زين و أمسات طرتلي إياه أم سيف أشهد إنه ريال و النعم , إلا هو وين بيلقى وحده تحب عياله و تداريهم , بعدين يا المكور , روحج تبينها من الله و لا شو اللي بيخليج تشلين عياله و تدحين صدرج عشان تساعدينه و لا شعنه من حد يقولج شي تسيرين له عشان يفزع عليج.؟
مهره ما تدري شو تقول : أمي فديتج شكلج دهمانه .
أم حارب : دهمانه حتني أقول الصدق , برايج لا تسوين لرمستيه سالفه و نشت عنها .
مهره تنسدح و ترد أمها تفر عليها التيلفون .
أم حارب : من تسوي لج هندوه زقريني ها .
مهره : من عيوني يا نور عيوني .
و ظهرت و صكت الباب وراها .
زخت مهره الفون تشوف كم تم من رصيدها بعد هَالمكالمه و شافت إنه سحب وايد , ردت تجلب في المكالمات المستلمه عشان تشوف كم رمست لنها شكلها تدفع وايد دام إنها بترمس هند و هو بعد بيتصل , شافت مدة المكالمة و ساعة الفون , و شقهت .
مهره تتحرطم إلا و رن التيلفون و شلته .
هند : عوذ بالله بلاج تتحرطمين .؟
مهره بعدها تحت تأثير السالفه : واعثرتيه , جان ريتي أنا و أمج نرمس ربع ساعه عن غيث و تقولي إن شاء الله تاخذينه (و قصت السالفه) , و آخر شي الريال كان على الخط , وافشلتااه , يا فضيحتيه .!
هند : هيّدي , هيّدي بلاج , ما صار إلا كل خير و بعدين زين إنه سمع على الأقل بتسيرين إنتي في حالج و بيصفالي الجو! .
مهره : يصفالج .؟ و جيه شمووس وين سارت .؟
هند : شمسووه حق راشد , و اللي ما يدري يدري عنهم الإثنين , ياخي قصة عشق من الصغر , هزرج يا الخديه رشود بيخليها , لو بيخليها جان ماتم لين الحين عزابي .
مهره : و أخيراً أختي أنفتح مخج , إلا تعالي , أهتديت عليج و لا قلت لج الحمد لله على السلامه .
هند تضحك : لو متأخره بس الله يسلمج.
مهره : شو سويتي شو ما سويتي.؟
هند : و الله ماشي من ركبت حطيت راسي على السيت رقدت و من الخاطر , رديت 7 سنين ورى يوم نسافر .
مهره : شو سرتي ع الفيرست كلاس.؟
هند : هيه , عيل شوه .؟
مهره : و شو المزايين في لندن .؟
هند : تعالي و أتنقي , و لا لاء شو تتنقين عندج غيث شو تبينهم بالمزايين هنيه يا مسودة الويه .!
مهره : شو أبابهم .؟ , هاذيل خليهم ع صوب و المزيون اللي وياج في صوب ثاني .
هند تضحك: راشد , هيه والله بس أتحملي , لو سمعتج شموس , لا تراويج نجوم الظهر .
مهره بخبث : ما أوصيج , احرقي أعصابها لين ما تعترف , و ببدا الشغل فيها .
هند تضحك بمكر : فديت أختي اللي في بالي , توها ع بالي الفكره , إن ما خليتها تعترف و تقولي أحبه , بس أصبري علي شويه , بطلع كل شي من عينها .
مهره : أنزين , أتوصي بها , إلا عمير ما سرتي جداه .؟
هند : لا والله , باجر من غبشه بسير جداه .
مهره : ع خير .
و بند الخط , ردت تتصل بس فونها مغلق , يعني خلص الجرج .
هند فرت الفون .
راشد : الحمد لله إنه بند , خليتن حد ما قرضتن فيه .؟
هند زاغت : بسم الله من متى إنته هنيه .؟
راشد : من قلتي ألووه ..
هند تضحك : يعني سمعت كل شي .
راشد : من دون قصد .
هند : راشد .
راشد : آمري .
هند : والله مشكور عـ...
قاطعها راشد : شووفي هندوه , و الله إن فجيتي ثمج بها الرمسه اللي مالها معنى مره ثانيه يويلج .
هند تبتسم : ما تقدر تكون شري .
راشد يبتسم لها : شفتي عاد , فديتني طيب.
هند : ما بقولك أفداك .! , أختي تفداك .!
و تنش تحط فونها في الجرج و تشغله : خييبه . في كم دقيقه 11 مسدكول .!
راشد : منو المهتم .؟
هند : شموووس . و رن فوونها .
شمسه مندفعه : ألووه , هلا هندووه , الحمد لله ع سلامتج شحالج .؟
هند تضحك : حبه حبه , أهلين و الله يسلمج و انا بخير , بلاج مندفعه .؟
شمسه : سرتي عند عمير .؟
هند : لا , باجر الصبح إن شاء الله .
شمسه : هندووه , صدق اللي مهروه تقوله.؟
هند : و شو تقوول مهروه , يا كثر اللي تقوله أختنا العوده .؟
شمسه : إنه شي مزايين وايد في لندن و إنه و إنه , ما عرفت كيف تكمل لها .
هند ضحكت في خاطرها و عرفت السالفه : إنه شو ..؟؟
شمسه : إنه , ياخي هندووه برووحج أفهمي ما أحيدج جيه طمه . .!
هند : هيه طمه , شو إنه و إنه ..؟؟
شمسه : يعني شي مزيونات وايد و جيه . .
هند أونها تستوعب : هيه , هيه عيل صدقها مهروه , لو شفتي الغراشيب , كل وحده تقول الزين عندي , اللي تبينه , الحمر و الصفر .
شمسه : و راشد .؟
هند : بلاه , زين .
شمسه : لا لا , أطري يعني .
هند تستغبى : شو ما أفهم ؟
شمسه : أووه هندووه , لا تغيضيني , عيونه وين .؟
هند ترفع ضغطها و تصد جدا راشد اللي شل سماعه من اللي فإذن هند و يلس يتصوخ : عيونه .؟ عيونه في راسه وين بعد.؟
شمسه : أوووه هندووه , يعني يطالع و جيه .؟
هند : هييييه قولي جيه من أول بادي , ممم إنتي لو شفتي اللي أتلقت لنا في المطار , مزيونه و تقوول نش يا القمر بيلس محلك .
شمسه مغتاظه : انزين , و بعدين .؟
هند : و شو بعدين , ما شي بس يوزع إبتسامات , أصلن كلهن يعرفنه , صديقات الدراسه و زميلات العمل , ها بس هني , خلينا نسير برلين , بيظهر كل شي ع أصول .
شمسه وصلت حدها : و أنا أقوول ليش غالق فوونه تراه مرتبش فيهن , زين يا بوسنيده .
هند : الحينه ها اللي متصله عشانه , نيال قلبه جانج تتوعدين و تهددين , يا ويلي ع اللي تغار .
شمسه : إنتي شو تخربطين .؟ شربتي شي من ييتي .؟
هند : إنتي اللي شاربه تيزاب .!
شمسه : تيزاب في عينج . و الله قلبج بارد.
هند : و تقوول أخربط شوفي عمرج كيف تتنشدين عنه و ميته .
شمسه : أقوولج , باجر عندي إمتحان بسير أرقد و يوم بتشوفين عمير و تتطميني عليه أتصليبي , مع السلامه .
و سكرت الخط على طول .
راشد : حرام عليج إنتي و أختج تشوهون سمعتي .
هند : الحين ها يزانا .؟ , هي دووم تأكلنا مقالب سخيفه , خلها تاكلها ها المره .
راشد : هيه , و أتطيح في راسي خلاف .
هند تضحك : الحينه نداري منوه و لا منوه ,.!
راشد سار بعيد : أقوول أرقدي , أرقدي شكلها أختج صادقه يوم قالت شاربه شي .
و ظهر عنها و هو يعرف شمسوه ما بتسكت و أكيد بترد بشي يقهره و ينرفزه أكثر .
راشد بطيعته راعي سوالف , مرح و الكل يموت عليه , شخصيته جذابه و دبلوماسي في كل ردوده , بس في نفس الوقت ما يحب وحده تتمادى وياه أو تاخذ سوالفهم منحنى غير الزمالة و الشغل , و هو من النوع اللي ما يقول اللي في خاطره بسهوله يعني كتوم من ناحية مشاعره لدرجه كبيره , و يوم يخيل يغير الموضوع طوالي .
مرت ها الليله غير على الكل .
مهره اللي بالها مشغول في كل شي , كيف بتم جيه في البيت بطاليه , و غيث و عياله , عمير و أمها و كل شي .
هند اللي مقهوره من سيف و مرتفع ضغطها منه , أمها و خواتها , و عمير أخوها و كيف بيصرفون أمورهم عقب ما أتفنشت مهروه .
شمسه اللي ما تدري الله وين فارنها و تمت طول الليل واعيه ما رقدت .
أم حارب اللي ما رقدت و هي تحاتي كل شي .
راشد اللي يفكر بشمسه و شو بتكون ردة فعلها و شو بتسوي بس أستانس لأنه يمكن يعرف هو شو بالنسبه لها .
سيف اليله تم في المكتب و ما رد البيت و يشتغل متلوم في هند بشكل .
أصبح الصبح في بوظبي قبل لندن .
مهره صبحت على أمها , و خبرتها باللي صار و خلاف ظهروا ويا الصغاريه .
دخلت لميا المكتب بتحط الملف حق سيف و شافته يالس على المكتب .
لميا مستغربه : شو .؟ إنته ما رحت من إمبارح .؟
سيف : هيه , يالس أتسلى .
لميا : ليه .؟ شو صاير .؟
سيف : أسير شو أسوي , عيوزي و شبيتيه مسافرين , حميد وفطيم وياهم , حصوه عند ريلها , أرد البيت منو أجابل .؟ , شيف البشاكير .!
لميا بعتاب : عشان تعرف شو أهمية المره بالبيت .
سيف قاطعها و بدون نفس : لميا و اللي يرحم والديج , هب متفيج للكلام اللي مالع داعي الحين , خلي أحمد يزهب عمره في شي مهم لازم نسير له في بيروت اليوم المسا , يعني على الظهر لازم نكون طايرين من بوظبي , أنا رايح و لمي ها الأوراق و طرشيهن معاه و قوليله رايحين و رادين شغلة 24 ساعه بس .
شل عمره و طلع من المكتب من دون لا يسوي لها أي سالفه .
لميا تلم الأوراق و هي تمتم : يخبرب بيتك يا هند شو علمتي فيه , إيه الصبي جن و صار مغروم .!
و راحت تسوي اللي قال عليه .
كانت الساعه في بوظبي جريبه من 11 الصبح و في لندن 8 الصبح .
هند لابسه و متوتره لنها بتسير عند عمير .
زقرها راشد فظهرت له .
راشد يالس على طاولة الطعام : ما تبين تتريقين.؟
هند أتذكرت إنها يوعانه و هب ماكله من كم يوم مثل الناس : هيه والله , يوعانه .
يلست تاكل و هو بعد كان يوعان . بعد الريوق نزلوا و و سرحوا جدا سبيتار .
سألوا وين عمير و ساروا جداه طوالي .
هند أول ما شافته ما رامت تزخ عمرها , دمعتها سبقتها يوم شافته و الوايرات في كل مكان , و ويه ملفلف و حالته ما تسر , قربت منه , همست له شوي و طلعت لأنها تعرف إنها ما بتتحمل تشوفه و هو جيه و سارت تيلس صوب مكان الإنتظار , راشد راح و كلم الدختر و تم يسأله و جيه .
هند و هي يالسه سمعت حس حرمه .
الحرمه : هندوه , سواف , حسبي الله على عدوكم , تعالوا لا تفضحوني , و يت و يلست على الكرسي حذال هند و يو اليهال الإثنينه يترابعون جداها و يلسوا حذالها .
صدت هند جدا الحرمه , و الحرمه صدت جداها .
هند : حصه .؟
حصه : هند .؟
تضاحكن و نشن يحضنن بعض و سالفه .
هند : دبه , أشتقت لج وايد .
حصه : و الله أنا أكثر , محلوه يا العوفه.!
هند تضحك بغصه : علومج.؟ , شو مسويه .؟ , شو العرس و العيال.؟
حصه تتنهد : علووم الخير والله , العرس زين لكن العيال يا شين حنتهم .
هند : ليش .؟ بعدج عن الدرزن وايد .!
حصه : لا حشى عليه بعد درزن .! يسد ها الفناعيص الأربعه بعد أييب غيرهم لا ما فيني.
هند : وحليلج , إلا شو تسوين هني .؟
حصه : و الله ماشي , ربيع بو مايد مرقد وياي يشوفه و سواف عنده موعد أسنان ويا الفنعوصه آخر العنقود .
هند : ذكريني بهم , مايد و وديمة و بعد منوه .؟
حصه : هند و سيف .
هند : نايس , ما خبرتيني سميتيها هند .
حصه : هو سمى أول بادي ع هواه , خلاف يوم يبت ها التوم الحلوين قالي سمي ع هواج , عاد ما عندي أغلى عنج و عن سواف فديته .
هند أتذكرت و ضاجت : إلا ما تدرين , أنا أشتغلت , أو بالأحرى أمج توسطت و شغلتني .
حصه : زين , زين , على الأقل تحللين الشهاده , هب أنا , فارتنها في الكبت , و وين أشتغلتي .؟
هند : في مكتب سيف أخوج , مكان الصبي اللي توفى .
حصه : أونه , ما خبرني سواف .
هند : ما ظني يعرف إني ربيعتج أو ما يحيد .
حصه : هندووه , إنتي شو تسوين هني .؟
هند لمت إيديها لبعض : آه يا حصوه , لو تدرين ....... [ خبرتها بالسالفه كلها ] .
حصه تتقرب لها و تحط إيدها ع جتف هند : فديت قلبج والله , ما تستاهلين هندوتي , الله كريم , إن شاء الله خير .
هند تمسح دموعها : حصوه , و الله ما رمت أشوفه , قلبي عورني عمير جيه صار .
حصه تبغي ترفع معنوياتها : و الله و قلبج غدا رهيف , ما أحيدج جيه , نسيتي يوم أتوفى محمد و كنتي تقويني .؟
هند : ما أدري , و الله أحس عمري ما فيا شده أبداً .
حصه تدحها : يلا , يلا , خير إن شاء الله خير إدعيله بس , والله أمج ما تستاهل .
هند : و ها اللي معور قلبي زود بس الله كريم .
راشد يا صوب هند .
راشد : يلا , هند .
نشت هند : يلا أشووفج جريب الغالية .
حصه : تعالي , منو ها .؟
هند : بعدج فضوليه .؟
حصه : لا بس أقول منو ها المزيون , ما أحيده يشابه حارب .!
هند : عقب , عقب .
و نشت عنها .
راشد : منو هاي .؟
هند : صديقة الطفوله فديتها .
راشد : تدرين , الدكتور قالي في أمل يتحسن أكثر , و هو بدا يتحسن بس لازم نكون كلنا حواليه و لازم ننقله مستشفى متخصص أكثر .
هند : الحمد لله , كيف الإجراءات الحين .؟
راشد : ما أدري , يبالها شغلة يومين و لو كنا محظوظين بنقدر نخلص اليوم الحين بوصلج البيت و برد أشوفهم .
هند : على خير , الله يسر لنا .
ردت هند الفندق و راشد راح , و اتصلت بأمها و طمنتها.
جدا حصه , كانت توها راده البيت و تشوف شو وراها ما وراها , إتذكرت إنها ما رمست سيف من فتره و قالت خلها تتصل به و تتغلس عليه شويه , شافت فونه مغلق و قالت بتشوفه خلاف .
في حدود الساعه 8 المسا في بوظبي .
شمسه يالسه متواكلة و ماكلة عمرها في السكن .
وديمة ربيعتها و وياها من زمان , من أيام الإعدادي و كلمة خوات شويه عليهن .
وديمة : شمسووه بلاج جيه .؟ مالج بارض على الشي اليوم زين ما كفختي البروفسور.
شمسه : ودووم أتخيلي هندوه قالت لي البارحه بتتصل بي من تتطمن على عمير و الحينه أمي تقولي صاكه سوالف ويا مهروره من متى و لا اتصلت بي .
وديمة: تحاتين منو بالتحديد .؟ , هندوه و عمير .؟ لا هندوه و حد ثاني .
شمسه معصبه : ودووم و الله هب وقتج يعني بحاتي راشد شو أبابه .؟!
وديمة بمكر : هااا , ها الدليل إنج تحاتينه , لني ما قلت لج راشد , قلت حد ثاني و ما حددت يمكن يكون خالج التعبان و لا أخوج العود و لا أمج و لا أي حد .
شمسه تفرها بالمخده : إنتي وين تبين توصلين ويايه .؟
وديمة : أنا , وحليلي وين أبى أوصل .؟ قولي إنتي اللي وين تبين توصلين .
شمسه : أوصل وين و لا وين , الله يسامحج يا هندوه جانج من البارحه مخلتني على أعصابي .
وديمة تنش و تيلس حذال شمسه ع الشبريه : شمووس , إنتي تحبين راشد .
شمسه مبرجه عيونها : ليش الكل يسأل ها السؤال .؟ , يعني شو الشي اللي خلاكم تفكرون بها الطريقه .؟ , يعني شو الغلط لو أتصلت به و قلت له يفزع علينا.؟!
وديمة تيرها من إذنها : أسمعيني أنا ما أسألج تحبينه و لا لاء , أنا أقولج إنج تحبينه و لا تقعدين تكابرين و تسوين عمرج لي المستقيمه اللي مالها في الدنيا , ترى البارحه سمعتج و إنتي ترمسينه في الفون , ياخي شوفي أسلوبج وياه ها أولاً و ثانياً ليش مغنيه ع الكل إنج محيره لولد عمج عشان تبعدينهم .؟ إلا لأنج تحبينه , و تكابرين تخافين السنين غيرته عليج أو شي من ها القبيل ..
شمسه : حووو , شو ها الإستنتاجات , حبيبتي , لا تستوين إبليس و تقنعيني بكل ها السوالف , إنتي شكلج من ملجتي أستخفيتي و قمتي تتوهيمن .
وديمه : و الله بلاها الملجه حلوه و تفرح الخاطر و تونس فديت ولد خالي و الله من ملجت و هو يشجعني و لا يوم بيكمل ماستر بيشلني وياه عشان أتخصص في كندا , شو أبى أكثر .؟
شمسه تدزها : الله يهينج ويا ها الـ زايد اللي خاف عقلج , يلا يلا لايستبطيج سيري رمسيه فونج يرن.
وديمه : شمووس لا تمين تتهربين .
شمسه تدزها عشان تنش و تتلحف .
شمسه : برقد لو سمحتي عندج شي سويه برع .
وديمة تعرف شموس يوم تكابر : هيه , بيخلص السمستر و كبر راسج علينا , أوكيك يا شميس بنت صقر .
شمسه متلومة : ودوومي , حياتي و الله سوري بس أنا شويه متلخبطه أوكيه حبيبي ..
وديمة أوونها ما تسمع و ظهرت بترمس ريلها .
في بوظبي , عند مهره اللي تعابل ويا الصغاريه الأشيا اللي يابوها من السوق ويا أمها .
مهره : ها حبيبي , إنتي مني بترقدين لين ما إيي بابا .
حمد : خالوه و أنا وين بلقد .؟ ( برقد) .
مهره تضحك : منيه حبيبي , وياها و لا بتخلي أختلك بلوحها ( بروحها ) .؟
حمد : لا , لا , بابا يقول الريال ما يخلي الحلمه لوحها .
حمده صاحت فجأه و فزعت عليها مهره , مهره بخوف : شو حبيبتي تعورتي ؟
حمده تهز راسها بأن لاء , مهره : عيل ماما بلاج .؟ شي يعورج.؟
حمده ببراءه : أستقت حق باباه وايد , أخاف يخلينا و يسيل (يسير) نفس ما راحت ماماه. .
مهره تحضنها : حبيبتي , لا تخافين الحينه بيتصل و بتكلمينه , هو قالي ما بيخليكم و يوم بتكلمينه إسأليه .
مهره تضحك عليهم و تصد جدا أمها : بلاج ماماتي سرحانه .؟
أم حارب : الله يعطيني العمر و ألاعب عيالج , قولي آمين .
مهره : أكم هاذيل أمايه أستانسي وياهم لين ما إيوون الصدقيين .
أم حارب تنغز مهره : يوم أبوهم بيغدي نسيبي يصير خير .
مهره أتوهقت و في خاطرها : شكلها أمي حاطه شي في بالها و مصدقتنه , ياخي أنا هب شموس و تبى تتهرب من أمها و نظراتها : يتراوالي فوني يرن , بسير أشووفه . و نشت .
أم حارب ضحكت عليها لنها تعرف بناتها زين و تفهمهن عدل و تفكر نفس ما يفكرن و تشوف الواقع بعيون يديدة هب العيون اللي أمها كانت تشوف فيها الدنيا قبل 20 سنه أو أكثر .
مهره سارت حجرتها و صدق كان فونها يرن . .
شافت الرقم . . ( مديري غيث , يتصل بك ) . .
شلت الفون و عطوول جدا حجرة الصغاريه , و فجت الخط و عطته حمد . و هي تقوله : بابا .
حمد أستانس : ألوه , بابا ..
غيث أرتاح من سمع حس عياله , بس كان مستعد نفسياً إنه مهره هي اللي بترد عليه .
غيث : ها باباه , شحالك .؟
حمد بشوق : باباه أنا بخيل ( بخير ) , أستقت ( أشتقت ) لك وايد .
مهره حولت تزقر حمده عشان ترمس أبوها .
مهره : ماما حمده , سيري كلمي باباه فوق .
مهره تربع جدا الدري و أم حارب وراها .
أم حارب : أيه إنتي حمدوه, هيّدي أميه لا تنجبين على ويهج .
مهره تضحك : أمي و هي شدراها بالرمسه .؟
أم حارب تركب وراها : سيري شوفي العشا في المطبخ أحسن لج .
كلمت حمده أبوها و قصت عليه كل شي , لأنها بطبعها تحب تخبره بكل شي و بالتفصيل على عكس حمد اللي يعطي رؤوس أقلام و بس .
و خلاف عطوا الفون أم حارب .
أم حارب : حي بها الصوت , علومك ولديه .؟
غيث : الحمد لله عموه , شحالج , عسى مالعوزوكم الصغاريه .؟
أم حارب : لا فديتهم أم لا يلعوزون و لا يطفرون فديتهم خفاف على القلب .
غيث : الحمد لله أحيدهم شياطين .
أم حارب : لا , لا أبويه , إنته شو شغلك .؟
غيث : الحمد لله عموه , كل شي زين ياغير الغربه كربه , و الوحده شينه .
أم حارب : الغربه كربه ما أخالفك و الوحده شينه يا أبويه , يا غير إنك تستاهل و زوود بعد .
غيث أستغرب : أفا , ليش عاده عموه .؟
أم حارب تعاتبه : و الله إنتوا رياييل اليوم تشيبون الواحد , عيزت و أنا أقول حق عيالي و حق ولد حميي أتيوز , خلنا نتنقى لك بنت الحلال بتوقف وياك و بتساعدك و ما أسمع غير تو الناس , هب الحينه , و لا ماشي بنت تناسبني .
غيث حس إنه الرمسه طالعه من قلبها , و إن أول مره حد يقوله ها الكلام بعد أبوه و خليفه ربيعه و تكون الرمسه من قلبه .
أم حارب : تبى نصيحة عيوز شايفه الدنيا و خابرتنها.؟
غيث : أتحفيني عموه , و خبريني .
أم حارب بحنان : يا أبويه الفشل أول وديه هب نهاية الدنيا , ترى الدنيا تدور و تمشي و عيالك أكم يكبرون و يبون حرمه تحبهم و تداريهم و تربيهم , لا الحرمه روحها تروم تربي و لا الريال روحه , الريال و الحرمه يكملون بعضهم , أستهد بالله و أتعوذ من إبليس و من ترد عزم و عرس , باجر الزمن يلف عليك و بتضيج و تبى اللي توقف وياك و تربي عيالك و تيب لهم خوان , و إنته بريحاتك ما تروم ع الزمن .
و تمت ترمسه و تنصحه , في لحظه تم غيث يقولها أسبابه و ليش ما يبى يعرس و رمسها جنها أمه و بطوا وهم يرمسون .
ركبت مهره فوق عقب ما أستبطت أمها .
مهره تتحرطم في خاطرها : ها كله أمي ترمسه , لا ما ظنتيه لبدها سارت تصلي العشا .
و فجت الباب و توها أمها مسكره التيلفون .
مهره تشهق :أمي , توج مسكره عن غيث.!
أم حارب ناشه و تناول مهره الفون : هيه فديته , يلسنا نسولف عندج مانع.؟
مهره تشل الفون : لا , لا خذي راحتج بس العشا زهب .
في مكان ثاني و جد غيث .
خليفه : حشى ما بغيت تصك قبضت التيلفون قبضه رمست حرمتيه و عيالي و أمايه و أبويه و أختي و لا أتريتك .!
غيث يتنسد على الغنفه و يسترخي : و الله ها العيوز فنانه ذربه و رمستها ترد الروح , شكلي بسويلي موعد كل يوم برمسها .
خليفه يحط كوب الكوفي جدامه : هي و لا بنتها .؟
غيث يبتسم له : هي بروحها .
خليفه : و شو قالت لك خلتك تبسط و تستانس و تقص عليها كل شي .؟
غيث ما أدري : طيبة قلبها , كيف تلكمني و كيف تنصحني و كل شي .
خليفه : مشكله اللي فاقد حنان , من رمس عيوز مره عشقها.!
غيث يضربه : حوو , شو قالولك , راضع التيلفوون بالساعات .؟
خليفه فهم قصده : و الله حرميته و كيفي وياها , شعليك منا.؟
غيث راح باله بعيد . .
خليفه : بو حمد , شو رايك أقترح عليك إقتراح .؟
غيث : قوول يا أبو الإقتراحات , مع أني ما أشوف ورى إقتراحاتك إلا العثره .!
خليفه : شو رايك تاخذ هاي البنيه مهره .؟ , دام تقول عيالك مستلطفينها و يقولون إنها طيبه وياهم .؟
غيث برج عيونه : لا , لا , مهره , لا ما تنفع لي .
خليفه : و ليش يعني .؟ بلاها هب حاضنه عيالك.؟
غيث يتذكر لسانها و كيف تهازب : ملسونه , أقوولك قويه و القوي الله محد يروم لها إلا ربها .
خليفه : إنته متمنكر , يوم نقولك فلانه تقولي والله ترمس مع اللي رايح و اللي راد و لا فلانه تقول والله هب حشيم فيها و فيها و يوم قلنا مهره قلت و الله ملسونه , و يوم نقول بندور لك تقول بعدين.!
غيث : بنش أشوف شي آكله يوعان .
خليفه يضحك : يووم أقوولك متمنكر و ما إيوز لك الحق ما تصدقني . و زخه : ها المره بتناقش و أقنعني و بقنعك .
غيث : خلووف , فجني .
خليفه : ما بفجك و لا بتشرد مني و بتم أحن عليك .
غيث يعرف خليفه زين : أنزين يلا أقنعني .
خليفه : إنته ما تقول إنك مليت من البشكاره من كثر ما تحاضي عيالك , ما تقول أمك في دنياها و لا تدري بشي و أبوك ما يفاتحك في مواضيع مثل هاي , و خواتك كل وحده لاهيه مع عيالها و محد بيشل هم عيالك.؟ و أخوانك كلهم أكبر منك .؟ , و إنته ضايع في الطوشه , و الأهم عنود ما تدري عن عيالها و من أطلقتوا ما نشدت عنهم , فليش ما تعرس .؟ و شو السبب اللي يمنعك ؟ , يا إنك تحب عنود و ما تبى غيرها , يا إن عايبتنك حياتك و إنته جي بروحك و مستقطع لا أنيس و لا ونيس.!
غيث أصلاً ما كان عنده ولا سبب يبرر فيه بس كان مقتنع إنه لازم يعرس : أول شي , عنود أنا ما كنت أحبها ولا في حبيبتها , كان زواجنا تقليدي و إنتهى يوم هي خانت بيتها و ريلها و عيالها وهي الحين معرسه , و ثانياً مالقيت اللي تناسبني .
خليفه : ها العذر أعرفه , هات غيره .
غيث : تبى الصراحه .
خليفه : و لا شي غيرها .
غيث : هب مستعد , أحس عمري لين الحين ما أثق في ولا وحده .
خليفه : قوول جيه من البدايه , هب تسوي لنا سالفه و تلف و تدور , بعطيك الحل , جرب تثق في حد و أعرف أصابع الإيد هب وحده , و بعدين عليا أختك تحب عيالك و تحن عليهم كنت تقدر توديهم عندها و لا عند حرمتيه , ليش وافقت توديهم عند حرمه غريبه لا تعرفها زين و لا هي تعرفك زين .؟ , إلا لأنك تثق فيها فلا تيلس تلف و تدور علي , قوول ما أبى أعرس و خلاص .! , بعدين بعده قلبك بعده ما رقع , خلاف يوم قلبك بيرقع و بتتخشع ما بتقول شي .!
خليفه سكر على غيث من كل الجهات و خله غيث نفسه يستغرب هو ليش جيه يتصرف .! و مالقى غير يغير إنه يظهر للبلكون و يتيمد في البرد و يفكر في كل شي قاله خليفه و قالته أم حارب. ..
.
. . ( . . مجموعة مشاعر . . ) . .! *
(. . الجزء الخامس . .)
الساعه 6 بتوقيت غرينتش , الشمس بعدها ما طلت . .
راشد : ها هند زاهبه .؟
هند : هيه , هيه هاذيه الشنطه جدمتها عشان أنزلها تحت .
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك