رواية مجموعة مشاعر -5
. . ( . . مجموعة مشاعر . . ) . .! *
(. . الجزء الخامس . .)
الساعه 6 بتوقيت غرينتش , الشمس بعدها ما طلت . .
راشد : ها هند زاهبه .؟
هند : هيه , هيه هاذيه الشنطه جدمتها عشان أنزلها تحت .
راشد : لا يوقف قلب أمج بس يوم تشوفج .
هند تبتسم : لا فديتها أكيد بتستانس , إنتوا بس إنتوا لا تبطون أسبووع من دون تأخير .
راشد يفج باب الشقه و يدز الشنطه. : لا , لا أصلاً أخوج ما بيصبر بيبني قبل التيم بكم يوم .
هند ضحكت : يلا عيل بنسير و بنعرف الفاجأة اللي يقولون عنها .
راشد يبتسم : مفاجأة عوده , هب بس لكم , لنا كلنا .
هند : منو بيعرس .؟
راشد يضحك و يظهر من الباب . ثواني و هم تحت في صالة البنايه .
فيصل يبتسم : يلا يا عرب متحرقص أبى أرجع .
راشد يفر عليه سويج السياره : يود , تحطتها في عينك لين ما أرجع , هاي بنتي اللي ما يبتها و الله توها يديده بقراطيسها .
فيصل يلقف السويج : يا البخيل , بدال ما تقولي أخويه الصغير فداك السياره .!
هند : كل يديد حبه شديد .
راشد : هيه والله , كارف عشانها و مرابع عشان أشتريها , لا تسرع فيها و تصف علي نقط سووده و خلها تحر من كم شهر ما أشتغلت .
فيصل يأشر بإيده : و الله فهمت , يلا بنت عمي أترياج خاري , بتطير الطياره و توصيات أخوي ما خلصت .
و يسلم على راشد و يروح .
هند تصد جدا راشد : ها المره خلني أقولك شي .
راشد : آمري .
هند : صدق بتم شاله لك ها اليمايل ع راسي لين ما أموت . و محد بيظهر من يميلك .
راشد: تبين تردين لي ها اليمايل على قولتج.؟
هند تهز راسها : يا ريت .
راشد : عدلي الأوضاع بيني و بين شمسه و قولولها الصدق .
هند : يعني تحبها ؟
راشد يبتسم : أقولج , أخويه يتريا خاري , ترى برد و الله الله على عماركم .
هند ضكت و فهمت راشد ما بيرد عليها , لكنه يحبها , و لا ليش كل ها التصرفات.!.
في هذا اليوم بالتحديد كملت هند بالضبط 3 شهور قاصرين يومين من ييتها ألمانيا , و 3 شهور بالضبط من سافرت من بوظبي , في أشيا وايد أتغيرت في بوظبي و تطورات وايد صارت و هي ما تدري عنها , و الأهم من هذا كله عمير بدا يتحسن و خلاص إلا كم يوم و بيرد لحياته الطبيعيه .
كانت الساعه في بوظبي 10 الصبح و مهره و شمسه في دبي مول و بالتحديد في " كدزانيا" , و طبعاً هن موديات حمد و حمده اللي صاروا جزء من ها البيت الصغير .
تموا يلعبون و ربشه .
شمسه : الله ليتني ياهل , شوفي شقا المكان غاوي .
مهره : فديتهم , أنا بس أشوفهم مستانسين جني أنا لعبت و سويت كل شي .
شمسه تدقق في ملامح مهره : مهروه , من البدايه قلت لج لا تتعلقينهم , هاذيل بيردون عند أبوهم , تراني أشوف نظرات الحب في عيونج .
مهره تصد عليها : شماسي , شو فايده ها الكلام اللي يسم القلب الحين .؟
شمسه ما حبت تخرب فرحة أختها أكثر . و سكتت و تمت تراقبها و هي وياهم .
طبعاً الحبايب بطوا و هم يلعبون , خلاف ظهروا بيتغدون .
شمسه : لا حوول , أنش لها ها الحرمه .؟ ما تشووف غيرنا , من الصبح و هي تطالعنا , عندها عيال خلها تجابلهم .
مهره : إنتي شلج .؟ خليها تشوف لين ما تشبع شعلينا منها .!
نشت مهره و وياها الصغاريه و هم ظاهرين في الباركنات .
يت الحرمه جدا مهره : لو سمحتي أختي , ممكن أكلمج ثواني .؟
مهره مستغربه : آمري أختي .؟
الحرمه : على إنفراد أختي .
مهره تناول شمسه السويج : أسبقيني السياره , لا يحرون الصغاريه .
شمسه مغطت البوز و شلت الصغاريه و أتجدمت .
و هي تتحرطم : و الله أحس شي تحت راسها ها الحرمه , جييه أفادي هب مرتاح إلها .
الحرمه : أنتي حرمة غيث صح .؟
مهره منصدمه : نعم .؟
الحرمه : أدري إنج حرمة غيث لا تخيلين و لا تستغربين من سؤالي , أنا عنود ,طليقته .
مهره جنه حد جب عليها ماي بارد : آمري ختيه شو بغيتي ؟
عنود : لا و لا شي بس شفتج ويا الصغار كذا مره في كذا مكان و هم يزقرونج ماماه , ماماه شفت الإهتمام في عيونج و هم كيف يحبونج .
مهره : انزين .
عنود ضحكت و الدمعه في عينها : أنا غيث من زمان خبرني إنه هو عرس و كنت مستانسه له وايد و اللي سويته في حقه هب شويه , أنا ندمانه على كل شي سويته في حقه و حق عيالي لكني أحاول أعوضه في اللي عندي الحين , غيث إنسان طيب و وفي و لو حب يحب من قلبه و وفي و حنون لأبعد الحدود , دخيلج لا تضيعينه , و حمد و حمده أمانه عندج أمانه , و لو يوم طلبتج إني أشوفهم دخيلج لا تحرميني و قوليلهم أمكم تحبكم بس الظروف و الطيش حرمها منكم .
و راحت الحرمه عنها , مهره تبى تصرخ : لحظه , إتريي , أنا هب حرمته بس الحرمه راحت قبل لا تتنطق , سحبت عمرها للسياره .
مهره : شموس , سوقي عني , ما أروم .
شمسه تنزل : بلاج مهاري .؟ شو قالت لج الحرمه .؟
مهره : في البيت يصير خير .
طول الدرب مهره عينها خاري و سرحانه ما تدري شو تقول و لا شو تسوي .
نزلت مهره و دخلت ويا الصغاريه اللي تموا يقصون ع أم حارب شو صار ما صار و مهره راحت تبدل فوق .
دخلت شمسه وراها و طوالي سارت تشوفها .
شمسه : حووو بلاج فجأة جييه أتغيرتي .
مهره تفر عمرها ع الشبريه : تدرين منو ها الحرمه.؟
شمسه : و منو تكون.؟
مهره : حرمة غيث أو بالأحرى طليقته .
شمسه : أنزيين و خير شو تبى .؟
مهره بضعف خبرتها السالفه .
شمسه : لا بركتن في عدوينها .
مهره : حرام , شو ذنبهم ها الصغاريه .؟ , باجر بيرجع غيث و بيشلهم و بعدين .؟ بيتمون جيه حرام و الله حرام يدفعون غلطة أمهم و ...
شمسه : تهرب أبوهم من مسؤوليتهم .!
مهره : حرام , هو هب متهرب منهم .
شمسه : مهروره , شو هب متهرب , عيال مربتنهم خدامه .! و تبين تقولين لي ما يتهرب .!.
مهره ما تبى تناقشها في الموضوع : حرام , أحسهم أتعلقوا أمي , كيف بيصبرون عنها.؟!
شمسه : أصلاً هم أتعلقوج إنتي أكثر , ما ظنتي غيث بيشلهم بها السهوله عنج .
مهره : ما أدري , ما أدري , خليني أرقد أحسن .
شمسه نزلت عندها أمها و يلست تسولف وياها .
في حدود الساعه 3 الظهر كان البيت صخه و الكل راقد و مندس في حجرته .
هند : أقرب بن عمي ما إيوز جيه .
فيصل : لا , لا ورايه خط لين العين ما فيني إن حولت ما برد أركب السياره فديتها أمج سوالفها ما تنمل .
هند بخبث : علينا , علينا , و لا ولهان على بعض الناس و ما تبى تفوت يوم عرفت إنهم عندكم .؟
فيصل : يومج تدرين , فارجي الله يخليج , خليني أوصل قبل لا تسير .
هند : زين , زين بتشووف تراني أرد الصاع صاعين .
فيصل ينزل شنطة هند : بلا , راويني شطارتج .
هند : أنزين , بتشووف بيني و بينك الأيام .
و سحبت شنطتها بهدوء و دخلت من باب الحوي , كان الحوي كبير لدرجة إنه يخلي هند تتذكر كل شي من يوم ما أتحولوا ها البيت و هي في الإعدادي لين اليوم اللي سافرت فيه عشان موضوع عمير . دخلت البيت بهدوء و ركبت صوب حجرتها شغلت الكنديشن و ظهرت , سمعت صوت مهره تغني في حجرتها " ليت جنح الليل يحملك أساي , نوح قلبي منك ليتك تسمعه " .
فجت هند الباب : الله الله بيعتزل ميحد .
مهره شهقت خلاف بغمت بأعلى صوتها : هندوووووووووه , متى ييتي يا الدبه .؟
و نشت تحضنها و الدموع أربع أربع يت أم حارب و شمسه عقب ما سمعوا البغيم .
أم حارب : شو بلاج تباغمين .؟
هند تظهر من ورى الباب : وجودي ما يرزى البغيم .؟
أم حارب زين ما وقف قلبها , و شمسه ما تدري شو تقول .!
هند : مفاجأة صح.؟ و تحب أمها و تلوي عليها : أشتقت لج عيوووزي الغالية .
أم حارب بين دمعه و فرحه : فديتج , و فديت ريحتج .
شمسه : جني إلا بنت البطه السوده.!
هند تقرص خدها : شمووستي فديييتج مشتاقتلج .
بعد حفلة الإستقبال .
هند : أول شي أنا يووعانه و ثانيا أحس عمري وايد وصخه , بسير أتسبح .
أم حارب : سيري فديتج و بنحط لج الغدا لا تحاتين .
في مكان ثاني بعيد "خالص " .!
غيث : إنتي شو تقولين.! , عنود إنتي صاحية و لا فيج شي .!
عنود : غيث , بلاك .! أنا ما قلت شي قلت لك شفت حرمتك ويا عيالنا , شفتها و كلمتها .
غيث مستغرب : و إنتي شو ذكرج بهم , تعرفينهم أصلاً .!
عنود بحزن: و في أم تنسى عيالها .؟ , غيث أنا أشوفهم بس إنته ما تدري .
غيث : شوو .!
عنود حست إنها لازم تقول الصدق : يوم توديهم عند عليا , أحياناً تتصل فيني و تقولي و أشوفهم , و هاي هب المرة الأولى اللي أشوفهم ويا حرمتك , ( صخت ثواني ),ماشاء الله عليها حلوة الله يهنيك , شفت في عيونها حب و خوف على الصغاريه , تدري مره كانت وحده من أهلها تغيض حمدوه و سارت تربع جدا حرمتك و هي لمتها في حضنها و تقولها : ما عليج , هاي شريرة , نحن بنخبر عليها باباه بنخليه يضربها . . و تمت عنود تقص عليه و تقص عليه .
غيث حس إنه أكتفى من اللي تقوله : و المطلوب الحينه .!
عنود : ماشي , حافظ عليها , لنها أكيد تحبك و من جيه تحب عيالك و تراعيهم , غيث من قلبي أقولك الله يوفقك و يهنيك . . مع السلامه .
و سكرت الخط على طول , و غيث في حاله أكيد محد بيحسده عليها .
خليفه : بلاك صديقي .؟ , شو قالت لك الحرمه .؟
غيث : لا , لا ولا شي مهم .
و لف ظهره عن خليفه .
خليفه : أنزين , برايك بس قولي شو صار على المربية عيالك .؟
غيث : أمي توها راده من السفر و تقول بتشوفها في ها اليومين بس ما ظنتيه تتفيج لها , لنه ريل عليوه مسافر و هي توها مربيه.
خليفه : و هي ما سألت وين عيالك .؟
غيث : لا , قالت لي سلم عليهم لنها تتحسبني معرس مثل ما قلت لها آخر مره .
خليفه : آها عشان جيه ما أشوف حد قال شي .! , إلا بتخبرك , شو بتقول للبنيه اللي أستلمتها حرمتك.؟
غيث : يعني سمعت .!
خليفه : إنته اللي حاط ع السبيكر .!
غيث : ما أدري و لا تسألني دخيلك . و نش عنه .
على الجهة الثانيه .
هند خلصت سبوع و أتلبست و سارت جدا حجرة مهره .
مهره : أسفرت و أنورت .
هند تتبسم و تيلس بين مهره و شمسه .
شمسه : حشى نشي , متنتي مايشلج المكان .!
هند : و الله هب مني جان متنت من راشد , اللي داخل ياكل و ظاهر ياكل .!
مهره :راشد , وحليله , علوومه..؟؟
هند : زين , زين .
شمسه : إنتي منو يابج جيه عفدتي علينا فجأه.!
هند : الله يسلمج هب ويا راشد لا تخافين , فيصل كان راد لنه عنده إجازة فرديت وياه و راشد و عمير يتبعوني عقب كم يوم .
شمسه : آها , بسير أشوف أمي .
هند : بلاها .؟
مهره تضحك بخبث : من يوم سالفة اللي عطته ورده و هي ما تترامس .
هند تضحك : كلتها .!
مهره : إلا ما بتاكلها .!
هند تتقرب : أقوولج , أشوف في عين برقة فرح ما قد ريتها عقب ما أتوفى أبوي , شو صاير .؟
مهره : أول الأسبوع اللي طاف يا طويلة العمر يانا ضيف غير متوقع , قولي منو .؟
هند : منوو .؟
مهره : عمي غانم .
هند برجت عيونها : عمي غانم .!
مهره : هيه , سلم علينا و تم يتعذر لنا و جيه و عطا أمي ظرف عود و قالها فيه كل شي و إن حصة أبوي أتسجلت بأسم الورثه , يعني كل شي رد إلنا , شو بيرد , إلا رد , جيكي ع حسابج و شوفي كم فيه .!.
هند بعدها هب مستوعبه : إنتي صاحيه و لا تخربطين علي .؟
مهره : شو أخربط عليج .؟ , أقولج قالنا إنه هو ما أترقع من يوم ما خذ البيزات و طاح كم وديه و دار البلادين كلها و لا لقى لعوقه دوى .
هند : و أخيراً بتقر عين أمي .
مهره : و لا أزيدج من الشعر بيت , حروب آخر ها الشهر بيرد البلاد و بييلس .
هند مستانسه : حلفي .؟
مهره : والله و بعد من يوم ما طلع عمي يتنا عموه عفرا و بناتها , يعني ردت المياه لمجاريها , و لا بعد من تدخل عينها ع شموس و تطالعها و تصاصر أمي و إمايه تقولها خير , خير الله يرده بالسلامه و فاله طيب .
هند : يعني هي ميشنت ع شموس .؟
مهره تقوم : هيه , هيه , قووومي , خلينا نسير تحت .
نشت هند و هي هب مصدقه اللي يصير جدامها , كل شي بدا يصير حلو و يرد مثل ما كان قبل .
طبعاً من يلست و هي تتكلم شو صار ما صار و ما خلت شي ما رمست عنه و طبعاً الكل يسمع .
أم حارب : أميه شمسه , قومي وصليني بسير عند أم سيف .
هند : أنا بوديج أمايه .
شمسه : جنهم إلا قالوا لي أنا .؟
مهره أستغربت : خليها تسير , إنتي شو عايلنج.!
هند : يا الطمه , كلنا بنسير أنا صراحه في خاطريه أظهر و أتحوط في بوظبي , ولهت ع السكان و الريس.!
مهره : لا , لا و سيروا إنتوا أنا بيلس ويا الصغاريه هنيه ما فيني .
أم حارب : أبويه برايكن أنا بلبس و أبى أشوف السياره جدامي .
مهره : يلا , يلا نشن .
و نشن هند و شمسه يتلبسن و ظهرن ويا أمهم . نزلوها بيت أم سيف و هم راحوا يهيتون .
شمسه : وين بنسير .؟
هند : وين ما تودينا سيارتنا .
شمسه : أنزين , خلينا نسير المارينا .
هند : اليوم الجمعه و الحينه الساعه جريبه السبع , أتخبلتي و لا شووه .؟ , العنصر المواطن خاب خبه هناك , المول كله كنادير بيض , مافينا .
شمسه : يا الخبله , بسير آخذ شي حق مهروه .
هند : و ليش.؟
شمسه : باجر عيد ميلادها يا الطمطمه .!
هند : شووه , صدقج والله , نسييت و راح عن بالي , بس شو ناخذ لها .؟
شمسه : ما أدري , أنا توني سرت فوق عندي أمي و عطتني بيزات عاد ما عديتهن و عطتني الفيزا و قالت لي خذولها اللي تبونه , و خلي هند تاخذ اللي تباه .
هند : ردينا للصرف و العز السابق , ردينا لأيام البزا .! .
شمسه تضحك : بس خلاص أتعودت على الإقتصاد , و ما فيني أرد بزيه شرا قبل .!
في البيت عند مهره , يالسه تلاعب الصغاريه و مرتبشه فيهم و هي تفكر شو بيكون البيت بعد حسهم .
في المول , هند و شمسه يالسات يتنقن و أتشرن لين ما قالن بس , خلاف نزلن الأشيا عند محل تغليف الهدايا عشان تكمل الساربرايس حق مهره .
شمسه : هندوه , تدرين , أنا اليوم لو محد زخني بقوم أكفخه .!
هند : منووه .؟
شمسه بغياض : هذا اللي هني , واقف لنا عظم في البلعوم في كل محل أنشوفه .
هند : قلت لج , ما طعتي شوري , خليه يولي الحينه ظاهرين .
و هم في الباركنات و يحطون القشار في الدبه.
شمسه : هندوه بلاج تشوفين ها السياره .؟ عيبتج .؟
هند و هي تبتسم : ها , لا بس أتذكرت شي .
شمسه تسكر الدبه : أشك والله .
هند خاطفه جدا الباب بتركب شافت ريال يطالعها و هو واقف .
شمسه تشوف و بنظرات ناريه و لفت الصوب الثاني بتركب , و هند شافت بنظره إني بمر .
الريال : آوه السموحه ختيه , أتفضلي و رد على ورى عشان هند تركب .
ركبت هند .
شمسه : بلاه .؟
هند و هي تشغل السياره : ماشي واحد سخيف تقول أو وديه في حياته يشوف بنت ويالس يطالع .
شمسه تضحك : ردينا ع طير يلي , إنتي و مهروه ما تيوزون من طولة اللسان .!
هند تحرك سيارتها و تفج الجامه : ما أدري منو اللي كانت بتكفخ الريال .!
شمسه أتجاهلت هند و اتصلت لمهره تقولها بيبون عشا وياهم .
شمسه : أقوولج , مهروه تقولج بتطلب من هاك المطعم شو أسمه .. أبو شقره , هيه صح هو , تقول متوله ع أكله .!
هند : شوو , حق الدوااعيس هناك .! و الله لو حد شحف سيارتي بدفعكم جيمة الصبغ و السيرفس.!
شمسه تشغل المسجل و تطول : ما أسمع ..
هند تتحرطم و شمسه ولا ع بالها , لا هم و لا يحزنون . .
وصلت هند المطعم , و أكيد ما بتحصل باركن , وقفت ورى نفس السياره اللي شافتها في باركنات المول .
شمسه : أووه ,شو ها السبعه ورانا , ورانا . .
هند تنتبه ع السياره : تدرين هاي سيارة منو ..؟؟
شمسه : منوو , لا تقولين ...!
هند : لا بقوول , سيف , مديري .
شمسه : سييف , ها النحس ما غيره .!
هند : ليش في غيره .!
شمسه : أفف منه , أنا من يوم نحن صغار ما كنت أدانيه ولا ينزلي من زور .!
هند : و الله أنا ما أحيده , كلكم ترمسون عنه بس ما أحيد أبداً . .
شمسه و هي تضغط ع الهرن : ما شكله ما بيي . .!
هند : أكووه و وحليله ياج يربع . .
شمسه و هي تفج الجامه : لو سمحت حطه في الدبه . .
و تناوله البيزات . .
الريال : شووكراً , من زوئك والله . .
شمسه : شكراً , بس لو سمحت ممكن تقول للي جدامنا يخوزون عشان نحن نروح .
الريال : من عينيا . .
هند تضحك : شو شكلج دسمتي شواربه .!
شمسه : ما عليه , إلا عشر ربيات , ما إييبن حتى كرت تيلفون .
هند تدق هرن , بس الأخ شكله هب ناوي يتجدم لنه أصلاً اللي جدامهم محد في السياره .!
شمسه ترد ع الفون : هلا الغالية , لا لا الحينه يايين دقايق هب باطين . .
هند : حلوه الوهقه ويا أمي الحينه .!
شمسه : هندووه , شوفي أكوه شي سيد أدخلي فيه و أظهري . .
هند : ضيج , ما أروم . !
شمسه تبى تستفزها : قولي إلا زايغه .!
هند : تدرين , بجازف بس والله لو أنشحفت و لا شي ع هواج .!
شمسه : أوكيه .
هند تفج الدرايش لنه مخفيها قوي و ما بتشوف , ما خلت معوذة ما خلت آيه ما قرتها .
و خطفت , شوي شوي و هي خايفه . .
بس وقفت عند سيارة سيف لنه في واحد كان ظاهر من الباركن اللي جدام .
هند : أووه , وهقه .
شمسه : هندوه , أحس إنج شحفتيه .!
هند و سيف صدوا في نفس اللحظه , عين بعين بعد آخر مره من 3 شهور .!
كل واحد فيهم شل عيونه على طول و صد الجهة الثانيه .
طلع اللي جدام و هند راحت .
ذياب : سواف , سواف .
سيف : هااا ..
ذياب : وين رحت .؟!
سيف : وين رحت و أنا يالس وياك.؟
ذياب : لا , لا , أطري من شفت هاذيج راعية المرسدس العنابي شو أستوابك.؟
سيف : يتراوالك . . و هو يظهر للشارع العام .
ذياب بغم وديه وحده : أتحمل , شي سياره يايه . .
سيف دح بريك وديه وحده . .
ذياب : و تقوولي ماشي , كنت بتنفدني و أنا توني مالج .! , شعندك وياها .؟
سيف ما رد . .
ذياب : سواف , ما أحيدك راعي سوالف بطاليه . شو حدا ما بدا.!
سيف يصد جداه : و لين الحينه هب راعي سوالف بطاليه , عندي خوات أنا و أخاف عليهن ..
ذياب يتذكر : ليكووون هاي سكرتيرتك اللي حبيتها .!
سيف دح بريك مره وحده : شووو , سكرتيرتي اللي حبيتها .!
ذياب : حبيبي , رووح رووح الشارع هب بأسمك , خضيت جبدي كل ساعه و دحيت بريك .!
سيف : شو ها الإستنتاجات , قالوا دارس كمستري , ما قالوا طلع إستنتاجات من مخك .!
ذياب : الحينه أنا مخاونك من متى .! بتي تعلمني فيك .؟ , دخيلك لا تكابر . .
سيف : لا بالله كلكم فيكم شي , شو أكابر ما أكابر , أسير الدوام تيلس لي أم مروان : إيمتا ترجع هند , أشتقت لهند , أرد البيت أختي حصوه من ردت الشهر اللي طاف و كل ما أرمسها : فديت هندوه , هندوه و هندوه , و أمي نفس الشي و الحينه إنته .!
ذياب : خلني أقولك ليش كلنا أستنتجنا ها الشي , أول شي بالنسبه لي , يوم كانت هاذي موجوده كنت متغير شويه و مرخي حبالك , تمزح أكثر عن قبل و مبسط و مستنانس أكثر و أشتغلت أكثر عن قبل و الباركن اللي خبرتني عنه أم مروان و الإبتسامات اللي توزعها كل صبح , حتى هزبتك لها و شغلة المغايض اللي دووم تغيضها , و يوم هزبتها و هي سافرت شفت عمرك شقا غديت .! و بالزور بديت ترد لطبيعتك شوي شوي و لا رديت بعدك , صرت نفس قبل و ألعن بعد .! , و يوم وقعت على تعيين حمدان مكانها كنت من ورى خاطرك موقع و الود ودك محد يلس ع هاك الكرسي إلا هي .! , و الحين من شفتها تقول جنه عمي و برج .! , سواف حبيبي كل شي مبين في عيونك .
سيف طول ع المسجل . يعني لا أبى أرد و لا أبى أسمع . .
ع العشا . .
نشت أم حارب أول بادي حتنها ما تروم تسهر . .
شمسه : و أخيراً شفته ها السيف , اللي يشوف ويهه ما يقول جيه غلس .!
مهره : وين شفتوه .؟
شمسه تقص السالفه , و هند نشت . .
هند : تعبانه , بسير أرقد و ع طول راحت .
شمسه : شكلها بعدها حاطه في خاطرها .
مهره : هب شاله في خاطره قد ماهي حاسه إنها إنهانت و كرامتها إنجرحت .
شمسه : هزرج حبته .!
مهره تفلعها بالخفيف بالخاشوقه : لا , وين تبين شو هندوه هب مال هالسوالف , و لا كل من يرى الناس بعين طبعه.!
شمسه : مهرووه , عن الحركات , شو عين طبعي ما عين طبعي !
مهره : أقوولج , هندوه بعدها ما تعرف صح .؟
شمسه : باجر و لا بعده بتعرف . . , صدقيني ها الشهر توه بادي .
مهره : أقوولج , باجر إنتي بتودين أمي موعدها.؟
شمسه :هيه , و إنتي بتسيرين تودين الصغاريه تقفضين أشيائهم و تاخذين لهم شنط و جيه.؟
مهره بحزن : هيه , خطفن الأيام , ماتم شي عن ييت غيث .
و نشت تداري دمعه ضاعت في نص عينها . .
لمت شمسه الأشيا و راحت تنام بعد . .
.
. . ( . . مجموعة مشاعر . . ) . .! *
(. . الجزء السادس . .)
نشت هند على صوت البشكاره و هي تدق عليها الباب .
هند : ها سوما , شو صاير .؟
سوما : ما يعرف , هادا ريال برع يقول يبغي ماماه و محد داخل البيت كلوش روح .
هند : أنزين ما قال منو هو و لا شو يبى.؟
سوما : لا هو يجي كل مره عند ماما بس الحينه أنا ما يدري شو يسوي .!
هند : أنزين خليه يصبر الحين بظهر له .
غسلت ويها و لبست عباتها لنها بالبجامه و شلت شيلة الصلاة و طلعت .
هند و هي تمشي في الحوي : أفف من توني ناشه و أمشي ها الحوي كله .!
و من وصلت عند الباب قالت حق سوما : أظهري له و قوليله شو يبى و عقب قوليله ماما محد خله إيي بعدين .
و ردت ريوس , شويه إلا سوما دخلت .
سوما : أنا قول ماما محد ماما هند فيه , هو يقول مافي مشكل في كلم إنته .
شويه إلا شافت الريال واقف جدام الباب بس من داخل . .
هند تقول حد جب عليها ماي بارد ما تدري شو تسوي .!
سوما راحت بهدوء اعصاب , ما تدري بالموقف اللي حطت هند مع الريال اللي واقف اللي يكون "سيف".!
هند أتقربت : نعم , أمر أخويه .
سيف : لا , ماشي بس ممكن تعطين هذا الوالده و تسلمين عليها .؟ , قوليلها كنت بس بسلم عليها قبل لا أسافر .
و ناولها ظرف .
هند : يوصل .
و لف بيظهر . و خلاف رد صد جدا هند وديه ثانيه . .
سيف : هند شحالج .؟
هند : زينه الحمد لله ..
و قبل لا ينطق بشي .
هند : لو سمحت ممكن تروح , لني في البيت روحي , هب حلوه وقفتك في نص الحوي.!
سيف : أفهم إنج تروغيني .!
هند رفعت راسها و بنظره ناريه شافته .
سيف : أوكيه , أوكيه , أنا مروح في كل الأحوال بس ممكن أقول شي .؟
هند و تفج الباب أكثر بمعنى أطلع برع . : بسرعه لو سمحت .
سيف : هند , أنا آسف , صدق أنا متلوم فيج من هاك اليوم ( و تم يعتذر و يتأسف لها ).
هند تمت مستغربه و تمتم في خاطرها : سيف يعتذر لي .! من وين طالعه الشمس يا ناس.! , أكيد شي صاير , بس ما أنكرت إنه الموضوع عيبها .!
سيف راح بعد ما عطاها أسطوانة أعتذارات أرتاح بعدها و حس إنه خلاص ضميره ما بيأنبه عقب , و في نفس الوقت يسأل نفسه سؤال : أنا في حياتي ما أثرت فيني بنت و لا أعتذرت لوحده في حياتي , هاي البنت شو سوت فيني .؟؟!
سكرت هند الباب و دخلت البيت و فجت الظرف . .
شافت بيزات في الظرف , أستغربت من السالفه هاي و من كلمة سوما : كل مره يجي .!
ثواني إلا سوما يايبه لها الريوق و مهره داخله و الصغاريه يترابعون وراها . .
مهره تزقر هند بس هند هب في الدنيا . .
مهره تهزها : حووه أكلمج أنا ..
هند : ها , متى يتي .؟
مهره تسحب الظرف من إيد هند : توني شفت سيف عند اللفه قلت أكيد كان عندنا , متى يانا سيف.؟
هند : توه من ثواني .
مهره :ظهرتيله .؟
هند : هيه , وعتني سوما و خلاف ( تقوول السالفه ).
مهره تيلس حذالها : تعرفين هندوه , من أول يوم سافرتي فيه سيف يانا الظهر و قعد عند أمي خلاف راح , و ثاني يوم ع طول رد و يايب ها الظرف و فيه معاشج , و زود ع ما يقول بدل الوقت اللي كنتي تشتغلين فيه و تم يسوي جيه كل شهر إييب الظرف و فيه معاشج و دوم يتصل بأمي يسألها لو محتايه شي أو تبى شي .
هند هب مستوعبه كل ها الأشيا : ممكن أفهم , ليش يسوي جيه .!
مهره تلعب بطرف شيلتها : متلوم , أكيد متلوم و سيف إنسان طيب بس الدنيا قست عليه شويه من جيه غدا عصبي و ما يتقارب .
هند تطالعها بإستغراب..
يتبع ,,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك